رواية ريله الفصل الثامن عشر 18 بقلم مها حولي الزاكي
يوسف عرس يا ريله!!
يوسف عرس يا ريله!!
بقيت ما سامعه شي غير الجمله دي! قفلت الخط وحسيت الدنيا ضلمت في وشي!.... حصل الكنت خايفه منو!!... إحساسي ما خاب و يوسف خيب ظني فيهو مره تانيه! كل مره أصدقو و أثق فيهو بندمني!...ما أكذب، لما سافرت خليتو وجيت مع أمي حسيت بالندم وإني ما كان مفروض اتصرف كدا، بس هسي فهمت إنو إحساسي ما كان غلط و إنو العملتو هو الصح!
كل مره يوسف بثبت لي إنو ماف شي بهمو في الدنيا دي غير يكون عندو طفل، ما مهم أم الطفل المهم يكون في طفل!...كيف و متين عرس بالسرعه دي!؟ يعني زعلو من سفري كان كذب و تمثيل!؟
يوسف شاطر شديد في الكذب! بعرف كيف يستعطفني و يخدرني بكلامو و أسلوبو! بعرف كيف يخليني اسامحو بعد كل مره يغلط فيها، بس المره دي بالذات ماف سماح وماف رجوع، خلاص نحنا انتهينا وجد جد المره دي كل الأبواب ح تتقفل في وشو، دي حاجه أنا ما بقدر اسامحو عليها!💔
طبعاً الوقت داك يمنى كانت بتتصل علي بس تاني ما رديت عليها ودخلت في حاله تانيه، عمتي شاديه من برا بقت تنادي علي عشان اجي أقعد معاهم، شدة ما كنت موجوعه وممغوصه ما قدرت أفتح خشمي و أنطق حرف واحد على الأقل! حسيت في شي واقف لي في حلقي!... لما ما رديت عليها طوالي جاتني داخله و وراها أمي! لقوا عيوني مليانه دموع! طبعاً اتخلعوا، أمي قالت لي بسم الله ، في شنو يا ريله!؟ عمتي جات قعدت جنبي وقالت لي مالك يا بت؟! برضو ما رديت عليهم، كنت بمسح في دموعي ويقول في نفسي: ما تبكي عليهو، ما تبكي عليهو يا ريله!
طبعاً حبوبه ذاتا جات لما سمعت صوت أمي وعمتي بتكلموا معاي، قالت في شنو يا جماعه!؟... نطقت وقلت ليهم ماف شي.... فجأه تلفوني رن، عاينت ليهو بس ما رديت، عمتي شافت الإسم مكتوب يمنى، قالت لي دي مش حماتك؟! هزيت ليها راسي، طوالي شالت التلفون وردت على يمنى.... قالت ليها معاك عمتها.... اي قاعده....قولي لي في شنو أول؟!.....اي ياها قدامي تبكي ساي! انتِ اتصلتي عليها؟!.... خير قلتي ليها شنو؟!
هنا عمتي سكتت وبقت تسمع في كلام يمنى و تعاين لي ساي، بعد قفلت منها، قالت لي ليه ما كلمتينا؟!...أمي و حبوبه قالوا ليها في شنو؟!.... قالت ليهم يوسف عرس.... أمي و حبوبه الإتنين في نفس الوقت قالوا ليها شنوووو!! عرس!!
طبعاً أنا اللحظه ديك حسيت بوخزه في قلبي، كأني بسمع الكلام دا لأول مره!!.... فجأه عمتي بقت تضحك لمن حيرتني!... بقينا نعاين ليها بإستغراب! ضمتني عليها وهي بتضحك وقالت لي يا حليلك ريله يا بتي! الضر دا حار كدي؟!😂
المهم يا السميحه راجلك لا عرس لا شي، حماتك كانت بتهظر معاك سااااي!
