رواية ريله الفصل السادس 6 بقلم مها حولي الزاكي
المهم عدوا كم يوم كدا علاقتي بيوسف كانت فوق الممتازه، يوم جاتني نفحات لقتني بنضف في البيت، قالت لي حيييا أنا منك ما بتفتري من الشغل الكتير دا! ما باقي ليك إلا تنضفي المراوح! ضحكت و قلت ليها فعلاً نضفتهم، رفعت راسها عاينت للمروحه و قالت لي فظيعه والله! أنا لو مسحت ساي بتعب و بكسل من الباقي! قلت ليها المراوح كانوا مغبرات و في عناكب بدت تبني في أركان الحيط و السقف، ف نفضت الغبار و اتخلصت من بيوت العنكبوت!.... فجأه كدا جات يمنى داخله، سلمت و قالت لي عايزا المكوه حقتك، حقتنا اتعطلت امبارح، قلت ليها كويس و مشيت اجيبها ليها و لمن جيتهم لقيتها بتتشاكل مع نفحات! ... نفحات قالت ليها عايني أنا حركاتك دي ما بتنفع معاي! شكلك عايزا ليك سبب و لقيتيهو! يمنى قالت ليها والله انتي العايز ليك سبب و لقيتيهو ، و خليك عارفه إنو ما أنا البجري ورا زول، و ما أنا البدي فرصه تانيه😊
قلت ليهم بنات بسم الله في شنو؟؟ نفحات!.. يمنى! مالكم جنيتو ولا شنو!؟ كنتوا صحبات و زي الأخوات الصابكم شنو؟!
يمنى قالت لي لا صحبتي لا بعرفها!
نفحات: محسساني إني ميته في صحبتك! يا بت أنا اتجاوزتك من بدري بس انتي الظاهر إنو خصاااامي ليك فارق معاك و مؤثر عليك
_ ههه منو انتي اساسا عشان تفرقي معاي؟ مصدقه نفسك و مدياها قيمه اكتر بكتير من قيمتها المتدنيه الحقيقيه!
= والله زول متدني غيرك هنا ماف، امشي امشي اتعالجي عليك الله و حاولي لو قدرتي تتخطيني زي ما أنا اتخطيتك و شيليني من بالك عشان تعرفي تعيشي حياتك
_ مفتكره نفسك اوكسجين؟ والله أنا شفقانه عليك، شدة ما خصامي حاااارقك بقيتي تحلمي و تتمني إنو فراقك يفرق معاي! عامله سيناريو كامل في مخيلتك عن انك محور حياتي و إني ما قادره اعيش بلاك و إنو انتي اوكسجيني! و المضحك انك مصدقه الوهم دا كلو! عليك الله منو المحتاج علاج، ربنا يشفيك😘
طبعاً أنا هنا اتدخلت و قلت ليهم عيب البتقولو فيهو دا ! مهما كان الحاصل بيناتكم ما مفروض يوصلكم لدرجة انكم تقولو كلام زي دا لبعض! يلا اتصالحوا هسي!
نفحات قالت لي عليك الله يا ريله خلينا منها، أصلا أنا مليت من حركاتها دي، طبعاً طوالي يمنى جاطت و قالت عن نفحات بياعه، و نفحات بقت تقول ليها انتي ما عندك موضوع، جيتي لريله دي مزعلاك و غايظاك شديد، مع انها مرت أخوك بس بتضايقي لمن تشوفيني في بيتها أو بتونس معاها!
