رواية ريله الفصل الثالث عشر 13 بقلم مها حولي الزاكي
مع إنو أنا عارفه إنو مصيري أتلاقى مع يوسف بس إتخلعت لمن شفتو!.... جانا قريب و عاين لهيثم جووووه عيونو بتحدي كدا و قال ليهو كنت بتقول ليها في شنو؟ هيثم قال ليهو قلت ليها : يا مشتولة الجرف الفروعك وار.... يوسف ما انتظرو يتم كلامو و طوالي ضربو بوكس على وشو لمن رعف و داك إنفعل و رفع يدو عشان يضرب يوسف بس يوسف مسك ليهو يدو و بقى لاويها ليهو، أنا اتخلعت وما عرفت اتصرف كيف ف بقيت أقول ليهو لا لا يا يوسف! فك ياخ ما تفضحنا!.... طبعاً كأنو ما سامعني، الإتنين اشتبكوا مع بعض و يوسف دا كأنو بضرب في ألد اعداؤ والله إلا الشباب الكانو قريبين مننا جوا حجزوهم من بعض و نفحات جاتني جاريه و عاد الشفع جروا و نشروا الشمار في الحِله كلها و كل الناس مرقت و جات علينا أولهم أبوي و أعمامي و أولادهم!
أبوي وصلهم و قال ليهم في شنو يا ناس؟.... لا يوسف لا هيثم ماف واحد فيهم اتكلم و طبعاً أنا عيوني مليانه دموع، أبوي عاين لي و قال لي امشوا البيت، طوالي مشيت مع نفحات و الشارع بقى كلو رجال و النسوان واقفات بعيييد ماف وحده بتقدر تجي و تقيف وسط الرجال عشان تتشمر، لمن وصلت قريب البيت استلموني أمي و عماتي و بقوا يسألوني الحاصل شنو؟ برضو كان معاهم ناس حبوبه النخيل! في شافعه قالت ليهم هيثم اتشاكل مع الراجل داك و أشرت على يوسف الكان جاي علينا هو و أخوهو إلياس و عمو سيد، طبعاً هم السايقنو بالغصب و هو شكلو لسه ناوي يتشاكل مع هيثم! واحد من أعمامي قال لينا خشن جوه!.... دخلنا و ناس أمي لسه يسألوني يوسف اتشاكل مع هيثم في شنو و أنا ساكته، في الآخر سكتوا خلوني و أي زول مشى يشوف شغلتو، ليلى و نفحات جوني و قالوا لي سرررعه أحكي لينا الحصل شنو، قلت ل ليلى لقيتي أولادك؟ قالت لي لقيتهم خليك منهم و أحكي الحصل شنو؟ نفحات قالت لي أحكي يااااخ حلفتك!..... أخدت نفس و قلت ليهم الحصل إنو....... الخ
ليلى قالت لي واااي من وقاحة هيثم و جراءتو كيف يقول كدا قدام راجلك! نفحات قالت لي فظيع والله! .. بالمناسبه هيثم دا منو؟!
ليلى ضحكت و قالت ليها ما تقولي هيثم، قولي مجنون ريله، هيثم دا ولد اهلنا، كان ميت في ريله دي و اتقدم ليها كتيييير بس عمي الزين رفضو، ياخ دا شدة ما بريد ريله و واقع في غرامها كان بكتب فيها شعر عديل! قالوا لمن عرست قرب يجن بس الله ثبت قلبو 🤣
نفحات قالت ليها جااااده! يحليلو والله غيتو هو ما شين لكن نحنا عايزين ريله ل يوسف و ما بنبدلو بزول، ضربتها و قلت ليها في أحلامك ما تقولي كلام زي دا! قالت لي ريله انتي زعلانه من يوسف بس اكيد ما بتكرهيهو صح؟ و على فكره يوسف جاي يرجعك، قلت ليها ئهه لعبه هي؟ يطلق و يرجّع على كيفو؟! قالت لي ريله انتوا الإتنين مكبرين الموضوع! نقاشات و إختلافات زي دي بتحصل عادي، أكيد يوسف طلقك في لحظات زعل و غضب و لمن عرف غلطو و استوعبو جا عشان يرجعك! قلت ليها و أنا ما عايزا أرجع معاهو!