حبوبه قالت ليها هظارها شييييين! أمي قالت لي ما يطلع جد كمان!! ... العود الما فيهو شق ما بقول طق! عمتي قالت ليها لا لا والله، قالت بتهظر ساي وريله قفلت الخط وما أدتها فرصه تقول ليها دا هظار!... فجأه تلفوني رن، عمتي مدتو لي وقالت لي دا راجلك، أمشي اتكلمي معاهو برا ولا نحنا نمرق ليك من هنا!؟
عاينت مسافه للتلفون، حبوبه قالت لي بتعايني في شنو!؟ انتِ يا ريله جنيتي ولا شنو تصرفاتك بقت ما مفهومه!؟
شلت التلفون وطلعت بيهو برا، فتحت الخط وسكت، قال لي كيفك!؟... قلت ليهو كويسه!.... قال لي لو ما اتصلت عليك ما بتجربي تتصلي علي!؟ ان شاء الله مسكول ساي!؟
سكت ساااي.... قال لي عموماً أنا ما عرست ولا ح أعرس لو أقعد بدون أطفال عمري كلو، يمنى كانت بتهظر معاك واتصلت حكت لي الحصل، قلت أوضح ليك لو بهمك الموضوع مع انك ما سألتي أصلاً!😊
بتردد قلت ليهو: أنا صدقتها!
قال لي لأنك ما واثقه فيني، على الأقل لو كان عندك ذرة ثقه فيني لحظياً كنتِ ح تقولي لـ يمنى كذابه أو كنتِ ح تتصلي علي وتعرفي ليه يمنى قالت كدا، بس سكاتك و تصديقك للكلام القالتو يمنى بدون إستنكار أو تفكير بوضح عدم ثقتك فيني!
قلت ليهو ما لي حق؟!
يوسف أنا كم مره وثقت فيك واتخذلت!؟.... قال لي كم مره!؟ وبعدين انتِ ليه بترجعينا لنفس النقطه!؟ دا كلو نحنا مش اتجاوزناه و اتجاوزنا غيرو كتير و كنا كويسين لحد ما قبل الإجهاض!؟ الحصل شنو فجأه خلاك تتغيري علي!؟.... قولي زعلتي من في شي، قولي غلطت عليك بدون ما انتبه مش من حقي أعرف في شنو!؟ مش مفروض تجي تواجهيني بدل ما تهربي؟؛
قلت ليهو أنا ما هربت، أنا انسحبت، لو كلام يمنى اليوم هظار بكرا ببقى جد، يوسف أنا ما عايزه اتخذل أو اتصدم مره تانيه، عارفه إنو الطفل هو سبب إستمرار علاقتنا وهسي راح فـ..... طوالي قاطعني وقال لي بنهره: عشان كدا مشيتي!؟ معقوله قايلاني سطحي للدرجه دي عشان اتخلى عنك بسبب الإجهاض!؟ أنا مفروض اعتذر منك كم مره يا ريله عشان تفهمي إني شلت فكرة الزواج دي من بالي!؟ أعمل شنو أنا عشان انتِ تصدقي انك أهم شخص في حياتي دي كلها و إني غيرك ما عايز شي، حتى لو ح نقضي عمرنا كلو بدون أطفال!... لو عندي نية عرس كان عرست بت خالي و ما خليتها يوم العقد، افهمي يا بت الناس إني ما شايفك غيرك و ما عايز غيرك!؟ لمتين انتِ حتكوني شاكه في افعالي و أقوالي!؟ قولي لي بس أعمل شنو أنا عشان أقنعك واخليك تثقي فيني!؟اكتب ليك تعهد!؟ تمام ما عندي أي مشكله😊
طبعاً ما عرفت أقول ليهو شنو، قلت ليهو انت ما ح تقدر تفهمني، قال لي ايوه لأني واحد كذاب ومنافق وعديم إحساس!!