قلت ليها شوفي يا يمنى، نفحات دي صحبتك انتي، و كونها بتجيني و أنا بمشي ليهم ما معناه انها باعتك أو فضلتني عليك، و أنا والله ما عايزا أدخل بين أي اتنين و أكون سبب في خراب علاقتكم و..... سكت لمن حسيت نفسي ح استفرغ، ختيت يدي على خشمي و مشيت الوضايه، نفحات جات لاحقاني و هي شغاله لي مالك يا ريله في شنو؟؟ قلت ليها بطني طامه و بديت استفرغ!! يمنى جات و بقت واقفه معانا، نفحات مشت دخلت المطبخ و جابت لي ليمونه، غسلت وشي و ارتحت شويه و شلت منها الليمونه، قالت لي مالك فجأه كدا ؟ قلت ليها ما عارفه بس من قبيل حاسه بطمام، قالت لي و ليك فتره تعبانه و الحاجه دي ظاهره فيك.... ريله انتي حامل ولا شنو؟؟
طبعاً لمن قالت لي كدا اتخلعت مع إنو أصلا دا الكنت بفكر فيهو من فتره بس خفت اتكلم و يطلع كذب أو وهم! ... ما رديت عليها و هي فرحت، يمنى قالت لي مالك ما اتكلمتي؟! قلت ليها ما متأكده.... المهم دخلنا جوه و يمنى مشت طوالي و نفحات كانت فرحانه و بقت تقول لي خلينا نمشي نكشف عشان نتأكد، قلت ليها ما عايزا اعشم ساي، قالت لي ريله والله دا شكلو حمل ظاهر عليك!.... ختيت يدي على بطني و قلت ليها ان شاء الله بس برضو خايفه من العشم!... قالت لي هسي نسيبتك ح تجي، يمنى حتكون كلمة الشعب كلو!
المهم نفحات قعدت تحنس فيني عشان امشي اقابل دكتور و اعمل فحص حمل بس رفضت، المهم هي لمن رجعت بيتهم جات راجعه مع حبوبه النخيل، طبعاً حبوبه النخيل جات فرحانه ضمتني شديد و قالت لي ألف مبرووك يا بتي و ربنا يتمو ليك على خير، طبعاً طوالي عاينت لنفحات! ابتسمت و قالت لي والله من شدة الفرح ما قدرت امسك خشمي، دا خبر ما هين يا ريله، دا اجمل خبر ممكن ينسمع! حبوبه النخيل قالت لي من متين؟؟
قلت ليها يا حبوبه لسه ماف شي مؤكد! نفحات دي ساي استعجلت! نفحات قالت ليها : قلت ليها أرح اعملي فحص حمل عشان نتأكد أكتر لكن رفضت و قالت خايفه من العشم! شوفي يا حبوبه الحمل ظاهر عليها كيف!.... حبوبه النخيل عاينت لي مسافه و ختت يدها على بطني و أنا براقبها بخوف و قلق! شالت يدها و قالت لي ما معروف والله! لكن كدي أمشي افحصي و اتأكدي و ان شاء الله يكون حمل!
طبعاً أنا جواي كان في أحاسيس كتيره ملخبطه، إحساس أمل و عشم و خوف و قلق!
لمن أصروا علي امشي افحص قلت ليهم طيب بس بعد يوسف يرجع، حبوبه النخيل رفعت يدينها فوق و دعت و قالت ان شاء الله يكون حمل، ربنا يرزق يوسف و ريله الذريه الصالحه، ربنا يقر عينك و عينو بقرة عين لا تنقطع، ربنا يفرحكم و يفرحنا معاكم يا ريله ...
فجأه هنادي جات داخله و من الباب تنادي ريله يا ريله ، لمن جات داخله قالت ليك مبروك الحمل، سمعنا قبل شويه، عاد اتلومتي معانا و عمتي سنيه هنديك ليها خليتها زعلااانه و حالفه ما تخت رجلها في بيتك!
قلت ليها هنادي أنا ذاتي ما عارفه و الحمل دا لسه ما مؤكد! قالت لي أجي! في وحده ما بتعرف نفسها حامل ولا لا؟ انتي ما تقولي ما كنت عارفه قولي ما حبيت اكلم زول، عادي بتحصل كتير، النسوان البحملو بعد فتره طويله بدسوا حملهم حتى من أقرب الناس، نظام خايفين من العين و الحسد😊
طبعاً أنا احترت و ما عرفت اقول ليها شنو! لو قلت ليهم ما حامل حيقولو كذابه ما عايزا تكلم زول ، و لو قلت حامل حيقولو ليه ما كلمت زول و المشكله إنو أنا ذاااتي ما متأكده! ايوه لي فتره حاسه بأعراض الحمل بس ما اتحمست لأنو دا البحصل معاي دائماً و لما أمشي اكشف بطلع حمل كاذب و مجرد وهم مني!!
