
رواية إبنة القاضي الفصل السابع 7 بقلم مشاعر مبعثره
: الموت ما كعب، كعبه البشتنه يا بنتي، انتي ما بتعرفي السجن ولا البحصل فيه، دا غير الفضيحه، انتي فاكره الموضوع بخلص على كدا؟ انا بقيت مشترك معاه في العملو دا
: ما بغلبك تطلع نفسك، انا البحصل لي ما مشكله، ولا ماسك عليك حاجه تانيه؟
ابوي زعل واتنرفز فيني
: عايني الضرر ما واقع عليك عشان تقرري ببساطه كدا تسلمي نفسك، اهون عليك انا انفضح في أخر عمري وادخل السجن
عاوزه اتكلم قاطعني : عارفك ما ح تقبلي، عشان كدا، اتنازلي انتي برضو شويه بس، واوعدك يا سمر اول ما القى الفرصه المناسبه بخلصك منو
قعدت ابكي لأني اتأكدت تماما انو مقرر خلاص وما جاي يستشيرني
قال لي : ما تزعلي نفسك، دي فتره بس اتحمليه فيها، هو أسى أصر على العقد بس انا ما بخليه يسوقك صدقيني
دي كانت تاني صدمه! عقد؟ عقد يعني عرس، وعادي يتجاوز حدودو معاي ولا يفكر يضغط على ابوي عشان يكمل العرس، اخر حاجه ح اتزوج البني آدم الخالي الرحمه دا، من شدة الصدمه ما قدرت اقول اي حاجه، وابوي مشي، هناك اشتبك مع امي كمان، من حرقتا عدت الليل كلو بكاء، والصباح جات تحرض فيني عشان أرفض، و مستغربه كيف انا ساكته، وما اخدت موقف كالعاده، ما عارفه الابتزاز الحاصل. المهم، ابوي اتصل ب أشرف وقال له موافق على العقد، بس اوعا تضغط عليها ولا تستفزا عشان ما تبوظ الموضوع كلو، ودا السبب الخلاه ما يتصل ولا يزعجني كعادتو، وانا اصلا كنت حاظره رقمو عديل تحسبا لاتصال ولا طايقه اسمع صوتو واستفزازاتو
مشيت الجامعه عشان اناقش ولا كلمت زول من البيت زاتو انو يوم مناقشتي ولا خليت زول فيهم يمشي معاي، حتى المناقشه زاتا ما مشت معاي تمام وسرحانه في حاجات كتيره ما جاوبتا وما عارفه زاتو انا كاتبه شنو في البحث، طلعت من المكتب براي وعارفه مافي زول منتظرين برا ذي باقي زميلاتي سامعه الزغاريد والتباريك الماعندي فيها نصيب، قعدت في البينش برا، وفجأة سمعت
: الف مبروك المناقشه
رفعت راسي لقيتو سامر لمن انخلعت، من صدمتي نسيت انو انا في الجامعه، وحولي الناس، قمت حضنتو بدون تردد وقعدت ابكي هو لمن انخلع وبقى يهدي فيني
: بطلي خلاص، أسى في زول ناقش ببكي؟
: سامر انا بالجد مشتاقه لك، ومحتاجه وجودك معاي، عليك الله ارجع البيت
: والله بيتكم دا انا تاني الا اجيه زياره
: عشاني انا وامي تعال
: ما تتعبي نفسك، ابوي فاكر نفسو بختبرني، لكن انا بعرفو اني راجل وما محتاج لدعمو
: أسى ممشى امورك كيف؟
: لقيتو دافع لي رسوم الجامعه، وعندي حبة قروش بمشي بها، اصلا ما ح اقعد كتير مع عثمان ولا بتقل عليه، بشوف شغل لو لقيت
: تشتغل شنو لكن؟
: اي حاجه، الناس دي كلها شغاله، انتي اخبارك شنو؟
: أشرف جاي يعقد لي يوم الجمعه
: عقد شنو؟ ما تهظري
: والله العظيم جاده، انت ما عارف حاجه عننا
: وانتي خشمك مربوط؟ دا راجل تعرسيه أسى؟ عديم خجل واحترام، شكلو زاتو ما مطمن
: ما عندي حل تاني
: عايني انتي مش ما موافقه؟ما بعرسك غصب، تعالي ارح
: وين؟
: البيت ارح
كان جادي جاء معاي البيت وامي فرحت شديد لمن شافتو ابوي كان لسه ما جاء وقعدناه مسافة يجي
