رواية شتات الفصل السادس عشر 16 بقلم مها حولي
مزاجي اتعكر اكتر بعد قريت الرساله دي! حسيت بقهر وغضب في نفس الوقت، يااااخ انا متين اخلص من المواضيع دي كلها!.... انا ما اعترفت بغلطي، اعتذرت وطويت الصفحه دي، ليه ياخ كل ما أبدا من جديد يجي شي من الفات يعكر مزاجي!..... انا اافهمت مشاعرهم كلهم وحسيت بالذنب لكن كفايه كل شي ليهو حد وانا شخصيا بزهج وبقرف من الإستعطاف المستمر! ياخ غلطت معاك اعتذرت منك انت ليك حق تقبل اعتذاري أو ترفضو بس ما تقعد تنط لي في كل مكان وزمان وكل مره نفس الكلام، نفس العتاب! اعمل شنو يعني!؟ انتحر! انتحر عشان الناس دي جد تفهم وتصدق انو ضميري أنبني؟ عايزيني اعيش في اكتئاب حياتي كلها عشان أثبت ليهم اني زعلانه عليهم؟..... أحمد عمرو ما فتح خشمو، دائما كان بلمح، وهو متقصد يعمل كدا، بحس المشاعر عاجباهو اكتر من انو يتحمل مسؤوليه، هو عايز يحب و يتحب بس ما كنت بحس انو عندو استعداد يفتح بيت ويكون أسره! كان عاجبو حالة الصد والجذب البيناتنا! عاجباهو قصص الأفلام دي و جر الطرحه من ورا! عاجبو الحب الخجول دا!!
اما وائل دا انا برضو اعتذرت منو اكتر من مره وهو اكتر واحد انا ظلمتو و دي حاجه انا ما ناكراها ومعترفه بغلطي، براي رسلت ليهو وعلقتو فيني وما قلت ليهو اسمي ولمن جا وكان ح يتقدم ل الاء على أساس انو دي انا ما منعتو! كل الكان هاميني انو ماف زول يعرف اني كنت متواصله معاهو ومكذبه عليهو!..... دي كلها حاجات انا معترفه بيها، هو عرف وكان بقدر يتصرف وينهي الموضوع دا بس مشى وعقد على الاء وجاي يرمي اللوم علي!.... لو هو ما كان عارف وعقد عليها كل اللوم بقى علي انا بس هو كان عارف!.... عرسها ولسه عايزني اعيش في حالة زعل وتأنيب ضمير عليهو!.... إذا أنا غلطت عليك و دمرت حياتك ليه انت تواصل في تدمير نفسك عشان تخلي الطرف التاني يموت من تأنيب الضمير عليك!!
يمكن في حاجه هم الإتنين ما عرفوها عني، يمكن الإتنين ما عارفين جوانبي التانيه، انا اي شي بعمل بتحمل مسؤولية بس نهاااي ما بتحمل مسؤولية شي انا ما عملتو 🤚 انا ما غبيه ولا واحده ساهلة الإستعطاف عشان كل مره يجي يتشكوا ويتبكوا لي، مش قلتوا علي انانيه؟ كويس ح تشوفو الأنانيه على أصولها.
رديت ليهو :
الله يبارك فيك يا احمد، عقبالك 🩷
لما رفعت راسي لقيت خليل بعاين لي، قفلت الشاشه وختيت التلفون على جنب ونزلت من المنصه، مشيت لناس جمانه الكانو برقصوا على اغاني كدا غريبه، كل الشباب عاجباهم و دا ذوقهم! بقيت اتمايل معاهم سااااي كيه بس و جمانه قالت لي مالك؟
قلت ليها ماف شي، قالت لي خليل قال ليك حاجه ولا شنو شايفاك ما رايقه؟!.... قلت ليها حاجه ما مهم، بقول ليك بعدين، بعدها مشيت قعدت شويه مع ناس امي، خالتو سميره ذاتا كانت قاعده معاهم و خالتي كمان، اما وائل و الاء كانو قاعدين براهم بعيدين عننا شويه،بس كل مره كنت بلمح وائل بعاين لي بنظرات عتاب!
