رواية علاقة سامة الفصل السادس 6 بقلم ورود الخالدي
دعاء:::
وصار الصبح وكعدت ملك وقبل متكعد ماما كلتلها:
ملك كولشي لتحجين لماما اذا ماما سألت وشافت الآثار مال الضرب اني اجاوبها..
شلون يعني
راح اكولها اني ضربتها لان هي رايحة متعاركة ويه راون ام الصيدليه وغالطة عليها والبنية خابريني وعاتبتني تمام
اي
بس
اوكفي تره اني رحت حجيت ويه محاق وكلي راح يلكه حل انتي سكتي وكولشي لتحجين واي تصرف لتسوين حتى قندرة مجد بعد لتتواصلين وياه
تمام
وكعدت ماما ومثل متوقعت شافت ملك :
يمه..وج اشبيج مزوركة
بسرعة جاوبتها اني:
اني ضربتها!!
عزة العزاج وج ليش هيج مكطعتها
رادت تضربني
قبل متضربيني شوفي بتج شمسويه وشلون مفشلتني ويه بت العالم وبصيدليتها وكدام الزبائن!!
مافهمت
الخاتون ماصدكت..حجيت الها ليش بطلت من الشغل بالصيدليه..جان تكولي ..انتي فطيرة وهاي خبثت عليج وخلتج تبطلين لان ابن عمها جبرها تشتغل عندج هي مدا تدفع من جيبها ليش راحت فتنت وكطعت رزقج ومن هالحجي ومتوقعت تروح ع البنيه وتفضحها فضيحة بالصيدليه
واذا فضحتها هيج تسوين بأختج على مود خريانه روان ؟!وانتي شبيج وجهج مورم وعيوني منفخة!!
اصلا بالبداية مردت اضربها بس من خابرتني البنيه حسيت نفسي تفشلت رحت الها كمت ادك والطم ع وجهي واكولها ليش فشلتيني كدامها حضرتها ممهتمه ضلت تتمضحك وتكولي يطبها مرض..شبيج تلطمين وكاتل نفسج.فورت دمي لزمتها كطعتها بالتعلاكة..
ماما جرتني من شعري وكالت
شوفي ولج دعاء انعل ابو روان لا ابو الخلفها..مسويه نفسج عود جبيرة وادكين على اخواتج..هالمرة سويتيها مرة الثانية ايدج اكصها اذا تمديدها على وحده من اخواتج ولج شنو..وحش انتي چلبه!! مكطعتها هيج..ما بكلبچ رحمه..!!مافكرتي اختج عدها دوام شلون الدوام وانتي مزوركتها
شمدريني شلون اداوم طبها مرض
جان ملك تكولها:
يوم ما اداوم اصلا عدنا عطله لان بعد١٠ ايام ع الفاينل
اي خوش..همزين ماكو دوام
وعافتنا وراحت تتريك
اخذت نفس واحجي بيني وبين نفسي الحمد لله عبر عليها الفلم وصدكتني
مر النهار واني انتظر اي رساله او رد من محاق كل ربع ساعة افتح الواتس بس ماكو شي المغرب صاحتني ملك
دعاء شكلج محاق؟
ملك ..يعني تردين اسولف وامي تسمع!!خليني بهمي حالي حالج دا انتظر
بينما دنحجي..ماما فتحت الباب ودخلت
هااا..شو تسولفن شنو تصالحتن عشتو!
يوم شعندي وياها تره هي الي بدت
دسكتي..لتخليني اكتلج كتله زينة يله كومن وحده تثرم لحم ووحدة تسوي زلاطة
واني دا اثرم باللحم شفت رساله وصلت ع تليفوني بسرعة فتحتها
وجانت بس 3كلمات من محاق
(الموضوع صار يمي)
عفت اللحم ودزيتله فوك ال10 رسائل ردت اعرف شنو راح يسوي وانتظرت يفتحهن بس مفتحهن يربي هذا شنو من بشر اني كلبي مثل النار وهو حتى ميفتح الرسائل ولا مهتم
ومرت٣ايام وهو مفاتحهن ومراد عليهن يربي شوكت يرد عليه دزيتله بعد رسائل صوتيه واتصلت بس ميرد
وبيوم الرابع العصر ماما جانت يمهم ورجعت وجهها يضحك وطايره من الفرح..وصاحتنا وكالت
ولجن اذا احجيلجن متصدكن!
