
رواية غالية سيدة قلب يونس الفصل السابع عشر 17 بقلم نسرين نادر
في جناح غالية الدافئ بالأعلى، كانت أضواء الغرفة تتلألأ برقة، وصوت الضحكات يملأ المكان بهجة بعد يوم طحن القلوب وأنهك الأرواح.
جلست غالية في منتصف السرير، وحولها زينب وكريمة، وقد فتحتا الصناديق والأكياس الفاخرة التي جلبها يونس لها من قبل ولم تستخدمها بعد. انتشرت الأقمشة الحريرية والعباءات الشرقية المطرزة والفساتين الفخمة فوق السرير كأنها بستان من الألوان.
اندفعت كريمة وهي تمسك بعباءة حائلية ناعمة باللون العنابي المطرز بالذهبي، وقالت بابتسامة واسعة:
ـ «وه! شوفوا الجمال ده عاد! يونس واعر وطعِم في اختياره قوي.. قومي يا غالية، قيسي دي عشان نشوف القمر الصعيدي كيف هيكون شكله النهارده!»
ابتسمت غالية بخجل، فنهضت زينب وسحبتها من يدها بحنان، وقالت:
ـ «تعالي هني يا غالية.. اليوم يومك، ولازم الدوار كله يشوف ست البنات على أصلها!»
ارتدت غالية العباءة الفاخرة، وأسرعت كريمة بإحضار صندوق المكياج والكحل العربي، ثم أجلستها أمام المرآة الكبيرة. بدأت زينب تكحل عينيها الواسعتين بالسواد الفاحم، بينما وضعت كريمة لمسات رقيقة أبرزت جمال ملامحها.
تأملت كريمة انعكاس غالية في المرآة، وانبهرت بجمالها، وهتفت بدلال صعيدي:
ـ «بسم الله ما شاء الله عليكِ يا بت عمي! الكُحل في عينيكي زي الليل لما يغطي القمر.. جميلة وست البنات كلهم! والله إنك تكوني ست الدار والبلد كلها بلا منازع!»
التفتت إليها غالية بطيبة، وقالت برقة:
ـ «لا يا كريمة.. ما تقوليش كده، الدار ليها ستها وهي الخالة صفية أم يونس، بعد أمك يا زينب ما حدش بياخد مكانها!»
ابتسمت زينب، وطبعت قبلة على وجنة غالية، وقالت بامتنان:
ـ «نخبّرك زين يا غالية، وعارفينك بت أصول وطول عمرك أصيلة وما تتبدليش واصل!»
وفجأة، قفزت كريمة وهي تفرك كفيها بمرح، واتجهت نحو هاتفها وشغّلت أغنية صعيدية مبهجة، ثم صاحت:
ـ «يلا بقى! نطلع من حزن اليوم ونفرح.. نشغل شوية ونرقص، والليل من أوله لينا!»
سحبت كريمة وزينب غالية إلى منتصف الغرفة. في البداية، بدت مترددة، لكن الموسيقى وحب صديقتيها شجعاها على الاندماج. وما إن بدأت تتحرك مع النغمات حتى أذهلتهما بخفتها ورشاقتها؛ راحت تلف عباءتها حول خصرها وترقص بانسيابية، وسط ضحكاتها وتصفيق البنات اللاتي شاركنها الفرحة.
ولأول مرة منذ سنوات، خرجت ضحكات غالية من أعماق قلبها دون خوف أو انكسار.
وفي لحظة خاطفة، دارت غالية ووقفت أمام المرآة. توقفت حركتها تدريجيًا، وهدأت أنفاسها، وظلت تتأمل انعكاس صورتها بذهول امتزج بالخشوع.
طالعت وجهها المكحل، وعباءتها الفاخرة، وشعرها الحريري المنسدل، وعينيها اللتين تلمعان بكبرياء لم تعهده من قبل. لم ترَ تلك الخادمة المكسورة التي اعتادت ارتداء السمال وإطراق رأسها خوفًا من الإهانة، بل رأت أمامها غالية رضوان العزازي، بنت الأكابر التي لن تسمح لأحد بأن يكسرها من جديد.
