رواية ريله الفصل الثاني 2 بقلم مها حولي الزاكي
لمن دخلت المطبخ قال لي التلاجه دي فاضيه ليه و ليه مفصوله؟ متعطله يعني؟
قلت ليهو لا، قال لي اها مالا؟؟ قلت ليهو بتستهلك كهربه و بسببها الكهربه بقت تفصل، قال لي كيف يعني بتقولي في شنو انتِ؟؟ عشان كدا فصلتيها! ياخ معقوله!....قال كدا و طوالي وصل التلاجه، قال لي تاني إياك تفصليها و بالمناسبه الحاجات القاعد اجيبها بتوديها وين إذا ما قاعده تختيها في التلاجه؟؟
قلت ليهو قاعده أوديهم ناس أمك، و التلاجه أنا ما فصلتها فصلتها عمتي سنيه ! قال لي نعم؟! أمي فصلت التلاجه!متين الكلام دا؟؟ قلت ليهو قبل يومين ، قال لي ليه ما كلمتيني و أساساً ليه أمي تقول ليك كدا!؟ قلت ليهو قالت بتستهلك كهربه ، طبعاً سكت ما قال حاجه بس حسيتو زعل، طبعاً أنا عارفه إنها ما بتستهلك كهربه زايده و عارفه إنو ماف أي سلك قاعد يفصل بسبب تلاجتنا، كلنا موصلين من بيت عمتي سنيه حتى ناس هنادي و اليوم كلو مكيفاتهم شغاله بس عمتي مشكلتها معاي أنا، عشان كدا ما حبيت اتناقش معاها لأني عارفاها عايزا ليها مشكله بس ، أنا نقطة ضعفي ما تلاجه أو مويه بارده، و التلاجه دي لو قعدت شهر فاصله ما بوصلها، هسي ولدها عرف تاني بطريقتو مع أمو ما عندي بيهم شغله، طبعاً أمو دي من البدايه تعاملها معاي ما كان كويس و ما كنت عارفه السبب بس لمن خلاص بقيت مرت ولدهم و سكنت في حيهم و جنبهم عرفت من الناس إنو هي كانت عايزا ليهو بت صحبتها حتى انها مشت خطبت ليهو البت و كانت متفقه مع أمها و موفقين أمورهم بس قسمة ولدها جابتو لحد عندي، دي مشكلتها الأولى معاي، مشكلتها التانيه الحمل، من أول شهرين زواج هي بدت تنق و تقول لسه ما عايزين تبقوا تلاته، لسه ماف كدا ولا كدا، طبعاً بقت وين ما تمشي تجيب سيرتي و تقول مرت ولدي عاقر، مرت ولدي ما بتلدي و و و ...و أنا الكلام دا كلو واصلني بس ما حصل فتحت خشمي و اتناقشت معاها، بقت تنق كتير و ما عندها سيره غير الموضوع دا لحد ما في الآخر يوسف قال ليها خلاص حـ نمشي نقابل دكتور، لمن مشينا قال لينا الإتنين ما عندكم مشكله والله بس شكلو لسه ربنا ما قاسم ليكم ، مشينا لدكتورين غيرو و قالوا لينا نفس الكلام ، طبعاً هي الكلام دا ما عجبها و بقت تقول للناس إنو ولدها سليم و المشكله فيني أنا ، و أنا والله كلامها دا بوجعني جنس وجع بس ولا مره رفعت صوتي عليها أو جادلتها ، مرات كتيره لمن أزعل بقول ما بمشي بيتها تاني بس بعدها بتراجع و بمشي ليهم عشان عمي سيد و عشان هم نسابتي في الآخر وأهل راجلي...
