رواية علاقة سامة الفصل التاسع 9 بقلم ورود الخالدي
دعاء::::
وفعلا ماما اخذتنا صالون اني وفروحة وهي هم لبست نفنوف مال نسوان كبار بس كشخة وحلو ورتبت نفسها وفروحة طلعت حليوة..ام الصالون خلتلي مكياج يجنن بس حسيت روج الشفه قوي كتلها خففي كالت لا هو الي راح يبرز المكياج كوله..المهم رحنا للعرس والعرس جان بالقاعة بالبدايه جانت العروس موجودة واقاربها وقسم من اقارب العريس..وبصراحة حسيت ماما عدها حق من خلتني اختار هذا الفستان المميز ..لان لاحظت عيون البنات معظمهن عليه....وكرايب العروس ميعرفني فقسم منهن تعرفن عليه وكالن
عيني هيج اهل العريس عدهم بنات يخبلن ..وقسم كالن شكلج مميز انتي متزوجة مخطوبه وكتلهن لا
بصراحة حيل فرحت باهتمامهن واسئلتهن..وحسيت ثقتي بنفسي رجعتلي بعد ما قربت احس انه اني واهلي منسوة فلس بسبب الي سوته ملك والاكثر السم الي جان محاق يبخة بوجهي كلما التقينا..فقررت بعد ما اسمحله يقلل من قيمتي او يخليني افقد ثقتي بنفسي لو بسمعة اهلي
وره نص ساعة جوي الشباب جايبين العريس وياهم الي هو ابن عم محاق وبمجرد مشفت محاق وياهم..لابس قاط انيق كالعادة وطالع غير شكل... لان هو اصلا جذاب وكاريزما ..بالبداية مشافني تقريبا هو ربع ساعة يضحك ويسولف ويه اقاربه وولد عمه واصلا ممنتبه عليه لو على مجموعة البنات الي داير مدايري ..بس اني مدري ليش جنت اراقبه يمكن لان متوترة من وجوده وما اريده يشوفني ..وفجأة التفت وشافني..بالبدايه جان وجهه لهناك لجهة ثانيه بعدين بقه عيونه عليه خررب حظي..بس هالمرة مجانت نظرات وكبل لا اصلا عيونه معافتني دقيقة ..حسيته يريد ياكلني ..لا عبالكم نظرات اعجاب وكذا لا والله يمكن اذا ينفرد بيه هسه يخنكني ..يربي شهالقهر..شايفين شكد شعور سيء من نحس انه احد يراقبنا خصوصا اذا هالشخص يكرهنا وبينا وبينه..توتر او يدور فد زله حتى يلزمها علينا..
بالضبط هذا جان شعوري يربي شعليه بيه عيونه اكلتني اكل ..منو هو اشايف نفسه وليش مخليني اباله القاعة مليانه بنات مبدلات ولابسات لبس يمكن اكثره مبين اجسامهن وتفاصيلهن وهم حلوات ومرتبات شنو ماكو غيري بالقاعة حيل اتضايقت منه..وجنت احاول ما اباوع عليه والتهي ويه البنات وفقرات الحفله..وقبل متنتهي الحفله بينما جانو يكصون الكيكة شفته اشرلي..بحركة راسه يعني طلعي بره القاعة عززاا شيريد مني..بس لا يريد يرزلني لو يريد يبخ سم جديد عليه..وتذكرت تصرفه الاخير وياي..الي تجاوز كل الحدود وقررت ما اخاف واطلع احجي وياه واني الي اهجم هالمرة
وطلعت بره ووكفنا بالممرالي واكفه بيه السيارت وقبل ميحجي كتله
شتريد مني محاق وبعدين منو انت..حتى تاشرلي واطلعلك..ابويه اخويه خالي عمي زوجي خطيبي..منو انت بالضبط..وليش هيج مركز وياي وحتاكلني بعيونك طول الوقت!!
ابتسم..وكال
ردت اكولج.....