بقلمي الكاتبه نسرين نادر
وقفت زينب وكريمة خلفها، ووضعتا أيديهما على كتفيها، فقالت كريمة بفخر:
ـ «شفتي نفسك زين يا غالية؟! دي أنتِ الصُح.. بنت العزايزة وست الدوار والبلد كلها!»
وفي الجانب الآخر من الدوار، كانت سمر تجلس في غرفتها العلوية، تضغط بكفها على وجنتها المورمة والملتهبة، حيث تركت صفعة أبيها عبد الرحيم أثرها، في المكان نفسه الذي لطمها فيه يونس سابقًا.
كانت تعتصر يديها بغل، تستعيد ما حدث معها، وتتعهد في سرها بألا تسمح لغالية بأن تتهنّى بيوم واحد في الدوار.
أما نعمة، فكانت تجلس على الأريكة تأكلها الغيرة والغيظ. لم يكن قهرها بسبب ضرب زوجها لابنتها أو زواج يونس من غالية وحدهما، بل بسبب الاسم الذي قلب حساباتها رأسًا على عقب: رضوان العزازي!
تردد الاسم في رأسها كالرعد، حتى انتفضت من شرودها. نظرت إليها وصال بحدة وقالت:
ـ «فوقي معايا يا نعمة! رُحتِ فين؟! مش وقت شرود واصل، عايزين نشوف هنعمل إيه في الطين اللي وقعنا فيه ده!»
ردت راوية بعبوس ويأس:
ـ «وه هنعمل إيه ياما؟! البنت دي كل ما نحفر لها حفرة تطلع منها زي الشعرة في العجين! بقت مجوية قلبها قوي، وما عادش يونس لوحده هو اللي بظهرها.. ده يونس، وعمي عبد الرحيم، ويمكن أبوي كمان، وعمي نعمان، وأم منصور، وحمزة.. الكل بقى في صفها! يعني أي خطوة هنعملها دلوك هتبقى محسوبة علينا وبالمية حساب!»
نظرت إليها أمها بسخرية، وقالت:
ـ «أخيرًا.. أخيرًا الجاموسة اللي مخلفاها فهمت حاجة! ولفتِ تزغرطي يا راوية من كتر العقل!»
ردت راوية بغضب وجرح:
ـ «في إيه يا ياما؟! كل ما أقعد معاكي ولا أتكلم كلمتين، لازم تسمّي بدني وتطلعيني إني ما أفهمش ووحشة! أنا بنتك أهه.. بنتك والله!»
قالت نعمة ببرود:
ـ «أنا خبرة زين إنك بنتي.. تعرفي يا بت يا راوية؟ لو البنت غالية دي كانت هي بنتي أنا.. يا سلام! كانت مال وجمال ودلال، وكان زماني في حتة تانية خالص، مش مخلفاكي أنتِ ما بتعمليش أي حاجة في حياتك غير الأكل وبس!»
امتلأت عينا راوية بالحزن، وقالت بصوت متهدج:
ـ «وه يا ياما؟! يعني أنتِ عشان غالية حلوة وطلعت بت عمنا، خلاص تتمني إنها تكون بنتك وأنا لأ؟! ماشي يا ياما!»
نهضت راوية وخرجت بخطوات غاضبة، ثم أغلقت الباب خلفها بعنف.
نظرت وصال إلى الباب بتهكم، وقالت:
ـ «أهي مشيت وريحتنا من وجهها..»
ثم التفتت نحو نعمة:
ـ «آه يا نعمة.. قولي لي هنعمل إيه دلوك؟»
وقبل أن تجيبها نعمة، انفتح الباب ودخل الحاج عبد الرحيم بوجه عابس. وما إن رآهن مجتمعات حتى استعاذ بالله بصوت عالٍ:
ـ «أعوذ بالله من الشيطان الرجيم!»
