رواية بيت لا يعرف معنى الخصوصية الفصل السابع 7 بقلم نجاة محمد


رواية بيت لا يعرف معنى الخصوصية الفصل السابع 7 بقلم نجاة محمد


> «حين يعمى الطمع القلب، يتحول الحق إلى ذريعة للانتقام، ويصبح أقرب الناس إلينا أخطر من أعدائنا.»


الكاتبة نجاة محمد


ـــــــــــــــــــــــــــــــــــــــــــــــــــــــ


كان البيت هادى على غير العاده 


الجميع كان متأثر بوفاة فاروق، لكن كل واحد كان يحمل بداخله شيئاً


فى شقة احمد كانت حنان بتحضر الفطار، والاولاد بيجهزوا عشان يروحوا المدرسه، واحمد قاعد فى الصاله باصص قدامه سرحان مش بيكلم حد حنان حطت الفطار على السفره وقعدت جمبه


حنان: انا عارفه انك زعلان عشان اللى قالوه اخواتك امبارح بس ممكن تاكل، انت مكلتش حاجه من امبارح 


احمد: مليش نفس لاى حاجه، انا مستعد اتنازلهم عن كل حاجه، انا متضايق عشان كنت فاكر انهم بيحبونى زى ما بحبهم، وهيقفوا جمبى زى ما كنت بقف جمبهم ودى مكنتش مجامله منى دول اخوااتى 


حنان: زى ما انت قولت هما اخواتك، وممكن يكونوا اتصرفوا كده بس من الصدمه متزعلش منهم 


احمد هز رأسه 


_لا الكلام طالع من قلبهم بجد مكنش تصرف صدمه لدرجة انهم قالولى ان عمرهم ما حبونى من وانا صغير تخيلى العمر ده كله عايشين معايا بوشين بيمثلوا عليا انهم بيحبونى لى اجل لو احتاجوا منى حاجه


كل حاجه بانت على حقيقتها 


ياترى ايه تانى مستخبى 


حنان: خير ان شاء الله، طب يلا عشان الولاد جهزوا يلا نفطر 


احمد: حاضر 


وبعد ما خلصوا فطار راح يوصل ياسين وادم المدرسه 


وحور المدرسه بتاعتها وبعدين راح شغله


ــــــــــــــــــــــــــــــــــــــــــــــ


داخل مدرسة حور اول ما دخلت قابلت صاحبتها ناديه 


ناديه: حور وحشتينى، ايه مالك شكلك متضايقه 


حور: جده والد بابا توفى امبارح وانا كنت بحبوا اوى كان اطيب من تيتا فايزه وكان بيحبنا اوى انا واخواتى 




ناديه: البقاء لله، معلش طب ايه رأيك بعد المدرسه نروح نشرب حاجه فى الكافيه اللى قدام المدرسه مش بعيد واهو منها تفكى نفسك ونغير جو وتتبسطى 


حور: مينفعش عشان انا مش قايله لى حد فى البيت وممكن يقلقوا عليا 


ناديه: محدش هياخد باله اكيد مامتك هتكون مشغوله مع الناس والعزا وباباكى هيكون فى الشغل واحنا زى ما قولتلك مش هنتاخر 


حور: مش عارفه هفكر،  انا كمان نسيت تلفونى فى البيت يعنى مش هعرف اطمنهم 


ناديه: ماشى فكرى،  ولما نخلص ابقى قوليلى كده كده انا رايحه و بنت خالتى هتكون هناك مستناينى واهو بالمره تتعرفى عليها 


ــــــــــــــــــــــــــــــــــــــــــــــــــــــــــ


عند يوسف فى الشركه دخل مكتبه وبدأ يشتغل فى التصميم اللى مطلوب منه وبعد شويه محمود دخل عنده 


محمود: صباح الخير،  ايه ده انت بدات فى مشروع المول اللى فى العاصمه 


يوسف: صباح النور، ايوه بدات انت كنت فين كل ده اول مره تيجى الشغل متاخر كده ده انا قربت اخلص 


محمود: متاخر ايه انا كنت عند المدير وطلب منى اننا نستعجل فى المشروع ده عشان هيتنفذ اخر الاسبوع بس الحمد لله جيت لقيتك بدأت فيه 