ليلى قالت هسي خلونا في العرس و بعدها نشوف نهاية الموضوع دا، المهم بعد أقل من ربع ساعه جابو العروس و الناس مشت تجهز نفسها للعقد، طبعاً نحنا البنات كلنا اتلمينا في بيت واحد و جبنا لينا وحده بتمكيج و ما شاء الله ظبطتنا كلنا، طبعاً لبست فستان، و ليلى لبست توب و طبعاً مع حنتها و رسمها طلعت خطييييره، كنا كلنا قاعدين مع ساره العروس و البنات يدقوا في الدلوكه ساااااي و برا عاملين صيوان طوييييل عريض عامل زي الصاله المتحركه، طبعاً هنادي تعاين لينا سااااي في البدايه كانت مربعه يدينها و بتعاين بعيونها و شويه شويه اتحمست و بقت تصفق و تغني معانا، المهم بعد شويه كدا سمعنا صوت الزغاريد جايه من برا، جاتنا عمتي شاديه جااااريه و قالت لينا امرقن يا بنيات، ناس ام سياله ديل وصلو امرقن استقبلوهم، اهاااا البنات طواااالي كلهم طلعوا بإستعجاب هم و دلاليكهم، طبعاً ناس ام سياله ديل أهل العريس، لمن طلنا الشارع ما شاء الله كل الرجال لابسين جلاليب و واقفين جنب عرباتهم و ناس الصيوان جو مارقين و الشفع راكبين في الشجر زي القرود و بصورو 😂😂🤣
اهل العريس جوا بعرباتهم و 4 حافلات كلها مليانه و جزو راكب فوق، طبعاً سجى دي في حِلتنا ست الغنى و الدلوكه هي و معاها 4 من بنات فريقنا، اتقدموا قدامنا و اشتغلوا دق شدييييد في الدلوكه و كلهم بصوت واااحد :
الجنني يمه دار حامدي الولد العذبني يمه دار حامدي
سيد السوط يمه دار حامدي المنجل الما بفوت يمه دار حامدي 👏👏💃
جنن البنوت يمه دار حامدي فوقو سوا الفوت يمه دار حامدي
مارقه ايدو المال يمه دار حامدي بيدي بالدولار يمه دار حامدي💃👏👏
طبعاً أهل العريس اتكيفوا كيف من الغنيه، عملوا سيره وطلعوا بالشبابيك و بقوا يزغردو و ديل ولا كضبو الرصاص وقف فوووق طبعاً أنا من الله خلقني بكره ضرب النار بالذات الفي المناسبات دا، و أولاد اعمامي ديل في ضرب السلاح دا عويرين لمن بهناك الواحد بفضي ذخيرتو كلها و يقولو ليك عرس من دون سلاح دا ما عرس، طبعاً البنات معظمهم جرو و أنا بس غمضت عيوني و ختيت يديني على اضنيني و بقيت ماشه بإستعجال على البيت و صوت الرصاص ملى قلبي خوف، و أنا جاااااريه كدا اصطدمت بزول ما عارفه منو بس مسكني و دخلني جوه ما سألتو هو منو لمن كان سايقني عشان همي كلو كان أطلع من الرصاص دا لمن دخلت و اتخطيت عتبة باب بيتنا حق الشارع فتحت عيوني و لقيت يوسف قدامي!!
طوالي فكيت يدي منو و قلت ليهو الجابك هنا شنو؟ عاين لي جوه عيوني و قال لي جابني الشوق!!
قلت ليهو عاين حركات دي ما تعملها لي انا، أنا بقيت بعرفك كويس و للأسف حيلك الزمان ديك كلها ما ح تمشي علي تاني، قال لي ح اعتبر نفسي ما سمعت شي، طمنيني عنك، كيفك؟ قلت ليهو زي ما شايف زي الفل، أول ما اتطلقت منك ياداب اتحسنت و حسيت بالحريه!.... ربع يدينو و قال لي أنا عكسك، و أظن الشي دا ظاهر فيني، حياتي بدونك ما ليها طعم، و بيتك بدونك بقى باهت، بقيت ما قادر أقعد فيهو و انتي ما موجوده، بقيت زي الزول الرايحه ليهو حاجه و انتي الحاجه دي!....ريله أنا بعترف إني غلطت كتير في حقك و أكبر اغلاطي إني في لحظة زعل و غضب منك طلقتك! بس انا كلمت أبوك و رجعتك و بعد العرس دا ان شاء الله عايز ارجعك معاي البيت و اتطمني من اليوم و لقدام ما بحصل إلا العايزاهو انتي، أنا بقيت ما عايز شي غير بس تكوني معاي!