قاطعته
اعرف شنو تريد تكولي..لان اعرف عقلك المريض شلون يفكر من ناحيتي..راح تكولي شدعوه هالفستان وهالمكياج..هااا مواعدة..لومقرره تصيدين واحد من المعازيم..احب اكولك لا..لا انت ولااي احد من اقاربك يهمني اتقرب منهم..وبالنسبه للبسي ومكياجي حالي حال كل هالبنات ..بس انت الي..مركز وياي زيادة وادور عليه حجج وزله حتى تبخ سمك بوجهي..
ابتسم اكثر بس حسيته متفاجيء من كلامي شمر الجكارة وكلي:
لا هالمرة ردت اكولج
هم قاطعته
لا تكولي ولا اكولك ..عوفني بحالي محاق معليك بيه.. ما اريد اي موقف يجمعني بيك..يا اخي كافي الي صار بينا لحد الان كافي ..اكولك باختصار اكرهك..واكره كل عباراتك وكل شي يصدر منك تجاهي وما اريد اسمع منك حرف منا وجاي..
وشفت وجهه تغير يمكن كلامي هالمرة اثر بيه لان مجاوبني عفته واكف ورجعت دخلت للقاعة.
وره دقايق شفته دخل للقاعة عادي وجهه طبيعي ويبتسم للناس بس ابد مشفته يدور عليه بعيونه الحمد لله كلامي جاب نتيجة..بداخلي توقعت كلامي ضوجه بس هو جان ريلاكس..اصلا من ركصو ولد عمه انضم للركصة مالتهم ويفر بالسبحة مالته..واموره عادية وخلصت الحفله على خير وحسيت نفسي هالمرة منتصرة لان مسمحتله يغثني
وره شهرين ماما كالت لازم نروح للمستشفى اخيرا غزل راح يسوولها العمليه وعمليتها الساعة ب2 بالليل لازم اني وماما وفروحة نكون يم خاله مسألت ماما شلون خاله كدرت ادبر مبلغ العمليه مخطر على بالي اسألها وفعلا رحنا للمستشفى..وبقينا هناك ودخلوهاساعة 2 لغرفة العمليات فروحه خطية مفرفحة عليها واحنا كاعدين وندعي وابوها وامها واخواتها المزوجات جايات وكولهن كاعدات بره بالممر لان ممنوع احد يدخل جوه يم الغرف..
ساعة بالسته وربع طلع الدكتور وبشرنا عمليتها ناجحة بس راح تضل تحت المراقبه الطبيه 24 ساعة حتى تستقر حالتها..
خاله وزوجها حيل فرحو وشفت خاله ركضت ع ماما وشبكتها
الله يخليج خيتي لو ماوكفتج وياي جان ماتت بتي!!
ياااتحجين صدوك شنو مصخره عليها تره غزوله حالها حال فرح بتي بعدين اني مسويت شي روحي تشكري منه هو
اي والله الله يحمي لشبابه ويوسع عليه رزقة اضعاف مضاعفه مثل مانقذ بنتي من الموت!!
اني مستغربه ماما شعليها ومنو الي ديحجون عنه وبس راحت خاله شاورت ماما
ماما شنو الموضوع منو الي دتحجن عليه
ياااا وج منو يعني محاق حمه اختج
ومحاق شعليه!؟
غير هو الي دفع فلوس العمليه
شنو؟!
اي هو بس حجتله امه حجه وياي وكلي عمليتها عليه ودفع
وشلون راح تسددله خاله
وج شنو تسددله الولد دفعهن للثواب
8 ملايين للثواب!!
