رواية بلسم الفصل السادس 6 بقلم هند الهيباني
وانا في عز صدمتي...
ماكنت عارفه اعمل شنو..
او اقول شنو حاسه كأني في وسط دوامة..
حاجه ما اتخيلتها تحصل في يوم من الايام
بل المفاجئ اكتر الانسانة الوحيده الما اتخيلتها
يحصل لي معاها....
في وسط الجوطة دي دق الباب واتجرا السلك
لقيتا خالتو فاطمة وهي بتقول بسم الله مالكم في شنو.
اكتر انسانه بكره زول يعرف عني حاجه سيئة
وخصوصا لو ماكان فيني. جريت ودخلت جوه وانا حاسه بي وجع ما طبيعي من الحصل دا.
#فاطمة
كلتوم؟!
مالك بسم الله ما من عوايدك في شنو صوتكم طالع للجيران
ودا شنو الأكياس المجدعه دي طقوكم عين ولا شنو..
كلتوم:اقول شنو يا فاطمة اااخ اقول شنو..
جابو لي خبر ما سمح نهائي..
فاطمة:خبر شنو؟!
خبر عن بلسم ما بسر نهائي وشي كعب بس عليك الله بيني وبينك..
فاطمه :بدون تقولي لي حا اعمل كده بعدين بدون اعرف الموضوع انا متأكده انو بلسم بت كويسه ومحترمة
كلتوم:ما انا عارفه بلسم كويسه لكن يا فاطمه مرة كبيرة مصلحتا شنو تجي تكذب...
فاطمه :كدي اسمعي كلامي دا يا كلتوم وهدي بالك وتعوذي من الشيطا**ن وان جائكم فاسق بنبأ فتبينو ان تصيبو قوما بجهاله فتصبحو على ما فعلتم نادمين...
اتوكلي وامشي اسمعي من كل الاطراف بعدين اتصرفي.
بي طريقتك حاولي اتحققي من الموضوع وحتى لو لقيتيها
على غلط صلحي معاها بالنصح واللين عمرو الدق والعصبيه ماكانت حل لي مشكله....
كلتوم :كلامك صاح يا فاطمة جزاك الله خير خففتي عني كتير.
فاطمة: وجزاك طيب انا بضاير ليك
كلتوم :لالا انا بضاير ما بتقصري
لا والله ما بينا وما ترجي راجلك بالوضع دا عشان ما يحس
انتي عارفه الرجال تصرفاتهم كيف في الأمور الزي دي انا برتب وانتي امشي فتشي في الموضوع دا عشان لو ظالماها تخلي الوضع تحاسبي المسؤول ولو غلطانه جد تصوبيها.
كلتوم : لبست هدومي وطلعت وخليت وراي فاطمة تضاير...
وقصدت بيت المرة الجاتني ومن دخلت شافتني..
سلمت وقعدت وقلت ليها دايرة اعرف الدكان القصدتيهو
وين قالت لي معليش يا اخت بس ما بقدر اوريك وارمي نفسي في مشاكل مالي فيها...
قلت ليها صدقيني ما حا ارميك في مشكله عاوزة اعرف بس
رفضت نهائيا رغم الحناسات و الالحاح مني بس بدون جدوى
وانا طالعه جات جارتا وهي بتسلم عليي وقبلت عليها وهي بتقول ليها هسي جيت من دكان محمد عشان اشتري ايسكريم لقيت الليله ماف نفسي فيه والله وسألتو قال البت ماجابتو ليه.
من الكلمة دي والتفت على جارتا وعليها ولقيت ديك بتقرص فيها عرفت انو دي وجهتي سألت من الدكان..
وقالت لي دكان محمد راجل فلانه دي.
راجلا!!!
طلعت من هناك وانا بسابق خطواتي.
لحد ما وصلت الدكان اشتريت منو كيس عدس وقلت ليه عندك ايسكريم هنا كده كم نفر اتكلم عنو اديني منو
قال لي والله خلصان لكن بما انو اول مرة تجي هنا حافض لي كيس جوه كان داير اكلو لكن حلال عليك..
نفس الكيس الشفت شايلاه بلسم.. نفس الطعم .
