رواية ريله الفصل الثالث 3 بقلم مها حولي الزاكي
صحيت مخلوعه و قلت ليهو بلهفه يوسف في شي واجعك؟؟ قال لي لا بس انتِ نايمه هنا ليه، قومي خشي جوه، قلت ليهو لا عايزا أنوم هنا، قال لي خلاص حأطلع ليك سرير وين المفتاح؟؟ قلت ليهو لا ما تطلع لي أي سرير أنا هنا مرتاحه! ختيت يدي على جبينو و قلت ليهو حرارتك لسه مرتفعه! لو كان سمعت كلامي و مشيت قابلت الدكتور كان أفضل، قومني و قعدني على سريرو و قال لي نومي هنا و أنا بنوم في مكانك، قلت ليهو لاااا ياخ انت مالك و مالي أنا عاجباني الرقده هنا!! قال لي ما تناقشيني، طوالي قمت و مشيت رقدت على لحافي، قال لي ريله بطلي عواره و تعالي نومي هنا، قلت ليهو أبيت و طوالي اتغطيت بالبطانيه، شويه كدا حسيتو جا رقد جنبي، لمن شلت الغطى عن وشي لقيت وشو قصادي، قال لي عشان تكوني مرتاحه و بالك ما ينشغل علي، قلت ليهو منو القال ليك إني شاغله بالي بيك؟؟ قال لي تصرفاتك هي القالت لي و أصلاً أنا عارف، لمن دموعي جات نازله مسحها لي و قال لي جنك بكى ، براك بتخوفي نفسك علي، ريله أنا كويس فإتطمني و نومي، ختيت راسي على صدرو و غمضت عيوني و حاولت أطمن قلبي عليهو، طبعاً الموقف دا و كلام يوسف معاي و قربو مني ذكرني بأيامنا الأولى و نحنا عرسان، كان تعاملو حلو و لطيف معاي و ما ببعد عني ثانيه و وين ما أمشي بجي لاحقني و بحب دائماً يقعد جنبي في أي مكان حتى في بيت أهلو، بس بعدها اتغير بسبب قصة الحمل دي و بقى جافي في تعاملو معاي و نادراً ما يحصل بيناتنا موقف زي دا، المهم قلبي اتطمن شويه فنمت فتره من الزمن مرتاحه لحد ما جاتني صحيه كدا و ما لقيت يوسف جنبي، قمت مخلوعه و عاينت يمين شمال شفتو في نهاية الحوش بستفرغ، مشيت عليهو بإستعجال و لمن وصلتو بقيت أقول ليهو يوسف مالك حاسي بشنو و دخلت فيني خوفه كدا ما عاديه لمن أطرافي بدت ترجف و بقيت أقول ليهو اعمل ليك شنو، أجيب ليك شنو، واي ما عارفه اعمل شنو، اتصرف كيف يا يوسف، خت يديهو على أكتافي و قال لي بحده:ريله أنا كويس انتِ المالك!...ساقني و مشى بي على السرير قعدني و قعد و قال لي هسي بقيت أحسن بعد الإستفراغ، ما قلت ليهو حاجه، كانت في دموع على جدران عيوني و حسيت بحشرجه في حلقي عشان كدا ما اتكلمت عشان ما أبكي! قال لي وين المفتاح؟؟ طوالي نزلت تحت للحاف الكنت راقده فيهو و طلعت المفتاح من تحتو و قلت ليهو عايز شنو؟؟ قال لي البرد زاد أدخلي نومي جوه، قلت ليهو معاي بطانيه! قال لي ياخ انتِ ما بتتغطي كويس، أنا الليل كلو أغطي فيك، قلت ليهو اعمل ليك حاجه تاكلها أو تشربها؟؟ قال لي لا ما عايز شي، طوالي مشيت فتحت، المظله و منها دخلت المطبخ و عملت ليهو نشا، طبعاً هو الوقت داك دخل لحافي و الفرشه الكنا نايمين فيها، لمن جا داخل المطبخ لقاني ببرد ليهو في النشا، كبيتو في كبايه و إتلفت عليهو و قلت ليهو أشربو دافي، قال لي أنا مش قلت ليك ما عايز حاجه؟؟ ما اشتغلت بيهو، جيتو و مسكتو الكبايه و قلت ليهو انت من قبيل ما اكلت شي فأشرب النشا دا عشان يعوضك، شربو و بعد خلصو قلت ليهو أديك تاني؟؟ قال لي ياخ الكبايه دي أنا شربتها بسلة روح تقولي لي أديك تاني! المهم أرح نومي بعد دا، المهم طلعت من المطبخ و خليتو بقفل فيهو، لمن طلعت برا لقيت الفرشه و اللحاف ماف، لمن إتلفت لقيتو في وشي، قال لي خشي نومي جوه، قلت ليهو يوسف ما..... قاطعني و قال لي ريله اسمعي الكلام، أنا كويس يعني كويس مالك عنيده كدا و بتحبي المبالغه!؟!!