قلت ليهو قمة الأنانية! ليه انت بتحب تفرض علي قرارتك و تجبرني اتقبلها و أوافق عليها؟ عشان معوداك على الطاعه؟ قال لي لا ما كدا بس أنا متأكد زي ما أنا ما بقدر من دونك انتي كمان ما بتقدري من دوني 😊
قلت ليهو سبحان الله آخر موقف بيناتنا دا ما كان كلامك؟ مش قلت علي كذابه و كنت بمثل عليك و متغمصه شخصيه ما شخصيتي ولابسه قناع البراءه؟
قال لي قلت دا في لحظات غضب و انتي عارفه إني ما قصدت البقولو و عارفه إني قلتو بس ما مقتنع بيهو و عارفك زي ما انتي بس اسلوبك معاي هو الجبرني أقول كدا!
قلت ليهو ما علينا، خلينا نكون واضحين، أنا و انت ما عندنا مستقبل مع بعض، أرجع ليك ليه و أنا عارفه إنو ماف شي ح يتغير، انت زي ما انت بنرجسيتك و غرورك و حب تملكك و أهلك بنفس..... المهم ما عايزا أرجع يا يوسف و رجاءً خلينا كدا افضل لينا الإتنين، و انت في أي وقت عايز تجي مرحب بيك بس أنا ما لي رجعه هناك تاني..... طبعاً زعل شديد و حسيتو كان ح ينفعل بس مسك نفسو و قال لي ما عايز أقول كلام اندم عليهو و ما عايز أبدي ردة فعل تضرنا الإتنين، و كلامك دا كلو بالنسبه لي كلام زعل ما ح أعمل ليهو اعتبار، انتي مرتي و أم ولدي و حترجعي معاي بيتك و ح تعيشي فيهو عزيزه مكرمه و بالنسبه لأهلي الما حصل شكيتي منهم ديل و اللحد اللحظه دي أنا ما عارف بتفاصيل المشاكل الحاصله بيناتكم ماف واحد فيهم ح يزعجك تاني، و أنا مسؤول عن كلامي دا، و لو حابه ممكن أسكنك في مكان تاني المهم تكوني معاي..... ابتسمت ليهو بشماته كدا و قلت ليهو مستعد تعمل المستحيل عشان ولدك!
هنا مسكني من يدي بقوه و قربني منو و قال ليه محسساني إني واحد كذاب و أي كلمه اقولها ليك وراها هدف؟ ليه محسساني إنو ماف شي بهمني غير الطفل؟.... ايوه الطفل مهم بس ما أهم من أم الطفل! و انتي عندي أهم من أي حاجه في الدنيا دي.... قلت ليهو طيب لو قلت ليك ح ارجع معاك بس بشرط، بإستعجال قال لي موافق، قلت ليهو أعرف الشرط أول، قال لي موافق من دون ما اعرف المهم ترجعي معاي، قلت ليهو شرطي هو اني أجهض الطفل.... طبعاً بقى يعاين لي بإستنكار كدا ! قال لي شاربه شنو انتي؟ قلت ليهو دا شرطي، عاين لي جوه عيوني و قال لي موافق.... طبعاً ردو فاجأني! اتوقعتو يعصب و يرفض عشان أقول ليهو انت ماف شي بهمك غير الطفل! فجأه الناس جو داخلين و نحنا بعدنا عن بعض بس هو كان بعاين لي لمن وترني، فطوالي اتحركت و دخلت جوه و أنا قلبي بدق بسرعه!
المهم الناس عقدوا و كلنا طلعنا الصيوان فطرنا هناك و رجعنا نخدم الضيوف، طبعاً رانيا أختي جات مع أهل العريس، لمن لاقيتها بكينا جنس بكى، هي و أولادها فقدتهم شديد و اشتقت ليهم، عندها 3 أولاد و كلهم ذكور، اكبرهم عمرو 13 سنه، المهم عقدو و عملنا حفله في الصيوان، جابو فنانه مشهوووره كدا و غنت ليهم، طبعاً في الحفله كل ما ارفع راسي ألقى يوسف بعاين لي! طبعاً هو ذاااتو كان لابس جلابيه و ما شاء الله و الصلاة على النبي! كلهم علقوا عليهو بالذات البنات و شغالين يقولو دا راجل ريله!