وامي متأمله : اختك دي ضغطو عليها، وانا والله قدر ما اتكلمت ما نفع مع ابوك دا، بس تقول ماسك له زله، بعد كان رافضو بقى يسمع كلامو ويصغرنا نحت
انا قلبي بقى يدق بسرعه وخفت، انا قدر العملتو دا،؟ بقدر اقول كدا قدام ابوي؟
____________
: انت قدر المسؤوليه يا ولدي، عارفك انت الوحيد القادر تجمع اولادي، وتلم شتات الاسره دي، انا ربنا يسامحني، ادعي لي، ادعي لي وما تظلم واحد من أولادي ، ما تظلم اي واحد
: ابوي ابوي ابوي
: ابوك ايه يا بني هو انت فاكر نفسك فين؟ قال ابويا قال
: ع عزت
: دا انت عرقان جامد اوي، قوم يالا
: كنت بحلم
جاء العسكري وقف في الباب
: مروان جلال الدين الصادق
: ا ايوا انا
: تعال وياي
طوالي قام بسرعه، وكان عندو زياره من المحامي
: طبعا دي اخر زياره لك في السجن
: ما عاوز تجي تاني؟
: لا انت ح تطلع
سكت مسافه وقال له : أخيراً ستهم رضت علينا يعني؟
: كيف يعني؟ والله الدكتوره دي ما خلت حاجه وما خلت زول ما كلمتو، لكن القضيه معقده
ضحك بصوت عالي
: في شنو ليه بتضحك كدا؟
: الشراب بقى قضيه كبيره بتغلب محامي زيك، معناها انت فاشل بس
: مروان ما تتجاوز حدودك معاي، انا موكلك ما شغيل عندك
: أنجز عليك الله بلا فصاحه كتيره، تتكلم كدا تقول مطلعني من اول ساعه حبس، أسى لي كم يوم محبوس انا
المحامي عض على انيابو من الغيظ وبعد كمل إجراءاتو وطلعو، مشى منو بعيد وبقى يتكلم بلهجه حاده
اما مروان اتنفس الهواء وملي رئتينو كانو بتنفس لأول مره وبقى يتلفت حوليه وقال بسخريه : تاريك حلوه يادنيا، تاني منو البخليك ويتحبس بين اربعه حيطان وقف تاكسي ومشي، والمحامي بعد خلص مكالمتو انتبه، لقاه مافي، بقى يتلفت
عاوز يتصل في تلفونو لقاه قاعد عندو هو ولسه داك ما شالو
طوالي عمل مكالمه
: ا الو، مروان دا ما بعرفو مشى وين، أسى كان قدامي ومشى
: يمش كيف وانت معاه؟ اتصل به سريع
: تلفونو هدأ قاعد عندي ما شالو ولا حتى اي حاجه بتخصو، قروشو زاتا عندي هنا
: دا كلو عدم التصرف
: يا زوله ما تطلعي مي******نا، ما عندي شغله معاه تاني، هدا طلعتو انتي ارجي الراجيك زمان تختفي تبلعي نفسك انتي حره، كرهتونا الشغل زاتو، حركاتكم دي زاتا الكرهتنا الشغل في السودان وآسي لاحقننا هنا، الله لا جاب باقيكم ياخ
وطق قفل الخط
: تافه، غلبك تكمل شغلتك للنهايه يعني؟ اووووف
اتلفتت جنبها، كان راجلا راقد متغطي لراسو، جرت منو الغطا بسرعه ونهرتو
: قوم على حيلك انت كمان، نايم لي زي البغل، اتحرك يلا شيل ملابسك واطلع سريع، مروان جاي
_____________________
في بيتنا المساء، جاء ابوي وما قدر يخفي فرحتو بشوفة سامر، بس بحاول يظهر العكس، وفي نفس الوقت، ما حاول يستفزو برجعتو عشان ما يمشي تاني، بس هو كان بارد على غير عادتو
قال له : ابوي انا ما جيت عشان اقعد
: عادي بكرا بعد بكرا بتجي
: والله لو انت بنفسك حاولت تعقدا لي بلقى طريقه اطلع َ منها واعيش
: مشكلتك انو انت فاكرني شغال ضدك وقاعد افكر اضرك، ح استفيد شنو يعني، مافي النهايه انا الكون مجبور أحل مشاكلك، اتسبب فيها ليه؟ فكر شويه
يا...........
