رواية شتات الفصل الخامس 5 بقلم مها حولي
_قايلاني ما ح اعرف يعني؟ لمتين يعني كنتِ عايزه تستمري في كذبك و استهبالك دا؟ !.... ليه تكذبي علي؟ هدفك شنو؟ ليه من البدايه ما قلتي لي اسمك، ليه بعد رجعتي ما قلتي لي انا ما اسمي الاء! و فوقها كذبتي تااااني لما حاولتي تشتتيني اكتر و تخليني أظن انك الاء الحقيقه! ما خطر على بالك اني ممكن اعرف الحقيقه؟ طيب ما خطر على بالك اني ممكن اجيب سيرة البينا ل الاء أو اسألها عن شي بخص التلات سنوات ديك و وقتها اكتشف الحقيقه؟ برودة الدم و قوة القلب دي جبتيها من وين؟ ضميرك ما أنبك؟ ما حسيتي انو مفروض تكلميني قبل اجي و أتقدم ل الاء؟.... جاااوبيني بتكلم معاك انا 😡
= وائل عليك الله وطي صوتك، امي ح تسمعنا، انا غلطت وكل الحق علي، ليك حق تزعل وتغضب لكن صدقني كنت عايزه اقول ليك لكن ما قدرت، اهلي لو عرفو ح تحصل مشكله كبيره، خالتي ح تزعل مني و الاء كمان لأنها بتحبك!.... والله كنت عايزه اكلمك
_ متين لكن؟ بعد أعرسها؟؟
= وائل عليك الله... عليك الله ما تعلي صوتك.... أمي جايه علينا اسكت عليك الله ما تجيب ليها سيره
_ اسكت؟ زي سكوتك؟ خليها تعرف وخلي كل الناس تعرف.... ولا اقول ليك الأحسن أدخل ليها انا عديييل و أحكي ليها ب عمايل بتها
= وائل لا.... لا يا وااائل
فجأه صحيت من النوم مخلوعه، عاينت حوليني لقيت نفسي براي وانو دا كلو كان حلم!.... أمي جات وقالت لي هسي كنت جايه اصحيك، قومي كفاك، نوم المغرب دا ما كويس، نايمه من لمن الاء مشت منك!
قلت في نفسي الحمدلله انو كان حلم... بس ما بعيده يبقى حقيقه!
صليت المغرب بعدها اتغدينا، ما قدرت آكل كويس شلت هم، بقوا لي همين، هم الإمتحانات وهم وائل!
شلت شيتاتي ومشيت السطوح وانا مقلقه، ضغطت على تلفوني بس ما فتح!.... ضغطو بالجنبه عشان لو مقفول يفتح مع اني ما قافلاهو بس التلفون حلف ما يفتح! قدر ما حاولت افتحو ما فتح!.... طوالي نزلت تحت بسرعه وقلت ليهم تلفوني دا الهبشو منو ابى يفتح!.... أمي قالت لي كدي جيبيهو مالو.... شالتو برضو ما فتح ليها!.... مآب قالت لي قبيل شفتو عند واحد من التيمان لمن سألتو قال عايز يختو ليك في الشاحن!.... طوالي بقيت انادي عليهو بصوت عالي محمددد يا محمددد، مصطفى.... تعالوا سرعه .... ابوي قال دي بتكورك مالا!!
