رواية أرهقني الفجور الفصل الثالث والعشرون 23 بقلم نوسه حمد
مشيت لقيت زهير يصلي قلت ليهو الشيخ دعواتك ابتسم وقال لي دعواتي كلها ليكم انتو وامي وابوي قلت ليهو يا سلام عليك اسمعني عاوزاك في كلام ضروري قال لي خير حسيتو خايف علي قلت ليهو اطمن ماف شي بس عاوزين نحل اللغز بتاع الشله الفاسده دي عن طريقك واظنها امي واقفه ورانا ونحنا ما شايفنها قلت ليهو انت لازم تمثل ليهم انك عاوز تبقا معاهم وانك ضليت الطريق وبقيت افهم فيهو وامي شربت الكلام كلو جات وقفت في وشنا قالت لي عشان صاحباتك تضيعي اخوك وكانت تبكي وانا وزهير بقينا نتمتم وغلبنا البنقولو قلت ليها يمه كدي استهدي بالله والله انتي فاهمه غلط قالت لي افهم شنو اكتر من السمعتو ويابتي خلي لي ولدي في حالو بعد الله هداهو عاوزه ترجعي ليهم واتكلمت معاي كتير حسيتا خايفه شديد علي زهير وليها حق انا في حاجات كتيره ما عملت ليها حساب قلت ليها يمه اسفه وسلمت عليها في راسها وقلت ليها والله خلاص الموضوع دا ح اقفلو قالت لي لو عاوزاني اكون عافيه منك عايني لي حياتك انتي بس ما تعايني لي ورا قلت ليها حاضر يمه ومشيت رقدتا وافكر للصباح وبدعي ربنا يحلها من فوق لانو غلبتنا خلاص وانا اي شي خليتو بس صفيه ح تكون عايشه في جحيم ح يزلها ويهينا وياعالم بقول ليها فشنو قدرتا نومتا نومه طويله ما صحيت نهاي الا امي بتصحي فيني قالت لي ام زميلتك منتظراك بره وامي كانت زهجانه لانها ماعايزه الموضوع دا يتفتح عشان خايفه علي قومتا سويع اتسوكتا وصليت ولبست عبايتي وقطع شك قلت دي ام صفيه بس اتفاجأتا لقيتا ام سعاد وحالا تصعب علي الكافر حشاها انحرق علي بتها الشاطره الكانت نفسها تفرح بيها سلمت عليها وقالت لي مبروك يابتي ربنا يسعدك ويهنيك الستره سمحه والعرس سمح القرايه دي لو ربنا قاسمه ليك مع راجلك بتقري بس اهم شي الستره الزمن العلينا دا زمن قابر لو ما اندفنتي حيه بتموتي بالمغسه والوجايع قلت ليها الحمد لله يمه انتي حالك كيف قالت لي انا انوم كيف وبتي ماتت قدام عيني وكانت بتبكي شديد امي بقت تسكت فيها وتقول ليها ادعي ليها البكا ما بجيب فايده قالت ليها الحمد لله قلت ليها هي مالا سعاد قالت لي سعاد الله انتقم من الدمر حياتا ووصلها للوصلت ليهو دا قلت ليها انا والله ما عارفه عنها اي شي يومي الشفتها يومها الولدت في الشارع ومن الخلعه تاني ما سالنا منها ولمن فقدناها جينا لقينا حالتها متغيره قالت لي ماقصرتن والله الله اديكن العافيه بس بتي ما اشكرها ليكم بس ادبها في اخواتا ماف اتسلطتت عليها بت عبدالمجيد وهنا كانت تقصد علا قلت ليها علا قالت لي الله انتقم منها بقت تجيها طوالي قالت بتقرا معاها فجأة بتي حالا اتغير والبت دي بقت تنوم معانا وفي يوم انا غلطتا غلط كبير سعاد بتي قالت لي ماشه ابيت معاها والله ما ختيت ليهم الشينه ولا اتوقعت حاجه كعبه ع حسب البت بتنوم معانا خليتا وبتي جاتني تاني يوم متغيره وزهجانه والبت بعد ما كانت تقع وتقوم معاها بقت تطردها وسالتها ماقالت لي حاجه قلت احتمال اتناقشن مشاكل البنات دي ما اتوقعتا انو بتي تكون جاتا حاجه مر يا زمن ومرن يا الايام بتي بدت تتغير علي وقدر ما قلت ليها اوديك لدكتور رفضت لغايه ما جاتا عقده بقت محبوسه في الغرفه وخلت المدرسه اتصلت علي اخواتا وياريتني ما اتصلت اختها اول ما جات قالت لي يمه بتك حامل وانا سعاد دي بالذات ما بصدق فيها الكلام دا كذبتهن وطردتهن وخاصمتهن بالزمن عميت من الحقيقه لانو ثقتي فيها كبيره لغايه ما جابوها لي بي حال شبه ميته وقالو ولدت في الشارع انا صبت فيني مطره واليوم داك ربنا اغفر لي من حقها ضربتها لمن ماتت في يدي وكنت ما واعيه الجيران مسكوني منها واخواتا اتصلو ليهم جو وعشنا ايام لا اكل لا شراب ولا اي شيء والحمد لله البت الولدتا ماتت في يوما وماتت معاها روح سعاد بتي لادكتور نفع فيها لا شيوخ نفعو نقبضا من الشارع ونقبضا في الهواء وجسمها كلو جروح كتير حاولت تقتل نفسها بس يومها ما تما لغايه ما يوم انا في عز نومي سمعت لي صوت غاطس كده والله قلت دي غنمايه دخلت جوه القا بتي شنقت روحها انا لمن اموت ما بنسا منظر سعاد بتي كانت بتحكي لينا هي تبكي ونحنا نبكي امي اتاثرت شديد بقت تهدي فيها وتطبطب عليها
