رواية ريله الفصل العشرون 20 بقلم مها حولي الزاكي
اتفاجأت لما شفتها! ما خطر على بالي انها تجينا! قلت ليها عمتي سنيه!!...اتفضلي ومديت ليها يدي، سلمت علي ببرود ودخلت وهي تتلفت سااااي في البيت، لما دخلنا جوه قالت لي يوسف وين ما موجود؟! قلت ليها ايوه ما موجود!
دخلت المطبخ جبت ليها مويه، أديتها ليها ورجعت تاني عملت ليها عصير، قالت لي جيتي من أهلك ونزلتي بيتك الجديد طوالي وتاني ما إتلفتي على زول، ويوسف ذاتو تاني ما سأل من زول! ئهه حتى ما قلتوا للناس انكم راحلين، يعني فجأه كدا نتفاجأ بيوسف رافع عفش بيتو!
قلت ليها أنا ذاتي ما كنت عارفه، يوسف لما ساقني من أهلي جابني هنا طوالي، قالت لي وانتِ ما صدقتي عشان كدا ما رجعتي تاني!😊
طبعاً كانت عايزه تلومني بأي طريقه! قعدت قصادها وقلت ليها أرجع لشنو؟!
قالت لي كنتِ تجي تشوفي الناس و تديهم طله، جاراتك ديلك ما كان بقصروا منك..... طبعاً هي ما قادره تقول لي عديل: ما جيتي شفتينا وعرفتي الحاصل بينا، أنا مع إنو يمنى حكت لي الحاصل هناك في بيتهم بس ما اهتميت ولا ح اهتم، قلت ليها أنا الرحلت مفروض جاراتي هم اليجوني ولا أنا أمشي ليهم؟!.... فعلاً هم ما قصروا جوني كلهم قبل يومين وقيلوا معاي، خالتو نبيله ذاتا جات قبلهم هي و نفحات، وأنا ما بقصر منهم ولا بقيف منهم وطوالي حأكون معاهم!
رجعت تاني وبقت تتلفت في البيت، قالت لي أجرتوهو بكم؟! قلت ليها ما عارفه والله، يوسف ما قال لي، إلا تسأليهو....
قالت لي لسه في مواعيد رجعتو القديمه ولا حتى مواعيدو اتغيرت؟ قلت ليها لسه في مواعيدو، وقفت على حيلها وقالت لي معناها ما بجي هسي، أنا ماشه، قلت ليها عليك الله اقعدي شويه يا عمتي سنيه.... ممكن اتصل ليك عليهو عشان يجيك!
قالت لي لا ما تتصلي وطلعت مشت طوالي وما انتظرتني أقدمها!!
طبعاً حيرتني وما فهمت جيتها دي! يعني هي جايه تشوف البيت ولا جايه تشوف يوسف! جايه تطمن علينا ولا جايه تعاتبنا!
المهم بعدها طلعت مشيت لجارتي بالحيطه، قاعده تجيني طوالي وأصرت إنو أجيها،لما جيت راجعه لقيت يُمنى واقفه جنب الباب بتضرب في الجرس! شافتني وسلمت عليها، قلت ليها كنتِ تتصلي علي، قالت لي جيت هسي، طلعت المفتاح وفتحت الباب ودخلنا جوه، قالت لي طبعاً دي جيتي من الجامعه، قلت ليها اها كيف عامله مع الجامعه؟! قالت لي تمام، شغاله امتحانات آخر سمستر في السنه دي، والبعديها خريجه ان شاء الله، قلت ليها موفقه،دخلت المطبخ جبت ليها مويه وعصير، طبعاً دائماً بعمل عصائر وبخليها جاهزه في التلاجه، ما بحب الضيف الناس مويه ساده، العندي بقدمو ليهم، ختيت الصينيه قدامها، كانت فاتحه تلفونها بتحضر فيديوهات، فجأه قالت لي ريله!! الولد دا أخوك ولا أنا عيوني دي ما بتشوف كويس!