قمت وكنت راجعه مكاني وانا ماشه حاسه بنظرات وائل، انا مستغربه فيهو، مشى قرر يبدا صفحه جديده مع الاء! عايز مني شنو تاني!!.... إتلفت عليهو وإبتسمت ليهو إبتسامة نظر كدا، زي لمن تحسس زول انك ما فاهم عليهو أو ما قادر تفهم نظراتو وما شغال بيهو، وزعت نظري عليهو زيو و زي المعازيم.... لمن حولت نظري منو وعاينت قدام لأني وصلت مكاني لقيت خليل بعاين لي، كان بعاين بنظرات زول بتسائل جواهو، قعد مكاني لا اتكلم معاي لا اتكلمت معاهو لحد ما خلصنا!
بليل كنت قاعده في السطوح بتكلم مع جمانه بالتلفون، قالت لي ما شاء الله أهل خليل كلهم ناس راقين، بختك والله، قلت ليها هم البختهم بي، قالت لي حقيقي والله، لكن تحسيهم مملين! قلت ليها في ناس عندهم البرود فخامه والرقي بعدين احسن زاتو ارتحنا من الجوطه والكواريك والفوضى البتحصل في المناسبات، قالت لي دي البتحلي المناسبات ذاااتها وبالمناسبه نحنا كمان أهل امي زي أهل خليل، ناس فخامه كدا و باردين تحسيهم Ai في المناسبات بس أهل ابوي عسل، مع انهم برضو ناس هاااايات لكن بحبوا الهجيج والبهرجه والكواريك بنبسط شديد في اعراسهم،قلت ليها نحنا كدا، ميكس بتلقي مناسبات الهجيج ومناسبات البرود والبرستيج 😂
قالت لي ما قلت لي قبيل مالك؟
طوالي حكيت ليها بموضوع الرسائل، قالت لي ولد خالتك دا في البدايه لمن حكيتي لي كنت متعاطفه معاهو بس هسي غاظني تصرفو،ليه يعني يرسل ليك رساله زي دي في توقيت الخطوبه! ليه متقصد يبوظ ليك فرحتك!
قلت ليها نفس تفكيري يا جمانه، صدقيني في البدايه انا كرهت نفسي شديد وكنت متعاطفه معاهم الإتنين و زهجانه من نفسي بس هسي مليت منهم ومن استعطافهم المستمر و الدراما حقتهم! بالذات لمن اتأكدت انو هم بس عايزني اعيش بتأنيب الضمير طول حياتي! عايزني ازعل وابكي على طول!.... وائل مع انو قرر يبدا صفحه جديده مع الاء مع ذلك بعاين لي بنظرات عتاب!
قالت لي :
معظم قصص الحب والمشاعر الزي دي بتستمر عشان هي ما اكتملت عشان ما نضجت، يعني وائل عشان بقيتي ليهو صعبة المنال لسه مشاعرو ليك ما انتهت، أظن لو كان عرسك ما ح يحبك الحب دا كلو، ما عارفه لكن بحس انو هو في مرحلة الإعجاب المتأخر، الإعجاب بالشكل، لأنو هو كان متواصل معاك ك اسم ومشاعر بس ما عارف تغيرات شكلك وما عارف بقيتي كيف، ما عارفك الاء ولا مها،وعلى كل حال هو حب البت المتواصله معاهو، لمن خلاص اكتشف الحقيقه وعرف انو دي انتي صاحبة الرسائل الإستمرت معاه 3سنوات بدأ مرحله تانيه من الإعجاب! بدأ يربط الشكل بالرسائل، كل ما يشوفك بتذكر رسائلكم، و تبدأ عندو تخيلات صورتك مع رسائلكم وكل ما يتذكر موقف قديم في الرسائل يربطو و يتخيلو طوالي بصورتك الظاهره قدامو، لذلك هو ما ح يتخطى بسهوله وهو ظلم نفسو لمن استعجل وعقد على بت خالتك، حتى لو كان زعلان الغلط ما بتعالج بغلط، كان يصبر شويه و يدي نفسو فرصة انو يتجاوزك ويتخلص من مشاعرو ليك، بس العملو غلط كبير ماف غيرو ح يدفع تمنو، ح يضطر يا اما يواصل في علاقه ما عايزها أو ينهيها وكدا حيكون ظلم بت خالتك معاهو، أو يحاول ينسى علاقه وهو في علاقه تانيه و دا ح ياخد منو وقت و جهد و محتاج صبر من بت خالتك.