مرام جات وقالت لي الإتنين ما قاعدين، طلعوا الشارع.... قلت لأمي اقسم بالله أولادك ديل الليله ما اخليهم ليك.... اها بعد شويه جا واحد من التوأم طوااالي مسكتو وقلت ليهو تعال هنا عملت شنو للتلفون دا؟ قال لي ياااهوي تلفون شنو انا متين هبشت تلفونك؟.... قلت ليهو ما تكذب!.... قال لي ياخ انتي شفتيني هبشتو؟ اسألي محمد.... قلت ليهو انت مصطفى مش، قال لي لا الجن الأحمر!..... طبعاً نهااااي ما بفرزهم، بتشابهوا شديد والمشكله انهم بلبسوا زي بعض، قلت ليهو سررررعه امشي نادي لي محمد، قال لي بلعب كوره ما بجيك هسي، قلت ليهو كوره بليل كمان، ناديهو سرعه..... اها بعد شويه مصطفى جا، قلت ليهو تعال هنا عملت شنو للتلفون قال لي ما عارف انا ما هبشتو اساسا!.... طبعاً زهجوني زهج، قلت ليهم يعني براهو باظ، ما تجننوني، يا انت يا مصطفى واحد فيكم هبش التلفون دا!! قال لي العندي قلتو ليك، قال كدا و مشى طوالي، بقيت اطنطن ساي، مرام جات وقالت لي نكروا مش؟ قلت ليها اي واحد يقول دا ما هو، مآب قالت لي اي واحد شنو، مصطفى طلع و تاااااني جاااك داخل يعني ما مشى ينادي محمد اصلاً 🤣🤣
قلت ليها حييييينا منهم الإتنين ديل ح يجلطوني!.... ياخ انا بعاني معاهم، اي زول ينكر! بس الأكيد دا واحد من التوأم أو هم الإتنين! مرام قالت ل أمي أولادك ديل اعمل لينا فيهم ملصقات أو ماركات عشان نعرفهم بيها!.... أمي قالت ليها والله إلا كدا، واللبس دا نهاي تاني ماف زول يجيب ليهم ملابس زي بعض!.... مآب قالت ليها هسي يا أمي معقوله انتي ذاتك ما بتعرفيهم؟.... قالت ليها غيتو مره بتصيب و مره بتخيب، فتره كدا كنت بقدر افرزهم واعرف منو مصطفى ومنو محمد بعدها الحكايه جاطت، انا زاتك قاعدين يستهبلوا علي ومستغلين نقطة انو ماف زول قادر يفرز بيناتهم!!
تلفوني وجعني وجع! في الآخر واحد من التوأم قال التوم التاني وقع منو في المويه، طبعاً التوم التاني دا منو ما قدرت اعرفو لأني ما عارفه نفسي بتكلم مع محمد ولا مصطفى وهم الإتنين قاعدين يستهبلوا علي!!
ابوي قال لي جيبيهو بكرا بوديهو يصلحوا ليك، اديتو لأبوي وتاني يوم اضطريت امشي الجامعه بدون تلفون، امي قالت لي شيلي تلفوني، قلت ليها ما بحتاج ح امتحن بس و اجي راجعه، فعلاً مشيت امتحنت وانا مدبرسه وفي مية حاجه شاغله بالي..... لمن رجعت من الجامعه زي الساعه 3 كدا مشيت بيت ناس خالتو سميه قلت ح احكي ل وائل واخليهو يوعدني انو ما يكلم زول!.... مشيت ليهم ضغطت الجرس ودقيت الباب بس ماف زول فتح لي!.... قلت معناها ما موجودين، خلاص بجيهم العصر!
من هناك مشيت بيت ناس خالتي عايزه اسلم عليهم واعرف لو وائل اتكلم مع الاء و قال ليها شنو، و الصدمه كانت انو لمن مشيت ليهم مآب قالت لي ناس امي في المستشفى!... اتخلعت وقلت ليها ليه الحصل شنو؟؟
قالت لي وائل عمل حادث قبيل الصباح!!
اتخلعت اكتر وقلت ليها بقى كيف هسي وناس خالتي مشوا متين؟؟
قالت لي اول ما عرفوا مشوا، امك ذاتا مشت معاهم!
طبعاً كان في لمى و ولاء فقط، أحمد مشى مع ناس خالتي!
لمن رجعت بيتنا مرام كلمتني، قلت ليها اي غشيت ناس خالتي وحكوا لي!
