رواية مشاعر ثائرة الفصل الاول 1 بقلم هدير ممدوح


رواية مشاعر ثائرة الفصل الاول 1 بقلم هدير ممدوح


يكمن الحب في قلب كل شخصٍ منا بطريقةٍ ما، ربما لا يستطيع التعبير عنها، لكنه يحبك...


في إحدى شوارع الحارات الشعبية، وتحديدًا داخل تلك العمارة البسيطة ذات الجدران القديمة، التى تآكلت ألوانها واصبحت باهتة، ارتفع صوت فتاة من داخل إحدى الشقق في الطابق الثاني:


_اسمعي بقى، أنا زهقت من العيشة دي.


قالت نادية بحزم، تلك المرأة التي قد تجاوزت الخمسين، بدا ذلك على تجاعيد وجهها الواضحة:


_وأنا قلتلك مش هتتجوزيه يا بنت بطني.


ردت سمر بعناد:


_هتجوزه حتى لو غصب عنكم.


أمسكت نادية ذراعها بقوة، ودفعتها لتسقط على الأريكة قائلة:


_يا بت، ما تقفيش في وشي، وقولي حاضر ونعم عشان تكسبي رضايا.

اعتدلت سمر في جلستها على الأريكة،و أشاحت بوجهها للجهة الأخر:


_يا ستي، أنا حرة، سيبيني أتجوز اللي أنا عايزاه.


زفرت والدتها بغضب، وكظمت غيظها، ثم جلست بجانبها وقالت بلين، وهي تزيح إحدى خصلات شعرها إلى الخلف:


_اسمعي يا سمر يا حبيبتي، إنتِ أصغر واحدة في إخواتك، بلاش ده وهيجيلك الأحسن منه.


ردت سمر بعنادٍ أشد من ذي قبل:


_لا، ما هو أنا بقى مش عاوزة الأحسن، عاوزة ده وبس.

استمعن إلى صوت طرقات على الباب، فلكزتها والدتها وهي تقول بغيظ:


_طب يلا قومي من وشي افتحي الباب، داهية تاخدك وأخلص منك.

قامت سمر وهي تسير بغنج، وكأنها لم تتجادل  منذ قليل، أو ربما لإثارة غيظ والدتها أكثر.


فتحت الباب، لتطل من خلفه فتاة أقصر منها طولًا بقليل، ذات بشرة خمرية وعينين خضراوين.


فصاحت سمر:


_بنتك حبيبة قلبك المطيعة جات أهي.


ثم انحنت سمر بتمثيل أمامها قائلة:


_جلالة السلطانة سلمى، فلتتفضل.


تحدثت سلمى وهي تحمل على يدها بالطو أبيض خاصًا بالأطباء:


_مش فاضية لتريقتك خالص.


وولجت إلى الداخل، فقالت والدتها ما إن رأتها:


_جاية البسمة من الودن للودن، خير يا بنتي؟


ردت سلمى بفرحة، وهي تترك حقيبتها وتضع بالطوها جانبًا:


_نونة القمر خلاص لقيت شغل في مركز علاج طبيعي كبير، ومع الدكتور محمود اللي قولتلك عليه.


قالت سمر بتهكم، وهي تجلس في الجهة المقابلة لهما:


_وهتشتغلي إيه يا ست الدكتورة، هتسجلي أسماء الحالات وتنضفي الأرضية؟


وكزت نادية «والدتهما» سلمى قائلة:


_قومي يا بنتي، لافيني الشبشب من عندك.


قالت سمر بذعر:


_لا، كله إلا ده يا ست الحبايب. 


هتفت نادية بصوتً عال:


_دلوقتي بقيت ست الحبايب، ده أنا طلعت روحي وأنا بناهد معاكي. 


رمقتهما سلمى في ريبة قائلة:


_في إيه بينكم إنتوا الاتنين؟


هتفت والدتها بقهر:


_عريس متقدم لأختك، لا و إيه... سيد العرسان. 


رمقتها سلمى بذهول: 


_مين؟!


ردت سمر ووالدتها في صوت واحد:


_عبدالعال!


قالت سلمى بحنق:


_عبدالعال حسين اللي ساكن في الشارع اللي ورانا، ده اللي كان متجوز رباب بنت زينهم وطلقها، صح؟


تمتمت نادية وهي تلوي فمها:


_أيوة، واختك موافقة.


