رواية بلسم الفصل الواحد والاربعون 41 بقلم هند الهيباني

رواية بلسم الفصل الواحد والاربعون 41 بقلم هند الهيباني

اتقفل الخط وحسيت في اللحظة دي بي  خوف شديد ماعارفه سببو...في شنو يابلسم خايفه. مش دا الكنتي بتتمنيه..

مش دا القبل ايام كنتي مخططة تعمليه بس ما اتوفقتي فيه.. الان براه رمى نفسو، الان انتي بره القصه خايفه من شنو...

وجع شديد وضيق في قلبي.. ماعارفه سببو....

#فاطمة

كلام بلسم خفف عني... 

وخلاني اخف شويه... 

بس احساس الانكسا**ر الحسيت بيه.. 

بعد الحصل دا وبعد طلوعي منهم.. بحزن ماقادرة اوصف وجعو.. 

طلال ما لحقني.. 

ولا حتى اتصل... 

ولا جى... 

والشعور والتصرفات دي زادتني اكتر... حزن على حزني 

ماف أقسى على الواحده من انها تحزن ويتم تجاهلا كأنها ما مهمه ولا احساسا بشكل فرق.... عمري كلو ما كنت متطلبه... 

ولا اتمنيت حاجه كبيرة ولا شي صعب.. 

كل الكنت عاوزاه من طلال الاعتذار... وتبرير كل الحصل دا بس للاسف.  كان ولازال غير مبالي بي... 

ودا خصم من جواي الكتير... وبقيت حاسه برغبه اكتر في البعد وحاسه انو دا المفترض يحصل... 

يستحيل انسان يكون بحب انسان يتركه كل الوقت دا بدون مايسأل أو يصل... 

يارب لطفك يارب.  يارب اعمل لي الفيه خير لي.. 

أن كان طلال دا فيه شر لي وسبب لي حزني وألمي اصرفه عني وارضيني وطلعو من قلبي وان خير طمني طمني يارب.  

#طلال

من مكاني رجعت البيت لي زينب...

رغم تصرفا، ورغم العملتو والماعجبني قررت اني أرضي عليها...

زي ما فاطمة زعلت وغارت ماحا اقدر الوم زينب في غيرتا...

شلت معاي باسطة ولبن فتحت لي الباب دخلت واديتا الحاجات بعدا قعدت..

جابت لي موية وقعدت... قلت ليها حصلت مشكله في البيت داك وانتي عارفه ما عندي استطاعه لي إيجار..

فجبتهم هنا يازينب..

هاجت وبقت تقول لي وانت شنو الدخلك بيها مشاكل أو لا وليه اصلا تفكر ليها في إيجار وشنو هو زاتو البقى جديد ياتو يوم كنت معاها كده ومتين اصلا رجعتو اتصافيتو لا كمان ومبخرين وعاملين جبنتكم وهي يايمه التقول ماشه عرس مكياج ولبس التقول عمرا لسه في العشرينات وعامله يادنيا مافيك الا انا.. انت قايلني غبيه؟! طلال اثبت وخلي عينك على واحده مننا بس عشان ما تفقدنا الاتنين واعتقد عارف حاتخلي عينك على منو!.. ناسي ورشتك!!! ورزقك الاتقطع بي سببا...

نص ساعه وزينب ما كانت بتسكت...

نص ساعه من الأفكار السا**مة اللي كانت لولا الموعظة السمعتها قبل مسافه اقوى منها كان ضعفت ورجعت كل الضيق الاتملكني اول ما حصلت بينا المشكله دي قلت ليها تمام....

طلعت نادت عليي ماشي وين قلت ليها عندي مشوار..

وطلعت وانا حاسي بي إحباط..

ماعارف أصلح شنو وابدا من ياتو خراب...

حياتي بقت بين الحطام... وكل حته بمشي فيها كأنو فيها الغا**م  حا تنفج*ر في اي وقت...

مشيت في ليلي دا لي فاطمة... يستحيل اخليها تنوم الليله دي وهي حاسه اني ماهاماني ولا هاميني زعلا.....

#بلسم

كنت داخله مارقه غالبني القعاد.  الساعه كانت ماشه على ١٢ وماف جديد... وللان ماظهر... 

تعبانه من تفكيري الما مفهوم وخوفي المامبررر انا مالي ومالو

ومن متين بقيت اهتم اذا كان بخير أو لا.. 

بس كنت بقول في الكلام دا وجواي لسه الخوف في مكانو... 

وللأسف بقدر اكذب في الكلام بس ما بقدر اكذب على قلبي.... 

وانا متضايقه..و خايفه من الحاجه ألفي راسي تكون حصلت... 