فزعت وصال واعترضت:
ـ «وه! شيطان إياك يا أبو منصور؟! إحنا شياطين ولا إيه؟!»
رد بحدة:
ـ «لو ملمومين ويا بعضكم تبقوا ألعن من الشياطين ذات نفسهم!»
نظرت وصال إلى نعمة، فوجدتها غارقة في أفكارها، فقالت بضيق:
ـ «فُتكم بعافية..»
ثم أخذت عباءتها وخرجت.
بقيت سمر جالسة بوجه مكفهر، وعيناها تشتعلان بالشر. رمقها أبوها بغلظة، وقال:
ـ «قاعدة ليه أنتِ كمان؟ عايز أنام ودماغي مش ناقصة.. خدي بعضك ويلا على أوضتك تتخمدي!»
انتفضت سمر مقهورة، وخرجت بعنف، جارة الباب خلفها حتى ارتطم بإطاره بصوت مدوٍّ.
فزع عبد الرحيم وصاح خلفها:
ـ «يتقفل في نافوخك طاقة يا بعيدة!»
ثم التفت إلى نعمة التي ظلت جالسة في مكانها، شاردة في حقدها. خلع عباءته وعمّته الصعيدية، ووضعهما جانبًا، ثم تقدم حتى وقف أمامها.
أفاقت نعمة على ظله، ورفعت عينيها إليه ببرود:
ـ «خير يا عبد الرحيم؟ واقف كده ليه؟»
ظل ينظر إليها لثوانٍ دون كلام، حتى رفعت حاجبها بسخرية، وقالت:
ـ «واه.. خدت لك صِورة ياك يا عبد الرحيم؟! باصص لي كده ليه ومسلط عينيك عليا من ساعتها من غير ما تنطق.. في إيه، مالك؟»
قال بجدية:
ـ «باقول لك إيه يا نعمة.. غالية...»
هبّت في جلستها، ورفعت حاجبها باستهزاء:
ـ «مالها ست غالية دي كمان؟! جرا إيه، هي كمان بقت تاخد العقل ولا نزلت لينا من السما عشان نقعد نحسب لها حساب؟!»
اشتدت ملامح عبد الرحيم، وانخفض صوته بوعيد:
ـ «لو جيتِ يَمّها.. ولا أنتِ والشياطين اللي معاكِ دول بتخططوا تأذوها بحرف ولا حركة.. صدقيني لأوقف لك في السكة، وهتشوفي مني أيام تحلفي بيها!»
نهضت نعمة مستنكرة:
ـ «حيلك.. حيلك يا أبو منصور! هي مين دي اللي أحطها في دماغي وأخطط لها؟! وبعدين تعال هني.. من ميتى وأنت بقيت حنين عليها كده؟! إيه، خلاص حسيت إنك عمها والحنية نزلت على قلبك فجأة؟! ما أنت ياما كشحتها وسمّيت بدنها بالكلام، وياما كنت بتكرهها وما تطقش بصتها! إيه اللي حصل مرة واحدة خلاك تنقلب كده؟!»
لم يتحمل عبد الرحيم استفزازها، فانتفض واقترب منها وأمسك بذراعها بقوة حتى تألمت.
ـ «آآه.. إيدي يا عبد الرحيم!»
اقترب منها، وعيناه تشتعلان غضبًا:
ـ «باقول لك يا نعمة.. سمعتِ حديثي زين؟! أنا ما هعيدهوش تاني واصل! وعارف زين إن دلوقتي زاد كرهها في قلبك والغل بقى أضعاف مضاعفة.. مش بس عشان بقت بنت العيلة، ولا حتى إنها هتكون مرّة يونس وهتاخد ست الدار، اللي أنتم ووصال والشياطين اللي معاكي كنتوا بتحاولوا توصلوا له من أول ما اتجوزتوا.. لا!»
ضغط على ذراعها، واستطرد بنبرة حادة:
ـ «أنتِ بالذات.. كرهك وغلّك عشان هي بتكون بنت رضوان.. عشان خاطر رضوان ذات نفسه!»
