رواية اسميتها ريحانة ج2 الفصل الخامس عشر 15 ج2 بقلم سلمى جاد
_ صاحبي؟ صاحبي مين؟
كادت الممرضة أن تجيبه باسمه، لكن قاطعها ظهور الشخص نفسه خلفها، وهو يقول:
«أنا يا ياسين.»
انتفض ياسين من مكانه، واتسعت عيناه بعدم تصديق، قبل أن تشرق ملامحه بفرحة وهو يهمس:
« مش معقول .. سليم!»
بعد دقائق، كانا يجلسان على الأريكة يتسامران بمرح كعادتهما.
ياسين بعتاب: «معرفتنيش ليه يا كلب البحر، إنك رجعت مصر؟»
سليم بابتسامة خفيفة: «حبيت أعملهالك مفاجأة.»
«صحيح، عم سعد عرف إنك رجعت؟»
نفى سليم: «لا، لسه مروحتلوش. إنت عارف هو شايل مني من ساعة اللي حصل. مستني أخلص شوية حاجات هنا وأروحله.»
ياسين بحيرة: «أوماال عملت إيه في اليومين اللي نزلتهم مصر بدل ماجتليش لا أنا ولا أبوك؟»
حمحم سليم بخشونة: «كنت بصفي حسابات قديمة.»
وضع ياسين يده على فمه بدهشة: «متقولش ريحانة؟»
أومأ سليم برأسه، ليقول ياسين بضيق حقيقي: «سليم، إنت عايز منها إيه تاني؟ مش كفاية اللي عملته؟»
سليم بنبرة صادقة: «اسمعني يا ياسين، أنا بجد راجع عشان أخليها تسامحني. أيوة، الموضوع مش سهل وهي قافلة كل الأبواب في وشي.. وشبه بتهزأني، بس أنا مش هستسلم.»
ياسين بصدمة: «أوف! هو إنت قابلتها؟»
أومأ الآخر برأسه.
ياسين بفضول: «احكيلي إيه اللي حصل؟ عرفتها إنك عرفت الحقيقة؟»
«مدتنيش فرصة أتكلم، بس أنا اتحججت بموضوع الشغل.»
«شغل إيه؟ هو أدهم السويسي هيوافق يكمل شراكة معاك؟»
أومأ برأسه، وبدأ يسرد له الحوار الذي دار بينه وبين أدهم.
طبطب ياسين: «يا ابن اللعيبة! كويس إنك أخدت أبوها في صفك، لأنه لو مش في صفك من البداية، مش هتعرف تقرب من ريحانة أساساً.»
«هو مش في صفي أوي. إحنا عملنا زي هدنة سلام لحد ما أقدر أخلي ريحانة ترجع تثق فيا وتحبني.»
ثم أكمل بثقة ومكر: «رغم إني عارف إنها لسه بتحبني.»
ضحك ياسين بمرح، وهو يهز رأسه نفيًا: «يخربيت الإيجو بتاعك اللي طالع بيه السما!»
ابتسم سليم: «المهم احكيلي إنت... إيه أخبارك مع المطلقة بتاعتك؟»
ياسين بغضب: «سليم، احترم نفسك.»
أشار سليم باعتذار : « خلاص ياعم أنا آسف. احكيلي بس علاقتكم وصلت لحد فين؟ إنت مكنتش بتحكيلي حاجة لما كنا بنتكلم في الموبايل.»
تنهد ياسين بتعب: «إحنا حاليًا في فترة الخطوبة، لحد ما تحن عليا.»
رفع سليم حاجبه باستنكار: «نعم يا خويا؟ خطوبة؟ بقالكم سنة؟ ده أنا قولت هرجع ألاقيك مخلف منها عيلين!»
ضحك ياسين بسخرية: «يا ريت! بس إحنا حكايتنا مختلفة. آيات مرت بتجربة سابقة صعبة، ومش قادرة تدي لنفسها ولا تديني فرصة إني أغير فكرتها عن الجواز.»
ثم بدأ يسرد له آخر الأخبار، بما فيهم خبر هروب زوج آيات السابق من السجن.
