صفاء: يعني ايه
ناصر: ديه تبقا بنت اللي كانت خطيبتي وهربت يوم الفرح
صفاء: يعني البنت ديه تبقا بنت اخت هادي
ناصر: شاطره روحي بقي اعملي القهوه
صفاء: حاضر
لتذهب صفاء لإعداد القهوه وهيا تفكر
صفاء: انا لازم امشي البت ديه من هنا ما هو انا مش هصبر كل ده وف الاخر تيجي حتت عيله تاخد كل حاجه صبرك عليا يا ناصر هتشوف انا هعمل ايه
اما في شقه منال
فها هيا منال تجلس أمام الهاتف وهيا تفتح لايف تيك توك
منال: ايوه يا حبايبي اسد عايزه ايد عاش عاش كافووو يسلمووو
ويمر الوقت
لتغلق منال اللايف
وتذهب الي غرفه هيام
لتجدها مستيقظه
منال: خالتي حبيبتي انتي صاحيه
هيام: اه يا حبيبتي
منال: الله اكبر انتي بتتكلمي كويس اهو
هيام: نفسي اشوف عيالي
منال: محاوله تخفيف الأجواء متحكيلي يا خالتي قصه حبك مع عم ظريف الله يرحمه
هيام: ظريف هو كان في زيه
لتبدء هيام في سرد قصتها مع ظريف الي ان تصل إلي وصولهم إلى القاهره وسكنهم ف الحاره
لكن المحزن أن ظريف بعد الرصاصه أصبح عاجزا فالطلقه أثرت علي حركته ف المشي
ليعمل شيالا
وكانو رغم كل هذا يعيشون سعداء
ولا يعكر صفو هم سوي معامله أصحاب العمل لظريف والمبالغ الزهيده التي كان يتقاضها
هيام: وخلفت هاله وبعد كام سنه خلفت البنتين وبعد كام سنه اتوفي ظريف كان جاي من الشغل وشكله كان حزين اوي دخل ينام مصحيش الله يرحمك يا ظريف
منال: طاب ياله عشان ميعاد العلاج الطبيعي
هيام: يا بنتي كفايه مصاريف عليكي
منال: وبعدين معاكي يعني هو انا مش زي هاله
هيام: زيها يا بنتي وربنا يعلم
منال: يبقي مش عايزه كلام كتير
اما هاله
فها هيا تجلس كما تركناها وهيا تضم جسدها بيدها
لتقترب منها سكينه
سكينه: قومي يا بنتي وضبي العنبر، احسن رجوات شاده حيلها اوي، وبعدين قوليلي انتي مزعله مين اوي كده بره لدرجه انه يوصي عليكي واحده مفتريه زي رجوات
هاله (بدموع): انا معرفش حد، انا اغلب من الغلب
سكينه: امال فيه ايه بس
وهنا تقترب منهم رجوات
رجوات: قومي يا بت انتي، عايزه العنبر ده فله تشوفي فيه وشك
هاله: حاضر
رجوات: وبعد كده عايزاكي تغسلي هدومي وتخليهم اشطه
هاله: حاضر
رجوات: هو ايه كله حاضر حاضر؟ طاب اضربها ازاي ديه بقي، طاب ما اسمع حكايتها، مش يمكن تكون مظلومه
هاله: حضرتك تؤمري بحاجه تاني
رجوات: اترزعي هنا وتحكيلي حكايتك من طقطق لسلامو عليكو
لتقص عليها هاله حكايتها
رجوات: اوعي تكوني بتكدبي عليا
هاله: والله العظيم ابدا
رجوات: طاب انتي تعرفي واحد اسمه ناصر العدوي من دمياط
هاله: لاء
رجوات: ايه اللخفنه ديه بقي، علي العموم فاضل علي ميعاد الزياره يومين وهعرف كل حاجه بنفسي، ولو لقيتك بتكدبي هعرفك شغلك
هاله: والله انا مش بكدب وربنا يعلم
وبعد يومين
وبعد ميعاد الزياره
رجوات: تعالي يا هاله
هاله: نعم حضرتك
