رواية ضره من عالم اخر الفصل العاشر 10 بقلم نوسه حمد
تاني يوم محمد قال لي اجهزي عشان اسوقك لي زوجك قلت ليهو حاضر دخلت وكنت حزينه شديد ابتهال قالت لي نوسه مالك تعبانه قلت ليها لا بس محمد قال لي ح اوديني لي الولد القال زوجي قالت لي نوسه دقيقه وطبعا هي راقيه وهاديه وصوتو ما بتسمع طلعت بره اتناقشت معاهو وشكلها اقنعتو انو انا لازم اتعالج وقالت ليهو تم جميلك للنهايه ساعدها قال لي نوسه انا بس خايف زوجك اكون قلقان عليك انا والله لو علي تقعدي ميه سنه تونسي امي وابتهال بس كمان ما صاح نمسكك معانا ابتهال قالت ح تعرضك لطبيب نفسي يشوف حالتك دي لو قدرتي تتزكري زوجك ح نرجعك ليهو قلت ليهو انا والله اقدر اتزكر حاجه بكل صدق احكيها ليكم قال لي تمام ربنا اشفيك انا ح امشي مكان جبتك وادخل للشيخ اسالو واتفاهم معاهو وبجي بعد اسبوع قلت ليهو تمام وخلي الولد القالو راجلي اديك القسيمه قال لي تمام وح اصورها ليك وافهمو انك انتي ما متزكره حاجه عسي ولعل يساعدنا في علاجك قلت ليهو تمام محمد طلع حسيت نفسي مرتاحه اصلا انا ارتحت ليهم شديد ما اتوقعت اجي يوم وناس اكونو ما عارفين عني شي يستضيفوني وما كده وبس يواصلو في استضافتهم لي بعد اهلي وصاحبت عمري طردوني وما خافو مني ح اكون حافظه ليهم الجميل دا مدي عمري
ابتهال قالت لي اجهزي نمشي الدكتور حسيت بي احراج دكتور اكيد بقروش قلت ليها انا اول م اشتغل ح اسدد اي قرش تدفعيهو قالت لي نوسه بالغتي العفو ما بينا نحنا اخوات قلت ليها ماقصرتي معاي مشينا الدكتور مكان راقي وناس راقيين وبقيت اعاين للناس ياربي العيان منو فيهم وهم نظاف كده ابتهال افتكرتني خايفه قالت لي نوسه ما تقلقي دا طبيعي الحاصل ليك دا وجا دورنا دخلنا للدكتور وبقا يسال فيني قلت ليهو فجأه انا لقيت نفسي في ولايه ما ولايتي وفي مكان بتاع رقيه وفيهو اولاد الشيخ قال لي دا راجلك وانا والله ما متزكره زاتو عرستا متين افتكرتهم خاطفني ساعدني ولد وصلني بيتنا بس ناس بيتنا كلامهم غريب ماقدرت افهم قاصدين شنو كذبتهم ومشيت لغايه ما صديقت عمري زوجها حكا لي نفس كلام اهلي وانا ما قادره استوعب اني متزوجه ولا متزكره بي زواجي قال لي طيب بتتزكري حاجه من طفولتك والجامعه وكده قلت ليهو بتزكر اي شي الا الولد القالو راجلي دا قال لي طيب الولايه الانتي فيها بتتزكري مشيتي ليها كيف قلت ليهو للاسف لا قال لي تمام واحد من الاتنين يا انتي حصلت ليك صدمه بعد زواجك مباشره فقدتك جزء من الزاكره يا انتي معمول ليك عمل ووعيتي بعد الرقيه الشرعيه الخيار الاول انا ح ابدا معاك علاج من الان ح اكتب ليك علاج يرجع ليك الزاكره تدريجيا وح تبدي تتزكري اي شي بتتزكري تجي تحكي لي قلت ليهو ان شاء الله اتزكر قال لي طيب متزكره امس حصل شنو قلت ليهو انا بتزكر من لحظه محمد لقاني في الشارع وما نسيت حاجه الشي الما متزكراهو واجمعو عليهو الناس زواجي وراجلي قال لي طيب بتتزكري شكلو قلت ليهو اي لانو الشيخ قال لي دا زوجك واشر عليهو