#عودة.... 

#طلال... 

وصلت أخيراً.... اخدت وقفه مسافه لحد ما اتوكلت على الله ودقيت الباب.. بعد فترة من الزمن... سمعت صوت أقداما...

فتحت لي الباب وهي متبلمه بالتوب.. 

اول حاجه شفتها عيونا اللي كانو وارمين... حسيت بي ضيق. 

كنت ولا زلت سبب حزنا...

كانت حا تقفل الباب راجعه بس ثبتو... 

دخلت الباب وقفلتو وراي.. مشت من قدامي وداخله باتجاه الغرفه عرفت عاوزة تعمل نفس حركة يومتا انها تخش وتقفل وراها الباب.. جريت وسبقتها وقعدتها في الكرسي وقلت ليها فاطمة اسمعيني... 

قالت لي ماعاوزة اسمع.. 

بقت ماعندي رغبه في إني اسمع اي شي.. 

كانت بتعاين بعيد مافيني... 

شفت فيها انسانة ختت نية أمر... واضح من تعاليم وشها وثباتا كلام انسان ونظرات شخص بقى خالي من كل شي... 

قلت ليها وانا بقيت حاسي بالضعف والخوف... 

فاطمة... اسمعيني عليك الله اديني فرصه!... 

انا والله ماكنت قاصد أعمل كده واغضبك 

بعدين انتي عارفه انو الحصل معانا دا بسبب انو انتي كان غلطتي و...  

اتلفتت تجاهي وشفت دموعا... بتنزل ورا بعض. 

قالت لي غلطتي!!!. 

قامت على حيلا وقالت لي.. انت مستوعب نفسك بتقول في شنو... 

جايي من بيتك.. داقي الباب وبتحنس فيني عشان اسمع منك اغلاطي اللي عاوز تبرر بيها خذلاني والتخلي عني ..

عاوز تبرر ياتو غلط عملتو... عشان تغطي على الكعب السويتو لي.. 

صاح كسرت ليك عدة شغلك... 

اخدت كم فترة وصلحته... ورجعت الورشه تبعك عادي والاتكسر اتبدل بالاحسن والأجدد... 

حاجه زي دي زعلتك... 

وانت ناسي انك كسرتني انا قبل ما اكسر حاجاتك.. 

كسرت قلب لو قعدت عمرك كلو عشان تصلحه ما بتصلح. 

جايي تبرر انو يجيبو لي خبر زواجك  اخواتك ولما واجهتك ترد عليي رد بمساخه وتطلع بدون مقدمات... 

عاوز تبرر لي الااااف الساعات  اللي قضيتا وانا بدفع تمن زواجك.. بي تعبي... وراحتي عايشه فيها دور الام والاب 

بنضف وبطبخ وبغسل وبدرس الاولاد وبطلع كمان اشتغل اجيب القروش.. انت مستوعب انا الحاصل لي شنو كان!... 

مستوعب اني اشتغلت كم مرة، واشتغلت شنو عشان تشوف أولادك بصحة... ماكلين، شاربين، متعلمين...

ماجربت يوم واحد في السته سنة تسألني جبتي اكل من وين شغاله شنو. تعبانه ولا الحاصل معاك ...

كم ليلة بكيت وانت هناك مبسوط بي حياتك الجديده ولا كأنو في زوله كانت في حياتك... 

بعدا دا صبرت... ما وقفت في محكمة ما اشتكيت ولا جى يوم شحدتك فيه تصرف على أولادك... 

عمرك ما كنت كده بقيت لي انسان غريب س*ئ 

غير مبالي.. 

صبرت واستحملت بقيت اتابع في شغلي من البيت والبيع... 

والتسويق ألفي النت وكلو كان يادوب بكفي... 

استحملت فكرة واحده مشاركاك معاي أو بالأحرى اخدتك مني. 

استحملت كل شي ما وقفت معاي ولا وقف معاي زول غير الله... وجارتي اللي يوم طالعين أبيت ترد عليها وقعدت تحدر فيها استحملت كل دا.. وفي الاخر قررت اديك فرصه تاني.. 

ورجعت ابذل اي شي عشان ارضيك وابهرك

للاسف ما كافأتني الا بي كسرة الخاطر... 

قلت ليها وانا موجوع لي كل كلمة بتقولا..

وعي بتبكي بي حرقه. قالت لي طلال 

انا عملت ليك شنو عشان تحاول تأذيني كده. بعد ما وافقت وسكت واتقبلت فكرة زواجك توديني بيتا وتجي ترمي لي الكلام كده بالطريقه دي... 

صدقيني انا جواي مات تجاهك... 

