
رواية بيت لا يعرف معنى الخصوصية الفصل السادس 6 بقلم نجاة محمد
(هناك مواقف لا تأتى لتؤلمنا فقط، بل لتعرفنا بمن حولنا، فتسقط الاقنعه، وتظهر القلوب كما هى، ونعرف أن القرب لا يعنى دائما المحبه)
*الكاتبه نجاةمحمد*
فى بيت هناء كانت مريم رجعت من الشغل
مريم: السلام عليكم، ازيك يا ماما
هناء: وعليكم السلام الحمد لله يا حبيبتى انتى عامله ايه فى الشغل
مريم: الحمد لله على كل حاجه بس تعبانه جدا يدوب اكل وانام، عامله اكل ايه انهارده
هناء: سلامتك من التعب بس هتاكلى وقبل ما تنامى عايزاكى فى موضوع
مريم: موضوع ايه
هناء: تعالى تعالى ناكل بس الاول وبعدين نتكلم
وبعد ما خلصوا اكل
مريم: ها يست الكل عايزانى فى ايه
هناء: الحاجه منى كانت عندنا انهارده وطلبت ايدك لى ابنها
مريم: وانتى قولتى ايه
هناء: انا قولت اخد رايك الاول هو بصراحه محترم وكمان سمعت انه مهندس
مريم: اللى تشوفيه ياماما
هناء: مالك مش مبسوطه لو مش موافقه عادى مفيهاش حاجه ولا هو فى حد تانى وانا معرفش
مريم بضحك : لا مفيش حد تانى ولا تالت انا بس اتفاجأت عادى يعنى
هناء: يعنى ارد عليهم واقولهم انك موافقه
مريم: ماشى
وبعد ما هناء خدت موافقة مريم اتصلت على منى عشان تبلغها واتفقت معاها انها هتيجى وتزورها يوم الجمعه
ـــــــــــــــــــــــــــــــــــــــــــــــــــــــ
وفى بيت كريم بعد ما قفلت مع هناء دخلت عند يوسف فى الاوضه وكان هيبدا تنام
منى: بتعمل حاجه ولا فاضى
يوسف: رايح انام فى حاجه
منى: جهز نفسك يوم الجمعه عشان عندنا مناسبه
يوسف: مناسبة ايه دى
منى: خطوبتك
يوسف: ده اللى هو ازاى، بردوا يا امى روحتى كلمتى الناس من ورايا
منى: ايوه، ولسه قافله مع هناء وقالتلى ان العروسه موافقه واتفقنا على يوم الجمعه
يوسف: انا اسف يا امى بس انا مش هروح فى حته
منى: يعنى ايه عايز تصغرنى قدام الناس، انا نفسى افرح بيك يا بنى
يوسف: مش قصدى اصغرك بس انا قولتلك قبل ما تكلمى وعارفه ان مش موافق
منى: انت تعالى معانا ده كلام مش خطوبه ولو متفقتوش
عادى ده قسمه ونصيب
اتنهد يوسف: حاضر يا امى اما نشوف اخرتها
منى بفرح : اخرتها خير ان شاء الله
ــــــــــــــــــــــــــــــــــــــــــــــــــــــــ
فى المستشفى عند فاروق كان احمد قاعد مع والده
فاروق: احمد
احمد: نعم يا حاج محتاج حاجه
فاروق: عايز اروح البيت
احمد: بيت ايه يا بابا دلوقتى انت لسه تعبان والدكتور قال انك لازم تفضل كام يوم فى المستشفى لغاية ما تتحسن
فاروق: انا تعبت من قعدة المستشفى
احمد: وانا مش هخاطر بيك
فاروق: يا ابنى انا حاسس انى بقيت احسن وبعدين فى البيت هبقى براحتى اكتر
سكت احمد شويه وبعدين قال
_طيب هكلم الدكتور واشوف هيقول ايه
فاروق: وكلم اشرف المحامى كمان
احمد: المحامى! ليه
فاروق: اعمل اللى بقولك عليه، قوله يجيلى على البيت
احمد: حاضر
وبعد شويه رجع احمد عند فاروق