تغير وجه نعمة، وظهر الاضطراب في عينيها رغم محاولتها التماسك.
ـ «أنت.. أنت قصدك إيه؟!»
ضيّق عبد الرحيم عينيه مهددًا:
ـ «أنتِ فاهمة قصدي كويس قوي، ومش عايز أقعد أفتح في القديم ولا أفكرك باللي فات! لو جيتي يَمّ غالية بحرف ولا حركة.. صدقيني هتكوني حفرتِ قبرك بإيدك.. سامعاني زييييين؟!»
دفعها نحو السرير، ثم استدار وخرج، وأغلق الباب خلفه بقوة.
وفي الممر، كان عبد الرحيم يتجه نحو السلم، حين صادف منصور وحمزة صاعدين.
توقف منصور وسأله:
ـ «مالك يا أبوي؟ رايح فين دلوك؟»
تنهد عبد الرحيم وقال:
ـ «ما فيش يا ولدي.. طالع أشم شوية هوا، اليوم النهارده كان طويل وجوّ علينا كلنا.. هأشم شوية هوا وأعاود طوالي.»
هز منصور رأسه بتفهم:
ـ «ماشي يا أبوي..»
سألهما عبد الرحيم:
ـ «وأنتم رايحين فين كده؟»
أجاب حمزة بعفوية:
ـ «هنروح نطل على يونس، ونرجع طوالي.»
ربت عبد الرحيم على كتف حمزة بحنان:
ـ «ماشي يا ولدي.. ربنا يرضى عليكم.»
نزل عبد الرحيم إلى الساحة، بينما واصل منصور وحمزة صعودهما نحو جناح يونس. وفي منتصف الممر، وصلهما صوت الأغاني والضحكات من غرفة غالية والبنات.
توقف حمزة بفضول وقال:
ـ «وه! شكل البنات عاملين سهرة على الآخر زي ما قالوا فعلًا!»
ابتسم منصور:
ـ «خليهم يفرحوا شوية.. غالية تعبت كثير وشافت المرارة، وحقها تفرح.»
لمعت عينا حمزة بمرح:
ـ «عايز أروح أطل عليهم طلّة بس!»
أمسكه منصور من لياقة قميصه وسحبه للخلف:
ـ «اتخبلت إياك ولا إيه؟! هتدخل عليهم كيف ودلوك البنات مع بعضهم؟!»
ضحك حمزة محاولًا التملص:
بقلمي الكاتبه نسرين نادر
ـ «في إيه يا منصور؟! أخواتي وهأسمع عليهم بس، مش هأدخل يعني!»
شدّه منصور محذرًا:
ـ «امشي قدامي يا حمزة وبطل جنان! لو يونس عرف، والله ليقطع رقبتك ودماغك دي!»
ابتعدا عن جناح البنات واتجها إلى غرفة يونس. طرق منصور الباب مرتين، لكنهما لم يسمعا ردًا.
فتح حمزة الباب ببطء، فرأى يونس واقفًا في البرندة الخارجية، مستندًا إلى السور وشاخصًا نحو الليل.
همس حمزة لمنصور:
ـ «ناظر أهو.. شكله في دنيا تانية خالص!»
تطلع منصور إلى ظهر أخيه بأسى:
ـ «ليه حق والله.. اللي حصل النهارده ما كانش سهل واصل، وبالذات عليه هو!»
فكر حمزة قليلًا، ثم قال:
ـ «بقول لك إيه.. تعال نهمر ونسيبه لحاله، يمكن محتاج يقعد ويا حاله شوية ويهدأ، والصبح نطمن عليه.»
وافقه منصور:
ـ «عندك حق.. يلا بينا، وكل واحد ينام عشان من الصبح هيكون ورانا حاجات كثيرة وتحضيرات للحفلة.»
أغلقا الباب برفق وانصرفا دون أن يشعر بهما يونس.