صمت سليم بتفكير: «طيب ما تستغل الحوار ده لصالحك.»
ياسين بحيرة: «إزاي؟»
«قولها إنك عشان تعرف تحميها هي وإياد، لازم على الأقل يبقوا تحت عينيك في البيت كمان، يعني لازم يعيشوا معاك في بيتك، مش في شقة قصاد.»
قطب ياسين جبينه باستغراب: «طيب وإزاي هنعيش أنا وهي في بيت واحد؟»
ضرب سليم على وجهه بنفاذ صبر: «أموت وأعرف طلعت دكتور إزاي بذكائك ده! يا ابني ما هو ده قصدي... عشان تبقوا في بيت واحد، لازم تبقى على ذمتك.»
أشرقت ملامح ياسين بفرحة، وقال بصوت عالٍ متحمس: «تسلم دماغك! أنا إزاي مفكرتش في كده؟»
لكن انخفض حماسه فجأة، وقال: «بس كده هكون بستغل وضعها وبجبرها على الجواز ...لا لا، دي مش أخلاقي.»
نهض سليم بتثاقل، وقال بسخرية: «ماشي يقلبي، خلي أخلاقك تنفعك، بس متجيش تعيط لما تفضلوا مخطوبين لأجل غير مسمى.»
كان سليم على وشك المغادرة، فأوقفه ياسين بلهفة: «يا عم استنى! إنت مستعجل كده ليه؟»
قال سليم بجدية: «بص يا ياسين، مفيش حاجة اسمها أخلاق في الحب، لازم تعمل أي حاجة عشان اللي بتحبه يكون معاك.»
ثم أكمل بنرفزة: «ثم إنت ليه محسسني إنك هتغصبها على حاجة؟ إنتوا مش متنيلين بتحبوا بعض، يبقى سو وات!؟»
ابتسم ياسين: «عندك حق. معلش بقى، أنا جديد في حوارات الخطط والمدبرات. إحنا هنيجي جنبك إيه يا خبرة؟»
طأطأ الآخر رأسه بتكبر: «ميرسي، ميرسي. دي أقل حاجة عندي.»
ثم توجه للباب استعدادًا للمغادرة، ليقول ياسين:
«ما تقعد شوية النهارده. اليوم خفيف ومعنديش حالات كتير، هخلص بسرعة ونخرج نتغدى سوا.»
«لا، أنا لازم أطير عالشركة.»
ابتسم ياسين بتفهم: «آه، أنا نسيت إن فيه معركة لازم تروح لها.»
ابتسم سليم ولم يعلق، ثم غادر، بينما نظر ياسين أمامه في الفراغ، وعيناه تلمعان بتصميم.
_____________________________________________________________
مر الوقت، كانت تجلس في مكتبها تراجع بعض الملفات الخاصة بصفقات مختلفة، وفي الوقت نفسه كان أمامها اللابتوب تتابع عليه آخر الإيميلات بتركيز شديد. كانت تبدو جذابة جدًا بنظارات القراءة الطبية التي استقرت على عينيها الفيروزية، مما زاد من جمالها وهيئتها العملية.
فصل تركيزها دقات هادئة على الباب، فظنت أنها السكرتيرة، لتقول بهدوء بدون ترفع عينيها :
« ادخل.»
فُتح الباب بهدوء، ثم تبعه صوت خطوات واثقة وثابته تتجه نحوها.ريحانة كانت عيناها زالت معلقتين باللابتوب، لتقول دون أن ترفع رأسها:
«فيه حاجة؟»
دوى الصمت بالغرفة، لتقطب جبينها باستغراب عندما لم يأتيها رد، رفعت عينيها على غفلة، لكنها لم تجد السكرتيرة، بل وجدته هو ..سليم، يقف أمامها بغروره وهيبته المعتادة، وبالطبع جاذبيته التي لم تتغير ،بل تزيد بمرور الوقت.
فكان يرتدى قميص زيتي انيق أبرز جسده الرياضي مع بنطال كلاسيك أسود،واضعًا إحدى يديه في جيب بنطاله، وينظر إليها بعينيه السوداوين، يتأملها بحب.