احمد: انا كلمت الدكتور مكنش موافق فى الاول بس الحمد لله وافق وقال اهم حاجه ان احنا نلتزم بالعلاج والراحه وكمان عملت زى ما قولت وكلمت المحامى
، بس ممكن تقولى عايز المحامى فى ايه
فاروق هتعرف فى الوقت المناسب المهم دلوقتى يلا نمشى عشان زهقت من القعده هنا بتعب اكتر
وبعد شويه كانوا وصلوا البيت
ـــــــــــــــــــــــــــــــــــــــــــــــــــــــ
وفى يوم الجمعه عند هناء وصلوا منى وكريم ويوسف
هناء: اهلا وسهلا نورتونى
منى: ده نورك يا حبييتى وطبعا اكيد عارفه احنا جايين ليه
هناء: طبعا وشرف ليا ان هناسب عيله محترمه زيكم، ومش طالبه حاجه غير ان بنتى تكون مبسوطه ومرتاحه
كريم: طبعا احنا عندنا بنتين وهى ان شاء الله هتكون التالته
منى: اومال فين عروستنا
هناء: ثانيه هقولها تيجى
وبعد شويه خرجت مريم وهى شايله صنية العصير حطيتها على الترابيزه وقعدت وبصت على اللى موجودين واول ما شافت يوسف اتصدمت
مريم: السلام عليكم
منى: وعليكم السلام يا حبييتى بسم الله ماشاء الله قمر
يوسف فى نفسه: يارب نخلص من فقرة الترحيب دى
امه ضربته فى كتفه
فرفع راسه وبص على العروسه واتصدم
منى بصوت واطى لى يوسف : مالك متنح كده ليه، اكيد عجبتك، مش قولتلك
مريم ب ابتسامه: ازيك يا استاذ يوسف
يوسف: الحمد لله يا انسه مريم بخير
هناء: انتوا تعرفوا بعض ولا ايه
مريم: ايوه استاذ يوسف شغال معايا فى نفس الشركه
منى: بجد طب حيث كده يبقى نقرأ الفاتحه
قرأوا الفاتحه وحددوا معاد الخطوبه وكل ده ويوسف مش مستوعب اصلا اللى بيحصل حواليه
ـــــــــــــــــــــــــــــــــــــــــــــــــــــــ
وفى بيت فاروق
كانت فايزه تعبانه واتصلت على عفاف تنزلها وشويه ونزلت عفاف ليها
عفاف: ازيك يا ماما ايه محتاجه ايه
فايزه: معلش هتعبك تعملى الاكل لى عمك فاروق عشان ياخد العلاج وانا تعبانه ومش قادره اعمل حاجه
عفاف: عنيا ليكوا
دخلت عفاف المطبخ وبدات تحضر الاكل وبعد ما خلصت دخلت الاوضه عند فاروق
عشان تحط ليه الاكل
عفاف: عامل ايه دلوقتي يا عمى
فاروق: الحمد لله
عفاف: يارب دايما، بص يا عمى انا كنت عايزه اتكلم معاك شويه بخصوص كامل، لو ينفع يعنى تديله مبلغ صغير يعمل بيه مشروع او تفتحله الورشه اللى على اول الشارع مقفوله بقالها كتير اهو يقف فيها ويشغلها بدل ما هو قاعد كده لا شغل ولا مشغله
فاروق: انا اديته فلوس كتير وكل مره كان بيقول هعمل مشروع ولا شوفت منه اى حاجه
ما اخواته فاتحين بيوتهم اهو ومحدش فيهم طلب منى فلوس قد ما بيطلب
عفاف: معلش يا عمى مفيهاش حاجه معلش لو ساعدته هو ابنك بردوا
فاروق: شيلى الاكل يا عفاف وسبينى لوحد معلش
عفاف بقلة حيله: حاضر
خرجت عفاف وقفلت الباب
فضل فاروق باصص قدامه وبيفكر فى كلام عفاف ووضع يده على قلبه من شدة التعب
وبعد شويه فايزه داخله تتطمن عليه
فايزه: فاروق
مش بيرد عليها
قربت منه
_فاروق انت نايم
ولما مردش عليها تانى
بدات تهزه بيدها
فايزه بخوف: فاروق رد علياا
وبعدها بتنده على اللى فى البيت بصوت عالى
فايزه: يا كاااامل، يا احمد