شكو ماما
غير أم محاق حاجتني يردون يجون يخطبون ملك لمجد
سويت نفسي كولشي ما اعرف وغمزت الملك
ماما ياخطبه تره بعداسبوع امتحاناتها
وج قابل ميدرون عدهم امتحانات..بس أمه تكول الولد يموت عليها ويكول لأهله لو تخطبوها الي وتعقدولنا قبل الامتحانات لو ابطل من الجامعة..ولجن..تعجبت بحجي سميرة تكول نريد نجي نخطب وهي مشية هو عقد
معقوله؟!
اي والله حيل مستعجلين..
وباوعت ع ملك وج شلون هيج مخبله الولد عليج شمسويتله
يوم شمسويتله تره ملك حجتلي قبل فترة الولد كايللها هو معجب بيها بس هي كايلتله نخلص جامعه وروح احجي ويه اهلي شمدريها هيج كاتل نفسه..يوم شدعوه هالاستعجال خلي يمتحنون وبعدين الخطبه هيج كولي لام الولد
وج سكتي وإذا خطبو وعقدو..اني كلبي طار وج مصدكة مجذبه اناسب بيت ابو محاق!!!وج اختج انفتحت الها باب الجنه يوم الالج وتجيج هيج قسمه..والله يا الله تكولي اكولهم أجلو الخطبة واني كلبي يرفرف واخاف ليبطلون
زين يوم يعني مشية وعقد
اي يمشون علينا مشيه زلم ويعقدون
زلم يجونا!!؟
اي غير ادز ع خوالج ولدهم وكم واحد من أقارب ابوح يكعدون وياهم ..قابل اني اكعد ويه إلزلم!
شوكت
ام محاق كالت رتبي امورج وخابريني كتلها اليوم اخابر اهلنا كالت تمام وباجر العصر يمشون علينا
يوم غير تكولين عقد لازم نرتب ملك وناخذها صالون مو؟!!
اي طبعا وج هم زين اديها طابن من الضرب مالتج
يوم كل شويه تعيدين عليه الموضوع تره ساعة عصبيه وراحت
امداج وج الاخت. عزيزه هسه تتزوج وتشوفين وحشتها وشلون مكانها يضل خالي وتضلين تفرفحين ع شوفتها
وعليمن افرفح هياتهم عيالها واروح اشوفها
وفعلا ثاني ماما اخذتني اني وملك للصالون عافتنا وكالت خوالج جايين بالطريق من تخلصن خابرني حتى اجي اني وخاله نجيبجن للبيت..وبقينا بالصالون طبعا منكدر نحجي كدام البنات البنيه ام الصالون عدها كومه بدلات اشكال ملك اختارت وحده لونها.. كولش حلو وكملنها البنات مكياج وتسريحه ومن خلصن كالت
انتي مو اختها شو لا اختاري اي فستان او بدله لاخليتي ميك اب شمنتظرة؟؟
فكرت كلت اذا اضل هيج اتصفن لو اروح مبهذله هم الناس تكول هاي شبيها اختها بعقد اختها ...جايه وجهها يطرد النعمة..فاختاريت فستان طويل بنفسجي وقماش الردن شفاف وتذكرت من كلام مرت مصطفى بعرسها أنه اعراسهم مختلطة يعني ولدهم وبناتهم وكلهم يحضرون سوه..فرجعت اخذت فستان ثاني لونه كرزي بس مستور أكثر والبنية ام الصالون خلتلي ميك اب كولش مرتب..ومن رجعت للبيت لبست حذاء اسود الي متوفر عندي..
وصارت المشيه وخلص العقد وطبعا خوالي وراهم طريق بس خلصت المشويه راحو..ومتصورت هالكد ناس يجون..بس ماما عبالك تعرف جابت هوايه كيك وعصائر وكرزات وبوكسات عقد ورتبتهن وخلت بيهن الكيك اضافه الى الكيكة الجبيره الي محضرتها العقد ماما من فرحتها تحير شتسوي سوت ميز مال عقد وحضرته ع السريع بحيث من رجعنا من الصالون تفاجئنا شوكت ماما كملت كولشي..طبعا كومه بنات ونسوان وولد عمهم وكرايبهم ومصطفى ومرته ومروه وابوهم وأمهم وكلهم حاضرين و أثناء مجان مجد يلبس ملك الحلقة وشفت أمه جابت علبه تعجبت شو محضرين الذهب وجايبيه وياهم وهمه توهم كطعو المهر يجوز يكطعون فلوسه من المهر..لان سمعت الشيخ يكول مهر معجل٢٥ مليون ومؤجل٥٠ مليون..
