رواية ريله الفصل الاول 1 بقلم مها حولي الزاكي
و أنا قاعده براي و بفكر في شكل حياتي الإتغير من سنه و نص،فجأه جاتني نفحات بت جيرانا قالت لي سوينا الجبنه انتِ ما جايه ولا شنو! قلت ليها مصدعه، قالت لي و لو قعدتي براك الصداع حـ يخف!؟ أخدي ليك مسكن و أرح معاي، قلت ليها والله ما قادره يا نفحات، قالت لي عليك الله أرح و ما تقعدي براك ، أمي و حبوبه من قبيل يسألوا عنك ساي، أخدت نفس و قلت ليها أرح طيب، بسرعه سرحت شعري و اتشطفت و اتمسحت و لبست توبي، فجأه نفحات جات طالعه من المطبخ و قالت لي تلاجتكم لحقت تلاجتنا ولا شنو! فتحتها قلت اشيل لينا منها تلج لقيتها فاضيه!
قلت ليها مفصوله عشان "بتستهلك كهربه "...اكتفيت بالجواب دا و ما زدت عليهو، شلت لي بن و سكر و قفلت البيت و مشيت معاها بيتهم، طبعاً كانوا عاملين قعدة جبنه و نسابتي كانوا معاهم عشاااان كدا ما كنت عايزا أجي قعدة الجبنه دي، طبعاً أول ما دخلنا بيتهم صوت الونسه و الضحك كان واصلنا لحد باب الشارع، مشينا ليهم في المظله و طبعاً المظله مليانه من بدايتها لنهايتها و في النص مفرشين فرشات قاعدين فيها البنات الشابات و النسوان الكبار قاعدات على السراير، دخلت سلمت عليهم كلهم و قعدت، خالتو نبيله أم نفحات قالت لي وين انتِ من قبيل يعني إلا نرسل ليك عشان تجي، قلت ليها كنت جايه بس كان عندي حله في النار، المهم كبوا لي جبنه و زادو البخور و النسوان رجعوا لونستهم تاني، كانوا بتكلموا عن وحده راجلها عرس فيها عشان ما حملت فـ طوالي عمتي سنيه يلي هي نسيبتي قالت ليهم والله من حقو يعرس، يعني مرا ما بتلدي دي يسوي بيها شنو؟؟ طبعاً لمن قالت كدا حسيت بوخزه في قلبي ، عارفاها قاصداني، المهم بقوا يتكلموا في الموضوع دا بين رافض و مؤيد و أنا حاسه نفسي قاعده في نار و عمتي سنيه تطاعني بكلامها ، لمن غيرو الموضوع فجأهـ كدا وحده منهم قالت لي ما شاء الله يا ريله رسمتي متين و عند منو؟؟
قلت ليها والله أمبارح لقيت نفسي فاضيه و عندي باقي بيقن عملت لي كيس و رسمت بيهو ، طبعاً اللحظه ديك كل النسوان ركزوا معانا و بقوا يقولوا لي ما شاء الله والله حناااانه ، وحده منهم قالت لي والله أنا بتعجبني فيك جيهتك و نضافتك دي ما شاء الله ما أسحرك، أريتك بتي أو مرت ولدي، نفحات قالت ليهم شهتني العرس والله بسببها بقيت أفكر في العرس بصوره جديه شديد و كلو عشان أرسم و اتحنن 🤣🤣
أمها قالت ليها و الجامعه دي مخلياها لمنو؟؟ قالت ليها ماف مشكله بعرس و بقرا، أمها قالت ليها والله لو هو بخليك تقري عرسي ساااي و اتخارجي لي من البيت ، قالت ليها يخسسسي عليك يا نبعو، معقوله عايزا تتخلصي مني! قالت ليها يخسي دي لي أنا!؟ عليكم الله يا حريم شوفوا قلة أدب البت دي! النسوان ضحكوا و قالوا ليها ياهو حال بنات الجيل دا، نفحات ضحكت و قالت ليهم كالعاده ، جنكم في كل قعدة جبنه تتكلموا فينا و تطلعونا قليلات أدب و نحنا ما كدا ولا شنو يا بنات ؟؟