الحقووونى
يا اسااامه الحقنى
حنان نزلت تجرى وكل اللى فى البيت نزل
حنان: فى ايه ياماما
فايزه بعياط: عمك.. عمك فاروق بصحيه مش بيرد عليا خايفه يكون جراله حاجه
حنان: متقلقيش هتصل بالدكتور يجى يشوفه
وبعد شويه جه الدكتور يشوف فاروق
وخرج
فايزه: طمنى يا دكتور هو كويس صح
الدكتور للاسف هو اتعرض لى انفعال شديد وتقريبا ماكنش خد العلاج
شدوا حيلكوا يا جماعه البقاء لله بعد اذنكوا ربنا يصبركم
فايزه: يعنى ايه، يعنى ايييييه سبتنى لوحدى ومشيت ليه فاروق
عفاف: متعمليش فى نفسك كده حرام هو دلوقتى بقى فى مكان احسن
فايزه: اخرسى هو كويس هو بس نايم شويه وهيقوم محدش يقول انه مات
كامل: طب اهدى يا امى مينفعش تعملى كده عشان متتعبيش
بعد اجراءات الدفن عملوا العزا فى البيت وفى اخر اليوم بعد العزا ما خلص
اشرف المحامى: لو سمحت يا استاذ احمد ممكن تجمع اخواتك الاستاذ كامل والاستاذ اسامه
احمد: حاضر
مرڤت وهى بتقول لى عفاف: اكيد هينده ليهم عشان يوزع الورث وجوزى هو الكبير واكيد هو اللى هيتحكم فى كل حاجه
عفاف: ان شاء الله كل واحد ياخد حقه بما يرضى الله بلاش طمع
اشرف: انا عارف ان ده مش وقته وربنا يصبركم على فراق الحاج فاروق كان راجل محترم وخيره كان على كل الناس
بس هو كان موصينى على حاجه ابلغها ليكوا قبل ما يتوفى
الحج فاروق كتب كل املاكه لى الاستاذ احمد
الجميع اتصدم
اسامه لى احمد : ازاى يعنى كتب كل حاجه ليك
انا الكبير والمفروض انا اللى ابقى المسؤول مش انت
كامل: والله وانا بره الحسبه صح وليه مبقاش انا
احمد بصدمه من كلام اخواته: انتوا بتتكلموا بجد ابونا لسه دفنينه الصبح وانتوا دلوقتى بتتكلموا فى مين ياخد ايه
اسامه: يا سلام ده بعد ما لعبت فى دماغ ابوك وهو عايش وخليته يكتبلك كل حاجه
جاى تعمل فيها برئ دلوقتى
احمد: انا بجد مش مصدق احنا اخوات مش اعداء انتوا ليه بتتكلموا معايا كده
كامل: بنتكلم كده عشان عايزين حقنا انت مش هتاخد كل حاجه احنا لما كنا صغيرين واحنا مش بنحبك عشان ابوك كان بيهتم بيك اكتر مننا
اشرف المحامى: انا اسف انى هتدخل بس مينفعش اى حد ياخد اى حاجه غير الاستاذ احمد الحاج فاروق كان بيقول ان محدش يقدر يدير الاملاك دى غير احمد لانه عارف انه مش هياكل حق حد
ال ٣عماير الاستاذ احمد مسؤل عن تأجيرهم والايجار يقدر انه يقسمه بالعدل عليكم
احمد: انا مش فارق معايا كل ده قد ما فارق معايا انكم وجعتونى بكلامك واتصدمت فيكم انكم بتمثلوا عليا ان بتحبونى
وسابهم وخد مراته وعياله وطلع شقته
وكله مشى
وفايزه كانت قاعده فى اوضة فاروق بتعيط بشده
وفى الصاله
كامل: يعنى ايه احمد خد كل حاجه واحنا هنفضل نمد ادينا ليه زى الشحاتين
عفاف بسخريه: وايه الجديد
كامل: ما تسكتى يا وليه انا مش فايقلك خالص
اسامه: اسكتوا عشان نشوف هنتصرف ازاى
ـــــــــــــــــــــــــــــــــــــــــــــــــــــــ
تتوقعوا اخوات احمد هيعملوا ايه 👀🙈
نلتقى الفصل القادم 🫶🏻😘.