هتفت سلمى باستنكار:

_بقى مش لاقية غير ده يا سمر، ده الشارع كله بيكره سيرته هو وأمه، ومراته اتطلقت بعد عذاب، ما تفوقي لنفسك، إنتِ يدوب داخلة على التسعتاشر. 


قالت سمر في هدوء:


_وفيها إيه، أنا لا أول واحدة هتاخد واحد كان متجوز قبلها، ولا أول واحدة هتتجوز وهي عندها تسعتاشر يا ست الدكتورة، ويا ستي بحبه وعايزاه، ها. 


قالت والدتها بغضب:


_بتحبيه، يبقى كلام أم جمال صح، قالتلي إن بنتك بتعدي من شارعنا وعبدالعال بيغمزلها، دي تربيتي يا سمر. 


صاحت سمر بامتعاض:


_ما كفاية بقى، عاجبك عيشتنا من يوم وفاة والدي وإحنا متشحططين. 


ودار نظرها في أرجاء شقتهم البسيطة الصغيرة، ذات الألوان الباهتة، التي احتوت على غرفتين وصالة بسيطة ومطبخ وحمام، ثم تابعت:


_إحنا بناكل اللقمة بالعافية ومش بتكفينا، أنا أخدت دبلوم وريحتك مني، واللي جنبك الوحيدة اللي هتفلح بس يا حسرة، أهي متبهدلة بين الكلية والمحاضرات في النهار، و أي شغلانة.


صاحت سلمى في وجهها:


_اخرسي بقى. 

وصمتت سمر لثوانٍ وهي تلتقط أنفاسها، ثم قالت:


_ولا خايفة يكون حظي زي هدير، الأولى اللي قعدتيها من كليتها وجوزتيها، مش كان كلامك برضه إن التعليم مبقاش ينفع الأيام دي، واللي خدوا كلية عملوا إي، واهي قاعدة لا طايلة سما ولا أرض.


طأطأت نادية رأسها إلى الأرض، وامتلأت عيناها بالدموع، فوثبت سلمى واقفة وقالت بغضب وهي تسحب سمر من يدها:


_قولتلك اخرسي، ويلا تعالي معايا.


صلي على محمد 🌺

في نفس المنطقة، وعلى بعد بضعة شوارع، في منزل بسيط يتكون من دور ارضي وطابق واحد، داخل الشقة البسيطة، التي كان أكثر ما يميزها ألوانها الزاهية.


 كانت هدير  في المطبخ تُعد الطعام؛ أفرغت علبة الجبن في طبق صغير،ثم صنعت البيض، وقبل ان تكمل مابيدها، صدح صوت بكاء طفل، فاستدارت راكضةً نحو مصدر الصوت. 


هرعت إلى الغرفة وحملت طفلًا صغيرًا بين يديها، وهتفت وهي تهدهده:


_خلاص يا حبيبي، ماما جات أهو.


ثم قبّلت وجنتيه بلطف، قائلة:


_مين كبر وكمل سنة، كل سنة وإنت طيب يا قلب ماما من جوة.


واتجهت به نحو الفراش وهي تُتمتم:


_تعالى نقعد، أرضعك وبعدين أتغدى، لحسن ماما جاعت على الآخر.


وبعد دقائق، غفا الصغير بين يديها مرة أخرى، ثم وضعته في فراشه برفق،و عادت إلى المطبخ لتناول بضع لقمات على عجالة؛ فقد تأخرت على عملها. 


وبعدما انتهت، عادت إلى الغرفة التي بها الطفل، وأبدلت ثيابها بأخرى استعدادًا للخروج، وحملت الطفل ،وقالت بنبرة حانية:


_يلا ننزل لتيتة تقعد معاها لحد ما أرجع من الشغل.


نزلت هدير إلى الطابق السفلي، كانت هناك مساحة صغيرة فاصلة بين السلم والباب الرئيسي بينما على اليمين هناك باب خشبي صغير، توقفت هدير  أمامه، و طرقت على الباب في هدوء. 


ولحظات و فُتح الباب،  ظهر شاب في العشرينات، طويل القامة، نحيف البنية، ذو بشرة خمرية، وقال بإبتسامة وهو يقضم من الخيارة التي بيده:


_أهلًا يا مرات أخويا، ادخلي.