المهم تاني يوم قريب المغرب كدا جوني اتنين من نسوان الحي وحده منهم اسمها سميه كانت معانا في قعدة الجبنه في بيت ناس خالتو نبيله ، دي الكان قالت لي رسمتي عند منو، المهم قالوا لي عايزنك تحننينا و ترسمي لينا و كانوا جايبين معاهم بيقن، قلت ليهم صح أنا بحنن نفسي لكن ما على قدر المستوى، سميه قالت لي ماف أي مشكله اعملي لينا الفي بالك ان شاء الله شكل بسيط ، عندنا مناسبه بكرا و الحنانه البنمشي ليها بيتها زحمه و الزمن ضيق، والله لو ما مستعجلين و ماف وقت ما كان تعبناك معانا، قلت ليها لا لا ماف مشكله، مشيت عملت ليهم شاي و جبتو ليهم، مسافة يشربوهو عملت كيس الرسم و خلطت البيقن بمويه و كبيتو في الكيس ، بعدها بديت أرسم للمراه التانيه، رسمت ليها شكل خفيف و بسرعه خلصت ليها رجليها، قالت لي ما شاء الله ماف كلام و يدك خفيفه، بعدها أنا و سميه صلينا المغرب و جيت قعدت تاني و بديت ليها في يدينها، جات نفحات مرسله لقتنا شغالين رسم سااااي ، قالت لي والله ما شاء الله يا ريله بقيتي حنانه رسمي، قلت ليها بري دا رسم قدّر ظروفك ، المراه قالت لي لا والله، ما شاء الله رسمك نضيف و سمح شديد والله، سميه قالت ليها ايي والله رسمها نضيف ، هسي يا ريله لو بقيتي حنانه مالك؟ على الأقل تبقي لينا قريبه و تراعي لظروفنا، نجي نرسم عندك في أي زمن، قلت ليها والله الرسم دا بياخد زمن طويل و قعدتو حارهـ و أنا ما بقدر أقعد اليوم كلو في شغل واحد، قالت لي كلامك صح والله، المهم نفحات قالت لي عايزا قرفه لو عندك، قلت ليها اي عندي، أمشي المطبخ و افتحي الأدراج الفوق، البرطمان الغطاهو أزرق، قالت لي طيب و مشت ، المهم شالت القرفه مشت ودتها بيتهم و جات راجعه بغداها ، ختتو في المطبخ و جات قعدت تتونس معانا، لمن جا دور سميه قلت ليهم دقيقه خلوني أخت الغدا و فعلاً مشيت ختيتو و جبتو و قعدنا نتغدا سوا و طبعاً المرا ديك جبت ليها معلقه، كنت عامله سليقه بالرز، و نفحات جايبه سلطه و ملاح بامبي، سميه قالت لي ما شاء الله أكلك طاعم، والله أول مره تعجبني سليقه للدرجه دي، نفحات قالت ليها فعلاً ريله أكلها طاعم هسي أنا كل مره لمن أكون راجعه من الجامعه بغشاها و أشوفها طابخه شنو ، المهم بعدها نفحات رفعت الصينيه و غسلتها و لمن كنت حـ أعمل شاي قالت لي خليهو بعملو أنا، قلت ليها طيب اعملي لينا فيهو قرفه، المهم رجعت و بديت أرسم لـ سميه و نحنا بنتكلم، فجأه كدا يوسف جا داخل! اتفاجأ لمن شاف سميه و المعاها و ما عرف يدخل ولا يطلع! شكلو باب الشارع كان فاتح عشان كدا ما سمعنا صوتو، المرا طوالي صلحت رقدتها،طبعاً كنا قاعدين في المظله، قال السلام عليكم و طوالي دخل جوه الغرفه، كان شايل معاهو أكياس، سميه قالت لي سجمناااا الراجل جا و لقانا متبطحات ليهو في بيتو، بكون اتضايق، قلت ليها لا لا والله ما بتضايق، قمت من مكاني و مشيت جبت ليهو مويه و شلت الأكياس دخلتها التلاجه، نفحات قالت لي يوسف جا ولا شنو؟ قلت ليها ايوه جا، قالت لي اخت ليهو يتغدا؟؟ قلت ليها بكون أكل في بيت أمو بس لمن تكبي الشاي كبي ليهو معاك، قالت لي طيب، لمن مشيت المظله يوسف جا طالع من الغرفه و طلع طوالي، المراه الجات مع سميه قالت طفشنا الراجل من بيتو! قلت ليها لا لا أصلاً هو ما قاعد يقعد كتير في البيت، قلت كدا وقعدت و واصلت رسم لـ سميه، قالت لي يعني نهاي ما بقعد في البيت؟؟ هسي لمن يطلع بجيك راجع متين؟؟ قلت ليها لحد 9 كدا! قالت لي غريبه يجي من شغلو و يطلع طوالي! شايفاهو بغشى ناس أمو طوالي و بقعد في بيت أمو بس غريبه ما بقعد في بيتو!! المرا التانيه قالت لي هسي علاقتو بيك كيف؟؟ قصدي بتتعاملوا زي أي زوجين؟؟.... جات نفحات و قالت ليهم هوووي يا حريم دي اسئلة شنو دي ، ماااالكن و مالهم، سميه قالت ليها هسي نحنا قلنا شنو يا بت نبيله! اسئلتنا دي عاديه!.... طبعاً لمن لقوني ساكته غيرو الموضوع و قعدوا يشربوا الشاي لحد ما انتهيت من سميه، انتظروا الحنه تجف بعدها مشوا، نفحات قالت لي النسوان ديل ما تعوديهم تغديهم و تفطريهم و تعملي ليهم شاي ، والله يبقوا ليك في رقبتك و تاني من بيتك ما يطلعوا! قلت ليها زمن الغدا جا و خجلت أكون قاعده و ما أديهم حاجه! قالت لي يختي يمشوا يتغدوا في بيوتهم و زاتهم جايات في زمن متأخر زي دا ليه؟ ...صحي هم دفعوا ليك حق الرسم؟ قلت ليها يا بت أنا ما حننتهم بقروش! قالت لي حيييا أنا تاني ماااا تعوديهم.... المهم أنا ماشه البيت، قلت ليها عليك الله اقعدي ونسيني شويه لحدي ما يوسف يجي، قالت لي والله راااجياني قرايه قدر التراب و طبعاً جيت هنا هرباً من الشيت و هسي حـ أضطر أرجع ليهو تاني ، قلت ليها طيب و ربنا يوفقك و مشيت قدمتها لحد الباب، أول ما كنت حـ اقفلو كدا يوسف جا داخل! كان شايل تلفونو و مركز معاهو، ما قال لي أي شي قفل الباب و دخل، طبعاً اتعاملت معاهو بنفس أسلوبو و ما ركزت معاهو، قعدت قدام الشاشه و بقيت أحضر و هو برا في المظله، شويه كدا سمعتو بناديني، طبعاً لااابسه توبي، أصلاً ما حصل وقفت قدامو من غير توب، لمن مشيت ليهو قال لي على فكره أنا ما متغدي ☺️
قلت ليهو غريبه! ما غشيت ناس أمك؟؟.... قال لي غشيتهم و غداهم ما عجبني و بعدين لو غشيتهم أو لا مش مفروض تجي و تسأليني متغدي ولا لا؟! ... قلت ليهو مفروض بس عشان دائمًا بتقول انك متغدي مرات ما بسألك! قال لي و إذا اتغديت هناك عيب أو حرام أجي اتغدا هنا تاني ؟؟ قلت ليهو طيب حـ اجهز ليك الغدا و فعلاً مشيت جهزتو ليهو و ختيت ليهو الصينيه قدامو و طوالي مشيت المطبخ سخنت الشاي، لمن هو خلص قلت ليهو اجيب ليك تاني؟؟ قال لي لا، رفعت الصينيه وديتها المطبخ غسلتها و جيتو راجعه و أنا شايله الكبايه في صينيه، فجأه التوب عتر لي و الكبايه وقعت مني و اتكسرت و جزو من الشاي اتدفق في رجلي، نزلت و بقيت ألمس في رجلي، يوسف جا قعد معاي على الأرض و بقى يشوف في رجلي و هو زهجان و شغال لي كنتِ خاته بالك وين انتِ! قلت ليهو التوب عتر لي، قال لي بنهره توب شنو ذاتو قايله نفسك عايشه في الشارع انتِ 24 ساعه متلففه بتوبك دا!!
طبعاً خلعني! جاب مويه بارده و غسل لي بيها رجلي، نضفت القزاز و مشيت جبت ليهو شاي تاني، بعدها مشيت و قعدت أحضر و هو ذاتو بعد مساااافه جا قعد يحضر معاي، بس بالو كان في حته تانيه، لاحظت ليهو من جا سرحان بعيد و زي البفكر في حاجه....
