رواية أرهقني الفجور الفصل العشرون 20 بقلم نوسه حمد
خبر حمل صفيه نزل علي زي الصاقعه واتاثرت ليها شديد كان غرضها تمنع الفساد الحاصل بس وقعت فيهو غصبا عنها جيت راجعه الاولاد قالو لي اها ان شاء الله الفحوصات نظيفه قلت ليهم شكلها ملاريا وبديت اتصنع ابتسامه وبي وراها الف وجع بس صفيه بتعرفني كويس قالت لي نوسه فشنو قلت ليها مافي شي وبقيت اضحك قلت ليها انتي ما بتعايني لنفسك ملاريتك عاليه لمن وقعتك حسيتا اطمنت من جواي ما مرتاحه عشان كذبت عليها وطلعنا وديناها البيت وطول الطريق هي تستفرغ دخلت معاها البيت قلت لي امها صفيه وقعت شكلها عندها ملاريا اديها الادويه دي وخليها تاخد راحتها ما تجي المدرسه صفيه قالت لي نوسه تعالي لي كل يوم قلت ليها ان شالله ويارب تطلعني من بيتهم اول ما عتبت عتبه بابهم فكيتا بكيه وكنت بتوجع من جواي ونفسي اكورك باعلي صوت ليها حق سعاد تدخل في الحاله الدخلت فيها دي اتاكدت تماما انو حصل لسعاد زي الحصل لصفيه لانو لو بي ارادتها ما ح تدخل في حاله نفسيه مشيت البيت في الشارع لاقاني زهير اخوي وعامل حركات اولاد الشوارع القميص مرجعو لي ورا ولابس في يدو حاجات والاولاد المعاهو اصيع منو لمن شافني جايه صلح قميصو ومشيتو وقلع الفي يدو وانا ما اتكلمت معاهو اول ما دخلنا البيت امي شكلها مافي قلت ليهو زهير دا شنو البتعمل فيهو دا قال لي شنو يا زوله هوي خليك في حالك قلت ليهو بقيت يا زوله زهير انت من متين كده وانا ما مزعلني الا انك ممثل لي ابوي المسكنه وانت برا البيت زي الصايع قال لي ايوا دي امور الجنا دا قلت ليهو ياتو جنا وانت قاصد شنو قال لي خطيبك قلت ليهو خطيبي الدخلو في الموضوع شنو انا حاجه شفتها بي عيني زهير اثبت لي كلام شهاب صاح بقيت افتش في جيوبو وهو بلاوي فيني لمن طلعت يدي طلعت السجاير والولاعه وفي لحظتي دي امي جات داخله لمن شافت السجاير في يدي لمن وقعت وامي عندها السكري اخواني الصغار جرو جابو ابوي زهير جدع الحاجات في راس البيت وانا بقيت في امي واسعفناها المستشفى وهنا اتاكدت تماما انو لو حصل اي شيء امي ح تموت شعورها ما زي شعور اي ام لمن تعرف مصايب اولادها وعرفت انو التربيه براها ما ليها اثر الشارع مرات بزرع فيك حاجات مافي بالك واصحاب السوء ليهم دور كبير في تغيير اصحابهم بالذات في فتره المراهقه وامي كان عندها حق لمن تقول لي البت الاسمها علا دي ما بهضمها وما تباريها امي كانت صاح وانا كنت غلط بي برائتي علا الما قدرت تطبقو فيني طبقتو في اخوي بس جاتني لحظه وختيت في قلبي يقين انو زهير ح يتراجع من الهو فيهو بس ما بي الساهل لازم نحنا نستحمل ونشجعو ابوي بقا يسال فيني امكم مالها قلنا ليهو ما عارفنها بعد ادوها دربات صحصحت وقالت لي ابوي سوق نسيبه وامشو البيت لي اولادي الصغار وخلو معاي زهير حسيت امي عاوزه تتكلم مع زهير ابوي طبعا بحب امي شديد قال ليها انا ما بفوتك شبر يرجعو هم وانا بقعد جنبك لمن تبقي كويسه والبيت بدونك ما بندخل لي امي دمعتا في عينا قالت ليهو معليش يا موسي بس امشو خلوني انا طوالي قلت ليهو ابوي ارح ممكن