قلت ليها كدي....قعدت جنبها وعاينت لتلفونها، كانت فاتحه التيك توك و الفي الفيديو أحمد اخوي، قلت ليها ايوه دا أحمد، قالت لي دائماً فيديوهاتو بتظهر لي مع إني ما متابعاهو، بس يمكن التيك توك بعرضها لي كـ محتوى شبيه بالمحتويات الأنا بتابعها، طبعاً أنا بحب الشعر و الشعراء والحاجات الزي دي، قلت ليها أحمد نفس الشي، حتى إنو بكتب شعر و بنزلو في حساباتو، قالت لي غريب ما ظاهر عليهو! قلت ليها ح يظهر عليهو كيف يعني؟😅
قالت لي ما فهمتيني، الزول البكتب شعر، بكون زول حساس و عميق بس أخوك بحسو عكس كدا! ما ناسيه أيام كنا في المستشفى لما ناس أبوي عملوا الحادث داك، أخوك مره هرشني لما اتخلعت! أبوي ما حصل هرشني هرشه زي دي!
قلت ليها هرشششك!😂 ليه عملتي شنو انتِ؟! أحمد بالغ!
قالت لي يوم لما كنا كلنا في المستشفى أبوي مش قال لينا ارجعوا البيت، وقال هو بس الح يقعد ما يوسف، يومها نحنا اعترضنا بس خلانا نمشي غصب عننا، اليوم داك وصلنا البيت اخوك، يلا قبل ما نمشي برا جنب المستشفى أنا قعدت أقول ليهم ما ماااشه،وكنت راجعه أدخل جوه، قام أخوك هرشني هرشه واحده خلاني ارجف من الخوف، ورجعت معاهم عن سكات.... قلت ليها معقوله يمنى بتخاف وتخلي زول يهرشها!
قالت لي النصيحه أخوك هرشتو صعبه، بس يا زوله ما سكت ليهو، تاني يوم طوالي اتشاكلت معاهو، ف قعد يقول لي عني بت لئيمه، قلت ليها هو ذاتو لئيم، قالت لي الله يعين خطيبتو ولا هي مرتو، ما عارفه مستحملاهو كيف!
ضحكت وقلت ليها دقيقه دقيقه! من القال ليك إنو أحمد أخو خاطب أو معرس عديل؟!.... ماف أي كلام بالشكل دا، قالت لي شنوووو!! غريبه قايلاهو معرس والله، عادة ناس البلد بعرسو من بدري، قلت ليها أحمد ما خاتي فكرة العرس في بالو، ما عارفنو عايز شنو بالضبط.... يمكن لسه ما لقى البت المناسبه، قالت لي أخوك دا رافع السعر، وشكلو عايز ليهو بت رئيس أو وزير،قلت ليها الله هو بفكر في شنو، نشوف في الآخر بعرس منو....قالت لي أياً كانت ربنا يعينها عليهو.... مع احترامي ليك، قلت ليها عادي، كلامك ما فيهو شي، طبعاً أنا لحد اللحظه ديك كنت مستغربه وما قادره ألقى تفسير منطقي لتغيرها معاي 180 درجه! كيف فجأه كدا بقت تطيقني وتجي تتونس معاي!
قالت لي طبعاً أنا شكلي ح أطفش من البيت، قلت ليها ليه مالك؟!
قالت لي البيت بقى عباره عن مشاكل! بالجد بقيت أصدع عديل! أول ما أجي داخله بلقى شكله قدامي، مره أمي وهنادي و حبوبتي الزينه، و مره أمي و أبوي، و مره حبوبه و إلياس، ومره إلياس و أبوي، ومره إلياس وهنادي، اتخيلي بجوا يتشاكلوا في بيتنا!؟....أبوي ذاتو زهج وبقى يرجع البيت متأخر بسبب المشاكل دي، لما يجي أي زول بجي يشكي ليهو براهو، أمبارح زهج منهم وهرشهم كلهم وقال لناس أمي دا العملتنو انتن، تاني أي زول يتحمل نتيجة أفعال وماف أي زول يجي يشكي لي تاني!