المهم أثناء ما نحنا بنرقص و بنبشر للعرسان بت ليلى الصغيره قعدت تبكي و قالت إلا تمشي البيت و طبعاً ليلى ما عايزا غنيه تفوتها زهجت زهجه من بتها و البت بكاااايه، قلت ليها جيبيها، أنا راجعه البيت يمكن عطشانها أو جعانه لمن أرجع برجعها معاي، قالت لي كويس، شلتها منها و طلعت من الصيوان، أول ما طلعت كدا لقيت عمي سيد في وشي، لافي عمتو و لابس جلابيه، كان بتكلم بالتلفون قفل و قال لي بتنا الما بتسأل مننا! ما بتقولي اشوف عمي الجاي عشاني دا و اسلم عليهو ان شاء الله من بعيد!
طبعاً خجلت منو خجل و طوالي مشيت سلمت عليهو،بارك لي عرس بت عمي و قال لي حتى تلفونك قافلاهو مننا! قلت ليهو عشان كنت مشغوله، قال لي مشغوله ولا زعلانه بسبب ولدي العوير دا ؟ يا بت هوووي عندي ماف حاجه اسمها طلاق و يوسف عرف غلطو و جاي يصلحو و أنا كلمت أبوك و الموضوع بسيط و اتحلى، و خلافات زي دي بتحصل في أي بيت لكن الطلاق ما حل!....ما حبيت اتجادل معاهو ف هزيت ليهو راسي بس، قال لي ما ااخرك أمشي هسي و نتناقش مره تانيه، المهم رجعت البيت و كان فاضي كلهم مشوا الحفله، دخلت المطبخ و ختيت اكل لبت ليلى، اسمها مآب بنقول ليها اوبا، المهم أديتها تاكل و شربتها مويه و عصير، قالت نعسانه، شلتها دخلتها جوه و رقدتها على السرير، طبعاً هي دلوعه شديد، عذبتني عذاااب، بقيت اطبطب عليها و أغني ليها النوم النوم لحد ما غفية و نامت، شغلت ليها المكيف و غطيتها و طلعت و قفلت الباب، لقيت في شفع أمهاتهم منومنهم في العريشه ف شلتهم واحد واحد و دخلتهم جوه مع مآب و غطيتهم كلهم عشان ما يحسوا بالبرد، دخلت المطبخ شربت مويه و لمن كنت حأطلع هيثم جاني داخل! طبعاً خلعني! قلت ليهو عايز حاجه؟ قال لي كيفك يا ظالمه؟
ما رديت عليهو وكنت حأطلع بس هو كان واقف لي جنب الباب، قلت ليهو هيثم زح لي خليني أطلع! اتكل في الباب و قال لي اسمي من خشمك بنقط عسل!
قلت ليهو احترم نفسك! ناسي نفسك وين؟ هسي لو جا زول شافنا! قال لي يعني بس المخوفك إنو يشوفنا زول؟ قلت ليهو بنهره ياخ احترم نفسك و ما تنسى إني معرسه! قال لي كنتي معرسه، قال ليك ما عارف إنو طلقوك؟ اصلا انتي لي أنا و بس، القسمه الشالتك مني رجعتك لي تاني، مصيرك تكوني مرتي يا ريله، قلت ليهو زح من وشي، و لمن جيت عشان اطلع مسكني من يدي بقوه و قال لي لسه مُصره تتجاهليني؟؟ شايفاني حيطه ولا مزهريه، قلت ليهو فكني ياخ! قال لي مالي ما راجل ولا ما مالي عينك، قلت ليهو هيثم عليك الله فكني من دون مشاكل، ما تفضحنا مع الناس! احترم نفسك شويه، قال لي أنا محترم نفسي بس انتي المُصره تتجاهليني! من جيتي من السفر بالغلط ما عاينتي لي ولا سألتي عني ولو شفتيني ما بتسلمي! قايله الحاجه دي ما بتوجعني؟
قلت ليهو بصوت راجف فكني يا هيثم.... فك يدي و دخل ل جوه و قفل الباب.... هنا أنا اتخلعت، قلت ليهو اقسم بالله ما تفتح الباب اصرخ و ألم فيك الناس كلهم، قال لي بس عايز اتكلم معاك.... طبعاً أنا إنفعلت و بقيت أقول ليهو انت حيوان ولا شنو افتح الباب دا و زح لي أطلع و هو شغال لي أنا بس عايز اتكلم معاك لزيتو و مسكت الباب و كنت ح افتحو بس هو ثبتو و جراني عليهو قال لي بإنفعال ما تجننيني أنا بس عايزك تسمعيني و .... فجأه كدا حسينا بلزه قويه للباب و فجأه ظهر أحمد أخوي في وشنا!