صدقني لو فكرت بكل الاتجاهات اتجاه واحد انو انت  انا اخر زول بهمك قال لي عليك الله خليني اشرح ليك.. اديني فرصه

قلت ليه الشرح لزول عاوز يكمل... وفرصتي اديتك ليها من دخلنا الغرفه دي سوا بس للاسف الفرصه الاديتا ليك دي أعلنت نهاية كل شي.. لايكلف الله تفساً الا وسعها وانا دا وسعي يا طلال( طلقني).... 

#بلسم 

ماكان جايني نوم.. ماشه وجايه. . وانا بفكر وبفكر لحد ما سمعت صوت الباب تبع غرفتي بفتح. 

اتهجمت.. مازن!! 

قال لي تعالي غرفتي.. 

بقيت مافاهمه شي.. قبل دقايق كان في المهمه حقتو ديك 

وسامعه صوت الشرطة وانا عارفه بل واثقه ٢٠٠ في المئة انو الشي الشايلنو ماكان شي عادي.  

كيف يا مازن طلعت منها! بل كيف الان واقف قدامي بعد ساعات بس وهو لسه باقي نفس الشخص بنفس البرود... 

مشيت وراه وانا محتارة.. عاوز بي شنو... 

دخلت وراه قعد في السرير وقال لي... ليه الغرفه دي جايطة كده.. 

سكت من غرابة طلبو وماخليتو حتى يتم الكلام بقيت اضاير فيها لحد ما خلصت... 

بعدا قلت ليه خلاص انتهيت عاوزة امش... قال لي اعملي لي عصير ليمون. طلعت وانا ساكته للمرة التانيه ومشيت المطبخ بقيت اعمل فيه جى فيني عم جلال سألني من مازن.. 

قلت ليه ايوه جى.. قال لي تمام حا اطلع ليه... 

بعد مسافة جى راجع ومعالم الهم كلها في وشوو..

للاسف اكيد مازن رجع وغلط معاه في الكلام...  

طلعت الجك راجع وزدت الليمون.. 

كبيت كبايتين وطلعت بره ومشيت باتجاه عم جلال وقلت ليه اتفضل... 

ابتسم لي وقال لي جزاك الله خير يابتي..

العبرة خنقتني وانا بشوف فيه مهموم كده... 

وولدو بتصرف معاه بصورة سيئة زي دي.. 

قلت ليه ما تشيل هم بإذن الله حا يتصلح وحايدرك قيمتك. 

قال لي عاذره على المر بيه حا اخليه على مهلتو تاني وما حا أسألو كتير  لحد ما يتعافى من. الحصل دا 

قلت ليه أن شاء الله مشيت وخليتو في نفس المكان وطلعت 

من وصلت فوق وعاوزة اخش لقيتو واقف متكي في الباب 

بلعت ريقي من الخوف... 

شال الكباية مني وبقى يشرب... قال لي رجعيها المطبخ وتعالي.. 

حسيت نفسي زي اللعبه... بس اعمل شنو. 

من الأساس ما ممكن ادخلا جوه وأبيتا وهي وسخانه...

وديتا وجيت راجعه وقررت اني امش غرفتي بس للاسف لقيتو واقف في نفس مكان قبيل دخلت.... 

رقد في السرير وانت بقيت واقفه منتظرة يقول لي اي شي بس ماقال... 

#المعلم.. 

ههههههه دا الكلام الصاح.. 

ايوه ايوه... شفتو كيف بختار ناسي بحذر 

انا ما اي زول بكون في جماعتي... 

عاوز مستوى زي مستوى الاتنين ديل.... ماعاوز لعب.. 

ولا شنو يا ابو حميد.. 

ايوه..... 

المعلم :ها مهمة بعد بكره ما تنساها.. سوق معاك حيدر وعباس.. 

ردد لا انا من اليوم ولي قدام.. ماعاوز اشتغل مع زول غيرو... 

المعلم :ههههه  لكن كده ما كتير.. وباقي الرجال الماشادين حيلهم ديل نفكهم لي منو.. 

ديل تفكهم عكس الهوا انت قايل الجايي لعب.!. 

الجاي اتقل من كل فترة مضت.... 

الجاي ماعاوز ولا غلطة وصدقني الجاي دا ما حاينجح الا بالقيصر. لأنو الشفتو اليوم كان كبير ... 

المعلم :شفت شنو؟! 

#بلسم 

كان ساكت مده طويله لا عاوز يتكلم لا عاوز يخليني امش 

قررت انهي لحظات الصمت دي واسألو الحصل شنو... 

اتوترت غمضت وفتحت واستجمعت شهادتي وقلت ليه قبيل كان في صوت في التلفون وسمعت تقريبا شرطه.. 

