رواية علاقة سامة الفصل السابع 7 بقلم ورود الخالدي
دعاء:::
كتلك هدني هد ايدي
حسيت صوته بأذني
يعني مخليتني ابالج ودتحسبين تصرفاتي وتقارنين بينها
ارتبكت كتله
لا ممخليتك أبالي بس..هذه الحقيقة واي واحد يتعامل وياك يعرفها مباشرة
وقربني أكثر :
بس ذني الكلتيهن شويه ...منا وجاي خلي دفتر وقلم واحسبي وقارني
هدني بسرعة
إن شاء الله ما احتاج ..دفتر واكيد مراح تجمعهما مواقف بعد حتى احسبها
وسكت إلى أن وصلنا قريب من شارعنا
شكلتي اول مصعدتي؟!
كتلك اريد اروح للبيت ابدل حتى اروح لخاله
واني شنو السايق مال الخلفوج انتظرج تبدلين وارجع اوصلج
لا العفو تكدر بس تنزلني يم بيتنا
ومنو ياخذج لخالتج بهالليل!!
اني اروح
ليش خالتج وره البيت..لو مسافة كيلو ع الأقل والدنيا ليل ..لو عادي تطلعين وحدج بالليل!؟
شعليك انت؟
ادب سز..احجي عدل ..ماكو لخالتج ولا غيرها انزلي يم اهلج ابقي بالبيت تفض الناس اللعدنه واجيببج تنامين يم الحجية؟؟
يم الحجية شنو..لا اروح خلاله
شوفي تره تعبان..ومفارغلج ورايه كومه شغل.
جان صوته حاد ردت انهي الكلام:
اي..اي..كافي..تتأمر عليه
وصلت لبيتنا نزعت الفستان وكلت لنفسي هسه اني لو بايته بالفندق شلون راح اكدر انام بالفستان والله يا الله لبست تراك وتمددت حسيت معدتي بيها صوت فارغة من الجوع...فتحت الثلاجة اعتيادي ماما مطابخه اليوم طلعت برتقاله وخبزة وخيارة واكلت..اويلي ارتاحيت جنت ميته جوع..خليت راسي ع القنفه محسيت من غفيت فززني صوت دكة الباب كمت فتحته
يله الكل راحو قفلي بابكم وتعالي
لا ماكو داعي اصلا جنت نايمة وحدي
دعاء فوتي كدامي...تره ابو أبويه محترك من التعب
هسه راح اجي
قفلت باب الصاله. ورحت وياه جان بيتهم فارغ..وبوبهم كولها مسدودة ماعدا غرفة الحجية الضوة جان معلوك دخلني يمها وراح واستغربت ساعة حتصير ب١١ وهي كاعدة..وره شويه شفته شايل صينيه واجه كعد يمها
وهذا العشه
ما اريد عشاك روح خلي انام ليش كعدتني
افه..تنامين جوعانه
اي مو انت مفكر بيه شو من الصبح لسه ماشفتك خليتني اتغدة وحدي مثل البومة
لا والله مناسيج بس ملتهي طول النهار غير تدرين عدنا عرس
منو معرس..عمتك بهيرة!!؟؟؟
هههه لا مو عمتي بهيرة مجد اخويه
مجد منو!
مجد اخويه الزغير هذا الجان يصرخ باذنج وينهزم
يااا وليش تزوجوه خو اشتروله بايسكل احسن
اي نشتريله ليش لا!!