اي اصلا من كتله نرجعلك المبلغ ضحك وكلي خاله اني ادور هذه الحالات دوارة حتى اساعد ليش شمحصلين من الدنيا غير ذني الي نقدمهن في سبيل الله
بقيت صافنه ..يربي هذا .. شنو من شخصيه غريبة معقوله يدفع هيج مبلغ يدور بيه اجر وثواب وبقه محاق لغز جبير الي مستحيل اكدر احله لحد هاللحظة
وره نص ساعة ماما خابرت ملك حتى اطمنها ع غزل لان هي هم ضال بالها عليها بس ماما اثناء المكالمة سمعتها تكول
يااا..تحجين صدوك..شوكت..وليش مخابرتيني ..الله يطيح حظج غير تخابريني بساعتها
خفت عبالي ملك لو طفلتها الي ابطنها صار عليهم شي بس ماما سدته وصفنت
يوم شكو شبيج
وج ..الحجية عجوز سميرة ماتت
انا لله وانا اليه راجعون شوكت ماما؟؟
وج المرة ميته من الساعة ب٣الفجر وماخذيها يدفنون واختج الغبرة مخابرتني شكد عيب منهم
يوم شنو عيب غير عدنا عمليه وام محاق تدري
وج ميخالف ع الاقل تخابرني حتى اتصل بالمره اعزيها واتعذر منها
اي خابريها هسه
اخابرها شنو المرة ماخذيها يدفنوها واني اخابر...لا راح اتعذر من خالتج ما اكدر اضل وياها بالمستشفى لازم نروح عليهم
اي روحي ماما
وانتي ولج العصر لحكيني اصلا البنيه24 ساعة يله يطلعوها من العناية
اي يوم العصر اجي
وماما راحت بقيت يم خاله وبناتها وفروحة وياي وخاله راحت للدكتور سالته شوكت يطلعوها من العناية كال ساعة وحده لو2 بالليل..صار العصر اكدت على خاله تتواصل وياي واني راح اخابرها كل شويه اطمن لان ماما تريدني اروح لنسابتنا ام ابوهم توفت
اي خاله سمعت اني هم بس بنتي تطلع واطمن عليها اخلي وحده من بناتي يمها يجوز باجر امر ع الفاتحة شلون انسه فضل ابنهم عليه
ورحت بدلت لبست نفنوف اسود عريض وطويل جان بيتهم مليان نسوان رغم البيت جبير كولش بس مليان للنهاية..مبينن معروفين واصحاب واجب ع هواية ناس.. النسوان تدخل من باب الزغير والزلم من الباب الجبيرة
ومن دخلت جوه بالكاميرات شفت الناس دتفوت للاستقبال مالتهم وابومحاق ومحاق ومصطفى ومجد وعمامهم وولدهم يسلمون ع الناس هم..اجوهم اعداد هواية كولش ناس تطلع وناس تدخل وهكذا طول الوقت
لليل الناس كامت تخف شويه قسم راحو والمعارف والاقارب بقو يتعشون وره العشه هم راحو معظم الناس بقن عماتهم وخالاتهم..ووعجايز ما اعرفهن كاعدات بالغرف مره ينامن ومره يكعدن ينعن شويه ويسكتن..
ساعة١٢خابرت ع خاله اطمن ع غزل كالت ممطلعيها يمكن بعد ساعة لو ساعتين تطلع ..بس مخليها تشوفها وتكول زينه فكلت الها خاله مراح انام الساعة ب2 هم اخابرج
بس جهازي وره شويه طفه شحن..كلت لماما اروح لبيتنا اشحنه مقبلت كالت كعدي وسكتي وكت موبايل هسه فنطيت جهازي لملك كلت الها شحنيه لان اريد اخابر خاله بعد شويه اخذته مني وطبعا ساعة بالوحده البيت مالهم صار هدوء كولها الناس نامت مصطفى ومرته صعدو فوك وملك هم صعدت هي ومجد تذكرت جهازي صعدت فوك دكيت عليهم الباب طلعتلي ملك
ها .دعاء
جهازي اريد اخابر خاله
جوه جهازج ع الشحن بغرفة محاق
بغرفه محاق!! ملكيتي غير غرفته
اي مو كولنا اجهزتنا ايفون معدنا شاحنه تايب سي بس هو جهازه بوكو يشحن ع التايب سي
وهسه شلون
روحي اخذيه
يااا اني اروح لغرفة محاق؟!
