رواية كيان محطم الفصل الاول 1 بقلم رحاب محمد رحمه
قصتي بدت لمن كنت في الثانوي اعرفكم انا عنود محمد كنت زي اي بنت عادية
في أولى ثانوي بمشي المدرسة و بجي كان بالنسبة لي عالم جديد من الأساس لي الثانوي دخلت بي نسبة 266 و ابوي سجلني في مدرسة خاصة
انا بي طبعي مشاغبة و شقية و كنت مصاحبة الفصل كلو بتكلم مع دا حبة و مع دا حبة
وياهو دخلت الطور الجديد دا
اول لي يوم في الثانوي متحمسة من بعد صلاة الصبح ما نمت تاني
انا : ي امي وين الطرحة حقتي
امي : مع الملابس
انا : هي الملابس وين زاتوو
امي : أمس بعد كويتهم ليك انتي ختيتيهم وين
انا : اا اي صح طيب الجزمة الجزمة انا نسيت ما نضفتها اااا الجزمة جديدة اصلا ما لبستا لسة الشنطة حقتي وين الكراسات ابوي جلدهم ي امي سامعاني
امي : روقي ي بت بتقعي هسي بدل تمشي المدرسة ح تمشي المستشفي
انا : اها رقتا وين عيالك علييييي عليااااااء قومو عشان ما تاخروني ما نفسي انجلد في الثانوي زي الاساس
امي : قامو و هم زاتهم عندهم ترحيل وانتي ح يوصلك ابوك في طريقو
انا : الحمد لله ارتحت من عيالك الكسلانين ديل. وين عناب ما ح تمشي معاي
امي : عناب أول ليها محاضرة الساعه 9 عندها زمن لسة ح يوصلا عمار
انا : اها المعفنة الليلة اول ليها يوم في الجامعة وين الحماس حقها عناب عنااااب
ابوي : البنت دي طالعه لي منو حسها عالي كدا
امي : هههه والله ما عارفة لا لأمة مع الكبار العاقلين ولا الصغار الهادئين
زي ما شفتو انا واقعه في النص
اخوي عمار الكبير في رابع جامعه هندسة
و عناب أولى جامعه صيدلة
و علي وعلياء تؤوم في خامس اساس
وانا دخلت الثانوي
بعد ابوي وصلني بقيت أتلفت نحن رحلنا هنا من كم اسبوع اصلا كنا ساكنين مع ناس جدي وابوي رفعو منصبو و رقو و حولوهو الفرع الأساسي للشركة الكان شغال فيها و بقت بعيدة شديد من بيت ناس جدي عشان كدا اشتراء بيت و رحلنا فيهو و بقينا بعيدين من ناس جدي و اصحابي الزمان
وهسي دا عالم جديد لنج
دخلت الفصل بعد الطابور و كلمة المدير و الحصص كانت عبارة عن تعارف مع الاساتذة و شرح و توضيح للمقرر وانو ماف حاجة صعبة
بعد خلصنا اليوم زي ما قال لي ابوي
الموصلات الراجعة دي كلها بتجيبني بي شارع البيت بعد دا لازم تعتمدي على نفسك و أهم شي انتبهي لي نفسك تمام و ما تتلفتي كتير البيت طوالي و ابعدي من أصحاب السوء و من اي زول كعب يلا لمن شفتا الحافلات قلت اركب بس و اول ما احصل صيدلية الهدى انزل
الحافلة الأولى جات البنات ادافرو و ركبو
والتانية جات دفروني و ركبو و اتملت
التالت حلفتا الا اركب و الحمد لله ركبتا قعدت جنب الباب و اتلفت ساي
مغلق اسعد
دكان الخير
صيدلية بر الوالدين
دكان إجمالي
كافتيريا الشعب اشيل واقرا بعد حصلتا محطتي نزلتا و نزلت معاي بنت لابسةةةة زي لبستي حقت المدرسة
بقينا ماشين واي واحدة بتعاين للتانية
انا دعا
عنود
اتشرفنا
لي الشرف شكلنا في نفس المدرسة
ايوا اي في كم اول مرة اشوفك
في أولى
هيي زيي الليلة اول يوم لينا خلاص من هسي صحبتي
نحن رحلنا هنا من كم اسبوع و ما حصل طلعنا من البيت الا الليلة
دعا : ايوا
انا : اتفضلي معاي دا بيتنا
دعا : انتو السكنتو في بيت عمو مهدي شوفي داك بيتنا بعد بيت خالتو أنصاف اتشرفت بيك بجيكم مرة تانية
انا : لي الشرف
دخلت البيت لقيت امي معاها كم جارة جو يسلمو لي امي سلمت عليهم و دخلت المطبخ طبعا دا محلي المفضل اكلت و يداب انتبهت انو انا جيت اول زول مشيت نمتا
وصحيت بي حركة علياء وهي بتونسني بي يوما الأول نص نايمة و نص صاحية
لمن جا تاني يوم
يتبع..