وشفت محاق واكف يم مصطفى..مدري ليش توترت من شفته جان يباوعلي من فوك ليجوه محسيتها نظره اعجاب حسيت عيونه تخترق جسمي نظرته انطتني شعور انه اكو بيه فد خطأ ومن كد متوترت رحت الغرفه مال ماما اباوع ع نفسي يربي شبيه اكو شي غلط..لبسي مستور ..ومكياجي مو قوي .شبيه يريد ياكلني عبالك..سجان واني متهمه..وطلعت من الغرفه دورت مكان اوكف بيه بحيث ما اصير كباله وما انطي فرصه يضوجني بنظراته
وخلص العقد وكولهم راحو ماما طايرة من الفرح وتبوس بملك والغريب بالموضوع ملك هم عايشه اللحظة مصدكة بنفسها ..اصلا لو اني منها اطم نفسي..والله .بس ..هذا الي صار..لا وازيدكم من الشعر بيت قبل امتحاناتها بيوم كامت تنزل ستوريات مصوره الحلقة بيدها..وتكول احلى مفاجأة لصديقاتي قبل الامتحانات....والله يا الله شلون عقل عدها..هم الها نفس تفرح وتكيد صديقاتها..
ومرت الايام..وخلصت الامتحانات ودزو المهر وماما بدت تجهز ملك كولشي طبيعي..خطبه وعقد وتجهيز..بس اني كلبي ممرتاح معقوله كولشي يمشي بهالسهوله افكر..محاق..شلون دبر كل والأمور..لان من خلال كلام ملك الي عن لسان مجد أنه محاق هو الي ديرتب كولشي للعرس حتى الخطبة والعقد من ترتيبه..
وره شهرين صار العرس..بالقاعة وكلهم فرحانين ويركصون وحتى محاق الي جنت مترقبه وقلقه من تصرفاته شفته يفر بالسبحة ولابس قاط انيق وطالع..يجنن وعيونه تضحك وديحتفل بعرس اخو مثل اي اخ فرحان باخو الزغير اني بداخلي..احس اكو شي غلط وممصدكة كل والأحداث..وجنت افكر بغير شي افكر باجر..الي اعرفه انه عمام مصطفى من أهل گبل يعني..مثل يكولون المصريين(دقة قديمة) اخاف يطلبون نيشان العروس يعني نيشان عذريتها اي كل اهل قبل هيج يسوون ينتظرون نيشان الوصله البيضه مهما أطور الزمان هاي عاداتهم ..يربي شيخلص العرس..وشيجيب الصبح وشراح يصير؟!
ومن صعدنا الفندق طبعا حاجزين جناح العرسان وجناح ثاني لام العريس وبنتها وأهل العروس اول مدخلنا للغرفة حسيت نفسي اختنكت وبطني انخبطت يمكن لان متوترة وقلقه..وما اتخيل نفسي الصبح اسمع فد خبر يخرب كولشي اذا ام محاق طلبت وصله العرس العليها النيشان واختي معدها..وهالكد ما الموضوع شاغلني تخربطت أفكاري وتعبت نفسيتي كلت لماما:
ماما اريد ارجع للبيت ابدل ومناك واروح لبيت خالتي حيل مختنكة هنا
وج وين ترحين تره صار الليل
ماما كتلج احس نفسي حيل متخربطه
كعدي وسكتي شنو متخربطة
ام محاق سمعتنا
ع كيفج وياها دادة تره بتج مبينه ما الها خلك شوفي لونها شلون مخطوف
وحاجتني
شبيج خاله شو وجهج مكلوب
خاله معدتي توجعني ومختنكة
ليش شبيها معدتج شماكله شو كولنا اكلنا من أكل القاعة
اصلا متعشيت اني
خاف الظهر ماكله شي!