طبعاً كلامو زعلني و حسسني إنو خوفي عليهو ما عندو أي قيمه عندو، أصلا هو كدا و دا طبعو و عمرو ما حـ يتغير، غلطانه أنا الخليت خوفي عليهو يسيطر علي و يتحكم في تصرفاتي و يحسس يوسف إني مُبالغه!!
عن سكات دخلت المظله و رقدت في أقرب سرير، جا و قال لي نومي جوه الغرفه، بطانيتك هناك، ما رديت عليهو، طوالي دخل الغرفه جابها لي و غطاني بيها و طلع من المظله و قفل بابها، والله زعلت شديد لأنو هو دائماً بحسسني إني ببالغ ،و لو تصرفي دا بالجد كان مبالغه فالحاجه دي ما بيدي والله، هو دائماً بتعامل معاي ببرود و لمن أنا افك الجمود الحاصل في علاقتنا و أظهر ليهو مشاعري و خوفي عليهو بلقاهو بصدني بطريقه مباشره أو غير مباشره، طبعاً بعد دا كلو قلبي ما ريحني و كل ما أغمض بفتح عيوني تاني و بعاين بشباك المظله، لحد الصباح أنا ما نمت كويس و أول ما طلعت أصلي لقيتو صلى فإتطمنت شويه بس نهاااي ما اتكلمت معاهو ولا قلت ليهو بقيت كيف، المهم عملت الشاي و معاهو زلابيه و جبتو ليهو في المظله و أنا ساكته، قال لي ما عايزا شاي؟؟ قلت ليهو ما عايزا، تاني لا اتكلمت معاهو لا اتكلم معاي، جهز نفسو و قال ماشي الشغل، قربت اتكلم و اقول ليهو ما تمشي بس ما حـ يسمع كلامي و حيقول عني ببالغ! المهم أول ما هو مشى بديت أنضف و أرتب البيت بس لسه كنت مقلقه على يوسف، قلت في نفسي ياااخ ريحي نفسك، بما إنو صحى كويس و جهز نفسو و مشى الشغل معناها كويس!
المهم زي الساعه 10 كدا جهزت فطوري و قلت أمشي أفطر مع ناس حبوبه النخيل، لي أيام ما مشيت عليهم، المهم شلت فطوري في عمود، أول ما فتحت الباب لقيت ولد إزدهار في وشي عمرو 9سنوات، قال لي ريله أمي قالت ليك لو سويتي حاجه أدينا أبوي ما خلى ليها مصاريف، قلت ليهو كويس، دخلت معاهو جوه أديتو ملاح و كيس عيش و كيس تاني فيهو سلطه، المهم بعدها قفلت البيت و طلعت معاهو، هو مشى بيتهم و أنا مشيت بيت ناس حبوبه النخيل و فطرت معاهم، خالتو نبيله قالت لي مشيتي وين ليك يومين ما جيتي طاله علينا! والله بسأل منك نفحات ساي، حبوبه النخيل قالت ليها نحنا ذاتنا ما مشينا عليها، قلت ليهم قاعده والله بس أمبارح يوسف دا كان تعبان فما طلعت من البيت، قالوا لي سلامتو مالو كمان، قلت ليهم حمى و صداع، أمبارح اليوم كلو حرارتو ما نزلت و بليل استفرغ حتى ارتاح شويه، حبوبه النخيل قالت لي سلامتو والله، هسي مشى الشغل ولا قاعد؟ قلت ليها لا مشى....المهم فطرنا و قعدت اتونس معاهم لحد ما نفحات جات راجعه من الجامعه، قالت يا سلاااام ريله السمحه معانا بيجاي عشان كدا البيت منور، ضحكت و قلت ليها اها كيف عامله مع الإمتحانات ولا لسه ما بدت؟ قالت لي اليوم كان أول امتحان و الحمدلله كان كويس، قلت ليها بالتوفيق يا زوله، المهم نفحات بعد ارتاحت شويه جابت الكانون و بدت تسوي في الجبنه و أنا بتثائب ساي، خالتو نبيله قالت لي شكلك نعسانه، حبوبه النخيل قالت ليها بتكون ساهرت أمبارح مع يوسف العيان دا، نفحات قالت لي صحي؟؟ مالو يوسف، قلت ليها حمى و صداع شفتي من لمن جا داخل لمن كنتوا معاي انتِ و هنادي، قالت لي سلامتو، قلت ليها الله يسلمك، قالت لي خلاص مسافة أعمل الجبنه أخدي ليك نومه، غمضت عيوني زي 5 دقائق كدا و فتحتهم لمن سمعت صوت الباب، نفحات قالت يااااخ دا منو البدق الباب بالطريقه دي، مشت فتحت الباب و جات داخله مع يامن ولد هنادي، قال لي ريله قالوا ليك تعالي عمو يوسف عيان، طبعاً اتخلعت و طوالي قمت جاريه و التوب دا ما لبستو كويس إلا لمن طلعت برا و وراي نفحات و خالتو نبيله بتكلموا معاي بس ما جايبه ليهم خبر، والله من الخلعه جريت حفيانه، قلت خلاص معناها يوسف دا تعب شديد و حالياً في لحظاتو الآخيره عشان كدا رسلو لي، وصلت بيتي بحيل ميت دخلت بس ما لقيت زول، يامن جا داخل وراي و قال لي ما هنا في بيت حبوبه، طوالي طلعت و مشيت بيت عمتي سنيه و أنا خاته يدي على قلبي،لمن وصلت البيت أول ما دخلت الهول شفت يوسف راقد و هنادي و عمتي سنيه و إشراقه واقفين في راسو، في اللحظه ديك خلاص حيلي مات، مشيت عليهم و قلت ليهم يوسف مالو، مالو يوسف، ختيت يدي على صدرو و قلت ليهو يوسف سامعني انت، أمو طوالي زحت لي يدي و قالت لي عايزا تتأكدي إذا مات ولا لا مش! خالتو نبيله جات داخله و قالت يا ناس يوسف مالو! هنادي قالت ليها عيان زي ما شايفه يا خالتو نبيله، اتصلنا على إلياس و هسي حـ يجي عشان يودي أخوهو المستشفى، نفحات جات و ختت لي شبشبي، لبستو و قعدت في طرف السرير الراقد فيهو يوسف و أنا لسه يدي على قلبي و بدعي إنو ما يصيبو مكروهـ، هنادي قالت لي كنتِ وين انتي يوسف جا تعبان و ما لقاك في البيت فـ جا لأمو؟! نفحات قالت ليها ولدك جا ناداها من بيتنا يعني انتِ عارفه هي وين، قالت ليها يامن دا أظنو لف ليها البيوت كلها لحدي ما لقاها في بيتكم لأني رسلتو من قبيل، قالت ليها من البدايه كنتِ تقولي ليهو يجي بيتنا، يعني معقوله يمشي يلف البيوت البعيده و ما يدخل بيتنا القريب! طبعاً هنادي اتغاظت و كانت حتتكلم بس خالتو نبيله قالت يا بنات دا ما وقتو و قالت لنفحات خليك ساكته، عمتي سنيه جات فجأه كدا مسكتني من يدي و قومتني من جنب يوسف و عملت نفسها عايزا تعصر ليهو رجلينو، و يوسف مره يغمض و مره يفتح، فجأه كدا إلياس جا و طوالي قوم يوسف من السرير و طلع بيهو برا و نحنا وراهو، ركبو في العربيه و لمن كنت حأركب عمتي سنيه جات زحتني و ركبت هي و قفلت الباب و قالت لإلياس اتحرك، قلت ليهو لا دقيقه و اتحركت بسرعه و جيت بالباب التاني، أمو بنهره كدا قالت ليهو أتحرك ياخ منتظر أخوك يموت و إلياس طوالي اتحرك قبل ما أنا امسك مقبض الباب و افتحو، قعدت أبكي بس، حبوبه النخيل قالت عليك الله شوف المراه الكعبه دي! هنادي قالت ليها عمتي خايفه على ولدها و زعلانه من ريله عشان ما كانت معاهو، نفحات قالت ليها ريله دي أمبارح الليل كلو مساهره معاهو و انتوا خبر ما جايبنوا، مالا ما زعلت و قالت انكم ما شغالين بولدكم؟؟!
خليتهم واقفين بتكلمو و رجعت بيتي شلت لي قروش و لمن كنت طالعه ناس حبوبه النخيل جو داخلين و قالوا لي ماشه وين، قلت ليهم ماشه أحصلهم، نفحات قالت لي عارفاهم مشوا بيهو وين؟ قلت ليها حأتصل على إلياس، خالتو نبيله قالت لي كدي انتظريهم شويه كدا يتصلوا و يقولوا لينا الحاصل شنو و لو في شي كلنا بنمشي معاك، قلت ليها و أنا ببكي والله ما بقدر أنتظرهم يا خالتو نبيله ما بقدر والله، حبوبه النخيل قالت لي يا حليلك والله، لو قعدتي ما حترتاحي عشان كدا أمشي حصليهم و سوقي معاك نفحات و ان شاء الله يوسف ما بتجيهو عوجه، المهم في الآخر اتصلنا على إلياس و قال لينا اسم المستشفى و مشينا ليهم أنا و نفحات، لقيناهم عملوا ليوسف الفحوصات و عمتي سنيه ما مديه زول فرصه عشان يقعد جنبو أو يتكلم معاهو، من جيت تحمر لي و شاماني شديد و نظراتها بتقول لي انتي السبب!
