رواية علاقة سامة الفصل الرابع 4 بقلم ورود الخالدي
دعاء:::
اذا ع الشغل الشغل موجود وبمكان مريح ومرتب وحتى يوميته افضل
ههه وين شنو اكو بنات يشتغلن بالنجارة
لا مو نجارة كدام هاي امج باجر اخذج تشتغلين ويه بت عمي ..وإذا معجبج الشغل لو اليوميه عاتبيني
تاخذني شلو؟
بكيفج اخذج أو انطيج العنوان وترحين نفس الشي
لا انطيني العنوان احسن
الله وايدك خاله بلكي يم بت عمك احسن الها والله اني كتلك ما اريدها تشتغل بس هي مصره
ولا يهمج ..باجر تروح واشوف بعينها..اترخص اني..
وطلع من بيتنا وره نص ساعة تقريبا دز العنوان ع الواتس مال ماما ..وقريته عنوان صيدليه..بس اني ما اعرف بالادويه شنو راح اشتغل هناك يعني
المهم ثاني يوم رحت ع العنوان ومن وصلت دخلت الصيدلية طبعا الصيدليه مفتوحة جديد مبينه لان رفوف الادويه بيها كميات قليلة والبنية البيهه شابه ومبينه خريجة السنوات الاخيره..وحتى مكان الصيدلية ماكو يمه حركة ناس قليله اول مدخلت وعرفت اني دعاء رحبت بيه وكالت :
ابن عمي محاق حجالي عنج وشغلج يمي بسيط ومريح
الله كريم طبعا
تجين الصبح بثمانية وويه اذان الظهر أعزل نروح البيت ونرجع الساعة ب٣ تمام
ها الصبح والعصر؟
اي بس لا عبالج الشغل متعب تره الصيدليه جديدة وبعدها ممعروفه كولش يعني الزبائن قليلين
وشنو يعني العفو اقصد اليوميه أو الاسبوعيه شكد
راح انطيج 25 يوميه تمام
طبعا تفاجئت25!!!
بس كلت
اي تمام
اشتغلت وياها اول يوم بصراحة طول الوكت كاعدين يمكن اربع زبائن لو خمسه فاتو الصيدليه الصبحيه والعصر يمكن بس3اخذو ادويه وساعة ب8عزلنا والبنية انطتني25 ورجعت للبيت سولفت لماما طبعا فرحت حيل..وكالت
والله خوش شغل ويوميته مرتبه لازم تخابرين محاق تشكريه
عليمن اشكره قابل شغلني بالبرلمان!! يوم لتبالغين وتكبرين رأسه شنو عبالك نسيت الحجي مالته لو ألفاظه الي حجاهن ابيتنا
وج انتي شكد خشمج يابس غير حاسبج أخته ويخاف عليج
لا اني مو أخته شجايبني لأخته المدلله
شطوله لسانج بكيفج لاتخابريه
يوم ..انتي بعد كولشي لتجيبين للبيت خلي الراتب بس لعلاجج وجمعي منه لاقساط جامعه ملك بس..وهاي الخمسه وعشرين كافية علينه مسواك ونضم منها النت والمولد
لا يوم جمعيهن يمج لرأس الشهر ومن يصيرن مبلغ جبير عود نعزل منهن
بكيفج يوم
وصرت يومية اروح الشغل وما احجيلكم شكد مرتاحة اصلا ماكو شي اسمه شغل البنيه توكف تقره الراچيتات مال الزبائن وتاشرلي انطيني من هذا الرف أو من ذاك وكمت اعرف بعض اسماء الادويه ولأن شغلنا قليل والزبائن محدودين طول الوقت كاعدات ونسولف اني وهي وصرنا صديقات طبعا البنيه حيل حبابه وحلوه واجتماعية وتحب اسولف ومن خلال هل كم يوم صرنا صديقات اني احجي لها عن حياتي وهي تحجيلي عن أهلها وعن خطيبها..ويوم بعد يوم قوت علاقتنا وصرنا كولشي نسولف
ومر٢٠يوم ع شغلي بالصيدليه واليوم الاخير جنا كاعدين عادي نسولف بس هي سألتني
انتي حيل حلوة شعجبب منخطبتي!!