لما سكت قفل الخط في وشي!....حسيت بمراره في حلقي!... ما عارفه اعمل شنو! ما عارفه تصرفي العملتو كان صح ولا غلط!.... ختيت يدي على بطني واتذكرت إني السبب!... ماف زول لامني ولا حتى يوسف يمكن عشان كدا نسيت إني براي مشيت لأحمد أخوي و اتجاهلت الوجع الكنت حاسه بيهو! أنا عارفه أحمد أخوي عنيد وما ح يسمع مني مع ذلك بدون ما اكلم زول حتى مشيت ليهو في بيت صحبو! يوسف ما جاب لي سيرة الموضوع، لا لامني لا سألني عن شي، متأكده إنو عارف وأحمد حكى ليهو بس ما لامني!
يمكن لو كان اهتميت بنفسي شويه وما إتجاهلت الألم الكنت حاسه بيهو وما مشيت لبيت صاحب أحمد أخوي ما كان دا كلو حصل!... ايوه قضاء وقدر بس أنا السبب!💔
________________________
_عاد يا أمي ما شفتي الحصل،ياريتك كنت قاعده وحضرتي الشكله.... أم بدور دي طلعت ما هينه، زفتتها معاهم كلهم من صغيرهم لكبيرهم
= يستاهلوا الكلاب.... سيد كان موجود؟ وسنيه قالت شنو وحبوبتهم الزينه؟!
_لا لا عمي سيد ما كان قاعد، كان بس في سنيه وبناتها وحبوبتهم الزينه وبت خالهم الما عندها كرامه
=وانتِ الحكى ليك منو بالحصل دا كلو؟!
_بري ماف زول حكى لي، رسلت يامن ولدي الدكان مشى وجا قال لي يا أمي في عربيه قبل شويه جات وقفت جنب باب ناس حبوبه،نزلت منها مراه ودخلت جوه، قلت يمكن مع معارفهم، اها بعد شويه سمعت الجوطه، ولا كضبت لفحت توبي ومشيت ليهم بهناك عملت نفسي جايه أشيل عدتي العندهم، وعاد اتكيفت كيفه لما عرفت إنو المراه دي أم بدور، جاطت فيهم وشاكلتهم وقالت ليهم بتي ما لعبه عشان تحركوها يمين شمال، كلمتوا منو انتوا لما عرستوا ليها، أنا أمها دي سمعت من بعيد!.... حبوبه الزينه قالت ليها أصلا انتِ بتك سائله منها!؟ ولدي مات بيجاي طوالي مشيتي عرستي بيجاي وجدعتي بتك هسي جايه تقولي بتي وما بتي!
=هههههاي والله عجبني ليهم الكلاب، اتمنيتها تمسك سنيه دي و تمعطها وما تقصر من الحبوبه ذااااتا
_والله يا أمي عديل اشتبكت مع سنيه وفعلاً جرتها من شعرها لما إلا بناتها يمنى و إشراقه مسكوها منها و إشراقه لزت أم بدور و طردتها من البيت
=يعني المراه خلاص رجعت؟؟...وبتها ما ساقتها معاها؟!
_ البت نافره من أمها،كلام زي الناس ما اتكلمت معاها، قالت ليها ما تدخلي في حياتي و مشت دخلت جوه، اتخيلي الجوطه والكواريك دي كلها والبت ما جات طالعه، كأنو ماف زول هاميها!
=بت الكلب بتكون بطنها طمت منهم،هي ذاتا كلبه وعديمة كرامه وصحي ما عندها والي، عشان كدا حبوبتها بتحركها على كيفها....ما قلتي لي أمها رجعت؟!
_ما رجعت، قالت حالفه تقابل عمي سيد، لسه عندها باقي غبينه ما فشتها، طلعت وقعدت ليهم جنب باب بيتهم وقالت ما بتمشي إلا عمي سيد و إلياس يجوا!!
طبعاً أنا طوالي سقتها وجبتها معاي البيت!
=اجي! دايره بيها شنو، مالك ومالا كان تخليها تقعد في شارعها،قلت ليك الناس ديل عايني ليهم بعيونك بس!
_لا لا ياخ، لازم زول يحمش النار و يفهمها انها مفروض تسوق بتها معاها وتمشي
=ايواااا كان كدا أوعك تقصري، خليها تسوق بتها عديمة الكرامه دي معاها
_خلاص يا أمي ح اقفل بعد دا، المراه قاعده جوه براها
......
