رواية شتات الفصل السابع 7 بقلم مها حولي
قلت ليها نعرس سوا كيف يعني اشتريتي لي عريس ولا شنو، قالت لي يختي العريس قااااعد من زمان لكن انتوا الإتنين عاملين فيها غتيتين ورايحين إلا فلان دا خلاص فاض بيهو وقرر يعترف، قلت ليها فلان يلي هو منو؟؟
قالت لي مهااا عليك الله بطلي سغااااله ياخ وعيشي معاي الشعور، قلت ليها غيتو انا هسي شاااعره بالجوع!.... ضربتني على كتفي وقالت لي يا بت خلي البرود حتى لو تمثيل واستهبال منك، ياخ انا لمن قلتي لي وائل عايز يتقدم لي جسمي كلو ارتعش وقلبي اشتغل زي الدلوكه! هسي انتي مالك يا عشششه؟!
قلت ليها الاء جاده معاك انا في شنو!؟.... قالت لي يعني انتي شايفني بهظزر؟! أحمد عايزك.... عايز يتقدم ليك.... قلت ليها أحمد منو ما تقولي لي أحمد اخوي.... قالت لي اخوك؟؟ امكم واحده ولا ابوكم واحد؟ ياخ عليك الله خليك جاده معاي شويه، أمس كلم امي و ابوي، وهم اكيد ما عندهم مانع وامي جايه بشكل رسمي تتكلم مع أختها، متخيله معاي 🤣🤣 لكن أنا سبقتهم كلهم وجيتك زي الصاروخ!
بقيت ساكته بعاين ليها وهي مبسوطه، لمن لقتني عاديه وماف أي تعبير على وشي، ابتسامتها اتلاشت، قالت لي مالك انتي ما مصدقه ولا شنو؟.... قلت ليها ما عايزه اي عرس، عايزه اقرا، قلت كدا وكنت ح اقوم بالغصب جرتني من يدي وقعدتني مكاني، قالت لي كيف يعني ما عايزه عرس؟ ومنو القال ليك أحمد ح يمنعك من القرايه؟!
قلت ليها انا هسي لا جاهزه ل عرس لا غيرو، عايزه اركز مع قرايتي وبس.... سكتت مسافه بعدها قالت لي عشان قرايتك ولا عشان صاحب الرسائله داك؟
قلت ليها ما عشانو، لكن انتي وقت عاااارفه الحاصل ليه جاياني فرحانه بفكرة العرس دي؟! قالت لي عايني أحمد ما عارف شي، ما قلت ليهو انو في زول في حياتك، لأني حسيتك ما جاده! قلت ليها انا حلفت ليك و وريتك الرساله كيف يعني اكون ما جاده!؟ لو جد كنتِ حاساني بستهبل عليك او بكذب ما كان زعلتي مني!.... قالت لي المعنى انك رافضه أحمد عشان الزول دا ما عشان القرايه؟!
بقيت افكر في نفسي، لو قلت ليها ايوه ح تمشي تكلمهم و امي ح تجي تسأل الزول دا منو، ولو قلت ليها خلي الموضوع بيني وبينك انا رافضه اخوك عشان في زول غيرو ديلك الح يقنعهم شنو؟ لو قلت ليهم القرايه ح يقولوا لي أحمد ما ح يمنعك!!
قلت ليها لا، لأنو الزول داك موضوع وانتهى من بدري، من لمن عرض علي فكرة الزواج و رفضتو، قالت لي لحدي اللحظه دي ما قلتي لي هو منو؟! قلت ليها زول من الجامعه، قالت لي المهم هسي انتي رافضه اخوي ليه طيب؟؟ أحمد دا انتي مش كنتِ حاباهو وبتغيري عليهو من اسيل؟ قلت ليها ما أي شي معناها زواج!
قالت لي أي شي؟ الريده دي أي شي؟.... عايني هم اتنين يا بتريديهو يا ما بتريديهو ما تتحججي!
قلت اختصر عليها وعلى نفسي ف قلت ليها ما بريدو.... سكت مسااافه بعدها قالت لي كذابه والله!
قلت ليها الاء انتي عايزه تصلي لشنو! سألتيني وجاوبتك!
عاينت لي بنظره كدا زي الزول المتحسر على زول بعدها قالت لي بتريديهو لكن عشان انتي وحده بتهمك المظاهر و الوضع المادي وما شايفه زي أجمل من القروش رافضه اخوي 😊 ما تلفي وتدوري، قولي كلام قلبك، قولي الحقيقه عديل!