ولجت هدير إلى الداخل، فرأت حماتها "صابرين" جالسة على الأرضية، وبين يديها مخرطة الملوخية، تحركها يميناً ويساراً بانتظام، وتمضع اللبان في فمها. 


رفعت صابرين عينيها إليها،وقالت:


_بقولك من البداية أهو، لو جايبة «علي» أخد بالي منه، فأنا مش فاضية.


غابت البسمة عن وجه هدير، وهي تقول:


_بس يا خالتي، أنا رايحة الشغل ومش هينفع آخده.


ردت صابرين بلامبالاة:


_خديه معاكي، هو أنا فاضية لزن العيال، أو وديه عند أمك.


تنهدت هدير بخيبة أمل،وضمت طفلها إلى صدرها أكثر:


_أنا أصلًا متأخرة على الشغل، هاخده معايا وأمري لله.


وغادرت من أمامهم،  فأغلق حسن الباب خلفها بعد خروجها، والتفت لوالدته قائلاً: 


_بقى كده تكسري بخاطرها يا أمي؟ 


ردت عليه صابرين بحدة وهي تترك المخرطة جانباً:


_أكسر بخاطرها، أكسر دراعها، إياك تتدخل.


قال حسن وهو يقترب منها:


_طيب بقولك إيه،  معاكي ميتين جنيه سلف؟


قالت صابرين وهي تنظر إليه :


_ومنين يا حسرة. 


ضحك حسن ساخراً:


_حسرة! ده إنتِ على قلبك قد كده.


لكزته في كتفه قائلة:


_اخرس يا واد، للبت هدير ترجع وتسمعك.


صاح حسن بغضب:


_حتى لو سمعت، إنتِ كنتِ هتديها حاجة يعني. 


نهضت صابرين من مكانها، ورمقته شزرًا:


_أنا هديك الميتين جنيه عشان أخلص منك وتمشي من قدامي، وإياك تجيب سيرة حاجة قدامها، فاهم. 


هز حسن رأسه قائلًا:


_اعتبريني أخرس وأطرش بعدها.


سبحان الله وبحمده 🤍


في مكانٍ آخر، وتحديدًا داخل ذلك المنزل الذي يشبه الفلل في تصميمه، كانت إحدى غرف الطابق الأرضي تهتز من شدة صراخ مازن، وهو يهتف بغضب:


_قلت اطلعي برة، مش هاكل ولا عاوز حاجة. 


هتفت الفتاة الشابة بتوتر، وهي تتقدم نحوه حاملةً كأسًا من الماء وبجواره حبة الدواء:


_طيب يا مازن بيه، خد العلاج بتاعك.


صرخ مازن في وجهها، ودفع الكأس من يدها بعنف، فتساقط أرضًا وتناثرت شظاياه في أرجاء الغرفة، مصدرةً صوتًا حادًا . 


لم تمر سوى ثوانٍ حتى دُفع الباب وانفتح على مصراعيه، وظهر شخص آخر أمامهما، قبل أن يقول بصرامة:


_إيه اللي بيحصل هنا؟


أجابته العاملة بوجل:


_مازن بيه رافض الأكل والعلاج يا أستاذ مدحت.


أشار مدحت بيده إليها، ثم تقدم نحو شقيقه بخطوات هادئة، وقال:


_اطلعي إنتِ يا نسمة دلوقتي، وابقي ارجعي لمي القزاز ده بعد ما أخلص كلامي مع مازن.


هزت نسمة رأسها بهدوء وغادرت الغرفة.


أشاح مازن بوجهه إلى الجهة الأخرى، بينما توقف مدحت أمام الفراش الذي كان شقيقه مستلقيًا عليه.


 مد يده وأمسك بفكه برفق، وأجبره على النظر إليه قائلًا:


_بصلي... بصلي يا مازن.


كظم مازن غيظه، ثم نظر إليه بضيق:


_مدحت أنا مش ناقص، أنا فيا اللي مكفيني.


هتف مدحت بغضب:


_فوق لنفسك كده إيه يعني عملت حادثة ومش قادر تقف، الدكاترة كلهم قالوا فترة وهتعدي، وهترجع تمشي تاني.