_خالتو سلوى.... هاك اشربي العصير دا
=ما كان تتعبي نفسك، ما دايره أي شي
_ماف تعب والله، مفروض اديك العصير بعد تاكلي لكن شايفاك مهبطه والأكل لسه ما جاهز!
= ما عندي نفس ل شي، الراجل دا لسه ما جا!؟ رسلي ولدك دا يشوفو لي
_لا لا لسه ما جا، لو جا بنسمع صوتو، دي ما مواعيد رجعتو، بجي بعد ساعه كدا أو أكتر،للوقت داك انتِ ارتاحي وان شاء الله البحصل كلو خير
=يجي الخير من وين بعد ما دمروا حياة بتي، وهي العويره المتخلفه الكلبه لسه مبارياهم وبتسمع كلام حبوبتها!
_انتِ يا خالتو سلوى معقوله ما كنتِ عارفه!؟ حبوبه الزينه قالت خيلانها عارفين! معقول اخوانك ما كلموك؟؟
=والله ماف زول كلمني، أنا قريه تانيه بعيده من قريتهم،ما كلموني عشان عارفني ما ح أوافق،بعد عرفت الظروف ما ساعدتني عشان اسافر وأصلهم بس وصلت،سنيه دي من زمان بتي دي كانت عميانه منها!؟ولدها بعد يعرس ومرتو ما تلدي تجي تقول دايره تعرس ليهو بتي!؟ عليك الله دي ما حقاره! وبدور السجمانه كانت موافقه!
_النصيحه الحصل دا كلو غلط في غلط، أنا طبعاً عشان بقول ليهم النصيحه ما بريدو كلامي وماف زول شغال بي، عمتي سنيه دي أنا عديل واجهتها وقلت ليها يا عمتي البتسوي فيهو دا غلط، كدا بتخربي حياة ولدك و تظلمي بت الناس، لكن ما سمعت مني وأنا صراحة لما شفت بتك موافقه وراضيه سكت
=بتي غبيه وبتسمع كلام حبوبتها من دون ما تفكر، شوفي هسي البت فيها، مفروض يعرسها واحد و عرسها التاني! للدرجه دي مرخصين بتي، دا يرفضها ودا يوافق عليها!
_ ئهه طيب أنا أقول شنو يا خالتو سلوى!؟ بتك الكنت خايفه عليها وما عايزاه تنظلم لأني عارفه يوسف ما بمسكها شوفي السوتها فيني! مشت وجات عرست راجلي!
=عرسوا ليهم هم،هي ذاتا انظلمت زيك! دا كلو من حبوبتها راس الهوس، أعوذ بالله منها، خربت ليكن حياتكن!
_حسبي الله ونعم الوكيل، أنا خليتهم لـ الله يجيب لي حقي منهم، استحملت كتير وسكت كتير و عشان معوداهم على الطاعه والرضى، خلوا إلياس يعرس بتك حتى بدون ما يفكروا فيني أو يكلموني! هسي دي برضو ما حقاره!... زعلت طبعاً ومشيت أهلي،وماف واحد منهم جا لاحقني أو رفع سماعة التلفون سأل مني أو من أولادي يلي هم أولاد ولدهم! اتمغصت وأمي اتمغصت واتحرقت أكتر مني، ساقتني من يدي ورجعتني بيتي،شالت ليها كرسي وختتو جنب باب الشارع وكانت منتظره واحد من نسابتي يجي يفتح خشمو معاها، وماف أي زول جا
=دا الكلام الصاح، أمك زوله حربيه، شفتي أوعك تسكتي ليهم، سنيه و أمها حجه الزينه خرابات بيوت، حجه الزينه دي بالذات،مشهوره في البلد بالفتنه و وليع النيران، أي راجل طلق مرتو هي السبب، أي نسوان اتشاكلوا هي السبب، أي رجال اتضاربوا برضو هي السبب! ما بترتاح لو ما جوطة الدنيا وشربكت الناس في بعض!كانت نسيبتي وأنا بعرفها كويس!
