رواية احببت متلازمه داون الفصل التاسع 9 بقلم نوسه حمد
بقيت احب شاذلي وحسيتو كانو زوجي لانو وصلنا مراحل بعيده جداااااا وجاب لي مانع عشان م احمل زي المره الفاتت وانا زاتي كنت م بفهم فيهو شديد وصفو لي هو كنت بعمل البقولو لي بالحته وقرايتي م علي قدر كده وشاذلي زاتو بقا مدمني وحبو لي ظاهر كل الاساتذه حزروهو عشان هو غريب من الحله وحكو ليهو بي ماضيني وكان م مركز معاهم او تقدرو تقولو الشيطان عامينا الاتنين من الصاح والغلط وابوي وامي بقو يخافو مني وم بثقو فيني ومحرصين علي بس انا ادمنت شاذلي بقيت اتهرب منهم وقلت ليهم طالما منعتوني امشي حصص العصر في استاذ بجي اقريني ومعاي زميلاتي بعد تانيس حتي وافقو لي شفتا لي كم بت قلت ليهم تعالو اقرو معاي وانا بدفع وفعلا البنات يومين جو واهلهم منعوهن تاني وانا وشاذلي كسبناها فرصه وبقا شين اهلي يقولو لي الاستاذ م تجي وهم م عارفين اصلا القصه و الجوانا شنو بقا فرقنا من المتزوجين القسيمه ولمن اكون جايني بمشي اعمل ليهو الاكل ومهتمه بيهو كانو راجلي
لغايه م حصل فوق توقعاتنا تاني حملت ومع الامتحانات وكلمت شاذلي قال لي ليه م بلعتي الحبوب قلت ليهو والله ببلع فيهن بس ربنا راد كده وشاذلي بقا اتجرس لي قال لي ننزلو هسي قلت ليهو م بنزلو والله شاكلني وضربني قال لي انتي متعوده علي ولاده الحرام بس انا م نفسي اكون عندي ولد بالحرام قلت ليهو م عاوز ولد بالحرام ومعتبرني زي مرتك وبتعمل معاي الحرام و َم عاوزني احمل كيف قال لي م عارف بس تتصرفي تنزلي قلت ليهو انا م بعرف قال لي طيب انا ح اتصرف وبقيت زهجانه وبطني طمت وم اتعظتا من المره الاولي وتاني كررتها اودي وشي وين امي وابوي ح يجنو المره الجايه شاذلي بقا قافل تلفونو ولمن الاقيهو في المدرسه بختصرني وانا بقيت بين امرين م عارفه اعمل شنو بقيت اربط بطني عشان م تظهر وم خليت لي حاجه بتنزل الجنين م شربتها وبرضو م نزل والامتحانات جات امتحنت وكنت م مركزه وشاذلي بعد انتهت المدرسه رجع بلدهم وقفل مني تلفونو وانا ادبستا في الحمل وبقيت نهاي م بطلع التوب مني ورابطه بطني بالطرحه والشهور ماشه وحركه الجنين زايده والحمل ورمني امي وابوي علقو علي شكلي بس استبعدو الحاجه دي واخواتي جو من السعوديه وم كانو عارفين قصه حملي الاولي بس لمن جو اتفاجأو بي شكلي قالو لي كبرتي وبقيتي اكبر مننا نحنا المتزوجات وبي اولادنا وبرضو استبعدو الحمل لانو م عارفين قصصي وانا م بتعظ وبقيت كئيبه وم نجحت في الامتحانات
علي م شاء الله بقا شيخ في الاجازات بخطب في الجامع وهو م سأل مني وانا م سالت منو لغايه م مره بالصدفه شفتو في الشارع كنت ماشه مع اختي قلت ليها دا زميلي م شاء الله بقا شيخ كدي اسلم عليهو ومشيت وقفت جنبو قلت ليهو علي سلم علي من بعيد بقا م بصافح قال لي اريج كيف وطمنيني عليك قلت ليهو الحمد لله قال لي مالك عيانه ولا فيك شنو قلت ليهو لا لا انا كويسه وكان لابس دبله في يدو اليمين قلت ليهو م شاء الله خطبتا قال لي اي الحمد لله وعقبالك قلت ليهو من وين قال لي خطبت ثويبه صاحبتك انا كنت دايره اقع من طولي