رواية شتات الفصل الثاني 2 بقلم مها حولي
لما خالتي و احمد وصلوا، جونا في البيت طوالي،خالتي رقدت على طول بسبب تعبها و إرهاقها من المرض، أحمد قال لينا عندها ملاريا و إلتهاب في البول، امي قالت ليهم مالكم ما كلمتوني؟ لو ما الاء دي جات ما كان عرفت! أحمد قال ليها والله حالتها كانت صعبه، ما قدرت انتظر بيها زول بس كنت خاتي في بالي اتصل اكلمك بس انتِ سبقتيني!
أمي وخالتي بقوا مشغولين بالكلام مع بعض و الاء بتتونس مع اخواتي وانا ماسكه تلفوني، كنت بقرا في آخر رساله منو :
_ صدقيني الكلام القلتو ليك دا حقيقه و انا جادي، ما عايز اضغط عليك اكتر و اجبرك تتواصلي معاي لكن بس عايز اطمنك وعايزك تعرفي اني شاريك وباقي عليك
بقيت افكر في الكلام دا! هسي أرد اقول شنو!.... حسيت أفكاري جايطه وما عارفه اتصرف كيف، فجأه رفعت عيني عن التلفون لقيت أحمد مركز معاي!.... طبعاً هو قاعد في السرير المقاصدني، بكل هدوء رجعت اعاين لتلفوني تاني و أديتو إحساس اني ما شفتو اصلا وبقيت اتبسم ساي، فجأه أحمد قال لي قومي اعملي لينا الجبنه، قلت ليهو جبنه المغرب؟ قال لي عندها زمن معين؟ قلت ليهو نحنا شربناها، قال لي لكن أنا ما شربتها قلت ليهو داك بيتكم!... قلتها بزهج كدا!
مع جملتي دي كلهم ركزوا معانا، أمي قالت لي تبيتي في الحراسه ان شاء الله، قومي اعملي ليهو الجبنه، قلت ليها ماف زول غيري يعني؟ في مرام وفي مآب و اختو ياها قاعده!
خالتي قالت ليهو ارح البيت انا بعملها ليك، امي قالت ليها ماشه وين خليها مرام بتعملها ليهو، وبعدين هي اصلا بتتكلم كدا مع احمد، ياها مناقراتهم وحركاتهم المن زمان ديك، أحمد قال ليها كلامها دا ما جديد علي وانا اصلا ما شغال بيها، سوي لي الجبنه يا مرام.... كلامو غاظني شديد واتذكرت كلام الاء القبيل، قلت ليهو في نفسي: تشتغل بي كيف وانت بالك مشغول مع الست أسيل!
المهم مرام عملت الجبنه ليهم كلهم، شربوها و قمنا صلينا المغرب، بعدها ناس خالتي رجعوا بيتهم، طبعاً اول ما مشوا انا دخلت جوه، امي جاتني داخله وطوالي قرصتني على خدي وقالت لي انا مش قلت ليك خلي أسلوبك الزفت دا؟ كيف يعني تقولي ليهو هداك بيتكم! قلت ليها كلامي صاااح هسي كلامي دا فيهو شنو غلط، هو ذاتو مش قال ليك الكلام دا ما جديد عليهو بمعنى انو شايفو عادي! قالت لي ماااا عشااان كترتيها و مسختيها! انتوا بعد دا ما صغار عشان تقعدي تحرجيهو و تتزهجي فيهو، أحمد بقى شاب كبير و ليهو احترامو ما تعامليهو كأنو شافع أو كأنك والداهو!.... طبعاً دا كلو وهي لسه شاده خدي!
قلت ليها يمه خلاص!
فكتني وقالت لي شدة ما كترتيها وكلامك بقى شين خالتك بقت تزعل!
قلت ليها خلاااص خلاااص ما ح تتكرر تاني!
اها بعد شويه ابوي جا، قمت ختيت الغداء وقعدنا اتغدينا كلنا، لما بقينا انا ومآب و مرام وآبوي في الصينيه، مآب ومرام بقوا ياكلوا بسرعه وكل دقيقه يعاينوا لبعض، ابوي هرشهم وقال ليهم أكلو براحه، أمي من المطبخ وقفت في الباب وقالت ليهو دا كلو عشان ما يرفعن الصينيه، غايتو بنات أولاد بس!