عبست ريحانة بضيق:
«نعم؟»
هز كتفه ببرود وعلى وجهه تلك الابتسامة الباردة :
«هو إيه اللي نعم؟»
«يعني نعم... واقف كده وعايز إيه؟»
اقترب أكثر حتى أصبح أمامها مباشرة، ثم سند على طرف مكتبها ومال عليها قائلًا ببساطة، قاصدًا استفزازها:
«جاي شغلي. إنتي نسيتي إن النهارده أول يوم شغل ليا في الشركة؟»
تنفست بغضب قائلة بانفعال:
«يعني إيه؟ إنت هتفضل تنطلي كل يوم في الشركة بحجة الشغل؟ ما تشتغل في شركتك، وأي اجتماع خاص بالشغل اللي بينا هبعتلك تيجي.»
ابتسم بمراوغة:
«لأ، ماهو أنا هشتغل من هنا.»
رفعت حاجبها باستنكار:
«يعني إيه؟»
ابتسم بخفة، وهو يحاول كتم ضحكته حتى لا تنكشف لعبته:
«يعني أنا هاجي عندكوا الشركة عشان أشتغل الشغل اللي ما بينا ،وشغل شركتي كمان.»
ثم تنهد بأسف ،وقال بتمثيل مصطنع:
«أصل عقبال عندكو، الشركة عندي بنعمل فيها تجديدات. ومكتبي مينفعش أشتغل فيه... يرضيكي وأنا ماشي أتزحلق في برطمان بوية؟»
رفعت طرف شفتها العليا بسخرية:
«يارب، ده أنا أتمنى.»
ثم تابعت حديثها وهي تستند بظهرها عالكرسي، وقالت بابتسامة باردة:
«بس إنت بتتكلم بعشم أوي، بس بأمارة إيه بقى؟ ومين هيسمحلك أصلًا؟ أحب أقولك إني مش موافقة.»
تنهد ببرود، وهو يستدير عنها، ثم جلس على الأريكة الموجودة في ركن المكتب، والمقابلة لمكتبها.ثم ابتسم بخفة، لتظهر صف أسنانه العلوية بوضوح :
«بأمارة إني أخدت الإذن من أدهم السويسي نفسه، صاحب الشركة، وهو رحب جدًا.»
أردفت ريحانة بصدمة:
«بابا؟ بابا وافق تقعد في الشركة هنا؟»
أومأ بتأكيد، ثم فتح الحقيبة الجلد التي يحملها، وأخرج منها اللابتوب ووضعه على ركبته، مستندًا بظهره إلى الأريكة، وفاردًا ذراعيه براحة؛ كأنه ببيته.
بلعت ريحانة ريقها بعدم تصديق، وقالت بتلعثم:
«إنت بتعمل إيه؟»
قال ببساطة، وهو يعمل على اللابتوب:
«بشتغل.»
أردفت بدهشة :
«طيب ما تقوم تشتغل في أي حتة! ده مكتبي لو مش واخد بالك.»
ابتسم بجانب فمه، وهو يحاول كتم ضحكته ويجد صعوبة في التمثيل، ليقول بتأثر:
«اسكتييي... إنتي معرفتيش؟»
وضعت كف يدها على رأسها بتعب:
«إيه تاني؟»
ضم شفتيه الغليظة بصعوبة، قائلا بتأثر مصطنع :
» للأسف أنا معنديش مكتب حاليًا، فهضطر بقى للأسف، وأمري لله، وغصب عني والله، إني أشتغل معاكي في مكتبك لحد ما مكتبي اللي في الشركة يخلص.«
همست بصدمة:
«نعممم؟!»
تنهد وهو يقول باستفزاز:
«تيك إت إيزي يا ريحانة، خليكي عملية أومااال، ولااااا. »
صمت لثوان ،قبل أن يكمل بمراوغة:
«ولا خايفة تضعفي عشان لوحدنا في المكتب؟»
ثم أردف، بتمثيل الخوف، وهو يحاوط جسده بذراعيه بحماية:
«لأ ونبي يا ريحانة، إلا الشرف! هو الراجل مننا عنده إيه غير سمعته؟»
جزّت على أسنانها بقوة، لدرجة أنها أصدرت صوت صرير من احتكاكها، ثم نفخت بضيق وعادت بنظرها إلى اللابتوب، محاولة التركيز في العمل.