طوالي شلت تلفون مرام اتصلت بيهو على الاء، لمن ردت علي قلت ليها قالوا لي انكم في المستشفى، قالت لي اي وائل عمل حادث، قلت ليها ان شاء الله ما خطير، عملوا ليهو شنو، قالت لي والله الدكتور قال ارتجاج بسيط وكدمات قويه في الصدر وتمزق في أربطة الرقبه، هسي مركبين ليهو طوق رقبه و ح يقعد 4 أيام في المستشفى، قلت ليها ربنا يواليه بالعافيه، قالت لي آمين يارب تسلمي.... امتحنتي كيف؟؟
قلت ليها تمام الحمد لله، قالت لي دعواتك لي بكرا برضو عندي امتحان، قلت ليها موفقه يارب،طبعاً هي في امتحاناتها باديه قبليني بس في امتحانين اتأجلو وهسي ياداب عايزين يمتحنوهم بكرا، لمن قفلت منها مرام قالت لي قالت ليك شنوووو ف وريتها بإختصار!
اها بعد المغرب ناس امي جوا، قالت بقى كويس والحادث ما خطير شديد لكن ح يقعد في المستشفى، نفس كلام الاء، قلت ليها خالتو سميه جات معاكم، قالت لي بري البجيبها شنو و ولدها مرقد في المستشفى؟!!
ابوي لما جا قال لي تلفونك دا دخلتو شوية مويه، خليتو لبتاع المحل قال لي تعال استلمو بكرا، قلت ليهو يا ابوي ما كان تخليهو ليهو، هسي لو طلع حرامي أو غير شي في التلفون! قال لي لا لا دا زول موثوق، انا بعرفو حق المعرفه، لو ما كدا ما بخلي التلفون عندو!
قلت ليهو شفت يا ابوي دا كلو بسبب أولادك الإتنين ديل، ياخ انا تعبت منهم يا ابوي، قال لي خليهم لي، ناداهم تاني ونهرهم الإتنين وقال ليهم اتكلموا منو الشال التلفون و رماهو في المويه؟؟.... طبعاً ابوي هرشتو حااااره، واحد من التوأم اتكلم وقال ليهو، بس شلتو عشان نلعب بيهو، دخلت بيهو المطبخ و وقع مني في الجردل والجردل كان فيهو مويه، والله طلعتو منو بسرعه و رجعتو مكانو، ما قايلو ما ح يشتغل.... قلت ليهو دقيقه دقيقه، يعني انتوا عارفين رمز القفل حق تلفوني؟؟ كويس
ابوي قال ليهم من يوم الليله دا ممنوع زول يشيل حاجة زول، فاهمين ولا لا و اوعكم واحد يعمل الغلط ولما يسألوهو منو ينكر ويكضب!.... هزوا ليهو راسهم..... سكتو شويه وبعدها واحد منهم قال ليهو انت ح تجيب لينا تلفونات متين يا ابوي؟ قال ليهم بعد تخلوا شغبكم و قلة ادبكم دي وكضبكم واستهبالكم......قالوا ليهو خلااااص هسي خلينااااها! 😂😂😂
تاني يوم ما كان عندي امتحان، امي قالت لي امشي عليهم في المستشفى، سوقي معاك مرام، هسي سميه تقول ما جيتوها!