في حاجه حصلت؟!..... 

سكت مسافه... بعدا وهو مغمض عيوني قال لي تعالي.. 

مشيت باتجاهو مفتكرة حا القى اجابه.. 

فاجئني بي كلمتو عصري لي ضهري...

عفواً!! في شنو! ودا شنو البحصل هنا.. هل هو بستهزئ بي!!. 

كرر الكلام لي مرتين.. لا اراديا مديت يدي وانا مستاءة وبقيت اعصر ليه فيه.... 

#مازن

سؤالا رجعني للحصل قبيل... 

من شفت مكالمتا ماقدرت الا أرد.... 

وأثناء ما بتكلم سمعت صوته وهو بقول لي الشرطة قدامنا وبعدو وقفو جمب الشباك وسألوني شنو الشاحننه

#ابو_حميد

وقفو قدامنا نقطة تفتيش... 

فيهم ٦...

٣ منهم جنب شباكو... 

وسألوه كلامو ونبرته وهو بقول ليهم شايلين قش لي بهايم... 

ووصفو وكلامو وقعدتو الما اتغيرت.. 

لدرجة قربت أصدق انو نحن فعلا شايلين قش بس ماشي غيرو ما رمش ولا ململ وهو بتكلم بكل اريحيه.. وكأنو نسى كميه ال....... الكانت قاعده تحت القش وممكن تظهر بسهوله عند أول لحظة يلمسو فيها.. 

ابتسم ابتسامة. ذات مغزى وهو بردد صحي 

قيصر.... . 

#اسعد 

شنو الحصل وخلا بلسم تقول الكلام دا.. 

بل كيف انا ازعل منها وانا ماعارف شنو الدفعا تقول دا... 

رجعت لي ابوي بي مكالمة ووريتو الحصل بعدا قفلت.. 

وتابعت تفكيري شنو الممكن يكون غيير راي بلسم... 

بس إجابة واحده حات في راسي.. 

اكيد مازن هو السبب وانا ماحا يبقى اسمي أسعد لو مارجعتك المكان الجيت منو... 

ابتسم ابتسامة واسعه وهو بردد كيف راح من بالي.. 

بل ليه مافكرت بالحاجه دي... 

إذا ما حا اقدر أرمي مازن في السج*ن واخليه يطلق بلسم بالطريقه دي... يبقى يامرحبا بالطريقه التانيه.  

من اليوم الأبى يحصل لي بالطريق االساهل والنضيف  حا اقلعو قلع بي أي طريقه مهما كان مدى سو*ءا   بعتذر يا بلسم... بس ماعندي خيار....... 

#عوده

#مازن 

رجعت البيت وانا بفكر هل نامت ولا لا.. 

شنو كان ردة فعلا لما سمعت كده... 

خافت، ولا اتبسطت.. 

اترددت ادخل غرفتا أو لا... 

بس في شي كان بدفعني دفع.. 

فتحت الباب ولقيتا ماشه وجايه في الغرفه 

ماعارف اتبسطت ليه... 

هل كانت قلقانه عليي. 

لحظة شافتني ماكان عندي اي شي اقولو وعشان ما تفكر اني جاي اشوفا.... قلت ليها تلحقني الغرفه... 

كنت كل مرة بتحجج بي حاجه.. 

وما عارف ليه ماعاوزا تمش من الغرفه.... 

لحد طلبي الاخير... 

اللي كل ما تطلع مني كلمة بستغرب في شنو يامازن... 

مازن اصحى يا مازن... 

صوت التلفون برن

وقفتها وقمت على حيلي... 

#بلسم.. 

مشى باتجاه الباب فتحو وعاوز يطلع... 

بس قلع المفتاح من الباب حتى طلع... 

قفل الباب.... 

دقايق ومشيت عشان اطلع.. 

لقيت الباب ما بفتح... 

دا شنو؟! 

دا شنو الجنون البعمل فيه دا.. 

ليه يقفلني هنا... 

كنت بعافر وبحاول في الباب بس يئست.. 

ومشيت باتجاه السرير قعدت وانا مستاءة وبنبذ فيه جواي بكل اوصاف الدنيا... 

شلت الغطى ورميتو في الأرض وبعدو المخده، وبعدا شلت مفتاح عربيتو رميتو ومسكت ورقه كانت قاعده رميتا

بس وقفت مسافه وانا لمحت شي ..... 

اتحركت براحه وشلتها من الأرض......

وشفت........ 

#يتبع..

             الفصل الثاني والاربعون من هنا 

   

          لقراءة جميع فصول الرواية من هنا

تعديل المقال