رواية النصاب الفصل السابع 7 بقلم جمانه السعيدي
بان....اتفقنا بعد يومين نروح نعقد
عصام...شنو رائيج نروح نعقد
بان....اي تمام
عصام....بس مااريد اي احد يحس اني اعمى
بان...ليش
عصام....احسن هيج اني راح احاول اتصرف طبيعي
حتى ماابين اعمى
بان...براحتك رغم اني بلنسبه اليه عادي المهم
شنو انت وشنو شخصيتك مو مهم تشوف لو لا
عصام....اتفقنا اني اجيب وياي خالتي وزيدون
ونمر عليج للبيت
بان....بيومها طلبت اجازه وحضرت نفسي لبست فستان سمائي طويل وخليت مكياج قليل ورتبت نفسي
اجو عليه بلسياره طلعت وياهم
عصام...هلو حبي شلون وياا هذا العطر الي سحرني
بان....شكرا
عصام...يله اصعدي
كعدنا اني وعصام برا بلاستراحة
وأم زيدون وزيدون مشو بلاجراءات وياهم محامي
منا لمن كملو كلشي بقا بس الفحص
رحنا للمستشفى دخلو زيدون وعصام جوه
واني وأم زبدون بقينا برا ننتظرهم
بعدين اجت ممرضه اخذت مني عينة دم
انتظرنا تقريبا ساعه
طلعو عصام وزيدون كالو كلشي تمام يله ترجع المحكمه
نكمل الاجراءات
هذا الحجي الساعه صارت ١٢ الضهر
رجعنا للمحكمه وكفنا كدام القاضي وعقدنا
طول مااحنا واحد مكابل الثاني بلعقد كبال القاضي عصام جان مدنك راسه
وملابس نظارته السوده مااجت عينه بعيني ابد
منا لمن خلصنا وطلعنا برا رجع لبس النظاره
رجعوني للبيت وهما راحو البيتهم
دزولي مهر مليونين بيد ام زيدون كالو جهزي نفسج بيهن
اني عندي ذهب هواي ذهبي وذهب امي
مااشتريت ذهب اشتريت ملابس ومكياج
وفرشات جربايه
وباقي تجهيزات العرايس
جمانه السعيدي
حددنا العرس بعد اسبوع واحد
بديت احضر نفسي واشتري الاشياء الي ناقصتني
لمن اجا يوم العرس
رحت للصالون لبست البدله البيضه
وأم الصالون رتبت شكلي
صح فرحانه راح ازوج
بس اكو كسره بكلبي شكبرها هذا اليوم احلى يوم بحياة اي بنيه
تنتظره بفارغ الصبر
واني وحدي العروسه الي جانت وياي بلصالون
امها وياها توكلها بايدها
ولمت غراضها وصورتها
واني عبالك جاي من غير كوكب وحدي
حتى محد كالي مبروك
ام الصالون وبتها يكولون هاي العروس احلى من هاي
يقصدن على العروس الثانيه احلى مني
احاول ابين متماسكه وقويه بس ولله اذا واحد يحجي وياي كلمه وحده انفجر من البجي
ليش اني ماعندي اهل ومحد بحالي
ومحد وكف وياي
شبيه شنو ناقصني ليش ماعندي حظ بلاهل
مااريد دموعي تنزل شيفيد البجي الوحده مثلي
كملت واتصلت على عصام اجا زيدون رجعني للبيت
لكيتهم محضرين كيكه وعصاير وجكليت
وأم زيدون طلبتنا عشى جاهز
شويه وراحو كلهم بقينا بس اني وعصام بلبيت
اخذته ودخلنا الغرفه
نزع الستره وفتح الرباط
لزمني من ايدي وكعدنا على الجربايه
عصام...قربي خل ارفع البركع
بان...قربت علي رفع البركع وباسني من راسي
عصام...اليوم احلى يوم بحياتي
بان....اني هم سعيده كمت ابجي هييي هييي
عصام...شلون سعيده وشلون تبجين اتندمتي
بان...لا ما اتندمت بس حزينه لان وحدي محد وياي
عصام...اني وياج كافي لو موكافي
بان...لا كافي
خل انزع البدله ضايقتني
عصام...أدير وجهي هههه ولو اني كلشي مااشوف
بان...براحتك
نزعت البدله ولبست سيت نوم ابيض طويل
بان...احضر العشى
عصام..ياريت لان اني جوعان من الصبح مااكلت اي شي
بان...تدلل
عصام...اسف مااكدر اساعدج بس من باجر بس اندل كلشي بلببت راح اساعدج
بان..مايحتاج مساعده هو اكل جاهز
كعدنا نتعشى اباوع علي يكدر ياكل
يمد ايده ويعرف شنو بلماعون وياكل
حتى سوالي لفه وكال اخذيها مني
اول ليله من ماتت امي لليوم ااكو شخص يشاركني غرفتي
يارب ديم هاي النعمه عليه وتممهاا بلاطفال
ياارحم الراحمين يالله
جمانه السعيدي
تمت هاي اليله على خير
بس كلما يتغزل بيه عصام راسا عقلي يكووول
ياترى لو جان يشوفني هم يتغزل بيه هيج
ويا كل كلمه حلوه عقلي يطرح نفس السؤال
ليش احس بلنقص مااعرف
اخذت اجازه شهر من الدوام
يومين ورا العرس ام زيدون ادزلنا ااكل للبيت
نكعد الصبح الساعه ١٠ لو ١١ مرات نكعد الساعه ١٢
اخذ عصام للحمام يسبح علما اجهز الأكل
نكعد ناكل ونسولف اني ويااا
بعدين نقرر شراح نطبخ للغده
نختار فد شي نطبخه
هو يبقى وياي بلمطبخ اني حجيتله كلشي مر عليه