فجأه قمت خليتهم، مآب ومرام اتخلعوا و قاموا طوالي في نفس اللحظه وأبوي يهرش فيهم سااااي قال ليهم يعني الصينيه دي أرفعها انا ولا كيف وهم يضحكوا! 🤣
جيت عايزه ارفع الصينيه بعد ابوي خلص قال لي خليهم يرفعوها هم، طوالي ناداهم الإتنين، قال ليهم واحده ترفعها والتانيه تغسلها، طبعاً عاينت ليهم بشمااااته كدا..... دخلت جوه و شغلت المكيف، لما مسكت تلفوني وفتحت الواتس لقيت الاء مرسله لي، كاتبه لي مالك مع أحمد، رديت ليها :
_ مالي؟
كانت خاشه ف طوالي رسلت لي ريكورد :
= ردك عليهو قبيل اداني إحساس انو في شي!
كتبت ليها :
_ يااااخ تحبوا تكبروا المواضيع بصوره خياليه! فيهو شنو ردي القبيل؟ دا طبعي، و دا اسلوبي و دي طريقة تعاملي معاهو ومعاكم كلكم ما جديده! ف ليه مستغربين!
= ايوه طبعك كلنا بنعرفو و انتي و احمد طبيعي بتتناقروا و تردوا على بعض، بس نبرة ردك تبع قبيل كان فيها شي من الزعل والغضب! ما كان رد عادي لمجرد انو أحمد قال ليك اعملي لي جبنه!
_ انا شايفاهو رد عادي، لو انتوا شايفين غير كدا دي مشكلتكم!
= مالك انتي هسي هايجه كدا، قولي بسم الله!
_ يااااخ خلاص غيري السيره!
= تمام نغير السيره، ح ارسل ليك صور ل أطقم تياب و حاجات كدا بتخص الأعراس، عايزه أبدا من هسي تجهيزات عرس أحمد اخوي واسيل
قريت رسالتها دي وطوالي حظرتها و قفلت الشبكه، براي زهجانه وقافله معاي، الاء مستفزه، اقول ليها نغير الموضوع تلف و ترجع لي لنفس الموضوع!
اتغظت واتضايقت ضيق ما عادي!
__________________
من جانب آخر :
عارفاها حتكون شمتني شديد، بس دي الطريقه البتنفع معاها، عنيده هي وما بتعترف بسهوله.... عاينت لدردشة الواتس وقعدت أضحك بسبب حظرها لي، اتخيلت منظرها، اكيد هسي بتنبذ فيني وعايزه تطق من الزعل! 😂
وانا بضحك فجأه لقيت أحمد اخوي قدامي، ضيق لي عيونو وقال لي : الاء جنيتي ولا شنو؟
قلت ليهو لا لا ماف شي وقعدت اضحك زياده، قال لي ربنا يشفيك وكان ح يمشي بس انا غلبني أمسك خشمي علي، قلت ليهو أحمد اتخيل مها حظرتني، إتلفت علي وقال لي عادي الجديد شنو ما هي دائما بتحظرك!
قلت ليهو لا لا المره دي الموضوع مختلف، تاني عشره سنه لقدام ما ح ترفع عني الحظر وعلى الأغلب ح تقطع علاقتها بينا كلنا 😂😂🤣
قال لي للدرجه دي، مالك هببتي شنو؟؟
ختيت يدي على خشمي وقلت ليهو كذبت كذبه صغيرووونه قدر كدا 🤭🤏
جاني قريب وقال لي معناها عامله مصيبه، قلت ليهو لا لا، قال لي اها شنو؟ اترددت وبقيت اتكشم ليهو زي نار القصب، زهج مني وقام طالع، اول ما وصل الباب بإستعجال قلت ليهو :
قلت ليها انك ناوي تعرس أسيل 🫣
إتلفت علي مهجوم!!... هرشني وقال لي انتي يا بت عبيطه ولا شنو؟ أسيل منو وعرس شنو جنيتي انتي!