يوسف: طب يلا بطل رغى وتعالى اشتغل فاضل حاجات بسيطه اصلاً


محمود: حاضر، قولى صح عملت ايه امبارح 


يوسف: عملت ايه فى ايه 


محمود: انت فقدت الذاكره ولا ايه مش كنت بتقولى انك رايح امبارح مع مامتك تخطب 


يوسف: ايوه، وقرينا فاتحه وحددنا ميعاد الخطوبه الشهر الجاى 


محمود بفرح: بتهزر قريت فاتحه بجد غمزله وعمال تقول مش هتجوز وفى حاجات اهم من كده شكل العروسه كانت حلوه وخلتك تغير رأيك 


يوسف: ما تحترم نفسك يلا ايه حلوه دى وبعدين اصلا انا كنت حاسس ان معزوم مش انا العريس، تخيل العروسه طلعت مين 


محمود: وانا هعرف منين هو انا كنت معاك،  اوعى تكون بنت عمك اللى فى الصعيد 


يوسف: بنت عمى ايه ياعم لا مش هى انا بعتبرها زى اختى 


العروسه طلعت مريم 


محمود: مريم مين 


يوسف: مريم اللى شغاله معانا فى الشركه 


محمود بصدمه وضحك: ده بجد ولا بتهزر 


يوسف: اهو انا اتصدمت زيك كده طلعت ساكنه عندنا فى الشارع اللى جمبينا 


محمود بضحك: مش انا قولتلك انها عينها منك وهتكون من نصيبك مصدقتنيش


يوسف: خلاص بقى فكك من السيره دى ويلا نكمل شغل 


ـــــــــــــــــــــــــــــــــــــــــــــ


وبعد حوالى ساعه كان يوسف خلص الجزء المطلوب منه فى المشروع وراح عند مكتب مريم خبط على الباب


مريم: ادخل 


يوسف: السلام عليكم، انا خلصت مشروع العاصمه وكنت جاى اشوف المشروع اللى بعده ايه واخد الملف عشان ابدأ فى التصميم 


مريم وهى مشغوله فى الورق اللى قدامها ومش بصاله: ايوه بس احنا لسه منفذناش المشروع اللى انت خلصته 


يوسف: عارف انا بس كنت عايز اخد فكره عنه 


مريم: طب ممكن تيجى كمان شويه معلش 


يوسف: مالك شكلك حاجه ضايعه منك بتدورى على حاجه 


مريم: ايوه المدير طلب منى اودى ملف المدرسه اللى هتتعمل فى بدر  للمهندس عبدالله وانا عماله ادور عليه مش لاقياه ولازم اوديهوله عشان يلحق يخلصه 


ومش عارفه اعمل ايه 


كان موجود والله 


يوسف: طب اهدى اهدى.. ليه كل ده ان شاء الله هنلاقيه 


وخد شوية ملفات يدور فيهم وهى بردوا بتدور 


وبعد شويه 


يوسف: بيتهيألى هو ده الملف اللى بتدورى عليه 


مريم: ورينى كده..  ايوه هو ده 


اتنفست براحه 


_انا مش عارفه اشكرك ازاى، انا كنت قربت اتجنن 


يوسف ابتسم: لا عادى ولا يهمك بس الملفات محتاجه ترتيب شويه 


مريم: والله كنت مرتباها بس اتبهدلوا وانا بدور عليه 


يوسف: عادى طب ممكن بقى  الملف اللى كنت عايزه ولا ضاع هو كمان 


مريم ب ابتسامه: لا متقلقش انا بحافظ على الحاجه والله  ثانيه واحده 


وجابت الملف وادتهوله وبدات تشرح ليه باختصار طبيعة المشروع والخدمات المطلوبه 


يوسف: تمام شكرا جدا ليكى انا كده خدت فكره كويسه جدا، معلش عطلتك 


مريم: ولا يهمك عادى 


كان يوسف ماشى بس مريم وقفته وندهت عليه 


مريم: استاذ يوسف 


يوسف لف ليها تانى 


_ايوه 


مريم: انا كنت عايزه اتكلم بخصوص امبارح..  بصراحه كنت حاسه انك مش موافق او مغصوب على الموضوع 


يوسف: ليه بتقولى كده هو فى راجل بيتغصب على الجواز 


مريم: اصل كنت بتقول قبل كده انك مش بتفكر فى الجوزا دلوقتى،  وكمان امبارح مامتك هى الى كانت بتتكلم طول الوقت وانت كنت قاعد ساكت وكان شكلك متضايق 


