رواية من قلب العتيك الفصل التاسع 9 بقلم جمانه السعيدي
علي... اتمددت وجاي افكر اخاف ابو ايمان يرفض
شلون احلها واني ابوي معاديني وعمامي مايردوني
الغرفه ضلمه
انفتح الباب ودخلت نجيه الضوه ضارب عليها من ورا طويله وفاتحه شعرها
ولا بسه ثوب طويل نص ردن
من شفتها كعدت على حيلي
استغربت من شكلها اول مره اشوف شعرها ووال مره تنزع الشيله كدامي اصلا هيه بعدها لابسه اسود على عمي سلمان
كعدت على حيلي وكتلها نجيه
اجت كعدت بصفي
نجيه...اي نجيه شبيها نجيه شناقصها نجيه
علي...هاي شنو تخبلتي
نجيه...ليش تخبلت رجلي وحلالي
علي....لا انتي اليوم صاير بعقلج شي
نجيه....هذا شرع الله حقي لو موحقي
علي...كومي اطلعي برا شنو هاي المهزله
ليش اسوين هيج مره جبيره ومحترمج شنو هاي التصرفات عيب عليج
نجيه...مااطلع اني زوجتك ومن حقي انام يمك
علي...كمت على حيلي مشيت فتحت باب الغرفه
كومي اطلعي برا كومي اطلعي
نجيه....ليش هيج اني احبك
علي...اتخبلتي شنو تحبيني انتي شايفه نفسج
خليني محترمج كومي اطلعي برا
سحبتها من ايدها وطلعتها وقفلت الباب عليه
استغفر الله هاي المره شبيها اخذتها الغيره شنو
معقوله مره بعمرها تتصرف هيج تصرف
والنوب تكول احبك اي حب هذا
دخيلك ربي صدمتني ما متوقعها منها
جمانه السعيدي
بقيت اتكلب وصورتها كدامي شكد اني محترمها
ليش هيج اتسوي لا لا مستحيل
الصبح كعدت وهيه ماكعدت مثل كل يوم ولا حضرت الريوك
خليت القوري على النار وطكيت بيضتين
اكلت وطلعت لا شفتها ولا شافتني
اول شي طلعت الشارع اهل ايمان
صحت بصوت عالي و كفت العربانه ما طلعت
بقيت اكثر من عشر دقايق واكف بلشارع
خفت خاف ابوها رفض ليش ما طلعت
اخذتلي فره ورجعت على نفس الشارع
وكفت كبال بابهم وصحت فتحت الباب شمرت ورقه
وطبكت الباب بسرعه
نزلت وشلت الورقه صعدت مشيت شويه
قريت الورقه
ايمان....علي روح ابوي اليوم بلبيت ماكدر اطلع عليك
روح منا لا يشوفك ويشك بيه
علي...طلعت من الشارع وبعد مارجعت اكلت لفه بلشارع ومارجعت للبيت الضهر
اخر النهار رجعت دخلت لاكتني نجيه
نفس شكلها كل يوم دشداشه طويله سوده وشيله سوده على راسها
نجيه...الله يساعدك
علي...هله سلمت عليها من ورا خشمي
نجيه...اني اعتذر منك
علي...باوعت عليها ودنكت
نجيه....اني البارحه مو بعقلي كلش مستحيه منك
علي....مارديت عليها
نجيه...اوعدك بعد ما تنعاد هاي السالفه ابد
علي....سكتت
نجيه...تريد عشى
علي...هزيت راسي
نجيه...هسه اجيبلك العشى
علي...كمت سبحت وبدلت ملابسي خلت العشى نجيه كدامي وكعدنا نأكل اني وياها بس ماحجينا ولا كلمه
اليوم كلش تعبان لان مارجعت الضهر ولا نمت
قفلت الباب عليه ورحت بسابع نومه
اليوم الي بعده مارحت من الصبح الشارعهم
احس الناس كلها تعرف اني احب ايمان
لان ماكو عتاك هلكد يدخل بشارع بليوم الواحد
اخر النهار مريت من شارعهم
فتحت الباب ايمان وشمرتلي ورقه
اخذتها وطلعت فتحتها مكتوب بيها
ايمان....علي اليوم ابوي سئل عنك ويكول خوش ولد والناس كلها تحمد باخلاقه