رد مازن بالنبرة ذاتها، وقد بدا اليأس واضحًا في عينيه:


_الفترة بقت  شهرين يا أخي، ده أنا حتى الحمام مش قادر أدخله لوحدي.


ثم خفت صوته قليلًا، وأشاح بوجهه بعيدًا عنه:


_اطلع يا مدحت وسيبني لوحدي.


لم يجبه مدحت، بل جلس إلى جواره، وقال بنبرة أكثر لينًا:


_إحنا طول عمرنا سند لبعض يا مازن، عشان خاطري ما تعملش في نفسك كده، ارجع خد أدويتك، ودكتور محمود رجع من السفر، وبكرة هيكون موجود في المركز، أنا حجزتلك عنده، وده من أكبر الدكاترة.


هتف مازن بتهكم:


_أنا رافض أسافر برة، تفتكر هروح المركز هنا؟


رد مدحت بحزم:


_هتروح يا مازن، ما إنت لازم تروح وتخرج من ورا ستار اليأس ده، فاهم. 


صمت مازن لحظات، ثم قال بعناد:


_تمام هروح... بس لو ما ارتحتش، يبقى دي هتكون آخر مرة.


هز مدحت رأسه في هدوء، وتمتم:


_ماشي يا سيدي موافق، فك بقى وتعالى نلعب دور شطرنج.


أشاح مازن برأسه إلى الجهة الأخرى، وقال:


_لا، مش عاوز.


نهض مدحت من مكانه، وقال بإصرار:


_لا عاوز، حالًا هروح أجيبها وأرجع.


وغمز له بعينه قبل أن يخرج، فارتسمت ابتسامة هادئة على وجه مازن وهو يتابع شقيقه بعينيه؛ ذلك العنيد الذي، لولا الظروف التي وضعته في هذا الحال، ربما ما كان ليكتشف إلى أي حد يحمل له الحب والخوف في قلبه.


لاحول ولاقوة إلا بالله العلي العظيم 🤍


في مكانٍ آخر، تحديدًا في تلك البناية التي تمتعت بمظهرٍ رائع، تحيط بها الخضرة من كل جانب؛ أشجار كثيفة تتناثر أمامها، ومقاعد خالية تتوزع أمامها.


طلت سيدة في عامها الخمسين من شرفتها، وابتسمت براحة وهي تستنشق الهواء النقي، ثم زفرت في هدوء وتمتمت:


_الحمد لله على هوا ربنا اللي مفيش أجمل منه.


لم تمضِ سوى لحظات قليلة حتى استمعت إلى صوت جدال بين زوجة ابنها والعاملة، فزفرت بضيق، ثم خرجت من غرفتها وهي تقول:


_خير يا بنتي، في إيه تاني؟


نظرت إليها زوجة ابنها بحدة وقالت:


_الهانم بتحاسبني أنا رايحة فين وجاية منين.


هتفت الفتاة بأعين منكسرة:


_لا أبدًا يا ست هانم صدقيني، أنا بس سألتها إنتِ خارجة يا هانم، وهي زعقت بالشكل ده.


قالت السيدة أميرة وهي تنظر إلى زوجة ابنها:


_وبعدين معاكي يا بنتي. 


رمقتها علياء بكبر، وقالت:


_بقى بتصدقي دي وهي عيني عينك بتكدبني. 


هتفت السيدة أميرة محاولة تهدئتها:


_يا بنتي أنا...


قاطعتها علياء وهي ترفع يدها أمام وجهها، ثم التفتت إلى العاملة وقالت بتعالٍ:


_يلا شوفي لو  ليكي أي حاجة واطلعي حالًا، مش عايزة أشوف وشك.


نظرت العاملة إلى السيدة أميرة برجاء، دون أن تنطق بكلمة، لتبادرها علياء بغلظة:


_أنا هنا صاحبة البيت، واللي ليا الكلمة، فاهمة. 


ثم نظرت إلى السيدة أميرة وتابعت ببرود:


_أما الباقي، فهما ضيوف.


صاحت أميرة بامتعاض وقد نفد صبرها:


_لا بقى إنتِ زودتيها، ولما ييجي عبدالرحمن هبلغه بكل اللي حاصل ده.


