رواية أيوجد بالأسمر شي لا يعشق الفصل الثاني 2 بقلم غزل وليد
*في أحد الأسواق الشعبية ل أحدى المدن القديمة و العريقة في السودان مطلع عام 2005...
إجتمعت النسوة يتبادلن الحديث وكما نسميها نحن ب "الشمارات"
...... هييي صحي أحمد ود التومة مات أمس بالليل؟
أي ي هناية مات موتاً شينة قالو اللوري حق العيش إتقلب بيهو ودووغري مات...
..... حيااا يحليلو كان زولا طيب الله يرحمو ويعوض شبابو الجنة...
اي والله، زعلانة على شهد بت مأمون ، كان عرسها منو الجمعة الجاية دي ..
....... البت دي أصلو ما محظوظة الراجل الفات الكان دايرها برضو مات وبرضو قبل مواعيد العرس بفترة....
يحليلها، أصلا بقولو إنها شوم البت دي، من ما ولدوها كدي أمها ماتت في الولادة....
...... ماتقولي كدة البت مسكينة وطيبانة بس الدنيا ظالماها....
غااايتو ماعلينا، ارح النعزي طيبة يحليها بتكون ميتة من الحزن على ولدها ....
بعد م خلصو شماراتهم كلها مشن بيت العزاء، بكن واتمردغن في التراب، والتومة حالتها كانت صعبة، وكل شوية يغمى عليها من كترة الحزن و البكاء، النسوان برشنها بالموية، تصحى تقعد شوية وتاني ترجع تسكلب ويغمى عليها.....
*بعد كم يوم من وفاة أحمد*
كانت قاعدة في الراكوبة ودموعها جارية وصحباتها جمبها بحاولو يواسوها....
شهودة حبيبتي ماتبكي ياأختي، عارفة وجعك حار يمة...
كانت بس ساكتة وبتبكي بصوت مكتوم....
قومي أكلي العصيدة دي عليك الله ليك كم ما ماكلة شي انتي...
ردت عليهم:
ماني جعانة يا حواء... أحمد خلاص فات، فات وخلانا....
حواء: قدر ربنا ياأختي، ألزمي الصبر بس.....
شهد : صحي أنا نحس ياحواء؟
حواء: سجمك يابت ، دة منو القال كدة...
شهد : سمعتها بأضاني دي كم مرة... وبقولو اي راجل دايرني بموت، قتلتة راجلين عشان انا نحس....
انفجرت بالبكاء بعد كلامها دة.....
نورة: هيي ياسوما أصلو ماتبكي عشان كلام الناس، هو الناس وراهم شنو غير القطيعة والكلام الشين، لو قلتي تزعلي عشان كلامهم تموتي هم و وجيعة....
حواء: نورة كلامها صح يا شهودة أصلك ما تشتغلي بكلام الناس... هسا دي قومي وخلينا ناكل العصيدة دي قبل م تبرد...
حنسوها لحدي م رضت تاكل معاهن، أكلت ليها كم لقمة وقامت....
صحباتها اتونسن معاها شوية ونسوها وجعها حبة وقامن مشن..
شوية كدة حبوبتها جات من السوق ماسكة قفتها بعد ما باعت بضاعتها البسيطة البتمش توديها السوق كل يوم....
هييي يابتي جدك جاء ولا لسة...
شهد: لسة ماجاء ياحبوبة ...
مالو قال إتأخر كدي الليلة...
شهد: مشا سوق المحاصيل وقال حيتأخر شوية الليلة....
ايواا، كدي تعالي سوي لي جبنة نشربها نظبط الراس دة شوية..
شهد : حاضر حبوبة...
قامت ولعت الفحم في كانون الطين قلت القهوة جمب حبوبها، دقتها ناااعمة وظبطت القهوة....ومدت لحبوبتها فنجان القهوة...
بتعملي سماحة قهوة ياشهودة أصلو مالاقاني زول بظبطها زيك...
شهد ضحكت عجبها كلام حبوبتها...
صحي ياحبوبة..
أي والله...
حبوبتها ركزت في عيونها وعرفتها كانت بتبكي...
كنتِ بتبكي مالك يابتي...
ببكي؟ لالا ما كنت ببكي حبوبة...
أجي دة علي أنا.... هوي يابت قايلاني مابعرفك أنا لما تكون ما ياكي...
شهد سكتت وماقالت شي....
عارفة الواجعك شنو يابتي، ارفعي وكيلك ل الله الكريم، وأي شي بحصل في الدنيا دي لخير وحدو الله عارفو، أصلو ما تزعلي وتشيلي هم شي دامو الله في يابتي، سامعة؟
سمح حبوبة....
يلا كدي قومي عصري لي كرعي ديل واجعاتني وجع...
سمح حبوبة...
إن شاء حياتك كلها سماحة يمة... ♡
آمييين حبوبة... ♡
السلام عليكم حاج الوسيلة إن شاءلله طيب....
وعليكم السلام ورحمة الله شيخ الطيب ....
شيخ الطيب: كيفكم ان شاءلله طيبين...
حاج الوسيلة: في نعمة الحمد لله ياأخوي.... إتفضل معاي البيت أشرب ليك كباية شاي...
شيخ الطيب: شكرا ياأخوي بس مستعجل، في بضاعة كدة المفروض أوصلها لزبون باللوري حقي ، بس المرة الجاية إن شاءلله بجيك جية مخصوص كدة نتونس فيها....
حاج الوسيلة: خير ياأخوي سلم على ناس البيت كلهم...
شيخ الطيب: يصل يصل إن شاءلله.....
طبعا سمعت إنو أخوك الجيلي جاي صحي الكلام دة....
حاج الوسيلة: اي والله جاي، بس لسة ماوصل، قبل أسبوع مشيت البريد إستلمت رسالة منو وقال خلال الشهر دة إن شاءلله بجي....
شيخ الطيب: لالا ماشاء الله والله
ربنا يوصلو بالسلامة كدة، سنين طويلة ماشفناه...
حاج الوسيلة: اللهم آميين ياارب، اي والله طول شديد....
شيخ الطيب: يلا ودعتك الله ياأخوي....
حاج الوسيلة: الله يعافيك حاج الطيب.... ..
يتبع...