_ما بكذب عليك يا خالتو سلوى لما جيت راجعه بيتي لقيت بتك فيهو، والله ولا اتفاهمت معاها طوالي طلعتها، لأنو دي حقاره شديده، يعرسوا ليها راجلي ويسكنوها في بيتي! العرسها دا مالو ما راجل ما يبني ليها!
=ما عليك عتب،من حقك، دا بيتك وحق أولادك، العتب على الكبار الما عاقلين، حاج موسى و حجه الزينه و سيد ذاتو معاهم، لكن الليله بحددها مع سيد و أولادو الإتنين، جدهم داك في البلد أديتو حقو باقي لي التلاته ديل طوالي ح اسوق بتي معاي غصب عنهم كلهم
_طبعا داك ما فاضي ليكم، مرتو أجهضت وسافرت مع أمها،بقى ما ظاهر و من يوم العقد رجلو ما ختاها في بيت أهلو، هم ذاتهم وقفوا منو،كلهم كدا في بعض كعبين، أنا وقعت في اسوأ نسابه بس صابره عشان أولادي، و وقعتي دي ما بتمناها لأي وحده غيري، واسمعيها مني يا خالتي سلوى، لو دايره مصلحة بتك سوقيها معاك، ديل غير الذل و الكراهيه ما عندهم ليها حاجه، و إلياس الباطل دا عليها ما ح يتلفت، هو أولادو ما شغال بيهم وما قاعد يصرف لا عليهم لا علي لا البيت قايلاهو بقدر يسوي ليهو بيت تاني!؟ خاصة إنو انجبر يعرس بتك و يصلح غلط أخوهو!؟... شوفيهم هسي هايننها كيف، براك جيتي وشفتي بتك بعيونك حالتها كيف... إذا من هسي مهيونه ومذلوله كدا لقدام بحصل شنو؟! بكرا حبوبتها بتمشي وتخليها وح تشوف العجب من سنيه وبناتها و إلياس عليها ما ح يتلفت، عرسها ليهم بيجاي وجدعها لأمو في بيتها!!
=الليله بتي لو كسرت رقبتها رجاله بسوقها معاي، عندي أخوي ود خالي هنا هسي بضرب ليهو يجي يقيف معاي والبت دي بالغصب يخليها ترجع معاي، تاني ما ليها قعده هنا والخرطوم دي تاني في الأحلام ما ح تشوفها ود عمتي دا برضو غصب عنو يطلقها، قايل بتي لعبه!!
_دا الكلام الصح يا خالتو سلوى، بدور تستاهل راجل أحسن من إلياس وتستاهل حياة احسن من حياة الذل والإهانه دي!
________________________________
مع الضهريه كدا مشينا بيت سميه مرت عمي عشان نشرب معاها الجبنه،كانت راشه مظلتها ومغرقاها مويه، طبعاً الجو كان سخن شديد، مشينا أنا و أمي، حبوبه مشت ناس الفريق التاني، عمتي شاديه ذاتا جات معانا و اتلموا باقي بنات الأهل، جابوا الكانون و بقوا يسوا للجبنه و أنا قعدت لـ سجى عشان تمشط لي شعري،طبعا عمتي أمي جابت ليها خضره و قعدوا يورقوها معاها و يتونسوا ونحنا البنات بنتونس على جنب، بعد شويه سمعنا صوت حسام و هو بقول يا أمي الجبنه دي لسه؟!
قالت ليهو قربت، طبعاً سجى كانت بتسرح لي ولما سمعت صوتو وقفت! رفعت راسي وقلت ليها مالك يا بت!؟ قالت لي ولا شي ورجعت تمشط لي شعري بس عينها في باب المظله وكل ما تسمع صوتو تقعد تتلفت! طبعاً حسام ولد عمي نادر، عمي عندو 3 أولاد ذكور أكبرهم حسام و بت وحده صغيره ياداب في تامن، المهم وحده من البنات قالت لـ سجى بصوت واطي اها انتِ وفلان دا الحصل شنو في قصتكم؟! طبعاً فلان دا قاصده حسام، سجى قالت ليها ولا شي، يحصل شنو يعني؟! قالت ليها علينا نحنا الحركات دي!؟ يا بت تصرفاتكم وااااضحه وكلنا كاشفنكم!