طبعاً من الخلعه و الموقف الشافنا فيهو ختيت يديني على خشمي و داك ولا بتفاهم و هيثم عارفو كويس فـ طوالي فكاني و لز أحمد و قام جاري و أحمد طوالي جرى وراهو و أنا خلاص جاني هبوط و ما عرفت أعمل شنو، مسافة أطلع برا و اصلهم الدنيا اتقلبت و الناس دي كلها بقت تصرخ، لمن وصلت الشارع الرجال ديل كلهم جارين قالو احمد شال سلاح و حلف يفضي الذخيره كلها في هيثم، قالوا الإتنين جروا على الترعه و الرجال مشوا يحصلوهم و عاد أم هيثم تبكي بأعلى حس و في الآخر هي ذاتا جرت تلحقهم و كتار المشو وراها من أهل هيثم و نحنا ما خلونا نمشي، طبعاً أنا بقيت ارجف من فوق لتحت، الليله أحمد لو كتل هيثم ح تبقى مصيبه!
أمي دي بس بقت خاته يدينها على راسها و شغاله ربنا يستر، ربنا يستر، و هناك ناس الصيوان هم و العرسان بقوا قاعدين محتارين!
طبعاً انا هبطت و عديل الوقوف غلبني ف قعدت و طوالي رانيا أختي و بنات عماتي و اعمامي و معاهم نفحات و بقوا شغالين لي ريله مالك، أمي شافتهم متلمين فيني خافت زياده و جاتني تولول قالت ليهم بتي مالا مالا ريله! و حاولت تقومني بس قلت ليهم ما قادره و كنت ماسه بطني بيديني الإتنين، حبوبتي وارفه و حبوبه النخيل رفعوني و قالوا لي حاسه بوجع ولا شنو؟ قلت ليهم بطني واجعاني و حاسه نفسي مهبطه، أمي قالت لي دي الخلعه الدخلنا فينا اخوك، ساكي ود الناس مالو كمان متين جا عشان يعمل مشاكل الله يستر عليهو و علينا!!.... طبعاً بنات عمي الصغار مشوا شمروا ليوسف و قالوا ليهو ريله تعبانه و هو بعد مشى قدام مع الرجال جا راجع طوالي لقاهم دخلوني جوه قال إلا يوديني الدكتور مع اني رفضت بس هو كان مُصر شديد و ما رضى يتفاهم معاي و ما اشتغل بكلامي و ناس أمي ذاتهم كانو مؤيدين كلامو، ف ساقني بعربية إلياس أخوهو و مشينا مستشفى جبرة الشيخ، طبعاً يوسف أول ما وصلنا كان بسأل عن دكتوره و قال ليهم عايز دكتوره ما دكتور ف لقينا دكتوره قابلتها و كشفت علي و قالت ماف شي خطير بس قالت لي مفروض تهتمي بنفسك، انتي حامل ولازم تتغذي كويس، المهم كتبت لي أدويه و يوسف مشى جابهم لي بعدها رجعنا لقينا الناس خفت و العرس خلص و ناس ام سياله ساقو العروس و مشوا، و قالوا هيثم شرد و الرجال لحقو أحمد و قلعو منو السلاح! طبعاً لمن نزلنا من العربيه ياداب قابلت إلياس، سلم علي و قال لي ريله يا ريله! شنو ياخ من جينا ما شفناك! قلت ليهو انشغلت مع العرس، قال لينا اها مشيتو المستشفى ان شاء الله كلو تمام، يوسف قال ليهو تمام الحمدلله، فجأه جات هنادي طالعه من بيتنا و هي شايله بتها الصغيره، أدتها لـ إلياس بزهج و قالت ليهو امسك بتك دي! طبعاً هي ما جابت رامي معاها، خلتو مع حبوبتو سنيه، إلياس قال ليها بسم الله مالك جنيتي ولا شنو؟! طبعاً كانت غضبانه غضب، قالت ليهو الجن في دا شنو؟ جايباها من الشارع أنا؟ مش انت برضو أبوها معناها.... قاطعها و قال ليها خلاص فهمت انك ما جايباها من الشارع!.... المهم يوسف دخلني جوه و كان ساندني و ماسك يدي رغم إني قلت ليهو كويسه، و كل ما أحاول افك يدي منو يمسكني بقوه أكتر و ما كان خجلان من أي زول لحدي ما دخلنا ليهم جوه و طمناهم و حكوا لينا الحصل، بعد يوسف فات أمي قفلت الباب و قالت لي سرعه قولي لي الحصل شنو هنا خلى أخوك دا يتجنن فينا كدا؟ طبعاً كانت قاعده معاي رانيا اختي، قالت لي احمد مسكوهو من هيثم جا يفتش ليك و كان حالف يرصصك و اتشاكل مع ابوي و أبوي ضربو كف!
