رواية أيوجد بالأسمر شي لا يعشق الفصل العاشر 10 بقلم غزل وليد
*ميونخ،، ألمانيا *
لِيا: لسة محتفظة برسايل بابا؟
شهد بخجل: امممم أيوة...
لِيا: امممم ممكن أشوفهم 🙈
شهد: لا 😒
ليا: ماما بليييز...
شهد: ي بت يلا بعد كدة الزمن زاتو فات إمشي نومي....
ليا: لالا الزمن لسة، خلاص تمو لي الباقي 😭 بابا قول شي...
شهد حمرت ليهو: أها قولك شنو ي بابا 😒
إيڤان كتم الضحكة : أسمعي كلام الماما، أمشي نومي، وبكرة بنتم ليك الباقي...
ليا بحزن: طيب 😔
Gute Nacht, Mama und Papa
"وتعني تصبحو على خير ماما وبابا"
كلهم مشو على غرفهم علشان الوقت كان إتأخر....
شهد قبل م تنوم قعدت في التسريحة بتعمل في الإسكن كير حقها المكون من سيروم ومرطب... م أخد معاها أكتر من دقيقتين، فكت شعرها بعد م عملت ال hair mist المفضل عندها والبحبو زوجها، وإستلقت في حضن زوجها...
أثناء ما كانت مستلقية في حضن زوجها، وهو يعبث بشعرها ويستنشق رائحة شعرها الجميل...
إيڤان: سبحان الله، السنين دي عدت سريع، ذكريات عرسنا كأنها أمس....
شهد جرت نفس و وضعت إيدها في صدره...
صح والله، لِيا رجعت لينا الذكريات القديمة كلها...
كانت أحلا أيام....
إيڤان: ومازالت أيامي حلوة بيك ومعاك ♥
إبتسمت ونظرت ليهو في عينية الأشبه بلون السماء...
قائلة:
إنتَ أحلى حاجة حصلت في حياتي... إمكن لو فضلت أحكي ليك قدر شنو أنا بحبك وقدر شنو بحترمك وقدر شنو انت غيرت فيني كتير، م حقدر أخلص لبكرة....
إيڤان إنت أحلى صدفة حصلت في حياتي...
رغم إنو لينا قرابة 19 سنة متزوجين بس انت محسسني وكأنو أمبارح إتزوجنا، نفس الحب واللهفوة والحنية والدلع، ماإتغيرت أبدا...
ربي م يحرمني منك ولا من حنيتك ♡
إيڤان فضل يعاين ليها بكل حب وكل الكلام الفي لسانو راح، قلبو ملان كلام بس لسانو غلبو التعبير لحظتها...
طبع قبلة دافئة في شفتيها، وحدث الذي لا يُقال ♡
*نوفمبر 2005*
*بلسان شهد *
عمي ماهل تم بنى بيتو، بني غرفة وبرندة وراكوبة وسيعة قدام البرندة....
بعدها طوالي حدد مواعيد العرس...
وفي نهاية شهر نوفمبر تم عرسو ولله الحمد ...
زوجة عمي إسمها طيبة، وسبحان الله إسم على مسمى، زولة عسسل وفرفوشة محترمة وخدومة شديد...
هي أكبر مني بشوية بس، عشان كدة قدرت أصاحبها، عملت لي موضوع والله وبقت لي زي الأخت.... عمي كان بحبها شديد...
رغم إنو الزواج كان تقليدي، او زي مانحنا بنسميه في الوقت الحالي زواج صالونات، بس البشوفهم بقول الناس ديل عاشو قصة حب طويلة....
ف الحاجة دي زرعت فيني أمل، وخلتني أتفاءل من زواجي الحصل .....
بنهاية ديسمبر 2005، في يوم كان جمعة بتذكر عمي الوسيلة جانا في البيت وكلم جدو بإنو عمي الجيلي رسل ليهو رسالة بإنو بداية السنة الجديدة إن شاءلله حيجو عشان ولدو يتم العرس، غالبا منتصف شهر فبراير، يعني بعد شهر ونص ... ف خلي البنوتة تجهز أمورها وكل احتياجاتها حتتلبى ....
