رواية فراشة المقبرة الفصل الاول 1 بقلم إسماعيل موسى


رواية فراشة المقبرة الفصل الاول 1 بقلم إسماعيل موسى


ماما انا مش هقدر استحمل اكتر من كده


ردت الام، اسكتى يا هبة، مش عايزة اسمع صوتك 


صرخت هبه مش هسكت  ؟ أية ذنبى اعنس بسببها ؟دى مبقتش عيشه والله، انتى ايه مش بتحسى ؟


مش شايفه شكلك ومنظرك عامل ازاى ؟ كمان بتتنطى وتتأمرى وعايزة تختارى  ؟

صرخت الام قلتلك اسكتى يا هبه


بتحدى صرخت هبه مش هسكت ولازم تعرف الحقيقه


لازم تعرف اننا حفينا على بال ما لقينا عريس يوافق يتقدملها


لكن الهانم مش عاجبها شخصيته


تقولش بيتقدملها كل يوم عريس ؟، دا اول عريس يتقدملها من يوم ما تولدت


وسام هيسبنى بسببها ولو وسام سابنى هنتحر ،هموت نفسى


وطيت راسى من الكسره ،مكنتش اعرف انهم هما إلى جابو العريس يتقدملى ومش ذنبى ان مفيش عرسان بتتقدملى


طلبت من والدى اكتر من مره يجوز اختى  هبه، وانى مش عايزه اتجوز لكن والدى راسه والف سيف لازم اتجوز انا الاول


قفلت الباب على نفسى وقعدت ابكى بحرقه ،أبكى كسرتى وقلة حيلتى وشكلى إلى مش حلو، لسه محدش بيبص على اخلاقى ولا تعليمى وكل يبص عليه مره واحده ميقدرش يعيد النظره مره تانيه


بقيت بخاف انزل الشارع او احضر مناسبات، اعمل ايه تانى ياربى ؟


بست ايد والدى واترجيته ميربطش هدى بجوزى لكن والدى رفض.


افتحى يا احسان يا بنتى، وصلنى صوت والدتى من الصاله


بس انا مكنتش عايزه اسمع او اتكلم مع حد


كنت محتاجه ادس وشى فى المخده وابكى ،أبكى لحد ما دموعى تجف.


نص الليل بعد الكل ما نام خبطت على اوضة هبه اختى ودخلت


هبه انتى صاحيه


وصلنى صوت هبه من على السرير ابعدى عنى، عايزه ايه منى تانى؟


انا اسفه يا هبه والله مش ذنبى، انتى عارفه انا اترجيت والدى قد ايه عشان يوافق يجوزك وسام لكنة رفض

استدارت هبه ،ايوه رافض وانتى من جواكى مبسوطه، رفضه جاي على هواكى


رفضتى العريس ليه ؟


ليه مقولتيش موافقه وخلصتنيا وخلصتى نفسك ؟


يا هبه هو انتى مشفتيش شكله عامل ازاى ؟


شكله مرعب وبكرش وسنانة سودة وكمان كان متجوز قبل كده


فتحت هبه عيونها بسخريه ،اسم الله عليكى يا قمر الزمان


هو انتى مش بتبصى فى المرايه يا عنيه ؟


إلى بتقولى عليه شكله وحش ده  أجمل منك،انا تعبت مع ماما لحد ما وافق يتقدم لكنك بوظتى كل حاجه


حسبى الله ونعم الوكيل فيكى يا شيخه


الدموع نزلت من عنيه، اذا كانت اختى شايفانى بشعه يبقى الناس إلى بره حقهم يشوفنى اوحش من كده


انا اسفه والله مكنتش اعرف حاجه ،اوعدك اول عريس هيتقدملى هوافق عليه يا هبه


هبه اديتنى ضهرها وقالت  ،عريس تانى ؟ ابقى قبلينى دا فى أحلامك.


يتبع...


                     الفصل الثاني من هنا 

        لقراءة جميع فصول الرواية من هنا

تعليقات
×

للمزيد من الروايات زوروا قناتنا على تليجرام من هنا

زيارة القناة