أمي قالت لي والله لو ما حسام ساقو و مشى بيهو كان فضحك و فضحنا مع الناس!.... طبعاً خلعوني زياده! قلت ليها أنا ما عملت حاجه عشان افضحكم! قالت لي سمح الحصل شنو؟ ... قعدت أبكي و حكيت ليهم الحصل، أمي عضت اصبعها و قالت حيييييا أنا من هيثم دا! ولد الناس دا مالو عليكم الله! كم مره انضرب و كم مره انطرد و كم مره انرفض! هسي الليله لو كان احمد دا رصصو و كتلو ببقى ليهو سمح! ود الناس دا إلا كان ودر!! رانيا قالت ليها ياريتو رصصو هيثم دا تافه و قليل أدب كما جراءه و وقاحه و قلة أدب منو يتخطى الرجال ديل كلهم و يجيها داخل في البيت! والله يستاهل الكتل!
المهم الناس جات شافتني و كل واحد رجع بيتو ينوم و يرتاح بعد تعب العرس الشغل الحِله كلها، طبعاً كانو مخططين يعملو حفله و جرتق و قومه و قعده و عروووض بس بعد المشكله الحصلت دي أبوي و عمي نادر قالو ليهم سوقو العروس، طبعاً عشان هم ذاتم عاملين حفله هناك، المهم كان في هدوء في البيت بس كنت عارفه إنو في الحوش التاني في حوارات حاصله بين أبوي و ناس عمو سيد، كنا قاعدين و مترقبين و أنا عديل قلتها ليهم ما راجعه، ختو الغدا و قعدنا كلنا بناس حبوبه النخيل، الكلام دا بعد صلاة المغرب، فجأه كدا سمعنا صوت احمد اخوي و هو جايط، بعدها ظهر قدامنا و كان ماشي علينا و هو غضبان و بعاين لي عشره عشره، وصل العريشه و من دون مقدمات قال لي تاكلي و تقومي تلمي شنطتك و ترجعي مع راجلك، قال كدا و اتحرك و أنا طوالي وقفت على حيلي و قلت ليهو ما راجعه، أول ما إتلفتت علي كدا أمي وقفت و ختت يدها على خشمي و قالت ليهو سمح يا احمد، لمن مشى بكيت و قلت ليها ما راجعه معاهو يعني ما راجعه، حبوبتي قالت لي مابياهو مالك؟؟ الراجل دا قاعد يضربك؟... هنادي قالت ليها يضربها شنو؟ والله صوتو ما قاعد يرفعو عليها!!.... حبوبه النخيل قالت لي كدي قولي بسم الله يا بتي و ختي الرحمن في قلبك، يوسف لو طلقك طلقك في لحظات زعل و لمن عرف غلطو اتراجع و جا رجعك، ما تصعبيها و تعقدي الموضوع، أمشي معاهو و أديهو فرصه تانيه و شوفي البحصل شنو، لو ما عشانو عشان ولدكم الجاي دا!
حبوبه وارفه قالت ليها صدقتي يا حجه النخيل، و كونو جا و اعترف بغلطو و قال داير مرتو دي براها خطوه كويسه و دليل على إنو ما قنعان من مرتو و داير يستمر معاها! أمي قالت ليهم لكن هو داير يعرس فيها! ليه تجبروها تقبل الضره! خالتو نبيله قالت ليها عرس وين ؟ وينو العرس؟ والله لا داير يعرس لا في زول جاب سيرة عرسو تاني، لو يوسف داير يعرس ما كان جا عشان يرجع مرتو!