طبعاً الصدمه يا ريله إنو بدور طلعت ما هينه! ساي كانت كاتله حيلها! أنا من يومي ما بحبها بس أمي كانت عامله ليها قيمه، يلا مش كان قلت ليك أم بدور جات وعملت جوطه وشكله كبيره في البيت وقالت يفرزوا لبتها عيشتها واتناقشت مع أبوي؟!... يلا ابوي غصب إلياس يسكنها في بيت براها، طبعاً سكنت في بيتكم، يلا أقول ليك سبب مشكلتها مع أمي شنو، خليل أخوي وأولادو قالوا جاين السودان، أمي فرحت وقالت يخلوا ليهم بيت يوسف يجوا يسكنوا فيهو، طبعاً أمي من زمان كانت عايزه خليل يرجع ويسكن جنبها، المهم أمي قالت ل بدور بيتنا واسع، اسكني معانا بيجاي وخليل ومرتو وأولادهم يسكنوا في بيت يوسف، يلا ديك طوالي انتفضت وطلعت من كيسها وقالت ما بتقعد مع أي زول،عايزه بيت براها، طبعاً أمي انصدمت فيها فـ حصلت بيناتهم نقاشات كتيره، اتدخلت حبوبه ووقفت في صف بدور وقالت كلامها صاح ماف زول يسألها، اها أمي برضو اتشاكلت مع أمها والحكايه جاطت، ف بقى في توتر حاصل، زول داير زول ماف!بالجد تعبت منهم وبقيت أصدع بسبب جوطتهم!
قلت ليها ربنا يعينك و يطايب النفوس، طبعاً ما زدت حرف على الجمله دي!
المهم قعدت اتونست معاي وساعدتني أعمل الغدا، مع انها قالت ما بتقعد تتغدا بس حنستها، و في الآخر رضت أول ما جهزنا الغدا يوسف جا، لما لقى أختو قال ليها شايفانا في منامك ولا شنو؟😂
قالت ليهو تاني ما بجيكم، شكلها جيتي دي ضايقتك، قال ليها يا بت انتِ هبله ولا شنو، بس عشان ما من عوايدك!
قالت ليهو خلاص من اليوم زيارتي ليكم ح تبقى من عوايدي! قال ليها أهلا وسهلا بيك في أي وقت!....المهم قعدنا التلاته وبقينا نتغدا وهو سأل أختو عن جامعتها وناس بيتهم ف حكت ليهو الحاصل كلو، قلت ليهو يوسف بالمناسبه قبيل أمك جات، قال لي والله؟!
قلت ليهو اي والله، سألت عنك وما قدرت تنتظر لأنك ح ترجع متأخر، قال لي والله ما اتوقعتها منها بعد آخر نقاش حصل بيناتنا بسبب الرحول! يمنى قالت ليهو والله يا يوسف يوم رحلت أمي بكت بكى التقول مات ليها زول و لسه بتهاتي بيك!.... قلت ليهو يوسف انت ذاتك بالغت، مفروض تمشي ليها وتطيب خاطرها، كل يوم بكلمك بتمشيني وبتقول كويس بس ما بتمشي!
سكت مساااافه بعدها قال لي بكرا ان شاء الله ح نمشي ليهم.... طبعاً أنا سكت وما حبيت أقول ليهو قدام أختو أمشي براك، يوسف من واجبو يمشي يزور أهلو ويطيب خاطر أمو وياخد رضاها، بس أنا ماف داعي لـ مشيتي، لأسباب كتيره أهمها إنو ماف زول من نسوان بيتهم غير يُمنى جانا حمدل لي السلامه لما أجهضت، عمتي سنيه الجات قبيل ديل كيفك أو الله يعوضك ما قالتها لي!
______________________________
_وعليكم السلام
=ايييك لمن نسيتك!
_...؟؟؟
=شنو الإستفهام؟!
_يعني أكيد انتي ما ساي رسلتي لي!
=اي
_.….