البنات قالوا ليها فعلاً أمهاتنا ديل ساااي ظالمننا و
خاربين سمعتنا 🤣
حبوبه النخيل يلي هي حبوبة نفحات أم أمها، قالت ليهم والله يا جماعه كل جيل بختلف عن الجيل القبلو و البعدو، يعني مثلاً جيلنا نحنا الحبوبات ما زي جيلكم انتوا الأمهات ، و جيلكم انتوا يا أمهات ما زي جيل بناتكم و جيل بناتكم حيكون مختلف عن جيل بناتهم في المستقبل، نحنا ذاتنا زماااان امهاتنا كانوا بقولوا لينا جيلكم دا أكعب جيل! أو جيل قليل أدب مع اننا ما كنا قليلين أدب زي قلة أدبكم البتسوا فيها هسي دي، لكن الجمله دي اتقالت لكل الأجيال على مر السنوات، نفحات قالت ليها ما فهمت يا حبوبه هسي كلامك دا ضدنا ولا معانا، قالت ليها والله قصدي أقول ليكم في كل جيل في الكعب و في الكويس يعني ما كلهم بكونوا كعبين، في بنات قليلات أدب و ما بحترمو أمهاتهم ، بس برضو في بنات طفره و عمله نادره زي ريله دي ما شاء الله عليها زينة البنات ، نفحات قالت لي غيتو الليله يا ريله الله يستر عليك ، حبوبتها لبعتها و قالت ليها قاصده شنو، ضحكت و قالت ليها ولاااا شي ولاااا شي يا حبوبه ، المهم بعدها اتواصلت الونسه، طبعاً نسيبتي بتونسهم بس بتسكت أول ما النسوان يجيبوا سيرتي أو يقعدوا يشكروا فيني، المهم بقوا كل مره يفتحوا موضوع و يتكلموا عنو لحد ما فتحوا موضوع النسيبه و مرت الولد! جزو كان بقول إنو معظم نسوان الأولاد ما بحترموا النسيبه و هم سبب المشاكل و جزو تاني كان بقول إنو النسيبه والنسابه عامة هم سبب المشاكل ، حبوبه النخيل قالت ليهم اسمعني يا نسوان ، جزو كبير منكم هنا نسوان أولاد و جزو تاني عندهم نسوان أولاد و فيهم القاعدات معانا هنا يلا الكلام دا ليكم كلكم، مشاكل النسابه دي ما ظنيت يجي يوم و تختفي فيهو ، المشاكل بين أم الولد و مرتو حاجه أزليه و حـ تستمر مدى الحياة، لكن شنو الواحده تحاول تكون صبوره و متفهمه و رشيده، لو نسيبتك صعبه و كعبه انتِ كوني عكسها و لو حاصل العكس مفروض النسيبه تكون حكيمه و أوعى من كدا، غيتو أنا شايفه الموضوع دا واقف على النسيبه، هي البتقدر تهدي الوضع أو تزيدو سوء ، نسوان الأولاد معظمهم بنات صغار و مهما كانت أعمارهم هم صغار والله قدام الزواج و مسؤولياتو، يعني الواحده في بيتهم أمها بتكون متحمله مسؤوليتها و يمكن كمان تكون مدلعاها و فجأه كدا تلقى حياتها اتغيرت و تلقى نفسها قدام مسؤوليه كبيره و عليها واجبات كتيره ناحية راجلها و نسابتها و أهل نسابتها ، ف هم بحتاجوا نُصح و إرشاد من النسيبه، مالو لو اعتبرتيها بتك أكتر من كونها مرت ولدك ، والله الواحده طول ما هي