رواية بلسم الفصل الخامس 5 بقلم هند الهيباني

رواية بلسم الفصل الخامس 5 بقلم هند الهيباني

صباح اليوم التاني ومن بدري  قلت لي ابوي نادتني جارتهم ادرس بتها ولي دي برضو بمش بعد ساعه..

قال لي خير ان شاء الله امشي.

بعد ابوي طلع بي مسافة وبعد خلصت تنضيفي مشيت لي ناس دينا ووديت الايسكريم لي سيد الدكان من وصلت قال لي

قبل ما تجيبيه حجزوه..

حسيت بي سعاده ما طبيعيه قلت ليه حجزو كم قال لي كامل ٦٠ كيس لي ناس في الحي عندهم طلعه..

وانا واثق الباقين حا يشيلوهم

فربحك زي م جبتي ال٨٠ كيس  مؤكد الفضل ح يشترو

الربح كامل ٨٠ الف ليك ال٦٠ ولي ال٢٠ حلو معاك!.. 

حسيت نفسي ماقادرة اصدق قال لي بس ماعندي كاش غير عشرين جيبي حساب بنكك.

قلت ليه بس ماعندي قال لي حاولي شوفي زول قريب ليك ولا اي شي..

ابوي الوحيد العندو حساب بس اقول شنو..

شلت العشرين منو اشتريت بيها حاجات الايسكريم للمرة التالته ورجعت البيت انتظرت ابوي لما يجي قال لي اها كيف كان يومك قلت ليهو حلو  شديد ودرست قرابة ال٦ طلبه

قال لي كويس والله قلت ليه حا يدوني أربعين ألف..

قال لي ماشاء الله والله...

قلت ليه بس ماعندهم كاش قالو الا اجيب رقم بنكك قال لي ماف مشكله حوليهم عندي قلت ليهو طيب يا ابوي بكره بكلمهم

بكريتا كالعاده مشيت الدكان بس المرة دي لقيت واحده واقفه مع سيد الدكان من جيت سلمت عليهم وقلت ليه هاك دا رقم الحساب.. اديتو ليهو ووراني الأشعار حسيت بنظرات المرأة الواقفه دي غريبه ما حاولت اركز معاها طلعت مبسوطة بالقروش الجاتني دي.. ورجعت البيت عملتهم وديتهم بيت ناس دينا استمريت على الحال دا عدة ايام وكنت كل ما امش بصادف المرأة  دي نفسها...

حياتنا بقت ماشه احسن والضيق ألفي ابوي الكنت بشوفو دايما خف كتير بل بقيت طوالي اشوفو منشرح...

بس الحياة مادايماً بتمش زي ما احنا عاوزين..

وماكل سعاده بتدوم للأبد ولابد نمر بي امتحانات

وابتلاءات ومصاعب ومطبات بس ماكنت متخيله حا تجيني بي الطريقه دي بنفس السعاده الكنت حاسه بيها من التيسير السريع دا جاتني وراهوصدمة ماكنت متخيلاها....

الساعه ١٢ ضهر

بعد رجعتي لقيت امي في البيت منفوخة

قالت لي جيتي من وين.. قلت ليها من التدريس.. قالت لي ماتكذبي جيتي من وين جات طالعه من جوه العريشه

نفس المرأة الكنت بشوفا مع سيد الدكان طوال الايام دي..

حسيت بي قلبي بضرب وخفت...

قالت ليها ما تشاكليها عليك الله وحلفتك بالله زي ماوعدتيني ماتكلمي زول بالقلتو ليك لا هي ولا ابوها عليك الله

حسيت بي غصة في قلبي وانا بعاين لي امي وهي غضبانه مني قدر كده.. قلت وانا بستنكر ماتقول لي شنو؟!

طلعت وهي بتقول ليها ودعتك الله وفرصه سعيده اتعرفت عليكم وزي ما وعدتك دا بيني وبينك امي قالت ليها ماقصرتي

قفلت الباب جاتني وقالت لي اخر الزمن يابلسم آخر الزمن تعملي كده! ابوك مالو عمل ليك شنو عشان تكافئي بي كده

يخسي عليك دي تربيتنا ليك!

قلت ليها امي قولي بسم الله واستهدي بالله عملت شنو اصلا الموضوع عادي وانا سمعت ابوي لما كان قال ظروفو كعبه وقررت اساعدو بعدين انا مالي عملت شنو ماهدي كتار من النسوان بعملو كده...

ضربتني ضربة قوية على ضهري وهي بتقول لي والله انتي مابتي الربيتا بي يدي الاتنين ديل ويشهد الله يا بلسم تمرقي تاني من البيت دا الا اكسر كرعيك ووالله وتالله وبالله آخر إنذار والا الدور الجايي حا يعرف ابوك...

