رواية بلسم الفصل السادس عشر 16 بقلم هند الهيباني
طلعت من الحمام... ودخلت على الغرفه لقيت امي بتفرش.
قلت ليها خليهم بفرش الملايات انا...
قالت لي انتهيت خلاص.
قلت. ليها والكان جى منو. ؟!
قالت لي صحي ذكرتيني....
الجات قبيل كان اسما منو..
قلت ليها قصدك خالتو سناء؟!
قالت لي ياها...
قلت ليها مالا نست حاجه.
كلتوم :لا قالت انو قبيل قابلتك في بيت سمر البتدرسيها
وانو عحبا تدريسك.
وانو عاوزاك تدرسي بتها .. طالبه جامعيه.. وعندها مشكلة مع الانجليزي وحنستني كتير انو ما ترفضي لأنها محتاجه ليك
والسعر البتطلبي ماعندها مشكله...
كان عرض مغري بالنسبه لي!
ما فكرت مرتين ولا اظن افكر.
انا وناس البيت محتاجين للقروش
جامعتي م فضل ليها الا ايام بالعدد وتفتح.
وانا ماعندي قروش للمواصلات ولا لدفع رسوم السمستر
التفكير في الحاجات الزي دي رفاهيه لناس تانيه...
بس انا مع ظروفنا دي ما عندي الا اني أوافق حتى لو
الوقت كان ضاغط بالنسبه لي....
مدت لي... ورقه وقالت لي دا رقما قالت ليك ارجعي ليها هنا...
شلت الورقه من امي...
وبعدا ابوي جى داخل وانشغلت في تحضير الاكل وتجهيز الموية ليه والجبنه...
بعد صليت المغرب درست اخواني... لانو بكريتا كانت امتحاناتهم....
بعدا صلاة العشا...
ورقدت في سريري... اتذكرت الورقه الادتا لي امي...
شلتها واول حاجه مشيت كلمت ابوي بعد وافق لي..
شلت تلفونو واتصلت. على الرقم.....
#سناء
دا كل الحصل الليله وصراحه ماشاء الله تبارك الله
ذوقك سمح وعزلك سمح عفيت منك ياولدي...
ما زي بنات الزمن الفاكات وتابعات الموضه وقلة الأدب
بت رزينه والزيها بقو نادرين.
اتوكل وانا من الليله مدياك رضاي في موضوعا دا
وشاحده ربي يلمكم عاجلا غير اجل ويفرح قلبك
بعد سنين التعب التعبتها دي لانك تستاهل كل خير.
بس انت متفق معاها؟!
#مازن
سرحت في كل كلمة بتقولا امي.
وبفكر في نقيض كل الكلام دا جواي..
الممكن يحصل بكرا واليوم كلو ماشي بصورة
ما ختيت ليها نفس السيناريو تبع اليوم دا
بس كنت متوقع جزو منو...
عاينت بعيد وانا بسمع في سؤال امي الاخير...
ورديت بي جمله واحده ما زدتها
لا بس حا توافق...
قالت لي قصدك على التدريس الطرحتو عليي بعد طلعت منهم ورجعتني ليهم ولا على الزواج منك...!؟
عاينت بعيد وقلت ليها الاتنين...
قالت لي والله وواثق..والعرفك شن.
وقبل ماتتم حروف الكلمة التلفون رن...
دا منو الداقي لي دا يارب
الوووو
بلسم:خالتو سناء كيفك معاك بلسم عرفتيني
سناء: اهلين يا مرحب اكيد وانتي بتتنسي يابلسم
مازن:ابتسم ابتسامة غريبه وهو بسمع في الحوار الداير دا
وبعد خلصت...
والله وتوقعك صدف...
عقبال التاني يارب
كدي النقوم أوري ابوك..
قلت ليها لا..
ماعاوز اي واحد فيهم الاتنين يعرف أي كلمة بينا...
سكتت مسافة وقالت لي خير....
قلت ليها قالت شنو
قالت لي موافقه اجي ادرس بتك...
وبجيك بكره الساعه ٨ نتفق على المواعيد...
وانهينا الحوار دا....
#بلسم
كنت مبسوطة وانا بفكر في الشغل البقى يجيني لي محلي
دا بدون تعب وانا ممنونه للطف ربنا ورحمته ولو شكرتو من هنا للصبح ما حا اوفيه حقو..
الحمدلله... نمت وانا متمنيه غد أجمل من يومي دا..
أشرقت صباح يوم جديد شايلة في كل ركن بيت قصة مختلفه...
صليت الصبح حاضر...