بينما لم تلاحظ نظرات ذلك الجالس أمامها، وهو ينظر إليها بنظرات ماكرة، راضيًا عن نجاح خطته، بينما عيناه تتأملانها بحب، مستمتعًا بغضبها الذي كان هو السبب الرئيسي فيه.
_____________________________________________________________
في تمام الساعة السابعة مساءً ،كان للتو عائدًا من العيادة، فقط مرّ على شقته ليأخذ شاور سريع. خرج من باب شقته والتوتر واضح على ملامحه... نعم، فالآن قد حان وقت المواجهة. سيعرض عليها الآن طلبه بالزواج منها.
دق باب الشقة بهدوء ينافي تمامًا الحرب القائمة بداخله، انتظر ثواني قبل أن يُفتح الباب، وتظهر هي بهيئتها الملائكية، حيث ترتدي إسدال صلاة بسيط باللون الأبيض، منقوشًا بقلوب باللون الوردي، مع حجاب من نفس النقشة أحاط وجهها الأبيض الملائكي.
ابتسمت بدفء بمجرد رؤيته، قائلة بصوتها الرقيق بطبيعته:
«رجعت من العيادة؟»
أومأ برأسه بابتسامة خفيفة:
«آه، لسه راجع. يادوب خدت شاور وغيرت هدومي.»
آيات بعفوية أردفت بقلق:
«يعني خدت شاور وطلعت في الهوا؟! كده ممكن تاخد برد.»
نظر لها ياسين بصدمة، ولم يستطع أن يكتم ابتسامة الدهشة التي ارتسمت على ملامحه. أتخاف عليه؟ أيهمها سلامته؟
أما آيات، ففتحت عينيها بصدمة بعدما أدركت ما تفوهت به للتو، لتضم شفتيها بخجل.
ياسين بابتسامة، وهو يمسح على خصلات شعره الرطبة أثر الاستحمام:
«إياد نايم؟»
أومأت برأسها:
«أيوة، جيه من الحضانة وخلص وجباته ونام على طول.»
هز رأسه ببطء، ليحل الصمت مرة أخرى. ياسين يتنفس بتوتر، وينظر لها بتردد مما سيقول، ليحمحم بخشونة قائلًا:
«أحم... كنت عايز أتكلم معاكي في موضوع مهم.»
آيات باستفهام:
«موضوع إيه؟»
بلع ياسين ريقه بصعوبة، لا يعلم كيف سيبدأ الحديث، ليقول بتردد:
«بخصوص موضوع طليقك. إنتي طبعًا عارفة إنه أكيد مش ناوي على خير، ودلوقتي سواء إنتِي أو إياد بقيتوا في خطر.»
أومأت برأسها بحزن شديد:
«أنا بجد نفسي يبعد عننا بقى، أنا...»
لكن الكلمات توقفت في حلقها عندما سمعت ياسين يقول فجأة، وهو مغمض عينيه:
«تتجوزيني يا آيات؟»
آيات : ؟!!!.................
_____________________________________________________________
في نفس الوقت، ولكن في شركة السويسي.
دقت الساعة السابعة مساءً، وقد حلّ الليل سريعًا. السماء مزينة بنجوم لامعة، مما أضاف شعورًا بالهدوء والسكينة، خصوصًا مع نسمات الهواء الباردة، فتتطاير الأشجار برتم رومانسي هادئ. ضوء القمر، الذي كان بهيئة البدر المكتمل، كل ذلك كان ظاهرًا من شباك المكتب الزجاجي الشفاف.
الهدوء مسيطر على المكان. كانت تجلس خلف مكتبها، وبالنظر لهيئتها الخارجية، تظن أنها تعمل بتركيز ليس له مثيل، ولكن في الحقيقة كانت تختلس النظر للجالس أمامها على الأريكة.