خاته في راسها إنو مرت ولدها دي زي ضرتها أو عدوتها المشاكل دي ما حـ تخلص، ريديها و إحترميها و عامليها زي بتك عشان هي ذاتها تريدك و تحترمك و تختك في مقام أمها، المشاكل ما حـ تخلص بس لمن يكون في ود و إحترام المشاكل بتتحل و الناس بعد كل مشكله أو نقاش برجعوا يتعاملوا تاني مع بعض، وحده قالت ليها صدقتي والله يا حجه النخيل، هسي أنا ما بشكر ليك نفسي و تعاملي مع مرت ولدي لكن والله أنا بعاملها زي بناتي، لو عملت غلط بقول ليها غلط و لو صح بقول ليها صح ، في البدايه كانت بتزعل و بتقول إني مترصداها و ببهت أي حاجه بتعملها، والله كانت لو عملت ملامح ملحو زايد و قلت ليها ملاحك دا مالح بتزعل مع إنو نفس الكلام دا قاعده اقولو لبناتي و ذاتو ما فيهو شي لكن مع الأيام اتعودت و فهمت إنو أنا ما عندي معاها أي مشكله و بعتبرها زي بتي و هسي علاقتنا زي السمنه على العسل مع إنو مرات بنتشاكل و نتناقش بس زي ما قلتي لمن يكون في ود و إحترام المشكله طوالي بتتحل، والله مشاكلنا دي لولدي ما قاعده تصل ، بتحصل بيناتنا و بتنتهي بيناتنا ، حبوبه النخيل قالت ليها ايوااا دا الكلام الصح والله.... طبعاً نسيبتي خشمها ما فكتو ، و نهاي ما علقت على الموضوع دا ، المهم لمن القعده خلصت و النسوان بقوا يمشوا وحده ورا التانيه نسيبتي وقفت على حيلها و قالت ليهم يلا يا جماعه ان شاء الله دايماً عامرين، قالوا ليها اقعدي يا سنيه لسه بدري ، قالت ليهم وين قعدنا كتير والله، يلا يا بنات قومن أرح ، يمنى قامت بس إشراقه قالت ليها انتوا أمشوا أنا بلحقكم بعد شويه، قالت ليها خلاص لكن ما تتأخري، قالت كدا و طوالي طلعت مع بتها و أنا ما سألتني ماشه ولا قاعده، قعدت شويه بعدها رجعت البيت، مسكت الحوش رشيتو و كنستو و سقيت الشجر ، بعدها صليت العصر و دخلت جوه و قعدت أحضر ، طبعاً غداي جاهز و مرات بعملو مع الفطور ، المهم قريب المغرب كدا شلت لي ملاح و مشيت وديتو بيت نسابتي، عمي بريد ملاح الباميه و دائماً بقول لي لو عملتيهو خلي لي، طبعاً ما قعدت كتير وديتو ليهم و جيت راجعه، طبعاً هم ساكنين جنبي ، البيوت لصق بعض، المهم بعد صليت المغرب مسكت تلفوني و دخلت الفيس اتصفحت كدااا لحد ما يوسف جا داخل، خليت التلفون و مشيت ختيت الغدا، لمن شلت الصينيه و جيت ختيتها جنبو قال لي أنا اتغديت مع ناس أمي بهناك ، ما قلت ليهو شي ، رجعت بالصينيه المطبخ و قعدت اتغدا هناك من دون نفس لأني ما بقدر آكل براي، بعدها مشيت ليهو و قلت ليهو عايز شاي ولا شربتو؟ قال لي والله عايز جبنه! ما قلت ليهو شي بس طوالي مشيت و عملت ليهو الجبنه و جبتها ليهو، بعد داك كل واحد إنشغل بنفسو، أصلاً ما عندنا كلام كتير مع بعض، هو عادة بطلع الصباح و برجع المساء و مرات حتى لو جا راجع بدري أو نص النهار بكون في بيت أهلو أو في الميدان مع الشباب بس ما بقعد كتير في البيت، علاقتنا زي أي زوجين اتنين و كل واحد قايم بواجباتو بس في حاجز بيناتنا و جواي فراغ كبير ، مرات كتيره بقرب اسألو و أقول ليهو انت مالك معاي يا يوسف بس بتراجع و بخجل من نفسي و بقول ليها يعني عايزاهو يعاملك كيف؟؟ زي ناس المسلسلات مثلاً؟! يعني حتى لو أنا ما قصدي كدا هو حـ يفهم كدا ، المهم تاني يوم صحيت بدري كالعاده رتبت البيت و قعدت أبخر فيهو و دخلت المطبخ عملت الشاي و الزلابيه ، الوقت داك يوسف كان في الحمام ، طبعاً البيت عباره عن غرفه مربوطه ببرنده و جنبهم مطبخ و قدامهم مظله زنكي مربوطه بيهم و الحمامات خارجيه، المهم لمن جا داخل المظله لقى الشاي و الزلابيه جاهزين، شويه كدا سمعنا صوت الباب، يوسف مشى يفتحو و فجأه كدا جاتني داخله سجى بت جيرانا صغيرووونه كدا ، فرحت لمن شفتها شلتها و قلت ليها سجووو يا سجووو بقيت ما قاعده أشوفك بتمشي وين انتِ؟ قالت لي قاعده أمشي ألعب مع ناس رحمه الحقارين، طبعاً يوسف قعد يضحك عليها، قالت لي أمي قالت ليك أديها زلابيه، طبعاً استغربت أمها عرفت كيف إني عملت زلابيه! قلت ليها حااااضر و طوالي نزلتها، يوسف شال من الزلابيه و أداها، قال لي جيبي ليها لبن، مشيت كبيت ليها لبن و جبتو ليها و شلت لي صحن ملان زلابيه و مشيت بيهو بيتهم و هي خليتها بتشرب الشاي مع يوسف، طبعاً لقيت أمها جنب الباب، هم بيتهم بعد 3 بيوت من بيتنا، لمن وصلتها سلمت علي و قالت لي عليك الله يا ريله ما شفتي لي سجو دي مشت على وين!؟
قلت ليها سجو في بيتنا انتي مش رسلتيها؟!قالت لي بري والله ما رسلتها، ضحكت و مديت ليها الصحن و قلت ليها جات و قالت لي أمي قالت ليك أديها زلابيه ، قالت لي ووووبعلي أنا من البت دي! والله العظيم ما قلت ليها كدا يا ريله! أجي يا الأمي قالت ليك ! أنا ذاتي من وين حـ أعرف انك عامله زلابيه، غيتو البت دي بس تصبر لي ، قلت ليها لا لا والله ما فيها حاجه و عليك الله ما تسأليها هي شافعه في النهايه، قالت لي لو بتشحدك انتِ و بس يا ريله ماف مشكله والله انتِ أنا عاداك زي أختي و عارفاك ما بتشيلي حالي لكن البت دي بقت تلف الحي كلو و تشحد الناس و المشكله انها بتقول ليهم أمي قالت ليكم أدوها! قبل كدا مشت لناس حجه سلافه و قالت ليهم أمي قالت ليكم أدوها حبة زيت لو عندكم و عاد ناس حجه سلافه ليوم الليله ماسكاتنها لي في قعدات الجبنه و شغالات في زيت بنشحد!! ضحكت و قلت ليها بكرا تكبر و توعى، قالت لي المشكله إنو ماف زول بصدق إنو هي القاعده تشحد من عندها، طبعها شين و عنيده و ما بتسمع الكلام، لو مشت بيت زول و شافت عندو حاجه عجبتها بتطلع و بتجيهم راجعه و بتقول ليهم أمي قالت ليكم أدوها الحاجه الفلانيه!
