رواية علاقة سامة الفصل الخامس 5 بقلم ورود الخالدي
دعاء:::
بيوم جنا راجعين العصر اني وماما من الكوت لان جنا يم خوالي طبعا رحنا من الفجر بس اني وماما لان فروحة يم خاله وملك مقبلت تروح ويانه كالت عندي دوام وهي اساسا متحب تروح لخوالي..ماما فاتت نامت لان تعبت من الطريق بس لاحظت ملك من فتحت الباب جان لونها مخطوف وعيونها تايهة متوترة فكرت هاي شبيها يمكن مريضة طبعا هي وفرح ينامن بغرفه وحده واني وماما بغرفة بس من تمرضت غزل فرح تبقى عدهم دائما تجينا بس يومين الخميس والجمعة لان ماكو دوام..ولهذا...ملك تبقى وحدها وكلما افوت يمها الكاها لو تدرس لو تراسل صديقاتها ..بس من جيت هالمرة شوفتها معجبتي صار المغرب سويت عشه وصحتها تتعشه وياي لان ماما نايمة..كالت ما اريد عشه هاي شبيها يمكن فعلا مريضة تعشيت وحدي بس مكدرت انام قلقتني كلت اروح اشوفها اذا مريضة انطيها مسكنات ونروح الصبح للدكتور..
فتت للغرفةشفتها كاعدة مخليه راسها على ركبها وتتصفن
ملك..شبيج شو وجهج مخطوف شنو مريضة
هالا..لا مابيه شي تعبانه من الدراسه
تره الامتحانات بعدلها اسبوعين ليش تضغطين ع نفسج
اي .صح
ردودها معجبتني :
ملك عيني شبيج شو مو على بعضج صاير شي
لا..لا شكو شصاير يعني
لعد نامي وارتاحي لتقرين اليوم
ردت اكوم كالت:
اكولج ..دعاء ليش ..اقصد ليش الي ينتحر الله يذبه بالنار يمكن عنده سبب قوي
شنو شكلتي!
لا..لا مكلت انسي
شنو انسي شنو مكلت شجاب هاي الفكرة براسج هسه ؟!
شوهاي شبكتني وبجت:
دعاء نامي يمي لترحين يم ماما
كلبي طفر من صدري من سمعت صوتها مكسر
وج ملك لتخبليني شبيج اليوم
مبيه شي..وطكت يجي وحضنتني حيل
ملك وج كلبي راح يوكف شبيج فهميني
دعاء اني..اني ما اكدر احجي
ليش شصاير وياج؟؟
ما اكدر احجي
خرررب وج احجي!!!!
خاف ..ماما نكعد وتسمعنا!!
عزززاا وإذا سمعت!!
واستمرت تبجي
ملك وروح بابا راح اضربج وج احجي
اوكفي خلي اسد الباب
كامت سدت الباب وضلت تباوع داير مديرها بعدين اخذت جرجف الجربايه خلته جوه فتحت الباب وكالت
دعاء شلون احجيلج خاف يصير بيج شي
احجي راح اتخبل
اليوم ..اقصد انتي تعرفين اني ومجد ..يوميه نرجع سوه..اليوم كتله اريد اروح اجيب غده ماما ودعاء مهنا..فكتله..وصلتي للمطعم اجيب سفري..
اي
فكلي لا اوصلج للبيت واني اجيبلج غده
كتله تمام
وليش تبرع حضرته!
