ويحدث كل هذا وسط دموع هيام وهي لا حول لها ولا قوه
ليضحك ناصر بفخر
ناصر: عرفتي اني انا اللي كسبت ف الآخر؟ ولسه بقي لما تعرفي باقي الحكايه، ولا اقولك كفايه عليكي كده، هتموتي مذلوله مشلوله، هتتمني نقطه مايه مش هتطوليها، حتي بنتك هكتبها علي اسمي، اصلي معنديش عيال، بس الحسره الأكبر لما افهمها انك كنتي خطفاها هيا واختها اللي ماتت، اما بقي الخدامه رد السجون كفايه عليها كده
هادي: عارفه امك فين؟ ف دار المسنين، اصلها قلبها حنين وعايزاني ادور عليكي، اه كنت هنسي، اصلها عملتلي توكيل وانا خدت كل حاجه، سلام يا اختي
ليخرج ناصر من الغرفه الي الصاله
ليجد هدي ناءمه
ناصر: حلوه البت، شيلها يا هادي وحطها ف العربيه، وياله بينا
مسكينه هيام، لم تستطيع أن تحرك ساكنا، وتبكي في صمت
هيام: يا حسره قلبي عليكم يا ولادي، اللي ماتت واللي اتسجنت واللي خدوها، اللي ميعرفوش ربنا، يارب انت قادر، يارب يا جبار علي كل جبار، انا عارفه انك هتجبر خاطري، احمي ولادي واحفظهم يارب، فك حبس بتي ديه غلبانه وشقيانه معانا من صغرها، يارب اهدي عليها حاكم ظالم، يارب استر بتي هدي وحافظ عليها، واجعل كيدهم ف نحرهم، يارب خليك مع الغلابه يارب
وبعد نصف ساعه
تصل منال وامل اختها الي منزل هيام
لتدخل منال غرفه هيام
لتنظر إليها هيام بدموع منهمره
ثم تدخل عليهم امل
امل: ابله منال، هدي مش نايمه علي كنبتها
منال: الله، هتكون راحت فين؟
لتنطق هيام بصعوبه، وتقص عليهم ما حدث ولكن بحروف متقطعه
منال: خالتي، انتي مش هينفع تقعدي هنا تاني ولا ف الحاره حتي، الحمدلله انا معايا فلوس، هنسيب الحاره ديه خالص، وانشاء الله هتخفي، وهاله هتخرج، وهدي هترجع، المايه هترجع لمجاريها، اسمعي يا امل انا هروح ااجر شقه مفروشه بعيد عن هنا خالص، وقبل الفجر هنسيب الحاره، خلي بالك من خالتك كويس، وكمان هكلم المحامي عشان اعرف ميعاد زياره هاله امته عشان اوديلها اكل وغيارات، مسكينه يا هاله بس ربنا كبير، انا ماشيه يا امل
اما هاله
فها هيا في محبسها، تجلس متقوقعه علي نفسها، تضم جسدها بيديها في خوف ورعب شديد
وهي تتذكر
فلاش باك
في المحكمه
القاضي: للشاهده، اسمك وسنك وعنوانك
ميمي: امينه الشريف، والشهره ميمي، صاحبه مكتب الخدمات، سني ٤٥ سنه، عنواني عند حضراتكم
القاضي: قولي والله العظيم اقول الحق
ميمي: والله العظيم اقول الحق
القاضي: ما علاقتك بالمتهمه هاله ظريف النشار؟
ميمي: ابدا يا بيه، هيا جاتلي عشان تشتغل وشغلتها، والصراحه يا بيه كل اللي اشتغلت عندهم شكروا فيها، وكمان امينه جدا
القاضي: محدش اشتكالك؟ او لاحظتي أن ايديها طويله؟
ميمي: حد الله يا بيه
ميمي: الكام مره اللي بعتها فيهم عند زباين، زي ما بقول لحضرتك شكرولي فيها اوي وقالولي أنهم عايزنها بالاسم
القاضي: تحب تسأل الشاهده يا استاذ المحامي؟
المحامي: لاء يا افندم، شكرا
القاضي: اللي بعده، اسمك وسنك وعنوانك
منال: اسمي منال محمد فهمي، سني ٢٥ سنه، عنواني عند حضراتكم، وبشتغل عند الست ميمي
القاضي: علاقتك ايه بالمتهمه؟
منال: صاحبتي واكتر من اختي، ومتربيين سوا، وانا اللي شغلتها عند الست ميمي
القاضي: تعرفي ايه عن اخلاقها؟
منال: ديه اغلب من الغلب يا بيه، وبتجري علي امها العيانه واختها الصغيره
الدفاع: ممكن سؤال للشاهده؟
القاضي: اتفضل
المحامي: انتي قولتي يا منال انك انتي اللي شغلتي هاله ف المكتب، كنتي متأكده من نظافه ايديها؟
منال: اه يا بيه، بقولك اختي
المحامي: عمرك شوفتي عليها حاجه كده ولا كده؟
منال: ابدا، وحياه المصحف يا بيه، دول غلابه اوي، ده حتي اختها ماتت عشان مكانش معاهم تمن العمليه، والزايده انفجرت ف بطنها، اه والنعمه
المحامي: اكتفي يا افندم بهذا القدر
القاضي: الشاهد اللي بعده، اسمك وسنك وعنوانك
عبدالباقي: اسمي عبدالباقي عوف يا بيه، بشتغل بواب ف الفيلا اللي حصلت فيها السرقه