ظل يونس واقفًا في البرندة، ويداه في جيبيه، ينظر إلى النجع الساكن تحت عباءة الليل، بينما تتصارع الأفكار في رأسه.
لقد سلّمه أبوه مقاليد الأمور، وجعله عمدة الدوار الذي يُرجع الحقوق ويفصل في المشكلات بحكمة وحزم، لكنه لم يتخيل يومًا أن أصعب مواجهة سيخوضها ستكون مع عائلته، بل مع أبيه نفسه!
كيف يتجاوز ما حدث ويتعامل معه كأن شيئًا لم يكن، وهو الرجل الذي طالما اتخذه قدوته؟ كيف يتقبل أن يكون أبوه هو من ظلم طفلة بريئة، وتركها سنوات طويلة تتجرع القهر والحرمان؟
والأصعب من ذلك كله، كيف سيجعل غالية تتجاوز ما حدث، وقلبها ما زال ينزف من آثار الظلم؟ كان يعلم أن الأمر لم ينتهِ بعد، وأن في الدوار نفوسًا لا تزال تضمر لها الشر وتنتظر الفرصة لإيذائها.
ضاقت الدنيا في صدره، فرفع يده وضغط بها على جبهته، ثم ألقى ببصره نحو السماء، وتمتم بصوت متوجع:
ـ «يا رب.. فوضت أمري إليك، قوّيني على اللي جاي، واهديني للطريق الصح، وخليني أقدر أحمي غالية وأرجّع لها حقها.»
لم يعد يحتمل البقاء داخل الجناح، فغادر البرندة ونزل إلى الساحة، ثم توجه إلى الإسطبل وأخرج حصانه «أصيل». امتطى صهوته وانطلق في طرقات النجع المظلمة، لعل هواء الليل يطفئ شيئًا من لهيب صدره.
ظل يطوف بالحصان طويلًا حتى اقترب الفجر، ثم عاد إلى الدوار. أدخل أصيل إلى الإسطبل وربطه واطمأن عليه، وبعدها دلف إلى البهو الداخلي.
لاحظ أن باب المجلس مفتوح، وأن ضوءًا خافتًا ينبعث من داخله، فاقترب ليرى أباه الحاج نعمان جالسًا وحده في انتظاره.
تقدم يونس بخطوات متثاقلة، وقال بتعب:
ـ «إيه اللي مقعدك هنا لحد دلوك يا أبوي؟! ده الفجر قرب يأذن!»
رفع نعمان عينيه المنكسرتين إليه، وقال بصوت متهدج:
ـ «قاعد مستنيك يا ولدي.. خابر إنك متألم وشارب المرّ بسببي، وما قدرتش أنام ولا يغمض لي جفن وأنا حاسس بإنك زعلان مني.»
وفي تلك الأثناء، كانت غالية قد استيقظت على صوت خطوات خفيفة. فتحت نافذتها ورأت يونس يعود بالحصان ويدخل الدوار، فساورها القلق عليه.
خرجت من غرفتها بحذر، ووجدت زينب وكريمة نائمتين، فلم تشأ إيقاظهما. ارتدت جلابيتها الصعيدية ووضعت طرحتها على رأسها، ثم نزلت بهدوء. وحين وصلت إلى الدرج، رأت يونس وأباه داخل المجلس، فتوقفت في الأعلى حتى لا تقاطع حديثهما.
نظر نعمان إلى ابنه والدموع تملأ عينيه، ثم قال بصوت منكسر:
ـ «استنى يا ولدي.. اسمعني للآخر. أنا عارف إن اللي عملته غلط كبير، وإن الطمع عمّى عيني وخلاني أضيّع حق غالية وأخويا المتوفي. طول السنين دي وأنا شايل ذنبي جوايا، وكل يوم كان بيعدّي كان بيزوّد الحمل على صدري. أنا مش طالب منك تنسى اللي حصل، بس اديني فرصة أصلّح اللي قدرت عليه من اللي بوّظته بإيدي.»