___________________________
_ اسمع هنا يا يوسف أنا البت دي متوقعه منها أي شي إلا انها تدس حملها مني!! ليه ياخ ح أحسدها أنا ولا ح أحقد عليها؟؟ مش دا اصلا الكنت عايزاهو أنا!؟ مش انا اكتر وحده اتمنت تشوف جناك و تفرح ليك ؟ و لمن حصل الكلنا كنا منتظرنو تدسو مني يا يوسف! تدس من أمك؟
= بتقولي في شنو انتي يا أمي!!.... جبتي الكلام دا من وين ! ريله حامل ؟ القال كدا منو ؟
_ ما عارف يعني ولا ما لقيت تبرير مناسب تبرر بيهو سكوتك انت و مرتك لمن ما كلمتوني بالحمل!
= اقسم بالله الكلام دا ما سمعتو إلا منك !.... يعني صح ريله حامل؟ ... هي القالت كدا ؟
_ والله من صوتك و لهفتك دي معناها انت ذاتك ما عارف! أظن مرتك خايفه من العين و الحسد عشان كدا انت ذاتك ما كلمتك، و الليله لو ما يمنى مشت ليها مرسله ما كان عرفنا انها حامل! و شوف بالله حتى بعد ما يمنى سألتها مرتك نكرت و قالت ما مؤكد! أعداءكم نحنا يا يوسف؟! و شوف لحدي اللحظه دي ما جات عشان تكلمني!
= أمي هسي أنا في الشغل و طالع طوالي ماشي البيت
_ كويس
________________________________
طبعاً بقيت قاعده و خاته يدي على بطني و جواي إحساس فرح و إحساس خوف لحد ما سمعت صوت الباب، ظنيت إنو دي وحده من الجيران أو عمتي سنيه جاين يسألو و يحققو معاي في موضوع الحمل دا و يلوموني و يقولو ما كلمتهم!.... أخدت نفس و مشيت على باب الشارع و أول ما فتحتو يوسف طلع في وشي! اتفاجأت لأنو دي ما مواعيد رجعتو، طبعاً عيونو كانت بتلمع و مبتسم ابتسامه مريحه كدا، دخل و قفل الباب و من دون مقدمات باسني على جبيني و ضماني عليهو و هو شغال لي ما قادر أصدق والله، الحمدلله، الحمدلله، مع إنو اتضايقت من نقطة انك ما كلمتيني بس الفرحه ما سايعاني و ما قادر أزعل منك ، دا أجمل خبر سمعتو في حياتي كلها، عارفه أول ما عرفت خليت كل شي و بقيت مارق، اتمنيت لو كان عندي اجنحه عشان اطير و اجيك بيهم بأقصى سرعه! دا اجمل يوم في حياتي، أخيراً، أخيراً ح تتحقق أمنيتي، بت ولد ما مهم، الأهم إنو منك انتي....
طبعاً كان بتكلم بفرحه و لهفه كدا ما عاديه و ما أداني فرصه أوضح ليهو، دخلنا جوه و هو لسه ضاميني عليهو و شغال يتكلم لي عن إحساسو، حتى إنو قال لي بعدين نقعد بمزاج و نختار ليهو اسم، لو كان بت أو ولد، بس ما قلتي لي من متين و ليه ما كلمتيني؟
هنا زحيت منو شويه و أنا عيوني مليانه دموع، قلت ليهو يوسف شوف أنا ما قلت لزول إني حامل، قال لي عارف بس..... قاطعتو و قلت ليهو الحصل إنو قبيل حسيت نفسي حأستفرغ ....... الخ يعني هم القالو دا حمل! ..لسه ماف شي مؤكد!!