من يوم انولدت لليوم
انفتحت سريرتي على الكلام
كنت احس اني وياا كلش متفاهمين
ونلتقي بهواي نقط بحياتنا
بعدين بدا يتعود على مكان الأثاث بيتنا
حتى لا يوكع ومكان الحمام والغساله
كلمة حبيبتي وعيوني ما توكع من السانه
طلعنا اني ويا مرتين هو مايحب بطلع هواي من البيت
يكول اذا اطلع احس نفسي ثقل على اي واحد يطلعني
مرات يجون اصدقائه بليل يطلع ساعه لو ساعه ونص ويرجع للبيت
احلى شهر مر عليه من يوم اجيت للدنيا لليوم
حياتي حيل اتغيرت بوجوده وياي
خلصت اجازتي ورجعت للشغل
اطلع الصبح وهو يبقى نايم
ومن ارجع من الدوام مرات الكا كاعد ومتريك
لان الكا مواعين الريوك على السنك
ومرات بعده نايم
اكعده نتغدا اني ويااا
ونكعد نسولف لو اني انام وهو يتصل على اصدقائه
يطلع وياهم
لو اكعد اسولفله على يومي وشنو صار وياي
اما ام زيدون كل أسبوع أو اسبوعين تجينا مره
ااكثر شي تجينا بليل تكعد ساعه وتروح
بيوم رجعت لكيته منزعج
بان...هااا خير ليش ضايج
عصام...خالتي اتصلت تكول راتبك بي غلط وهذا الشهر مانزل
بان...يااا صدك
عصام...باجر اخذ زيدون واروح اراجع
ليش كطعو
بان...تريد اروح وياك لو اخاطب وزارة العمل علمودك
عصام...لا حبيبتي ما مستاهل اني اروح
باجر اخلي زيدون ياخذني
جمانه السعيدي
بان...يومين ارجع للبيت واسئله شسوه
يكول قدمت اعتراض على الراتب وكالو احنا نمشي اللك
بان..هو شكد راتبك
عصام...هااا ٤٥٠
بان...مايسوى خلي يولي انشلع كلبك
ما محتاجين راتبهم عدنا خير من الله اني راح انطيك
كل شهر ٥٠٠ من وارد المحلات
واشتري اي شي يعجبك
عصام....الله يحفظج حبيبتي
بان..كلما استلم وارد المحلات انطي ٥٠٠ والباقي اخليهم بلمصرف اني عندي حساب قديم ومجمعه بي فلوسي
وراتبي يكفينا مسواك منا النهاية الشهر
كلشي يخص البيت اني اشتري من مسواك
ومواد غذائيه وادفع النت والامبيرات
صح عصام ما يطلع ولا يشتغل
بس وجوده بحياتي سووا فرق جبير
حياتي صارلها طعم ولون اكو شخص عايش وياي
يشاركني تفاصيل يومي
بعد اربع أشهر من حياتنا الزوجيه كمت ادوخ واتخربط
طلعت من الدوام قبل ساعه تقريبا ورحت سويت تحليل
بقيت كاعده على نار
هو هذا اليوم الي جنت انتظره
من اول يوم زواج النا واني احسب يمتى اطلع حامل
كل شهر من تجيني الدوره اضوج حيل
اريد اطفال اريد حياتي تتغير
بقيت كاعده وانتظر
ماعندي صبر كل شويه اروح اسئلهم يكولون بعد
منا لمن صاحو باسمي
ابو التحليل مبروك حامل
حسيت نفسي دخت اجيت اوكع الولد لزمني من ايدي وقدم الكرسي كعدت علي
لزمت راسي احس الدنيا ادور بيه
بان....شكلت ما سمعتك
حامل مبروك انتي مخلصه الشهر الثاني لان الحمل مبين
خيل
بان...كلما اوكف الكاع تفتر بيه الفرحه فوك طاقتي
مااكدر اتحملها
نص ساعه يله كدرت اوكف على حيلي
كمت واجرت تكسي وكبل للبيت
دخلت على كيف اريد افاجئ عصام
لكيته يدور بخانتي كالبها كلاب
بان...هلو حبي شدور
عصام....هااا عبالي خانتي تيهت
بان...اخذته من ايده وكعدته على الجربايه
بان...مبروك
عصام...على شنو مبروك
بان....اني حامل
راسا ملامح وجها اتغيرن رد عليه بتعجب
عصام....حامل
بان....اي اعرف انصدمت واني هم ما مصدكه هذا اليوم الي جنت انتظره طول عمري
عصام...انتي متاكده
بان...اي متاكده حبيبي اليوم احلى يوم بحياتي
هذا اليوم الي عشت عمري انتظره
عصام...مبروك
بان...جنك ما فرحان
عصام...لا طبعا فرحان شلون ماافرح
بس جنت حاب يرجعلي عيوني حتى افرح من صدك
بان... على هاي الفرحه مراح اجيب هذا الطفل اذا
ما راجعلك نظرك
عصام...شلون منيين اجيب الفلوس
بان...اني راح اسحب الفلوس الي مجمعتهن بلمصرف
وتاخذهن وتسافر تسوي العمليه
حتى ابنك اذا اجا الهالي الدنيا
تشوفه بعيونك
عصام....الله شكد يحبني خلاني التقي بوحده مثلج
الف الحمد لله والشكر
بس العمليه تكلف هواي
بان....شكد هواي
عصام...يعني ايجوز ٣٥ مليون
بان...اني عندي بلمصرف ٣٠ مليون وابيع من هذا الذهب
واكملك المبلغ
عصام...الحمد لله راح يرجعلي نظري
بان...انت ابو ابني شلون اتخلى عنك
عصام....حبيبتي انتي احلى شي صار بحياتي
انتظرونا....