وقع اعترافه على قلب يونس كالصاعقة. رمقه بنظرات موجوعة، وقال:
ـ «يا أبوي.. أنا مجروح منك قوي! ما كنتش أتوقع أبدًا إنك أنت اللي تعمل كده. كنت ممكن أتوقع الغلط ده من أي حد تاني في الدنيا، إنما أنت؟! أنت اللي كنت قدوتي الأولى في الحكمة والعدل.. صعب عليّا أكتشف إن أبويا هو اللي ظلم بنت أخوه وأكل حقها!»
خفض نعمان رأسه، وقال بصوت مرتجف:
ـ «عارف يا ولدي، وعارف إن الكلام وحده ما يكفيش. أنا مستعد أعوّض غالية عن كل حق ضاع منها، وأعمل كل اللي أقدر عليه عشان أصلّح اللي فات. السنين اللي راحت مش هترجع، لكن مش هسيب حقها يضيع مني مرة تانية.»
اتسعت عينا غالية بالدموع، ثم تقدمت نحوهما بهدوء. التفت إليها الاثنان، وهتف يونس بلهفة:
ـ «غالية..!»
نظرت إليه بحنان، ثم التفتت إلى نعمان وقالت بصوت هادئ:
ـ «يا يونس، أنا عارفة إن اللي حصل وجعك زي ما وجعني، وإنك كنت شايف أبوك قدوة ليك طول عمرك. بس ما تخليش الغضب يكسرك من جوه.. خُد وقتك لحد ما قلبك يهدأ، ومش لازم تنسى اللي حصل عشان تقدر تكمل حياتك.»
ثم نظرت إلى نعمان وأضافت:
ـ «وأنت يا عمي، أنا مش هقدر أرجّع السنين اللي ضاعت مني، ولا هقدر أنسى كل الوجع في يوم وليلة. لكن مش عايزة أفضل عايشة أسيرة للماضي. اللي أتمناه إن حقي يرجع، وإن اللي حصل ما يتكررش معايا ولا مع غيري.»
تأثر نعمان بكلماتها، وقال بخجل:
ـ «عندك حق يا بنتي.. وأنا مش هطلب منك أكتر من اللي قلبك يقدر عليه. هثبت لك بأفعالي إني ندمان، وإن حقك عندي مش هيضيع تاني.»
أومأت غالية برأسها، ثم قالت:
ـ «أتمنى أشوف ده بعيني يا عمي.. لأن الكلام مهما كان حلو، الأفعال هي اللي بتثبت صدق النوايا.»
ساد الصمت للحظات، وكان يونس يتأمل غالية بإعجاب؛ فقد استطاعت، رغم جرحها، أن تتكلم بعقل من غير ما تنكر حقها أو تقلّل من حجم اللي اتعرضت له.
استدارت غالية لتعود إلى الدرج، لكنه ناداها بصوت مرتجف:
ـ «غالية.. يعني لسه شايلة مني؟»
توقفت، ونظرت إليه بهدوء:
ـ «أنا مش عايزة أشيل من حد يا عمي، بس كمان مش هقدر أمحي اللي حصل من ذاكرتي. خلّينا نسيب الأيام تثبت لنا إذا كان كل شيء ممكن يتصلّح.»
ثم صعدت بخطوات هادئة.
نظر يونس إلى أبيه وقال بتعب:
ـ «اطلع ارتاح يا أبوي.. بكرة يوم طويل، وكلنا محتاجين نهدأ ونفكر.»
ثم أطرق برأسه وأضاف:
ـ «عن إذنك يا أبوي.»
وصعد خلفها.
بقي نعمان وحده في المجلس، يراجع ما فعله، وقد أدرك أن استعادة ثقة ابنه وغالية لن تكون بكلمات الاعتذار، بل بخطوات حقيقية تعيد الحقوق إلى أصحابها.
وفي الممر، لحق يونس بغالية قبل أن تدخل غرفتها، وناداها بصوت خافت:
ـ «غالية..»
