رواية بيت لا يعرف معنى الخصوصية الفصل الخامس 5 بقلم نجاة محمد


رواية بيت لا يعرف معنى الخصوصية الفصل الخامس 5 بقلم نجاة محمد


«لا تحكم على حياة الآخرين بما تراه من الخارج، فما يبدو لك راحةً قد يخفي وراءه الكثير من التعب، وما تظنه حياةً بلا هموم قد يكون صاحبه يخوض معارك لا تعرف عنها شيئًا.»


«الكاتبه نجاة محمد» 


احمد وحنان بعد ما خلصوا اكل وبيتكلموا مع بعض تليفون احمد رن 


احمد:  ايه ده ماما بترن انا كنت لسه عندها قبل ما اطلع 


حنان: طب رد يمكن محتاجه حاجه 


احمد: طيب، الو يا امى فى حاجه ولا ايه 


فايزه: انزلى يا احمد بسرعه 


احمد: فيه طيب انتى كويسه طب خلاص انا نازل اهو 


حنان بقلق: فى ايه، حاجه حصلت اجى معاك 


احمد: مش عارف خليكى وإن شاء الله خير وانا هطلع بسرعه واطمنك 


ـــــــــــــــــــــــــــــــــــــــــــــــــــــــــــ


تحت فى شقه فايزه كانت قاعده قلقانه وبتعيط وبتفوق فى فاروق اللى مغمه عليه


وبعد شويه احمد نزل لقى ابوه واقع على الارض 


احمد بخضه:  بابا ماله ايه اللى حصل وهو بيحاول يفوقه


فايزه: بعياط والله ما اعرف كنا بنتفرج على الفيلم مع بعض وهو قالى انا هدخل انام وهو رايح الاوضه اغمى عليه ووقع على الارض بفوق فيه مش عايز يفوق مش عارفه اعمل ايه اتصلت بيك 


احمد: متقلقيش انا هوديه للدكتور وان شاء هو كويس مفيش حاجه 


فايزه: انا جايه معاك 


احمد: ماشى يلا 


ـــــــــــــــــــــــــــــــــــــــــــــ


عند الدكتور بعد ما كشف على فاروق  


احمد: طمنى يادكتور ابويا كويس 


الدكتور:  لازم يتنقل على المستشفى فوراً


احمد سمع كلام الدكتور ونقله المستشفى وبعد شويه خرج الدكتور 


احمد: طمنى يا دكتور 


الدكتور:  احنا عملناله صدمات كهربائيه والحمد لله نبضات القلب بدات تشتغل تانى بس هو هيفضل معانا فى المستشفى شويه تحت الملاحظه وممنوع عنه اى انفعالات وبلاش تخلوا اى حد يتضايقوا لان ده بيأثر على صحته 


فايزه: والله يا دكتور محدش جه جمبوا ده كان داخل ينام ووقع على الارض 


الدكتور: الحمد لله انها جت على قد كده، ربنا يقوموا بالسلامه بعد اذنكوا 


احمد: يارب، اتفضل يا دكتور شكرا جدا تعبناك معانا، 


_تعالى يا امى اوصلك البيت ارتاحى والصبح اجيبك تطمنى عليه 


فايزه: لا والله ابدا روح انت لى عيالك 


احمد: لا خلاص اكيد مش هسيبك لوحدك انا هكلمهم واطمنهم 


ـــــــــــــــــــــــــــــــــــــــــــــــــــــ


فى شقة كامل 


عفاف كانت متضايقه وبتزعق  لى كامل 


عفاف: يعنى ايه كل ما اقولك عايزه اجيب حاجه للعيال تقولى معيش فلوس 


كامل: ايوه معيش فلوس، ومتقوليش  تانى على حاجه 


عفاف: امال اقول لمين للجيران ولا لى اخواتك اللى بيذلونا ما تروح تشوفلك شغلانه بدل ما انت قاعدلى كده ولا عايزنى انزل انا واصرف عليك بالمره 


كامل: تبقى ست جدعه والشغل مش عيب على فكره 


عفاف: دى بجد بقت عيشه تقرف  انت ليه كده ليه بتخلينا نمد ايدينا للى يسوى واللى ميسواش ما تبص لى اخواتك واعمل زيهم كل واحد بيشتغل ومكفى بيته بص لى احمد اخوك اللى معاه عيال اكتر منك ومكفيهم ومعاه عربيه قولى انت اقل منه فى ايه ليه بتمد ايدك ليهم


كامل: انا متقارنش بحد وبعدين دول مش غرب دول اخواتى وواجب عليهم يساعدونى ويقفوا جمبى،  بقولك ايه معكيش ١٠٠ جنيه اجيب علبة سجاير عشان مصدع ومش معايا فلوس 