صدمات كتيرة اتوالت عليي دخول المرأة دي وكيف عرفت بيتنا، ردة امي الغريبه عشان بيع اسكريم بس!  ولا ضربها لي لأول مرة بالصورة دي،ماكنت قادرة اقول اي شي دخلت جوه وانا ببكي ماعارفه من شنو بالضبط...

من الضر*بة ولا من الحصل دا، ولا من اني نا حا اقدر اساعد ابوي تاني.....ولا لو عرف ابوي.

بكيت بحرقه بعد ما كنت أمس بضحك بفرح....

#مازن

جو اتنين من العساك**ر وفتحو الباب وهم بقولو لي  اتحرك حا ترجع المحل الكنت فيه وان شاء الله تكون اتعلمت الدرس

مشيت وانا بضحك ضحكة ساخرة لو العمله العملتها دي حا تجيبني اقعد هنا براي حا أعملا كل يوم....

رجعت مكاني ومن جيت كلهم اتضايرو بس انتبهت في واحد جديد... اشحت نظري عنو 

ورجعت ركني واستندت على الحيطة وانا بفكر.....

#ياسر

اول مرة ينقلوني من المكان القاعد فيه....

لي سنة في المكان دا وما قدرت اتعامل مع أي إنسان ..

وحسيت بالراحه ليه. مهما كانت جري**متو...

كنت طوال الايام الفاتت بحكو لي الشباب عن واحد معاهم اتنقل للعزل اسمو مازن... انسان جاف، بارد، خطي**ر   .

سمعت عنو الااااف الأشياء وما اتمنيت اشوفو...

بعرف الإنسان من اشوفو يمكن  دي خاصية اداني ليها ربنا اني بفهم اي زول من ملامح وشو كويس ولا كعب ماعارف الصفه دي كويسه ولا كعبه.. . 

مجرد ما جى وقعد ماكنت قادر اشيل نظري عنو يمكن عشان اقدر افهم الإنسان القاعد جمبي دا بس قدر ما اعاين ليه بزداد حيرة اكتر فيه انسان مامفهوم  حزين، ولا سعيد، قلقان، ولا مسترخي، غضبان، ولا عادي، خير ولا شر، انسان قاعد كأنو صخرة جامده مافيها اي روح.. 

في نفس القعده دي سالوني الايام الفاتت والان 

ماعاوز تورينا ياياسر جري**مت*ك شنو 

اشحت نظري عنهم وانا مركز نظري هناك. 

قمت بخطوات بطيئة وقعدت جمبو وانا بمد يدي وبقول ليهو ياسر وانت!؟ 

ما التفت عليي حتى نزلت يدي وقلت ليه حاسي بالزهج هنا خصوصا انو مكان جديد لي رايك شنو احكي ليك عن سبب دخولي هنا... 

ماعارف كنت بقول في شنو لأول مرة من دخولي هنا احكي كلام زي دا والغريب انو من تلقاء نفسي رغم انو كان بنطلب مني بس ما بجاوب... 

بقيت احكي بدا كل دا لما انسر**ق تلفوني... 

وزي ماعارف تلفونك حصلت ليه اي شي اقنع منو خلاص.. 

واتجاهلت الموضوع..بل اتجاهلت حتى الشرايح لمدة أسبوع عشان كنت في موضوع ضروري جاري فيه. 

وحصل الحصل لقيت نفسي في يوم قدام باب المحل واقفين لي ناس الاستخبار**ات في شنو تتخيل طلع تلفوني السر**قو عمل بيه اشانة سمعة وابتزا**ز لعسا*كر حتى وجاط الدنيا كلها حاولت ابرر كتير انو جا ما انا بس بدون جدوى لما قلت ليهم والله اتس**ق قالو لي فتحت بلا**غ وين في اي قسم هنا عرفت اني اتورطت بصورة حقيقيه وزي ما شايف قاعد الان بدفع تمن غلطه ماعملتها انسر**ق تلفوني ودخلت السج**ن

حياة عجيبه غريبه ولا رايك شنو..... 

كنت بتكلم وبتكلم وبتكلم.... وبحكي ليه عن المدة الفضلت لي والغرامة المفترض ادفعا عشان كم قصة تانيه..... 

انتهى الحديث اللي من طرف واحد وهو انا اتسطحت بالقرب ليه ماعارف سبب انجذابي للانسان دا شنو... 

بليل وكل الناس كانو نايمين فتحت عيوني وما لقيت مازن راقد التفت في المكان ولقيتو قدام الباب.  مع واحد من العساكر مافهمت ولا سمعت شي... اتجاهلت الحصل ورحت في سابع نومه ... 

صحيتي.. كانت متأخرة صحيت بصوت كركبة الشباب للأكل. 