المهم بعد 3أيام من الكلام دا يوم لمن يوسف جا من الشغل ختيت ليهو الغدا و جيت قعدت قصادو و قلت ليهو بتردد يوسف عايزاك توديني أقابل الدكتور، رفع راسو و قال لي عيانه؟؟ قلت ليهو لا و سكت ... عاين لي للحظات بعدها قال لي تاني؟؟ ريله دي المره الكم؟! قلت ليهو ما خسرانين شي، أنا عايزا أعمل الفحص و اتأكد، سكت ما رد علي، قلت ليهو إذا ما بتقدر تمشي معاي ماف مشكله بمشي لنفحات و بسوقها معاي، قلت كدا و وقفت على حيلي و كنت حـ أمشي بس وقفت لمن قال لي بزهج : خليك جاهزه...
المهم الإتنين جهزنا و طلعنا عشان نمشي أقرب مركز صحي، ركبنا ركشه و اتحركنا، في الطريق قال لي المره الفاتت و القبلها و القبلها برضو نفس الحكايه! بتعشمي روحك ساي و بعدها بتزعلي! سكت سااااي ما رديت عليهو، لمن وصلنا و سجلنا بقينا قاعدين و منتظرين يندهو إسمي، طبعاً عرفنا إنو الدكتوره الموجوده هي دكتوره هاديه و دي القابلتها قبل كدا ، المهم يوسف كان مشغول بتلفونو و أنا بعاين للناس الحوليني، لمن ندهو اسمي وقفت على حيلي و عاينت لـ يوسف، قال لي خشي انتِ و ما دخل معاي!! دخلت قابلت دكتوره هاديه و حكيت ليها بالأعراض زي كل مره و قلت ليها عايزا اعمل فحص حمل عشان اتأكد و فعلاً عملت الفحص و قعدت برا مع يوسف و بقيت منتظره النتيحه و أنا مقلقه و بدعي إنو يكون حمل و هو ولا على بالو، يعني لمن طلعت من الدكتوره ما سألني و قال لي الحصل شنو!! المهم لمن النتيجه طلعت توتري زاد ، عاينت لـ يوسف و أنا خايفه بس هو ما كان مهتم! دخلت للدكتوره و لمن طلعت منها هو ما كان موجود!....لمن طلعت برا المركز لقيتو واقف جنب ركشه و منتظرني هناك،مشيت ليهو و ركبت عن سكات و هو أول ما ركب بتاع الركشه اتحرك، طوالي طول الطريق ماف واحد اتكلم مع التاني لحد ما وصلنا البيت، لمن دخلنا لا عاين لي لا عاينت ليهو، قعد و بقى يقلب في القنوات بزهج، دخلت جوه رقدت و اتغطيت و طوالي دموعي جات نازله! زي كل المره الدكتوره قالت لي ماف حمل و قالت لي عشان انتِ خاته الحمل في بالك و متمنياهو بتجيك أعراض الحمل الكاذب، بكيت كدا لمن نعست و نمت، تاني يوم لمن صحيت بعد ما صليت دخلت المطبخ و عملت الشاي، كبيتو و جبتو ليهو عن سكات و من دون ما أعاين ليهو، أول ما إتحركت من جنبو مسك طرف توبي، لمن إتلفت عليهو قال لي كويسه انتِ؟ هزيت ليهو راسي بس، وقف على حيلو و قال لي أنا كلمتك و قلت ليك زي كل مره دا وهم ، بس أصريتي تمشي! طوالي دموعي جات نازله، مسحهم لي و قال لي عشان عارفك حـ تضايقي و تزعلي لمن نجي راجعين من الدكتوره ما كنت عايزك تمشي!
قلت ليهو أنا كنت حاسه إنو في حمل و اتمنيتو يكون حقيقه، ما أنا بس كل الناس ، كلهم بسألوا و منتظرين متين اقول ليهم حامل ، المعارف و الجيران و الأهل كلهم بالذات أهلك... و انت كمان ، الحمل دا غير إنو حـ يفرحنا حـ يحسن علاقات كتيره أولها علاقتنا!
