رواية أسيرة عشقه القاسي الفصل الخامس والثلاثون 35 بقلم جنات
مراد اتجمد مكانه مكنش متخيل ان رفيف هتاخد خطوة بالسرعة دي جز على سنانه من الغضب: ماشي يا رفيف.
لسه هييخرج هند وقفته: بلاش تقسى عليها يا مراد البنت عندها حق في كل اللي بتعمله أنت اللي وجعتها.
مراد ماردش عليها وساب الأوضة والفيلا كلها وخرج وركب عربيته وطار بيها على بيت خالد.
شوية ووصل نزل من عربيته وطلع العمارة زي الاعصار وقف قدام الباب وخبط بعنف.
خالد فتح بعصبية: ايه الخبط ده مين قليل الذوق اللـ
اتصدم خالد لما لقى مراد قدامه: عايز ايه يا مراد.
مراد: رفيف فين.
خالد: معرفش
مراد: يعني ايه متعرفش رفيف المفروض تكون هنا.
خالد بعصبية: هو أنت مراتك تايهه وجاى تدور عليها عندي.
مراد: يعني هي لو مش عندك هتروح فين.
خالد بصله بشك: أنت عملت ايه في بنتي عشان تسيب الفيلا انطق.
مراد ضغط على راسه بايديه وهو هيتجنن.
أدهم اللى سمع صوتهم طلع جرى: في ايه وصوتكم عالي كدة ليه.
خالد: البيه معرفش عمل ايه في أختك خلاها طفشت من الفيلا.
أدهم: ايه اللي حصل بينكم يا مراد عشان تسيب البيت.
مراد ماردش عينه جت على باب شقة ندى لف لأدهم بسرعة: شوفها عند ندى هي مش هتروح في مكان غير لندى أو زينب أنجز.
أدهم رن جرس شقة ندى وفتحت كريمة ولما شافتهم استغربت: ازيك يا ابني اتفضل.
وبصت لمراد وخالد: اتفضلوا يا جماعة.
أدهم: شكرا يا ست الكل هي ندى جوة.
كريمة:أيوة ورفيف عندها.
مراد اتنهد براحة: طب ممكن تنادي لرفيف لو سمحتي.
كريمة: حاضر يا ابني ثواني.
دخلت كريمة وبعد شوية خرجت رفيف ملامحها كانت دبلانة وعينيها حمرا من العياط.
ادهم قرب منها: مالك يا حبيبتي سايبة بيتك ليه وشكلك عامل كدة ليه.
رفيف من غير ما تبص لمراد ولا لخالد: مفيش حاجة يا أدهم كنت مخنوقة شوية وعايزة أقعد مع ندى.
مراد قرب منها: تعالي معايا يا رفيف خلينا نتكلم.
خالد بغضب: مش هتروح معاك في حتة الله أعلم عملت فيها ايه عشان تبقى بالمنظر ده.
وبص لرفيف: تعالي يا بنتي بيت أبوكي مفتوحلك في أي وقت.
رفيف بصت لخالد: شكرا أنا هفضل عند ندى ومش عايزة أتكلم مع حد لو سمحتوا.
أدهم: طب يا حبيبتي فهميني بس في ايه يمكن أقدر أحل المشكلة.
دموع رفيف نزلت تاني: اسأل ابن عمتك وهو يقولك أنا مش قادرة أتكلم.
أدهم: طيب تعالي بيتك يا رفيف ماينفعش تفضلي هنا.
خرجت ندى وقفت جمب رفيف: لا يا أدهم رفيف هتفضل معايا دي أختي متقلقش عليها.
أدهم اتنهد: تمام زي ما تحبي المهم تبقي بخير.
مراد بعصبيه مكتومة: رفيف لو سمحتي تعالي ننزل نتكلم متخلنيش أتصرف تصرف مش هيعجبك.
رفيف بصت لأدهم: قوله اني مش هتكلم معاه وياريت يطلقني في أسرع وقت.
