رواية أيوجد بالأسمر شي لا يعشق الفصل السادس 6 بقلم غزل وليد
شهد مشت مع حجة آمنة بيتها، والبيت كان عامر م شاء الله، من اليوم الجاء فيهو الجيلي و ولدو والضيوف م إنقطعو من بيتهم، قعدت إتونست معاهم مسافة... بعدها حجة آمنة نادتها عشان تشوف الناقص شنو..... شهد سألتها من الكمية اللي عايزين يعملوها وعلى أساسها كتبت المقادير المحتاجنها وشنو الناقص عشان يجيبوه..... حيعملو بسكويت وناعم وبتفور وغريبة (بضم الغين)
بعدها حجة آمنة قالت ليها خلاص من بكرة الصباح بدري حنبدأ عشان نخلص سريع والزمن م يضايقنا، البسكويت عشان بياخد وقت نعملو في يوم براه اللي هو بكرة، اما الباقي نسويه اليوم البعدو، وكلنا حنساعدك حبيبتي...
شهد قالت ليها خلاص بكرة ان شاءلله من بعد شراب الشاي بجيكم....
كانت عايزة تمشي البيت بس حجة آمنة حلفت إلا تتغدى حتى تمش، لما شافتها مصرة قعدت إتغدت وطلعت....
جمب البوابة لقت السيد وإيڤان ومعاه اولاد اخوه قاعدين تحت شجرة النيمة.... السيد لما شافها طالعة قام سلم عليها وسألها من ناس البيت، إيڤان عاين ليها وهز ليها راسو من بعيد من دون م يقوم....
أثناء م كانت بتتكلم مع السيد، إيڤان كانت عيونو مركزة فيها لدرجة بعيدة ، مراقب نظراتها الممتلئة بالحياء، إبتسامتها الهادئة والجميلة خصلات شعرها السوداء الطالعة من تحت التوب بعفوية.....
أُغرم بكل تفصيلة فيها..... وقال في سرو:.
Es strahlt Weiblichkeit und Schönheit aus
(وتعني: إنها تفيض أنوثة وجمال بالألمانية)
بعدها السيد جاء راجع....
سأل إيڤان: عرفتها البت دي؟
إيڤان: مش دي الكان لقيناها في محل الخزف؟ "عمل فيها وكأنو م متأكد إذا دي هي ولا لا، بس هو من جواه متأكد مية في المية دي ياها زاتا البت ومستحيل ينسى شكلها"
السيد ضحك: طلعت ذاكرتك قوية ههههههه....
إيفان: Ein so schönes Mädchen wie sie ist unvergesslich.
السيد رجع ضحك وقال ليه دة شنو ي ود أمي، رطانتكم دي ماني داري عنها شي، خلينا في العربي حقنا دة ههههههه....
إيڤان إبتسم وقال لي جدا يا ود العم....
*ترجمة الكلام القالو إيڤان "فتاة بمثل جمالها لا تنسى"
تاني يوم برضو شهد مشت عشان يخلصو من موضوع الخبايز دة، وعشان الايادي المساعدة كانت كتيرة خلصو سريع م أخدو فيه زمن.....
حجة آمنة كانت معتمدة عليها في حاجات كتيرة، وشهد ما قصرت معاها وكل البطلبو منها بتعملو، لحدي م جاء وقت المناسبة....
إيڤان كان بلمحها لمن تكون طالعة أو خاشة البيت، وبس كان عايز ليه فرصة عشان يديها القلة الكان إشتراها عشانها،ويتعرف عليها... بس خالص م لقى فرصة ينفرد بيها.....
يوم حنة العريس ياهو البنيات كانو بحننو الأولاد، وحتى إيڤان قعدوه عشان يتحنن، فما رفض الفكرة وقعد حننوه... جزء، من البنيات كانو بدقو الدلوكة وبغنو..... شهد كانت قاعدة بس بعيدة شوية.....