ابوي زاتو حسا في حاجه قال ليها طيب يا غاليه ديل قروش لو احتجتو. لي حاجه امي بقت توصف لي في الاكل وقالت لي ما اوصيك قلت ليها حاضر يمه مشينا انا وابوي بعد غديتو ونومتا اخواني ابوي قال لي نوسه انتي بتي الما بتكذب وريني امكم مالا غلبني ارد قال لي عليك الله يا بتي ما تدسي مني انتو عندكم زول غيري تشكو ليهو انا لاحظت لي اخوك ما قادر اعاين في عين امك وامك من صحت ما نزلت عينا من عليهو قلت ليهو ابوي انا كنت بتناقش مع زهير عشان لقيت في جيبو سجاير وامي شافت السجاير وقعت طوالي ابوي حسيتو هما شديد قال لي ما استبعدتا حاجه زي دي في يوم من الايام وزهير ولد صغير وح يكون في واحد من اصحابو بشرب وهم في طور زي دا بشوفو انو شراب السجاير رجاله بس عمرها الرجاله ما كانت بشرب السجاير اقرب ليكم مثل انا من قومتا لا لقيت جنبي اب ولا ام وعتني ولا زول قال لي دا عيب ودا صاح الفتره الاتعلمتا فيها كانت كافيه تعلمني الصاح من الغلط والحاجه الحلوه التعليم كان مجان هسي في زمنكم دا التعليم بي قروش انا بتعب وبشقا عشان اوفر ليكم احتياجاتكم زهير ما عاين لي انا وحسيتو متحسر علي ولدو قال لي لو علي السجاير هينه لي الكلام البنسمعو في الحله المخدرات بقت تتباع فيها عادي بلقا ليهو ود حرام يديها ليهو وتاني كان ضاقا ما بخليها ممكن يسرق عديل عشان يجيبا انا خلاص ضهري انقصا قلت ليهو ابوي زهير غلط لكن عيونو كانت بتقول انو ندمان اشد الندم ومتاكده ح يتراجع ماتفكر لي الدرجه دي قال لي الله يهونا انا ما بي يدي شي غير ادعي ليكم واوعيكم وانا ماقصرت منكم مفهمكم الصاح والغلط بس الحمد لله قلت ليهو غلطه وح تتصلح يا ابوي صدقني قال لي ربنا كريم بنتناقش كده امي جات هي وزهير وطبعا زهير خجلان مني شديد وشكلو امي اتكلمت معاهو جا متغير قلت لي امي حمد لله ع السلامة ما تشوفي شر وجهزت ليها الاكل واستاذنت منهم مشيت عشان انوم بس انوم كيف وهموم الدنيا في راسي ما فكرت امسك التلفون حاولت انوم بس منظر صفيه وهي بتقول لي تعالي لي كل يوم ما داير يفارق خيالي قلبي مقطوع عليها اتكلم واوريها بس خايفاها تدخل في نفسيات زي سعاد لانو الحاجه دي ما ساهله كمان لو كلمت العاقد عليها يمكن يتهور ويقتل ليهو زول اعمل شنو وكانت دموعي سايله سيل شهاب اتصل علي رديت عليهو والعبره كانت خانقاني وانا ما صدقت انو اتصل وهو بقا شغال لي نوسه بسم الله نوسه فشنو احكي لي في زول لمسك في زول قال ليك حاجه وانا ما قادره اتكلم بس ببكي وكاتمه صوتي قال لي نوسه اجيكم لو ما عايزه تتكلمي انا بجي والله ما هاين علي اخليك تبكي كده قطعتي قلبي كدي احكي لي نوسه طمني قلبي قلت ليهو شهاب انا مضايقه قال لي فشنو يا نوسه انا جنبك ما تخافي لو في زول خوفك ما تستلمي انا جنبك قلت ليهو المشكله ما انا قال لي طيب شنو قلت ليهو صفيه يا شهاب قال لي مالا صفيه الحصل ليها شنو قلت ليهو الليله تعبت علي في الشارع وديناها الدكتور وطلعت حامل شهاب بقا يتعوذ قال لي نوسه انتي جاده قلت