قلت ليه ماشاء الله حاجه طاعمه بتعملو انت
قال لي لا جات بت قبل كم يوم ادتني ليه ابيعو ليها وسبحان الله ربنا بارك فيه وبتشال في نفس اليوم
قلت ليه حلو والله ماعندك رقم البت دي قال لي لالا ماعندي نهائي ولا عارف زاتو ساكنه وين حتى اسما ماعارفو
قلت ليه ماعارف اي شي ممكن توصلني ليها محتاجه ليها ضروري.اي شي انا بعرف الناس الفي الحي دا كلهم . قال لي والله ماعارف شي لكن دقيقه بتذكر ادتني رقم حساب احول فيه القروش تقريبا الزول اسمو خالد الأمين...
وضحت الصورة في راسي..
اتذكرت كل العملتو لي بلسم وانا متضايقه من نفسي ضيق ما يعلم بيه الا الله كيف فاطمه الغريبه تثق في بتي اكتر مني
وانا بشاكل وكذبت بتي عشان واحده غريبه بشوفا اول يوم ما قدرت استحمل رجعت لبيت المرة زاتا وانا خلاص فاضت بي..
مشيت ومن فتحت لي الباب قلت ليها كيف تجي بيتي وتكضبي في بتي اتهام زفت زي دا يا عديمة الضمير.
قالت لي هييي اسمعي هنا.. انا من اول يوم شفت فيه بتك دي حايصه في دكان راجلي وانا قلبي نغزني منها راجلي الليل والنهار ماعندو غير سيرتا وسيرة انو البت دي مرزقة وزوله اسكريما ما شاف زيوو وانا النار طالقه فيني من يوم بدت مع راجلي واسمعي هنا وكلامي دا ختي حلقه في اضنيك
بتك دي امسكيها عليك قوي وما اشوف خيالا ساي جمب دكانو ولا جنب الحلة دي ساي.. لانو والله وتالله الدور الجايي الاشاعه دي حا يسمع بيها الحي دا والوراه والبعدو وبتك اعشمي تعرسي ليها....
طلعت منها وانا راسي ضارب
من العملتو في بتي ومن القالتو لي الزولة دي وحاسه نفسي راسي لافي ماعارفه اعمل شنو....
#مازن
يوم زي كل الايام كل ساعه كانت بتشبه. القبلها يوم مافيه اي شي غير وضع باهت...
مسا اليوم دا سمعت صوت أقدام ماشه على طول الممر لحد ما هدا الصوت دا بعد قررب التفتا على الباب وانا بسمع دقه واحده على القضبان الحديديه جات اللحظة الكنت ماعاوزا تجي..
سمعت اسمي على لسانو اتحركت بي هدوء لحد ما وصلت عندو مد لي صحن الاكل شلتو وقعدت في ركني المعتاد طلعت ورقه من تحت الصحن عاينت ليها بتمعن وانا بشوف في الصورة دي.....
#بلسم
جاتني خالتو فاطمة وبقت تهدي فيني وضمتني عليها وهي بتقول لي حاسه بيك والله يا بتي..
قلت ليها مستحيل تحسي بي ياخالتو فاطمة انا شكت فيني امي وصدقت الغريبه وانا لا..
قلت ليها انا عارفاك صادقه
طيب ليه؟!.. انتي بتقولي كده عشان تواسيني صاح انا امي الولدتني ماوثقت فيني كيف انتي حاتثقي قالت لي لاني عشت في تفاصيل زي دي اتعرضت لاكتر من كده عارفه عشت زييك كده كتير واتقال لي اكتر من الاتقال ليك انا ضقت أضعاف الضقتيهو اتخنت... واتخذلت وبعد كل العذاب دا اتزوج عليي وراميني قاعده زي المعلقه بجيني مرة في الشهر اولما بتشاكلو أو يكون فلس لا حب لا اهتمام لا صرف.. وبضر*بني لي في الوضع دا اكتر من ٦ سنين مصدقاك لأني عشت احساسك دا احساس تكوني صادقه وكل الناس تقول ليك انتي كذابه.. احساس تتفهمي غلط.. كل الاحاسيس دي ما بحس بيها الا انسان عاشا.. اشتغلت وللان بشتغل وسمعت الكتير وحاسه وعارفه بالبتقال.