مو هو دائما يعزمني بالجامعة ع عصير او جاي لو لفات ففكر عادي اذا جابلي غده للبيت و
وج كملي
اجه جاب غده كال جبت غده النا اثنينا ناكل ع الواهس فاستحيت منه ودخلته للبيت..ووتغدينا بس وره متغدينا!!!!؟؟؟؟
وكامت تبجي أكثر
كملي راح انجلط
شلون احجيلج..ما ادري
احجي..لا اموتج
وره متغدينا هو تقرب مني يبوس ويحضن بيه ..ويكولي تدرين بيه احبج
عزااا العزاج يحبج شنو ومخليته يبوس بيج ويحضن!؟؟
مو هو من زمان كلي احبج
واني جنت اكوله مو وكت حب وهالسوالف خلي نكمل دراستنا..بس هو اليوم بقه هيج يحجي بأذني وحاضني وهو
وشنو..وج شصار احجي
دعاء...صار..ص..صار غلط بيناتنا كولش جبير هو تقرب مني اني بالبداية دفعته بس مدري شسوالي واخذ مني اليريده
اني سمعتها محسيت ع نفسي كمت ادك والطم ع وجهي وع صدري حسيت نفسي فقدت..كمت اخذت التعلاكة الخشب وكمت اضرب بيها بكل قوتي واحجي
وج شلون..شلون سويتي هالسوايه شلون تنطين نفسج
كطعيني موتيني خيتي استاهل جيبي سجينه من المطبخ وذبحيني..
شبعتها ضرب تعبت وكعدت ابجي وهي هم تبجي بعدين فكرت شويه وكتبها
اوكفي يعني شلون تقرب عليج بملابسكم مو!!
لا..لا مو بالملابس
وج علاقة كاملة يعني كسر وجهج..ولج
ما ادري ..ما اعرف ..
متعرفين شنو..
وضلت تيجي وتشرحلي ومن حجيها الي ما اكدر احجيه عرفت..اختي شرفها راح
مااعرف شلون اتصرف حسيت جبل وكع على صدري حسيت ملك الموت دياخذ روحي ..شسوي ستصرف من حركة كلبي بقيت اضرب بيها ملخت شعرها تملخ أصابعي انترست شعر هي بس تبجي وتسمعني
وج عبالج هذا يحبج عبالج..هذا يهتم للصار بيج وج وين عقلج..شلون انطيتي نفسج شلون شلون فهميني؟!!!
هو كلي لتخافين كولشي اني احله
وانتي صدكتي ..شلون راح يحله ..راح يخطبج وهو طالب وأهله راح يقبلون ياخذوج وهو مصخم وجهج بالحرام
اخذت نفس وكملت:
وج كسرتي وجوهنا امي اذا عرفت تموت..شنسوي وج شنسوي احجي
ما ادري..ما ادري
اتصلي عليه..اتصلي خلي احاجيه
اتصلت عليه جان ميجاوب..وميقره الرسائل..وقبل شويه شفته حاضرني
اي طبعا..طبعا يحضرج..غير اخذ الي يريده منج ياساقطة يامامربايه وج شنكول لأمنا مافكرتي شرائح يصير بيج
انتحر احسلي..انتحر ومحد راح يعرف
سدي حلكج..سكتي ما اريد اسمع صوتج
وطلعت من غرفتها كعدت بالصاله احس راسي راح ينفجر..شسوي شلون نطلع من هذه المصيبه..اروح اكول لماما وماما تروح تكول لام محاق ويتصرفن هنه .لا..لا. ماما متتحمل اني متحملت هي شلون تتحمل..اروح لابو. محاق وأبنه احجي وياهم خاف ميصدكون بكلامي ويتبرون من السالفة ويفضحونا..هو حاضرها..يعني ميريد يحجي..بقيت ساعات لساني مثل الخشبه وعيوني يجرن دمع وحدهن..رجعت لغرفتها لكيتها امدده ومغمضه عيونها ..باوعت ع اديها اثار الضرب مبينه اصلا اديها زرك من الضرب...