قلت ليهو أحمد براحه براحه انا كذبت عليها ساي، قال لي وهدفك شنو يا استاذه؟ قلت ليهو بس كنت عايزه اشوف ردة فعلها وياهو حظرتني.... طبعاً ما قدر يقول لي و دا معناهو شنو وليه انتي عايزه تشوفي ردة فعلها وليه دخلتني انا تحديداً في كذبتك دي وليه اصلا حكيتي لي الكلام دا!.... عمل رايح من الأسئله دي كلها وقال لي ما عندكم موضوع، قلت ليهو عشان ما عندنا موضوع عايزه اتموضع 😂
بقى يحك شعرو وقال لي امشي اعملي الجبنه، قلت ليهو جبنه بليل؟ قال لي يااااخ عندها زمن معين هي؟!.... قلت ليهو جملتك دي ما ذكرتك بزول؟ قصدي ب زوووله؟ 🤣🤣
شال المخده من السرير و جدعها فيني وقال لي شاربه شنو انتي؟ قلت ليهو انتوا الشاربين شنو أو فاطمنكم بشنو جايين عنيدين كدا و راسكم يابس على قول أمي، هي تنكر و انت تنكر.... هههه تنكر مويه 🤣🤣
قال لي والله انتي ما نصيحه، الله يصلح حالك،قلت ليهو أحمد ما شفتها زعلانه كيف من قصتك انت و أسيل الخياليه ، والعجب يوم انت اتشاكلت مع الأولاد الشاغلوا أسيل في الشارع، كانت ح تطق من الزعل ومن غيظها قالت انك بتحب تعمل نفسك بطل، وانا عشان عارفاها عنيده و نكاره قررت اكذب عليها و اجيب آخرها 🤣🤣
طبعاً أحمد اخوي سكت سااااي بس كان في ابتسامه على وشو و استحى مني، اخوووي و عارفاهو ميت فيها لكن نكااار زيها، لكن اصبروا لي لو ما جبت آخركم وخليتكم تعترفوا و تتلموا مع بعض، لو ما خليتكم تعرسوا بعض ما أكون اسمي الاء.... الصبر🤌
____________________
كلام الاء عكر لي مزاجي و قهرني، هي و أخوها الكلاب المستهبلين، هي ما كانت بتطيق اسيل من زمان انا وهي بنتشاكل معاها من لما كنا أطفال،و احمد دا زاتو زمااان قال عليها خفيفه وقال البنات الزيها ما بركبوا راسو! كيف هسي وفجأه كدا يقول عايزها! لا ما فجأه اكيد من زمااان حابيها عشان كدا فار و دفق لما الأولاد شاغلوها! بس لو في كلام بالشكل دا خالتي كانت ح تكلمنا! يمكن هو كلم الاء بس!؟؟...... دقيقه دا شنووو دا... كيف انا صدقت الاء بالسهوله دي؟ يمكن عايزه تستهبل علي و تجيب آخري!.... كويس يا الاء 🤌
تاني يوم طلعت الجامعه و اتلاقينا جنب دكان عمو عصام، قلت ليها ألويه صباح الخير،ضحكت و قالت لي صباااح النور، والله ما قايلاك ح تصبحي علي تاني بعد حظرتيني، قلت ليها الواقع كوم و المواقع كوم تاني، ما بلخبط الكيمان انا، تعالي عايزه اشيل مويه، اشتريت مويه واشتريت ليها معاي ومشينا على المواصلات، قالت لي أمس كنت عايزه احكي ليك بموضوعنا داااك متذكره بس براك حظرتيني، قلت ليها لأنك ما عندك موضوع و براي كنت زهجانه وقافله معاي، قالت لي معقوله كلامي بزهج للدرجه دي؟! 🤭
قلت ليها يااااخ كلك بتزهجي بس للأسف في شي تاني كان مزهجني اكتر منك ومن كلامك، وقفت وقالت لي في شنو؟.... قلت ليها يااااخ نفس الموضوع داك الكنت عايزه احكيهو ليك تتذكري يوم أحمد اتشاكل مع الأولاد، قالت لي وااااي مواضيعنا دي إلا نفضي ليها يوم كامل عشان الشمارات دي ما تتراكم علينا، قلت ليها ارح هسي نحصل محاضراتنا، بعدين بجيك في البيت، قالت لي تمام، ركبنا سوا بس انا بنزل قبليها، اول ما نزلت و دفعت ليها معاي نادتني بالشباك وقالت لي ارفعي عني الحظر، قلت ليها ابييييت ومشيت، لكن رفعت عنها الحظر!