هنا ملامح وشو اتغيرت و صابتو خيبة أمل كبيره! مسح وشو بيدينو و قال لي حصل خير و ربنا يقسم لينا الذريه عاجلاً غير آجل، قلت ليهو بصوت مبحوح آمين يارب، بعدها الإتنين سكتنا، بعد ارتاح ختيت الأكل و جبت الصينيه ختيتها قدامو، كان بعاين للشاشه بس سرحان بعيد، قلت ليهو يوسف الغدا، قلت ليهو كدا و كنت حأمشي بس مسكني من يدي و قال لي و انتي؟ قلت ليهو ما جعانه، قال لي ماف حاجه اسمها ما جعانه، قعدني و بقى يأكل فيني، ختيت يدي على بطني و عاينت ليهو و أنا في كلام في خشمي بس خايفه.... لمن هو انتبه إني خاته يدي على بطني قال لي في شي واجعك؟ هزيت ليهو راسي بس بمعنى لا ، قال لي عارف إنو انتي كمان نفسك تكوني أم بس شكلو لسه ربنا ما قاسم لينا، شلت يدو و ختيتها على بطني و قلت ليهو بتردد : ما عارفه أقول ليك شنو و ما عارفه إذا انت هسي ح تحس بحاجه ولا لا ، بس أنا حاسه يا يوسف و من بدري بس خفت اكلمك و اعشمك و اعشم نفسي على الفاضي، من بدري حاسه إنو في حمل، حاسه إنو في حاجه انخلقت في رحمي، حاسه إنو في فرحه اتزرعت جواي!
بهدوء شال يدو عن بطني و قال لي ريله، عارفها صعبه عليك بس..... قاطعتو و قلت ليهو يوسف المره دي غير، المره دي إحساسي قوي، مع إني فضلت السكوت و ما حبيت اكلمك بس هسي ما قادره ، عايزا اشاركك إحساسي، عايزاك تحس بي و تعرف الحاصل علي، يوسف خلينا نمشي نقابل دكتوره هاديه! قال لي ريله دي المره الكم!
قلت ليهو ما خسرانين شي و المره دي إحساسي قوي شديد، عليك الله يا يوسف خلينا نمشي! قال لي ريله حبيبي أنا ما عايزك..... قاطعتو و قلت ليهو عشاني يا يوسف!
في الآخر استسلم و قال لي جهزي نفسك ، قبل ما نطلع أمو جاتنا داخله هي و هنادي و طبعاً كانت صاره وشها و زعلانه شديد، سلمت على يوسف و قالت لي ازيك، قلت ليها كويسه، هنادي قالت لـ يوسف رأيك شنو في المفاجأه دي؟ قالوا لي انت ذاتك ماا كنت عارف! مرتك شكلها عملت تحديد الكل و دست الحمل مننا كلنا حتى انت.... لمن عاينا ليها، قالت لي لكن معاك حق و العين حقك، عمتي سنيه طوالي إنفعلت و قالت ليها يعني نحنا حاسدنها ولا حاقدين عليها عشان تدس مننا!؟ يوسف دا ولد ضرتي ولا جبتو من الشارع؟ مش ولدي؟! هنادي قالت ليها والله انتي كمان ليك حق تزعلي، انتي ما غريبه عنها عشان تدس منك.... لمن يوسف عاين ليها للمره التانيه سكتت، كنت عايزا اتكلم و أوضح الحصل لنسيبتي بس يوسف سبقني و قال ليها ريله ما دست من زول و حكى ليها الحصل بإختصار، قالت ليهو استحاله تكون ما عارفه نفسها حامل ولا لا !! الحمل و الولاده دي هي قايلانا ما جربناهم ولا شنو؟ مرتك هدي الحمل ظااااهر في وشها كمان عايزا تنكر!
طبعاً في اللحظه دي أنا و يوسف عاينا لبعض و هو فجأه كدا ملامح وشو اتغيرت بعد ما سمع كلام أمو و حسيت إنو في سعاده بدت تتسلل جواهو! أنا ذاتي حسيت بالإحساس دا ! يعني الحمل ظاهر فيني؟؟ يعني صدق إحساسي و أنا حامل؟
رغم الجوطه العملتها إلا إنو كلامها فرحنا أنا و يوسف! طبعاً هي استغربت فينا عشان فجأه كدا نحنا الإتنين ملامحنا اتغيرت و بقينا مبتسمين رغم جوطتها!