عقدت علياء ذراعيها أمام صدرها، وقالت بثقة متعالية:


_زي ما هو مش هيقدر يستغنى عن أمه، كمان مش هيستغنى عن مراته وأم ابنه، فبلاش تحطي نفسك معايا في نفس الكفة، عشان مستحيل نتساوى.


ألقت كلماتها في وجهيهما، ثم استدارت وغادرت الشقة، صافعة الباب خلفها بعنف.


اقتربت العاملة من السيدة أميرة، وربتت على كتفها، ثم غمغمت بحزن:


_الله يكون في عونك يا حجة، عن إذنك.


ردت أميرة بصوت امتزج بالقهر:


_معلش يا بنتي، حقك عليا.


همست العاملة قبل أن تغادر من أمامها:


_ولا يهمك يا حجة، الرزق على الله. 


                           🌺🌺🌺🌺

توجهت هدير إلى إحدى المكاتب في الحي، وهي تضم طفلها بين ذراعيها.


ولجت إلى الداخل، فنظرت إليها المرأة الواقفة خلف مكتبها، وقالت باستهزاء:


_يلا فاكرة تيجي يا ست هدير، وكمان جايبة ابنك معاكي. 


ردت هدير بتلعثم:


_معلش يا ست عواطف، أخر مرة.


أجابتها عواطف ببرود:


_وهو كل دور اخر مرة ده مش وضع على العموم أنا والحاج محمد مش عاوزينك هنا تاني، خلاص شوفنا ولد غيرك.


غمغمت هدير بأسى:


_ليه بس يا ست عواطف، ما إنتِ عارفة حالي، حتى عشان خاطر العيل ده.


قالت عواطف باستخفاف:


_الكلام ده مش هياكل معايا بعد كده خلاص، خلصنا.


ثم فتحت درج المكتب الفاصل بينها وبين هدير، وأضافت:


_استني.


أخرجت بعض الأوراق النقدية ومدتها إليها قائلة:


_دول حسابك.


رفعت هدير طفلها جيدًا بذراع، وأخذت الأموال بيدها الأخرى، ثم نظرت إليها للحظات وهمست بحسرة:


_ودول يعملوا إيه يا ربي بس. 


استدارت هدير عائدة إلى منزلها، تجر خلفها خيبةً كبيرة، وقد أثقل الهم كاهلها.


مرت في شارع ضيق يخلو من المارة، وكانت تخطو مسرعة وهي تحبس دموعها بصعوبة. 


لم تكن تريد شيئًا سوى الاختلاء بنفسها لبعض الوقت، لعلها تستطيع إطلاق سراح تلك الدموع العالقة في عينيها.


وأثناء سيرها، اعترض طريقها شاب، وقف أمامها مبتسمًا وقال:


_ست البنات معدية من شارعنا، وأنا أقول إيه النور ده. 


تبدلت ملامح هدير إلى أخرى جادة، وقالت بشجاعة:


_اخفي من قدامي يا أسطى محروس، أنا مش ناقصاك.


وكادت أن تتجاوزه، لكنه اعترض طريقها من جديد، وقال:


_طيب ما تشوفي اللي ناقصك وأنا أكمله، قولتلك نتجوز.


نظرت إليه هدير باشمئزاز، وهتفت:


_يا أخي أنت ما عندكش دم، أنا على ذمة راجل، أفهم بقى.


التوت شفتاه بسخرية، وقال:


_راجل، وهو فين الراجل ده؟ آه، ولا يكونش قصدك الراجل اللي هجرك ومحدش عارف له طريق. 


أغمضت هدير عينيها للحظة، ثم زفرت محاولةً التحكم في غضبها:


_انت لو ما اختفتش من وشي دلوقتي، لهكون قالعة الشبشب وهنزل بيه فوق دماغك.


ابتسم محروس بمكر، ثم اقترب منها فجأة وقبض على ساعدها.


تمسكت هدير بطفلها جيدًا، وحاولت تخليص يدها منه وهي تقول بحدة:


_لو ما سبتش إيدي حالًا، هكون مصوتة ولمّة عليك الناس. 


يتبع...

  هستنى رأيكم كالعادة، ويارب البداية تعجبكم. 

دمتم بخير ♥...


                   الفصل الثاني من هنا 

            لقراءة جميع فصول الرواية من هنا 

تعليقات
×

للمزيد من الروايات زوروا قناتنا على تليجرام من هنا

زيارة القناة