مراد زعق: لا ده أنتى اتجننتي رسمي بقا.
أدهم بحدة: مرااااد في ايه مالك.
مراد بغضب: أنت مش سامع أختك بتقول ايه.
ادهم: ما هو أكيد في سبب قوي يخليها تطلب الطلاق أنت عملت ايه.
رفيف: ما تقوله السبب ولا مكسوف تقول قدامهم انك اتجوزت عليا.
الكلمة نزلت زي الصاعقة على أدهم وخالد
خالد بذهول: ايه اتجوز عليكي.
أدهم بص لمراد: الكلام ده بجد يا مراد أنت عملت كدة.
مراد اتضايق انها فتحت السيرة قدامهم وده عصبيه جدا: أيوة بجد وأظن ده حقي الشرعي أتجوز اتنين تلاتة انشالله أربعة حقي ومحدش ليه عندي حاجة.
رفيف بصتله بصدمة ودموعها نزلت اكتر.
خالد: يبقى تطلق بنتي وتروح تتجوز براحتك بعيد عننا.
أدهم لما لقى الجيران بدأت تفتح الأبواب اتكلم بحدة: لو سمحتوا كفاية فضايح الناس بدأت تتفرج علينا ندى خدي رفيف جوة وأنت يا مراد خلينا ننزل نتكلم تحت.
ندى أخدت رفيف ودخلوا الشقة وقفلوا الباب.
خالد بص لمراد: اللي عملته ده مش هيعدي بالساهل يا ابن الحديدي وهتدفع تمن كسرة بنتي.
أدهم: بابا لو سمحت خلاص.
مراد بص لخالد بنظرة مرعبة: أنت بالذات مالكش حق تتكلم أنا ماسك نفسي عنك بالعافية ومأجل حسابك فياريت تتجنبني الفترة دي خالص فااااااهم.
خالد خاف من نبرته وأدهم شد مراد من ايده: يلا يا مراد خلينا نمشي.
نزلوا وخالد دخل شقته: معقول ابن الحديدي عرف حاجة عن حوار المخازن وشغل حازم لا بس هيعرف منين والكل فاكر انه حادثة ربنا يستر الموضوع مش مريح.
------
على كورنيش النيل في مكان هادي كانت وعد واقفة بتبص للمية تليفونها رن ردت بضيق: ايه أنت فين أنا بقالي ساعة مستنياك.
جه صوت من وراها: أنا جيت يا حلوة
وعد لفت وبصتله ببرود: كل ده تأخير يا وليد.
وليد ابتسم ببرود: المهم اني وصلت في الاخر ها ايه الجديد طمنيني على حبيبة قلبي وبنت عمي همس زمانها عايشة في جحيم دلوقتي.
وعد ضحكت بانتصار: انت مش متخيل امبارح لما مازن رجع اتسحبت ووقفت ورا الباب أسمع وسمعته وهو بيزعقلها ويقطم فيها وبعدها خرجت من الأوضة بصينية الأكل زي ما هي وكانت بتعيط ودموعها مغرقة وشها يا حرام
وليد عيونه لمعت بشر: حلو أوي الشرار بدأ يولع وأنا مش هسكت غير لما تشعلل على الاخر وهمس ترجعلي راكعة.
وعد: ادعيلي بقا أنا السبب في كل اللي بيحصل ده من البداية.
وليد ضحك: طبعا يا جميل هو أنا أنسى لما جيت أشوف همس في الفيلا وأنتي اللي قابلتيني وفهمتيني الحوار كله.
وعد رفعت حاجبها: بس أنت في الأول كنت عامل فيها شريف ورافض تحط ايدك في ايدي.
وليد بغمزة: بس في النهاية وافقت المصلحة واحدة يا حلوة قوليلي بقا ايه الخطوة الجاية.
وعد بخبث: نشعلل بزيادة نبعت مسدجات غرامية جديدة لمازن عشان نزود السبايسي في الحكاية ونخليه يتأكد انها بتخونه بجد ومفيش مجال للشك.