=عاين ما بحب زول يسفهني، ليه تقرا الرساله وما ترد؟
_"اي" دي مفترض أرد عليها بشنو يعني؟
=انت عارف أنا منو ولا لا؟
_شكلك في معلومه مهمه مهمه شديد رايحه عليك :"لا يعلم الغيب إلا الله"
=على فكره دا استهزاء منك!....اسمي واضح
_ واضح لكن انتي منو مااا بعرفك!
=بالله!.... يمنى سيد.... ما حصل مره عليك الإسم دا؟
_لا
=ماف داعي للإحراج و البياخه..... ياخ غلطانه أنا! تمام يا زول آسفه على الإزعاج
_النسابه
=😏😏 ما قلت ما بتعرفني
_اتذكرتك البت اللئيمه....خير
=على فكره ماف زول لئيم غيرك!
_.......
=ياخي أنا بكررره الحركه دي! ما تقرا الرساله وما ترد عليها!
_طيب يا يمنى سيد اتواصلتي معاي بخصوص شنو؟
=مرسله لي طلب صداقه ليهو قرن عديل، لو تكرمت يعني وختيت غرورك على جنب و وافقت عليهو
_جداً ما عندك مشكله
=شكراً يا أحمد، طلع عندك ذوق
_.....
=مبالغه طبعاً! انت غيااااظ وثقيل، عارفاك بتعمل كدا قاصد عشان تغيظني
______________________________
تاني يوم يوسف جا بدري من شغلو عشان يسوقني معاهو ناس أمو، قلت ليهو يوسف أمشي انت أنا ما ماشه!
قال لي أمي لما جات هنا سمعتك كلام فارغ أو ضايقتك؟
قلت ليهو لا ما حصل، بس في علاقات يا يوسف الواحد مهما حاول يصلحها بفشل،في علاقات مكتوب ليها تكون كدا متوتره، ومحاولات تحسينها تعب واستنزاف طاقه، قال لي الغريبه إنو قبل كدا أهلي ديل زعلوك كتير وغلطوا في حقك، بس ما حصل شكيتي أو وقفتي منهم؟!هسي الحصل شنو؟!
كنت بزعل منهم وبقرر ما أمشي ليهم، بس بعاين لعم سيد و بعاين ليك انت و بلقى عذر لعمتي سنيه، بقول هي عايزه مصلحة ولدها عشان كدا بتتعامل معاي كدا بس .... المهم يوسف انت أمشي، أنا ما عايزه أقول اي شي عن أهلك، في الأول و الآخر ديل أهلك، مهما يحصل ما تقيف منهم!
قرب مني وباسني على جبيني وقال لي يا بختي بيك! ربنا يحفظك يا ريله ويخليك لي ويقدرني أسعدك❤️
قلت ليهو ماشه اجهز لي ملابسك، دخلت جوه طلعت ليهو ملابس كانت مكويه بس برضو أديتها مكوه خفيفه، فجأه هو جاني داخل وكان زي الزول الإتذكر حاجه، ابتسمت وقلت ليهو مالك عامل كدا؟!... قال لي أمي لما جاتك أمبارح ما قالت ليك حاجه؟!...ما جابت ليك سيرة الإجهاض أو كدا؟!
ابتسمت ابتسامه باهته وقلت ليهو: يوم أجهضت ماف زول جا قال لي شي، معقوله يجوا يقولوا الشي دا بعد المده دي؟!...المهم يوسف ما تفكر كتير، أمشي أهلك،طبعاً بقى متردد! قلت ليهو ماف شي يخليك تتردد يا يوسف، دي أمك في النهايه، أمبارح جات ما لقتك، اليوم انت أمشي ليها.... المهم في الآخر هو جهز نفسو ومشى، قال ما ح يتأخر، بعدها أمي اتصلت علي،و سألتني عن حالي وأحوالي وإذا في مشاكل حاصله معاي، قلت ليهو الحمدلله يا أمي ماف أي مشاكل، كلو تمام، طبعاً هم عارفين اننا رحلنا، سألتها عن ياسر، قالت لي يا حليلو رجع أمبارح،لأنو بعد دا خلاص امتحاناتهم قربت، قلت ليها أبوي، حبوبه وعماتي واعمامي وعيالهم كيف عليك الله، قالت لي كلهم كويسين بسألوا منك ساااي،لكن هسي معظمهم ماف،مشوا لـ مرت أبوك، قلت ليها ان شاء الله عافيه؟!