ما رديت عليها، قالت لي انتي وحده قمه في الأنانيه، ما عايزه أحمد يحب غيرك وبتزعلي لو عاين ل بت ساي وفي نفس الوقت ما عايزاهو يعرسك! عشان شنو؟ عشان القروش.... خساره والله، القروش والمظاهر عندك أهم من مشاعر الزول القدامك دا!
وقفت على حيلها وقالت لي اسمعيها مني :
ساهل انك تعرسي زول عندو قروش لكن صعب انك تعرسي راااجل، القروش بتمشي وتجي لكن المشاعر البتنتهي ما بتتولد تاني وما بترجع، اما أحمد اخوي بكرا بعرس البتستاهل والبتقدر مشاعرو و تحترمو وانتي ان شاء الله تعرسي ولد وزير 😊🤚
قالت كدا و مشت طوالي وخلت عقلي ضارب،يااااخ انا تعبت وزهجت من الحال دا.... قعدت ابكي سااااي، للحظات حسيت بالضياع الشديد والشتات وضميري انبني، حنيت على أحمد، والله هو ما يستاهل رفضي ليهو، الرفض دا صعب وحار علي انا كمان بس انا ما عايزه أعرس وخلاص، مرات كتيره نفسي بتقول لي لو أحمد يوم من الأيام اتقدم ليك وافقي عليهو وما تضيعيهو من يدك عشان مجرد احلام ورديه، بس لما افتح الإنستغرام و اشوف حياة الرفاهية والرحلات و السفر من دوله ل دوله والنجاحات بحس اني ما بس عايزه أعرس وخلاص! ما بس عايزه أعرس واسكن مع خالتي وفي نفس الحي كمان والمنطقه!
انا عايزه اكون صاحبة محتوى على الميديا، عايزه الرفاهية والحريه، عايزه يكون عندي عالم خاص مع زوجي المستقبلي، يكون ناجح و يشاركني نجاحي ويدعمني ويظهر معاي على الميديا ونكون احلى كابلز والحاجات دي كلها مستحيله مع احمد و العائله عامة!
_اها لقيتي عمة أولادك بقت كيف؟
=كويسه الحمد لله بتسلم عليك
_الله يسلمها.... طبعاً قبيل سميه دي رسلت لينا نجي نشرب معاها الجبنه، جوها جاراتها الزمااان زياره وعرفتنا بيهم
= ديل ناس منو يا ربي
_ بري ما حصل شفتهم عندها، ساكنين بحري ديل ولا يمكن كانوا بجوها ونحنا ما جايبين ليهم خبر
=كويس فرقتي شويه...... رويدا اسمعيني، انا جاياك مخصوص لموضوع مهم
_سبحان الله انا زاتي عندي ليك موضوع معاهم!
=اسمعيني اول لأنو موضوعي سمح شديد.... انا جاياك وطالبه يد بتك مها لأحمد ولدي، عايز يستقر بعد دا ومعروف عايز منو من زمان، انا شايفه انو يعقد و يعملوا عرسهم مع الاء و وائل، يعني بدل العرس الواحد حيكون عندنا عرسين، والله الفرحه ما سايعاني، ربنا يتم ليهم على خير....
= مالك ساكته؟ في مشكله!
_ والله ما عارفه اقول ليك شنو يا رقيه..... أحمد ولدنا و زيو ما بنلقى لكن كمان جارت سميه دي قالت عايزاها ل ولدها!
=..... ويعني؟.... قولي ليهم عايزها ولد خالتها!
_والله هي ذاتا ما عارفه كدي نسألها اول
=تسأليها عن شنو، ح تفضل الغريب على ولد خالتها يعني، رأيها معروف نفسو رأي أحمد، اما مش من زمااان قلت ليك الإتنين ديل مصيرهم يكونو لبعض! ياهو كلامي مشى وجا
_خلاص انا بتكلم معاها وبكلم ابوها وان شاء الله كلو خير
= ابوها أحمد وابوهو حيكونو كلموهو وهو معروف ما عندو مانع، اصلا مستحيل تلقي زول معترض على العرس دا تحديداً!
_خلاص خير ان شاء الله
= كدي وينا هي ناديها لي
_دخلت تستحمى
= عايني خلاص انا هسي ح امشي تعبانه من المشوار، بكرا ان شاء الله ح نجيكم معانا أحمد ونشوف الببقى شنو....
