رواية علاقة سامة الفصل الثاني 2 بقلم ورود الخالدي
دعاء::::
بقن يسولفن هي وماما عن حياتهن وزواجهن وجابن الماضي والحاضر كوله بهل الساعتين الي زارتنا بيهن ام محاق تالي جنتهم كالت
عمه تأخرنا تره
ياخاله وين تاخرتن مصار ساعتين من جيتن
ميخالف خاله مو الجهال خبصوكم خبص
شنو مشايفين جهال دخليهم يلعبون خاف المزهريات الكريستال تارسه البيت ويكسروهن عشتو
ام محاق ضحكت
ههههه تسلمين داده ام دعاء بس هم يله عود نجيكم غير وقت بس ها لازم تجيبين البنات وتجن علينا بأقرب وقت
تمام
وراحن ماما وصلتهن الباب مبينين خوش ناس وراقين
بعد كم يوم صادف خميس ماما كالت بدلن خلي اروح على ام محاق عاد بدلنا ورحنا اللهم العصر اول مرة كعدنا بالاستقبال طبعا استقبالهم يجنن حيل جبير والأثاث
روعة
بعدين ام محاق كالت نروح نكعد بالصاله لان. الحجية تزعل متقبل نكعد هنا وتضل وحدها..فرحنا كعدنا بالصاله..شفنا المرة الجبيرة وسلمنا عليها بس هي شويه واترخصت كالت تريد تتمدد بفراشها..انتبهت ع بيتهم من الداخل ماشاء الله البناء الجديد يفتح النفس الصاله على عرض البيت والغرف داير مدايرها بيها ديوان جبير عن طولها وبالنهاية ميز طعام يلمع داير مدايره١٢ كرسي يعني حيل مرتب وخسرانين كومه ع البناء والأثاث خو الدرج الي على شكل حلزوني بنص الصاله يم...و..ت
وره ربع ساعة من كعدتنا بعد مشربنا عصير وكيك اجه ولد دخل للصاله تفاجأ بينا راد يرجع أمه كالت
تعال ماما مجد سلم على خالتك ام دعاء الولد دخل وسلم عليلنا اول مشاف ملك عرفها..
ملك بقسمنا مو؟
ملك استحت منه هاي شلون صدفة اثنينهم بنفس القسم والمرحلة وأمهاتهم هم جانن يدرسن سوه فعلا صدف غريبه المهم كعد يمنا وبقو يسولفون هو وملك ع الدراسه وع الجامعه طبعا ماما وام محاق يباعن عليهم ويبتسمن:
النوب طلعو بنفس الجامعة شفتي دادة الدنيا شلون زغيره؟!
اي والله
بهالاثناء طلعو جهال مصطفى همه توم يحجون مخربط كلشي منفهم منهم امهم كعدتهم بسيارات من هاي الشحن مال الاطفال اثنينهن نفس الشكل واللون شو شويه واجه واحد منهم يبجي بيبتهم كالت
شبي يبجي ثولنا
يبجي ع سيارته مدري شبيها وكفت
يااا وج مروة كومي دفعيه بيها خلي يسكت صرع روسنا
كامت مروه تلعبه وتدفع بيه بعدين كالت
تعبت شنو اضل افتر بيه اني خلي يكعد ويه ادومي ويلعب
وج هو ذاك يقبل واحد يكعد يمه
اي وتالي شنو اضل افتر بيه
عاد ماما كالت افرح
كومي فروحه دفعي شويه خلي يسكت
كامت فروحه تلعبه
بقيت اني ومروة ومرت مصطفى نسولف وماما وام محاق يسولفن حسيت حيل تأخرنا راح يأذن الاذان غير ماما تحس وتكوم ردت أدنه يمها وأكولها ماما تأخرنا شفت ابنهم الجبير دخل من الباب مال الصاله طبعا شايل كومه علاليك مبينات مليانات وثكيلات اول مشافنا كال
السلام عليكم
احنا ردينا السلام
ركضن مروه ومرت مصطفى اخذن منه العلاليك وتعجبت الجهال شلون ركضو عليه يشبكون برجليه طبعا هو مبين جاي من الشغل لان تراكة بيه صبغ واكو نشارة خشب بشعره مكعدع الديوان يمكن لان ملابسه بيها صبغ سحب كرسي بلاستيك من الممر وكعد وخله الجهال بحضنه منا ومنا واستغربت يصيحوله بابا بابا ام محاق كالت
ولكم خلو عمكم ياخذ نفس اثنينكم على كلبه