عاينت ليهو قال لي طيب زوجك دا ما قال حاجه لمن الشيخ قال ليك كده قلت ليهو دا الداير يجنني نهاي ما نطق حرف وبعد طلعتا ما جا لاحقني قال لي طيب ان شالله تتعالجي قلت ليهو نفسي اتعالج عشان ما اشيل ذنب في ولد الناس واكون طلعت من دون اذنو قال لي ان شاءالله ح تتعالجي وكتب لينا علاجات وقال لي بعد شهر تعالي لي وح تتزكري تدريجا ان شاء الله قلت ليهو ان شاءالله وطلعنا ابتهال شالت لي العلاج وطلعنا مشينا البيت امها قالت لي ان شاءالله خير يابتي ما تخافي دا امتحان وربنا كريم قلت ليها تسلمي يمه
دخلنا الغرفه ابتهال قالت لي نوسه الدكتور فكرني لنقطه معينه لمن الشيخ قال ليك دا زوجك فعلا لو هو زوجك كان اطمن عليك وقال ليك انا راجلك وما كان خلاك تطلعي براك قلت ليها خليك من دي انا الوداني للشيخ شنو احتمال انا مريضه كنت وودوني لي رقيه قالت لي م معروف احتمال المهم م تفكري كلو ح يتعرف ابدي علاجك وان شالله البحصل كلو خير قلت ليها ان شاء الله اتوكلت ع الله وبديت العلاج عديت تلاته يوم بالظبط وبليل صحيت مخلوعه وبقول سند والجنيه ابتهال قالت لي نوسه اتعوذي واستغفري وقومي صلي ركعتين قالت لي فشنو قلت ليها م عارفه بس فجاه اترددت في لساني كلمتين منها وصحيت قلت سند والجنيه قالت لي بسم الله مالك دايره تخوفيني عليك قلت ليها لا ان شاء الله مافي شي النقوم اصلي قومتا اتوضيت وصليت وفتحت المصحف بقيت اقرا قران لغايه الصبح ما اذن صليت ونومتا نومه طويله شديد ما صحيت الا لمن ابتهال جات من الشغل وكانت مبسوطه قالت لي بجد كراعك حلوه علينا قلت ليها خير ان شاءالله قالت لي المدير بتاعي جاي بعدين يطلب يدي قلت ليها م شاء الله الف مبروك تستاهلي كل الخير والله قالت لي تسلمي حبيبتي مشيت باركت لي امها ولقيتا تجهز ليها في فطاير اشتغلتهم معاها والبت البتنظف نظفت المكان ابتهال ادتني ملابس فخمه قالت لي استقبلي بيهم الضيوف قلت ليها ان شاءالله وهي لبست فستان رهيب وهي جميله جمال م طبيعي انا طلعت مع امها انتظرنا الضيوف لمن جو استقبلناهم وشكلهم ناس راقيين لمن مبالغه وخطيبها اعاين لي نهاي ما نزل عينو مني خجلت منو وقلبي قعد ادق وخوفتا قلت ابتهال بت محترمه م تستاهل العينو طايره دا بعد اكلو طلعت شيلت مع البت العده وقدمنا ليهم التحليه والشاي والقهوه مشيت ناديت ابتهال عشان تجي تتونس معاهم وبدو يتعارفو ابتهال قدمت ليهم امها وقالت ليهم دي صديقتي خطيبا قال ليها نوسه صاح انا انخلعت وابتهال زاتا انخلعت وانا طبعا عملت رايحه قال لي م اتوقعت منك تنسي الناس بالسهوله دي شكلو شغلك الجديد نساك ناسك القدام انا غلبني اقول شنو وانا القلت عينو طايره هو طلع بعرفني ومحتار فيني ليه ما اتعرفت عليهو ابتهال حست بي حاولت تلطف الجو قلت ليهو معليش بس جد ما ركزتا وانحرجتا دخلت جوه ودموعي حلفت ابت تقيف ابتهال حست بي جات لاحقاني قالت لي نوسه انتي م عرفتيهو قلت ليها نهاي والله بس انا متزكره ناس الشغل دا منو قالت لي م مشكله انا بفهمو اي شي براهو هسي ما ظريفه اقول قدام اهلو قلت ليها اي وامشي اقعدي معاهم انا ما بقدر اطلع قالت لي طيب بس م تزعلي من مؤيد قلت ليها حاضر بقيت اتزكر في مؤيد دا منو لو من ناس الشغل انا ما نسيتهم وراسي بقا جايط نومتا م صحيت الا الصباح لقيت ابتهال تلبس