ويكول رحت شفت بيته خوش بيت
يمكن راح تصير قسمتنا ونزوج
علي...الحمد لله شكد فرحت من قريت الرساله
جنت شايل هم لا ابوها يطلب عمامي وخوالي
وساعته مااعرف شكوول
كون رب العالمين يتممها على خير
رجعت للبيت تعشيت وقفلت الباب عليه ونمت
كمت ماانام اله اقفل الباب عليه اخاف من نجيه
لا تجيها افكار شيطانيه مثل ذيج اليله
جمانه السعيدي
اليوم الي بعده مادخلت على شارعهم لان الناس اغلبها
صارت تعرف اني اجي علمود ايمان
ومااريد اي احد يحجي عليها
بليل بدلت ورحت البيتهم
دكيت الباب طلع اخوها هلمره رحب بيه بحراره
لان صار يعرفني
ويمكن كلام الناس عني وعن أخلاقي طمنهم مني
دخلت بلاستقبال واجا ابوهم
ابو محمود...اهلا وسهلا هله بعلي
علي...هله بيك عمي شلونك
ابو محمود....الحمد لله
علي...اجيت اخذ الرد منكم ولو ما خلص الاسبوع
ابو محمود... احنا موافقين
علي...الله يحفظك شنو طلباتكم
ابو محمود .الي تطلبه الناس وانت ومقدرتك
جهز بلي تكدر علي بس لازم مشيه على الاقل كدام الناس
علي...بس هاي من عيوني تدلل
يمتى نجيكم
ابو محمود...خليها بلجمعه لان ماعندي دوام وهم اخوانها كاعدين
علي...تمام الف الف شكر
ابو محمود....انت محترم والناس كلها تحجي باخلاقك
اني ما تهمني الفلوس بس ايهمني الانسان الي يصون بتي
ويحافظ عليها
علي...اخليها بعيوني ومراح اقصر وياها
طلعت فرحان ما مصدك ابوها وافق بهاي السرعه
وماعنده اي شرط ولا كلفني فوك طاقتي
هداية رب العالمين هدا ابوها عليه
رجعت للبيت اضحك واغني
نجيه ..هاا شكوو
علي...ابوها انطانيها ابوها كال اخذها
نجيه....اي تلكاها دايحه ومصاحبه ولد بكد راسها
وماصدك يجي واحد يخطبها حتى يزوجها ويخلص منها
علي...ليش ما تحترمين نفسج
جاي تغلطين على زوجتي
نجيه....شبسرعه صارت زوجتك بعدنا بسم الله
علي...ممنوع اسمعج تحجين عليها فهمتي لو لا
نجيه....ليش هيج ادافع عنها
لو بيها خير مو بس خطبتها كالولك اخذها
لااخذت وياك ابو ولا عم
علي...كلمه ثانيه واعوفلج البيت واطلع
ابوها خير وانسان محترم وماراد يوكف بقسمتها
بعدين يكول سئلت عنك والناس كلها تحمد بااخلاقك
الرجال اهم شي اخلاقه
همزين ابوي ماحضر الخطبه جان خربها
لااريد ابوي يحضر ولا واحد من عمامي
نجيه....اي ويمتى المشيه
علي...بيوم الجمعه
نجيه...اني مااروح
علي.. بكيفج اكول اختي مكرمه ما تمشي وماكدرت تجي
نجيه ..... .شنو مكرمه اسم الله عليه جني غزال
علي....بكيفج اذا تردين ترحين وياي
ترحين وانتي اختي اختي وبس اقسم بلله
اذا سمعتج حاجيه كلمه مناومنا زايده
دقيقه مابقى بهذا البيت
طلاكج مراح يكلفني شي عشره بيده الشيخ يطلكج
نجيه...هااا هيج صارت
علي...انتي كد.امج خيارين
الأول تمشين عدل وياي بدون مشاكل
اختي الجبيره واني محترمج ومراح اقصر وياج بشي
الخيار الثاني تفضحين نفسج وتحجين كلمه زايده
اطلكج وابيع البيت وازوج حبيبتي
وبعد ما تشوفين وجهي ابد
هااا شكلتي
عافتني ومشت بدون اي كلمه