المهم بعد طلعت الفحوصات لقينا إنو يوسف عندو ملاريا و إلتهاب، و حمى الضنك، المهم أخوهو شال ليهو العلاجات و رجعنا البيت كلنا، طبعاً امو حلفت ما يرجع بيتو، قالت يقعد معاها في البيت، أنا خشمي ما فتحتو و هي بقت ترمي لي في الكلام داخله و طالعه شغاله تقول جاي تعبان روحو طالعه و ديك زي كلب الحر دقيقه ما بتقعدها في البيت... طبعاً بتقول الكلام دا و هي ماشه و أنا همي يوسف و ما شغاله بكلامها، طبعاً نفحات جات معانا لحد البيت قعدت شويه و مشت، طبعاً يوسف كان مرقد جوه غرفة عمتي سنيه لمن دخلت البرنده و وصلت غرفتها قبل ما أدخل هي جات طالعه منها، وقفت لي جنب الباب و قالت لي يوسف نايم و ما عايز أي إزعاج، قلت ليها عايزا أشوفو بس، قفلت باب الغرفه و قالت لي بحده: قلت ليك نايم! قلت ليها عمتي سنيه عليك الله خليني بس أشوفو بقى كيف! قالت لي عليك الله خلي استهبالك دا، كان صحي ولدي دا هاميك للدرجه دي ما بتطلعي تحوسي و تكوسي و هو عيان! قلت ليها هو مشى الشغل و الصباح قال لي إنو كويس! من وين حأعرف إنو ح يتعب و يجي راجع! قالت لي لو إنتي مرتو جد جد كان حسيتي و عرفتي....غمضت عيوني شديد و كظمت الغيظ و لمن فتحتهم قلت ليها بهداوه : عمتي سنيه يوسف من أمبارح كان تعبان و ....الخ حكيت ليها الحصل و قلت ليها لمن جا الصباح قال كويس و جهز نفسو و مشى الشغل و انتي عارفه ولدك عنيد و ما ح يسمع مني لو قلت ليهو أقعد ما تمشي! ... فجأه جات هنادي و قالت اها يوسف بقى كيف و اتحركت عشان تفتح الباب و تدخل الغرفة بس عمتي سنيه وقفت ليها في وشها و قالت ليها ما شايفه الباب دا مقفول؟ يوسف نايم و ما عايز أي إزعاج، هنادي قالت ليها ووووبعلي يا عمتي مالك الليله صعبه كدا! عمتي سنيه ما ردت عليها.... قالت خلاص بجي بعدين بشوفو... قالت كدا و طلعت و أنا طلعت وراها لمن اتأكدت إنو عمتي سنيه ما ح تخليني أدخل ليهو، المهم قعدنا في المظله أنا و هنادي و إشراقه لحد ما جات حبوبه النخيل و خالتو نبيله، سلموا علينا و قالوا لينا اها يوسف بقى كيف و حبوبه النخيل قالت ماشه تشوفو، خليتهم بعد دخلوا جوه البرنده بعد داك لحقتهم لأني عاااارفه عمتي سنيه ما بتقدر تقول لا لحبوبه النخيل، فعلاً لمن خالتو نبيله و حبوبه النخيل جوها جوه فتحت ليهم الباب و أول ما عملت كدا أنا جيتهم داخله تووووش قبل ما هي تقفلو، طبعاً عاينت لي عشره عشره بس ما قدرت تقول شي، يوسف كان راقد فلمن نحنا جينا داخلين طوالي قام قعد، حبوبه النخيل قالت ليهو سلامتك يا ولدي خليك راقد و قعدت في طرف سريرو و بقت تقول ليهو حيييا أنا الصابك شنو يا ولدي، خالتو نبيله برضو كفرت ليهو و قعدت، أما أنا قعدت جنبو في الطرف التاني من السرير و قلت ليهو يوسف بقيت كيف هسي؟؟ قال لي بصوت تعبان: كويس الحمدلله، حبوبه النخيل قالت ليهو والله خوفتنا عليك شديد، بالذات ريله دي، البت لمن قالوا ليها تعالي يوسف عيان والله جرت حفيانه و التوب جزو في الراس و جزو واقع، البنيه يا حليلا كانت ح تجن عديل، جننت البت و عذبتها معاك يا يوسف.... يوسف عاين لي و ابتسم و قال ليها والله يا حبوبه النخيل براها مخوفه نفسها و مقلقه أكتر من الازم، أنا كويس الحمدلله و التعب و المرض ما حاجه جديده، قالت ليهو ما حاجه جديده لكن الواحد بتبقى ليهو شينه و صعبه لمن يشوف زولو البريدو عيان.... طبعاً حبوبه النخيل دي خجلتني جنس خجل و لسه مواصله و عمتي سنيه دي قربت تطرشق من الزعل، قاطعت كلام حبوبه النخيل و قالت ليوسف دا مش موعد دواك؟قال ليها لسه باقي زي نص ساعه كدا، قلت ليها أدويتو وين؟؟ طنشت سؤالي و قالت ليوسف أسوي ليك شنو تاكلو؟؟ قال ليها والله ما عايز أي شي، خالتو نبيله قالت ليهو لا لا كلامك دا ما ينفع، حتى لو ما حاسي بالجوع لازم تاكل عشان تقاوم المرض، عندي قرع بسويهو و بجيبو ليك بنفع لحمى الضنك دي، المهم بعدها هم طلعوا و أنا بقيت قاعده مع يوسف، عمتي سنيه جات راجعه و قالت لي خليهو يرتاح و قالت ليوسف نوم أخد راحتك، قال ليها ما نعسان، قالت ليهو حاول تنوم و انتي يا ريله تعالي عايزنك في المطبخ، قلت ليها هسي بجي، أدتني نظره كدا و طلعت، قلت ليهو يوسف قلبي كان ح يقيف لمن يامن جاني في بيت ناس خالتو نبيله و قال لي قالوا ليك تعالي عمو يوسف تعبان، قال لي انتي من امبارح مقلقه، قلت ليهو لي حق أقلق انت ما شايف نفسك ولا قايلني ما حاسه بتعبك و إرهاقك و مرضك! قبيل كنت عايزا أقول ليك ما تمشي الشغل بس عارفاك عنيد و ما ح تسمع مني.... طبعاً بقيت اعاتب فيهو عديل، قلت ليهو من يومك راسك ناشف و اتجاهك واحد و.... سكت لمن مسك يدي و باسها، قال لي ريله السمحه! روقي! أنا كويس صدقيني و لو ما كويس حأبقى كويس ان شاء الله، انتي قايلاني ما حاسي بيك ولا ما عارف كمية خوفك و قلقك علي و الإحساس المرير البتحسي بيهو لما تشوفيني تعبان أو عيان أو حتى زهجان ساي!..... طبعاً لمن قال لي كدا قلبي عمل شحححح و بقى يدق بسرعه ، طولت أنا من الكلام دا! قلت ليهو بصوت متحشرج: لو حصل ليك شي يا يوسف أنا بمـ.....خت اصبعو على خشمي و قال لي بعد عمر طوييييل طوووويل شديد يا ريله و ان شاء الله تعيشي لمن تزهجي، قلت ليهو ما عايزا أعيش في حياة انت ما فيها! ضحك و قال لي شكلك متأكده و متيقنه عديل إني حأموت!.... قلت ليهو يوسف عليك الله ما تقول كدا و تقطع قلبي! قال لي دا كلامك انتي!
قلت ليهو خلينا من الكلام الكتير دا ، لاااازم ترتاح، قلت كدا و وقفت على حيلي، قال لي ماشه وين؟! قلت ليهو ماشه المطبخ أشوف الناقص شنو و اعملو، قال لي ما تتأخري يا ريله! طبعاً اللحظه ديك حسيت بإحساس عجيب! المرض دا جد جد أثر في يوسف! قال لي ما تتأخري و هو أنا كنت كل يوم قاعده قدامو بطلع بخليني في البيت و لو جا بدري من الشغل بقعد في الميدان أو مع ناس أمو! ... قلت ليهو حاضر و طلعت، لمن دخلت المطبخ لقيت هنادي، قلت ليها محتاجه مساعده في شنو؟؟ جات عمتي سنيه و قالت لي بعد شنو ؟ أنا مش ناديتك من قبيل؟؟ هنادي قالت لي الغدا شبه بقى جاهز، في سلطه لو حابه قطعيها، عمتي قالت ليها خليها بقطعها اناااا.... قلت ليها خليها أنا حأقطعها، ما ردت علي، طلعت السلطه غسلتها و بدت تقطع فيها! احترت و ما عرفت أعمل شنو!
