رواية من قلب العتيك الفصل السابع 7 بقلم جمانه السعيدي
علي....خلصت شغل اليوم ورجعت للبيت بس صورتها وكلامها مايروح من بالي ابد
عبالك انزرعت بروحي
بقيت افكر ياترى اهلها يقبلون اذا اطلب ايدها للزواج
ليش لا شنو ناقصني
يمكن يردون واحد احسن مني
ليش اقلل من نفسي ليش اني شنو ناقصني مثلا
اهلها يقبلون يزوجوها الواحد عتاك
حلوه وزغيره ايجوز اهلها ما يقبلون
تعبت من التفكير ونمت ثاني يوم لبست تراك عندي جديد
لابسه كم مره ضامه للكشخه
وسبحت قبل لا اطلع نزعت الجفيه ومشطت شعري
خليت عطر
دخلت عليه نجيه
نجيه...اليوم ماتروح للشغل
علي...لا ليش رايح
نجيه...ليش لابس ملابس الطلعه
علي...هو تراك شنو ملابس طلعه
نجيه...ما متعوده اشوفك تطلع للشغل هيج
علي...شنو هيج شفتيني لابس قاط
كله تراك خل البسه احسن ما مخلي بلكنتور
عود اذا خرب اشتري غيره
قابل اني وين طالع البسه احسن ماباقي بلكنتور
طلعت من البيت ورحت كبل على شارعهم
مشيت النهاية الشارع وما طلعت ولا شفتها
اخذتلي فره بلمنطقه ورجعت الشارعهم
من اوصل يم بيتهم اصيح حيل بلكت تسمعني وتطلع
رجعت اخذتلي فره ورجعت الشارعهم كلشي ماكووو
رجعت للبيت تغديت ونمت ساعه ورجعت طلعت
اول شي فتت بشارعهم
من اوصل بابهم أصيح حيل هم ما طلعت
شكد ضجت يعني اليوم لان كاشخ وطالع حلووو
رجعت للبيت تعشيت
نجيه دخلت غرفتها واني دخلت غرفتي
افكر بيها ليش هيج شاغلتني
ليش ما تطلع من دماغي شكد شايف بنات بس مثلها ماشفت
اليوم الي بعده نفس الشي لبست التراك الجديد
وتعطرت ومشطت
ورحت بشارعهم
طلعو عليه كم بيت باعو عليه خبز بقيت واكف
واصيح بلكت تسمعني وتطلع
هم ماطلعت ولا شفتها شكد ضجت ودي ارجع للبيت
خلص ثاني يوم وماشفتها ابد
ثالث يوم ايست كلت بعد مااشوفها
دخلت الشارعهم
بس وصلت بيتهم طلعت امها حلوه بيضه وسمينه
لابسه شيله
شفتها ضجت ليش ما تطلع ايمان
ام ايمان...خاله عدنا خبز بيش تأخذه
علي....بربع اخذ الكيلو
ام ايمان....ايمان يمه نصره وينجن وحده اجيب الخبز
بقت واكفه بلباب واني عيني عليها اريد ايمان تطلع حتى اشوفها
شويه واجت تسحب بلكونيه
مدنكه وتسحب بيها انفتح الباب وامها تباوع عليها
رفعت راسها شافتني اباوع عليها
عاف الكونيه وصارت ورا امها
علي....عوفيها اني اشيلها
مديت ايدي وسحبتها
وزنتها ونطيتهم الفلوس دخلن وطبكن الباب
جمانه السعيدي
ياربي لا شفتها زين ولا حجيت وياها
هاي شلون بلوه معقوله صار ٣ ايام اروح وارجع
على هاي امها ليش طلعت جان طلعت هيه بمكان امها
رجعت للبيت كلش ضايج
اليوم الي بعده دخلت للشارع
ااكو شايب عنده دكان كاعد بي
طلع خبز يبيعه
ابو هادي....الله يساعدك عمي
علي...هله عمي هله
ابو هادي...... عندي خبز
علي....اي جيبه
ابو هادي....عمي انت جديد اني ماشايفك قبل
تجي بهذا الشارع
بس هليام ركزت عليك لان تدخل بشارعنا هواي
علي....على عيشتنا نفتر شنسوي
ابو هادي...انت كل شارع تدخل بي اربع وخمس مرات كل يوم
علي...اني ضايقتك بشي
ابو هادي...لا بويه بس اول واحد هلكد يفتر بلشارع
علي.....اذا ضجت مني بعد ماادخل بشارعكم
ابو هادي...عليمن اضوج منك انت رجال على باب الله
علي...وزنت الخبز وطلعت من الشارع
هذا الرجال شكد حشري شلون منتبهلي
بليل كتبت رساله وقررت بس اشوفها انطيها الرساله
خوما ابقى رايح جاي بلشارع
حتى الناس انتبهت عليه
السلام عليكم عزيزتي ايمان
اني علي ابو العتيك كل يوم امر من شارعكم حتى اشوفج بس ما اطلعين
امر بلشارع اربع او خمس مرات
اتمنى اشوفج اني ماريد شي بس اشوفج
اذا تكدرين تفتحين الباب من تسمعيني الله يخليج
بس اشوفج اني قصدي شريف
علي...كملت الرساله وبقيت اقرا بيها
اذا انطيتها الرساله وغلطت عليه شلون
اذا صاحت اهلها وطلعو كلهم وكتلوني
اذا مخطوبه اذا تحب واحد غيري
راح اتفشل واحتمال انكتل
واذا تفشلت بعد مااروح بشارعهم
بس مايصير ابقى هيج
لازم تعرف اني احبها خوما ابقى هيج
رايح راجع بلشارع كل يوم
هاي شلون بلوه هسه هيه اله تطلع كدامي