والله من جنت بالجامعة هوايه شباب رادو يتقربون بس اني اعرف علاقات الجامعات كولها شباب تقضي وقت وبنات يردن بس نصيب يجيهن فجنت مبتعدة عن هيج علاقات
واقاربكم معقوله معدكم أقارب شباب أو اصدقاء أو جيران
بابا معنده اخوان بس اخت وحده وهم خلفتها بنات بس ولد واحدوجبير بالعمر اتذكر اتزوج من جنت بالابتدائيه ومن جهة الخوال..فماما عدها اثنين اخوات وحده هنا ابغداد هم ولدها وبناتها كبار ومتزوجين وخالتي الثانيه اطلكت وبقت تربي بنتها الوحيدة إلى أن تزوجت وبعدين خالتي توفت بكورونا الله يرحمها..وخوالى متزوجين بالكوت وزوجاتهم بنات عم ويزورونا بين فتره وفتره وماما هم تروح الهم مرات بس ابدا متحب نسوانهم ومتفكر تنطينا لاي احد من ولدهم
صفنت بوجهي وبقت تفكر
ها شوصفنتي
اكولج اني كولشي حجيتلج عن حياتي بس والله مترددة اسألج
شنو السؤال وليش مترددة يعني؟؟
خاف تزعلين لو ترحين تكوليله هو حيل عصبي ويزعل مني هم!
منو هوه
محاق ابن عمي؟؟
شبي!
بصراحة ردت اسألج هو شنو علاقته بيج لان السؤال ضال بكلبي شعجب هيج مهتم بيج فكرت احتمال بينكم علاقه!!
يااا على يختج شنو علاقة تره هو بس وعد ماما يلكالي شغل يمج
اكولج بس فدوة تكوليله لان أكد عليه ما اكولج؟؟!!
تره قلقتيني!!
دعاء بصراحة اني حيل حبيتج وفرحانه بشغلج يمي بس هالتشوفيني تره اني صيدليتي يادوب الناس تجيها واني نفسي لو احصلي١٠ لو٢٠ الف باليوم
شنو؟؟
اي والله تره ال٢٥ الي دا انطيهن الج من محاق لهذا سألتج فكرت عندج علاقة بيه وديصرف عليج بشكل غير مباشر
من محاق شنو؟؟
والله هو انطاني فلوس وكلي يوميه انطيج منهن٢٥..
انصدمت من كلامها بس اباوع بوجهها
اي والله ..الف فكرة براسي كلت اذا بينكم شي ليش هيج يسوي هو ينطيج بيدج شكو بيها اذا حبيبته ويصرف عليج ..هسه تفكرين اني بت عمه ودا أخبث لا والله تره كولنا نتمنى محاق يتزوج لان محاق خطية هوايه تعذب بحياته تزوج بت عمي ومخلفت منه واطلكو وهي تموت عليه وانوب مرته الثانية ماتت.وبت عمه الي تحبه رادت ترجعله ..وكالتله اطلك من زوجي وارجعلك ..بس هو مقبل كلها بعد ما أريدج
واني شنو علاقتي بيه!!
اترجاج لتفهميني غلط محاق احسن واحد بولد عمامي والله بابا وعمامي جلال وطلال وكلهم كالوله اي بنيه من بناتنه تريدها بس اشر بيدك واخذها بس هو ميقبل كلهم بعد ما اتزوج ولحد يفتح وياي موضوع زواج هذا الحجي من زمان صار له كومه سنين فهالايام من شفته مهتم بيج حيل فرحت وفكرت انتو ع علاقة وكلت بلكي يصير نصيب بينكم انتي حيل حلوة ومؤدبه كلت اكيد
اكو شي
روان تره ماكو هيج حجي وماكو بيني وبينه اي شي واصلا معندي اي فكرة عن الفلوس الي مخليها يمج الي واكيد راح ابطل من هالساعة من الشغل وارجع اله كل فلوسه
عزززااا عزززاا راح تكوليله رواه كالت والله يزعل مني
عادي روان اليزعل برضة وحده مستحيل اقبل أحد يتصدق علينا بالطريقه السخيفه
اخذت جنطتي وطلعت من الصيدليه الطريق كوله حابسه دموعي....يعني الافندي ديتصدق علينا بفلوسه والله حسيت..من شفت الصيدلية معليها ناس هوايه كلت شلون دتنطيني٢٥ يوميه بس ابد مجان أبالي هالشكل
وصلت للبيت احس نفسي راح انفجرجانت الساعة تقريبا بالعشره الصبح شفت ماما مبدله اول مفتت كالت:
هاا شو راجعة للبيت
يوم بعد ما اروح الصيدلية ولا اشتغل
يااا ليش ماما
ماما ميناسبني هيج شغل وما افهم بالادويه والبنية خطية عبالك مشغلتني كوه عليها بعدين حتى زبائن قليلين
يااا..وشجابرها تشغلج
ردت احجيلها كولشي واكولها محاق السبب بس كلت لا بس اكول لماما راح تحس هو مسوي عليها فضل واعرفها تستحي منه ومن أهله وتصير بموقف محرج ويه أمه فكلت ما احجي لها واني اطلعلي عذر وابطل
يوم محد جابرها بس اني والله ممرتاحةو استحي اخذ منها يوميه واني كاعد اتصفن وكلشي ما اعرف بالادويه
يعني راح تبطلين
اي يوم والله ميكطع اكيد الكة شغل غيره
بكيفج يوم ..لا تضغطين على نفسج
الله كريم...بس انتي وين رايحن
رايحة ع خالتج.