طبعاً انتظرت مرام بعد جات من المدرسه، جهزنا نفسنا ومشينا، لمن وصلنا لقيت خالتو بس،سلمنا عليها وقلت ليها حمدلله على سلامتو، قالت لي الله يسلمك يا بناتي،قلت ليها وين خالتو سميه؟؟
قالت كل كلهم نزلوا تحت ياكلوا ليهم شي، سميه دي يا حليلها من الصباح لقمه ما دخلتها في خشمها!... قلت ليها والله يا حليلها، وائل ربنا يشفيهو ويعافيهو.... قالت لي يديك العافيه، اتفضلي هسي بتجي.... قعدنا في الكراسي البرا، طبعاً ما قدرت اقول ليها ح ادخل اشوفو، بعد شويه قالت ماشه الحمامات، مرام قالت ليها انا زاتي عايزه امشي، قالت ليها سمح ارح معاي و مشوا سوا.... بعدها بشويه قمت من مكاني و وقفت جنب غرفة وائل، أصلا نحنا كنا قاعدين في الكراسي القصاد الغرفه، دقيت الباب بعدها فتحتو و دخلت، كان صاحي وقاعد على السرير، وزي ما قالت ولاء عاملين ليهو طوق رقبه، من جنب الباب قلت ليهو السلام عليكم،حمدلله على السلامه رد لي بصوت تعبان وعليكم السلام، الله يسلمك اتفضلي، بقيت افكر بين نفسي اقول ليهو ولا لا؟ هسي ماف زول اقول ليهو سرعه سرعه وامشي!.... تاني خجلت من نفسي، ياخ الراجل عامل حادث ومرقد في المستشفى اجي اقول ليهو الكلام دا!.... دا ما وقتو، طبعاً انا بفكر وهو بعاين لي بإستغراب، قلت ليهو بقيت كيف هسي؟ قال لي بخير الحمد لله، قلت ليهو ربنا يشفيك ويعافيك وطوالي طلعت وقفلت الباب، رجعت قعدت مكاني وناس خالتو سميه جوا، سلمت عليهم كلهم، وناس مرام برضو جوا، خالتو سميه قالت لينا ادخلوا ل وائل لو ما دخلتو، قلت ليها انا دخلت ليهو، مرام خشي سلمي عليهو عشان نمشي،فعلا مرام دخلت ليهو مع خالتو سميه، حمدلت ليهو السلامه، بعدها استأذنا منهم و رجعنا البيت.... طوالي بديت مراجعه لإمتحان بكرا، نفضت كل الأفكار الفي بالي وركزت بس على قرايتي، والشي الخلاني اتطمن شويه انو لسه عندي زمن لموضوع وائل لأنو هو حالياً في المستشفى ربنا يشفيهو ويواليهو بالعافيه، المهم تاني يوم مشيت وامتحنت وبقيت بس مركزه مع امتحاناتي، لأن أقل ضغط تاني أو مواضيع تانيه بتزيد قلقي و توتري و بتأثر على ادائي في الإمتحان، عشان كدا موضوع وائل دا كلو شلتو و ختيتو على جنب لحد ما اخلص امتحاناتي ، الوقت داك الاء خلصت وبدت تجهز في نفسها وفي تجهيزات الخطوبه وانا الأسويهو غلبني! مع أنو الخطوبه اتأجل اسبوعين لقدام لحدي ما وائل يبقى كويس، بس برضو الناس كانت بتجهز نفسها، طبعاً وائل طلعوهو من المستشفى جابوهو البيت، اليوم الجابوهو فيهو البيت غشيتهم من الجامعه، كان معاهم أهلهم القراب، لما بقينا انا وخالتي سميه برانا قالت لي اها كيف مع الإمتحانات؟؟ قلت ليها الحمدلله بكرا آخر امتحان، قالت لي الحمدلله،عشان ذاتو تجي وتساعديني في ترتيبات الخطوه، الأسبوعين ديل هسي بجوا، غيتو انتي حتكوني قاسم مشترك بين أهل العروس والعريس، رجل هنا ورجل هناك..... سكت مسافه بعدها قلت ليها خالتو سميه.... قالت لي عيوني.... قلت ليها لو في سر لو انقال ح يزعل ناس كتار ولو ما انقال ح يزعل طرف واحد يلي هو الزول العارف السر وساكت بيهو.... قالت لي بإستغراب الكلام دا بخص وائل أو الاء؟؟.... بسرعه قلت ليها لا لا.... ساي عايزه اشاورك واتناقش معاك، مش بقولو في أسرار الأفضل انها تكون مدفونه لو البوح بيها بخرب حياة ناس أو بزعلهم؟؟
قالت لي ما عارفه شنو في بالك أو قاصده شنو، لكن انتي عارفه نفسك بتتكلمي عن شنو، عشان كدا ح اقول ليك اسألي نفسك واعملي مقارنه بين انو السر دا لو انكشف ح يحصل شنو ولو ما انكشف ح يحصل شنو، شوفي اي كفه هي أقل ضرراً و أبقي عليها.... قلت ليها المشكله انو حتى لو سكت مصيرو ينكشف!.... فهل الأفضل اكشفو انا ولا انتظر و اشوف البحصل شنو؟؟
قالت لي شوفي في حاجات الأفضل تتقال مننا نحنا عشان ما يساء الفهم لما تتكشف براها وفي حاجات الأفضل نخليها للوقت.... سكت مسافه وبقيت اقول في نفسي ماف احتمال ولو بنسبة 1٪ بأكد لي انو وائل ما ح يعرف الحقيقه، هو ح يخطب الاء و يتزوجها استحاله ما يجيب ليها سيره، انا حقيقي براي رميت نفسي بين نارين، لو خطبها ح ازعل لأنو انا الحبيتو وهو بحبني انا، بس يمكن لو وريتو الحقيقه ما يكلم زول! بس كدا ح يخلي الاء و الخطوبه قربت، اسبوعين ما بعاد، وااااي يا ربي💔
ما قدرت ألاقي وائل كانوا معاهم ضيوف وبكرا عاملين ليهو كرامه، لما رجعت البيت كل دقيقتين اشوف تلفوني واتفقد الماسنجر، برضو ما كان داخل!!
في اليوم البعدو مشيت امتحن آخر امتحان وانا ماخده قرار نهائي اني ح احكي ل وائل و يحصل اليحصل و دا قرار نهائي لا رجعة فيه 🤚
خلصت امتحان وطوالي طلعت من القاعه وعلى طول على بوابة الجامعه، اول ما طلعت كانت المفاجأة!....لقيت وائل واقف جنب عربيتو، متكل عليها ومربع يدينو ولابس نظاره شمسيه، قلع نظارتو وبقى يعاين لي، إتلفت وراي، قلت يمكن جا لزول غيري بس ما كان في زول!.... قلت في نفسي الجابو شنو....مشيت عليهو بخطوات مُثقله وانا في ألف سؤال في بالي بالذات بعد نظراتو دي، لما وصلتو قلت ليهو السلام عليكم.... ما رد علي، فتح لي باب عربيتو عن سكات، صراحة اتوترت اكتر، قلت ليهو في شنو؟؟
قال لي تعالي عشان افهمك، بقيت اعاين ليهو بإستنكار، قلت ليهو ما ح امشي إلا تقول لي في شنو، قفل باب العربيه بقوه وجا وقف قصادي وقال لي بتخافي؟ بتخافي مني؟
قلت ليهو ما كدا، لكن جيتك ل هنا مريبه! في شنو يعني؟.... قال لي خلينا نمشي من هنا عشان افهمك الحاصل شنو؟
في الآخر ركبت معاهو، كان سايق وهو ساكت وانا مشربكه يديني، بعد مسافه وقف العربيه فجأه وما قال أي شي، انا اتوترت، لما دخل يدو جوه جيبو قلت خلاص عايز يطلع مسدس يرصصني بيهو أو منديل فيهو مخدر، ختيت يدي على خشمي ونزلتها لمن طلع تلفونو، بعدها طوالي رفع التلفون قصاد عيوني، فتح لي دردشتنا حق الماسنجر.... اتخلعت خلعه ما عاديه وقلبي اشتغل زي الدلوكه! واضح انو حلم بقى حقيقه، بقيت مُطيره ليهو عيوني وهو يعاين لي سااااي ونظراتو مليانه زعل وغضب.... مع ذلك نهاااي ما استعجلت للإعتراف، قلت ليهو دا شنو؟ وليه بتوريني ليهو؟