مسحت دموعي وانا بقول ليها طيب المقعدك شنو معاه وقت هو عامل ليك كده ومكفي حياتو مع واحده تانيه وجادعك كده..
قالت لي ببساطه عشان يتعذب بي...
عاينت ليها بي استفهام..
قالت لي انا ماعندي القدرة ارجع اتقل علي اهلي بيتنا ضيق وحالهم على قدرهم اخوي شايل بيتو وامي وابوي على اكتافو
ومستحيل اسوق شفعي كلهم وامش ابقى ليهو هم زايد واضيق عليه البيت.. بعدين انا اتعذبت كتير في الدنيا دي وماف. ولا زول ولا قانو*ن برجع لي حقي والظل**م الاتظل*متو
عشان كده قعدت كده..
بتذكر يوم اعترضت على زواجو قال لي انتي منو انا محللين لي اربعه.. انا قعدت من الوقت داك ساكته صابرة عارفه ليه؟!
لأنو ربنا قاعد فوق رب العدل...
زي ما شرع الزواج وحلل ليه ٣ و٤ ختا قصادا شروط تحفظ لي حقوقي وما اهملني كامرأة لا تميلو كل الميل..
لازم يعدل بينا لو جاب ليها كيس عيش لازم يجيب لي لو جاب ليها دهب يجيب لي برضو يقسم الايام بينا يديها قروش يديني أقل تفضيل وميل للتانيه دا عداد سيئات ماشي
لو عاوز يقعد معاها ايام زياده ويشيل جزو من ايامي يستأذني لو مارضيت ومشى ونمت اليوم دا حزينه كل دمعه من عيني ذنب ليه كل يوم نمت فيه موجوعه دا ذنب ليه عداد سيئات ماشي وانت راقد في سريرك ربنا ما عندو عقاب ليك لو ملت بي قلبك وحبيت واحده اكتر من التانيه بس بعاقبك على أعمال يدك والتفريق بينا في المعامله والتعامل...
ربنا حفظ حقنا وأدى أقسى العقوبات والرسول صلى الله عليه وسلم قال في نص الحديث يجي الرجل يوم القيامة وله امرأتان فلم يعدل بينهما جاء وشقه يوم القيامة مائل.
وحزر من ظلم حق الضعيفين اليتيم والمرأة
فأنا ما حا اخد شي لو اتطلقت هو حا يعيش حياتو عادي وسقط عنو اثمي وانا اربي واكبر عرفتي انا قاعده ليه وصابرة ليه!!؟ يابتي يا بلسم خليك قويه كل بيت ورا حيطانو زول عايش قصه ووجع انتي ماعارفه عنو شي كل زول داسي بين جدران البيت قصه وكل زول جوه نفسو في جرح ما اتضمد
ولا اتعالج أمسحي دموعك وادي أمك العذر هي أم ومابحس بالام الا ام زيها اكيد من خوفا عليك واحساسا بالعجز فكرتك في لحظة غضب عملتي كده والشيطا*ن
هيأ ليها وحصل الحصل دي امك اقعدي معاها براحه وصدقيني حاتلين وحاتصدقك..
مسكت خالتو فاطمة حضنتها.. عن كمية التعب العايشاه
عن مواساتا لي وهي المحتاجه البواسيها، وقفتا معاي ما انساها ليها لمن اموو**ت، لحظات الطمئنة البتجي في عز الاحتياج مابتتنسي....
مسحت دموعي وبعد مسافه امي جات اتكلمت مع خالتو فاطمة وشكرتا وجات عليي تبكي وتقول لي، العملتو كبير فيك بدل اشكرك وابوس راسك اتهمتك اتهامات كعبه وصدقت الغريبه، انا والله ماكان قصدي والله لحظة غضب..
بكيت، حزن وفرح انا مهما حاولت مابقدر ازعل من امي مسكتها واتقالدنا وبكينا زييين...
بعد سكتا قالت لي بس توعديني تخلي بيع الايسكريم كلو كلو
انا والله يابتي ماعاوزة ليك حاجه تجيب ليك الكلام والمرأة الشافتك دي الغيرة العمتا وعارفه النسوان وغيرتهم..
قلت ليها امي اساعد ابوي كيف.. قالت لي ربنا بحلها ربنا بحلها..