قلت ليها بما انو هم الإتنين عارفين الحقيقه بطريقتهم تاني، قالت لي في سؤال في بالي كم مره بقول اسألك ليهو 😁
قلت ليها شنو؟
قالت لي ما بتغيري على وائل؟ يعني لمن جا يتقدم لبت خالتك شعورك كان شنو وهسي شنو؟
قلت ليها يا بت انا مجرده مع الإحساس، قالت لي خلينا من الإجابه المعتاده دي، يعني حب 3 سنوات كيف قدرتي تتخطي بالسهوله دي وما غيرتي عليهو؟
قلت ليها خلقتي كدا، حتى التخطي دا عايزين تحسدوني عليهو 😂
ضحكت وقالت لي لا لا والله، للدنيا والزمان عايزه اعرف استراتيجية التصرف في المواقف الزي دي، عايزه اعرف كيف ابكي اولاد الناس ديل، يعني بدل نحنا نبكي عليهم هم يبكوا علينا، قلت ليها يا بت هووووي قصدك شنو؟
قالت لي لا لا ياخ ما قاعده ألعب على اولاد ناس، بس سااااي كدا عايزه اعرف لو ارتبطت بزول وعايزه اعمل انسحاب كيف اتخارج بدون ما اتضرر و يبكي هو. .. بمزح والله 😂
قلت ليها انا اكيد ما مشيت قريت كتاب اسمو كيف تتخطى و تتجاوز العلاقات ولا دخلت دورات تدريبية و ورش، اقول ليك انا مخلوقه كدا 😂
قالت لي مها عليك الله بطلي! السؤال دا زي ما شاغل بالي شاغل بال اكساتك الإتنين، قلت ليها دا المجننكم كلكم.... يا زوله انا زاتي ما عارفه، ما اكذب، وائل دا بالجد كان عاجبني وشايفاهو رهيب وكان عاجبني التواصل معاهو،كلكم بتقولو لي كيف قدرتي تتخطي بالسهوله دي وهو اصلا ما كان في سهوله، ماف زول كان معاي يوم القرر اقطع التواصل دا وانسحب، ماف زول كان معاي في أول يوم و ليله، ماف زول كان معاي و حاسي بوجع وكيف كنت بحاول امنع نفسي من اني ارجع و اتواصل معاهو، البكى كان رفيق ليلي، ما كنت بعرف الليل والنهار، كل الأيام والليالي بعد اليوم داك بقت تتشابه، انتوا شايفين السنتين دي شويه؟؟ سنتين وانا بتعذب نفس العذاب شايفنها شويه علي ومفروض اتعذب لسنوات أطول من كدا؟ انا لحد ما دخلت الجامعه ما كنت فاهمه شي، من إجازة سنه تالته ثانوي ولحد بداية تانيه جامعه كنت زي الزول المودر، بس حقيقي عذاب في أول يوم ما بشبه عذابي و انا تانيه جامعه لأنو الأيام والأحداث اليوميه بتأثر على الواحد وبتشغلو، الشي الفادني اني ما اتراجعت! قطعت التواصل يعني قطعتو، مشيت وما إتلفت وراي، ما اكذب لمن قال لي حسيت بمشاعر اتحركت جواي ولمن جا وشفتو بعد السنوات دي حسيت بإنشراح وأظن مشاعري كانت على وشك انها تتجدد، ولمن اتقدم ل الاء فرق معاي والله لأني عارفه انو هو قاصدني، بس من يوم الحكايه دي بقت جد شلتو من حساباتي خاصة انو الاء من زمان حاباهو، ف بحس انو هي بتستحقو اكتر مني، هي ما متقلبة المزاج والمشاعر زيي، يمكن هل الوحيده الح تقدر تصونو و تصبر عليهو و تقدر مشاعرو اكتر مني!.... قالت لي بحس انو وجود أحمد كان ليهو دور كبير في انك تتخطي وائل!... قولي لي كيف؟.... قلت ليها اهاااا كيف.... قالت لي راجل بنسي راجل، انتِ انسحبتي من وائل و وقعتي في أحمد طوالي، وكنتِ حاسه بمشاعرو ليك، اشرحها ليك كيف، أحمد دا ممكن نسميهو الفاصل الإعلاني، قصدي فاصل الحب، بتمشي و تجي ليهو والحاجه دي ما مخطط ليها هي تلقائيه، أحمد الحب الثابت والإعتيادي، مشاعرو ثبتتك شويه، قلت ليها والله ما عارفه يا زوله لكن على قولك، مشاعر أحمد يمكن بالنسبه لي كانت مشاعر اعتياديه أو حب خجول، من قمت لقيتو قدامي، ماف شي جديد ياهو جرجير الطرح، ضحكت وقالت لي يخسي عليك والله!!