: ما تكملا، يا عجل صح
: براك قلتا لروحك انا ما عاوز اقول كدا، يلا يا كوثر خت الغدا دا سريع
سامر قال له : اتغدو بعدين انا أسى عاوزك في موضوع
ابوي حس بحسره شديده لمن سكت، هو كان منتظر يقعد ياكل معاه زي زمان ويحاول يراضيه بطريقه غير مباشره، بس هو قفل الباب دا نهائي
: ابوي، انت عاوز تعقد لسمر على أشرف؟.
سكت وما رد له لحدي ما جاد قعد قدامو وقال له : عاوز تديها له بالبساطه دي؟ انت الحاصل عليك شنو يا ابوي، دي سمر بنتك البتحبها تضيعا كدا
: هي موافقه اسألا
انا انخلعت طبعاً، خشمي ما قدرت افتحو بس مقلعه عيوني
امي زعلت، قالت له : ما بتقدر تقول شي، ابوك مخوفا ومسكتا
وهنا هم الإتنين اشتبكو، وسامر بعاين لي بلوم. عاوزه امشي لحقني وخلى امي وابوي بتناقشو
جراني من يدي
: انتي جبتيني عشان تسكتي؟ دا شنو الضعف الانتي فيه دا، معقول انتي سمر ياخي قولي ما عاوزاه ذي ما قلتي لي قبيل
: سامر انا م مايقدر..........
: وجبتيني ليه ياخ؟
: كنت حابه انك ترجع وتتصالحو انت وابوي
: ونعقد لك على أشرف، انتي الولد دا لو ماسك لك زله وريني، وريني عشان اكسر راسو دا، انتي عارفه القتل ج*ني
قلعت عيوني وقعدت اهز راسي من شدة الخوف
: كذابه، انتي يا عارفه الق*تلا ولا قت*لتيها انتي
: كفايه يا سامر، معقول انا اختك تقول علي كدا عاوزني اتسجن يعني؟
: طيب اتكلمي، ياخ انا شفتك، شفتك بعيني يوم جيتي.