لمن قلت ليهو كدا رفع راسو و عاين لي ، يمكن دي أول مره واحد مننا نحنا الإتنين يحسس التاني إنو في نقص أو خلل في علاقتنا!
ما رد علي، قلت ليهو عارفه انك متغير علي بسبب إنو ماف حمل، عارفه الموضوع دا مضايقك و مأثر عليك بس أنا ذنبي شنو؟؟ ذنبي شنو يا يوسف عشان تعاملني بالطريقه دي و تحسسني إنو السبب أو العيب فيني أنا! من يوم عرستني و لغاية اللحظه دي ما حصل حسستني إني مرتك، بتتعامل معاي كأنك مجبور علي، في زول شال ليك سلاح عشان تجي تعرسني؟؟ في الشهور الأولى قلت ماف مشكله لأنو نحنا ما بنعرف بعض و طبيعي التعامل بيناتنا يكون رسمي بس انت كنت كل ما يمر شهر بتتغير علي أكتر، حالياً لينا سنه و نص و انت لسه بتعاملني بجفا، و مديني إحساس إني أسوا حاجه حصلت في حياتك، لو ما دايرني سلمني ورقتي و خليني أرجع أهلي، تكون ريحتني و ريحت نفسك.... ما قال أي شي طلع و بس و دا القهرني زياده 💔
تاني يوم زي الساعه 9صباحا كدا عمتي سنيه جات داخله، كنت في المظله بتكلم بالتلفون مع أهلي، رفعت لي يدها و مشت المطبخ جات بعد مسافه وقفت لي و انتظرتني لمن خلصت مكالمتي، قالت لي انتِ الحقاره ليك شنو يا ريله؟ التلاجه دي مش قلت ليك بتفصل الكهربه؟ و المكيف دا مشغلاهو في كم؟ قايله الكهربه دي جايه ببلاش! قلت ليها التلاجه وصلها يوسف، قالت ليه ما قلتي ليهو انها بتفصل لينا الكهربه و بتستهلك كهربه كتيره؟! سكت ساي، جات للمكيف و فصلتو، قالت لي كفاهو شغال من قبيل،لمن لقتني برضو ساكته قالت لي لو مسخنه تعالي اقعدي مع بناتي في الهول و شغلو المكيف، انتِ هنا قاعده براك و بتستهلكي كمية كهربه كبيره، هسي دا غلط ولا ما غلط؟؟ قومي هسي و أرح معاي البيت و اقعدي مع ناس إشراقه في المكيف حق بيتي....بالجلاله حركت لساني و قلت ليها حأقعد هنا ، قالت لي أنا فصلت التلاجه يوسف لو سألك قولي ليهو أمك الفصلتها كويس؟☺️
قالت كدا و رجعت المطبخ شالت الخضار الفي التلاجه و جات قالت لي بختو ليك في تلاجتي عشان ما يبوظ، وقت تحتاجي تعالي شيلي، بعد مشت عيوني إتملت دموع، في نفس اليوم دا مع العصريه جاتني هنادي و هي شايله بتها، قالت لي ريله ازيك، قلت ليها كويسه الحمدلله كيف عاملين، قالت لي والله كويسين شنو ليك يومين ما شفتك بهناك في بيت عمتي سنيه ولا جيتيني في البيت! قلت ليها مصدعه بس، قالت لي سلامتك ما بلعتي بندول؟ قلت ليها بلعتو و هسي أحسن شويه، قالت لي لو ما اتحسنتي طوالي كلمي يوسف يوديك الدكتور، اوعك تسكتي، قلت ليها لا لا ما للدرجه دي، قالت لي عشان بشوفك بتسكتي و في حاجات كتيره ما بتكلمي بيها يوسف....لمن قالت لي كدا أنا كنت داخله المطبخ، قلت ليها زي شنو و طوالي دخلت المطبخ شلت ليها مويه و جبتها ليها، شالتها شربت منها و قالت لي بارده شديد، زيدتها ليها مويه عاديه، شربتها و سقت بتها، قالت لي عمتي سنيه قبيل جاتك هنا لشنو؟ قبيل و أنا طالعه شفتها دخلت بيتك! قلت ليها دا بيت ولدها و ما بتحتاج سبب عشان تجي ليهو!