يوسف: لا عادى مكنتش متضايق ولا حاجه وفعلا مكنتش بفكر فى الجواز غير لما اوصل لى مكانه كويسه  فى شغلى واكون قد المسؤليه  بس ماما هى الىى كانت بتقعد تزن عليا فى الموضوع ده كتير وانا كنت رايح معاها عشان ارضيها بس مش اكتر بس واتفاجأت انك انتى العروسه 


مريم بضحك: هى فعلا كانت مفاجأه، حاجه ولا فى الخيال خالص الصراحه 


يوسف يلا حصل خير، طب بما اننا طلعنا جيران ايه رأيك اروحك معايا بالعربيه بدل مرمطة المواصلات 


مريم: لا شكرا انا بحب المرمطه 


يوسف: تمام، محتاجه حاجه 


مريم: لا شكرا ليك انا هروح اودى الملف للمهندس 


يوسف: ماشى سلام


وكل واحد رجع يشوف شغله 


ـــــــــــــــــــــــــــــــــــــــــــــــــــــ


وفى شقة عفاف 


كامل واسامه ومرڤت وعفاف مجتمعين وبيفكروا ازاى ياخدوا حقهم من احمد 


كامل: وبعدين ياجماعه احنا هنفضل حاطين ايدنا على خدنا كده وهو يتمتع بفلوسنا 


اسامه: هنعمل ايه يعنى، انا بحاول افكر


مرڤت: وهتفضل تفكر كده كتير انت المفروض الكبير ويكون ليك الحق فى كل حاجه 


عفاف: طب هو انتوا ما ينفعش تروحوا لى محامى تانى وترفعوا على احمد قضيه وتقولوا ان ابوكوا كان تعبان ومش فى وعيه وان احمد هو اللى خلاه يكتبله كل حاجه 


اسامه: مينفعش لان استاذ اشرف بيحب احمد وهيشهد معاه انه مكنش يعرف حاجه عن موضوع الورث وان الحج فاروق كان فى وعيه 


كامل: طب ما نروح لى اشرف ده ونتكلم معاه يشوفلنا حل ولو موقفش معانا نهدده بأى حاجه 


اسامه: هو اى كلام وخلاص ده محامى يعنى ممكن هو اللى يحبسنا لو هددناه 


كامل: ما احنا مش هنفضل كده كتير، مفيش حل غير ان احنا نخلص على اشرف ده ونعمل اللى عايزينه 


اسامه وعفاف خافو وقالو انهم ملهومش فى الدم وانها متوصلش انهم يقتلوا حد 


مرڤت: طب هتخلص عليه ازاى انت ليك فى الكلام ده 


كامل: لا مليش بس ليا ناس معرفه يخلصوا عليه ولا من شاف ولامن درى واحنا ملناش دعوه بحاجه 


مرڤت: يبقى خلاص انا معاك 


عفاف: معاه ازاى انتى عايزاه يروح فى داهيه، لا طبعا متسمعش كلامها احنا عندنا عيال عايزين نربيهم 


كامل: ما احنا لو معملناش كده مش هنعرف نربيهم 


اسامه: طب عندى حل تانى بس مش قتل 


احنا بس هنعمل حاجه هتكون قرصة ودن لى احمد ويخاف ويدينا حقنا 


كلهم انتبهوا ليه: ايه هى 


اسامه: هقولوكوا 


ـــــــــــــــــــــــــــــــــــــــــــــــــــــ


عند فايزه تحت كانت حنان نزلت عشان تتطمن عليها 


حنان: ازيك يا ماما عامله ايه دلوقتى 


فايزه: كويسه الحمد لله 


حنان: يارب دايما،  محتاجه حاجه اعملها 


فايزه: مش عايزه من وشك حاجه، انتى لى امتى هتفضلى كده 


حنان ب استغراب: هفضل كده ازاى يعنى وليه بتكلمينى كده انا عملت ايه 


فايزه: انتى مبتعمليش حاجه غير انك بتقومى جوزك على اخواته اكيد انتى الىى خلتيه يقول لى ابوه يكتبله كل حاجه عشان توقعى مابينه وبين اخواته  


حنان: والله مكنت اعرف حاجه ولا احمد كمان كان يعرف، بالعكس ده انا لسه الصبح كنت بقوله انه يحاول يكسب اخواته وانه ميزعلش منهم مهما حصل هما اخواته فى الاول وفى الاخر 