التفتت إليه برقة:
ـ «نعم يا يونس؟»
اقترب منها، وتفرّس في عينيها بحب جارف، وقال:
ـ «أنا بحبك قوي يا غالية.. بحبك بشكل مش قادر أوصفه!»
ابتسمت بخجل، وتوردت وجنتاها، ثم طأطأت رأسها. فمد يده برفق ورفع ذقنها بحنان، وقال:
ـ «لا.. ما تتكسفيش مني، أنا بتكلم بجد! مش عارف عملت إيه حلو في حياتي عشان ألاقي واحدة زيك. وجودك جنبي خلاني أشوف الدنيا بشكل تاني، وحسّسني إن لسه فيها حاجات تستاهل نتمسك بيها.»
ضحكت غالية بخفة، وقالت:
ـ «كل ده عشان وقفت جنب أبوك؟!»
ابتسم يونس، وقال:
ـ «مش عشان كده وبس! عشان أنتِ عاقلة، وقلبك أبيض رغم كل اللي شفتيه. ما سمحتيش للوجع يغيّر أصلك، ودي حاجة خلتني أحبك وأحترمك أكتر.»
رفعت عينيها إليه وقالت بحب:
ـ «ربنا يخليك ليا يا يونس..»
ابتسم وهو يتأمل وجهها، ثم قال:
ـ «أنتِ سيدة قلبي يا غالية.. وصدق اللي قال: غالية سيدة قلب يونس!»
ابتسمت بفرح، فقال لها:
ـ «يلا.. ادخلي ارتاحي زين، عشان بكرة يومك.. بكرة هتكوني ست ست البلد دي كليتها!»
أومأت غالية برأسها ودخلت غرفتها، بينما ظل يونس يتابعها حتى اختفت خلف الباب، وقلبه يرفرف بالسعادة، معلنًا بداية عهد جديد.
---
أشرقت شمس اليوم التالي على الدوار، حاملة معها أجواء مختلفة. فمنذ ساعات الصباح الأولى، كان الدوار كله على قدم وساق؛ الرجال في الساحة الكبرى يستقبلون كبار النجع وأعيان البلد الذين بدأوا يتوافدون تلبية للدعوة.
أما في الأعلى، فكانت الغرفة تعج بحركة البنات والتحضيرات. جلست الخالة حكمة بجانب غالية، تحمل طبقًا صغيرًا وتحاول إقناعها بتناول الطعام:
ـ «يا بنتي لازم تاكلي لقمة.. اليوم طويل قوي وهتحتاجي جهدك، أنتِ ما حطيتيش في معدتك حاجة من امبارح!»
أجابت غالية بصوت ضعيف:
ـ «والله يا خالة ما عدتش قادرة.. معدتي مقفولة وحاسة إن روحي في لساني!»
تدخلت زينب وكريمة لتهدئتها، وقبل أن تشتد حيرة الجميع، طُرق الباب طرقتين خفيفتين، ثم دخلت الحاجة صفية، أم يونس.
نظرت إليهن وقالت بنبرة هادئة وحازمة:
ـ «يا حكمة.. خدوا البنات وانزلوا تحت شوفوا التحضيرات وراجل البلد اللي بدأت تيجي.. سيبوني أنا مع غالية كلمتين.»
خرجت حكمة وزينب وكريمة، وأغلقن الباب برفق.
التفتت صفية نحو غالية، وما إن رأتها حتى ارتسمت ابتسامة واسعة على وجهها. كانت غالية كالقمر، ترتدي جلابية بيضاء بسيطة وأنيقة يزينها تطريز فضي رقيق، وقد زاد الكحل العربي جمال عينيها، بينما أضفى الخجل على وجنتيها حمرة طبيعية.
تقدمت صفية وطبعت قبلة على جبينها، وقالت بحنان:
ـ «تبارك الله أحسن الخالقين يا بنتي.. ده القمر نفسه يغار منك! يوم السعد والهنا اللي جمعنا بيكي يا غالية قلبي.. ألف مبروك يا عروسة النجع كلياته!»