قالت لي عارفه لكن هي صراحة ما بتجي إلا لو في حاجه! قلت ليها ماف حاجه، قالت لي والله يا ريله يا اختي جيتك ناصحه لكن شكلك كلامي ذاتو ما دايراهو، المهم استأذن، قلت ليها لا لا عليك الله اقعدي يا هنادي و ما تزعلي مني، قالت لي بري والله، الله لا جاب الزعل، ماشه والله خليت يامن راقد محموم، قلت ليها سلامتو يموني مالو كمان! قالت لي عندو حمه إلا يجي ابوهو بعدين يوديهو الدكتور، المهم شالت بتها و مشت و أنا بقيت أعاتب في نفسي لمن حسيت إني رديت ليها رد ناشف، بس هي كمان عارفه البير و غطاها و أكيد عارفه عمتي سنيه جات ليه فماف داعي تسأل و إذا عايزا تنصحني مفروض تقول لي الكلام عديل بس هي بتتغابى و بتعمل نفسها ما فاهمه حاجه و هي ماف حاجه بتفوتها!!
المهم المسا لمن يوسف جا و دخل الخضار في التلاجه اكتشف انها فاصله، طبعاً أنا كنت معاهو في المطبخ و بعاين ليهو بطرف عيني، ما سألني و فهم إنو دي أمو، طوالي وصل التلاجه و طلع طوالي، قايلاهو دخل جوه بس لمن سمعت صوت الباب عرفتو طلع برا، ما ختيت في بالي إنو ح يمشي بيتهم عشان يتكلم مع أمو، كنت قايله إنو كل ما هي تجي تفصلها هو حيوصلها و يستمروا كدا، ما عرفت إنو اتجادل مع أمو بخصوص التلاجه إلا تاني يوم لمن جاتني هنادي تشمر لي، لقت معاي نفحات بنشرب في الجبنه، قعدت و كبينا ليها معانا جبنه، قالت لي عاد امبارح ما شفتي الحصل ولا يوسف حكى ليك، قلت ليها يحكي لي شنو؟؟
ضحكت و قالت لي أمبارح جا اتشاكل مع أمو و قال ليها ليه بتفصلي التلاجه دي و و و ...و هي انفعلت و جاطت شديد، قالت ليهو مرتك حقاره ساي كدا بتشغل الأجهزه الكهربائية و بتطلع من البيت تحوم حوامتها، هسي دي خساره ولا ما خساره!! قال ليها مش مشكلتك قروش كهربه؟؟ تمام أنا بديك الضعف و تاني ما تفصلي لي أي جهاز في بيتي☺️
طبعاً زعلت زعل بعد ما هو مشى و قالت انتِ حرشتيهو عليها و إنو هو بقى ما بسمع كلامها و برد عليها، غيتو رمتها فيك و قالت انتِ السبب، قلت ليها والله العظيم ما حصل طلعت من البيت و خليت المكيف شغال! عشان كلامها دا المراوح ذاتا قاعده أقفلها، التلاجه بس البتكون موصله و دا الطبيعي! نفحات قالت لي نسيبتك دي مستهبله ساي والله، ياخ قولي طلعتي و خليتي الأجهزه كلها شغاله المشكله وين مش دافعين حق الكهربه؟! و مش دا بيتك و انتي حره!! و بعدين هي ذاااتا وينا الأجهزه االبتتكلم عنها دي؟ ياهو مكيف واحد و غساله و مكوه بشتغلوا ساعات معدوده و الشاشه أكيد ما بتستهلك كهربه كتيره! والله كل الحاجات الفي بيتك دا ما بتستهلك كهربه كتيره، هي ما شايفه الأجهزه العندها؟؟ 