باوع بوجوهم ويبتسم بعدين كال
شبيه نوح عيونه حمر شنو. باجي
اي جان يبجي
ليش؟
سيارته مدري شبيها متمشي
طبعا الطفل حيل ذكي بسرعة نزل من حضن عمه وراح جاب سيارته وخلالها كباله هم ابتسم وكله
هاا خربت..ولا يهمك هسه اسبح وابدل واخذك نشتري احسن منها انت رجال شلون تبجي
يربي شكد حلوة علاقته بولد اخوه وشكد يحبوه طبعا ابوهم مشفنا ولا الحجي ..وحسيت اخوهم الجبير كل المسؤوليه عليه واضح هو يتسوك للبيت والجهال معتبريه ابوهم ومتعلقين بيه ..زين هو يبتسم للاطفال اني شبيه حيل متاثره بعدلي شويه وابجي افكر خطية لان معنده اطفال هيج متعلق بيهم
بينما دا افكر أمه كالت لمرت مصطفى
عمه اخذي الجهال منه خلي يفوت يسبح ويبدل يكمزون على كلبه وهو تعبان
اخذت جمالها وفاتت لغرفتها هو كام وكال من رخصتكم شكد حباب ومؤدب ابد مشال عينه مدنك وملتهي بالجهال من كعد إلى أن كان دخل جوه ماما كالت
خطية مبين شايل حملكم والمسؤولية براسه
والله يادادة عدنا خير من الله وأبوه يلح عليه يكوله ما اله داعي هذا التعب والشغل هالكد شوف نفسك ارتاح اطلع سافر تونس مخلصها تلهط هو ميقبل يكول ما اعرف اكعد من الشغل وحتى المعمل مالته كومه عمال بيه جوه أيده بس هو اله يشرف ع الشغل ويمد أيده يشتغل وياهم والماعنده خبره يعلمه شوفه عينج يجي محمل مسواك فوك مسواك الحجي..والجهال متعلقين بيه حتى ابوهم ميهتموله ذاك هو هالنايم صار الغروب وهو لسه ماكاعد
يااا نايم لسه حتى ميصلح
شسوي خيتي الليل كله يلعب بوبجي ويه الهتليه أبوه مل منه مياخذ الحجي بالليل يلعب ع الموبايل والنهار
مخلصها نوم
شلون يصير عنده مرة وجمال والمرة تريد كلشي الاكله واللبسه والاهتمام
مرته هم طرنه مثله متهتم عمها مدللها كل فتره يأخذها يشتريها ذهب ويطيها فلوس تشتري ملابس ومكياج ومصرف الها ولطلعاتها ويه أهلها وعم الجهال هو القايم بيهم من كولشي متشوفين ابوهم معتمد ومنتجي لاشغل ولاعمل
لاعيني غلط هيج يعتمد هاي دنيه طويله عريضه لازم يشتغل لو يشوفه وظيفه
عود قدم ع العقود بلكي يطلع اسمه ويتوظف
ان شاء الله احنا هسه نروح حيل تأخرنا
لا..لا شلون يصير تعشن يمنا
تسلمين والله..عود غير مره
ليش
فروحة تريد تروح تقره واني هم عندي كم شغله
براحتج
ورجعنا للبيت طبعا بمرور الأيام علاقتنا حيل قوت بجوارينا وباستمرار نزورهم ويزورونا ماما حيل مكيفه بصديقة الدراسه والصراحة المرة حيل حبابه ومروة ومرت مصطفى يحيرن شنو يقدمن النا من نروح الهم واحنا هم بالمقابل نهتم بيهن بس ملك ابد متعجبني تصرفاتها الفتره الاخيره صح مجد حباب ومؤدب وجيرانه بس عيب يوميه تروح وياه الجامعة بسيارة أبوه لان الي عرفته أنه السيارة البيضة مال الحجي بس عادي مصطفى ومجد يستخدموها لان هو بس يطلع العصر بيها يروح لإخوانه أو لاصدقاءه الشباب بالكهوه لهذا مجد يروح بيها للدوام أما الكية والسيارة السوده فذني سيارات محاق نادرا أحد يصعدهن غيره..المهم مثل مكلت حيل مضوجتني تصرفات ملك ومره تعاركت وياها
ورزلتها وكتلها ليش يوميه تروحين ترجعين ويه مجد هسه زميلاتچ وزملائچ شيكولون عليج وهو مجد نفسه شيكول شنو ماصدكت طلعنا جيران يوميه تريد اوصلها..يجوز يستحي يكولج لا