مشيت الجامعه وأول ما خلصت محاضراتي رجعت البيت طوالي، فطور ذاتو ما فطرت استحميت غيرت ملابسي لفحت توبي ومشيت بيت ناس خالتي رقيه، لقيت أحمد قاعد في المظله وخالف رجل على رجل وقدامو تربيزه كبيره فيها فشار و مقرمشات و مكسرات و كيك يعني فطور جبنه 😂
قلت ليهو الاء وين، قال لي وعليكم السلام ورحمة الله، جاني صوت الاء من جوه المطبخ وهي بتنادي علي، مشيت ليها لقيتها بتصفي في الجبنه، قلت ليها عامله قعده ولا شنو؟ قالت لي ايوه لكن لينا نحنا فقط، قلت ليها دا كلو لينا نحنا الإتنين بس، قالت لي آييي والعايز بنديهو في يدو و يمشي مننا بعيد، شلنا الجبنه و طلعنا بيها المظله، أحمد لسه كان قاعد، قعدت وقلت ليهو تشيل كباااايتك وطوالي تمشي من هنا عشان نحنا عندنا مواضيع خااااصه، قال لي أسرار دوله ولا شنو، قلت ليهو ايوه أسرار دوله، قال لي داااك بيتكم، انا من هنا ما طالع، في سري قلت ليهو دا العايزاهو، ما تطلع عليك الله عشان اعمل الفي بالي، اها كبينا الجبنه، لمى جات شربت معانا و ولاء في بيتنا مع مرام اختي، طبعاً أحمد لسه قاعد وخالف لينا رجل فوق رجل، الاء همست وقالت لي : نمشي جوه؟
قلت ليها لا لا نقعد هنا، الشاشه كانت شغاله و احمد يقلب في القنوات و يشرب الجبنه، بعد شويه فتحت تلفوني، و مديتو ل الاء، اصلا كانت قاعده جنبي، قلت ليها بصوت واطي شوفي دا، قرت الكلام ونططت لي عيونها وقالت لي بخلعه دا منووو؟!!!
هنا أحمد عاين لينا و لمى دخلت المطبخ، ختيت اصبعي على خشمي وقلت ليها وطي صوتك وعاينت لأحمد وعملت نفسي محرجه منو!
الاء لما انتبهت انو أحمد قاعد معانا، قالت دا شنو الفستان الرهيييب دا جبتيهو من وين عليك الله يا مها؟!
طبعا انا قعدت اتبسم وعملت نفسي اني ما قادره امنع نفسي من الضحك وكلو عشان أحمد يفهم انو الاء بتكذب و انو في شي انا وريتو ليها غير قصة الفستان الهي اخترعتها هسي دي!
شلت منها التلفون وقلت ليها بصوت واطي بحكي ليك بعدين..... صح انا اتكلمت بصوت واطي بس كنت حريصه انو الصوت دا يكون مسموع بالنسبه لأحمد، عايزاهو يشك، عايزاهو يفهم انو في شي!!
فجأه تلفونو رن، اول ما شالو و مشى الاء قالت لي مها دا منووو دا؟
اخخخخ اتمنيت أحمد يكون قاعد و يسمع الهمس الكنت ح اقولو ليها، كنت مخططه أخليهو يفهم انو بالي مشغول بزول تاني، بس ماف مشكله الاء ح تلمح ليهو أو ح تحكي ليهو عديل.
الاء كررت لي السؤال مره تانيه، قلت ليها دا الكنت عايزه احكي ليك عنو، قالت لي وااااي دا منو، و دا كلو بدا من متين و ليه ما حصل حكيتي لي؟
"طبعاً انا ما كذبت انا وريتها رساله من الرسائل الرسلها لي وائل، عملت ليها اسكرين شوت، وقصيت المحادثه كلها إلا الرساله دي، يعني ما ظاهر اسم الزول المرسلها لي!"
قلت ليها صراحة انا كنت مشوشه وما عارفه اتصرف كيف، حسيت الكلام دا أكبر مني او اني ما جاهزه، بس من شهر بديت افكر بشكل جدي، لأن الزول دا جادي، وانا عارفه الحاجه دي و واثقه من انو هو قدر كلامو بس ما كنت عارفه افاتح أهلي كيف في الموضوع دا براك عارفاني في المواضيع دي ما بقدر أكلم زول عشان كدا انتي ذاتك ما حصل كلمتك..... بقت تعاين لي مساااافه في عيوني كأنها بتفتش على شي يدل إني بهظر أو ما جاده في كلامي... لقتني بعاين ليها بكل ثقه، قالت لي مها الكلام دا جد ولا استهبال منك؟ قلت ليها استهبال؟ ليه؟؟ والله العظيم الكلام دا جد انا حلفت يا الاء!