طبعا الحجية عدها زهايمر بس هو يسايسها..وشفته يوكلها بايد وبالايد الثانية يمسح حلكها بالكلينس ويبتسم بوجهه ويشجعها تاكل مبين حيل يحب بيبيته وحنين عليها..يربي هذا شنو من بشر كم شخصية عنده والله حيرني
وره متعشت مسح حلكها واديها وهي تمددت غطاها..وطلع واول مطلع جتني رساله منه ع الواتس
(انطمري)
كبر شلون اسلوب..سخيف شنو انطمري..بس اني مكدرت انام عدهم ابد عيني ما اخذت نوم يمكن لان مكاني متغير لو. لان الباب مفتوحة للصبح ومجنت مطمنه ولا مرتاحة..اول مسمعت الاذان مال الفجر كمت طلعت سديت باب صالتهم ومن طلعت للشارع سديت بابهم الخارجي ورحت نمت ابيتنا
ثاني يوم الصبح كعدت على مكالمة ماما
ها..دعاء..وين انتي شو محاق يكول عايفج يم الحجية هسه أجينه من الفندق انتي ماكو شنو رحتي لخالتج من الصبح
لا..ماما اني ابيتنا
وشعندج ضاله وحدج يله بدلي وتعالي هنا يمناشنو متسمعين الصوت شلون مسوين استقبال حلو لأختج ابيتهم
يوم دا اسمع بس ما اجي اريد انام..منمت هوايه
شلون صارت معدتج
بعد وكت تسألين ع معدتي حقج الفرحة مطيرتج
هههه وج تعالي ماما
لا ما اجي اريد اكمل نومتي
دضلي بغيرة
ونمت يمكن العصر يله كعدت ماما جايه هي وفرح..كعدن يسولفلي كولشي ومن خلال كلامهن فهمت أنه كولشي تمام واصلا موضوع نيشان عروس ومدري شنو ابد مسائله عنه ام محاق ولا ماما حاجية بيه يعني جنت شاغله بالي ع الخالي بلاش
وسمعت فروحة تكول ماما
ماما تاخذيني لغزل
اي نتعشه واخذج وتذكرت شو غزل مسوت عمليه الامتحانات خلصت وهي ماسوت العمليه
يوم شو غزل مسوت عمليتها!!شنو طابت؟
وج يا طابت خالتج ماعدنا فلوس تسويلها عمليه و العمليه مو بالعام لا بالخاص ومخليه البنية ع الادويه وكوه الدكتور قبل يأجلها بعد كم شهر
هاي شنو؟
اي والله الدكتور يكول عمليتها كبرى ودقيقة حيل وتكلف فوك ال8 ملايين وخالتج .. كولشي ماعدهه
خطية غزل
والله لو عندي ما أقصر عليها بس شسوي ما بيدي شي
الله كريم يوم متضيق الاتفرج
حيل انقهرت من كلام ماما وفكرت بس لاتموت خطية غزوله شابه بعدها..
ومرت الأيام وصارت عزيمه السبعة مال ملك..كولهم اهل زوجها حاضرين اله محاق مجان موجود..الحمد لله اني هم اكره شوفته بس لاحظت انه ملك حيل فرحانه بزواجها وتتصرف بشكل طبيعي مثل اي عروس يعني ماكو مشاكل عدها فقررت ما احجيله عن كلام محاق عن الطلاك واخليها عايشه الفرحة بس لان جان بالي يمها سالتها:
ها ملك شلونه الزواج
ههه حلو ..يوم الالج
شلونه مجد وياج وعيالج
مجد ورده ماكو منه..وعيالي كولهم حبوني الحمد لله بس هذا اخوه محاق..فد حقنه ونفسيه..من تزوجنا لليوم كلمةمحاجية وياه..
شعجب
ما ادري ..شبيه اصلا ميباوع بوجهي
شعليج بيه المهم زوجج وعيالج زينين
اي والله شعليه بي. متخلي يطير
وبقينا نسولف هوايه اني وهي بصراحة جنت فعلا قلقه عليها ومشتاقتلها بنفس الوقت..
ومرت الأيام والاسابيع تقريبا مر شهرين ع زواجهم واجتي ماما تبشرني ملك حامل!
فكرت..حامل..يعني زواجهم طبيعي..لعد ليش محاق يكولي يطلكون..عززا العزاج ملك..بس لايطلكوج وياخذون ابنج منج..بينما جنت افكر
وج شبيج..اكولج اختج حامل تتصفنين حتى مافرحتيلها بعدين انتي ابد مرحتيلها لبيت عبالها وهم بصفنه من عرست اليوم شنو مصدكتي تخلصين منها!
شهالحجي ماما .شنو اخلص منها تره فرحانه الها كولش بس اكول عدها جامعه دوام شلون بيها حمل ودراسة
شنو حد للبنات الي يتزوجن و يحبلن ويدرسن
والله ما ادري بس اشوفها صعبة
ديله بدلي خلي نروح نبارك الها
هسه يوم..ترى وكت عشة عيب
اي والله يله باجر نروح
اكولج ما الله هداج وترجعين تفكرين بموضوع محمد
اهووو يوم مو كتلج ما اريد اتزوجه ليش تلحين غير رديتي ع أمه وكلتيلها البنيه مقابله بعد شنو؟؟
مو هو رايح محاجي رجل خالتج وج ماما الولد مشتريج ليش ترفضيه شو خريج ومتعين وابو عنده أسواق شكدها شكبرها ..وشكله مرت
غير لزكة ..غير رفضته شكو رايح لرجل خالتي
وج غير رايدج ومتمسك بيج الولد
يوم كوليلهم البنيه متريد تتزوج وسدي الموضوع
وج غير افهم ليش شبي الولد
يوم محبيته..ولااتخيل نفسي زوجته احسه اتفه من التفاهة بعدين هو اكبر مني بعشر سنوات شجابرني يعني
دضلي مكابلتني راح يصير عمرج24 سنه وهاي اختج ازغر منج عرست وحاملَ
كولمن ياخذ نصيبه ماما
وثاني يوم رحنا اني وماما ع بيت ام محاق باركنا لملك وجانت حيل فرحانه وشاورتني وكالت اريد احجي وياج
اي احجي
لا من نصير وحدنا احسنِ
وانتظرت ماما وام محاق يلتهن ويكعدن بالصاله صعدت لغرفتها لان غرفتها فوك وكتلها :
خير خو ماكو شي
وج..دعاء هذا محاق شكد كلب وحقير
شلون..