وليد هز رأسه: فهمتك هظبط أنا الحوار ده وأصيغ الكلام بس اللعبة محتاجه رد من تليفونها هي عشان لو فتش يلاقيه.
وعد ابتسمت بشر: الموضوع ده سيبه عليا تليفونها هعرف أوقعه في ايدي وأرد منه في الوقت المناسب.
وليد: تمام يا حلوة كدة اللعبة بقت في المضمون.
وعد لفت عشان تمشي: يلا سلام وبلاش ترن عليا خالص لما يبقى في جديد هكلمك أنا.
-----
صحى مازن من النوم أول ما فتح عينيه لقى همس قاعدة على الكنبة وعينيها وارمه من العياط أول ما شافته قام وقفت بسرعة قدامه وبصتله بنظرة عتاب.
مازن بصلها بجمود:نعم.
همس بصوت مهزوز: أنت ليه بتعمل كدة معايا أنا عملت فيك ايه يا مازن عشان تقلب عليا بالطريقة دي.
مازن لف وشه الناحيه التانية ونفخ بضيق: همس أنا على اخري بلاش تخليني أتكلم دلوقتي عشان ماقولش كلام يزعل.
همس بدموع وقهر: لا اتكلم قولى أنا عملت ايه عشان تعاملنى كدا بعد ما طلعتني سابع سما بمعاملتك وحبك نزلتني فجأة سابع أرض على جدور رقبتى وانا مش فاهمه انا عملت ايه.
مازن ماردش عليها سابها ودخل الحمام وقفل الباب في وشها بعد شوية خرج ولبس هدومه عشان ينزل وأول ما فتح الباب همس جريت عليه ومسكت ايده: قولي في ايه يا مازن مش هسيبك تنزل غير لما تقولي.
في الوقت ده وعد كانت لسه جايه من برا ولما شافتهم وقفت تسمعهم.
مازن اتعصب وشد همس من دراعها بعنف ودخل بيها الأوضة ورزع الباب:مش عارفة عملتي ايه أنا هقولك عملتي ايه.
طلع تلفونه من جيبه وفتح المسدجات اللي بتجيله.
همس اتصدمت من الكلام المكتوب وحطت ايدها على بوقها: مستحيل أنا مكلمتش حد والله.
مازن بسخرية: مش انتي ازاي يعنى المسدجات دى مش على تلفونك.
همس بدموع: مستحيل يكونو على تليفوني.
مازن خطف تليفونها من ايدها بعنف وفتح الواتساب ودخل على الرسايل المخفية وفتح الشات اللى متسجل بتوأم روحي.
همس اتصدمت صدمة عمرها وايدبها بقت تترعش: والله ما حصل ولا أعرف حاجة عن الرسايل دي يا مازن صدقني في حاجة غلط.
مازن: المفروض أصدقك مش كدة أمي كان معاها حق من الأول اللي زيك ما ينفعش تتجوز واحد زيي أنا اللي غبي وعليت من قيمتك.
الكلامه كان زي السكينة اللى جرحتها: أنت بتقولي أنا الكلام ده يا مازن.
مازن بقسوة: أيوة انتي يا مدام يا اللي محترمتيش جوزك ولا اسم عيلته ورايحة تعيشي قصة حب من وراه.
همس بانهيار: بس أنا معملتش حاجة التليفون ده أكيد في حد لعب فيه.
مازن: بلاش تبريرات ورسم دور الضحية اللعبة اتكشفت خلاص.
بره الأوضة وعد كانت حاطة ودنها على الباب وعلى وشها ابتسامه انتصار أول ما حست ان مازن هيخرج جريت على أوضتها وقفلتها وهي طايرة من الفرحه.
خرج مازن ورزع الباب ونزل وساب البيت.
وهمس قعدت على طرف السرير بصدمة وذهول عينيها مثبتة على الشات ودموعها نازلة في صمت وقهر مش قادرة تستوعب المصيبة اللي وقعه فيها ولا صدمتها من كلام مازن.