المهم قريب المغرب كدا عمو سيد جا داخل و يمنى جات بعدو بـ دقائق، طبعاً ما كانوا عارفين، و عمتي سنيه دي أظنها زعلانه من عمو سيد عشان كدا ما كلمتو و قبيل لمن هنادي كانت ح تتصل و تكلمو هي منعتها، يمنى بعد دخلت شافت أخوها جات و قالت يخوانا مالو يوسف الحصل ليهو شنو أحكو لي بالتفصيل! هنادي قالت ليها مشى الشغل و جا تعبان و إلياس جرى بيهو المستشفى طوالي، عمتي سنيه قالت ليها يا حليلو جا تعبان عينو طالعه مشى بيتو ما لقى زول، لمن جانا داخل والله العظيم إلا أنا و إشراقه ثبتناهو جنب الباب و سندناهو و دخلنا بيهو جوه! ... يمنى قالت لي و انتي كنتِ وين ان شاء الله!!؟ عمتي سنيه قالت ليها دي اسكتي خليها، دي لو ما لفت و حامت ما بترتاح، يمنى جدعت شنطتها و جات وقفت قدامي و هي خاته يدينها في نصها و قالت لي لكن ما ممكن معاك!! متمنيه مره وااااحده بس تكوني مراه زي باقي النسوان و تقعدي في بيتك! هسي يوسف دا لو كان وقع في الشارع أو من البيت ما قدر يطلع و يجي لأمي كان الحيحصل شنو و انتِ ما قاعده و ماف زول جايب ليهو خبر! عليك الله حوامتك الكتيره دي خليها، عامله زي عربية النفايات لافه في الأحياء كلها و..... طبعاً سكتت لمن جا عمو سيد و نهرها، قال ليها انتي حيوانه ولا شنو احسن تحترمي نفسك! طبعاً انفعلت و قالت ليهو أنا حيوانه يا ابوي؟؟ حيوانه عشان قلت الحق؟!.... طبعاً طوااالي عمتي سنيه وقفت معاها و انفعلت أكتر منها و قالت ليهو وين الغلط في كلامها ما صحي مرت ولدك هااامله و لافه زي المروحه و بيتها دا التقول زارعين ليها فيهو شوك! أصلا انت السبب، بتكوس المصايب و بتجيبها لينا، يوسف دا لو كان خليتني أنا عرست ليهو كان هسي مرتاح و ولدو جاري قدامو!!.... طبعاً لمن قالت كدا أنا حسيت بخنجر في قلبي! طوالي طلعت و مشيت بيتي و قعدت أبكي لحد ما سمعت صوت تلفوني و المتصل كان ياسر أخوي اصغر مني، متأكده إنو دي أمي متصله علي بتلفونو، ما رديت عليها لأنو لو سمعت صوتي ح تعرف إني كنت ببكي و ح تخاف و تقلق علي أكتر و ح تكلم أبوي، ما رجعت ليها إلا بعد اكتر من نص ساعه، كنت فيها هديت شويه، اتصلت على ياسر اخوي، رد علي هو ، سلم علي و أداني أمي، قال لي من قبيل بتنق فيني عشان اتصل عليك، المهم أداني أمي و اتكلمت معاها و سألتها عن ناس ابوي و حبوبه و عماتي، قالت لي كلهم كويسين الحمدلله، سألتني عن يوسف و نسابتي، قالت لي ان شاء الله كلهم كويسين، قلت ليها كويسين الحمدلله لكن يوسف دا..... و حكيت ليها، قالت لي يا حليلو والله، سلامتو ألف سلامه لو جنبك أديني ليهو اسلم عليهو، كذبت و قلت ليها هسي هو نايم لأنو لو قلت ليها قاعد هناك في بيت أمو ح تشك و تبدا تسأل، قالت لي خلاص سلمي عليهو و عليك الله يا بتي اهتمي بيهو و ما تقصري منو لا هو لا نسابتك، شيليهم في راسك و اعتبريهم أهلك، عارفاك ما محتاجه توصيه لكن أنا اتعودت أوصيك، قلت ليها حاضر يا أمي... طبعاً هي متعوده توصينا أنا و أخواتي، حتى لو هي متأكده اننا ما بنقصر برضو بتوصينا، المهم بعد قفلت منها، مشيت بيت نسابتي عشان يوسف و بس، المره دي ما اتكلمت ولا عاينت لزول، دخلت تووووش ليوسف و أنا جايبه ليهو معاي حاجه خفيفه و مفيده عشان ياكلها و جايبه معاي القرع العملتو ليهو خالتو نبيله، لاقتني في الشارع و أدتني ليهو، كانت جايباهو ليهو بنفسها بس لمن لقتني أدتني ليهو، المهم قعدت معاهو زي نص ساعه كدا و لمن قمت طالعه قال لي ماشه البيت؟؟ قلت ليهو ايوه، قال لي دقيقه أنا ذاتي ماشي، قلت ليهو لا يوسف انت تعبان! خليك راقد و ما ترهق نفسك، قال لي لا أنا كويس و وقف على حيلو و تاني قعد، قلت ليهو شاااايف، انت لسه تعبان فخليك هنا، لمن وقف على حيلو للمره التانيه عمتي سنيه جات داخله و قالت ليهو ماشي وين؟! قال ليها البيت، قالت ليهو و دا ما بيتك؟؟ والله العظيم ما تمشي يا يوسف! قال ليها يا أمي أنا كويس و راجع بيتي في شنو!! عاينت لي و قالت لي انتي قلت ليهو أرح البيت؟! يوسف هو الرد عليها و قال ليها أنا القلت ليها أرح البيت!!