فجأه سجو جاتنا جاااريه و هي بتاكل في زلابيه و يوسف طلع معاها و لمن شافنا و اتأكد انها جايه علينا دخل، أول ما وصلت أمها مسكتها و قرصتها و قالت ليها تعااالي هنا يا كلبه أنا قلت ليك أمشي جيبي زلابيه من ريله؟ قالت ليها خلاص يا ماما تاني ما بعيدا، طبعاً هي عمرها 4سنوات، قلت ليها خليها ساي تجي في أي وقت و أنا تاني كل ما أعمل زلابيه بجيب ليكم منها، قالت لي لا والله سجو دي مستهبله ساي و كل يوم بتتشهى ليها حاجه جديده!
المهم لمن وصلت باب البيت و قبل ما أدق الباب في زول قال لي يا ريله، لمن إتلفت لقيتو جارنا في الحي، سلم علي و قال لي كيف الحال ان شاء الله كويسه، قلت ليهو كويسه الحمدلله كيف إزدهار و الأولاد، طبعاً إزدهار دي مرتو ، أول ما جبت ليهو سيرتها طوااالي قال لي هي كويسه البجيها شنو عاد 24ساعه راقده و ماسكه التلفون، مرا سجمانه و رمدانه، حلة عدس ما بتعرف تعملها و بيتها وسخان وهي في نفسها وسخانه و سجمانه كرهتني حياتي ... طبعاً أنا استغربت فيهو بس من قال لي هسي لو كانت زيك كدا مالا عرفتو شارب ليهو شي ، طوالي بقيت أدق في الباب و هو شغال لي أنا كان لقيت واحده زيك كدا تاني ما داير شي من الدنيا دي، قلت ليهو خلاص يا اسعد أمشي و هو حالف يتكلم لسه ، طبعاً عشان عارفاهو سكران ما رديت عليهو لأنو ما حـ يفهم لي شي ، قال لي ملاح الخضره و الكسره الجبتيهم لينا الأسبوع الفات طعمهم لهسي في خشمي، يدك طاااعمه و ناعمه، غيتو يوسف دا محظوظ عديل ، فجأه الباب اتفتح و يوسف جا طالع و أسعد لسه شغال لي انتِ و انتِ! قال لـ يوسف والله انت لاقيها لقيه، معرس ليك بت صغيره و سمحه و يدها طاعمه و ناس الحي ديل جت بريدوها ...حتى أنا!.... طبعاً كلامو خلعني و يوسف جاهو طالع، قلت ليهو شكلو سكران عليك الله خليهو ما تسألو، قال لي انتِ خشي جوه أنا بعرف كيف اتفاهم معاهو ☺️
أول ما دخلت كدا أسعد قال لـ يوسف رايك شنو نتبادل، لمن إتلفت عليهم يوسف طوالي قفل الباب، خفت يعمل شي للراجل و هو سكران و ما واعي على نفسو!!... لمن فتحت الباب لقيت يوسف ماسكو من لياقة القميص و سمعتو قال ليهو تاني يا أسعد لو شفتك ساي جاي ماري جنب الباب دا والله ما يحصل خير، قال ليهو كدا و لزاهو و أول ما إتلفت علي طوالي قفلت الباب و دخلت جوه وهو من هناك مشى شغلو طوالي.... المهم مع الضهريه كدا جاتني نفحات داخله، طبعاً كانت جايه من الجامعه، قالت لي وااااي أنا من الحر شغلي المكيف دا ، قلت ليها شغال ، قالت لي معقوله أنا مسخنه لدرجة اني ما حاسه بالمكيف! قلت ليها اقلعي الطرحه شوفي عرقك دا نازل كيف، قلعت الطرحه و فكت شعرها و بقت تهوي لنفسها، مشيت جبت ليها مويه و جيت، شربتها و قالت لي ما عندكم تلج!؟ قلت ليها لا والله لكن دقيقه بجيب ليك من ناس عمتي سنيه، قالت لي لا لا ماف داعي والله، قلت ليها لا لا هسي بجي، قالت لي حـ تندميني لأني جيت غاشياك، قلت ليها يا بت أنا ذاااتي عايزا تلج، المهم مشيت بيت نسابتي لقيت أمهم ماف و بناتها نايمات جوه، لكن هنادي كانت موجوده، طبعاً هنادي دي زوجة إلياس أخو يوسف برضو بيتها لصق مع بيت عمتي سنيه، نحنا بيتنا واقع يمين بيت نسيبتي سنيه و هم بيتهم شمالو ، المهم سلمت عليها و قلت ليها عايزا لي تلج، قالت لي تلاجتكم مالا ان شاء الله ما إتعطلت، قلت ليها لا ما اتعطلت، قالت لي طيب مالا؟...قلت ليها بتستهلك كهربه و كل يوم الكهربه بتفصل بسببها، قالت لي أجي كيف يعني الكهربه بتفصل بسبب تلاجتك!...قلت ليها دا الحاصل و طوالي مشيت، طبعاً هي مستهبله ساااي و عارفه الحصل كلو و عارفه إنو عمتي سنيه هي الفصلت التلاجه و قالت لي تعالي شيلي تلج من بيتي، المهم رجعت البيت أديت نفحات مويه بارده و عملت لينا عصير، قالت لي تسلمي يا قلبييي، قعدت معاها و قلت ليها اها كيف عامله مع الجامعه، قالت لي أسكتي ساي تعب زي التعب، قلت ليها أحسن من القعاد ساي، والله أنا اتمنيت اقرا الجامعه بس ما اتوفقت، قالت لي انتِ مش امتحنتي شهاده سودانيه؟ قلت ليها ايوه قبل 3 سنوات، قالت لي و أهلك ما خلوك ولا كان مالك؟
قلت ليها المسافه كانت بعيده و غير كدا رسوم الجامعه كتيره و في الحقيقه ماف زول مهتم شديد بقراية البنات، يعني أنا ما صدقت انهم خلوني أكمل الأساس و اقرا الثانوي، قالت لي لسه ما فات شي ، في جامعات بتقبل تسجل طلاب امتحنو قبل سنتين أو تلاته عادي، كلمي يوسف و خليهو يقريك، قلت ليها عليك الله بعد 3 سنوات تاني اقرا شنو و أنا الفي بالي كلو راح، قالت لي يعني انتِ قايله الأخدتيهو في الأساس و الثانوي لازم تكوني متذكراهو عشان تدخلي الجامعه؟؟ يا بت داك كوم و الجامعه كوم تاني خالص، المهم كلمي يوسف و ما تترددي، قلت ليها طيب، بعدها ضحكت و قالت لي واي اتذكرت قبيل الصباح، قلت ليها الحصل شنو قبيل؟؟ قعدت تضحك و قالت لي ما شفتي أسعد السكران قال شنو لـ يوسف، طبعاً أنا كنت طالعه ماشه الجامعه و جيت ماره بجنبهم و شايفه يوسف ماسك أسعد من لياقتو و أسعد شغال ليهو أنا كان لقيت لي وحده زي ريله دي صغيره و سمحه و يدها طاعمه والله ما داير شي من الدنيا دي، و يوسف دا حسيتو حـ يخنقو و يفصل راسو عن جسمو، قلت ليها اااي و حكيت ليها الحصل من البدايه و قلت ليها الراجل خلعني بكلامو، قالت لي إزدهار لو سمعتو حـ تفطسو 🤣🤣