يعني انا عمري ما شفت زول بياع واناني زي مها، مستعده تبيع الدنيا كلها قصاد سعادتها، بتهتم بالمظهر اكتر من الجوهر، بس احمد اخوي مظهر وجوهر.... انا ما ضد رغباتها والحاجات الهي عايزاها، انا ضد عدم تقديرها لمشاعر أحمد، ما فكرت فيهو، ما فكرت ح يحس بشنو لمن يعرف انها رفضتو!.... هي وقت ما عايزاهو وعارفه نفسها عايزه شنو ليه كانت بتزعل لما يجيب سيرة اسيل؟ ليه بتغير عليهو؟ لييييه معشماهو فيها؟ قايله كل الناس عديمين احساس زيها؟ قايله أحمد بالبساطه دي ح يتقبل الرفض دا ويشوف غيرها!
كنت واصله الحد من الزعل والضيق، ف طوالي رسلت قلب مكسور ل وائل، رد علي بعد دقائق وقال لي سلامتك قلبك.... قلت ليهو وائل انا ح اطرشق من الزعل.... ما قادره أوقف بكى وفعلاً كنت ببكي من الغيظ والقهر.... قال لي ليه الحصل شنو؟
قلت ليهو مها بت خالتي رفضت أحمد اخوي.... قرا الرساله وبعد مسافه كتبت لي : حقها.... أي زول ليهو حرية الرفض أو القبول!
قلت ليهو بس هم الإتنين بحبوا بعض من زمان وهي كانت بتقرب تطرشق من الزعل لو شافتو بتكلم مع بعض.... هم من بدري حابين بعض وكلنا عارفين الحاجه دي، تجي هسي وبكل بساطه ترفضو! ليه وين مشى حبها وريدتها ليهو! ليه ما قدرت مشاعرو! ليه ما فكرت في شعورو حيكون شنو! صدقني هو ما شايف غيرها وما عايز غيرها، هي الوحيده الساكنه قلبو وقافل عليها!
_ يمكن قلبها ملك زول تاني!
كلامو دا خلاني أغضب زياده، قلت ليهو صدقني ما عندها أي زول، كان واحد بس من جامعتها عايزها وهي رفضتو و طبيعي ترفضو، أكيد طالب زيها و وضعو ما على القدر المطلوب، هي ما بهما شي غير الوضع المادي للشخص المتقدم ليها، ما بتعاين لأخلاقو، ما بتهمها مشاعرو، الأهم قروشو قدر شنو، وهي رفضت أحمد اخوي عشان ما مستوفي شروطها ومتطلباتها، مع انها كانت بتحبو، بس عادي عندها تخسر الحب مقابل القروش، انا اليوم مقهوره منها شديد، طلعت انانيه وما بهمها شي غير نفسها!
"وائل "
أحياناً صدمة انك تعرف انو الطرف التاني انتهى الحب عندو أخفى قدراً من صدمة انو اصلاً ما كان في حب من البدايه !.... انكم ما بديتوا اصلاً عشان تنتهوا!
صدمه انو كل الحاجات الكانت من طرفي حب ومشاعر كانت مجرد مساحه مؤقته في قلبها،متصبره ومنتظره بيها عرض أفضل!
صدمه انها كانت خاتاني في ميزان ما بتشوفو العين، بتزن الحب بالجيب والوجود بالمكانه و المستقبل بالشي البتقدر تمنحو ليها!
ظهرت فجأه في حياتي، هي البدت التواصل دا وهي الأصرت انو يكون في تواصل بيناتنا لحد ما اتعودت عليها! اتعودت على وجودها! على قصصها وحكاويها، على جرستها وخوفها من الإمتحانات، كان ما بمر علي يوم بدون ما ألقى رسائل منها لحد ما بقى ما بمر علي يوم بدون ما ارسل ليها، وصلت لدرجة اني بحس نفسي مدبرس و راسي مقطوع عديل لو هي ساعه بس ما كانت موجوده في الماسنجر!
كذبت علي وبدون ما يرف ليها جفن قدمتني في طبق من دهب ل بت خالتها، ما حست بتأنيب الضمير، ما فرقت معاها، ما زعلت علي، ما غارت علي، ما حست بقيمتي، ما كان عندها مانع تسلمني لوحده تانيه!
السؤال دا دائما كان حاضر في بالي بعد عملتها دي هل هي بالجد حبتني؟ هل في زول بحب زول بقوم يكذب و يسلمو لزول تاني بكل بساطه ولأسباب واهيه!..... هسي لقيت الجاوب، هي ما بتفتش الحب هي بتفتش الجيب، يمكن لقت زول وضعو احسن مني مع اني كنت مستعد اجيب ليها النجوم لو طلبتهم، ما بغلبني ألبي ليها طلباتها، قادر أحقق ليها كلام أحلامها و اعيشها أحسن عيشه، بس هي ما قدرتني وما قدرت مشاعري..... انا اصلا مستغرب ليه؟ ياهو حتى ولد خالتها رفضتو بسبب وضعو مع انها كانت.... بتحبو.... ومن زمان كمان! معناها بس عشان كنت مغترب اتواصلت معاي، عيشتني 3 سنوات في وهم وزيف وغالباً عملت نفس الشي مع ولد خالتها، عامله مشاعر الناس لعبه، تمسك دا وتفك دا على كيفها!