نزل التلفون وقال لي فظيعه انتي؟ جايبه قوة القلب دي من وين؟ ليه لسه مُصره على الكذب والعناد؟
سكت سااااي، رجع اتكل على الكرسي حقو و رمى التلفون بزهج، قال لي ما عارف ألومك على شنو واخلي شنو!.... فجأه بقى يكورك ويقول لي انتي وحده انانيه وبياعه وما عندك تقدير للمشاعر، قال لي انا والله العظيم حبيتك ومشاعري كانت صادقه واستعجلت في الرجوع عشانك، عشان أبقيك حلالي واكون معاك باقي عمري الجاي، عذرتك واحترمتك شديد لما قلتي ما عايزه يكون في تواصل ونحنا ماف شي رسمي بيناتنا، صبرت على اختفائك المفاجئ وعشت أيام ولحظات صعبه في غيابك مع ذلك لما جيتي وقلتي لي الكلام العندك كل زعلي منك راح وفي الآخر اكتشف انك كنتِ بتكذبي علي؟ لا احترمتيني لا قدرتي مشاعري.... ياخ قولي مشاعري ناحيتي اتغيرت، قولي انك بطلتي تحبيني، اقلاها يااااخ كان تقولي لي انا بتكلم مع منو، معيشاني في خدعه عمرها تلات سنوات بدون ما تتراجعي أو تحسي بتأنيب الضمير و فوق دا كمان لسه مواصله وعندك نيه تواصلي اكتر واكتر، لكن لمتين؟... لمن فهمتي وعرفتي اني لما امشي اخطب بت خالتك الاء ح أشك و أتساءل، رسلتي لي عشان تشتتي أفكاري اكتر و تخليني اقتنع انو الاء الكنت متواصل معاها هي نفسها الاء بت خالتك!!؟.... عارفه انا اكتر شي واجعني شنو وشاقي قلبي؟ انك مستعده تتخلي عني... معقوله ما اتألمتي، ما اتوجعتي لما مشيت واتقدمت ل بت خالتك وانتِ عارفه اني حابيك انتي؟
بقى يجوط ويكورك وانا ابكي، بقيت كدا لمن قلت بس، قلت ليهو وائل والله العظيم انا كنت جايه اكلمك، كنت عايزه اكلمك بس حصل ليك حادث وما قدرت اقول ليك الحقيقه وانت في الحاله ديك، صدقني اليوم انا كنت جايه اقول ليك وانت سبقتني!
قال لي جايه تقولي لي بعد شنو؟؟ بعد فوات الآوان؟ انتي اصلا ليه من الاول كذبتي علي؟
بقيت ابكي وانا بقول ليهو:
لأنك في البدايه كنت قايلني الاء وانا ما قدرت اقول ليك اني مها، كنت خايفه من حتة اني اكشف ليك نفسي، انت اول زول اتكلم معاهو في حياتي كلها عشان كدا كنت خايفه وما عايزه اقول ليك اسمي، لما خلاص وعيت على نفسي، انسحبت فجأه، صدقني ما براك الكان صعب عليك الإنسحاب دا، انا زيك عشت اسوأ الأيام والليالي ويمكن اكتر منك، لأن من زمان كنت حاباك حتى قبل ما انت تحبني، ما كنت عارفه انو خالتو سميه ح تمشي وتتكلم مع خالتي في موضوعك انت و الاء، لو قريت رسالتك الكلمتني فيها كنت ح امنعك ما عارفه كيف بس ما كنت ح تتقدم ليها، لما جيت واتقدمت ليها انا بقيت واقعه بين نارين، لو اتكلمت مشكله ولو سكت مشكلتين وانت على كل