طلعت عصر اليوم دا بحاول افتش بيت بيت عشان ادرس، ، اي شي عشان اقدر اساعد ابوي بس مالقيت،
آخر بيت قررت ادخلو
وقفت قدام الباب وما قدرت أدقو طوالي.
يدي اترفعت ونزلت مرتين.
لو قالو لي "ما محتاجين"؟ لو ضحكو عليّ؟ لو سألوني شهاداتك وين؟
أنا ما عندي شهادات..
حا يقولو شنو..
أخدت نفس عميق ودقيتو..
الصوت كان واطي،
"منو؟"
صوت من جوة.
"أنا... أنا بدرس إنجليزي. لو محتاجين زول للتدريس..."
سكتت. الكلام وقف في حلقي.
الباب اتفتح نص فتحة.
عيونها بقت ماشه فيني من فوق لتحت . ما اتكلمت. غير بالجمله دي.
"ادخلي. اقعدي هناك. دقايق وأجيك."
دخلت.
بقيت أعدّ. واحد... اتنين... عشرة.
لو قالت لي لا، حأمشي وين بعد ده؟
الباب اتفتح تاني.
ودخل
شاب شكلو في نهاية التلاتينات ،
قعد قدامي من غير مقدمات وفتح تلفونو. وهو بقول لي انتي البتدرسي؟! جاوبت ايوه..
"تمام. أنا بسألك كم سؤال بالإنجليزي. لو جاوبتي صح، بكرة تجي الساعة اتنين. لو لا، معليش."
قلبي كان بيدق
السؤال الأول جا
سمعت صوت نفسي وأنا بجاوب. كان واطي، مرتجف، لكن صح.
التاني. التالت.
كل إجابة كانت بتفك عقدة في صدري شوية شوية.
سكت. عاين لي.
ابتسم ابتسامة صغيرة وردد
"مبروك. من بكرة الساعة اتنين.
ما صدقت.
"بجد؟"
"ردد ايوه . كم ساعة دايرة تقريها؟"
"ساعتين." قلتها وأنا خايفة يغيّر رأيو لو قلت أقل
"تمام. 150 ألف للشهر."
150 ألف.
الكلمة دي عملت لي صدى في راسي.
150 ألف!
مالا ما كويسه معاك؟ /
هزيت راسي وأنا ما قادرة أتكلم.
خفت لو فتحت خشمي يطلع صوتي باكي.
"تمام... تمام كويسة معاي."
طلعت من البيت وأنا ما حاسة برجولي.
الشارع كان نفس الشارع، بس الهوا بقى أخف.
مشيت وما عارفة ماشة وين.
طالعه وانا حاسه نفسي حا اطير من الفرح ماشه في الشارع وكأني عندي جناحات وطايره في الهوا من كترة السعاده كنت ماشه وبعدت من البيت بدون ما احس بس حسيت نفسي عاوزة اتمشى واشم هوا ماشه وماشه وماشه.....
#عسك*ري
مازن جلال.... اتحرك..
مازن :قمت على حيلي وبقيت ماشي معاه خطوة خطوة
وانا عارف سلفاً بالسيناريو الحا يحصل اليوم دا..
لحظة وصولي للمكتب..
قعدتي والقاعد قدامي الأوراق الوقعتها والمحاضرة السمعتها لحد ما سمعت كلمة انت حر انتهت مهلتك باشر حياتك وبنتمنى تاني ما نسمع بي اسمك ولا يمر علينا ولا بالغلط.لانو انت اتعديت مرحلة الانذار وبقيت على خط واحد من المو**ت..
خطوة ورا خطوة ورا خطوة وانا بسمع في صوت المفتاح طقطقة القفل، صوت الفتح، وصوت تحريك الباب، خطوة ورا خطوة لقيت نفسي بره جدران السج**ن اللي عشت فيه سنين طويله طلعت بي جسدي بس حاسي كأنو روحي علقت جوه للأبد......
فرحٌ ولِد من جديد
ووجع لفظه رحم السج*ن الي النور
بدايتان، ونهاية واحدة مجهوله
وسؤال واحد يتردد صداه
ترى هل كُتب لهذه البدايات أن تلتقي!!
#يتبع..