بعدها غيرنا الموضوع، قالت لي ما شاء الله أظن دي أطول مكالمه تتكلميها مع زول 😂
قلت ليها اعمل شنو، هسي لو قلت ليك ما بحب المكالمات تزعلي!.... قالت لي حييينا منك ومن صراحتك دي! على الأقل قولي لي عشانك بس! قلت ليها نفس المعنى!.... قالت لي انا عكسك بفضل المكالمات اكتر من الرسائل، قلت ليها المكالمات مقيده، الرسائل بترد عليها وقت تفضى و وقت تكون رايق، لأنو عادي اكون فاتحه شبكه وشايفه الرسائل بس ما رايقه للونسه!... قالت لي وجهة نظر، لكن برضو ماف زي المكالمات، قلت ليها خلاص يا زوله ح اقفل هسي ناس البيت يقول دي بتتكلم مع منو وطالعه فوق كمان 😂
قالت لي ماااا خلاص بقيتي مخطوبه، قلت ليها طواااالي كدا، ياخ انا لو عرستو عديل ما ح اتكلم معاهو مكالمه طويله زي دي، ما عندي أخلاق والله، قالت لي الله يعين عليك، يلاااا تصبحي على خير، قلت ليها جمانه.... بالجد شكراً ليك على وقفتك معاي ما قصرتي، قالت لي ياااا بت تشكريني على شنو! دا الطبيعي و دا واجبي ما عملت شي خارق! قلت ليها برضو شكراً ليك وسلمي لي على خالتو ربيعه، قالت لي هي ذاتا بتسلم عليك ...... ثواني هاك ليها عايزه تتكلم معاك.... أدت التلفون لأمها وبقت تتكلم معاي، باركت لي وقالت لي معليش ما قدرت اجي، قلت ليها عذرك معاك يا خالتو ربيعه عارفاك ما بتقصري، بتك ذاتا ما قصرت معاي، قالت لي أخوات انتوا كيف تقصر منك.... خليكم كدا على طول، قلت ليها ان شاء الله..... بعد قفلت منها، بقيت ماسكه تلفوني بعاين ليهو، منتظراهو يتصل اشوف عايز شنو عشان من قبيل ظاهر لي انو خاشي بمكالمات وانا كنت بتكلم مع جمانه، لمن ما اتصل تاني نزلت تحت، وناس امي طوالي عاينوا لي، كانت أمي واخواتي، قلت ليهم جمانه بتسلم عليكم عشان يعرفوا اني كنت بتكلم مع جمانه، مرام قالت لي الله يسلمها 🙂
طبعاً كان واضح انها ما مصدقه، قلت لأمي خالتو ربيعه برضو بتسلم عليك واعتذرت عشان ما قدرت تجي و.... الخ، قالت لي الله يسلمها ما بتقصر والله..... هنا ياداب حسيت انهم صدقو اني جد جد كنت بتكلم مع جمانه!.... غايتو حياة معقده، لو دخلت علاقه ما رسميه تخاف ولو دخلت علاقه رسميه برضو تخااااف و تخجل!!
قعدت معاهم شويه وعملت تلفوني صامت في حال انو خليل اتصل بس تاني ما اتصل، عملنا لينا شاي لبن حضرنا بيهو المسلسل بعدها دخلت جوه و خليتهم يحضروا في الهول، لما دخلت الواتس لقيت رساله من خليل قربت تتم ساعه او تمتها عديل، مرسل لي صورة فردة حلقي حق الدهب، قال لي شكلو وقع منك ما انتبهتي، بالجد ما انتبهت! حتى لمن طلعت المجوهرات ما انتبهت انو فردة الحلق ما موجوده!
رديت ليهو:
تمام
استلم الرساله لكن ما فتحها، قفلت الشبكه ونمت.