------
مراد كان قاعد فى العربية والضيق باين على ملامحه وأدهم قاعد جمبه بيبصله بعتاب السكوت طال ما بينهم لحد ما أدهم قطعه: ممكن تفهمني ليه عملت كدة في رفيف يا مراد أنت عارف ومتأكد انها بتحبك ومبتشوفش راجل غيرك ليه تكسرها الكسرة دي.
مراد ضرب الدريكسيون بايده بكل قوته: ما أنا كمان بتنيل أحبها وبموت فيها كمان.
أدهم باستغراب: لما انت بتحبها وبتموت فيها ليه تروح تتجوز عليها وتجيب ضرة لحد بيتها وفي الظروف دي.
مراد لف لأدهم وبص في عينيه بجدية: أنا متجوزتش يا أدهم.
أدهم بذهول: أنت هتحور عليا يا ابني ما أنت لسه قايل قدام أبويا وقدام رفيف انها زفتة مراتك ايه الكلام اللي بيتغير في ثانية ده.
مراد أخد نفس طويل وحط راسه على الدريكسيون: روزي تبقى مرات حازم الله يرحمه.
أدهم بصدمة: مرات حازم.
مراد هز راسه: ةيوة وأكيد مش هجوزها بس كل الحكاية اني بحميها من أهلها ومن ابن عمها اللي كان عايز يقتلها لأن مكانش حد يعرف انها متجوزة حازم في السر غير لارين وطبعا حازم لسه ميت بقاله كام يوم يعني البنت لسه في فترة عدتها وغير كدة هي حامل فطبيعي مش هينفع نتجوز بجد بس كان لازم أظهر قدام الكل وأقول انها مراتي عشان أقدر أدخلها البيت وأحميها ومحدش يلمسها برة فهمت بقا.
أدهم بدأ يستوعب: بس برضه لسه عتبان عليك طب يا فالح طالما الموضوع كدة ليه مقولتش الحقيقة لرفيف ليه سبتها تفتكر انك خنتها وتوصل للحالة دي.
مراد بقلة حيلة وندم: هي أختك ادتني فرصة يا أدهم أنا رجعت من برة مطبق وتعبان من حوار المخازن لاقيتها سابت البيت ومشت على طول من غير ما تسمع كلمة واحدة منى.
أدهم اتنهد: تمام يا مراد أنا هحاول أروح أتكلم معاها وأهديها وأخليها تديك فرصة وتسمعك بس السر ده المفروض أنت اللي تقعد معاها وتقولهولها بنفسك عشان تصدقك.
مراد: أكيد يا أدهم ده اللي هيحصل بس ترجع البيت.
أدهم فتح باب العربية ونزل وهو بيتاوب بتعب: ماشي يا صاحبي أنا هطلع بقا أرتاح وأناملي ساعتين لأني داخل على مأمورية تقيلة ومحتاجة مجهود.
مراد ابتسم: ربنا يعينك ويحفظك يا صاحبي تروح وترجع بالسلامة.
ادهم رفع ايديه لسما: يارب يا صاحبي.
-------
وصل سيف وزينب المستشفى وكان التوتر باين على زينب اللى بتفرك ايدها بقلق: أنت متأكد انك ما تعرفش هي عايزاني ليه يا سيف أنا خايفة من المقابلة دي.
سيف: علمي علمك والله يا زينب بس اهدي ياسمين تعبانة وأكيد مش هتعمل حاجة وأنا معاكي متقلقيش.
أول ما وصلوا عند الأوضة لقوا منى ونبيلة واقفين برا وملامحهم كلها غل وضيق.
أول ما منى شافت زينب قربت منها بعصبيه: لو بنتي حصلها حاجة تاني بسببك هموتك يا بنت داليا أنتي ايه اللي جابك هنا.