ليهو جاده والله وانا ما قدرت اكلمها وفهمت الدكتور انها متزوجه خوفتا يحصل ليها زي ما حصل لسعاد قال لي سعاد منو قلت ليهو الحضر ولادتا ابوك قال لي اي الحكيتي لي بيها مالا قلت ليهو دخلت في حاله نفسيه اهلا متحسرين عليها وببكو عليها بي دمعتها قال لي نوسه ما تخلوها البت دي لو نفسنت اكتر ممكن تجن خلاص هو البقا بقا قلت ليهو انا خلاص بقيت مافيني حيل خبر صفيه قتلني وانتهي مني قال لي نوسه انا جنبك بس عاوز منك كلام اسمعيني علا دي لو قالت ليك اخوك ميت تعالي الحقي ما تمشي نهاي والايام دي ما تطلعي غير للمدرسه انا والله عاوز أعرف الراجل وبيتو وتاني ماعليك قلت ليهو صفيه كانت ما واعيه عشان تحكي لينا قال لي لكن سعاد ممكن نقدر نصل معاها لشي قلت ليهو سعاد ما واعيه هسي قال لي لا انا بفهمك تعملي شنو تقنعي امها توديها لدكتور نفسي الشغال في المستشفى والزول دا لو قدرو مشو ليهو ح نجمع معلومات كتيره ومنها صاحبت تتعافا وح اتكلم مع المدير يرجعها المدرسه قلت ليهو طيب ح احاول طيب صفيه ممكن تديني ليها حبوب اجهاض اعملن ليها في عصير قال لي نوسه دا كلام شنو انا حالف قسم استحاله اغلط بالشكل دا والفي بطنها روح ناهيك عن الطريقه الجا بيها بس ربنا حرم قتل الروح انا بفكر في حل اصل بيهو لي خطيبا ونشوف لينا صرفه قلت ليهو طيب الله يهونا بس لسه بحزر فيك اوعك يا نوسه تخزليني انا بعمل في الكلام دا عشان احميك واحمي غيرك من البنات طالما قدرو عملو حاجه علي صفيه معناتا اي بت ح يعملو معاها نفس العملو مع صفيه وسعاد قلت ليهو الحمد لله بس لكن البنات ديل اتمكنن شديد وعلا البتحلف تقرل تابت بتغلط قدام عيونك قال لي علا ما تركّزي معاها بس خلي بالك من نفسك قلت ليهو حاضر قال لي اخليك تنومي عشان ترتاحي قلت ليهو تمام
نومتا وصحيت مشيت المدرسه نهايه اليوم مشيت لي صفيه لقيتا وشها واقع ولمن رابطه راسها وبطنها قلت ليها مالك قالت لي مغص ح يقتلني وصداع روحي ح تطلع وكانت تعبانه شديد لمن خوفتا منها واقنعتها مشينا للدكتور وشكت ليهو اعراضها قال لي وديها بهناك قسم النساء والولاده قالت لي لا ما ماشه اعالجني هنا قال ليها ماف طريقه يا استاذه انتي عندك مبادي اجهاض انا قربتا ازغرت بس صفيه قالت ليهو شنو شنو قال ليها السمعتيهو وطلع بقت تكورك وتقول لي انا حامل يا نوسه لدرجه انو قفلت ليها خشمها قلت ليها صفيه احمدي الله انو داير ينزل من فوق واستحملي وخليك واعيه انتي واثقه من نفسك ما عملتي الحاجه دي بي ارادتك بس حسبي الله ونعم الوكيل من علا ربنا انتقم منها وسكتها وديتا مكان الولاده لقينا لينا دايه شكلها صعبه قالت لي متزوجه ولا بالحرام قلت ليها كيف بالحرام اتقي الله متزوجه وهسي لو. دايره القسيمه بمش اجيبها ليك بس هي ما متحننه عشان بتقرا قالت لي تمام دخليها وصفيه تعبت اكتر واكتر ركبت ليها درب وحسيت صفيه روحها طلعت عديل بعد ساعتين صراع مع الالم صفيه عملو ليها عمليه الاجهاض علي قدر ما هي مخلوعه انا مبسوطه انو الجنين طلع وما انفضحت بعد طلعوها من الغرفه