وفكرت شلون اخذ رقم محاق من جهاز ماما فكلتلها:
يوم خلي جهازج يمي أكنك بي جهازي عطل ومدا يشحن
طلعته انطتنياه وراحت واول مطلعت اخذت الرقم فكرت اول مره اتصل من الواتس مال ماما واحذف المكالمة بس كلت خاف يتطور الكلام بيناتنا ويراسلني ع حساب ماما..أو يكون مشغول وميرد عليه ومن تجي ماما يتصل أو يدز رسالةحتى يعرف ليش متصله عليه كلت اتصل من حسابي احسن
المهم اخذت الرقم واتصلت
الوو تفضل
اني دعاء
سمعت صوت ناس يمه وشباب ويمكن آلات تشتغل لان ماافهم منه شي
الوو مدا اسمعك
سده ودزلي رساله
اني جاي
هذا شبي وين جاي..شنو بيتنا خان شغان وجاينه
دزيتله رساله كتبلي
ماكو داعي تجي نحجي بالتليفون احسن
انتظرت يقراها..بس مفتحها
يربي بس لا يجي صدوك ماما..راحت لخاله وملك وفرح بالدوام زين اذا اجه شلون يعني ادخله لو نحجي بالباب لو شنو..
يمكن ١٠ دقائق ودك الباب رحت فتحته هو رأسا دخل من الباب وسده وكلي
صيحيلي امج
ماما مهنا..راحت لخاله
هو دائما من يحجي يدنك بس من كتله ماما مهنا كلي رفع رأسه وكلي بوجهي:
ليش بطلتي!!؟
اكيد اتصلت بيك روان قبل لتجي.!!
اي
وشنو تريد من ماما تريد تكولها بتج بطلت متقبل تاخذ منك صدقات
صدقات شنو؟؟
اي صدقات محاق..من تنطينا فلوس بطريقة غير مباشره لان كاسرين خاطرك هذه يسموها صدقة ادور من وراها اجر بروسنا!!
ههه ادور اجر براسي
اي بالضبط..
لج شنو اجر شنو صدقه منين تجيبين هالحجي انتي مو دتشتغلين بالصيدليه اذا اني لو بت عمي دننطيج اليومية شنو الفرق يعني!!
عفته ودخلت جوه جبت الفلوس الجامعتهن وادنيت يمه اخذت أيده وخليتهن بيها وكتله
اكو فرق اخ محاق الفرق اذا اخذت فلوس حق تعب حقيقي موفلوس صدقه مال شغل جذابي!
ضل صافن شلون خليت الفلوس بيده سكت شويه وكلي
شهالتفكير شنو شغل جذابي انتي شكد معقدة ونفسيه!
تحب اكولك بت عمك بشنو تفكر بينا اني وانت؟؟
مافهمت ليش شبيها. روان وشكالت بالضبط؟
مكالت بس فكرت بت عمك معتقدة أنه اني وانت على علاقة وانت دتصرف عليه بشكل غير مباشر..لان اصلا صيدليتها مبيها وراد ولا بيها شغل تحصل منه هالكد حتى تنطيني يومية٢٥
راد يحجي كتله
اوكف خلي اكمل..طبعا راح تتصل بيها وترزلها وتكولها ليش حجتلي ..بس هي محجتلي لان ضايجة من وجودي لا لان فرحانه عبالها اني وياك واحد يحب اللاخ والله جابني من السمه حتى افك الجبسه مالتك مال الزواج وكعدت تحجيلي على عذابك وزواجك أكثر من مره وتكولي حيل فرحت من شفت محاق مهتم بيج وديصرف عليج..وو..انتي
طبعا مكدرت اكمل لان عيوني غوركت من قهري بس شافني بجيت بسرعة لزمني من زنودي وكلي
دعاء انتي مثل اختي مروة ليش هالكد معظمه الأمور واني مجانت نيتي لا أتصدق عليج ولابطيخ..ولا انتقص من كرامتكم انتي وامج واخواتج
وترضه بالكلام ع اختك مروة ترضه أحد يكولها اكو ولد يصرف عليج
لا اكيد ما أرضه بس روان فهمت خطأ..