قالت لي قالوا بتها مرضت ورقدوها مستشفى، قلت ليها لا حول ولا قوة إلا بالله!! متين الكلام دا،مالا سمر! قالت لي ما عارفه مالا، قالوا أول أمس مرضت ولما ودوها الدكتور رقدوها،حبوبتك و أبوك من أمبارح معاهم والليله عماتك و نسوان اعمامك مشن لحقنهم مع حسام، قلت ليها يمه وانتي لشنو ما مشيتي معاهن! قالت لي مرت أبوك دي لسانها طويل وجنها مطاعنه بالكلام وأنا ما عندي ليها أخلاق، لو مشيت يا كفتها يا كفتتني، حبوبتك ذاتا مشت لحقتهن مع حسام، قلت ليها والله هم لئيمين وسمر دا ذاتا ما هينه ورافعه نخرتها لكن في ظرف زي دا الناس بتخت مشاكلها على جنب يُمه،أمشي ألحقينها ان شاء الله تداري اللوم ساي!
قالت لي خلاص كدي النشوف الماشي منو أمشي معاهو، قلت ليها سمح لما تصلي أضربي لي ولا أقول ليك هسي بتصل على ابوي نهاي ما جاب لي سيره! قالت لي كويس، لكن كدي قبل ما تقفلي يا ريله اسمعيني، قلت ليها اها قولي يمه،قالت لي انتي بت ناس حجه النخيل ربنا يرحمها اسمها منو؟!قلت ليها خالتو نبيله؟!قالت لي لا لا بت نبيله ذاتا؟!
قلت ليها نفحات، قالت لي اي البت دي مخطوبه ولا ناضمين فيها؟!
قلت ليها لا ليه؟! قالت لي والله لو في قسمه دايراها لأحمد ولدي، طبعاً ابتسمت، قلت ليها والله ما عارفه يمه لكن انتِ ما تستعجلي عشان ما تختي نفسك في حته ضيقه، ما معروف يمكن أحمد ما يوافق، قالت لي اتطمني لو ما شاورت أحمد ما بفتح الموضوع دا مع زول، بنياتنا الهنا ديل كلها محجوزات ومخطوبات وناضمين فيهن، والفضلن ديل،لسه صغار شديد، لكن بت نبيله دي النصيحه عجبتني،ان شاء الله تبقى قسمة ولدي، قلت ليها ان شاء الله، المهم بعد داك قفلنا من بعض وأنا بديت أفكر في الموضوع، طوالي اتصلت على نفحات وبقيت اتونس معاها، بيجاي بيجاي سألت وعرفت إنو حالياً ماف زول في حياتها، قالت لي بتسألي مالك، عندك لي عريس ولا شنو؟! قلت ليها غيتو ما عارفه لكن كدي أصبري شويه، قالت لي اتحمست والله، غيتو في "إن"في الموضوع، في عريس جا طلبني منكم ولا شنو؟!😂
قلت ليها ما عايزه استعجل، كل شي في وقتو حلو، قالت لي أنا ذاتي فترت من القرايه دي، عايزه أعرس، قراية الكبر حاره🤣🤣ان شاء الله العريس يكون بنفس مواصفاتي، قلت ليها مواصفاتك شنو انتِ؟
قالت لي يكون راجل بالمعنى الحرفي، يكون كريم، قلبو حار، وسمح سمح سمح..... في سري قلت ليها كل المواصفات دي موجوده، قالت لي اها سكتي مالك؟!لو ما فيهو المواصفاتي دي خارجيهو طوالي يا صحبتي، قلت ليها لا لا اتطمني المواصفات دي فيهو، قالت لي قولي لي هو منو؟!