ورتبت ملابس اخواني...
وبعدا راجعت ليهم... الساعه سبعه شوكه كلهم طلعو لمدارسهم
بعدا....
رتبت البيت وبخرت وعملت لي ابوي جبنتو. وعملت الشاي.
خلصنا وابوي طلع كان بخت الدرداقه والحافظات عند بتاع محل هناك والصباح بمش هناك يعمل العصير... ويشتري ليه التلج....
وانا جهزت عبايتي البنية ومعاها طرحتا عشان حا امش ليهم الساعه ٨....
#عودة
#فاطمة
كنت حاسه بخنقه وقبول في نفس الوقت..
عاوزة اقعد معاه واسألو واعاتبو واقول كل الفي قلبي بس ماقادرة....
اكتفيت بالحصل دا وسكتا...
يمكن لانو السكات أفضل لي..
عشان ما بكلمة واحده ارجع اهدم كل البنيتو دا....
بس عارفه حاجه واحده ولو حتى اتصلحت علاقتنا دي ظاهريا يستحيل تتصلح الرابطة البينا لانو الاتكسر عمرو ما برجع يبقى زي ماكان اول مرة حتى لو اترقع واتلصق حا يفضل دايما
ظاهر عليه الانكسار دا... وشكلو ماسمح وباهت.....
بس اعمل شنو... دا قدري و الابتلاء الابتليت بيه ماعندي اي شي غير اني اصبر وانتظر من الله الجبر...
#طلال
كنت مبسوط بي كل تفصيله عملتا لي اليوم....
وانا مستغرب حاسي كأنو حلم مانفسي اقوم منو..
قعدت سنين طويله وانا بتمنى لحظة زي دي..
انا عارف اني كنت غلطان في حاجه..
بس انا كمان زعلت واتضايقت من العمله العملتا
وقعدت سنين عشان بس اقدر أوقف على رجلي وكل
يوم بشتغل فيه عشان ارجع اجمع قروش
عشان اجمع مبلغ الأدوات الكسرتا لي بتسرعا
برجع اتملي منها الف مرة
كل تعب كنت بتعبو كل انكسار كل شعور م سمح
كان وشها برتسم في مخيلتي كسبب اولي وأساسي
لكل الشقا والضيق الأنا بسببو بقيت كده....
كم ساعه بعدا جو الأولاد سلمت عليهم.
احساس سلامهم لي بارد...
كنت بتقطع الف قطعه وانا شايف الجفا دا منهم
بس ما منهم مني...
ماكان من الأساس احشر مشكلتنا مع الاولاد..
ماكان اغيب كل الغيبه دي وهم محتاجني
حا يكبرو وعقدة بعدي عنهم...
عمرا ما حا تفارقهم
قاعد بين نارين. .
ما كنت عاوز الوقت يمش.. بس مشى وطلعت وانا ما نفسي اطلع
#فاطمة
بعد اليوم دا انقضى بقيت احس بي مسؤلية تجاه أولادي ونفسيتهم خصوصا انو كان بعاين ليهم وعلى وشوو باين متأثر تأثير لاول مرة اشوفو فيه...
قررت اني ابدا بداية جديده عشاني اولا وعشان أولادي تانيا..
عشان جوطتي ونقتي الكتيرة وخلق مشاكل من ماف
ما جاب لي الا الهم والغم وسوء الحال...
بداية جديده وبإذن الله ح تكون خير....
#بلسم
لبست ملابسي وطلعت ركبت مواصلات قاصده العنوان الوصفتو لي....
نص ساعه حتى وصلت المكان ووقفت بره الشارع..
مكان شارع الصيدلية الوصفتا لي...
وقفت بره وانا ماعارفه اعمل شنو...
لقيت بتاع طبليه قلت ليه ممكن اتصل بي تلفونك دا دقايق..
طلعت الرقم من الشنطه واتصلت بعد تلاته رنات ردت..
قلت ليها انا جمب الصيدليه ها امش على وين.
قالت لي امشي بالشارع دا طويل... تمشي لا شرق بعدا تلفي يمين البيت غرب بقاله......
قلت ليها خالتو معليش لكن صراحه انا لا بعرف شرق لا غرب ممكن توصفي لي بي امشي طويل والف يمين وشمال وكده
ضحكت ضحكة طويله...
حسيت بالاحراج قالت لي والله عسل انتي ياخ كدي دقيقه
وقفت مسافه وانا حاسه بالاحراج من بتاع الطبليه انو مكالمتي طولت...
بعدا قالت لي خليك واقفه مكانك ولدي حا يجيك....
#يتبع..