المهم قعدوا يتكلمو في الموضوع و أنا بس ببكي و شغاله ليهم ما راجعه معاهو، رانيا قالت لي هوووس والله هسي احمد لو سمعك يعمل ليك مشكله! فجأه احمد اخوي جا و من الحوش قال ليهم البت دي جهزت نفسها ولا لسه ؟
طوالي طلعت ليهو برا و قلت ليهو انا ما ماشه يعني ما ماشه، جا علي بإندفاع و قال لي احسن تحترمي نفسك عشان ما اقبل عليك انتي كمان، قلت ليهو بصوت باكي بس جنك تتحكم في الناس و تغصبهم على أي حاجه! طبعاً عصب شديد و انفعل و أمي و حبوبه و عمتي شاديه طوالي جو وقفو بيني و بينو، عارفنو ما عندو أخلاق! و رانيا شغاله لي عليك الله اسكتي يا ريله، طبعاً هي بتخاف مووووت من احمد ، طوالي اتخطيتو و مشيت الحوش البهناك، بس ما اتجرأت أدخل الديوان و اتجادل مع ابوي قدام ناس عمو سيد، ف وقفت جنب الديوان و بقيت أنادي على أبوي من جوه الديوان بصوت باكي طوالي يوسف جاني طالع لقاني ببكي و وراهو جو أبوي و عمو سيد و إلياس و عمي نادر، عاينت لأبوي و قلت ليهو أنا ما راجعه معاهو، طوالي أحمد جاني طاير و قال لي والله ترجعي رجاله ولا على كيفك! قايلانا بنشاورك نحنا! أبوي قال ليهو احمد خليك ساكت! أحمد انفعل زياده و قال ليهو البت دي راكبه راس عشان انت مدلعها و مخليها على راحتها، مراه راجلها جاي يسوقها البقعدها شنو في بيت أبوها؟؟
طبعاً كلامو زعلني زعل، قلت ليهو انت مالك و مالي مش قاعده في بيت ابوي!!....طوالي جا علي و رفع يدو عشان يضربني بس يوسف مسكو و قال ليهو اياك تضربها! عمي سيد قال ليهو لا يا احمد المواضيع ما بتتحل بالطريقه دي! دي اختك في النهايه! قال ليهم ياخ البت دي ما بتسمع الكلام، مقويه راسها و عامله فيها ما بتسمع كلام زول! طبعاً جاط شديد و حبوبه طوالي جات ساقتني الحوش البهناك عشان أحمد ما ينفعل زياده، حبوبه قالت لي عليك الله يا بتي اسمعي الكلام و ما تشيلي الناس حالك! ارجعي بيتك مع راجلك و لو الوضع ما عجبك تعالي راجعه! احمد دا منفعل شديد ما ح يتفاهم مع زول، قلت ليها هو احمد سلام ما سلم لي جاي يتحكم فيني و يفرض قراراتو علي؟!😭😭
طوالي احمد جا تاني و قال الناس ديل ماشين، عاين لي و قال لي من دون شنطه ترجعي معاهم، طبعاً ناس حبوبه النخيل كانوا مجهزين نفسهم عشان عمي سيد كلمهم انهم ح يرجعوا الليله، دخلت جوه و أمي جات لاحقاني و قالت لي امشي يا ريله اسمعي الكلام و لو حصل اي شي ما عجبك تعالي راجعه، هسي أخوك دا ما بتفاهم مع زول، احمد جانا داخل جوه و قال لي قومي يا ريله! أمي وقفت ليهو و قالت ليهو عشان شفتها مع الحيوان داك جاي تتهمها و ترجعها لراجلها الطلقها من دون ما يتردد بالبساطه دي!... قال ليها قلة ادب ما بتنفع معاي،طلقها و رجعها المقعدها شنو؟؟ ما معقوله كل مره جايه وحده راكبه راس و مصره ما ترجع بيتها! .... طبعاً قال كدا عشان قبل كدا رانيا اختلفت مع راجلها و جات قعدت معانا شهر و لمن جا يسوقها حلفت ما تمشي، ف احمد زهج و زفتها معاها و خلاها تمشي معاهو بالغصب!