المهم بعدها مشيت عملت جبنه و بقينا نشربها أنا و هي بمزاااج و نحنا بنحضر، المهم للغدا اشتهيت لي كسره فـ قمت عستها و عملت لي ملاح أم رقيقه و عملت معاها شطه خضراء، طبعاً ما متعوده اتغدا براي كل مره بشيل أكلي و بمشي بيهو بيت ناس نفحات أو بيت نسابتي أو أي وحده من جاراتي ، المره دي شلت أكلي و مشيت بيهو لـ نسابتي، لقيت عمي سيد موجود من شافني قال يا سلاااام أخيراً الأكل الطاعم جا! نسيبتي سمعتو و قالت ليهو البسمعك بقول قاعدين نأكلك برسيم! همس لي و قال لي بصوت واطي حكومتنا دي صعبه شديد، ضحكت و قلت ليهو عشان كدا أعمل حسابك، قالت لينا بتوسوسوا بتقولوا في شنو انتوا الإتنين! قال ليها ولا شي ، المهم دخلت جهزت معاها الغدا و ختيناهو و قعدنا كلنا عشان نتغدا، هنادي ذاتها شالت أكلها و جات، طبعاً يوسف عندو أختين يلي هم يمنى تالته جامعه و إشراقه إتخرجت و أخوانو اتنين خليل دا الكبير معرس و عايش برا السودان مع مرتو و أولادو و أخوهو التاني إلياس ياهو المعرس هنادي و ساكن جنب ناس أمو، عندو ولدين صغار بت و ولد و يوسف هو الوسطاني لأنو أخواتو أصغر منو، المهم أثناء ما نحنا بنتغدا كدا يوسف جا داخل، أخوهو إلياس قال ليهو حصانك جراي والله، أرح أرح يا زول الغدا ما يفوتك، طوالي غسل و جا قعد ، هنادي شالت صحن سلطة الأسود و ختتو جنبو عشان هو بحب سلطة الأسود ، قال ليها لا لا أنا اليوم عايز لي كسره بس ، إشراقه أختو رفعت صحن سلطة الأسود و ختت جنبو ملاح ام رقيقه و قالت ليهو أصلاً دي الحاجات البتشبهك ، قال ليها شنو؟؟ قالت ليهو قصدي انت ما بتاكل إلا الأكل البلدي و نحنا ما بنحب الأكل البلدي و ما متعودين عليهو، أبوها قال ليها دي قلة أدب منك ساي، عمتي سنيه قالت ليهو و قلة الأدب شنو في دا؟؟ بناتك ديل معروفات من زمان ما بياكلوا لا كسره لا عصيده! إلياس قال ليهم خلاص عليكم الله ما تعملوا لينا موضوع!!
المهم بعد شويه كدا هنادي قالت لي مالك يا ريله ما بتدخلي يدك في ملاحي ما عجبك ولا شنو؟ قلت ليها لا لا والله و طوالي دخلت يدي في ملاحها غصب عني و أنا شايفه ولدها بهبش و بدخل يدينو في الصحن و هي ماسكه بتها في يدها و لمن تأكلها بترجع اللقمه تاني للصحن تملحها و تديها ليها تاني!
المهم بعدها قمت طوالي و مشيت أعمل ليهم الشاي، شويه كدا إشراقه جات داخله و هي شايله الأكياس الجابهم يوسف، فتحت التلاجه و دخلتهم ، المهم عملت الشاي و شربناهو كلنا سوا، بعدها يوسف قال لي نمشي البيت ، طبعاً شال جزو من الحاجات الجابهم قبيل، أصلاً هو لو جاب حاجه بجيبها للبيتين، لينا نحنا ولناس أمو، لمن جا مارق أنا كنت منتظراهو في الحوش، المهم طلعنا و مشينا بيتنا، هو دخل المطبخ و أنا دخلت البرنده شويه كدا بقى ينادي علي ريله يا ريله!
طبعاً عرفتو بنادي ليه فـ قمت و مشيت ليهو.....
"لو جئتني لوجدتني يعقوبا اعماه الشوق وليس غيرك يوسفي "
يتبــــــــــــــــــــــــــــــــــــــــــــع.