يوسف خت يديهو على أكتاف أمو و باسها على جبينها و قال ليها والله العظيم ماف زول دس منك، نحنا ياداب ماشين نتأكد دعواتك لينا، طبعاً بعد تصرفو دا ياداب هي هدت بس لسه كانت زعلانه مني و كانت حاسه إنو أنا عارفه بس دسيت منها!... قالت ليهو مرتك الحمل ظاهر فيها، لكن وقت هي استهبلت و قالت ما عارفه خلاص ح نعمل روحنا رايحين و نصدقها، امشوا و ربنا يعدلها عليكم و ان شاء الله تجيبو لينا الخبر السمح.....
المهم قفلنا البيت و طلعنا بعد امو و هنادي مشوا، الفرحه كانت ما سايعاني و طول الطريق يوسف كل دقيقتين يمسك يدي و يضغط عليها و يقول لي لو حصل الفي بالي و بالك والله اجيب ليك العايزاهو.... كان فرحان و مبسوط اكتر مني، كلام أمو خلاهو يتفاءل و يحس إنو أنا فعلاً حامل ... المهم مشينا المركز ، المره دي ما لقينا دكتوره هاديه بس لقينا دكتوره غيرها، طبعاً يوسف المره دي دخل معاي و كان متحمس شديد، حكينا للدكتوره الحاصل معانا و كلمتها بالأعراض البتجيني، المهم بعدها عملنا الفحص و قعدنا في الإنتظار و بقينا منتظرين النتيجه، طبعاً أنا من شدة الخوف و القلق أطرافي بقت بارده و يوسف شغال يطمن فيني، قال لي اقول ليك حاجه؟؟.... صراحة أنا كمان و لأول مره احس إنو فعلاً في حمل، لأول مره احس إنو جد أنا ح أبقى اب! قلت ليهو ان شاء الله، ان شاء الله يا يوسف ، أنا كمان حاسه كدا، ربنا يقسم لينا و يفرحنا.... طبعاً ناس أمو من وصلنا اتصلوا علينا مرتين عشان يعرفو النتيجه طلعت ولا لا، المهم لمن النتيجه طلعت يوسف بإستعجال مشى استلمها، و أنا قلبي كان شغال دق دق! يمكن دقيقه كامله أنا و يوسف قدام باب مكتب الدكتوره، متحمسين و خايفين في نفس الوقت، يوسف قال لي من شدة الحماس عايزا أشوف النتيجه و اقرا تفاصيلها بس معليش حأخلي الخبر الحلو دا ينقال من الدكتور، المهم دخلنا ليها و نحنا متوترين، ضحكت و قالت لينا خايفين شديد، يوسف أداها النتيجه و قال ليها ان شاء الله اسمع البشاره منك، قالت ليهو ان شاء الله و قالت لينا اتفضلوا اقعدوا، قعدنا و أنا خاته يدي على قلبي و يوسف بهز في رجلو و هي فتحت الظرف و بقت تقرا في تفاصيل النتيجه و أنا و يوسف منتظرنها تقول لي انتي حامل!.... بعد مسافه قلعت نظارتها و عاينت لينا الإتنين و قالت :
والله أنا كمان اتمنيت ليكم الحمل دا، بس كل شي قسمه و نصيب و شكلها قسمتكم لسه، للأسف ماف حمل!
أنا وقفت في جملتها دي و بعدها حسيت إني لا بسمع لا بشوف، كانت بتواسي فينا و بتقول لينا انتوا لسه صغار فما تيأسوا لو الحمل اتأخرت.... بعدها وجهت كلامها لي و قالت لي أحياناً كتيره غياب الدوره الشهريه ما معناهو وجود حمل.... بقت تتكلم و تحاول تخفف عننا! يوسف وشي ضلم و حسيت قلبو دا انقسم نصين!
بعدها يوسف قال لي خلينا نمشي و طلع قدامي و أنا كنت مستنكره كلام الدكتوره! كيف ماف حمل! قلت ليها يا دكتوره انتي متأكده إنو ماف حمل؟!
قالت لي والله يا ريله ياها نتيجتك و واضح إنو ماف حمل!