المهم احمد قال لأمي امرقي ليها شنطتها و لو ما مرقتيها ترجع بالتوب اللابساهو دا ما عايز أي قلة أدب و...... فجأه سمعنا صوت يوسف بنادي ريله يا ريله!
احمد طلع ليهو و قال ليهو هسي بتطلع، قال ليهو عايز اتكلم معاها، أمي قالت لي اطلعي ليهو، صلحت توبي كويس و طلعت ليهو و أنا صاره وشي، احمد مشى خلانا و امي طلعت من جوه و قالت لينا خشوا جوه.... بعد دخلنا جوه قال لي ما عايزك تزعلي نفسك، و زي ما قلت ليك ما ح يحصل إلا العايزاهو انتي، أنا رجعتك على ذمتي بس ما ح اجبرك على الرجوع بما انك رافضه الرجوع للدرجه دي! ... طلع قروش كتيره من جيبو و قال لي خليها معاك و كل فتره برسل ليك، عايزك تهتمي بنفسك و ما تخلي شي يضايقك، اهم شي راحتك.... قال كدا و وقف على حيلو و مد لي يدو و قال لي يلا مع السلامه! بتردد مديتو ليهو يدي مسكها شديد و نزل راسو باسني على جبيني و قال لي يلا في أمان الله و طوالي طلع و أنا بقيت زي الصنم و ما مصدقه الحصل دا كلو!
ناس حبوبه النخيل جوا ودعوني و طلعوا، نفحات قالت ليها افتحي تلفونك يا زوله و اووووعك تقفليهو تاني، المهم بعد مشوا احمد دا جاط فيني شديد و أبوي شاكلو و قال ليهو كيف تتكلم كدا مع اختك قدام الناس! المهم احمد زعل و طلع من البيت!!
طبعاً الموضوع دا اتقفل و كلهم سكتو و تاني ماف زول اتكلم معاي فيهو..... فتحت الدولاب طلعت منو تلفوني و لمن فتحت لقيت فيهو كميه من المكالمات كانت من يوسف قبل ما يجي هنا و بعد ما جا، و كمان من ناس نفحات و رسائل كتيره في الواتس منها، طبعاً لقيت رساله من يوسف قبل ربع ساعه كاتب لي :
ريله حبيبي أنا ماشي و مخليك وراي، غصب عني والله، رغم إني عايزك تكوني معاي، عايزك ترجعي بيتك و نرجع زي زمان بس ما بقدر اغصبك على حاجه انتي ما عايزاها، حاسي روحي ح تطلع لأني ح أرجع "بخفي حنين" انتي ما عارفه الخيبه الأنا حاسي بيها و الراجع بيها، زي الزول البمشي البحر و برجع عطشان، ريله انتي مرتي و حبيبتي و حياتي، بدونك أنا ولا شي و بدونك حياتي ماف ليها داعي!
و أنا بقرا في رساله دي دموعي جات نازله! بقيت أعيد قرايتها كل مره أخلصها فيها لحد ما فجأه كدا صوت الحركه كتر برا و بقيت سامعه صوت همسات بعدها سمعت أمي بتقول لا حول ولا قوة إلا بالله.... لا حول ولا قوة إلا بالله!!
طبعاً قلبي بقى يدق بسرعه.... طلعت برا بإستعجال لقيت احمد أخوي و أبوي واقفين مع أمي و حبوبه و حبوبه خاته يدينها على راسها و هي ما بتعمل الحركه دي إلا لمن يكون في مصيبه أو زول اتوفى! قلت ليهم مالكم في شنو؟؟ .... كل الأنظار اتوجهت علي! سكت سااااي و أنا خوفهم زرع الرعب جواي، ختيت يدي على قلبي و قلت ليهو أبوي في شنو!.... قال لي اتصلوا علي هسي و قالو نسابتك عملو حادث خطير في الطريق و في وفاة !
" إذا كان يُرضيك الفراقُ فإني رضيت بما يُرضيك ."
و "كم من فراقٍ مر ثم نسيته
إلا فراقّك شد عن قانوني "
و"معاذ الله ما أنهيت وداً بدأته
إلا بعدما رأيت أنه قد هان ودي.!!
يتبــــــــــــــــــــــــــــــــــــــــــــع..
لقراءة جميع فصول الرواية من هنا