بقيت كاعدة بره بالحديقة راسي منفوخ من الحيرة والتفكير شسوي وين انطي وجهي المن التجيء زين اروح اكول لمرت مصطفى وهي تكول لزوجها وعمتها ويلكون فد حل بس..لا..لا..لا.. مرت مصطفى صح حبابه بس بالاخير هي غريبه خاف تحجي لأهلها وننفضح أكثر وبعدين مصطفى لايحل ولا يربط ..اي صح الحل والربط بيد محاق..وهو الأكثر تأثير عدهم حتى أكثر من أبوه لان ابوهم مودائما متواجد يومين عدهم ويومين عند زوجته الثانية وبالليل يم عمامهم لو يم أصدقاءه حتى اني شفته مرات قليلة قياسا بالمرات الي شفت بيها محاق أبيت اهله
باوعت ع الساعة بجهازي شفته راح اصير ب2 اتصل بيه خاف نايم وخاف ميرد وخاف اذا مرد هسه يتصل بيه الصبح وماما كاعده وهسه تكولي شعجب متصله بيه زين شلون بيه ابقه هيج وحدي اكل بنفسي والله احس راسي حار وادية ترجف راح يصير بيه شي اذا ابقه هيج وحدي اكل هم المصيبة
وبدون تفكير طلعت رقمه واتصلت ع الواتس دك هوايه وبعدين رد مبين من صوته جان نايم ويمكن محافظ رقمي بجهازه لان من جاوب كال
الوو..منو؟؟
اني..اني..جيرانكم..اني دعاء
كال بصوت مستغرب
دعاء!!
قبل لا ارد كال
امج بيها شي؟؟
لا..لا ..مو ماما
سكت وبعدين كال
انتي اخواتج..بيكم شي..اجيكم..يعني؟؟
لا..لا..بس
اوكفي..فهمت حاسه اكو حركة غريبه ابيتكم لو احد يحاول يدخل الكم..لاتتحركين ضلي بمكانج ولا تطلعين صوت..ابدا..وإذا بفراشج سوي نفسج نايمه..اني ثواني وجاي ..سمعي كلامي ولترتبكين..
لا..لا اخي ..وين تجي محد عدنا..وماكو هيج شي
اختي لعد شكو؟
اريد ..اقصد اريد احجي وياك بموضوع..
موضوع..اي موضوع انتي تعرفين بيش الساعة هسه!!
اي..اي اعرف
اختي شنو حلمانه روحي نامي!!
تره الموضوع ضروري حيل ضروري
اي عادي يتأجل للصبح
ما اكدر ..ع التأجيل واصلا ميتأجل..
سكت وحسيته ورث جكارة لان سمعت صوت الجداحة
يله احجي اسمعج بس اختصري لان نعسان حيل!
مو بالتليفون!؟؟
خرب..شبيج دعاء..شتردين بالضبط؟؟!!!!
تره احنا بمشكله منتخيل شكد حجمه اترجاك طول بالك وياي
ياستار..مشكلة هسه بالليل؟!!
بجيت مكدرت اجاوبه
..سكتت..ومن سكتت كلي
الوو..الوو دعاء..وياي
اي ..وياك
هاي شنو دتبجين..شكو يمعوده..راح اجيكم؟؟
لتجي ما اريد ماما تسمعنا
زين..شلون تحجيلي ..اذا ما اجي وانتي تكولين مو بالتليفون..عادي تجين انتي هسه!!؟
خاف اهلك أحد كاعد منهم؟
لا نايمين تعالي اني راح اشوف الكاميرات الي بالشارع اذا محد بالشارع ادزلج رساله وتعالي
اي..
وقبل لا اطلع صارت مرايه المطبخ كبالي عزة هاي شصاير بوجهي صاير خريطه من اللطم..وعيوني مورمه وحمر..شحالي صاير ..بس مو مهم هذه الأمور كلها تافهة المهم احل هالمصيبةمال ملك
وشفت رسالته
تعالي ركض
وفعلا رحت ركض فتحلي الباب جان بفانيلة وبرموده لان جان نايم...دخلت لبيتهم
دخلي الاستقبال خلي اسد بابل الصاله ونسولف هناك..