الأحوال كنت ح تعرف بس كنت عايزاك تعرف مني انا وفي نفس الوقت كان صعب علي أخرب فرحة الاء البتحبك برضو من زمان وما صدقت انك جيت واتقدمت ليها.... انا جد عقلي كان ح يطرشق وبقيت مضغوطه من كل الإتجاهات بس اليوم كنت مقرره أكلمك ويحصل اليحصل، انا الغلطت يا وائل لو عايز تعاقبني عاقبني بس رجاء خلي الموضوع دا بيناتنا، اهلي لو عرفوا ح تحصل لي مشكله 💔😭 الله يخليك يا وائل ما تجيب ليهم سيره، انا والله العظيم حبيتك بس كذبت عليك لما ما وريتك الحقيقه...... سكت سااااي ما اتكلم، بعد سكات طويل قال لي وانا هسي اعمل شنو؟ اخطبها؟؟ اخطب البت الما بحبها؟.... ضرب الدركسون بقوه وقال لي ما تتوقعي مني اخطب بت خالتك دي واعرسها، انا حبيتك انتي ما هي فاهمه ولا لا؟؟
زدت زياده في البكى والكلام غلبني، كل ما احاول اتكلم دموعي تغلبني، حلقي اتقفل وحسيت نفسي ح اطرشق من شدة الزعل والبكى، هو تاني ما اتكلم معاي، ساق العربيه ولمن وصلنا نزلني جنب بيتنا ومشى طوالي بدون ما يقول أي شي، دخلت البيت وما اتفاهمت مع أي زول، رقدت واتغطيت بتوب امي وبكيت كأني ما كنت قاعده ابكي من قبيل، ختيت المخده على راسي وغمضت عيوني شديد وحاولت انوم.... انوم عشان اهرب من الحصل دا عشان ما أحس بشي، بس الذكريات هاجمتني من كل الإتجاهات، كل حبي ومشاعري ليهو الكانت طول التلات سنوات دي صحت من جديد، بقيت اقول في نفسي و أرددها:
أنا بحبو.... انا بحب وائل، والله بحبو..... ياداب جاني وجع ومرارة احساس انو مشى اتقدم ل بت خالتي، قبضت المخده شديد ب يدي وانا ببكي بدون صوت عشان ماف زول يسمعني، حسيت روحي ح تطلع، كل قهري من نفسي ومن الحصل طلع على شكل شلالات من الدموع!💔
_ امي يا أمي
= اي يا وائل في شنو يا ولدي مالك بتكورك كدا
_عايني مش نحنا أجلنا الخطوبه دي بسبب الحادث الحصل معاي؟
= اي!!
_ الخطوبه ملغيه، ما عايز أي خطوه عقد بس و بكرا ح نعقد و نتم العرس في أي وقت
= يا ولد هوي دا كلام شنو؟كيف يعني تعقد بكرا؟ في شنو مالك انت؟
_عايز كدا وبس يا أمي ما تعترضي!
= وائل نحنا الجماعه ديل متفقين معاهم انو الخطوبه بعد اسبوعين كيف نمشي هسي ونقول ليهم العقد بكرا، ماف زول جاهز!
_ يوم بكرا دا مش هو يوم الخطوبه الاتأجلت؟ مش كلكم كنتوا جاهزين للخطوه دي؟ معناها حتكونو جاهزين للعقد، وهو عقد بس ما عرس كامل.... يا أعقد بكرا، يا الموضوع دا كلو يتلغي 🤚💔
=وااااي يا ولدي انت جنيت ولا شنو، بسم الله يا وائل مالك يا ولدي الصابك شنو!!
_ دا آخر كلام عندي.... انا ح اكلمهم وانتي ما عليك إلا تكوني جاهزه ولو عايزه تتصلي تكلمي بناااتك وتعزمي ناااس اتصلي من هسي.... ابوي انا هسي بكلمو..... انتهينا🤚
وانا نايمه صحيت على صوت مرام اختي وهي بتهز وتصحي فيني، زحيت المخده عن وشي وقمت عيني مغمضه وعين مفتحه، قالت لي مها قووومي بكرا عقد الاء!
قلبي وقف لحظتها!