البارحة رحت للدكتوره وبشرتني حامل بالاسابيع الاولى عيالي طارو من الفرح..كولهم بس محاق اول ما اجه واحنه نتعشه خاله عود تريد تبشره بحملي اول محجت هو سكت وشفت ملامحة كولها تغيرت بس كال من وره خشمه
اي يابه مبروك الحفيد الجديد
شو نص الليل دك على واتس مجد ومجد رد عليه كلي محاق رايدني راح انزله..استغربت شيريد بهالليل اول منزل مجد نزلت وراه لان كلبي..لعب منه خليت اذني ع باب غرفته.وجان اسمع صوت الراشدي
ليش ..ليش محاق شنو طفل اني وتضربني
لك هو هذا اتفاقنا مو كتلك لتتقرب عليها الى ان اطلك..وكتلي صار..شنو..مو بعينك اني وتضحك عليه
شنو ما انقرب عليها محاق مرتي حلالي..تره
لك تريد تخبلني..يعني اله تحبلها يله ترتاح شلون اطلك هسه وهي حامل
عادي تنزله للطفل
شنو انت يهودي تريد تقتل نفس تريد تق تل ابنك شنو ذنبه الطفل
شتريد محاق فهمني شتريد؟!!
شريد بعد فاس ووكع بالراس وهذا الراشدي لان طلعت زعطوط ومو كد حجايتج..لك وحده انطتك نفسها شلون تتقبلها مرة وتخلف منها
تريد الصدك..خويه تره احبها
تحبها!!
اي والله احبها ..ومن اتفقت وياك جنت مجبور اوافق ع كلامك
مادام تحبها..تحمل مو باجر عكبه تجي وتكول محد نصحني ومحد شار عليه
مجد مرد عليه سمعته كله
يله ولي ..اريد انام
شفتي. شفتي..دعاء جانو متفقين فترة ويطلكوني بس مجد لان يحبني واني احبه ومدللته..مسمع كلام اخوه
ردت اهون عليها :
اي..المهم رجلج يحبج معليج بيه هذا حماج تره واحد كلبه اسود ومريض..خليج فرحانه بحملج وابد لتحسسين رجلج انه انتي عرفتي شي
ها يعني ما افتح الموضوع ويا
لا ابد..خلي الامور طبيعيه
ومن رجعنا لاهلي حمدت رب العالمين الف مره على الي صار الحمد لله مجد يحبها لملك ومراح يعوفها وهذا محاق رب العالمين فشله ومخلاه ينفذ الي براسه القذر
وره 3شهور ملك عزمتنا كالت مسويه حفله زغيره هاي مال معرفة جنس الجنين ..وفعلا رحنا جانت الحفله العصر.وطلعت ملك حامل ابنوته المغرب ردنا نرجع للبيت بس ام محاق جلبت بينا ع العشه وبينما ديسون العشه كعدنا اني ومروة نسولف بره بالحديقة واحنا كاعدين بالمرجوحة وحسيت كلبي انقبض من شفت محاق طلع وصار قريب من يمنا..اصلا اني طلعت حتى ما ابقه بالصاله واصير كباله فهو اشر لمروة فكامت دخلت جوه شلت جهازي وهيدفوني سمعته
ابقي اريد احجي وياج
خير ..شكو؟!!
خير انشاء الله كعدي خلي نسولف
رجعت كعدت ع المرجوحه اجه كعد يمي..وحسيته يراقب ملامحي من كالَ
بدون مقدمات اكو شخص حجه وياي بموضوعج باعتبارنا نسابه وكذا
اول مكال شخص عرفته محمد محاجية كبل كتله
محمد مو..هذا شكد لزگة..مو دزيتله رفض بيد ماما ورجل خالتي بعد ليش هالملحة وانت شنو علاقتك بيه حتى يفتح هيج موضوع شخصي وياك
عادي ترة الي يخطب يحاول مرة مرتين اوتلاثة بعدين شفايتلج يخطبج مني!!