استقبالهم خارجي وجبير فدخلت وبقيت انتظره ..مبين عليه قلق من كلامي ووجهه كوله استفسار من دخل سد الباب وكعد كبالي وكلي احجي من انتبه لوجهي. كلي
هاي شنو شبيج ليش هيج وجهج؟!!
رأسا بجيت..
دعاء اني كايلح ابجي اهدي..اهدي لخاطر الله
هسه احجيلك
ياريت
سكتت ما اعرف شكول وشلون ابدي بالكلام وهو منتظر احجي دقيقه كامله منتظر احجي
دعاء شنو الموضوع غير جايه تحجين شنواضل انتظر للصبح
والله ما اعرف شكولك
احجي الموضوع مباشره
محاق باختصار..اخوك..اقصد..اخوك..مجد مصخم وجهها لأختي ملك
شنو؟؟
اي
مصخم وجهها شنو؟؟
شنو يعني مصخم وجهها..اي مثل مافهمت!!
لج انتي واعيه منتبهه شدتحجين!!
اي واعيه ولو مواعيه ومنتبهه مجايتك بنص الليل..بهالحال!!
ويقه يفكر يحاول يستوعب كلامي انوب طلع باكيت وجداحة من جيب البرموده وورث جكارة وأخذ منها نفس وكلي عباره عبالك سجينه وخلاها بصدري
اي ومنو يكول اخويه؟!!
بسرعة زمخت بيه؟؟
شتقصد..شتقصد ..انت ..ش
اي..اقصد كلامي..منو يكول اخويه يجوز أحد غيره!!
محاق..انت ..ممصدكني!
اي..شنو دليلج أنه هو اخويه مو غيره
حسيت صوتي طلع قوي من كتله بصياح:
انت..تقصد أنه اني دا اتبله ..على اخوك
اول شي لتصيحين لا افلشه لوجهج..الدنيا ليل وصوت الليل مسموع...جايتني نص الليل بموضوع ممكن يطير بيه راس اخويه..وترديني اصدكج؟؟؟!!!!بسهولة!!..منو يكول اخويه شنو مصورتله فديو لو شفتي بعينج لو تحجين معتمدة ع كلام اختج لو طابختها انتي واهلح حتى تورطون عائلتنا وتجيبون سمعتنا للكاع
متحملت كميه الطعنات الي وجهها الي
كمت الطم ع وجهي..وابجي
عزه..وفوكاها ممصدكني
هو بسرعة لزم أيديه وكلي
لج مخلبه..كافي خلي نحجي مثل الاوادم
محاق انت ممصدكني!!!
اي..لان كلامج مو منطقي ..وين لكاها اخويه أو وين أختله بيها..حتى صخم وجهها همه يرحون ويرجعون سوه وبالنهار وكدام كل الناس..شنواغتصبها بالشارع يعني؟!!
لا..ابيتنا؟!!
ابيتكم؟؟
اي ابيتنا البارحة اني وماما ..جنه بالكوت طول النهار وهي وهو راجعين من الجامعه وجايب الها غده ودخلته للبيت وصار الي صار
ها..هي مدخلته للبيت !!!!!!!!!!؟
كال هالعباره وحركة وجهه وابتسامته الي جانت صفح و مستفزه عبالك ديحجي ويه شخص يعرف كل ماضيه أو يعرف أنه إنسان موتمام هيج حركته ونظرته وابتسامته فسرها عقلي
اي
يعني مجابرها!! أو مغتصبها؟!!
شتقصد..؟!!
يعني برضاتها!
محاق!!!!قصدك اختي..
اي..هذا تفسير كلامج هي مدخلته للبيت وراضيه ماكو رجال يفوت بيت ناس ويسوي هالسوايه الا إذا لكه الباب مفتوح ع الغارب والمرة مهيئتله الجو..
زمخت بيه..:
محاق يعني أحنه موزينين وبابنا مفتوح واختي مو شريفه
اكو تفسير ثاني..؟!!!