مو خبلتني مجاي تطلع من بالي
ليش مااخطبها كبل اخلي نجيه تخطبها اليه
زين لازم اعرف هما منيين عدد أفراد عائلتهم
ابوهم شلونه حباب لو عصبي
زينين خوش اوادم
ليش مااسئل عنهم قبل لا ادز نجيه تخطب
جمانه السعيدي
ثاني يوم رحت الابو الدكان نفسه
علي.... الله يساعدك عمي
ابو هادي....هله بويه هله بيك هااا خير
علي...خير الي بوجهك اريد اسئلك
ابو هادي...اي اسئل
علي...هذا البيت الباب الازرك بيت منو
ابو هادي...ذوله بيت ابوحسن ليش تسئل
علي...ابن عمي يريد يخطب منهم مره
ابو هادي.....اي بناتهم كلهن حلوات
علي....ليش هما كم بنيه عدهم
ابو هادي.....عدهم عشر بنات وخمس ولد
البنات الكبار اربعه ازوجن بقن سته
انتصار وايمان وحلا ورغد ومنال وعلياء
علي...ابوهم شيشتغل
ابو هادي.....موضف بسيط على كد حاله
بس ولده يشتغلون ومعيشيهم
علي.....هااا تمام يعني تنصحنا ناخذ منهم مره
ابو هادي...بناتهم كلهن حلوات وشريفات
علي...شكرا عمي
ابو هادي....تدلل
علي.....واني جاي احجي ويا ابو هادي طلعت ايمان
اذب الزباله لابسه عبايه مشت مسافه عن بيتهم
صعدت العربانه ومشيت صرت كبالها
علي...شلونج ايمان
باوعت عليه وماردت السلام شمرت الزباله ورجعت
علي...دقيقه بس احجي وياج كلمه وحده
وكفت وكالت شتريد
علي....اذا اخطبج تقبلين
مثل انصدمت من سمعتني اكول هيج مشت بسرعه
ودخلت للبيت
فرحت وخفت بنفس الوقت
فرحت لان ايمان عرفت اني أريدها زوجه
وخفت لا ترفض
لو اهلها يرفضون
ثاني يوم مارحت من الصبح بشارعهم
ااخر النهار قبل لا ارجع للبيت فتت بشارعهم لان خفت الناس تنتبه عليه مثل ما ابوهادي انتبه
وصحت عتيك للبيع بصوت عالي
شويه انفتح بابهم فتحه زغيره وااكو عين تباوع عليه
عرفت هاي ايمان
ومادام منتظرتني وتباوع عليه يعني ااكو قبول
نزلت من العربأنه بابهم سويت نفسي ااعدل بلحمل
وشمرت الرساله الي كتبتها
وااشرتلها اخذيها
صعدت العربانه ومشيت على كيف
كل شويه التفت على بابهم شفتها طلعت بس ايدها من الباب من جوه وأخذت الرساله
يا فرحتي من شفتها اخذت الرساله
ودي انزل واركض بلشارع
رجعت للبيت بس اضحك
مبتسم وامشي بدون وعي همزين الحصان يندل بيتنا جان طلعت بغير طريق
نجيه... خير اليوم تضحك لازم الشغل زين
علي. الحمد لله خير من الله
بقيت مبتسم كعدنا ناكل اني اكل لكمه واضحك
نجيه ...شكو اليوم ضحكنا وياك
علي... ماكو شي اكلج نجيه اذا لكيت بت حلال ترحين تخطبيلي
من سمعتني احجي هيج راسا شركت
علي. اسم الله هاج ماي اشربي المره اختنكت
كمت على حيلي وضربتها على ضهرها
كطعت النفس اختنكت
رجعت ضربتها على ضهرها
علي.. كومي تكدرين تكومين اطلعي برا
شمي هااا تنفسي شبيج
نجيه...اااح اااح مابيه شي
علي...شلون مابيج شي عيوني يدمعن
نجيه...انشحطت
علي...سلامتج هااا صرتي احسن
نجيه....الله يسلمك
جمانه السعيدي
علي ...بقيت كاعد وياها ماعفتها حتى نسيت الموضوع الي جنت احجي بي
لمن نامت يله رجعت الغرفتي نمت
الصبح كعدتني من النوم
نجيه...علي علي تكعد تطلع على باب الله
علي...اي كعدت رحت غسلت ورجعت
كعدنا نتريك
نجيه....علي البارحه خفت عليه
علي....شلون مااخاف عليج اعوفج تموتين
نجيه...الله يحفظك اليه ويسلمك
شتريد غده اليوم
علي...اي شي من ايدج طيب
نجيه....اسويلك احلى ااكل
علي طلعت من بيتنا واني كاشخ ومشط الشعر
والعطر يهف رحت على شارعهم كبل وكمت اصيح بصوت عالي
انفتح بابهم شويه وبقت تباوع عليه
ابتسمت واشرتلها سلام
بقيت فاتحه الباب لمن طلعت من الشارع
اخذتلي فره ورجعت مره ثانيه
بس ادخل شارعهم اصيح حيل
فتحت الباب طلعت وجها وضحكتلي
ااي هيه هاي الي جنت منتظرها
لو تعرف شكد احبها
جان وكفت بلباب ليل نهار
استمريت اروح كل يوم الشارعهم بس حتى اشوفها تفتح الباب
رجعت كتبتلها رساله ثانيه
احبج واموت عليج انتي تحبيني
اذا تحبيني اكتبيلي رساله
شعلتي كلبي رايح راجع بلشارع علمودج
حتى الناس تسئلني شعندك بهذا الشارع
اذا تحبيني اكتبي رساله واني اجي أخذها منج
انتظرونا.......