بتذكر يومها دخلت فيني خوفة للآن متذكراها ههههههه،
المهم طوالي بدينا التجهيزات، وحبوبة طوالي نزلتني دخان، حبستني بطريقة حلوة شديد عمري م أنساها....... رغم وقتها لا كنا بنعمل كريمات، ولا لوشنات فاخرة ولا الحاجات الموجودة حاليا دي، ياهو بندخن بالودك الواحد دة، بس بتعمل بطريقة حلوة، بتغلي ب كذا بهار عشان ريحة الودك تروح، بنتمسح بجلسرين وفازلين، وزيت الكركار..... دة كان الترطيب حقنا،
الجسم دة كان بلمع زي السراميك تبارك الله من النضافة.....
حبوبة كانت بتعمل لي يومي مديدة الحلبة، وبتعمل لي الحليب بالبلح.... رغم إني م نحيفة شديد يعني ... وزني كويس، بس من زمان هوس السمنة دة عندنا هههههه وفعلا بالروتين دة لمدة شهر ونص وزني زاد شوية، زيادة حلوة ومعقولة....
مرة أبوي كانت كل يومين تلاتة بتجي مع أولادها بتقيل وبترجع المساء بيتها..... مقيلتها عبارة عن رقاد ساي واكل وشراب، لا بتساعد ولا بترفع كباية..... من جوة قلبي كنت بتمنى أقول ليها ممكن م تجي بس م بقدر أعملها...... وشها بذكرني بكل الحاجات الكعبة العملتها معاي، قدر م أحاول أصفي قلبي تجاها وأتجاوز الماضي مابقدر خالص.....
عدت الأيام سريع..... يوم 17 شهر 2 بالضبط إيڤان وأهلو جو السودان والعرس طوالي اتحدد حيكون يوم 25 شهر 2 يعني بعد أسبوع بالضبط.......***
*بلسان إيڤان *
أول م رجلي عتبت السودان وأنا متلهف عشان أشوف شهد ❤حبيبتي الماخدة عقلي.....
كنت عايز أمش أسلم عليها بس رفضو ليا وقالو ماصح تشوف العروس قبل العرس، أصبر بس كلها أسبوع وحتشوفها،، ماكان في زول قادر يفهمني، قدر شنو كنت متعطش لشوفتها، كلمت السيد ولد عمي عشان يمش معاي بالدس، بس قال لي ماف ليك اي طريقة والله، وحتى لو مشينا أهلها مستحيل يخلوك تشوفها لو كسرت رقبتك 😂
غايتو عصرت على قلبي ليمونة وقلت يا راجل أصبر كلها كم يوم، انت صابر شهوور بقت على اليومين تلاتة دي.....****
قبل العرس بيوم شهد التوتر كان متنشن بيها شديد...
كل شويتين بتغمض عيونها عشان تنوم عسى ولعل تهرب من الخوف العايشاهو، بس أول م تغمص عيونها وتتذكر الكلام القالتو ليها طيبة النوم بطير من عيونها....
"طيبة مرة عمها ماقصرت معاها أدتها كل النصايح البدوها للعروس، ماخلت شي م ورتها"
بقت بتفكر بينها وبين نفسها، ي ربي كيف حقدر أعمل كل دة مع زول لا بعرفو ولا حتى بينا معرفة قديمة، احياااا أنا ي الله اعمل شنو وفضلت تبكي.....
طيبة خشت لقتها دموعها عشرة عشرة ومتكومة بتوبها....
طيبة: سجمي، مالك بتبكي.... في عروس بكرة عرسها بتكون زعلانة....
شهد زادت بكاها: طيبة أنا خايفة، تعالي ألمسي قلبي حاساهو حيطلع من محلو....
طيبة جات قعدت جمبها، حضنتها عليها وبقت بتسكت فيها وتهديها....
ماتخافي حبيبتي، حاسة بيك أنا وحاسة بخوفك، أنا برضو كنت زيك ...
شهد: لالا ياطيبة أقلاها انت بتعرفي عمي حتى لو معرفة من بعيد، و ببقى ليك ود أهلك، بس أنا ياطيبة لا بعرفو كويس ولا حتى بشبهنا في اي شي.... زولا زي م بقولو دمو م دم سوداني أصيل.....
طيبة: فاهماك أنا ياشهودة، بس اتفاءلي انت وحاولي روقي وما تفكري كتير، إن شاءلله كلو خير حبيبتي، أسي شيلي مصحفك واقري قرآن شوية، حترتاحي ♡
شهد جرت نفس ومسحت دموعها، قامت إتوضت ومسكت مصحفها فضلت تقرى كتيير لحدي م حست روحها مطمئنة وسبحان الله طوالي نامت نومة طويييلة م صحت إلا تاني يوم اللي هو يوم العرس ♥....
يتبع.....