سيف اتدخل: خالتي زينب مش جاية بمزاجها بنتك ياسمين هي اللي طلبت تشوفها وتتكلم معاها بنفسها يلا يا زينب.
سيف فتح الباب ودخلوا هما الاتنين وقربوا من سرير ياسمين اللي كانت منظرها يقطع القلب والتعب والشحوب باينين على ملامحها.
زينب قلبها وجعها عليها وقربت منها: ألف سلامة عليكي يا ياسمين.
ياسمين فتحت عينيها بتعب وبصتلها: الله يسلمك يا زينب.
وبعدين بصو لسيف: سيف أنا عايزة أتكلم مع زينب لوحدنا لو سمحت.
سيف هز راسه: تمام يا ياسمين براحتكم.
وخرج وقفل الباب وراه
زينب قربت الكرسي وقعدت ومسكت ايد ياسمين: قوليلي يا ياسمين أنا سامعاكي.
ياسمين ابتسمت: أنا عايزة أقولك يا بختك بحب سيف ليكي أنتي عارفة أنا بحبه من واحنا عيال صغيرين بس هو عمره ما اعتبرني غير أخته وبس ولما ماما جت قالتلي انه طالب ايدي مكنتش مصدقة نفسي من الفرحة واتخطبنا بس هو بيتعامل معايا ببرود مش بيبص في وشي أصلا كنت بزعل أوي لحد ما في يوم سمعت ماما بالصدفة بتتكلم مع خالتي نبيلة وسمعت كلمتين كسروني عرفت انهم هما اللي أجبروا سيف على الخطوبة دي عشان مرضى وقتها اتكسرت وعرفت انه مجبور عليا وعمره ما هيحبني.
زينب عينها دمعت: بس أنا والله يا ياسمين.
ياسمين قاطعتها: متقوليش حاجة يا زينب ده مش بايديكو ولا بايد حد ده القلب وما يريد والقلب ملوش سلطان.
زينب بقلق: يعني مش زعلانة مني.
ياسمين هزت راسها بنفي: أبدا والله أنا فرحانة ان سيف هيعيش مع البنت اللي اختارها قلبه بجد ومكنش مجبور عليها ممكن لو سمحتي تنادي عليه هو وماما وخالتي.
زينب: حاضر من عيوني.
قامت زينب فتحت الباب: اتفضلوا ياسمين عايزاكم.
الكل دخل الأوضةومنى جريت على بنتها: مالك يا بنتي أنتي تعبانة في حاجة بتوجعك.
ياسمين: لا يا ماما أنا كويسة بس عايزة أطلب طلب من سيف ممكن.
سيف: اتفضلي يا ياسمين سامعك.
ياسمين: زي ما الدكتور قال خلاص أنا معنديش وقت طويل في الدنيا دي مش كدة.
منى عيطت: متقوليش كدة يا حبيبتي بعد الشر عنك هتقومي بالسلامة.
ياسمين: دي الحقيقة يا ماما فلو سمحت يا سيف أنا نفسي أحضر فرحتك أنت وزينب قبل ما أمشي.
نبيلة بصدمة: أنتي بتقولي ايه يا ياسمين فرحة ايه وزفت ايه دلوقتي.
ياسمين اتجاهلت خالتها وبصت لسيف: ممكن تكتبوا الكتاب هنا وأكون معاكم وأشوفكم سوا لو سمحت يا سيف اعتبره اخر طلب ليا في الدنيا.
سيف اتأثر وابتسم: أنتي هتقومي بالسلامة يا ياسمين وهتحضري معانا الفرح معانا.
ياسمين بدأ نفسها يضيق وتعبها يزيد: عشان خاطري يا سيف هات المأذون واكتبو الكتاب هنا دلوقتي أنا حاسة ان خلاص وقتي قرب.
سيف: حاضر يا ياسمين هعملك اللي أنتي عايزاه.
نبيلة اتعصبت: هو ايه اللي حاضر ايه الكلام اللي بنتك بتقوله ده يا منى أنتي هتوافقي على الجنان ده.