عفاف: انت ايه معندكش دم بقولك مفيش اكل ف البيت وعايزه فلوس تقولى هاتى فلوس، لا انا بجد مش قادره استحمل انا هتصرف 




ونزلت تحت عند شقه حماتها خبطت ملقتش حد طلعت خبطت على مرڤت 


مرڤت: ازيك يا فوفه عامله ايه، كنتى بتزعقى انتى وكامل ليه 


عفاف: يا شيخه دى بقت عيشه تقرف، هى ماما فايزه مش تحت ولا ايه 


مرڤت: مش عارفه انا لسه منزلتش 


عفاف: انا نزلت عشان كنت عايزه اكلم عمى فاروق واقوله على كامل وانه مغلبنى ومش عايز يصرف علينا وهو ابوه بردوا وليه كلمه عليه ويخليه يفوق لى نفسه  بس ملقتش حد 


مرڤت: غريبه هيروحوا فين يعنى، بقولك ايه تعالى نسأل حنان يمكن تكون عارفه 




خبطوا على حنان وبعد شويه فتحت لهم الباب 


مرڤت: ازيك ياحبيبتى عامله ايه مالك شكلك زعلانه 


حنان: اسكتى انا منمتش من امبارح 


عفاف: ليه كده ده احنا كنا جاين نسألك على عمى فاروق وماما فايزه فين خبطنا عليهم مفيش حد فى الشقه هو حصل حاجه ولا ايه


حنان: هو فعلا مفيش حد تحت امبارح ماما فايزه اتصلت على احمد قالتلوا انزلى بسرعه نزل وقالى هطمنك بس مكلمنيش رنيت عليه انا بس تلفونه مقفول 


مرڤت: لا حول ولا قوة الابالله إن شاء الله خير متقلقيش،  بقولك ايه انتى جايبه الجلابيه الحلوه اللى انتى لابساها دى منين 


حنان باستغراب من سؤالها اللى ملوش علاقه بالموضوع: احنا فى ايه ولا فى ايه يا مرڤت بقولك قلقانه وانتى تقوليلى جايبها الجلابيه الحلوه دى منين 


مرڤت: مصدش حاجه، انا بس كنت عايزه اجيب كام واحده كده واجدد مفيهاش حاجه يعنى 


عفاف: معلش يا حنان عديها بس بجد جايبها منين باين عليها ماركه وغاليه


حنان: لا إله إلا الله اتفضلوها لو عايزينها،  على العموم دى واحده صاحبة احسان اختى بتبيعهم بسعر حلو لو عايزين ابقى اديكوا رقمها 


وشويه وكان احمد بيفتح باب الشقه 


حنان: احمد انت روحت فين ومكلمتنيش ليه وبرن عليك تلفونك مقفول 


احمد بتعب: اهدى عليا هحكيلك كل حاجه بس الاول  ارتاح 


مرڤت: حمدلله على السلامه يا خويا شكلك تعبان 


احمد: الله يسلمك، وبعدين بص لى حنان وقالها امبارح نزلت لقيت بابا اغمى عليه وواقع فى الارض وديته للدكتور وطلب منى اوديه مستشفى لانه كان تعبان جامد واتحجز فى المستشفى وماما مرضيتش تروح وانا مش هينفع اسيبها لوحدها جيت ارن عليكى تلفونى فصل شحن  استنيت للصبح وقولت اجى اطمنك واغير هدومى بس وانا جى فى الطريق عملت حادثه عربيه ماشيه عكس وخبطتنى 


حنان: يالهوى حادثة ايه انت كويس طيب 


احمد: الحمد لله انا كويس بس العربيه اللى مش كويسه،  الحمد لله انها جد على قد كده 


عفاف: طب عمى فاروق عامل ايه دلوقتى ينفع نروح نزوره 


احمد: مش عارف بس الدكتور قايل ان الكلام كتير والانفعال بيأثر على صحته 


لما يبقى بخير ابقى تعالوا واطمنوا عليه 


عفاف: إن شاء الله خير وربنا يطمنا عليه، طب نستأذن احنا بقى يلا مرڤت 


مرڤت: حاضر  اه صح يا حنان هاتى رقم صاحبة اختك 


حنان:  حاضر خدى اهو 


مرڤت: شكرا يا حبيبتي يلا سلام 


مشيت مرڤت وعفاف وحنان متضايقه من برود مرڤت واحمد بيضحك 


حنان: بتضحك على ايه انت كمان دى وليه غريبه تقولها حادثه وعمى فى المستشفى وهى تقولى عبايات وجلاليب 