4 مكيفات شغالات اليوم كلو و برضو الغساله برموا فيها الملابس و بخلوها لاااافه كدا لمن تقول بس و دا غير التلاجتين الفي المطبخ، غيتو جنس استهبال و حركات! الله يعينك على المرا دي يا ريله، طبعاً أثناء ما نفحات بتتكلم أنا كنت بحاول أسكتها، مره أغمز ليها و مره ألكزها و هي ما شغاله بي! هنادي حتشيل الكلام دا زي ما هو أو ممكن تزيد عليهو و حتمشي تقولو لعمتي سنيه!.... فجأه سمعت صوت الباب و بعدو طوالي يوسف جا داخل! طبعاً عيونو كانت واقعه و التعب باين عليهو، هنادي قالت ليهو يوسف مالك عيونك دي واقعه كدا و الليله الجابك بدري شنو؟! قال ليها مصدع و طوالي دخل جوه، نفحات قالت لي أمشي شوفيهو أنا ماشه البيت بعد دا، قلت ليها لا لا عليك الله أقعدي، قالت لي قاعده معاك من قبيل، ماشه آخد لي نومه و اقرا شويه، هنادي قالت ليها أرح أنا ذاتي طالعه عشان ذاتو ما نزعج يوسف، المهم قدمتهم لحد الباب و جيت راجعه ليوسف لقيتو راقد، قلت ليهو أخدت مسكن؟؟ قال لي لا، مشيت جبت ليهو مسكن و كباية مويه، بلع المسكن و نام، بعد صلاة العصر جهزت غداي و جيت داخله عشان أشوفو لقيتو لسه نايم، صراحة خفت عليهو، قربت منو و اتأكدت إنو بتنفس، ختيت يدي على جبينو لقيتو مولع نار! جبت مويه و قطعة قماش و عملت ليهو كمادات، فتح عيونو و قال لي الساعه كم؟؟ قلت ليهو 4 و حاجه، قال لي معقوله نمت للزمن دا! ما صليت الضهر، قلت ليهو شكلك تعبان شديد، أحسن تمشي الدكتور، قال لي لا ما بحتاج و طوالي قام و جا تاني بعد ما اتوضا صلى الضهر و العصر و تااااني جا رقد، قلت ليهو يوسف حالتك دي ما عاجباني خلينا نمشي الدكتور! قال لي خايفاني أموت و تترملي و انتِ صغيره ولا شنو!
طبعاً لمن قال لي كدا قلبي عمل شححح و حسيت بخوف كبير و اتخيلت إنو حصلت ليهو حاجه و مات، مع إنو مجرد خيال أو فكره خطرت على بالي بس دموعي طوالي جات نازله، لمن هو استغرب فيني، طوالي قمت وطلعت برا و أنا بمسح في دموعي....
طبعاً كلام يوسف شيلني هم، بقيت كل دقيقتين أجي أشوفو و اطمن عليهو، بديهو في العلاجات البلديه لأنو ما عايز يمشي الدكتور، طبعاً لحد الساعه10 بليل و هو بنفس الحاله، قال حـ يرقد في الحوش و طلع سريرو برا و أنا ما قدرت أنوم، كل ما أغمض بقول يمكن يحتاج حاجه و ما يلقاني جنبو أو يمكن وضعو يسوء بليل و أنا بعيده منو و تحصل ليهو حاجه، قلبي ما ريحني فطوالي طلعت برا و قعدت في طرف سريرو، فكرت أطلع لي سرير بس السراير تقيله و ما عايزا أصحيهو و أقول ليهو تعال طلع معاي سرير أو طلعو لي، جبت فرشه فرشتها جنب سريرو و جبت لحاف و بطانيه و جيت رقدت و بقيت مقبله عليهو و كل ما أشوفو اتحرك برفع راسي، يمكن ساعه كامله و أنا براقب فيهو لحد ما في الآخر النعاس غلبني و غمضت عيوني، لمن صحيت صحيت لمن حسيت بيد على كتفي بتهزني و صوت يوسف و هو بقول لي ريله يا ريله!
"الأمان هو الشعور الذي يمنح الحياة طعمها الحقيقي، وهو أغلى ما يمكن للإنسان أن يبحث عنه في علاقاته. أن تجد شخصًا يُحبك كما أنت، بضعفك وقوتك، بفرحك وحزنك، هو نعمة لا تُقدّر بثمن. الأمان يعني أن تتحدث دون خوف من أن تُساء فهمك، أن تعبّر عن مشاعرك دون أن تُحاسَب، وأن تكون عفويًا دون أن تضطر لارتداء أقنعة تُخفي حقيقتك "
لكاتبه
يتبــــــــــــــــــــــــــــــــــــــــــع..