هي فهمت خطأ واني حسيت نفسي زباله اذا أقبل صدقه منك علينا
يابه لاتقبلين وهاي فلوسي راح اخذها
وهدني وخله الفلوس بجيبه
هاا هيج احسن ارتاحيتي
اي احسن
وفاجأني من مسح دمعتي بابهامة وكال بصوت ناصر
الدنيا خلصانه أخيتي ومتسوه دموع وبجي
شافني جفلت وتفاجئت من حركته رأسا دار وجهه وطلع من بابن
من رجعت ماما من بيت خاله مجانت فروحه وياها :
يوم لعد فرح وين مو ع أساس تمرين ع مدرستها وتجيبيها وياج
اوكفي خل اخذ نفس
كعدت ع القنفه الي بالصالة
وج يمه خالتج وبتها غزل يكسرن باب الكلب
خير شكو يوم قلقتيني !
خطية غزوله مريضة نايمه بالفراش صايرةصفره مثل الكركم..كوه تلكف النفس
شبيها
الدكتور يكولها اسم الله اسم الله عدها كيس مي على الرئه
عزززااا
اي والله خالتج صايره تراب عليها
والله خطية..وشنو انطوها علاج لو شنو
الدكتور من شايف الأشعة يكولها كيس ألمي مسوي التهاب قوي بالرئة ولازم يتعالج الالتهاب ويطيب يله يسوونها عمليه يشيلون الكيس..ومنطيها علاگة علاجات شكبرها مال٣شهور
حيل ٣شهور وفوكاها عمليه!
اي خطية مدري منين اجتها
ودراستها وهي السنه ثالث شنو تبطل؟؟
خالتج تكول اذا تبطل تتدمر نفسيتها
اي صح كتلها لتبطليها خلي فروحة يمها شينطوهم بالمدرسه ..يدرسنه سوه بالبيت واليوتيوب موجود وهي شاطرة خطية
يعني فرح راح تضل يمهم
اي خليتها يمهم لان غزل كسرت خاطري
خليها يوم اصلا رجل خالتي بالليل بالشغل والنهار نايم ومعدهم أحد
اي شسوي خليتها هناك...اكولج اريد الفلوس العندج فكرت ادزهن لخالتج خاف تحتاج مصاريف علاج لو شي خطية
ارتبكت من سألتني ع الفلوس فكرت بسرعة
يوم تره الفلوس رجعتهن كولهن لروان
شلوووون؟؟
اي رجعتهن حسيتهن مو من حقي؟؟
وج وتعبج ودوامج يمها كل والايام! وشلون قبلت تأخذهن!
يوم بالكوة أخذتهن من رجعتهن ارتاحيت حسيت هم وانشال عن كلبي
والله ما ادري ..بخشمج اليابس وحساباتج هاي
يوم عليج الله خليني مرتاحة واصلا بعد لا اشتغل ولا ادورشغل
الصبح من رجعتي كلتي ادور شغل جديد وهسه ما اريد بعد اشتغل كل شويه الج راي شكل بس بعد احسن هسه اني شحصلت من شغلج عشتو
ومرت الايام عاديةماماتروح ع خالتي وع عمتي مرات وخوالي مرو علينا قبل اسبوع وفروحه يم غزوله دائما وملك بدوامها الأمور كلها عادية ومرات نروح ع بيت جيرانه نسير عليهم كم ساعة من النهار أو ام محاق ومروه ومرت مصطفى يجونا عصريات..ومحاق مشفته خلال هالشهر غير مره وحده عند اهله جانت هالمرة جدا سريعة وعاديه
جنت مرتاحة لان ماما صحتها احسن ع الجهاز الي خلته على القلب والعلاج المنتظم والايام تمر متشابهة وماكو شي جديد بحياتنا بس فجأةيجي شخص يكلب حياتي الى قلق وتفكير شخص يحول الهدوء الى توتر والراحة الى خنگة وعدم استقرار والناس احسهم يراقبون ويحسبون كل خطواتي ويمكن تحسون كلامي غامض وممفهوم بس اختصرلكم كل والعبارات بأنه اختي واقرب الناس الي هي إلى نغصت كولشي حلو بحياتي بتصرف طايش وغير مسؤول...