: انا ما عملت شي، سامر الله يخليك ما تحكي لزول
: دا همك صح؟ انا لو ساكت ما عشان انتي قلتي، لأنو أصلا ماشي بتقال ياخ، اعملي العاوزه في نفسك، انا مالي متعب روحي معاك، تاني اي زول يهتم بشؤونو، امشي عرسي أشرف وخليه يزلك ويستحقرك ذي ما عاوز، دا واحد ناقص وبحاول يعمل قيمه نفسو واهميه بك انتي، ولا ح يكون في موده ولا رحمه بينكم
انا كنت ساكته لسه، هو شال نفسو وطلع زعلان
ياريت ياريت لو بقدر احكي لك يا سامر، انا نفسي استغنى ياخ عن كل شي واتحرر من الهموم مش أغرق فيها زياده، بس والله ما قادره، خايفه خايفه عديل من السجن والزل والاعدام، انا والله ما قاصده، بس لأني هربت وما اتقذتا قبل تموت مستحيل يقدر زول يصدقني، خاصة بعد العملوه ابوي واشرف،
شلت التلفون واتصلت في تلفون إمام بدون ما أحس، كنت خايفه بس برضو أصريت ومستعده اسمع منو اي حاجه، قلبي كان بدق مع كل جرس، مرات بقرب اقفل، بس بغمض عيوني، لحدي اخر جرس، ختيت راسي في المخده بس وشايله نفسي
وبقول : الحمدلله ما رد
بس بعد أقل من نص ساعه رجع لي، لمن خفت
يدي بقت ترجف وما قادره أرد مع انو انا الاتصلت
قويت قلبي وفتحت، وانا بقفل في الباب عشان ما يجي زول
فتحت وانا خايفه، جاني صوتو
: السلام عليكم
: عليكم السلام
: كيفك؟
: تمام الحمدلله
: التلفون كان بعيد مني
: ما مشكله
سكتنا مسافه، وهو كأنو منتظرني اقول متصله ليه؟ وانا الكلام راح من بالي، أخيراً هو كسر الصمت
: البركه فيكم
: ليه في شنو؟
:صاحبتك الاتوفت مق*توله في شقتا
طوالي دموعي قعدت تنزل بس من غير صوت، وهو مواصل : ربنا يصبرك أن شاء الله، كانت صاحبتك شديد واقرب واحده لك، اكيد بتكوني زعلانه شديد، عشان ما قدرتي تشوفيها لأخر مره وتودعيها
ساعتا ما قدرت اخفي صوت بكاي
قلت له : انت بتعذب فيني من جوا
: وليه تتعذبي كدا؟
: بطل خلاص
: هي صاحبتك وواجبي اعزيك فيها
ساعتا انا انهرت تماما
: إمام انت كلامك كلو كان صح، انا ما عارفه كيف ما صدقتك مع انو المؤشرات بتقول كدا، جنى انسانه مريضه ما طبيعيه، وصاحباتا شا*ذات
: دا كلو قلتو لك، بس مستغرب مدام ما صدقتيني انا، دا منو الأقنعك دا؟
: ل ل لأنهم اتمسكو، ا أشرف هو الماسك قصيتهم عشان كدا؟
: خير يا زوله، بس ما لاقيتك في النيابه، ما حققو معاك؟
: ح حققو معاي، ف في البيت، لأني كنت عيانه
: سلامتك ياخ، بس انتي بنت القاضي اكيد ما بجرجروك في المحاكم زينا
: سجنوك؟
ضحك باستهتار وقال لي : الما عملوه فيني شنو هو عشان اعترف؟ بس ربنا نصرني عليهم، خاصة أشرف دا، انا حقي الله بجيبو لي، لأنو انا ما عملت شي، وربنا عادل
: انت زعلان مني صح؟
: ابدا والله، ازعل منك في شنو؟ انتي ما عملتي حاجه، انا بتكلم عن أشرف العاوز يلبسني القضيه غصبا عني، انسان وسخ شديد فيه كل العبر
: عارفه
: انتي ما بقدر يئذيك
: إمام، ممكن اشوفك؟
: والله يا سمر انا عندي النيه اسافر، خلاص سمعتي بقت في الأرض بعد اتسجنت، وانا زاتي محتاج اكون من محيطي الحالي
: عليك الله ما تمشي
سكت مسافه وقال لي : ليه؟
: خلينا نتلاقى، وانا بحكي لك
يتبع
احيانا تكمن السعاده في ابسط الأشياء التي نراها أمامنا كل يوم، نراها عاديه، ولكن لا نقدر من دونها
حينما نفقدها فقط، نعلم انه ما كان ينبغي أن نبحث ، والسعادة امام أعيننا، ونعيشها كل يوم
لكن يبقى السؤال، هل تعودنا مرة أخرى؟ ام سنبدأ فعليا رحلة البحث عنها.