قلت ليها نفحات صراحة ما عايزه استعجل، ما ح أقول ليك هو منو،في وحده انتِ عجبتيها وهي عايزاك لولدها بس لسه ما كلمت ولدها، قالت لي والله أنا عاجبه نسوان كتاااار ومن زمان كل وحده تغشني وتقول لي حاجزاك لولدي....المهم قولي ليها استعجلي في إقناع ولدك، قبل ما يجي ولد وحده يشلبني من ولدك.... ضحكت ضحك وقلت ليها سمح، ربنا يجعل الفيهو خير🦋🤍
قفلت منها واتصلت على ابوي وسألتو عن سمر أختي، طبعاً هي أكبر بت ليهو من مرتو التانيه، قدر ياسر أخوي، ممتحنه شهاده سودانيه، المهم طمني عليها وقال لي بكرا ان شاء الله بتطلع من المستشفى، قلت ليهو خالتو سهيله أسلم عليها، طبعاً دي مرتو، فعلاً أداني أسلم عليها واسألها عن بتها....
المهم بعد يومين خليل أخو يوسف وأسرتو جوا السودان، مشيت مع يوسف سلمنا عليهم، خليت يوسف قاعد معاهم ومشيت قيلت مع ناس خالتو نبيله، طبعاً نفحات تحنس فيني سااااي عشان أقول ليها العريس منو بس خشمي ما فتحتو، طبعاً يمنى جاتنا وقعدت تتونس معانا، العرفتو انها اتصالحت مع نفحات وخالتو سنيه ذاتا اعتذرت من خالتو نبيله، حكوا لي حاجات كتيره، وجابوا لي سيرة إزدهار، نفحات قالت لي طبعاً هي زعلانه منكم من يوم يوسف اتشاكل مع راجلها أسعد، طبعاً نحنا ذاتنا عامله فيها زعلانه مننا ووقفت من بيتنا.... احسن ذاتو نرتاح منها ومن شحدتها الكتيره، يمنى قالت ليها دي مستهبله ساي ماف زول شغال بيها، راجلها فوق ما هو غلطان طعن يوسف كمان وهي دا كلو ما شافتو! وبعدين هي من نحنا عرفناها عرفناها بتنبذ راجلها وما بتطيقو ولا هو بطيقها، وهسي جايه تعمل نفسها زعلانه عليهو عشان يوسف اتضارب معاهو!! شي عجيب والله!!
خالتو نبيله قالت ليهم خلوها ساااي بكرا بفرق معاها، براها بتجي راجعه، هي المحتاجه للناس وماف زول محتاج ليها، يمنى قالت لي هسي من رحلتوا جاتك؟! قلت ليها لا والله ما جات!
المهم اتونسنا كويس وقيلت معاهم،طلعت منهم بعد المغرب، طبعاً حلفوا إلا اتغدا معاهم، بعد داك يوسف اتصل علي وقال لي نرجع بعد دا، مشيت ليهم ودعتهم وأنا واقفه ومرقت طوالي قبل يوسف و رجعنا البيت....
المهم بعدها عدت الأيام، بمشي لجاراتي الجداد وهم بجوني وعلاقتنا طيبه، يمنى بقت متواصله معاي طوالي وبتسأل عن أحوالي، أنا لما شفت تعاملها كويس واتغيرت قررت أصفي نيتي واقبل تغيرها الكويس دا ناحيتي، فـ بقت زي نفحات قريبه لي، و التلاته عملنا قروب بقينا نتونس فيهو على طول، المهم يوم يوسف جا وقال لي ريله تعالي، لما جيتوا قال لي اقعدي، لما قعدت قال لي انتِ حلمك شنو في الدنيا دي؟!....قصدي ما عندك أهداف أو طموحات! ضحكت وقلت ليهو هدفي الوحيد إنو كل يوم أكون أحسن من اليوم القبليهو، قال لي كيف اشرحي لي؟!....قلت ليهو مثلا لو اليوم عملت أكله معينه وما ظبطت معاي، بكرا بحاول أظبطها وأخليها تطلع أحلى من اليوم القلبها!
سكت مسااافه بعدها قال لي ريله انتِ ما نفسك تقري الجامعه؟؟!