اي شكو بيها
نزلي انتي وجيبيه
وج شينزلني اني وبطني تره كوه صعدت روحي اخذيها تره محاق بالاستقبال يم عمامه واحتمال ينام هناك
وصاحها مجد فهي سدت الباب وفاتت
يربي شلون بيه هسه ملكت غير غرفته تخلي جهازي بيها..شلون اخابر خاله وحتى جهاز ماما بقه يم فروحه..نزلت وكلت اخلي مروه تجيبه رحت لكيت مروه نايمه ..كلت ادوك الباب واكوله اريد جهازي اذا موجود واذا مموجود اخذه واطلع ع السريع..
دكيت الباب ماكو رد اكثر من مره دكيت وكلت خاف ابقه ادوك واحد يكعد لان الكل صنطه ماكو صوت..فتحت الباب جانت غرفته ضلمة ولا ضوة معلوك بيها لمست الحياطين ادور ع نقاط الكهرباء حتى اعلك الضوة مندليتهن ولان جهازي انفنكس وبيه ضوة من يشحن..شفت ضواه ضعيف من بعيد فرحت ركض..شلعته من الشحن وخليته بصدري ومشيت كم خطوه بس .. شفت الباب انفتحت وانسدت
لحظة وانعلك الضوة..والي علكة محاق وبس افتر شافني كباله مباشرة جان وجهه كوله استغراب
دعاء؟
وبعدني محجيت حرف اندكت باب غرفته اول مندكت الباب بسرعة جرني ..ووكفني وره الباب وطفه الضوة وفتحها وسمعت صوت امه عزززاا عزززا امه كاعدة:
يمه محاق راح احميلك برياني ادري بيك متاكل اكل الفاتحة واكيد ميت من الجوع هسه
لا يمه العصر جعت واضطريت اكل
من العصر لهسه اكيد جعت
يمه مجوعان بس تعبان حيل واريد انام ارتاح
اي يمه الله يساعدك بس الطريق كافي عليك روح نام ارتاح..اني وعماتك كاعدات هنا اذا جعت بس كولي حتى اصبلك لكمه
وعللك الضوة و قفل الباب وخله المفتاح بجيبه
ليش قفلته اريد اروح
وقبل ميرد سمعت وحده تنعه صوتها قريب هاي شنو مو جانن نايمات شوكت جني وكعدن هنا ورجعن ينعن!!
تردين اطلعين من غرفتي هسه ..كدام امي وعماتي..اصلا ليش انتي هنا شجابج لغرفتي مو ع اساس متردين اي موقف يجمعنا شعندج هنا؟!
جان صوته ناصي تقريبا اني هم نصيت صوتي
جان جهازي ع الشحن بغرفتك
اخذني من ايدي بعيد عن الباب وكلي
ها موبايلج هنا وماكو غير غرفتي بيها كهرباء حتى تشحنين بيها..لو انتي اصلا متعمدة ادخلين واطلعين من غرفتي ومفكرة البيت مليان باقاربي ..حتى الناس تشوفج طابه طالعة واكيد هذا اله معنى واحد
محاق شهالحجي !
ويمكن طموحج اكبر وتورطيني بيج!!
متحملت كلامة كالعادة دمعت وكتله
ابدا والله ..اصلا مو اني الي خليته بغرفتك اختي ملك هي الي خلته هنا وتفاجئت من كالت بغرفتك حتى كتلها انتي روحي جيبيه كالت كوه صعدت ما بيه انزل وفكرت اخذه واطلع بسرعة قبل لتجي..
اي وينه موبايلج اذا كلامج صح
استحيت اطلعة من صدري كدامه افتريت وطلعته ورجعت التفتت وانطيتهيا
شوفه حتى مليان شحن لان صارله فتره طويله هنا
باوع بوجهي ويمكن صدكني هالمرة لان ملامحة هدأت انتبهت هو لابس دشداشه سودة ووجهه مبين ميت من التعب..