جا عمي سيد و قال خير في شنو؟! عمتي سنيه ما اشتغلت بيهو ولاااا ردت عليهو، يوسف قال ليهو راجع بيتي، أخواتو جوا و قالوا ليهو انت تعبان اقعد هنا عشان تعبت تاني أو احتجت حاجه بليل تلقى زول معاك!.... طبعا بتكلمو كأني ما حأكون معاهو أو ما ح اهتم بيهو، ما رد عليهم، لبس وقف و لبس شبشبو و هو واااضح عليهو إنو ما كويس، عمو سيد قال ليهو أنا ما بقول ليك ما تمشي بيتك لكن انت والله ما كويس، ريله ما ح تقصر منك أنا متأكد و ممكن تساهر معاك للصباح لكن الأفضل انك تقعد هنا عشان كلهم يهتموا بيك و يتناوبوا عليك، حمى الضنك دي كعبه خلاص و عندها حمى صعبه بتجي بليل، لو رجعت بيتك والله كلنا حنكون مقلقين عليك و بالنا ح ينشغل بيك و طبعاً ما بنقدر نجيك في 24 ساعه و كل دقيقه نجي و ندق ليكم الباب!!
طبعاً أنا حاسه بخوف أهلو و قلقهم عليهو، للسبب دا قلت ليهو كلام عمي صاح يا يوسف، الأفضل انك تقعد هناك لحدي ما تبقى كويس، قال لي خلاص انتي ما تمشي البيت خليك هنا، عمي سيد قال ليهو أكيد، انت قايلني حأخليها تمشي تقعد في البيت براها؟! دا كلام شنو!!
طبعاً أنا ما حبيت فكرة إني أبيت معاهم، عارفه عمتي سنيه ما بتطيقني و أنا ما عايزا أسمع أي كلمه جارحه!
المهم اضطريت أبيت معاهم بس ما مع يوسف في نفس الغرفه، نمت في البرنده مع إشراقه و عمتي سنيه رغم انها متعوده تنوم برا في الحوش بس الليله ديك مخصوص نامت معانا في البرنده! و أول ما تحس بي اتحركت بترفع راسها! ما باقي ليها إلا تقفل الغرفه الفيها يوسف بمفتاح و طبله عشان تكون مرتاحه، طبعاً كانت كل شويه تصحى و تدخل تشوفو و أنا بصحى معاها....
المهم تاني يوم في مواعيد الجبنه كنا كلنا قاعدين في المظله، أنا بعد دخلت اتطمنت على يوسف جيت و بقيت أقلي ليهم في البن و ما شاء الله الجارات كلهم جوا، دخلوا سلموا على يوسف و جوا قعدوا عشان يشربوا الجبنه، أصلا قعدة الجبنه المره دي كانت على عمتي سنيه، حتى ناس حبوبه النخيل جوا و نفحات جات قبليهم، لمن جات قعدت جنب هنادي و يمنى و يمنى طوالي قامت أول ما نفحات قعدت جنبها، طبعاً أنا استغربت لأنو نفحات و يمنى كانوا صحبات شديد و يمنى دي ما كان عندها سيره غير نفحات، الدكان دا بمشوا و بجوا سوا، أصلا هم جيران من زمااان و خالتو نبيله و عمتي سنيه ديل زي الأخوات و أولادهم كبروا سوا، طبعاً أنا لاحظت إنو يمنى و نفحات علاقتهم بقت ما زي زمان في كل مره أقول عايزا اسأل نفحات عن الحاصل بيناتهم بنسى!!.... المهم ولعوا البخور و بدت الونسه، الشابات قاعدت جنبي و أنا بعمل في جبنة الكانون و النسوان الكبار قاعدات بعيد مننا شويه، نحنا جنب باب المظله و هم قاعدين لجوه، المهم شويه كدا سمعنا صوت عمتي سنيه و هي بتقول : اهلا اهلا انفصلوا حبابكم عشره، و كانت بتسلم سلم حاااار كدا لوحده، إشراقه قالت الجا منو يا ربي؟! فجأه جات عمتي سنيه و هي لسه بتسلم و بتقول اتفضلوا.... والله مشتاقين عدييييل يا أحلام!...