ثم تابعت بنبرة واثقة:
ـ «شوفي يا بتي.. أنا عايزة أقول لك كلمتين تحطيهم في أودنك زين.. أنتِ دلوك بقيتي بنت العزايزة، والبلد والنجع كله هينزل النهارده عشان يعرف ويشهد بالحقيقة دي.. تنسي خالص يا غالية إنك كنتِ بتخدمي هنا في يوم من الأيام! أنتِ دلوك بنت رضوان العزازي، ومرّة يونس اللي هتكون ست الدار دي كليتها.. تدخلي وتطلعي بعين قوية وبشمخة، ما تطأطئيش راسك لأي حد واصل!»
وأضافت بحزم:
ـ «ومن هنا ورايح يا بنتي تكوني قوية.. وذكية.. وعادلة! قوية عشان تاخدي حقك من أي حد يدوس لك على طرف، اللي يدوس لك على طرف دوسي له على عشرة! وعادلة.. علشان بعد كده أنتِ اللي هتقعدي مجلس الحريم عشان تحكمي بينهم وتفصلي بالعدل. وذكية.. علشان تعرفي تفرقي بين اللي بيحبك واللي عايز يوقع بيكي.. عايزاكي قوية ما تهابيش حد في الدنيا دي غير ربنا وحده، تاخدي حقك بذراعك ولسانك، وما تقبليش الغلط أبدًا.. سامعاني زين يا غالية؟ كلامي ده حلقة في أودنك!»
أجابت غالية بابتسامة واثقة:
ـ «حاضر يا خالتي صفية، عهد عليّ ما أنساش كلمة.»
خرجت صفية وأغلقت الباب خلفها، فشعرت غالية بقوة جديدة تسري في روحها. التقطت المشط وبدأت تسرّح شعرها المنسدل، مستمتعة بلحظة هدوء نادرة.
لكن الهدوء لم يدم طويلًا.
انفتح الباب فجأة وارتطم بإطاره، فانتفضت غالية واستدارت بسرعة. فوجئت بسمر تقف أمامها، تخفي شيئًا خلف ظهرها، وتراقبها بنظرات مريبة.
عقدت غالية حاجبيها، وقالت بثقة:
ـ «سمر..! إيه اللي جابك هني؟ عايبة إيه دلوك؟»
ابتسمت سمر ابتسامة صفراء، وأخذت تتأمل غالية من رأسها إلى قدميها. كان منظرها وهي ترتدي الأبيض وتستعد ليومها المنتظر يشعل النار في صدر سمر؛ فمنذ الليلة الماضية لم يغمض لها جفن. صفعة أبيها ما زالت تحرق وجنتها، وكلمات الجميع عن غالية ومكانتها الجديدة تتردد في أذنيها كالسياط.
ها هي الفتاة التي طالما احتقرتها تستعد لتصبح عروس يونس وسيدة الدوار، بينما تقف هي عاجزة عن الانتقام مما حدث لها. لم تأتِ سمر لتبارك لها، ولم يكن في قلبها ذرة فرح؛ بل جاءت تحمل فكرة خبيثة، عازمة على إفساد فرحتها قبل أن تبدأ، وترك ذكرى موجعة في يومها المنتظر.
أخفت سمر ما بيدها خلف ظهرها، وتقدمت خطوة، متصنعة الهدوء والود، ثم قالت بنبرة ناعمة تخفي وراءها سمًّا:
ـ «جاية أبارك لك يا عروسة..!»🔥💣
بقلمي الكاتبه نسرين نادر ❤️
يا حبيبتي يا غاليه 😭
1. يا ترى إيه اللي مخبياه سمر ورا ضهرها، وإيه خطتها عشان تبوّظ فرحة غالية؟
2. هل سمر هتقدر تنفّذ اللي في دماغها، ولا غالية هتوقفها عند حدها المرة دي؟
3. رأيكم إيه في موقف غالية من الحاج نعمان؟ وهل التسامح كفاية لمحو سنين الظلم والقهر؟..