رواية بلسم الفصل الواحد والعشرون 21 بقلم هند الهيباني
اتجمدت في مكاني وانا بشوفو.....
واقف وساند ضهرو على الحيطة بكل البرود ألفي الدنيا..
حسيت بثقل المكان، والهوا، احساس بالرعب اتملكني دفعه واحده وانا بعاين للواقف دا جى عليي بخطوات بطيئة..
قررت اني امش من جنبو..
مجرد الوقفه هنا كانت بتأذيني..
اتحركت خطوتين لحد ما حسيت في زول بمسك طرف عبايتي وبجرها، اتلفتا بخوف وانا بمسكا وبقول ليه في شنو في شنو..
قال لي المرة الجايه... ما القاك بتحومي قدام البيت دا بي أي صورة من الصور ولا القاك جنب الإنسان دا لي أي سبب من الأسباب...
غمضت عيوني وفتحتها وجمعت كل قوتي وشجاعتي وقلت ليه وانت منو عشان تمنعني....
ضحك صحكة صحت الوجع جواي، صحت شعور حاولت اتناساه ومعروف قدمو لي ودين في رقبتي اشترى بيه موافقتي وسكوتي وكرامتي زاتا...
الدموع اتجمعو في طرف عيوني...
اتلفتا عشان امش قبل يشوفا بس وقفني مرة تانيه وهو بقول لي انا قلت ليك امشي؟!...
ماقدرت امسك دموعي اكتر... نزلت بدون اراده مني انها تنزل.. فكاني بعدا ومشيت للبيت مشيه واحده وانا ببكي في الشارع وبكتم في صوتي من كترة الوجع واحساس العجز الاتملكني....
#مازن
جيت وانا بحدد موعد جيتا...
واقف ،منتظر طلعتا..
وعند اول طلعه ليها شفتها واقفه معاه...
وشفت ،كمية الإعجاب البعاين ليها بيه
اللي كل الدنيا لو شافتو حا تعرفو.. الا هي..
انتظرت لما محادثتهم تخلص..
جات....
نظرة الخوف ،الشايفا في عيونا...
ومشيتا... وقفتها وانا بقول ليها
تاني هنا ما اشوفك ولا تكون جمب الإنسان دا
لأي سبب كان...
قالت لي بصفتك شنو... وصوتا كان مرتجف...
رديت عليها وبعدا كانت ماشه ووقفتها للمرة التانيه
بس المرة دي شفت دموعا...
شفت الانكسار جواها فكيتا وبترت كل الكلام الجواي..
مشت، ووقفت انا دقايق معدوده ما فاهم فيها شي..
#أسعد
اتحركنا انا وابوي متجهين لي سنجه...
سرحت وانا بتذكر تهربا مني قبيل .... متأكد انو امها كلمتا... وهي خجلانه مني.....
حا انتظر لما تستخير وان شاء الله أمورنا حا تظبط
وقريبا حا انال موافقتا.....
#فاطمة
صباح يوم جديد قمت ليه نشيطة وانا بعمل في شاي الصباح وىرمي لي في لقيمات.. متكيفة لي اخر درجه وانا بسمع صوت راجلي من سنين طويله واخيرا بتونس مع اولادو ومنتظرين الشاي كلهم...
احساس ما بتوصف..
خلصتهم وشلت الكبابي وختيتهم قدامهم وبدينا نشرب...
الليله يوم نتيجة الفترة التانيه تبعهم وبكره كان تخريج بتي الصغيرة من الروضه....
كانو بحكو لي ابوهم وبضحكو...
ماف أجمل حاجه للمره غير انها تشوف نفسا في جو أسرة هادية ومستقر... اللحظة دي انتظرتها من زمن طويل
ومتمنية لسه تتحسن أمورنا اكتر واكتر....
زواج بلسم وطلبا كان مفاجئ لي على قدر ما فرحت ليها
على قدر ماحسيت انو الفراغ حا يملا حياتي..
بلسم ورغم فارغ السن بينا كبير الا اني بحسها قريبه لي واكتر انسانه بتفهمني وبتطبطب علييي وبتساعدني وبتحب لي الخير زي ما بتحبو لي روحا.. زعلت لما عرفت مصادفه..