بالنسبه لي الحب دا وطنٌ ما مفروض تُسأل عند بابه عن مال أو مقام ،لكن هي واضح انو قلبها ما بفتح بابو إلا بمفتاح من دهب!
انا كنت قادر أقدم ليها السعاده في طبق من دهب لكن هي استغنت....قلبي كان مليان بالمشاعر وقلبها مليان بالأرقام، عمري ما ح انسى الوجع والقهر الضقتو بسببها، احساس انك تكتشف انك كنت مُحب وصادق في العلاقه الصدق ما كان شرط فيها!
استمرارها معاي دليل على اني ما كنت زول بسيط وفقير في نظرها و استغناها عني هسي دليل على اني بقيت بالنسبه ليها أقل قيمه من الحياه الهي عايزاها!
أنا كنت مستعد احتوي رغباتها و طموحاتها، ما عندي مشكله لو هي الوضع المادي من أهم الشروط عندها، حقها ما بتتلام عليهو، بس هي استخدمت الخداع والزيف وسيله! وسيله عشان تحرق و تدمر بيها قلوب الناس!
أنا ما انهزمت قصاد راجل، انا انهزمت قصاد رقم!
لو بس جات وسألتني عندك كم، بتقدري تعيشني، بتقدري تحقق لي أحلامي، عندك المبلغ الكافي البقدر يسعدني، لو بس كانت واضحه معاي كانت ح تلقى جوابي : ايوه قادر.... لكن هي حتى السؤال استخسرتو فيني وباعتني بالرخيص!.... انا اول مره احس بالحرقه والمراره دي، اول مره انهزم قدام رقم!
_مشيتي وين انتي يا امي!
=مشيت ل رويدا وكلمتها بموضوع أحمد ومها، وبكرا ان شاء الله ح نمشي نتفاهم معاهم!
_وقالوا ليك شنو؟
=يقولوا شنو يعني؟ الناس دي كلها موافقه
_مها يا أمي قالت ليك شنو؟؟ ما قالت أي شي؟
= اتكلمت مع رويدا انا وهي كانت في الحمام لكن ح تقول شنو يعني كانت ح تخجل مني وتسكت!
=جارت سميه قالت دايراها ل ولدها؟
_ دايره منو وجارتها منو و ولدها منو؟
=رويدا قالت لي قبيل سميه عزمتهم جبنه وكانوا معاها جاراتها القدام المن بحري و وحده منهم قالت دايره مها ل ولدها.....
=ايوااا يعني دا السبب!
_سبب شنو؟
طلعت من الحمام وانا لسه حاسه نفسي نسخنه وعقلي ضارب، امي لمن نادتني عرفتها عايزه تفتح معاي الموضوع، قلت ليها مصدعه عايزه انوم، بدون مقدمات قالت لي أحمد قال دايرك، قلت ليها وانا عايزه اقرا، قالت لي ما بمنعك من القرايه، قلت ليها امي انا والله هسي لا عايزه عرس لا فايقه ليهو، يعني شرط إلا أعرس مع الاء أو قريب منها!
قالت لي انتي سميه اتكلمت معاك ولا شنو لمن رافضه أحمد!
طبعاً استغربت، قلت ليها تتكلم معاي في شنو؟؟
سكتت مسافه بعدها قالت لي جارتها القبيل ديك قالت دايراك ل ولدها!
طبعاً اتفاجأت!.... دا شنو دا.... دي حياة ولا عرض أزياء، لا لا دا ما عرض أزياء، دا عرض رجال، يمشي راجل، يجي راجل!
قلت ليها ما عايزه أي عرس، قالت لي بطريقتك بكرا لمن الناس ديل يجوا قولي ليهم كلامك دا انا خشمي ما ح افتحو! وقوليهو لأبوك كمان لمن يجيك بعدين!
دخلت جوه وانا حاسه الدنيا دي مضلمه، وفوقها لقيت مكالمات من أحمد و رسائل في الواتس، قلت معناها الاء كلمتو ومتصل ومرسل يحقق معاي، بس لما فتحت رسايلو، لقيتو كاتب لي:
"أميرة الشباب يا سمحه انا جايك عريس ❤️ "
اخخخ أحمد، أحمد ما تزيدها علي انا والله الفيني مكفيني، حاسه نفسي ح انفجر، ضغط من كل الإتجاهات، انت، وائل، نفسي، اعمل شنو انا وااااي ح اجن واحسن اجن زاتو عشان ارتاح 💔😭
بعد تردد كتبت ليهو:
والله يا احمد انا ما جاهزه لأي عرس، كلمت ناس بيتكم عشان بكرا ما تجوا ساي،عايزه اقرا.