طبعاً حسيت نفسي بحلم! ضحكت وقلت ليهو جامعة شنو!
قال لي جاوبيني، نفسك ولا لا؟!
قلت ليهو والله لو لقيتها ما بأباها!
قالت لي كنتِ علمي أحياء صح....عايزا تقري شنو؟! قلت ليهو والله ما عارفه، الجامعه ما كانت واحده من أهدافي.... قال لي طيب تعال خلينا نشوف المجال الطبيه البتناسبك وممكن تقدمي فيها،جيت قعدت جنبو فتح تلفونو وبقينا نشوف في فيديوهات، رقدت على كتفو وقلت ليهو يوسف و اتثائب، قال لي معقوله نعسانه من هسي!؟ قلت ليهو ما نعسانه لكن فترانه، لي كم يوم كدا حاسه بتعب، وحمى بليل، وصداع، قال لي ليه ما كلمتيني!؟ ريله انتِ ليه ما بتهتمي بصحتك؟!
قلت ليهو عادي، على قول أحمد أخوي المرض ما شي جديد، قال لي لا لا هسي دي قومي أرح المستشفى، قلت ليهو الموضوع ما مستاهل و.....ختيت يدي على خشمي لما حسيت نفسي ح استفرغ، قمت طوالي و جريت الحمام وبقيت استفرغ، يوسف جا لاحقني وهو مقلق، قال لي عيانه قدر دا وتقول لي الموضوع ما مستاهل!! يمكن دي ملاريا، المهم جهزي نفسك خلينا نمشي، طبعاً كان مُصر شديد، المهم طلعنا ومشينا سجلنا وقالبنا الدكتور وحكيت ليهو عن الأعراض، أداني فحص عشان أعملو، عملتو وبقينا قاعدين في الإنتظار، منتظرين النتيجه، لما طلعت شلناها ومشينا بيها للدكتور، شالها وبقى يعاين ليها بعدها قال لي عندك ملاريا، انتِ مفروض تهتمي بنفسك أكتر وانتِ في الوضع دا!...يوسف قال ليهو بتوتر وضع شنو؟؟... عاين لينا الإتنين بإستغراب كدا وقال لي انتِ ما عارفه انك حامل يعني؟!
طبعاً اللحظه ديك حسيت الدنيا لاااافه بي! عاينت ليوسف وأنا متفاجأه كأنو دي أول مره اسمع الجمله دي! أنا الحمل دا ركنتو بعيد وبقيت ما بفكر فيهو وما بتوهم وما بركز مع أي أعراض عشان ما أرجع تاني لنفس النقطه و أتعب نفسياً!!
يوسف قال ليهو متأكد يا دكتور! قال ليهو دي النتيجه! من الأعراض وشكل زوجتك عرفتها حامل و قررت ليها تعمل فحص حمل وملاريا و الإتنين موجودات عندها بس ما قايلها ما عارفه نفسها، الجنين ياداب في الشهر الأول.... طبعاً بقيت مخلوعه، عايزه أفرح وخايفه من الفرح! اتكون جواي خوف كبير وإحساس بإنو الفرحه دي ما ح تكتمل! يوسف عكسي كان فرحان شديد وأنا قلبي بقى يدق بسرعه، ودموعي جات نازله،اطرافي ارتعشت والخوف سيطر علي كأني ح ألدي هسي!!
نطمئن حين نكفّ عن الركض خلف كل شيء، حين نمضي بإيمان، بأننا عندما نبذل الأسباب، فإن الله يتولى النتائج
نطمئن حين ندرك أن الأماني التي خبأناها في سجدة، لم تُنسَ، بل تُصنع على مهلٍ،وستأتي
وها هي الأحلام، شيئاً فشيئاً، تقرع الأبواب، تقترب، تكبر، تتحقق... لا بضجيج، بل بهدوء يشبه اليقين
فلا تتعجل الوصول... فقط امشِ مطمئناً، فالذي كتب لك الأمل، لن يضيع منك الحلم
يتبــــــــــــــــــــــــــــــــــــــــــــع..