كانت بتهضرب وبتقول في احداث اليوم المشت فيهو لي علا الناس كلهم محتارين هي تقول فشنو وتتحسبن علي علا قلت ليهم علا دي ضرتها وطلبت منهم يفوقوها قلت عشان ما تقول كلام اكتر وفعلا ادوها حقنه لمن صحصحت قلت ليها حمد لله علي السلامه قالت لي نوسه انتي ليه فرحانه لي كده معقوله تكوني شمتانه فيني وانتي الوحيده الطلعتي من الشله الوسخه دي قلت ليها الله يسامحك يا صفيه انا عمري ما شمت فيك انا لمن عرفت انك حامل اقسم بالله الدنيا مسخت لي مشيت البيت نوم ما نومتا لدرجه انو قلت لي شهاب تدينا حاجه تنزل ليها الفي بطنها قالت لي انتي عارفه من متين قلت ليها الدكتور دا زاتو هو الفحص ليك لمن وقعتي علي في الشارع وقلت ليهو انك عاقدين عليك مفتكره انو بالساهل اعملو ليك العمليه دي دي جريمه والله يا صفيه انا الليل كلو ادعي ليك قلت انتي ما عندك ذنب غرضك كان تكشفيهم بس هم قادرين قالت لي نوسه انا اسفه عشان م حسيت بيك انخلعتي قلت ليها انا الخبر دا ما جديد علي وصراحه فرحت انوو اجهضتي بدل حملك يظهر وتجيك نفسيات زي سعاد قالت لي نوسه هلا هلا علي الجد والجد هلاهلا عليهو اقسم بالله لو ما دمرتهم ما برتاح قلت ليها لا لا يا صفيه الموضوع دا ادخلو فيهو ناس شهاب وشلتو ووصاني اني ما اعمل اي شي عشاني انا اسمعي كلامي خليهم بجيبو ليك حقك انتي وغيرك قالت لي مستحيل اخلي علا لانها دمرت حياتي قلت ليها معليش ياصفيه والحمد لله ربنا شاف حالك والحمل ما ظهر وهسي مدام وعيتي خلينا نطلع من هنا ما اجي زول من الحله تبقا لينا فضيحه قالت لي تمام وكانت تعبانه شديد الدكتور ادانا العلاجات ومشينا وديتا بيتهم قالت لي طبعا انا ح اطلق قلت ليها ليه قالت لي مستحيل اغشو وما بقدر احكي خليني اصحصح بعد يومين بجيكم اتصل ليهو لانو خطيبي صعب لو عرف الحقيقه امكن يقتل علا والمعاها من غير ما نصل لنتيجه قلت ليها طيب اتريسي قالت لي ما في طريقه انا لا هو لا غيرو ما ح اعرس ودا اخر قرار عندي حسيتا انكسرت والكسر الجواها كبير ما حاجه ساهله انك تفقدي شرفك غصبا عنك علا جنت عليهم قلت ليها شهاب قال نكلم اهل سعاد نوديها لطبيب نفسي هو بعرفو قال عاوز سعاد تحكي للدكتور احتمال تكون كانت واعيه لمن مشو البيت وهو عاوز يعرف الراجل الورا شله البنات وموفر ليهم اي شي دا منو قالت لي انا والله ما بتزكر اسمو بس شكلو لو لاقاني والله بعرفو ولا بتغالط فيهو قلت ليها ان شاء الله نصل ليهو
مرت الايام وخلاص نحنا نزلنا امتحانات وصفيه اصرت قالت لي خطيبا ما عاوزاك وزعل منها شديد وسمعها كلام فارغ بس قالت لي من حقو انا اتفرغت تماما لقرايتي حتي تلفوني قفلتو من شهاب والامتحانات جاتنا حلوه وصفيه كانت مجتهده اكتر مني في يوم ونحنا طالعين صفيه لمحت ليها راجل مع المدير ولا اتفاهمت معاي دخلت من غير استئذان المكتب ومسكت الراجل من قميصو وشكلو هو جلابي لمن بهناك وبقت تبكي وتقول ليهو عملتو لي شنو انتو. انا طوالي عرفت انو دا الراجل البنفتش ليهو والله يستر صفيه اتهورت شديد نشوف البحصل الحلقه الجايه.
يتبع.