اعتزرت ليها انو ما ساعدتهم في الاخر قالت لي لا والله ما قصرتي وكويس انك نومتي قلت ليها اتكلمتي مع خطيبك قالت لي بعد فات هو براهو جاب لي سيرتك وسالني منك حكيت ليهو الحاصل قلت ليها بس انا ناس الشغل حافظاهم صم قالت لي يلا مؤيد قال لي انا اتعينتا مدير عليهم وهي كانت في فتره الاجازه وبعد اتزوجت جات انا العملت ليها طلب الاجازه وكان اتناقشنا في الشغل وهي زوله شاطره قلت ليها معناتا انا الحاجه الجاتني دي بعد الزواج ومعناتا فعلا الولد دا زوجي بس انا لسه مصره علي راي لو ما اتزكرتو ما ح ارجع ليهو قلت ليها احكي ليهو بالحاصل علي واسالي انا متزوجه لي كم ومعناتا انا والده يا ابتهال قالت لي ما معروف احتمال تكوني والده وبي اطفالك يا نوسه وانا شايفه حتي لو ما اتزكرتي زوجك لو عندك اطفال خليهم جنبك قلت ليها اكيد يا ابتهال بعد تجي ح اخليك تتصلي لي. محمد قالت لي تمام وطلعت الشغل انا الهم داير يشل راسي معقوله دا كلو وانا لسه ما فاهمه شي ربنا يستر
ابتهال المساء جات اتصلت علي محمد وادتني ليهو بديت اسال فيهو قال لي نوسه انا هسي مشغول وان شالله بكره جاي وح تعرفي اي شي قلت ليهو طيب قفلت الخط وقدر ما حاولت اتزكر غلبني نهاي
تاني يوم بقيت منتظره لمتين محمد يوصل عشان يحكي لي الحقيقه مع المغرب اظنو اتصل قال اجهزو الاكل مشيت ساعدتهم. وجهزنا الاكل وانتظرتو لمن جا والمره دي ما جا براهو جا معاهو الولد القالو راجلي قال لي نوسه انتي كويسه ومدا لي يدو ابيت اسلم عليهو قلت ليهو انت منو محمد قال لي نوسه فعلا دا سند زوجك اتزكرت الحلم وابتهال عاينت لي وانا عاينت ليها قلت ليهو سند والجنيه محمد قال لي دا كلام شنو استهدي بالله قلت ليهو اتزكرت الاسمين ديل بدون تمر علي احداث وسند واقف صامت ما نطق حرف وشكلو متاثر لحالتي قلت ليهو اولادي وين خليتهم في الدلنج محمد قال لي نوسه انتي ما والده قلت ليهو سند انا ما والده قال لي اي ما ولدتي احترتا شديد وغلبني حسيت بتعب وارهاق م طبيعي ابتهال قالت ليهو نوسه تعبانه وبتتعالج محمد قال ليها ح تواصل علاجها وهي معاهو هسي هو جا اسوقها طبعا العبره خنقتني وما حبيت اضغط علي محمد اكتر ابتهال قالت ليهو محمد هي ما عندها استعداد ترجع معاهو مالم تتزكرو سند قال ليها م مشكله خليها تقعد معاكم انا ح اكون قريب ليها هنا وكل مقابله بجي اسوقها حسيت اني مخنوقه ودخلت جوه بكيت قدرتي قلت ليها انا ما مرتاحه ليهو حتي لو انا مرتو اكيد في حاجه خلتني بالشكل دا وغير دا كلو حسيت نفسي ما مايله ليهو وكرهاناهو ابتهال قالت لي استغفري يا نوسه والله زوجك حلاتو قلت ليها ما عارفه بس م مرتاحه ولو اتزكرتو ح اطلق منو ……يتبع .