وحده قالت ليها لكن حسام دا كان دايرك يا سجى البمنعو شنو!؟ ما يمشي يكلم أبوك!؟
سجى قالت ليهم انتوا بتجيبوا الكلام دا من وين!؟....قالوا ليها انتِ بتنكري ليه!؟
عمتي شاديه إتلفتت علينا وقالت مالكن يا بنات؟! قالوا ليها لا لا ماف شي!.... قالت لينا وحده منكن تمشي تنادي ريم للجبنه أو تنادي واحد من الشفع ديل يكلمها، سجى قالت ليها بمشي أنا، طبعاً واضح انها كانت عايزا تتهرب، قالت لي هسي بجي، أصلا عندي حاجه في البيت أشوفها و اغشى معاي ريم، ما بتأخري بجي اتم ليك شعرك، قلت ليها سمح، لما كانت ح تطلع مرت عمي قالت ليها عليك الله يا سجى نادي معاك حسام دا يجي يشيل الجبنه، قالت ليها كويس.... قالت كدا و طلعت، وحده من البنات مشت لحقتها، جات وقالت طبعاً ما صدقت قالوا ليها نادي حسام، ناكره البيناتهم حطب وهي لو سمعت اسمو ساي تتلبش!
طبعاً كانوا بتكلموا براااحه عشان أمهاتهم ما يسمعوهم، قلت ليهن انتن مالكن معاها!؟
قالوا لي غايظانا غتاتها دي! يعني كلنا عارفين بالبينها هي وحسام بتنكر ليها و تعمل نفسها ما شغاله بيهو وهي ميته في الأرض البمشي عليها!؟
وحده منهم قالت أنا لو مكان حسام ما بتلفت عليها تاني! بعد وافقت على غيرو واتخطبت ليهو جاي هسي يتكلم ويتضاحك معاها عادي!
التانيه قالت ليها، حسام دا ما كان عامل فيها صعب وما عندو حاجه لزول شوفوا هسي لـ سجى دي بذوب كيف! الزمن كلو لافي في الحِله وقاعد قريب من بيتهم عشان لما تطلع و تدخل يشوفها!... سامحها ونسى انها كانت ح تعرس غيرو!
قلت ليهم عاينوا سجى ما غلطانه، حسام لو جد جد دايرها ليه ما كلم أبوها أو أبوهو!؟ حتى لو ما جاهز مفروض يكلم الناس، عشان كلهم يكونوا عارفين إنو حسام عايز سجى بت عمو حامد!... هو ذاتو مستهبل و ما مفهوم!
طبعاً ما جملتي دي هو جا بس ما دخل، أنا عشان قاعده جنب الباب شفتو، رفعت توبي طوالي والبنات الجنبي كل وحده صلحت قعدتها وتوبها أو طرحتها، طبعاً أظنو سمع مني جملة : حسام عايز سجى بت عمو حامد!... هو ذاتو مستهبل و ما مفهوم!
لأنو عاين لي بنظره كدا، زي نظرة الزول لما تكون جبت سيرتو و يسمعك!
المهم شال الجبنه و مشى، البنات قالوا لي بكون سمعك، قلت ليهم خلوهو يسمع ساااي، المهم سجى جات بس ريم أختي ما جات، شكلها لسه زعلانه، المهم و نحنا بنشرب في الجبنه، سمعنا صوت وحده بتسلم، ردينا ليها السلام و مرت عمتي قامت طلعت ليها برا وقالت ليها اتفضلي، البت قالت ليها أنا بت زهره، مرت عمي قالت ليها ما شاء الله بتشبهي امك، اتفضلي يا بتي، وين أمك طولت الغيبه!قالت ليها أمي عيانه، قالت ليها سلامتها.... طبعاً بتكلموا وهم جنب المظله، أول ما مرت عمي جات داخله و وراها البت لقيتها دي مرام!! طبعاً اتفاجأت! قلت ليها مراااام طوالي قمت سلمت عليها، مرت عمي قالت لي بتعرفيها!!