لا عيوني متوهمه لا يستحي ولا شي اصلا هو ينتظرني يوميه ويكول نروح سوه ع الواهس والولد حيل مؤدب ومبدر منه شي ولو حاسه متضايق مني مجان رحت وياه
لج والناس وصديقاتج؟
شعليهم بينا مادام ممسوين شي غلط
خرب ..يوم تسمعها شتحجي
يوم شكو بيها شحاجيه قابل وإذا وصلها وياه مو احسن ما يوميه صاعده ويه سايق تكسي شكل يأخذها الجامعة ع الأقل الولد جيرانه ومؤدب وحسبه اخوها
اخوها منين يوم تره جيرانه لااقاربنا ولا ابن عمنه
شو سكتي دومج معظمه الأمور خلي البنيه بحالها
شفت مامامأيدتها واعرف امي زين عدها كلامها هو الصح ولو احجي وياها من الصبح لليل متقتنع
بيوم من الايام عمتي خابرت ماما وطبعا ماما صار فتره طويله مرايحة لبيت عمه ملتهيه ويه ام محاق طلعات للسوك ويسيرن وحده ع اللخ وحتى خالتي اختها قليل تروحلها أو تسأل عليها طبعا ماما جانت فاتحه سبيكر واسمع صوت عمه تبجي..وتعاتبها وتكولها مريضة اني ومحد يسأل عليه وصلت الموت لامرت اخويه ولا بناتها كالن خل نشوف عمتنا ميته عدله..خطية جان صوتها كوله عبرات
ماما من خلصت المكالمة انقهرت عليها وكالت باجر تروحلها تبقى يمها من الصبح للعصر ملك جلبت وياها لان عدها اوف باجر فاتفقن يرحن فرح كالت
يوم باجر اذا انتي وملك ترحن لعمه من اطلع من المدرسه خلي اروح يم غزل العصر ارجع
انجبي ولج انتي غير باجر عندج امتحان رياضيات شهري
كتلج من اطلع من المدرسه
لا مترحين شنو تخلين اختج وحدها بالبيت عاد اني كتبها
اي مثل مكالت ماما مترحين لبيت خاله ترجعين للبيت واصلا باجر مااطبخ لان بس اني وانتي باقيات الصبح تأخذين فلوس ومن تطلعين من الدوام تجيبيلنا لفات نتغده
طبعا هي كلبت خلقتها وفاتت تقره
المهم الصبح انطيتها فلوس حتى من تطلع من المدرسه اجيب النا لفات وياها وماما وملك الساعة بالتسعه ونص بدلن وراحن لبيت عمه..بقيت وحدي بالبيت نظفت وغسلت ملابس وسبحت وعطرت البيت اباوع الساعة بالوحده اشو فروحة مرجعت هي تحل ب12 ضل باللي هاي وين راحت وليش تأخرت كلت بس لا عاندت وطلعت من المدرسه هي وغزل وراحن لبيتهم هاي رعنه وتسويها خابرت على خاله
الو خاله
هلو دعاء شلونج خاله
الحمد لله خاله فرح عدكم؟
لا ما اجتنا شو تسالين عليها هو ماكو شي
لا ماكو شي بس كتلها من تطلعين من الدوام جيبيلنا لفات وياج شو تأخرت كلت خاف راحت الكم ويه غزل
لا..اصلا..اليوم غزل ممداومة مريضة ومصخنه
شلون ممداومه غير عدها امتحان شهري
اي اني رحت الصبح اخذت الها إجازة
يا الله وين صارت فرح
خاف منطيهم درس اضافي اليوم
والله ما ادري هسه اتأكد
عود خابريني طمنيني
تمام خاله
سديت الخط
احس كلبي حيل تنقبض كلت مبيها مجال اروح لمدرستها
وفعلا رحت هي مدرستها دوامين الصبح متوسطه يداومون والظهر اعدادية فتت للاداره استغربت من عرفت الدوام الصباحي طالعين قبل ساعة بس الإعدادية بالصفوف ..طلعت من المدرسه حايره شسوي رقم مديرتها ومدرساتها..بجهاز ماما هي معدها موبايل..طلعت من المدرسه امشي مثل التايهة كلبي يدوك بكل قوته حيل قلقانه اتلفت..بالشارع الدنياالظهر والف فكره براسي فكرت اخابرماما كلت..يجوز راحت السوك مناك تشتري لفات وتأخرت وإذا خابرت ماما..