بلعت ريقها بصعوبة وهي تتأمل هيئته الجذابة... يجلس براحة، فارداً ذراعيه على مسند الأريكة، يفتح أزرار قميصه لمنتصف صدره، فتظهر عضلات صدره الصلبة بوضوح. رفعت عينيها أكثر، لتجد تفاحة آدم التي تزين عنقه، خصوصًا مع وضعية رقبته التي جعلتها تبرز أكثر.
ضوء اللابتوب المنعكس على بشرته الخمرية، بينما عيناه السوداوان مسلّطتان بتركيز على اللابتوب، وأصابعه تتحرك بسرعة رهيبة على الكيبورد.
شهقت فجأة عندما رفع عينه على غفلة، لتتلاقى أعينهما لثوانٍ. خفضت نظرها سريعًا، وهي تمثل الانشغال باللابتوب، بينما أنفاسها تتعالى بتوتر، خصوصًا عندما شعرت بنهوضه من على الأريكة واقترابه منها.
بدأت بفرك أصابع يدها بتوتر، وهي تشعر باقتراب خطواته أكثر نحوها، حتى انقطعت أنفاسها عندما شعرت بظله يمر بجانبها، بل ويتجاوزها ليقف في الشرفة.
فتحت فمها بصدمة. أكانت تظن أنه يقترب منها؟ هزت رأسها بغضب، وهي تحاول استعادة تركيزها الذي سلبه منها، لتنهض من على الكرسي وتغلق اللابتوب بغضب.
بينما سليم كان يقف معطيًا لها ظهره العريض، وعلى وجهه ابتسامة ماكرة، وهو يراقب انفعالاتها الواضحة، وهي تلملم الملفات من على المكتب بغضب، والضيق مرسوم على ملامحها.
أطفأت الضوء الموجود على طاولة مكتبها، ولحظها كان هو الضوء الرئيسي، ليصبح المكتب معتمًا إلا من ضوء القمر القادم من الشرفة.
قالت بضيق وهي تمر بجانبه:
«أنا خلصت شغلي وهروح.»
كادت أن تمر خطوة إضافية، لكنها شهقت بصدمة عندما شعرت بيده تسحبها بقوة وتدفعها نحو زجاج الشرفة، ثم اقترب منها، لتصبح محاصرة بينه وبين الزجاج.
شعرت بارتفاع دقات قلبها، بينما تعالت حرارة جسدها من هذا القرب الرهيب، لدرجة أن أنفاسه الساخنة كانت تخبط في وجهها بدون رحمة.
استدارت برأسها، لتجد زجاج الشباك خلفها، بينما أمامها يوجد حائط بشري .. وبالطبع كان هذا صدر سليم .
رفعت عينيها نحوه ببطء، لتجده ينظر لها بعمق، وعيناه السوداوان تلمعان بشكل غريب. شعرت بارتفاع دقات قلبها، بينما تعالت حرارة وجهها من شدة التوتر.
همست بضعف، بينما من داخلها كانت ترتجف:
«سليم...»
#رواية_أسميتها_ريحانة
#الجزء_الثاني_من_رواية_عشقت_محتالة
#الكاتبة_سلمى_جاد
قرأت كام كومنت بالصدفة ع أخر بارت نزل إن بغير كلامي ومش ملتزمة بالاتفاق عشان فصل يوم الخميس منزلش ..حبايبي أنا بعت الفصل عالجروب يوم الخميس بليل الساعه 12:30 بالظبط لكن تاني يوم اتفاجئت إنه لسه منزلش واستنيت لحد ما ينزل عشان أنزلكم الجزء التاني .فيه تجديد فالجروب ومبقاش مسموح للكتاب بالنشر في أي معاد زي الأول وأكيد شوفتوا بوست الأدمين اللي فيه الكلام ده ،ف أنا ممكن أبعت البارت في وقت ويقعد فترة لحد ما يتنشر .زي مثلا البارت ده أنا والله ماعرف هينزل امتى عالجروب 🙂😚
دمتم سالمين أحبابي وأشوفكم على خير الفصل القادم ❤️..