كنت قايله نفسي بحلم ف بقيت اعاين ليها ساااي وانا قايلاهو حلم وما فاهمه هي بتقول في شنو، قالت لي يا بت قووومي ياخ امي مشت قدامنا وقالت نحصلها، بكرا العقد يا بت قومي، الاء ذاتا بتكون اتصلت عليك كتير جادعه تلفونك وين، قومي يااااخ انا ماشه، تعالي مع مآب.... قالت كدا و مشت طوالي، انتفضت وقمت مخلوعه.... عقد!؟ عقد الاء؟ الح يعقد عليها منو، وائل!!
طلعت تلفوني من الشنطه لقيت مكالمات كتيره مع الاء والتلفون صامت، فتحت الشبكه دخلت الفيس، وطوالي فتحت دردشتي مع وائل، عايزه ارسل اسألو من الخُلعه دي لقيتو حظرني!
لحظتها حسيت بإحساس كعب شديد! ياربي دا حلم؟
مآب جات قالت لي مها عليك الله قومي، والله امشي اخليك!..... قمت بسرعه صحصحت و غسلت وشي ب العبايه الجيت بيها من الجامعه قبيل مشيت بيها بيت خالتي، الوقت داك المغرب لسه ما أذن، مشيت بيت خالتي لقيت الجارات القُراب داخلات وطالعات، مشيت لناس أمي لقيتها بتتكلم مع خالتي وقالت ليها بالغ والله! خالتي قالت ليها دا كلو من ابوها وافق طوالي! ياخ الجاهز منو ل عقد بكرا! جايبنها من الشارع نحنا عشان يعمل ليها عقد كشى مشى!.... وحده من الجارات قالت ليها يا رقيه والله الموضوع دا ما كعب، قالوا ليك عقد بس ولقدام اعملوا مناسباتكم، يعني دا بدل الخطوبه وكدا احسن زاتو، الزمن دا الراجل بتزاوغوا من العرس، الواحد يخطب وحده يمسكها سنتين 3 سنوات و اكتر وفي الآخر يفكها عكس الهواء، انتوا وقت لقيتوا ليكم راجل ضكران وجادي، عايز بتك وشاريها ابقوا عليهو عشره، والله انا بتي عرست بنفس الطريقه دي و عملت مناسبه زي العجب! خالتي قالت ليها ياخ كان يتكلم من بدري، كيف يجينا باقي اليوم دا ويقول العقد بكرا! الولد دا أصر إصرار كدا لمن حيرني! امو زاتا ما راضيه ب عقد بكرا دا، لكن الرجال موافقين! قالت ليهو وكلام الرجال سكين!.... انبسطي بس ل بتك يا رقيه وجهزوا البتقدروا عليهو، اصلا هو عقد بس!
أنا هنا صدقت.... صدقت انو دا حقيقه، لا حلم لا خيال، بكرا عقد وائل و الاء!.... طيب كلامو القبيل؟ مش قال لي ما تتوقعي اني اخطب بت خالتك دي؟ طيب وهسي؟ عايز يعقد عليها عديل!
حسيت قلبي ح يطلع من مكانو، لأنو تاني ماف شي ممكن يمنع الحاصل دا، وائل بكامل إرادتو قرر انو يعقد ولا يخطب زاتو! حتى بعد معرفتو للحقيقه قرر يعقد على الاء!... طيب وانا؟!
بعض العقوبات لا تأتي لتؤلمنا فقط…
بل لتأخذ منا الشيء الذي كنا نظنه يومًا حقًا لنا
وما أقسى أن يكون عقابك أن ترى حلم مراهقتك، وحب سنواتك، والرجل الذي تخيلتِ أن تنتهي حياتك إليه يمنح امرأةً أخرى المكان الذي ظللتِ تحلمين به والسبب؟ انتِ
كأن الحياة تريد ان تريني كيف كان يمكن أن تكون حياتي، لو اني لم اكذب في ذلك اليوم.
يتبع.....