رجوات: اسمعيني كويس، اول حاجه لازم تنشفي وعضمك يقوي، انا عرفت كل حاجه، بقي ناصر يستغفلني انا ويقوللي انك شاغلتي اخوه لغيت ما انتحر، والحقيقة أنه كان هيتجوز امك وهربت منه، ده لولاش الولا جابر اللي شغال معايا هو اللي قاللي كل حاجه بعد ما خليته يشمشم ورا الحكايه
هاله: بس انا معرفش الموضوع ده
رجوات: مصدقاكي، اسمعي انتي من هنا وجاي زي بتي، ومتخافيش من اي حد هنا، ده انتي حكايتك تقطع القلب، وبعدين كمان لما تخرجي انا هوقف معاكي
هاله: انا نفسي بس اطمن علي امي
رجوات: متخافيش، هبعت حد يعس عليها
هاله: وهدي اختي حالتها صعبه اوي
رجوات: قولنا متخافيش، كل هيبقي تمام
هاله: ربنا يكرمك، لكن هو حضرتك هنا ليه
رجوات: هقولك انا يا ستي، ربنا كارمني وعندي فلوس ملهاش اول ولا اخر، وعندي محلات اسماك كتيره، بس الصراحه شقيه حبتين يعني اخش خناقه اقفلها، وكنت فارضه سيطرتي علي المنطقه، لكن في يوم قامت خناقه ودخلت ضربت تلت رجاله ضرب افضي للموت، واتحبست واتحكم عليا ب ٧ سنين يخلصو ف نفس المده بتاعتك، لكن رجالتي قايمين بالواجب برا
هاله: هو حضرتك مش متجوزه
رجوات: لاء، اصلي مبحبش الرجاله، اصل بعيد عنك ابويا عقدني فيهم من كتر عمايله ف امي، أصله اتجوز عليها كذا مره لغيت ما جلطها وماتت
هاله: لا حول ولا قوه الا بالله العلي العظيم، ربنا يرحمها
رجوات: يارب، القصد خلاني بقي خدوني عندهم وربوني وادوني ورث امي، واشتغلت بقي وكبرت واسمي كبر، بس اعمل ايه ف مخي كت، دايما عايزه اعمل كبيره واحلاله مشاكل
هاله: ربنا يكرمك
رجوات: بصي بقي انا وصيت الولا جابر يشمشم حوالين الحاره وحوالين ناصر العدوي ونعرف بقي حكايه أهله ايه مع واحده غلبانه زيك، كل ده عشان ينتقم من امك؟ هو الجواز بالعافيه؟
هاله: بالله عليكي ابوس ايدك، عايزه اطمن علي امي واختي، وهعيش خدامه تحت رجلك
رجوات (بعصبية): انتي لازم تنشفي، كده هتتداسي ف الرجلين
هاله: انا غلبانه، كل املي ف الدنيا اني اعيش انا وامي واختي ف سلام زي ما كنا عايشين
رجوات: روحي من قدامي دلوقتي
اما في دار المسنين
كانت بدريه تجلس وهي تبكي على حالها
ليدخل عليها الغرفه ولدها هادي
بدريه: هادي، هونت عليك ترميني هنا؟ عملت لك ايه؟ ده انا طول عمري بمشي كلامك وبعملك اللي انت عايزه، عمري ما زعلتك ولا كسرتلك كلمه، حتي لما اختك هربت وقولتلي لازم نبلغ عن ظريف أنه خطفها، ولما خدو أمه واخته وجرجروهم ف الحبس، والوليه ام ظريف ماتت من كتر اللي حصلها، واخته بعد ما طلعت هجت من البلد كلها ومحدش يعرف عنها حاجه، حتي لما قولتلي اعمليلي توكيل عملتلك، يبقي تعمل فيا كده ليه يا ابني؟
هادي: بقولك ايه مش عايز وجع دماغ، انا جاي اقولك اني لقيت بنتك، بس يا حرام عايشه ف مكان زباله زيها، ومخلفه تلت بنات، الكبيره كانت شغاله خدامه ف البيوت يعني هيا هتجيبه من برا شغلانه أهل ابوها، وبنتين تؤم، واحده فيهم ماتت من الفقر، والتالته عند ناصر خدها يربيها
لتصرخ بدريه