منى بصت لنبيلة بحدة: بنتي بتعمل الصح يا نبيلة ودي أمنيتها الأخيرة هتحققها ولا لأ يا بني.
سيف: هحققها أكيد يا خالتي.
وبص لزينب اللي كانت واقفة مصدومة: أنا هروح أجيب والدتك والمأذون وأرجع علطول.
زينب هزت راسها باه وسيف خرج.
----
بعد شويا وقت رجع سيف المستشفى ومعاه داليا والمأذون ووالده جواد وأدهم ومراد.
الكل اتجمع في الأوضة عند ياسمين وبدأ المأذون يكتب الكتاب جواد قعد وبقى هو وكيل زينب وأدهم ومراد وقفوا شهود على العقد.
نبيلة كانت قاعدة في ركن الأوضة هتموت من الغيظ وعينها بتطلع شرار بس مش قادرة تتكلم عشان ياسمين.
المأذون قال جملته الشهيرة: بارك الله لكما وبارك عليكما وجمع بينكما في خير.
الكل بدأ يبارك لسيف وزينب بفرحة وداليا خدت بنتها في حضنها وهي بتعيط وأدهم ومراد حضنوا سيف وباركوا له من قلبهم.
ياسمين بصت لهم وابتسمت بتعب شديد: مبروك يا زينب مبروك يا سيف فرحتوني.
سيف قرب منها: الله يبارك فيكى يا ياسمين أنا مش عارف أشكرك ازاي على اللي عملتيه ده أنتي بجد أثبتي ان قلبك نضيف.
ياسمين: حط زينب في عينيك كأنك شكرتني بالظبط.
سيف بص لزينب بنظرة مليانة عشق: دي جوة قلبي وفي عنيا وخلاص بقت مراتي احنا هنسيبك ترتاحي شوية دلوقتي أكيد تعبتي من الدوشة دي.
وفعلا الكل بدأ ينسحب ويخرجو برة الأوضة وفضلت منى ونبيلة قاعدين معاها.
ياسمين بصت لأمها بضعف وارهاق: أنا عايزة أنام يا ماما تعبت أوي.
منى طبطبت علي كتفها وباست راسها: نامي يا قلب أمك نامي يا حبيبتي وارتاحي.
ياسمين أخدت نفس طويل واتنهدت براحة حقيقية كأنها أدت رسالتها في الدنيا وغمضت عينيها واستسلمت للنوم.
-------
رجع مازن ومراد على الفيلا مع بعض كل واحد شايل في قلبه هم أول ما دخلوا الصالة لقوا هند وشريفة قاعدين والحزن مغطي وشوشهم.
هند أول ما شافتهم وقفت وبصتلهم بنظرة حادة واتكلمت بصوت مخنوق: ممكن أعرف أنتو بتعملوا كدة ليه ناوين تهدوا البيت ده على دماغنا كلنا.
مراد مسح على وشه بتعب: عملنا ايه يا أمي مش فاهم.
شريفة بعتاب: عملتوا ايه حضرتك روحت اتجوزت على مراتك والمسكينة سابت البيت ومشت وهمس سابت البيت هي كمان.
مازن: نعم همس سابت البيت راحت فين.
هند بصت لمازن بحزن: مراتك خرجت وهي منهارة من شوية وقالت مالهاش مكان هنا وسطنا وأنها مش شبهنا ولا من توبنا أنت قولتلها ايه يا مازن عشان توصلها للحالة دي.
في اللحظة دي نزلت فريدة ووعد على وشهم ابتسامة نصر خبيثة ومستمتعين بالخراب اللي بيحصل.
فريدة ببرود مستفز: وأنتى زعلانة أوي كدة ليه يا هند ابني وهو حر في حياته يتجوز اللي يعجبه ومحدش يحاسبه.
شريفة اتعصبت من برودها: ليهم حق يسيبوا البيت والله لأنهم فعلا خسارة فيكم وفي عيلتكم دى.