ملامح وشها اتغيرت وبقت مليانه زعل، بدون مقدمات قالت لي : و احمد؟
قلت ليها أحمد منو؟؟ قالت لي أحمد منو؟ أحمد اخوي.... قلت ليها مالو اخوك؟
زعلت زياده وقالت لي بنبره عاليه كيف يعني مالو أخوي؟ انتي عايزه تستهبلي علي ولا على نفسك؟.... اهاااا ياداب فهمت، قلتي كدا عشان تغيظيني زي ما انا غظتك لما كذبت وقلت ليك أحمد عايز أسيل؟
في اللحظه ديك حسيت بالنصر! كنت عارفه انها في النهايه براها ح تعترف بس ما اتوقعت اعترافها يجي بالسرعه دي!
ضحكت وقلت ليها الاء مشكلتك شنو انتي؟ وليه كذبتي بخصوص أحمد و أسيل؟
قالت لي يااااخ خلاص حصل العايزاهو، ياهو اعترفت ليك كنت بكذب عليك وعايزه اجيب آخرك، قلت ليها بس انا ما كذبت عليك، وما عندي أي هدف من كلامي دا، ولو كنت عارفه انك ح تعتبري كلامي دا استهبال أو كذب أو رد فعل لكذبتك القلتي عنها دي ما كان ح أحكي ليك.... الاء الرساله دي حقيقيه والله و اتكتبت لي انا، و الزول دا جاااادي..... هنا الإتنين سكتنا، لمى طلعت وبقت واقفه لينا جنب باب المطبخ وهي مربعه يدينها و بتعاين لينا و الاء صاره لي وشها! ضحكت تاني وقلت ليها بسم الله مالك يا بت مفروض تفرحي لي.... ردت لي لمى وقالت لي تفرح ليك كيف وهي عايزاك لأحمد، غايتو كلكم غتيتين و بتاعين جرجره، انتي و احمد و الاء، لو بتتكلموا بوضوح كدا بدون لف و دوران كان ريحتوا نفسكم، استغربت فيها، يعني لمى كمان عارفه! عاد اكيد ح تعرف إلا ما تكون صادفتها جمله جملتين من ونستنا الكتيره انا و الاء ....لمى قالت كدا وشالت تلفونها وقالت لينا انا ماشه لأمي..... اتحركت خطوتين وإتلفتت علينا، قالت لينا بعدين ما تنسوا تقولوا لي العريس الح تختاروهو منو😂🤭
قالت كدا و مشت!
الاء قالت لي بالجد حرام عليك، قلت ليها جنك دراما، زعلت زياده، قالت لي اخوي مالو عيبيهو لي؟ قلت ليها ما فيهو أي عيب، المطلوب شنو يعني؟
قالت لي مها خلاص انهي تمثيلية انك رايحه وما فاهمه شي، انتي عارفه أحمد حابيك!..... طبعاً هنا حسيت قلبي انشرررح والسعاده غمرتني! قربت ابتسم بس مسكت نفسي،وقويت قلبي، قلت ليها تاني ما تحضري مسلسلات عشان ما تسرحي بخيالك وياريت تخلي عادة انك تعرسي للناس وتخليهم يحبوا بعض في خيالك 😂
قالت لي دا ما خيالي، دي الحقيقه الأنا و انتي و حتى أحمد عارفنها و يمكن أهلنا كمان عارفين أو حاسين ب البينكم!.... ضحكت تاني وقلت ليها والله انتي يا الاء!.... عصبت شديد وقالت لي يااااخ انتي وحده مستفزه ودمك بارد! خلاص عرفناك عنيده وما بتجي بالساهل!
قلت ليها الله يسامحك، وقفت على حيلها، مشت لبست عبايتها وجات قالت لي عايني انا ماشه لأمي ماشه معاي ولا لا؟؟
قلت ليها دا طرد يعني؟ قالت لي ما عايزه اتناقش معاك كتير عشان ما أنجلط، ماشه ولا لا؟؟
قلت ليها ما ماشه وطوالي طلعت قدامها عشان امشي بيتنا، لقيت أحمد جنب الباب، كان بتكلم بالتلفون، عاين لي لقاني زهجانه و وراي طوالي الاء جات طالعه و برضو قالبه خلقتها،استغرب فينا، انا مشيت البيت طوالي وهي مشت بالإتجاه المعاكس، اول ما وصلت البيت لقيت امي جنب الباب كانت طالعه، قلت ليها ماشه وين؟ قالت لي ماشه لسميه دي ولدها المغترب جا أمس من السفر.... هنا قلبي كان ح يقيف و انخلعت خُلعه كبيره!
يتبع....