جمانه السعيدي
اجا يوم المهر ورحت للجوارين بيت بيت
اريد الناس الطيبه تروح وياي بلمشيه لان ابوي الله لايوفقه مايقبل يجي وياي
اخواني خمسه وعمامي اتلاثه وخوالي ثنيبن
واني اتوسل بلناس تروح وياي اخطب
كل الزلم الي بلشارع كالو صار تدلل بس هاي سهله
وماكو أسهل منها
بيوم المهر اشتريت قاط جديد وحلقت شعري
طلعت واحد ثاني ردت اطلع من البيت
جان تطلع نجيه لابسه ثوب
ازرك وعلي هاشمي ارزك وذهبي
ومكحله عيونها ومعطره
نجيه...اروح وياك اريد اشوف العروس
علي...اصعدي بس اي كلمه زايده ما تلومين اله نفسج
صعدت نجيه ويانا ورحنا عليهم مشيه
ابوها شكد محترم واستقبلنا احلى استقبال
كملنا عقد والناس كلها راحت
دخلت جوه نجيه كاعده وضاربه البوز شبر ليكدام
اليكول كاعده بعزا
ام العروس ...مبروك الف مبروك
علي ..الله يبارك بيج
ام العروس...شبيها اختك اليكول كاعده بفاتحه
لاصفكه ولا هلهوله
علي...باوعت ادور على عروستي اني شعليه بنجيه
اني اريد اشوف حبيبتي تضوي بنص النسوان
لابسه بدله حمره وفاتحه شعرها
طالعه تخبل لزمتها من ايدها وكتلها مبروك
ايمان...الله يبارك بيك
علي.... طالعه حلوه
ايمان....شكرا انت هم حلوو
قربت عليه وهمستلي باذني
ايمان...شبيها اختك ليش ضايجه اكو وحده
بعرس اخوها الوحيد هيج شكلها
علي.. معليج بيها لاتخربين علينا فرحتنا
واخيرا اني وياج عقدنا ولج صوتي راح كلما افوت بهذا الشارع صوتي يروح من وراج
ايمان....منا وهيج نشتغل اني وياك
نصعدعلى العربانه ونصيح سوه
علي.....يمه مااخليج اطلعين ياعربانه يابطيخ
ايمان....يااا شنو تريد تحبسني
علي... اي احبسج حتى الزباله اني اطلعها ممنوع تمدين راسج من الباب
ايمان....عليمن أمد راسي الي جنت أمد راسي علموده
صار يمي
علي....ولج تخبلين
ايمان....وانت اجنن
كامت نجيه واجت علينا
نجيه...تعبت يله نرجع للبيت
علي....بعد شويه
نجيه...وصلني وارجع
علي....شبيج اكعدي شويه
نجيه....مااكدر تعبت اريد ارجع للبيت
علي...اذا طلعت بعد عيب ارجع
نجيه....يله جنك ماشايف كوم خل نرجع
علي.. أمري لله يله امشينا
مصممه نجيه تخرب اللحظات الحلوه
رجعنا للبيت
علي...بشرفج نجيه مو تخبل ايمان
نجيه ...مليها الخبال بس البياض
علي ...عاجبتني احبها واموت عليها
ثاني يوم قررت اروح اشوف امي واسولفلها على خطوبتي
صعدت من الصبح وصلت الساعه ثمانيه
شفت ابوي طلع
دخلت للبيت
امي.. هله وميت هله ليش اجيت اخاف عليك
علي...رفعت ايدي حتى تشوف الحلقه
إمي.. بلعافيه مبروك الف مبروك عمت عيني ماحضرت مهرك
علي...اسم الله عليج ياقلبي انتي
امي..... اتمنى اشوف عروستك
علي. ... من ازوج اجي اخذج البيتي تشوفين بيتي وتشوفين عروستي
امي...الله يسعدك ويهنيك
علي....يعز عليه ازوج وما تحضرين عرسي
امي... اهم شي انت سعيد ومرتاح
علي... شكال ابوي اخر مره من تعاركنا خوما ضربج
امي...لا ما ضربني بس غلط عليه
يكول انتي خليتي يرجع للبيت
علي.. الله ياخذه ويخلصنا منه
انتظرونا ....