إيڤان عيونو كانت حايمة بتفتش فيها لحدي م لمحها واقفة بعيد وبتتكلم مع وحدة البنات وبتضحك... ف بقى كل شويتين برفع عينو بعاين ليها ومنتبه شديد معاها، بس ماف زول لاحظ لشي، ولا حتى شهد ماكانت جايبة خبر.....
العرس عدى على خير وبعدها بفترة الجيلي و ولدو خلاص عايزين يسافرو يرجعو ألمانيا نظرا لظروف عملهم ....
قضو أجمل شهرين وسط الأهل ♡
إيڤان أفكارو كانت جايطة وكان حاسو إنو جواه شي معين عايز يحصل عليه قبل م يسافر، بعد تفكير كتير مع نفسو لقى روحو متعلقة شديد ب ست القلة اللي هي شهد،، رغم إنو لاحصل بينهم أي حديث بصورة منفردة...
بس قرر إنو ياخد خطوة جريئة وجادة ويكلم أبوه إنو البت الفلانية عاجباه وعايز يتزوجها......
كلم أبوه وقال ليهو إنو في وحدة عاجباه وعايز يتزوجها، وإسمها شهد في البداية الجيلي أفتكر إنو ولدو بهظر وماجادي، بس إيڤان كان جادي في كلامو جدا ومصر إنو لو ما إتزوجها ماحيسافر.... ابوهو قال ليهو طيب شهد بت منو تحديدا، إيڤان ماكان عارفها شهد بت منو كل البعرفو إنو إسمها شهد، بس لاحقا سأل السيد عشان هو الشخص البعرف البت الهو قاصدها.... وأول م قال للسيد البت اللقيناها في مكان الخزف طوالي عرفها، وقال ليهم دي شهد بت المأمون....
الجيلي كان شايف إنو قرار ولدو دة فيه نوع من التهور، يعني لا بعرفها كويس ولا هي بتعرفو، مجرد إعجاب من طرفو ، بس الوسيلة طمنو وقال ليه شهد دي زولة م شاء الله خلقة وأخلاق ، فلو ولدي دة جادي شديد خلينا نمش أهلها ونشوف رأي البت و رأي أهلها شنو، الجيلي لما شاف إصرار ولدو وافق....
الوسيلة والجيلي واخوهم الطاهر ومعاهم إيڤان مشو بيت شهد، لقو جدها وحبوبتها وبالصدفة ابوها برضو كان قاعد، عدا شهد كانت في الزواية ماقاعدة في البيت...
أهلها رحبو بيهم وقعو إتونسو مسافة حتى بعدها الوسيلة بدأ يحكي معاهم في الموضوع الجو عشانو، في البداية أهلها كانو مامصدقين والموضوع كان غريب شوية وليه من بين كل البنات اختار شهد، طوالي الجيلي كلمهم إنو الولد شاف البت وعجبتو وقال عايزها....
أبوها لشهد كأنو ما صدق إنو البت جاها عريس وكمان مغترب طوالي قال ليهم إنو هو من جهتو موافق ماعندو مشكلة، جدها وحبوبتها كانو مترددين شوية وماعارفين يقولو شنو، يعني الولد يعتبر نص أجنبي وماعارفنو كويس ... بس بعد إقناع من الوسيلة وكلمة كلمتين حلوين كدة وافقو..... الجيلي قال ليهم طيب عديلة بعد كدة ننتظر البت تجي ونشوف رأيها شنو،، أبوها طوالي نط وقال ماعندنا بت بشاوروها والرأي رأي وليانها وطالما نحنا موافقين فخلينا نقول على بركة الله وأسي دة نعقد ليهم طوالي.....
حبوبتها قالت ليهو مالك ياولدي مستعجل كدة أصبر شوية ماكلو في حتة واحدة....وخلينا نشوف رأي البنية..
المأمون رد وقال ليهم ياجماعة خير البر عاجله وكلما الموضوع طول العوارض بتكتر وشهد بتي دي مؤخرا العوارض بقت ملاحقاها بالزات في حكاية الزواج فخلونا نكمل الموضوع في حتتنا دي، ولا رأيكم شنو انتو.....