بس كمان الزعل مستحيل يطول..
لأنو لا يمكن امحي لي انسانه وقفت معاي وقفه اتخلو فيها عني الكل... وانسى مساعدتا ووقفتا معاي بي موقف.
إذا كان وما ورتني فأكيد في سبب منعا...
من الأساس معرفتي من عدما لا بتنفع لا بتضر
ولو اخدت موقف ابقى انسانة سيئة وناكرة للمعروف..
كرهتي في الدنيا الإنسان البمحي الحسنات كلها عند أول
غلطه... كرهتي الإنسان البمحي عمر كامل مليان خير قصاد لحظة ذلة واحده ما مقصوده ودام اني بكرهو يستحيل
ابقى انا الإنسان دا...
زعلي كان حاجه خفيفه لاني اتمنيت اني احضر ليها حاجه تليق بي وقفتا معاي ماقدرت لكن مافات شي. .
دخلت المطبخ ورفعت لي حلة مديده احضرا ليها وامش
اخد معاهم قعده خفيفه بعدين واشوف لو احتاجو شي
اما طلال خليتو بتجهز يمشي مع الاولاد لي نتيجتهم...
#خالد
رجعت البيت وحكت لي كلتوم عن الحصل وزيارتهم
وكلمتها اني المرة الجايه لازم اقابلهم انا شخصيا واشوف الراجل وابوهو واسرتهم واسأل عنهم عشان اطمئن على بتي. .
قاعد بفضل الله في نعم.. أُموري بقت طيبه....
والشغل ماشي بأفضل حال...
ماكلين وشاربين والحمدلله......
ناديت كلتوم وسألتها اتصلتي على الناس ديك وكلمتيهم انو البت دي عندها زول والعفو والعافيه.
قالت لي ما كلمتهم...
قلت ليها منتظرة شنو؟!
هاك دا التلفون عملت خدمة اتصلي وقتي وكلميهم....
شالت التلفون واتصلت.....
.... الوووو
#أماني...
احييي انا كررر عليي..
سمر:مالك يا أمي
دي كلتوم ام بلسم الضربت
سمر :مالا
قالت بلسم رفضت عندها زول...
سمر :غايتو اسعد لو عرف بزعل...
اماني :اسكتي بس اكتمي الكلام دا عندك خلي هسي في شغلو وحالو دا لي قدام بنوريه.. الله يهون بس هن لاقين قال عندها زول قال اديني تلفونك دا أحول ليها قروشا تبع ال٤ يوم الجاتهم في الشهر دا وتاني وشها دا ما توريني ليه بي هنا...
سمر :يا أمي وانا دخلي شنو؟!
يادوب الانجليزي حقي بدا يتحسن...
اماني :يابت بلا انجليزي بلا سجم.. البت دي تاني لو جات هنا واخوك دا يشوفا تتقاطع فيه كل يوم بجن...
من عدم الاساتذه؟!
الله ما كتر الا الاساتذه ديل بكره بجيب ليك الأحسن منها التطير تشوف زول تاني يشغلا بالقروش دي...
الجيعان**ين المقحط**ين ماشايفين بيتهم لو جى هوا ساي بقع... شنقت نخرتا دايرة يحنسوها اظن لكن الا ما اندما...
وما يبقى اسمي اماني لو ماعملت كده...
#بلسم...
قلبي كان بتقطع الااااف القطع وانا شايفه الساعات بتمر بالسرعه دي....
وامي صدمتني بي انو رجالو وهو جايين اليوم بعد صلاة المغرب عشان يتعارفو هم ويتفقو...
من الصباح جو جزو من اهلي البيت عشان يحضرو...
اما جارتنا فاطمة...
قالت انو يجو صالون بيتهم وبدت تحضر براها بهناك...
الدقايق والساعات كان جاريه جري معلنه وصول اللحظة ديك
وكيف ومتين مشى الزمن لحد ما المغرب أذن...
والناس جهزو وسمعت أصوات العربات بره....
دخلت الغرفه بكيت قدرتي...
لحد ما سمعت صوت جوطة... ماعاديه...
طلعت بره اشوف الحصل لقيت خالتو فاطمة
جارية وبتنافس وهي بتقول شكلة كبيرة...
ات..............
يتبع .....