المهم طلعت مع يوسف و طول الطريق الإتنين ساكتين و هو تلفونو يرن ساي و هو ما شغال بيهو، في الآخر عملو صامت و طبعاً أنا تلفوني نسيتو في البيت، كسرت الصمت و قلت ليهو يوسف أكيد في شي غلط! ما رد علي، كان بعاين بالشباك! بقيت كل ما اتكلم معاهو عن الحمل بسفهني! طبعاً كنا في المواصلات عشان كدا ما قدرت اتكلم معاهو كتير في الموضوع دا! لمن وصلنا بيتنا لقينا الجماعه الطييبين واقفين لينا جنب الباب! امو و هنادي و أخواتو و معاهم إزدهار!
طبعاً يوسف ما اتفاهم مع زول، فتح لينا الباب و قال طالع و مشى طوالي، و إمو استلمتني ليك و وقعت فيني اسئله، إزدهار قالت لي جيت قبل شويه اسلم عليك و لقيت ديل واقفين منتظرنكم ف وقفت معاهم.... ما رديت عليهم، إشراقه قالت لي عايني ما تشتغلي لينا صامت! الحصل شنو؟
أخدت نفس و قلت ليهم الدكتوره قالت ماف حمل!
عمتي سنيه ختت يدها على قلبها و قالت سجمي!! كيف يعني ما حامل و الحمل ظاهر فيك؟ الدكتوره دي قرت ورا الفصل ولا الطب دا درستو كورسات؟!!
هنادي قالت لي يعني ما حامل؟؟ عشان كدا يوسف كان زعلان و متضايق، يا حليلو والله!
طبعاً بعدها ناس حبوبه النخيل جوا و حسيت إنو السودان كلو بقى عارف بالحاصل معاي و كل نسوان الفريق عرفو بقصتي! طبعاً ما طولو معاي، شافوني متضايقه و الفيني مكفيني ف طوالي مشوا، بعد فتره من الزمن اتصلت على يوسف، رد علي طوالي و قال لي ريله أنا كويس، قلت ليهو جاي متين؟ قال لي ساعه أو أقل و حأكون في البيت....
المهم لمن هو جا قلت ليهو يوسف أنا ما مقتنعه لا بكلام الدكتوره لا بالنتيجه الطلعت، أنا حاسه إنو في حمل، قال لي ريله هوني على نفسك و أقفلي الموضوع دا! قلت ليهو والله حاولت اتقبل الفكره زي كل مره إلا المره دي تحديداً نفسي ما قادره تتقبل فكرة إنو ماف حمل! ...ختيت يدي على بطني قلت ليهو مستحيل الإحساس الحاسه بيهو دا يكون غلط!.... مسكت يدو ختيتها على بطني بلهفه كدا و قلت ليهو ما حاسي بحاجه؟؟ شال يدو بزهج عني و قال لي بضيق: بطلي وهم و خلي الجن البتعملي فيهو دا!؟ مصدومه ليه مش دا القاعد يحصل معانا في كل مره نمشي نعمل فحص؟ ليه غالبك المره دي تصدقي و تتقبلي الواقع!
قلت ليهو يوسف براحه عليك الله، حاول تصدقني و تستوعب كلامي، قال لي اقفلي الموضوع، قلت ليهو خلينا نعمل الفحص مره تانيه و ياريت المره دي في مستشفى أو أي مركز تاني، طبعاً هنا انفعل فيني و قال لي ما تزيدي العلي! ما براك واجعك الموضوع دا! عليك الله أنسي الفكره دي و خلينا نتقبل واقعنا، أصلا أنا زهجت و شلت الفكره دي من بالي فما تعشميني ساي! و تاني ياريت ما تفتحي الموضوع دا فاهمه ولا لا؟!!
طبعاً اتكلم معاي بنبره حاده لمن خلعني!
المهم تاني يوم حبوبة يوسف جات من السفر ، معاها بت ولدها اسمها بدور، مشيت سلمت عليها و قيلت معاهم، الحبوبه قالت لي اها لسه ماف حاجه كدا ولا كدا؟؟
طوالي هنادي نطت و قالت ليها امبارح حصلت قصه طويله عريضه، كان مشكوك انها حامل و لمن مشت مع يوسف الدكتوره قالت ليهم ماف حمل!