هو بس الغده الدزيتوه للصالون
ماما كالت
بس لا ملك هم تتخربط
لا ماما ملك متغدت بس اني اكلت
دنحجي ودك موبايل ام محاق
الو ..ها يمه...اي..اي تمام...راح انزل
ها وين تنزلين
هذا محاق جايب سويج السيارة يكولي الصبح ما اكدر اجيكم للفندق خلي السويج يم مجد...اكول مادام جاي محاق خلي ياخذ...دعاء للمستشفى بلكي ينطوها علاج شي خطية ما الها خلك
فكرت كلت اي همزين اجه ولو ما احب يرجعني بس احسن ما اضل هنا..كاتلتتي الخنگة والتفكير
اي خاله خلي ياخذني حتى لو بس يرجعني للبيت
يله لعد خل ننزل سوه
ونزلت وياها محاق شافني نازله شفته مثل الي استغرب خاله اخذت منه سويج سيارة أبوه وبسرعة كالت
يمه محاق اخذ البنيه وياك لبيتهم ما الها خلك..وإذا تأخذها للمستشفى بعد احسن
صار يمه
محجه شي وياي مشه واني وراه فتحلي الباب صعدت كعدت اول محرك وره كم متر :
محاق أخذني لبيتنا اريد ابدل واروح لخاله
ابتسم صفح :
مو ع أساس متخربطة ..ولازم يدخلوج الانعاش تحت الأجهزة الدقيقة والإشراف الطبي المشدد!!!!!
محاق شدتحجي!!
وانتي شنو والحركات مال متخربطة ومريضة وانتي مابيج قز القرط !
هاي شبيك هيج تحجي شمسويتلك اني
شتردين بعد وشنو الداعي لهالتمثيل الي ردتي انتي واختج صار
اي تمثيل محاق اني فعلا مختنكة وروحي مقبوضة خايفه من أحداث الصبح واخاف امك لو امي يطلبن منهم شغلة نيشان العروس
هااا..من هاي مخطوف لونج اي حقج اختج منيلها نيشان تقدمه..الصبح بس هاي هم حليتها كتله لمجد عود يشك أيده لورجله..ويسوي نيشان لربه الصون والعفاف ولو اعرف كلش زين امي متطلب هيج شي بس خليت احتمال لأمج..ولو لحد الان ممصدك انتن ممتفقات وياها
محاق اسكت..اسكت لتحجين هيج اتقي الله
لعد شلون احجي وياج خاتون اخذلج تحيه انتي واختج الي ورطتنا ورطة متفض الا بعد5او6 اشهر
شنو 5 او6اشهر؟!
اي طلابة اختج ومجد متفض قبل هالمدة ع الأقل يحتاج5 او6 اشهر يله يطلك
يطلك؟؟
اي اكيد يطلك..بس لاعبالج هاي هيه راح يتزوجها من صدك ويعيشون بثبات ونبات ويخلفون ولد وبنات
ليش..ليش يطلك؟
انتي من كل عقلج ..اختج راح تصير جزء من عائلتنا من كل عقلج هذا زواج حقيقي..لا خاتون هذا زواج هيج كدام الناس حتى نلملم الفضيحة..وحتى نلزكها لغلطة اخويه..ونستر على اختج
بس
بس شنو ..معتقدة انتي واختج اهلي راح يتقبلون هيج جنه تشيل اسم عائلتنا وحده انطت نفسها ليكدام متناسبنا ولا نتشرف بيها
يعني اهلك يدرون
لا ميدرون بس اني ممستعدابقى اجذب عليهم واخدعهم طول العمر..ولان وحده مثل اختج أو عائلة مثل عائلتكم يستغلون غلطة اخويه حتى يتلزكون بينا..بگرابه أو نسابه هذا لا يشرفني ولايشرف اهلي
من سمعت كلامه الي كوله اهانات وطعن يشرفنا مجان عندي اجابات لان اختي فعلا نزلت روسنا وخلت شرفنا بالكاع وحدهن دموعي نزلن لان اني بطبعي..من أحد يحجي عليه وما الكة رد أو ماعندي ذيج القوه الي ارد بيها رأسا ابجي
بله ع شنو تبجين..اكو غلط بكلامي؟
سكتت مجاوبته جنت بس امسح بخدودي
ومن مجاوبته انفعل لان هو اساسا عصبي وكف السيارة وزمخ بيه بصوت بخوف:
ع شنو تبجين احجي..كل الي ردتيه سويته وأكثر خطوبه وعقد وعرس متحلم بيه اختج ومهر شتردين أكثر لو انصدمتي بحجاية الطلاك..؟؟
جنت افكر بملك كلت بصوت ناصي كولش
خطية ملك!