قلت ليها اي من زمن المدرسه، و كنا زمااان بنتلاقى في المدخه، وبعد كبرنا شويه تاني ما إتلاقينا! مرت عمي قالت لي امها بتجينا طوالي،بنشتري منها طُباقه و أرياح و سلاسل!
المهم مرام دخلت سلمت على النسوان و كبوا ليها جبنه، طبعاً أنا كنت بعاين ليها ساااي، و اتذكرت لما قابلتها اول مره بعد غياب في الترعه أنا و ليلى، كانت بتغسل و هي بتبكي وتغني!.... عيونها مليانه حزن! حتى ضحكها ما ضحك زول مبسوط!
قلت ليها يا حليلك يا مرام، طولنا ما اتقابلنا! قالت لي اي والله، من يوم الترعه و تاني ما شفنا بعض! الليله لما جيت جيت قاصداك عديل وقلت اسأل من بيتكم.... طبعاً هي عارفه قريتنا وأنا عارفه قريتهم بس ما حصل جات بيتنا ولا حصل مشيت بيتهم، المدرسه القرينا فيها كانت في قريه من القرى القريبه لينا، كنا بنمشي بالحمير سوا، بنتلاقى في مكان معين، نمشي المدرسه سوا و نرجع سوا بس ما حصل وحده مشت مع التانيه بيتهم!
عمتي شاديه قالت لينا شوفن الزمن جرى بسرعه كيف، أمبارح كنتن في المدرسه وهسي أي وحده كبرت وعرست... طبعاً مرام كان حنه غبشه على يدينها ورجلينها عشان كدا عمتي استنتجت انها متزوجه، مرام قالت لي ما شاء الله عرستي من متين؟؟
قلت ليها لي قريب السنتين أو سنتين عديل وشويه، قالت لي أنا عرست بدري شديد، قلت ليها اي عرفت الحاجه دي لما شفت ولدك معاك في الترعه!هزت لي راسها بس، كنت عايزه اعرف عنها أكتر و اتكلم معاها، بس انشغلت ب بضاعة أمها وبقت توريها للنسوان، لما خلصت و قالت ماشه، طلعت معاها أقدمها لحد الباب، طبعاً جات بـ كارو، قلت ليها مرام.. مالك انتِ!؟ لما لاقيناك في الترعه كنتِ بتبكي!؟ قالت لي البكي ما شي جديد يا صحبتي القديمه، قلت ليها طيب انتِ عرستي منو؟؟.... مدثر؟!... طبعاً مدثر دا من زماااان كانت بتحكي لي عنو و عن جوابات الغزل البرسلها ليها، الولد دا كان بريدها شديييد وهي ذاتا بتريدو، كان ساعي ومجتهد و ضاغط على نفسو، أي شغل الولد دا اشتغلو عشان يكون نفسو ويعرسها، أنا كنت شاهده على جزو من حكايتهم دي و الشفتو خلاني اجزم إنو مدثر دا ما ح يعرس بت غير مرام، مرام لمدثر و مدثر لمرام!
لما قلت ليها كدا عيونها إتملت دموع!
ختيت يدي على كتفها وقلت ليها ما أي زول بقدر يوفي بالوعد، ما عارفه الحصل شنو بالضبط، لكن لو مدثر عرسك غيرك هو الخسران لأنو..... قاطعتني بصوت باكي و قالت لي:
مدثر مات يا مها!!