الحبوبه قالت لي المشكله فيك ولا فيهو؟ عمتي سنيه قالت ليها ولدي نصييييح و ما فيهو أي عيب أو مشكله! .... قلت ليها الإتنين ما عندنا مشاكل، بس ربنا لسه ما قسم لينا، قالت لي طيب ما تخليهو يشوف قسمتو مع وحده غيرك!... هنا رفعت راسي و عاينت ليها، قالت لي أنا اللف و الدوران ما بنفع معاي و الراجل محللات ليهو اربعه، وقت ربنا ما قسم ليهو الجنى معاك، يمكن يقسم ليهو مع غيرك.... طبعاً ما قدرت أنطق،واصلت كلامها و قالت لي و خليني اقولها ليك عديل: يوسف دا نااااوي يعرس و خاتي الفكره في بالو و من حقو طبعاً، لا انتي لا غيرك ما مفروض تعترضو و تقيفو في وشو!
عمتي سنيه قالت لي عاجباك الحاله الهو فيها؟ افتحي تلفونو عليك الله و شوفيهو مليان شنو، الإستديو كلو صور و فيديوهات أطفال، يوسف عايز الجنى و متمنى يعرس بس مانع نفسو بسببك، حتى أنا إمو رافض يعترف و يقول لي عايز اعرف و اظنو حتى بينو و بين نفسو ناكر الحاجه دي و ما معترف برغبتو في العرس، إشراقه قالت لي و انتي الأنانيه ليك شنو؟ عايزاهو يقعد معاك كدا لمتين؟ ... يمنى قالت أنا بستغرب في المراه البتمنع راجلها من العرس و بتزعل و بتنقهر لمن يعرس! ما يعرس كان عرس مالك و مالو! ليه الواحده عايزا الراجل دا بس يكون حكر عليها؟ ليه حتى و هي ما بتلد عايز تربطو بيها و تدفنو و هو عايش!؟ دي شنو الأنانيه الضارباكم دي؟ ليه الوحده ما بتفكر في راجلها؟ إذا ربنا حلل ليهو التعدد انتي منو عشان تمنعيهو؟
هنادي قالت لي صراحة يا ريله انتي ما مقدره تضحيات يوسف عشانك، اتخيلي إنو مانع نفسو من الزواج و حارمها من الجنى عشانك؟؟ عارفه إنو انتي عقبه في طريق سعادتو؟
طبعاً أنا زعلت و الكلام وجعني، قلت ليها ليييه محسساني إنو العيب فيني و إنو أنا عاقر و هو مستحملني و صابر علي؟؟ ليه رامين اللوم علي ؟ ذنبي شنو انا؟
الحبوبه قالت لي ماف زول قال ليك عاقر و ماف زول لامك، أنا كنت واضحه و صريحه معاك و وريتك برغبة راجلك الداسيها منك عشان ما يزعلك و يجرحك، نحنا أهلو و من حقنا نشيل همو و نريد ليهو السمح.... عمتي سنيه قالت لي و عشان أكون صريحه معاك اكتر، موضوع عرس يوسف أنا استلمتو و حأعرس ليهو و في أقرب فرصه كمان و ما بهمني إذا انتي موافقه أو لا، لأنو ما معقوله تدفني نفسك و تدفني ولدي معاك، و عشان ما أكون ظلمتك، انتي كمان من حقك تشوفي حياتك و لو عايزا ممكن تعرسي واحد تاني، يمكن ربنا يديك الجنى معاهو، يمكن انتي و يوسف قسمتكم خلاص انتهت و ما بتنفعوا مع بعض تاني إلا تشوفو أزواج تانين، يوسف بالنسبه لي موضوعو محسوم لأنو عندو النيه، انتي لو عايزا تقعدي معاهو بعد يعرس ماف مشكله ماف زول ح يعترض، بس ولدي بعرس ليهو و بخليهو يشوف جناهو و يفرح بيهو، منتهي✋
عن جبران خليل جبران عندما قال :
"لا تعشقني بعينك ربما تجد أجمل مني ، لكن اعشقني بقلبك ، فالقلوب لا تتشابه أبداً."
يتبــــــــــــــــــــــــــــــــــــــــــــع..
لقراءة جميع فصول الرواية من هنا