وانتبهت لي مازن وهو مابياكل مشيت جنبو وشلت صحنو وقلت ليه اكلو قبل يبرد يا استاذ..اشاح نظرو عني بس الحيت... من اليوم داك بقيت دايما لاصق فيه رغم انو ما بيديني كلمة ولا وش كل وقت وكل ساعه وكل دقيقه بحكي ليه بدون توقف.. في نفس اليوم بالمسا صحيت ولقيتو بعاين للسقف اتحركت التفت عليي ورجع مرة تانيه يعاين للسقف

وردد نفسك تطلع من هنا.. بقيت التفت يمين وشمال.. انت بتتكلم معاي! 

سكت مني واستعدلت في جلستي وقلت ليه ماعشاني. عشان زوجتي وعشان البيبي العمرو ٣ شهور.. عشان اخواني عشان الحياة اللي لازم يكون في راجل قصاد ناس بيتو.. 

قال لي حا تطلع ورقد واتجه على الحيطه..ماكنت مستوعب البقول فيه ضحكت واتجهت على الجانب التاني حتى لو كان مجرد امل كاذب انا مبسوط انو اتكلم معاي.  

#بلسم

كنت قايله دا زعل لوقتو

بس ويخلص بكريتا نضفت  وظبطت البيت وطلعت اخواني وابوي طلع وبقيت اعبي في الايسكريم شلتهم في كيس وقلت لي امي انا طالعه.. قالت لي شنو؟! 

خشي جوه... 

قلت ليها امي خمسة دقايق والله واجي راجعه 

قالت لي بلسم خشي جوة والا والله البعملو ماحا يعجبك

قلت ليها يمه اسمعيني انا والله مضطرة اعمل كده عشان نقدر ناكل ونشرب نا شايفه ابوي الحاله الواقع فيها انا مجبورة أعمل كده خليني اطلع أتم شغلي واجيب القروش منو واجي. . 

يلا يا امي مابتأخر... 

مشيت خطوتين بس.. حسيت بي جرة قويه.. 

امي قلعت الكيس من يدي ورمتو في الأرض وكشحت أكياس الايسكريم وبقت تعفصهم بي رجلا وتشيل مرات في يدها وترميهم في الحيطة ويتقطعو.. وهي دموعا في عيونا وبتقول لي ان شاء الله نمو**ت من الجوع ولا اخليك تمرقي

قلت ليها وانا ببكي وانا بشوف في تعبي كلو قدامي اتدمر عملت شنو انا عشان تغضبي كده مالو دي حاجه عيب يعني لو مامحتاجين القروش ما كنت عملت كده ضربتني بي واحد منهم وبقت تقول لي وهي بتجرني من طرحتي ياتو يوم ابوك حوجك لي قرش عشان تمشي تعملي علاقا*ت مع اسياد الدكاكين وتقبضي قروش منهم دي تربيتنا ليك يا كرور يا ماناف*عة. وبتكضبي كمان وتقولي اسكريم تغشي فيني كل يوم بصحباتك ومرة بدرس فلان وعلان وادوني قروش وانا شنو ياربي الخلاني ما افكر كيف ممكن راتب تدريس ما يتعدا الساعه يكون ٣٠ الف و٤٠.. 

كل كلمة كانت بتنزل على قلبي زي السك**ين. 

كلمة ورا كلمة ورا كلمة... .. وانا بسمع في كل كلمة بتقولا.... 

وحاسه قلبي حا يتفج**ر.... رجلي الاتنين ماقدرو يشيلوني. 

#ياسر 

صحيت على صوت طرق في أبواب السج**ن بالمفتاح 

وبقى العسك**ري يردد ياسر عثمان رديت بنعم.. 

قال لي شيل حاجاتك واطلع معاي.. 

افتكرت لمكان تاني وحسيت بالضيق لحد مالقيت نفسي في المكتب بره.. 

ادوني ورقه وقعت عليها سألوني أسئلة وقالو لي مبروك ممكن تطلع تباشر حياتك... 

كانت صدمة بالنسبه لي.. 

كيف... وليه... ... 

بس كلمة واحده جات في راسي في اللحظة دي كلمات مازن بليل. 

حا تطلع!... 

ماكان في بالي اي شي غير اني ارجع لي مازن

قلت ليه دقايق بس عاوز اشوف زول مسكوني وقالو لي بره ماف دخله تاني خطوة واحده لجوه حا نلغي الموضوع دا. 

طلعت وانا بتخبط يمنه ويسرة ومافاهم اي شي.. 

كيف،، والانسان الجوه دا واحد زينا!! 

هل هو عندو يد في قصتي دي... 

مستحيل يكون انسان عادي.. انسان اكيد وراه حاجه كبيرة 

حاجه فوق تخيلي..... 

#يتبع..

                   الفصل السادس من هنا 

         لقراءة جميع فصول الرواية من هنا

تعديل المقال