بس هو سمعني
ها..خطية..لان راح تتطلك اي عادي امج ارمله واختج مطلقة عادي خلي..يسموكم بيت الأرامل والمطلقات احسن ما يسموكم بيت الگ....ب
التفتت عليه وصرخت بوجهه
لك انت شنو من بشر منين الله خالقك..مستحيل تكون بشر عادي
ميهمني رأيج بيه
مسحت خدي مره ثانيه واستمريت بكلامي:
اي مستحيل تكون بشر مثلنا..شفتك فرحان مثل اي اخ
فرحان بعرس اخو الزغير وكدام اهلك انت متكفل بكولشي وكدام الناس مبين كولشي عادي وطبيعي ..وهسه تكولي تمثلين لعد أنته شلون تكدر تمثل ع الناس كلها وتبين طبيعي وبداخلك كل بالسواد
هذا مو تمثيل هذا يسمو تعامل ويه المواقف..
لتحاول تزخرف كلامك
لا ما احتاج احاول كتلج رأيج ميهمني !!
واذا رأي ميهمك شكو ..جاي تهز بيه مثل الشجرة وتوجهلي كلام مستحيل اي انسان يتحمله .اصلا انت متفكر بالكلام الي توجهه الي شكد يدمر نفسيتي
عادي كل انسان ياخذ الي يستحقه من الكلام ورد الفعل
ليش اني شمسويتلك شعندي وياك..اني شنو وتحاسبني ع أخطاء اخوك واختي..وكل شويه تقارن بين عائلتك وعائلتنا عبالك انتو أنبياء واحنا..بيت مشبوه منشرفكم
لان اشوفكم تتعاملون ويه الموضوع بشكل عادي اختج تغلط ويه اخويه واخويه عادي لازم يتحمل غلطة..لان اذا متحمله راح ينفضح وفضيحته مو عاديه
هو منو الي راح ينفضح تره اختي الي راح تروح سمعتها..اخوك رجال ومجتمعنا ميحاسب الرجال وانت تعرف كولش زين هالكلام
متوهمه..يمكن اذا انفضحت اختج عادي..انتن مجرد اربع نسوان محد يعرفجن ابعد من حدود الشارع مالتجن ..بس احنا عائلة معروفه ٣ ارباع بغداد يعرفونه وعدنا ناس تكرهنا وناس تحبنا..وإذا انفضحنا..هيج فضيحة تمس الشرف..اليكرهونا يصيرون شمات واليحبونا يخلون جوه اسم عائلتنا الف خط احمر
كل هذا لان انتو زناكيل واحنا فقره..هذا الي تريد توصله كاعد تهين بيه..وتجرحني..بس لان اكو فرق مادي..واجتماعي بين عائلاتنا..زين اني شعليه مشبعني قهر شنو علاقتي..مستحيل اصدك انت بس يهمك توصلني هالفكره
وسكتت بعدين كتله
انت مريض والله مريض
لزم أصابعي ولواهن
منو المريض ولج؟؟
انت..مريض..ومليان تناقضات..مرة مسوي نفسك ابو الانسانيه وخبصتني خبص شكو تشتغلين ويه دكتور يذلج..!!وهسه..كاعد تقارن بين وضع اهلي وأهلك عبالك انتو ملوك واحنا عبيد!!ومرة تكولي رأيج ميهمني ومن الصبح لسه كاعد تشرحلي وتحجيلي وتراقب رد فعلي وتعابير وجهي !!ومرة تمسح دموعي وتكولي الدنيا خلصانه ومستوه بجي ودموع وهسه تشوفني افرفح وكلامك واهاناتك ملخته لكلبي ودموعي يجرن ولا هامك اصلا مستمتع بيهن!!
هالمرة مجاوبني بس عصر أصابعي أكثر وجرني قريب منه
اخ..اخ..ايدي....هاني.