طبعاً إتخلعت!.... واصلت كلامها وقالت لي لقى هنا ماف شغل وقال إلا يسافر يشوف ليهو شغل تاني، ركب باصات الأبيض وهو في الطريق عمل حادث و إتوفى قبل سنوات 💔
قلبي وجعني شديد! معقوله مدثر إتوفى!.... طوالي اتذكرت ليه هي في الترعه كانت بتبكي و تغني:
دفعوني الضريبه وما وروني الحقيقه و شالنو
شالنو الحبيب باصات الأبيض شالنو
شالنو العصاري بطريق اللوراي وشالنو
________________________________
_حييييينا يا أمي، اقسم بالله مستمتعه استمتاع 🤣 عليك الله رأيك شنو في الجوطه دي، طبعاً أنا واقفه جنب الباب، المره دي ما عايزه أخش ليهم عشان ما يقولوا مركزه معاهم، طبعاً عمي سيد جا و كمان إلياس و أم بدور إستلمتهم ليك
= خليها تذلهم كووويس و تسوق بتها وتبقى مارقه
_ طبعاً أنا منتظراها جنب باب بيتي، منتظره اللحظه الح تجي طالعه فيها هي وبتها المذلوله و تخمها معاها!....قبيل قالت عندها واحد قريبها ح تتصل عليهو يجي يساندها ما جا لكن ولا لسه في الشارع ما معروف
= حسب السامعاهو دا المراه دي براااها بتأدبهم، دي ما محتاجه توصيه ولا محتاجه دعم ومسانده من زول
_ سكتوا.... شكلها جايه طالعه مع بتها.... أمي خليك في الخط ح اقفل الباب عشان ما تقول منتظراها
هنادي قفلت باب الشارع وبقت تعاين بالقده، شافت أم بدور طلعت من بيت نسابتها، إنبسطت شديد و قعدت تتبسم،و كانت منتظره بدور تجي طالعه ورا أمها بس بدور ما جات طالعه، ولما أم بدور اتحركت كم خطوه كدا، هنادي فتحت الباب وقالت ليها خالتي سلوى!! الحصل شنو!؟ان شاء الله مشكلتك إتحلت!
= اي اتحلت الحمدلله و بتي ح تعيش معززه مكرمه، لو ما انتِ حكيتي لي تصرف أمك الحربي لما ساقتك رجعتك بيتك كنت اتصرفت غلط وسقت بتي و رجعت بيها وكدا ياداب حأكون دمرت ليها حياتها، العرس ما هظار، لو برضاي أو عدمو العرس دا تم وبتي بقت مسؤولية راجلها كان مجبور أو راضي، وهسي أبوهو وعدني إنو ولدو يصرف على بدور و يأجر ليها بيت لحدي ما تنفتح عليهو ويشتري ليها بيت عديل
_كيف يعني؟!(طبعاً قالتها بخلعه كدا)
=كداااا.... مش مرتو؟!.... واسمعي هنا يا هنادي الكاتله لي حيلك وعامله فيها مسكينه و مظلومه، بتي خط أحمر، لو يوم ساي سمعت انك ضايقتيها أو عملتي ليها شي إلا تطيري،بخسر فيك تذكره وبجيك لحد عندك.....يعني فوق ما غشيتوا بتي وظلمتوها دايرين تهضموا حقوقها وتطلعوها من المولد بدون حمص!؟ قايلاني أنا غبيه وصدقت كلامك!؟ ....انتِ حتكوني هنا في بيتك وهي هناك في بيتها، لا ح تغلط عليك لا تغلطي عليها، كل وحده تمسك بيتها وتركز مع حياتها، أنا ما بغلط على زول لكن البرش بتي بمويه برشو بجاز وبشخط فيهو كبريت.... يلا مع السلامه.....
المُكر السيّء لا يثمر، لا يستقيم، لا ينجو
يظن صاحبه أنه على بعد خطوة من النصر، فإذا بهِ يقع في حفرته، يحترق بالنار التي أشعلها لغيره، فيذوق ما كان يتمناه لغيره
"ولا يحيق المكر السيئ إلا بأهله"
ولأن الله عدل، فإن الظلمَ يرتد، والمكر يُهزم، والكيد لا يُفلِت من قبضته.
يتبـــــــــــــــــــــــــــــــــــــــــــع..