راح اقلقها ع خالي بلاش ردت اعبر الشارع واروح للسوك ادور عليها محسيت اله سياره وكفت قريبه مني جانت الكية مال محاق نزل منها وجه مستغرب
خير دعاء شفتج من بعيد مو على بعضج وتتلفتين خوش ماكو شي
اول سمعت صوته كتله
فروحة ..تأخرت لسه مرجعت من المدرسه
باوع ع ساعته
ساعة وحده ونص هي بيش ساعة تحل
ساعة12
احتمال راحت لأحد من اقاربكم لو لبيت جدج
لا مرايحة خابرت خاله تكول مو عدنا والمشكلة ماماوملك يم بيت عمه واني وحدي دا ادور عليها
خابريها يجوز امج ماخذتها من المدرسه
لا جان اتصلت بيه وكالتلي متخليني هيج قلقانه اصلا اني... متصلت بماما حتى ما اقلقها
تمام اهدي اختي هسه ندورها وين تروح يعني تعالي صعدي نفتر ندورها لو نرجع للبيت احتمال انتي ادورين وهي هسه بالبيت
لا شكرا انت روح اني راح ادور عليها
اختي شالسالفة انتي شايفه وجهج شايفه حالتج هسه شنو ادورين عليها وحدج
لا..اخي روح انته
اهوووو
راح فتح الباب وجرني من ايدي وكلي صعدي
محاق بس..
ودون مقدمات لزمني من خصري وكعدني ع الاكشن حيل استحيت منه بس قلقي ع فرح جان أكثر فعبرت الموضوع
صعد وبسرعة حرك وضلينا نفتر كتله
شوف محلات اللفات لان وصيتها تجيب لفات وياهانتغده بيهم
تمام وبقينا ندور ماكو عشر دقائق دك جهازي برقم خالتي
الو خاله هياتها فروحه عدنا جايه من زمان صاعدة فوك يم غزل وما ادري بيها التهيت اغسل هدوم بالحمام مشفتها من صعدت فوك
تحجين صدوك خاله دمي نشف صار ساعتين ادور عليها
اعذريني خاله والله منتبهت جماله اول مصاعده نايمه يم بتي هسه كعدتها كتلها غير تكولين لاهلج جايه
تكول اجيت اشوف غزل لان اليوم ممداومه وجنت نعسانه البارحة منمت للصبح أقره رياضيات محسيت ع نفسي وغفيت
وانتي خاله معقوله مصعدتي فوك كل هالوقت
خاله غزل تريكت ب11 وأخذت علاج ونامت واني التهيت والله اعذريني
والله ع حركة كلبي اذا التزم فرح الا اكطعها بسيطة
وسدت الخط بس شنو اعصابي نار فكلت لمحاق
فرح يم خاله الحمد لله
ابتسم كال
مو كتلج معليها شي نلكاها وين تروح
خلي نفسك بمكاني راح تقلق لولا؟
اكيد ..بس عفيه عليج مخابرتي امج واكلتي الحركة وحدج
محاق العفو ..اخويه تره
عادي اسمي محاق بدون القاب
محاق تره ماما مريضة عدها خفقان مو حمل قلق
مو كتلج عفية ..تصرفج صح
نزلني هنا خلي اروح لبيت خاله اجيب فرح اليوم اكطعها وروح بابا
اول شي لتحلفين ..وخليج عاقله تره اختج طفله
طفله شنو شابه بالثالث متوسط تكولي طفله؟!
مدام تتصرف بدون مسؤوليه يعني طفله
دخلي الزمها واعرف شلون أعلمها المسؤولية!!طبعا...اشكرك تعبتك وياي نزلني هنا ..مقصرت والله
الدنيا الظهر اختي اوصلج نجيب فرح ونرجع بالبيت
لا..اني اجيبها ونرجع سوه
انتي شكدعنيدة ..وادورين حجج اشو نجيبها سوه
والله مبيه حيل اتناقش وياك فوت من فرع البريد نهايته..يبدي شارع بيت خاله
ورحنا ليت خاله طبعا هو وكف بعيد ينتظرنه اول مدخلت خالتي حلقتني ما ابسط فرح ولا ارزلهاووعدتها ما ابسطها
اخذتها وطلعنا صعدنا بسيارة محاق اني ثوله المفروض اصعد فرح يمه واني بالطرف اكعد لان الكية مو جبيره فصارت كعدتي بصفة اضطربت ادنه حيل يم فرح وهو خطية هم حس وأبتعد بكعدته..
بس طلعنا من فرع البريد شفته لاف ع جهة المطاعم وكف السيارة ونزل فكرت احتمال يريد يشتري شي لأهله