فايزه: انتى هتعمليلى فيها بريئه انا مش عايزه منك حاجه 


طلعت حنان شقتها وهى متضايقه من اللى حصل 


ـــــــــــــــــــــــــــــــــــــــــــــــــــــ


عند حور فى المدرسه فى نهاية اليوم الدراسى 


ناديه: ايه يا حور فكرتى هتيجى معانا ولا لا 


حور: الصراحه انا مخنوقه بس فى نفس الوقت خايفه اتاخر وماما تقلق عليا 


ناديه: متقلقيش، يلا بس ومش ها نتأخر 


وخدتها وراحت الكافيه وقابلت بنت خالة ناديه وقعدوا مع بعض واتصوروا 


وحور نسيت انها اتاخرت ولازم تروح 


ــــــــــــــــــــــــــــــــــــــــــــــــــــــ


عند شقة حنان 


ياسين دخل الشقه وهو بيعيط وبيدور على مامته 


ياسين: ماما انتى فين 


حنان خرجت من المطبخ بسرعه 


حنان: فى ايه مالك بتعيط ليه وفين ادم مطلعش معاك ليه 


ياسين بعياط: احنا كنا خارجين مع بعض وهنروح 


بس افتكرت ان انا نسيت الكتاب بتاعى مع صاحبى وانا روحت عشان اخده منه 


وادم قالى هستناك قدام المدرسه بس لما رجعت ملقتهوش 


وقعدت ادور عليه كتير وسألت صحابى كلهم عنه 


قالو انه فى حد كان لابس حاجه على وشه وخده ومشى 


حنان  بخضه: يعنى ايه هيكون مين الى خده،  يعنى ابنى اتخطف وكمان حور اتأخرت اوى وبرن عليها لقيت فونها هنا استر يارب 


واتصلت على احمد وبلغته وهو قالها انه جاى بسرعه 


وبعد شويه حور دخلت الشقه 


حنان بقلق: انتى كنتى فين كل ده وبرن عليكى سايبه تلفونك هنا ليه 


حور بخوف: الصراحه ياماما انا خرجت انا وصاحبتى ناديه بعد المدرسه  وكنت ناسيه الفون ومعرفتش اطمنك 


حنان بغضب: والله ومن امتى وانتى بتروحى فى مكان من غير ما تقوليلى ولا تقولى لى ابوكى ايه خلاص كبرتى ومبقتيش تاخدى رأى حد 


حور: والله ما قصدى انا اسفه ومش هعمل كده تانى والله اخر مره 


وبعد شويه احمد جه 


احمد: انتى كويسه يا حور اتأخرتى ليه  


حنان: الهانم كانت خارجه مع صحابها واحنا ولا فى دماغها 


سايبانا نموت من القلق عليها وهى ولا هنا 


احمد:  المهم انها رجعت بالسلامه،  المشكله دلوقتى ادم مش لاقينه وروحت ناحية المدرسه بتاعته اشوف الكاميرات الموجوده عشان اشوف مين اللى خده  بس للاسف العربيه اللى اتاخد فيها كانت من غير نمر والشخص اللى خطفه مغطى وشه 


حنان: يعنى هنفضل قاعدين كده ومش عارفه ابنى راح فين 


تلفون احمد رن برقم غريب 


حنان: مين 


احمد: ده رقم غريب 


حنان بلهفه: طب رد يمكن يكون ادم 


احمد: الو 


شخص مجهول: ابنك معايا لو عايزه يبقى تحضرلى اتنين مليون جنيه ولما تحضرهم ابقى كلمنى عشان اوصفلك المكان اللى تيجى تاخد ابنك منه سلام 


احمد: الو الو 


حنان: ايه مين 


احمد: معرفش ملحقتش اتكلم قالى عشان تاخد ابنك لازم احضرله اتنين مليون جنيه وقفل 


حنان بعياط : واحنا هنجيبهم منين،  انا عايزه ابنى 

ـــــــــــــــــــــــــــــــــــــــــــــــــــــــ

تفتكروا مين اللى خطف ادم!؟ وهل احمد هيعرف يجيب ابنه ولا لا؟ مستنيه توقاعتكم. 👀♥

نلتقى البارت القادم. ♥🫶.


                  الفصل الثامن من هنا 

        لقراءة جميع فصول الرواية من هنا

تعليقات
×

للمزيد من الروايات زوروا قناتنا على تليجرام من هنا

زيارة القناة