احمد: حقك عليا انا، الولاد جم من المدرسه ولا لسه 


حنان: زمانهم جايين 


احمد: طب معلش لما يجوا ابقى تعالى معايا المستشفى تقعدى مع امى عشان قاعده لوحدها واكيد هتحتاج حد معاها وانا هحاول ابقى اروح اشوف حل للعربيه اللى باظت دى،  مش وقتها خالص مش عارف الاقيها منين ولا منين انا ماصدقت عرفت ادبر نفسى عشان اوفر مصاريف دروس الاولاد 


حنان: متقلقش يا حبيبى، هتدبر بإذن الله طول ما ربنا معانا ما تقلقش ومتحسبهاش  سيبها على ربنا 


احمد: يارب، إن شاء الله خير 


ــــــــــــــــــــــــــــــــــــــــــــــــــــــــــ


فى بيت كريم ومنى يوسف كان لسه راجع من الشغل وكانت منى قاعده هى وكريم فى الصاله بيتفرجوا على التلفزيون


يوسف: السلام عليكم عاملين ايه


كريم: الحمد لله يا بنى انت عامل ايه فى شغلك


يوسف: الحمد لله


منى: طب بقولك ايه انا عايزاك فى موضوع


يوسف: موضوع ايه، ربنا يستر بقلق من المواضيع بتاعتك يا حاجه


منى: بس يا واد،  فاكر لما قولتلك قبل كده ان الشقه اللى فى الدور الرابع ابوك كان بيدورلها على ساكن


جت واحده وسكنت فيها من اسبوع كده


يوسف: طب كويس انها سكنت


منى: اللى سكنت دى بقى عندها بنت زى القمر ومحترمه ومؤدبه


يوسف: طب وانا مالى بيها ربنا يخليها لى امها


منى: انت مالك ازاى،  ياواد نفسى افرح بيك والبت حلوه ومحترمه هى والدها متوفى بس عرفت تربى،  ايه رأيك اروح اكلم امها واخطبهالك


يوسف: لا تروحى ولا تيجى انا فى حاجات فى دماغى اهم من الجواز والكلام ده، هو انا اسيب محمود فى الشغل اجى الاقيكى بتجيبى نفس السيره


منى: طب والله الواده بيفهم ايه جايبلك عروسه


يوسف: لا واحده لسه متعينه جديد فى الشركه وهى كويسه مع كل الناس بس هو بيقولى انها عنها منى


منى: بجد طب لو عنها منك نجوزهالك


يوسف: انتى عايزه تجوزينى اى واحده وخلاص ماتقولها حاجه يا حاج


كريم بضحك: اقول ايه امك وعايزه مصلحتك وعايزه تفرح فيك قصدى بيك


يوسف: بتضحك ماشى يا حجوج،  على العموم انا مش هروح فى حتى ولا هتقدم لى حد ولا هتجوز حد واهم حاجه متكلميش حد فى حاجه،  بعد اذنكوا انا داخل انام


ــــــــــــــــــــــــــــــــــــــــــــــــــــــــــــــــــــــ


تانى يوم عند هناء


هناء: اهلاً وسهلا ازيك ياحاجه عامله ايه والله نورتينى


منى: ده نورك يا حبييتى،  المهم انا كنت عايزاكى فى حاجه كده


هناء: خير ياحاجه ان شاء الله


منى: خير، هى بنتك القموره دى مخطوبه


هناء:  لا مش مخطوبه جايبالها عريس ولا ايه


منى: الباش مهندس يوسف ابنى اول ما شوفت بنتك قلبى اتشد ليها ومحترمه وجميله ويشرفنى انها تبقى عروسة ابنى ها قولتى ايه


هناء: هو فى قول بعد قولك ياحاجه ده كفايه انه من بيت محترم والناس كلها بتشكر فيكم، بس ناخد رأى العروسه الاول ولا ايه


منى: طبعا يا حبيبتى اللى تشوفيه،  ربنا يقدم اللى فيه الخير ويجعلهم من نصيب بعض


هناء: إن شاء الله خير،  هى قربت تيجى من الشغل هكلمها  و ارد عليكى


ــــــــــــــــــــــــــــــــــــــــــــــــــــــ


اسفه على التأخير ده كله ومش هيكون فى تأخير تانى ان شاء الله🙂👀


تفتكروا يوسف هيعمل ايه لما يعرف ان مامتوا خطبتله من وراه 🙈👀


مستنيه رأيكم 🥰

نلتقى الفصل القادم 🫶🏻♥.


                 الفصل السادس من هنا 

        لقراءة جميع فصول الرواية من هنا

تعليقات
×

للمزيد من الروايات زوروا قناتنا على تليجرام من هنا

زيارة القناة