لمن جوا داخلين اكتشفت إنو الجات دي خالتو أحلام و دي من معارف ناس عمتي سنيه، طولنا ما شفناها، طبعاً البت المعاها من الشبه عرفتها بتها مع انها ما حصل جات، المهم دخلوا و سلموا علينا كلنا، خالتو أحلام ظاهر عليها مرا لطيفه و ظريفه بس بتها حسيتها متعجرفه و متكبره و الحاجه دي كانت ظاهر حتى في طريقة سلامها البايخه، عمتي سنيه قالت للنسوان طبعاً دي أحلام صحبتي بتعرفيها يا نبيله مش، خالتو نبيله قالت ليها اي أحلام منو الما بعرفها، المرا قالت ليها تسلمي والله يا نبيله، المهم قعدوا و إشراقه قامت و ضيفتهم و عمتي سنيه قعدت جنب المرا بقت تتونس معاها و تسألها عن ناس بيتهم، المرا قالت لعمتي سنيه وين إلياس و يوسف طولت ما شفتهم، قالت ليها إلياس دا في الشغل و يوسف يا حليلو عيان راقد جوه عندو ملاريا و إلتهاب و حمى الضنك، المرا قالت ليها حيييا أنا يا حليلو والله، أرح خليني أشوفو، المهم أول ما هم طلعوا البت شالت تلفونها و طلعت برا، أصلا من جات خشمها ما فتحتو و مركزه بس مع تلفونها كأنها ما قاعده مع ناس! بعد ما البت طلعت وحده من البنات قالت ليهم مش دي ملاذ؟؟ ملاذ نبيل الميك اب ارتيست المشهوره يا إشراقه؟؟ إشراقه قالت ليها ايوه ياها ذاتا ملاذ نبيل بشحمها و لحمها، نفحات قالت ليهم طبعاً مفتريه شديد و شايفه نفسها، إشراقه قالت ليها و إفتراها دا زاد لمن العريس خلاها، طبعاً قالوا جاها إنهيار عصبي عديل.... طبعاً البنات الشمار حرقهم و قالوا ليها هي الحصل معاها شنو بالضبط؟؟ نحنا كل العرفناهو من الميديا انها كانت مخطوبه و على وشك الزواج و تاني سمعنا إنو العرس إلتغى!! إشراقه قالت ليهم ااااييي كان خاطبها واحد اسمو مازن و لمن جوا للعرس نط و خلاها، البنات قالوا ليها مباااالغه!! مالو خلاها؟!!
نفحات قالت ليها مازن منو؟؟ نعلو مازن جمال ولد قريبكم داك؟؟ قالت ليها ياااهو ذاتو انتي ما عارفه ولا شنو؟ نفحات قالت ليها بري ما عارفه كنت وين أنا يا ناس! هنادي قالت ليها يا بت لمن عزمونا للعرس و البت كانت طايره من الفرح و ملت الميديا بصورها و كلامها عن تجهيزات عرسها و في الآخر الولد خلاها، ليها حق يجيها انهيار عصبي 😂😂
يمنى قالت ليهم هي ذاتا ما عندها موضوع، مازن دا كان خاطب صحبتها و خلاها و جاها هي و برضو خلاها! مفروض تتعظ و ذاتو كيف ترضى بواحد كان خاطب صحبتها! هو ذاتو حيوان ساي، هنادي قالت ليها هووووي دا ولد أهلك، قالت ليها ولد اهلي و حيوان اها في شنو!! إشراقه قالت ليها ذكريني صحبة ملاذ الكان خاطبها مازن اسمها منو؟؟ يمنى قالت ليها اسمها مها، قالت ليها ايواااا بس المهم انتوا عارفين إنو البت دي حالياً في كندا؟! أول ما مازن خلاها طوالي اتخارجت برا البلد، نفحات قالت ليها بطنها طمت، شينه منو والله يخطبها هي و يخليها و يمشي يخطب صحبتها و صحبتها ترضى بيهو!!
يمنى قالت ليها هسي هو ذاتو قالوا اختفى على الآخر و بقى ما بظهر في المناسبات و الناس نادراً ما تشوفو، حتى في بيتهم ما بنشاف، هنادي قالت ليهو هو وقت عايز البت الأولى مالو خطب ملاذ؟ غايتو الرجال ديل عليهم جنس حركات! الواحد براهو يحوم من بت لبت يمسك دي و يفك دي و لمن تضيع منو وحده بعمل فيها منفسن و قافله معاهو!!
طبعاً أنا كنت بسمع فيهم ساي و ما عارفه مازن دا منو و مها دي منو و ملاذ دي ذاتا ما عرفتها إلا هسي!
فجأه يمنى قالت طبعاً ملاذ نبيل دي أمي كانت عايزاها ليوسف، و يمكن لسه عايزاها، قالت كدا و عاينت لي😊
لمَاذا هـو دون غيّرهَ ؟
= لأنه لَم يتركني يوماً لإكتِئابي ، يعلم كَيف ينقذني مِن نَفسي
لَه طريقته الخاصة في تَرتيب قَلبي
وإِعادتي لِلحياة مَرة أُخرى. ♡🦋
يتبــــــــــــــــــــــــــــــــــــــــــــع.