وسابتهم وطلعت على أوضتها
ومازن خرج من الفيلا وهو متعصب.
هند بصت لمراد بدموع: موضوع أخوك وصل لايه يا مراد طمني قلبي قايد نار على حازم.
مراد: مافيش أي جديد يا أمي وفريق الانقاذ وقف البحث أنا من رأيي نعمل عزا ونقفل السيرة دى.
هند اتنفضت من مكانها بانهيار: لاااا طالما ما شوفتش جثة أخوك بعيني يبقي لا يا مراد مش هنعمل عزا أنا عندي أمل في ربنا كبير وقلب الأم دليله أنا مش معتبراه مات أخوك عايش وهيرجع وأنا هستناه لاخر نفس في عمري فاهم اياك تقول الكلمة دي تاني قدامي.
وسابته وطلعت ودموعها مغرقة وشها.
طلع مراد وهو روحه في مناخيره من كتر الضغوط اللي فوق رأسه وقبل ما يدخل جناحه اتفاجأ بروزي خارجة من أوضة حازم أول ما شافها ملامحه اتغيرت للقسوة والغل ووقف قدامها وعيونه بتطلع شرار
وروزي اتخضت من نظرته: في ايه يا مراد مالك بتبصلي كدة ليه.
مراد جز على سنانه وبصلها بغضب مكتوم: ببص لك كدة ليه بسبب دخولك البيت ده حياتي كلها اتقلبت جحيم رفيف بسبب الفيلم اللي عملناه سابت البيت وطفشت وعايزة تتطلق بيتي بيتهد فوق دماغى بسبب الخطة اللي وافقتك عليها عشان أحميكي.
روزي برقت عينيها بصدمة والدموع نزلت على وشها: أنا ذنبي ايه يا مراد أنا اللي قولتلك قولهم اني مراتي ما أنت اللي قولت كدة قدامهم عشان تحميني من علي ابن عمي واهلى أنا مكنتش عايزة أعمل مشكلة بينك وبين مراتك.
مراد سقف بايديه بسخرية: بس النتيجة ايه النتيجة اني خسرت رفيف خسرت البنت الوحيدة اللي بحبها بسبب حمايتي ليكي وللي في بطنك شيلت ذنب مش ذنبي ودلوقتي أنا مش طايق أشوف وشك ده هنا.
وسابها واقفة مصدومه من قسوته ودخل جناحه.
روزي وقفت مكانها كلام مراد قطم وسطها وحسسها انها عبء تقيل وجايبة المصايب للكل دموعها نزلت بحرقة وهي بتفتكر حازم: يا ريتني ما جيت هنا يا ريتني موت معاك يا حازم ولا عيشت الذل ده كله.
حست ان كرامتها متهانة ومبقاش ليها مكان في البيت ده ثانية واحدة دخلت الأوضة بسرعة لمت حاجتها البسيطة في شنطتها الصغيرة ونزلت على السلم بخطوات سريعة والدموع مغرقة وشها ومحدش من اللي في الفيلا شافها وهي خارجة.
خرجت من بوابة الفيلا وأخدت تاكسي وطول الطريق كانت بتعيط وهى حاضنه بطنها بخوف لحد ما وصلت للعمارة اللى فيها شقتها هى وحازم طلعت السلم وفتحت باب الشقة دخلت وقفلت الباب وراه وسندت ضهرها على الباب وشمت ريحة المكان ريحه حازم لسه فى الشقة الشنطة وقعت من ايدها ورمت نفسها على الكنبة وانهارت في العياط: أنا رجعت بيتك يا حازم رجعت ومستنياك ومش هخرج من هنا تاني وربنا يحميني ويحمي ابننا ماليش غيرك يا حبيبي.
جرس الباب رن وروزى استغربت وفكرت مراد جاى يرجعها راحت تفتح اتصدمت لما شافت علي ابن عمها واقف قدامها وعلى وشه ابتسامه كلها شر ...