لك..اختي جاهله واخوك مقشمرها وانت دتتهمنه بشرفنه وتريد تبري..اخوك وتخليه من المسؤوليه..
اختج مو طفلة اختج شابه وتعرف الصح من الخطأ؟؟
لا..متعرف اخوك..ضحك عليها بالحب والزواج..والأحلام..ومراعة أنه هي بنيه وبامانته..ولا راعه..رب العالمين بيها..ولاحسب حساب شرف وجوره وانت جاي تشيل منه الذنب وتحمله لأختي وحدها..هي هاي مروتك..هي هاي مروتك محاق
جان لازم ايديه حتى ما اضرب وجهي..فلتتهن وغطيت وجهي بيهن كلي
دعاء!!
التفتت عليه:
جيتك..واني مخليه كل املي بيك..راسي راح ينفجر من التفكير والحيرة ماما متدري وإذا درت يمكن تموت..وانت..انت هيج ردودك..حسبي الله ونعم الوكيل .حسبي الله ونعم الوكيل
دعاء شترديني..اسمعج منا وأكلج اي ميصير خاطرج اله طيب..تره الموضوع مو سهل الموضوع يخص شرفنا وشرفكم..وإذا..انفضح وطلع من عدنا لو من عدكم نصير علج بحلوك الناس
انت كلتها بلسانك ليش تحاول تحملنا وحدنا المسؤوليه
اكيد راح اتصرف وراح استفسر من مجد وإذا كلامج كوله بمكانه اني هم الي الكه حل اله
يعني شنو كلامي بمكانه
يعني اذا اختج فعلا جانت بت بيت واخويه هو المصخمها فهمتي!!
محاق
راح تضلين للصبح ترددين محاق ..محاق..خره على أهل محاق..كتلج اني استفسر واتصرف
يعني شراح تسوي!!!
استغفر الله .. يابت الناس..كتلج اني اتصرف..روحي هسه لاهلج..وإذا متردين امج تحس كافي بجي وتصرفي عادي إلى أن اتواصل وياج..
محاق بس اني ماراح أكدر انتظر هوايه
كتلج روحي باجر نحجي
اي راح اروح
اوكفي اروح اشوف الكاميرات ليروح يشوفج أحد طالعة من بيتنا نص الليل
راح ورجع بسرعة
يله روحي لأهلج بسرعة ونامي ولتحجين شي ولتشكين لاي احد من كرايبج أو تحاولين تستشيرين أحد كتلج اني احل الموضوع اذا كلامج بمكانه
تمام
طلعت من بيتهم رحت لاهلي بسرعة دخلت الحمام غسلت وجهي وكعدت..افكر بكلامه..شراح يسوي وهذا مجد النذل راح يعترف بلي سواه لو راح ..يتبله ع اختي ..شراح يصير باجر يربي..كلبي يلوب بس من جهة ثانيه عندي امل بكلام محاق رغم كلامه كله سجاجين تطعن بكلبي وبروحي بس..مضطرة اتحمله إلى أن يصير حل المصيبه الي اختي بيها..دخلت جوه ركض لغرفتها خاف سوت شي بنفسها لكيتها نايمه متكوره مثل البزونه الزغيره اباوع عليها واكول بداخلي شسويتي بيه شسويتي بينه لو ميته ولاسامعه هالكلام
منج ..بس..لحظه ماما الصبح اذا شافت اثار الضرب عليها واني هيج وجهي مورم من اللطم والبجي شنو راح اكول الها ..لازم اخترعلي فد قصة امي تقتنع بيها..بس شلون راح تصدك اني بعمري مضاربتها بالشكل شنو الطريقة الي أو القصة الي احجيها لماما بحيث تقتنع بيها!!!؟؟؟؟
متابعاتي شنو الموضوع شو بس تقرن وتم تم اني بشنو تفيدني التم وين ملاحظاتجن واراءجن وتعليقاتجن ع الاحداث والاجزاء الي دا انزلها..لا..لا حيل زعلتني.