الجيلي و والوسيلة شاورو إيڤان وإذا متأكد من الخطوة دي حيعقدو طوالي، إيڤان رد بالموافقة.....وقال موافق...
هو كان ناوي تكون خطوبة وبعد يرجع من السفر يعمل العرس طوالي بس لما قالو ليه نعقد ما أبدى أي رفض ورحب بالفكرة.
الوسيلة أصلا مأذون ف في حتتهم دي عقدو ليهم طوالي وشالو الفاتحة.....
شهد كانت في الشارع مع صحبتها وقبل م تحصل البيت سمعت صوت زعاريت في بيتهم، والجيران داخلين عليهم في البيت..... إستغربت وبقت مافاهمة الحاصل شنو... صحبتها سألتها وقالت ليها عندكم شنو ياشهد.... ردت عليها بإنها زاتها ماعارفة، الشمار طبعا خلاهم يسرعو خطواتهم عشان يشوفو الحاصل شنو.....
أول م وصلت البيت نسوان الجيران وبنات الجيران خمشوها بالأحضان والمباركات وهي زي الطيرة ما فاهمة أي شي.....
لما خشت لجوة لقت رجال قاعدين مع ناس بيتهم وبشربو في العصاير....
اتبلمت بتوبها وبقت بتفتش في حبوبتها عشان تفهم الجوطة الحاصلة دي شنو....
لقت حبوبتها قاعدة مع النسوان بتتكلم معاهم وشغالة ليهم والله الموضوع بالصدفة بس أصلو ما كانو مخططين ليهو...
حبوبتها أول ما شافتها مسكتها من يدها ودخلتها جوة الغرفة عشان تتكلم معاها براحة وتفهما الحاصل......
شهد: الحاصل شنو ياحبوبة والناس دي ليه بتبارك لي...
فضيلة: كدي روقي يابتي وأقعدي أسمعيني براحة...
شهد: سمح حبوبة أهو سامعاكي....
حبوبتها بدت تمهد ليها في الكلام....
طبعا يابتي إنتِ عارفة قدر شنو أنا وجدك بنحبك، وعارفة انو هدفنا الأساسي هو سعادتك يابتي، وقبل مانموت عايزين نشوفك كدة عروس في بيت راجلك، عشان لو روحنا دي طلعت نكون مطمنين عليك....
شهد: بعد الشر عليكم حبوبة وان شاءلله بعد عمر طويييل...
فضيلة: عشان كدة ود أخوه لعمك الوسيلة جاء طلبك على سنة الله ورسولة وقال عايزك تكوني ليه زوجة، وصراحة الود ود ناس ومحترم، وإنت عارفة أسرة الوسيلة أسرة ليها إسم، فما لقينا سبب نرفضهم وعشان العوارض عقدنا ليك على ولدهم.....
شهد لحظتها حست إنها بتحلم وكلام حبوبتها دة كلو حلم....
فضيلة: شهد، يابتي، سرحتي وين مالك مابتتكلمي....
شهد: حبوبة انا مافاهمة شي، فهميني براحة... عقد شنو وزواج شنو
فضيلة: كلامي دة ماواضح يابتي، عقدنا ليك على ود اخوه للوسيلة.... ود عمك الجيلي...
شهد: لعلو قصدك ود الخواجية داك؟
فضيلة : اي ياهو.... بس ظاهر عليه ود محترم.....
شهد حست براسها تقيل وبس انبطحت في السرير من دون م تقول ولا كلمة....
حبوبتها شغالة تتكلم بس هي كانت في عالم تاني وإتمنت إنها تغمض عيونها وما تصحى للأبد، أو يطلع كل الحاصل دة حلم ......
*🌷═℘═🌷═℘══🌷═℘═🌷══℘══🌷═℘═🌷══℘═🌷*
*★★يتبــــــــــــــــــــــــــــــــــــــــــــع★.