انت ليش قفلت الباب اريد اطلع
لج وين اطلعين الساعة بالوحده ونص وعماتي وامي بالصاله شلون اطلعين كبالهن..بعدين قفلت الباب لان اعرف امي ساعة الساعة تفوت حتى تتاكد اني متغطي ونايم هذا طبعها
لعد شلون؟
انتظري الى ان ينامن لو يرجعن يدخلن جوه اني اطلع اشوف الطريق واخليج ترحين
هو طلع من جيبه باكيت جكاير وجداحة وسويج سيارة وموبايله خلاهن عالميز وتمدد ع جربايته وبقه مفتاح الغرفة بجيبه
بقيت انتظر يسكتن ويهدا الجو بس الصوت مستمر ويمكن طلعن اكل ياكلن لان اسمع صوت مواعين وره شويه رجع صوت النعي فكلي:
شوفي ذني عماتي واعرفهن يشترن اللطم والنعي مشتره بعد لا ساعة ولا ساعتين يله يسكتن وينامن اني تعبان راح انام..ومن تحسين ماكو صوت وهدوء كعديني حتى اشوف الطريق واطلعين
تمام
وفعلا اول مخله راسه ع المخده راح بالنوم..عبالك طفل زغير..واني بقيت محبوسه بغرفته انتظر الفرج وهنه لاتعبن لانعسن وحده تسكت والخ تكمل وره ساعة تقريبا صار هدوء كلت خلي اكعده رحت يمه
محاق..محاق اكعد افتحلي الباب يمكن نامو
بس مكعد حاولت مره مرتين اكعده ماكو انوب واني اكعد بيه اندار صارن المفاتيح جوا بجيب دشداشته حتى ما اكدر اطلعهن هاي شلون ورطه ..انتظرت بلكي يكعد وحده ماكو ولا تحرك.
انتظرت اكثر من ساعتين ماكو شلون يربي راح ياذن الاذان والناس تكعد تصلي وهذا غافي ونومه ثكيل ميقبل يكعد رحت فتحت البردة اباوع راح يطلع النهار وفرحت من شفت شباج غرفته جبير ..واكدر اطلع منه فتحته باوعت حديقتهم بره صنطة بس اضويه البلوجكترات عاليه كلت مدام ماكو احد خلي اطلع ع السريع . فتحت الشباج وصعدت وشفت المسافه اكدر اجيت..فكمزت للكاع بس من سوء حظي نفنوفي جلب بالشباج ووانرفع واني بالكاع عزا جسمي كوله طلع حتى الشورت مالتي طلع النفنوف مجلب احاول اجره ميفلت رجعت ادنيت صعدت شويه فلته ونزلت الحمد لله محد شافني جان جهازي بصدري طلعته كلت ادك ع خاله بس لالا مو وكتها خلي اروح لبيتنا وهناك اتصل مشيت ع السريع وطلعت محد بره الناس بعدها نايمه رغم ديمجد
وصلت لبيتنا وخابرت خاله وعرفت غزل مطلعيها وزينه
ولان منايمه صار يومين اول مدخلت فتحت الاستقبال ونمت ع القنفه وفزيت ع رنه جهازي
وشفت رقمه:
رديت:
الوو
لج شلون طلعتي والمفاتيح بجيبي!؟؟
من الشباج
شلوووون!!!!!
اي حاولت اكعدك انت متقبل تكعد حيل تأخرت والنهار راح يطلع وانت متكعد ففتحت البرده شفت الشباج وطلعت منه
بيش الساعة هالحجي
جان المؤذن يمجد
خرررب..يعني الصبح
اي تقريبا
انتي مخبله شلون اطلعين من الشباج بيتنا متروس كاميرات وشاشه العرض مالتهن مشتغله بالصاله واكيد النسوان كعدن للصلاة وشافنج
شهكت..
مستحيل..مسحيل محد كاعد كولهم نايمين
اني بعدني مطالع من غرفتي..واكيد اذا وحده شايفتج معناها فضيحة الي وراح اعرف من امي ع السريع واكيد راح اصير ميز يم عمامي وولدهم اقسم بالله موتج على ايدي اذا احد شايفج طالعة من شباج غرفتي.