ليش عيني شنو انت ولي امري!!
لا مو ولي امرج
لعد معليك انت
ردت اكوم لزم ايدي كعدني
تره بعدنا دنسولف ومو من الذوق تكومين واحنا بعدنا ممخلصين كلامنا..
لا خلص الكلام..كتلك رفضته وانت بدورك كوله البنيه رافضة وخلص
ههه لاخطية ينصدم غير اقدمله فد سبب لرفضج
شنو فد سبب تره محمد اكبرمني بعشر سنوات شجابرني اقبل..بواحد خاش بالعمرين
خلفلله عليج يعني محمد الي عمره33سنه خاش بالعمرين مو؟!!
برأيي اي او بالنسبة لعمري اي
بس،هذا مو سبب الي اعرفه امج اخذت ابوج وهو اكبر منها بهوايه هذا عن لسانها طبعا
وليش اعيد غلط امي هياته بابا مات وعافلها 3 بنات يتيمات والدنيا..تلطم بينا
شفت نظرة عيونه تغيرت
وحتى اذا العمر موسبب..اني محبيته لمحمد واعتقد هذا سبب اقوى..
هاا يعني ادورين حب وكذا
اي ليش لا لازم الي اخلص وياه عمري احبه لو حرام؟!
اي اختج هم حبت واخذت!!..وانتي هم جربي حظج مثلها بلكي تلكين..غشيم مثل مجد وتاخذيه!!
اكولك..انت ليش تتدخل بحياتي سألتك اني فد يوم عن حياتك الشخصيه سالتك فد يوم ليش باقي لحد الان بدون زواج؟!
اي عادي خوش سؤال سئلي ليش لا؟!
ليش
شوفي..اني تزوجت مرتين مره تزوجت زواج تقليدي حتى ارضي ابويه..صح البنيه حبتني بس مرهمت..وتزوجت المرة الثانيه حتى ارضي اهلي كولهم واخلف الهم حفيد وهم مرهمت..هسه اذا اريد اتزوج لازم اتزوج وحده من اختياري احبها وتحبني وتستاهل كل هالانتظار والحقيقة بعدني ملاكيها لحد هاللحظة!!
شفت انت هم ادور حب لتنكر هالشي
بس اني وضعي مختلف اني مو بنيه وابور..اني بكيفي احدد الوقت الي اريد اتزوج بيه ماكو مقارنه بيني وبينج
اني هم بكيفي.!
لا مو بكيفج انتي عندج فرص محدودة واعتقد محمد فرصة زينه وقليل تكرر بحياة بنيه مثلج..المفروض مترفضين وتفكرين زين انه الفرص الزينه بالحياة متكرر كل شويه ولد خريج ومرتب ومحترم وحالته زينةّ
ليش شبيه اني ومتكرر الفرص الزينه الي بحياتي وليش لازم اوافق گبل بمحمد شنو قصدك من هالكلام المغلف
قصدي احمدي ربج الحليم الستار انه واحد مثل محمد تقدملح ولترفسين النعمة
شتقصد محاق..لك شبيه شبيه اني..شمسويه حتى اقبل بأي قسمة تجيني
اوكفي..لتبجين..ادري راح تسويني مريض وتسعدني دموعج دعاء تره الستر حلو عوفج من الحبجيات والغراميات محمد خوش شاب
لو خاطب اختك وهو اكبر منها بعشرسنوات راح تنطيها!!
اذا وافقت انطيها
واني مموافقه ومرايدته ..روح وصله هذا كلامي كوله دعاء متريدك وبعد ليروح على اي احد ولايخطبني
وكمت وبس درت وجهي سمعت كلمة وحده منه
أحسن!!!!!!!!!!!!
دخلت جوه..كعدت يم ماما هنه ديسولفن واني افكر يربي هذا محاق شبي لاهو عاقل لاهو مخبل صار ساعة يقنعني بمحمد عبالك ولي امري ويريد مصلحتي ومن كتله بالاخير مموافقه ..يكولي(احسن)..شنو قصده مخبل وحيخبلني وياه بعدين اني شبيه ليش اتناقش وياه هالكد وليش وره النقاش احس فقدت كل ثقتي بنفسي وليش دموعي قريبه كلما يحاجيني ..ليش هالكد كلامة ياذيني واني مستمرة اسمع كل حرف مسموم يطلع منه..
لقراءة جميع فصول الرواية من هنا