كأنو كان حارس الواتس، طوالي دخل الدردشه قرا رسالتي و رد علي بعد مسافه :
"عايزه اقرا"؟؟ ئهه الرفض المغلف، اي بت لما تكون ما عايزه المتقدم ليها بتقول ليهو الجمله دي كان تغيريها 😊
قلت ليهو حتى لو غيرتها المعنى واحد، أحمد انا والله ما عايزاك تزعل مني، انا من نفسي ما عايزه عرس، ما شرط أعرس مع الاء وما شرط أعرس في الوقت دا والسنه دي!
قال لي تمام ماااف مشكله، هسي ما جاهزه لكن لحد السنه البعدها حتكوني جاهزه صاح؟ لو لحد البعد بعدها زاااتو ماف مشكله، ح نعمل خطوبه والعرس لما تكوني جاهزه..... طبعاً قلبي بقى يدق بسرعه.... ما قدرت ارد على رسالتو دي، ياخ انا عايزه المواضيع دي كلها تتقفل، عايزه عقلي يرتاح من التفكير وعيوني ترتاح من البكى! 😭 نفسي انووووم، انوم نومه طويله ولما اصحى ألقى المواضيع دي كلها اختفت، لا خوف لا قلق لا حزن لا تأنيب ضمير!
قفلت التلفون وختيتو على جنبو ورقدت، ناديت مرام وقلت ليها لما ابوي يجي قولي ليهو قالت ما موافقه، قالت لي على شنو؟ قلت ليها يااااخ ناس امو بحكوا ليك انتي بس قولي ليهو كدا وما تصحيني، عايزه انوم، قالت لي خلاص مالك بتبكي هسي؟
ما رديت عليها، لفيت وشي منها واتغطيت وحاولت تجيب النوم بالغصب عشان ارتاح واطلع من الدوامه دي!
نمت نووومه طويله، لمن جاتني صحيه الساعه أظن كانت 10، قمت اصلي العشاء، ابوي لمن شافني ناداني، كان هو وأمي و مرام قاعدين برا و واضح انو قعدتهم كانت طويله من السيرمس وكبابي الشاي الفاضيه القدامهم، لمن مشيت عليهم و وصلتهم امي قالت لي هسي مبهدله نفسك كدا مالك؟ البشوفك بقول معلقين ليك حبل المشنقه بكرا!.... ابوي قال لي اقعدي، لمن قعدت قال لي هسي انتي مالك؟ قالوا لي كنتِ بتبكي؟ في زول ببكي ساي بدون ما يشاكلوهو أو يغصبوهو على شي؟!.... الكلام واضح و بسيط، ناس خالتك عايزين للولد وانتي ما عايزه دا موضوع انتهى، في شنو تاني؟.... أمي قالت ليهو خليها تقول للناس رافضه ليه؟ قالت عشان القرايه وأحمد ما ح يمنعها منها!.... قلت ليها بصوت باكي امي انا ما عايزه وبس 😭
ابوي قال ليك ماف زول جابرك، على راحتك وقت تحسي نفسك جاهزه ساعتها لكل حدث حديث، وهسي ماف أي زول ح يجبرك على شي لا على أحمد لا ولد الناس ديلك!
كلام ابوي طمني شديد، ابوي هو الوحيد القدر يطلعني من الحاله الدخل فيها، كلامو نزل على قلبي زي السكينه، ارتحت شويه وحسيت انو خلاص دا قرار محسوم وموضوع إنقفل ومشيت صليت العشاء وانا في بالي انو خلاص كل شي بقى تمام وتاني ماف زول ح يجيب السيره دي وخوفي من يوم بكرا اتلاشى.....
لمن دخلت جوه وفتحت تلفوني جاني إشعار رسائل واتس، لمن فتحتو كان في رقم غريب، اول ما دخلت الدردشه طوالي اتخلعت والتلفون وقع من يدي!!
"من قلبي دايرك لي شريكه وأم عيال
لاكن قربك لي بعيد صعب المنال
يعجبني فيك لو قلتي أنا ما دايره مال
اصلو العرس بالفاتحة يا ناس ما حلال
أميرة الشباب يا السمحة أنا جايك عريس
لي كتب الكتاب ي الملكة مهرك ما رخيص"
يتبع.....