ام سعاد حالتها تحنن قطعت قلبي شديد امي سكتتها وقالت ليها استغفري ياها حال الدنيا قالت ليها بتي لو ماتت ساي من غير ما تشنق نفسها والله بقول دا قدرها بس بتي ماتت بي سرها وهسي انا جيت اسالك يابتي احتمال تكون سعاد حكت ليك بالولد الغلط معاها قلت ليها والله انا سعاد ما حكت لي بالولد بس انا متاكده سعاد ما بي ارادتها سلمت نفسها قالت لي كيف وطبعا امي شغاله تحمر لي وتغمز لي خايفه من المشاكل بس انا كان نفسي اطمن قلبها ما تكون خاته بتها عملت الحاجه دي بي يدها قلت ليها علا دي بتعرف ليها شله كبيره بتاعت اولاد ومعاهم راجل كبير علمو البنات السجاير واي شي كعب والما بتستجيب بالقوه بوقعوها في الحرام زي ما حصل لي صفيه قالت لي صفيه منو قلت ليها يمه انا بحكي ليك في الكلام دا عشان ما تفهمي سعاد غلط الكلام البقول فيهو دا ما عارفو زول غيري انا لمن جينا منكم وسعاد لقيناها تعبانه نفسيا صفيه قالت لي انا ح اضحي واعرف الناس ديل ونوقعهم واتصلت كلمت الولد العاقد عليها ووصفت ليهو مكان بمشو في جنينه كده بس علا المره دي ما ساقتها لي الجنينه ودتها مكان صفيه زاتا ماقدرت تعرفو وشكلهم شربوها حاجه وما وعت الا تاني يوم عند ناس علا وقطع شك قالت لي حصل علي حاجه وفعلا صفيه طلعت حامل وربنا لطف بيها وحصل ليها اجهاض وهسي صفيه ولد عمها العاقد عليها ساقها وشكلو فهمها غلط والمشكله مافي زول عارف الحقيقه غيري مافي قالت لي انا مشيت رفعت في علا بلاغ لانها هي السبب في الحصل لبتي بس الضابط قال محتاج اقوال اكتر مابتقدري تمشي تقولي كلامك دا امي طوالي قالت ليها بتي عروس ما بتقدر ام سعاد حست بالاحراج وطلعت فاتت انا كنت ببكي وزهجانه من امي قلت ليها يمه ختي نفسك مكانها انتي مفتكره المرا عليهم دي حاجه ساهله يمه صدقيني لو مشيت اتكلمت ح احل الغاز كتيره قالت لي انا خايفه عليك وهسي الناس يقولو شنو عروس ومشت الاقسام يابتي ما تاكلي لحمي انا والله زاتي تعبتا من الكلام البحير دا قلت ليها يمه في بنات كتيره ح يضيعو بسبب البنات ديل وانتي عارفه يا امي سبب انو انا قلت عاوزه اتزوج وما عاوزه اقرا شنوو قالت لي شنو قلت ليها الراجل الشافتو صفيه مع ناس علا في البيت المشت ليهو جا المدرسه وصفيه اشتبكت معاهو وفي النهايه طلع عاوز اتبرع للمدرسه اتبرع للمدرسه هو مدمر نص بنات المدرسه يمه هو راجل كبير اكيد هو مريض لازم اتكشف والناس تعرفو ويعملو حساب لي بناتهم يمه عليك الله خليني امي قالت لي مستحيل واحرجتني مشيت كلمت شهاب وقال لي خليني بتكلم مع امك دي فرصه انو القضيه تكون في يد الضابط وشجعني شديد انتظرت المساء شهاب جا واتفاهم مع ابوي وابوي قال ليهو تمام نمشي معاها انا وانت قال لي تمام الصباح البسي نقاب ونمشي لي ام سعاد نسوقها ونمشي قلت ليهو تمام نومتا فرحانه اخيرا حقهم ح يرجع وعلا والمعاها ح يتكشفو
نومتا وصحيت الصبح ولقيت امي وابوي يشربو في الشاي شربتا معاهم وقال لي اجهزي زهير قال لينا ماشين وين حكينا ليهو قال لينا بمش اشهد امي قعدت تكورك ومسكتو ابوي قال ليها خلاص خليهو ما تكوركي من الصباح شهاب جا ساقنا ومشيت لي ام سعاد لمن شافتني فرحت وقامت لبست توبا ومشت معانا اول ما وصلنا الضابط اللاقيتو زمان لقيتو قاعد رفعت النقاب قاصده قال لي دي انتي قلت ليهو اي شهاب بقا اعاين لي طوالي هو حسا انهم مضايقين من سؤالو قال ليهم البت دي زوله حقانيه وما بتحب اللف والدوران وحصل كده كده كده حسيت شهاب ارتاح وقال لي احكي لمن بقيت احكي ليهم قال لي ديل البنات العملن جوطه في المدرسه قلت ليهو ياهن ومعاهن راجل كبير وقصدو شنو ما عارفين ومعاهم استاذ علاء وحكيت ليهو بي اي شي الضابط قال لينا بس كده القضيه جاهزه وانا ح اعمل جاهد واعرف قصتهم شنو وما ح ارحمهم حتي لو بالواسطات القانون عندي قانون ويطبق علي انا زاتي لو غلطتا فرحت شديد لانو صراحه القضيه دي عاوزه ضابط زي الضابط دا كتب كل اقوالي وقال لي م ح احتاجك تاني شكرا ليك كتير ومضيت وطلعنا نشوف الح يحصل شنو تاني توقعاتكم شنو تدخل الضابط ح يفيد القضيه ولا ح يعقدها ……..يتبع.