القاضي: ايه اللي حصل يومها؟
عبدالباقي: البت ديه جات يا بيه، ولما مؤاخذه كانت عماله تغمزلي وتعمل حركات، استغفر الله، انا عندي ولايا، ووقفت معايا وقالتلي بقولك ايه ايه ظروف الست ديه، قولتلها ليه، قالتلي فتح مخك معايا
هاله: كذب، والله العظيم ما حصل، حسبنا الله ونعم الوكيل
القاضي: اسكتي، مش عايز صوت
وهنا ترفع الجلسه
ثم تعاد مره ثانيه
ليتم الحكم علي هاله بسنه
باك
وهنا تعود هاله بالذاكره
وهي تصرخ
هاله: مظلومه والله العظيم مظلومه
لتقترب منها سيده، شكلها لا يوحي بالخير
السيده: جري ايه يا بت انتي؟ وجعتي راسنا، اترزعي ساكته
هاله (بخوف): حاضر
لتبكي هاله بكاءً مريرا
رجوات: جري ايه يا زفته انتي؟ اقوملك يعني؟ كفايه قولت
هاله: حاضر، خلاص، والله هسكت اهه
باقي السجينات: هيا البت ديه مالها يا ريسه؟
رجوات: ديه متوصي عليها اوي من بره
وهنا تقترب سكينه من رجوات
سكينه: حرام عليكي، ديه عيله صغيره وشكلها غلبان اوي، ده حتي انا كنت معاها ف القفص والكل شهدو أنها غلبانه وبتجري علي امها واختها، ويا عيني اختها ماتت عشان مكانش معاهم تمن العملية
رجوات: خليكي ف حالك انتي
سكينه: بلاش تعاديني
رجوات: قولت خليكي ف حالك احسنلك
سكينه: انتي قابضه كتير علي الغلبانه ديه بقي
رجوات: وحياتك اه، ووسعي عشان انام
سكينه: اتخمدي، يارب تنامي متقومي
اما ف الحاره
فكانت منال قد أنهت كل ما يتعلق بالشقه
منال: ياله يا خالتي، انا جيبتلك كرسي بعجل وهنمشي من الحاره ديه وهنروح مكان ميخطرش علي بال حد، والحمدلله كمان انا اتأكدت أن مافيش حد بيراقبنا، وكده كده انا واختي مقطوعين من شجره يعني محدش هيدور علينا، هنمشي وانا كمان هبطل خدمه البيوت وهشتغل من البيت، ومش هسيبك وربنا معانا
هيام (ببكاء وحروف متقطعه): نفسي اشوف ولادي، ياريت ياخدوني بدل هاله
منال: وبعدين يا خالتي، معاكي، عايزينك تخفي وتبقي قويه عشان لما هاله تخرج إنشاءالله تفرح انك بخير، وانا والله ما هسيبها
هيام: كككتترر خييرك يا بتي
منال: خير ايه بس، انتي زي امي، ياله بقي عشان نلحق نوصل قبل طلوع النهار، والعربيه جات اهيه، الحمدلله
وبعد ثلاثة ساعات
كانو قد وصلو الي الشقه التي استأجرتها منال ف منطقه التجمع الخامس
منال: الحمد لله ادينا وصلنا، ومافيش مخلوق يخطر علي باله أن احنا هنا
امل: تعالي ندخل خالتي اوضتها، وانا هبعت البواب يشتري اكل
امل: هو ايه البتاع ده؟
منال: ده حامل عشان هطلع لايفات علي التيك توك عشان نقدر ندفع الايجار ونعيش، وكمان هجيب دكتور لخالتي يعالجها، ونصرف علي اختنا هاله ف الحبس
امل: يعني هو البتاع ده هيعمل كده ازاي؟
منال: مش وقتك يا امل، بعدين افهمك
امل: طيب
اما في منزل ناصر العدوي
فها هو يصل ومعه هدي
ناصر: الحمدلله اني لقيتك يا بنتي بعد العمر ده كله، الست الوحشه اللي اسمها هاله كانت خطفاكي مني
هدي (بدموع): ازاي يعني؟ هيا مش امي؟ طاب وهند اختي اللي ماتت؟
ناصر: مش اختك، انتي ملكيش اخوات، هيام ديه حراميه وخطفتك مني
هدي: طاب انا عايزه اشرب مايه، وكمان عايزه انام
ناصر: حاضر يا قلبي، الداده بتاعتك هتعملك كل اللي انتي عايزاه، بس اقعدي معايا شويه
هدي: عايزه انام
ناصر: داده لطيفه، تعالي خدي هدي وطلعيها اوضتها عشان تنام
لتنظر إليه صفاء بتعجب
صفاء: شكله اتجنن ده ولا ايه؟ انا لازم اتصرف
ناصر: تعالي يا صفاء، بنتنا رجعت
صفاء: انا لازم اجاريه، وبعدين هيبقي لي تصرف تاني
وبعد أن صعدت هدي مع الداده الي غرفتها في منزل ناصر
صفاء: ممكن اعرف ايه ده؟
ناصر: خليكي ف حالك
صفاء: ما هو ده حالي
ناصر: روحي اعملي فنجان قهوه
صفاء: مش قبل ما افهم مين البنت ديه وهيا هنا ليه
ناصر: مش مهم تعرفي هيا مين، ووجودها هنا تخليص حق
صفاء: يعني ايه؟
ناصر: ديه تبقا بنت اللي كانت خطيبتي وهربت يوم الفرح