بدريه: اعمل معروف طلعني من هنا، عايزه اطمن علي بنتي، يا قلبي عليكي يا بتي، انا السبب، انا اللي ظلمتك، وربنا بيعاقبني علي الذنب ده
هادي: شاطره، ياله بقي ازعلي اكتر عشان تموتي وارتاح منك
بدريه: قلبي وربي غضبانين عليك، وربنا هينتقم منك ويوريني فيك يوم
هادي: خليكي كده مرميه هنا
ونتركهم
ونذهب الي منزل ناصر
حيث كان يجلس مع هدي ويلعب معها
لتتحسن حاله هدي
لكن صفاء لم يعجبها الحال
فبعد خروج ناصر من المنزل وسفره الي القاهره
نجد أن صفاء تدخل الغرفه علي هدي
صفاء: عامله ايه
هدي: الحمدلله
صفاء: انا عايزه اقولك حاجه بس تخليها سر ما بينا
هدي: حاضر
صفاء: ناصر مش ابوكي، انا هقولك كل حاجه
وبعد أن قصت عليها صفاء كل شيء
هدي: انا كنت حاسه بكده
صفاء: هو انتي مش عايزه ترجعي لوالدتك
هدي: ياريت بس ازاي
صفاء: انا هرجعك، بس اوعي ناصر يعرف اي حاجه حصلت بينا
هدي: حاضر
وبعد مرور يومين
وها نحن في محبس هاله
فنجد أن رجوات قد عادت من الزياره
رجوات: يا هاله انا عرفتلك نصايب، تعالي احكيهالك
هاله: حاضر
رجوات: اسمعي بقي، ناصر العدوي هو السبب ف أن ابوكي يعيش طول عمره أعرج، وكمان هو السبب ف ديون ابوالحمد، وهو السبب ف موت ابوكي
هاله: ازاي
رجوات: اسمعي، لما امك وابوكي هربو، ناصر ضرب علي ابوكي نار واتصاب، وطبعا بعد جوازهم وفضيحه ناصر ف البلد أن عروسته هربت منه، فضل وراهم، ولما ابوكي اشتغل عند ابوالحمد وناصر عرف، سلط عليه ابوالحمد أنه يشغله ويهد حيله وف الاخر يديله ملاليم، ولبسه كمان ف ديون بعد ما خلي راجل من رجالته كعبل ابوكي، ولما وقع لبسوه المبلغ، وغير أنه يوم وفاه ابوكي كانو حارقين دمه: يا اعرج يا اللي ملكش لازمه، وابوكي المسكين مستحملش ومات فيها
هاله: ليه كده، هو في حد ظالم كده
رجوات: اومال لما تعرفي حكايه خالك وستك
هاله: خالي مين وستي مين، احنا ملناش حد
رجوات: انا هحكيلك كل حاجه
وبعد أن قصت عليها رجوات كل شيء
هاله: ايه ده، يعني احنا لينا أهل
رجوات: لاء، والأهم من كده أن ناصر خد هدي اختك تعيش عنده
هاله: يا بي، مليش غيرك يارب، طاب وامي معرفتيش عنها حاجه
رجوات: لسه الرجاله بيدورو عليها
هاله: ممكن اساءل حضرتك سؤال
رجوات: اساءلي
هاله: انتي بتساعديني ليه
رجوات: هقولك، ربك والحق، الاول مكنتش طايقاكي، وكمان لما ناصر العدوي وصاني عليكي وشيعلي رساله اني ازهقك ف عيشتك واضايقك، وانك خربتي حياه اخوه وخليتيه اضرب بالصنف وانتحر عشان سيبته، لكن عقلي قاللي لاء ديه شكلها غلبانه اوي ومش وش كده، وكمان لما سكينه قالتلي اللي سمعته وشافته وانتو ف القفص، وبعد ما حكيتيلي كل حاجه عنك قولت ادعبس وراكي وأشوف، ولما لقيت كل كلامك صح صعبتي عليا، اصل كله الا ظلم الولايا
هاله: ربنا يكرمك، انا طول عمري ماشيه جنب الحيط
رجوات: اسمعي بقي، انا عايزاكي لما تطلعي من هنا تتغيري خالص، وتبطلي العبط اللي انتي فيه ده