قلت ليهو علي م لقيت غير ثويبه حرام عليك ياخ علي عاين لي واستاذن اختي قالت لي دا شنو قله الادب دي وزميلك بتتكلمي معاهو كده قلت ليها م شغلتك قالت لي م تردي علي عشان م امش اكلم ابوي وتاني م تطلعي معاي وكانت زهجانه مني شديد وكلمت اختي التانيه انا لقيتهم يتكلمو بالصدفه وقالت ليها اريج دي مورمه يا اكون عندها مرض وابوي وامي داسنو علينا يا اريج دي بتبلع حبوب شحم م اشتغلت بي كلامهم وكنت مغيوظه علي ثويبه ويارب تصبح لي الواطه عشان امش ازلها في بيتهم اصلا بقيت م شغاله بي زول
الواطه صبحت ومشيت لي ناس ثويبه لاقاني حسام في وشي شايل ليهو طفله صغيره شكلها مولوده جديده سلمت عليهو وكان واقف في الشارع لمن شافني لمن انخلع قلت ليهو اتزكرت الماضي صاح قال لي لا طبعا بس خير عندك شنو عندنا خلي ثويبه في حالا قلت ليهو ثويبه قليله اصل تحب الولد الكان بحبني وكانت بتلاقيهو معاي بجد م عندها كرامه قال لي حبك دا شي وقسمتها دي شي تأني ومعليش م تدخلي البيت قلت ليهو م استاذنت منك عشان ادخل بيتكم بس جيت اسلم عليك واعرف الاموره دي منو قال لي دي بتي قلت ليهو معناتا عندك بتين كده قال لي لا بت واحده لسه عرسان نحنا قلت ليهو لا بتنا ي حسام ولا نسيت قال لي م عندي بت انا غير الشايلها دي وديك بتك انتي ود الحرام بنسب لي امو لانو ابوهو بكون م معروف وشيلي فكرتي من راسك قلت ليهو لاكن خليك عارف عندك بت مني وبطل فلسفه زحيت يدو ودخلت لقيت ثويبه م شاء الله بقت مبالغه انا زاتي م عرفتها لمن انهجمتا بقت سمحه سماحه وناعمه واتغيرت ١٨٠ درجه وسبحان الله البكون في صغرو سمح ومميز بعد اكبر بتبهدل زيي كده والبكون مبهدل ببقا سمح زي ثويبه سلمت عليها وسلمت علي ببرود مبالغ فيهو و كانت جنبها بت صغيره وسمحه سماحه قلت ليها دي منو قالت لي دي مرت حسام انا م فضل لي الا اولع فيهم البيت الغيره دايره تكتلني ويا ريتني اكتفيت بالفضيحه الاولي انا واقفه قدامهم وشايله لي فضيحه تاني بس لسه م اكتشفوني قلت ليها ثويبه مبروك عليك علي ودي عملتيها كيف قالت لي الله يبارك فيك دي قسمه قلت ليها القسمه م عرفت الا علي الكنتي عارفه حقيقتو معاي معقوله يا ثويبه ونبزتها نبز لمن جا اخوها حسام طردني قلت ليهو ليك يوم ي حسام وطلعت منهم وصلت البيت وقفلت الغرفه علي نهاي م طلعت من البيت بليل حسيت بي وجع ولاده مشيت صحيت اختي قلت ليها م قادره قالت لي مالك قلت ليها دايره الد قالت لي شنو شنو وقامت فتحت الباب لقت دمي جاري بي رجولي قالت لي اريج انتي كنتي حامل قلت ليها اي وبقت تضرب فيني قلت ليها ضربوني القبليك وم غيرو شي من الواقع اتصرفي عشان م الد هنا مشت نادت ابوي وامي وهم زاتهم م مصدقين الحاصل بقو مخلوعين وغالبهم البعملو ضرب ضربوني م نفع ابوي وداني المستشفى وقالو ليهو الولاده صعبه الا عمليه وسالوهو من راجلي قال ليهم مسافر وقالو العمليه مستعجله جابوني البيت وسمعت ابشع الكلام وكنت بتوجع وجع الموت اختي عملت ليها بيقن وحننت لي يديني ورجليني وانا الوجع ماشي زايد علي والصباح ودوني ولايه تانيه ودخلوني عمليه مستعجله .
يتبع..