صحيت تاني يوم مرتاااااحه، كأنو الخطوبه دي بنت حاجز بيني وبين كل الفات، بالنسبه لي كانت قطع عشم سواء ل وائل أو أحمد، كدا انا رسمياً بالنسبه ليهم بقيت لزول تاني وغصب عنهم ح يقبلوا الحقيقه دي مع الأيام و يتعايشوا معاها، اليوم دا ما كان عندي جامعه، لأول مره بعد أيام كتييييره ارجع لنفسي الزمان وروتيني الكنت بعملو بكل هدوء، بعد الصبح مسكت المصحف قريت قرآن و أذكار الصباح، كنت نشيطه نضفت و رتبت البيت و عملت فيهو بخور و أمي تعاين لي ساي ومرات تضحك لما اقول ليها مالك بتقول لي لا لا ماف حاجه وانا حاسه انا بتضحك علي انا، حسيتها قالت في نفسهااا دي البوره بعد فكت منها 😂😂
جهزت الفطور من بدري ومشيت صليت الضحى وخلطت عصير دخلتو التلاجه، امي قالت لي الليله عاد!.... قلت ليها والله عارفاك بتضحكي علي! يعني الواحد لو اشتغل مشكله ولو ما اشتغل مشكلتين! قالت لي خلاص خلاص واصلي، ان شاء الله بس ما تكون هاشميه ساي، قريب للفطور خالتي رقيه جاتنا، جهزت الفطور وقعدنا نفطر انا وهي وأمي، خالتي قالت لينا ريحة البخور ما شاء الله من الشارع شميتها! امي قالت ليها جبتو من سميه، بتعمل بخور سمح، خالتي قالت ليها إلا اشتري منها، امي قالت ليها صحي وين هي الأيام دي ما ظاهره! خالتي قالت ليها قااااعده والله، وأمس كانت مقيله معاي! امي قالت ليها غريبه ما جاتنا بيجاي! بقت ما بتجينا عديل!
خالتي قالت ليها شكلها زعلانه لأنو سيرتكم بقت ما بتجيبها، زماااان كانت ماسكه سيرة مها دي طوالي، هسي سكتت ساي!
امي قالت ليها أجي عملنا ليها شنو كمان لمن تزعل!
خالتي قالت ليها والله ما عارفه، ما قالت لي شي!
طبعاً انا ساكته سااااي لأني عارفه السبب!
بعد شويه كدا الاء جات مع مواعيد الجبنه، امي قالت ليها حصانك جرااااي جيتي في الموعد، الاء ضحكت وقالت ليها ان شاء الله تكوني عملتيها انتي يا خالتي طولت من جبنتك، قالت ليها لا لا عملتها مها، لكن تعاليني بكرا بعملها ليك..... طبعاً لمن امي قالت ليها عملتها انا صرت وشها!..... يعني جايه بيتنا وكمان تصري لي وشها!... مش قالت لي ما عايزه اشوف وشك تاني و قطعت علاقتها بي! هسي جايه لشنو يعني؟ لا كمان براها الجايه و تصرصر في وشها التقول انا جبتها من بيتهم إجباري!
كبيت جبنه لي ولأمي وخالتي، امي قالت لي جيبي فنجان ل الاء، قلت ليها جبنتي ما ح تعجبها، خليها تجيك بكرا و تشربها، امي طوالي قامت ومشت جابت فنجان ل الاء وجات، قالت لي انا الطمسه وقلة الأدب ما بتنفع معاي، طبعاً امي اكيد شايفه تصرفي تهديد للعلاقات الأصلا بقى ماف داعي ذاتو الواحد يسعى عشان يحافظ عليها، ايوه دي اهلي لكن بعد الحصل دا كلو و ردة الفعل من الطرفين بقوا ما فارقين معاي كتير، ما متمسكه بيهم، جونا اهلا وسهلا بيهم بنضحك ونتونس معاهم، زعلوا ما بنحنسهم بالذات انا 🤚
اتوقعت الاء تاخد موقف وما تشرب الجبنه بس شربتها زي الما حصل شي وخالتي ما علقت على كلامي وما أبدت أي ردة فعل! كأننا رجعنا لطبيعتنا! لزمن كنا بنتناقر و نتناقش عادي انا وبنات خالتي بدون ما زول يزعل وبدون ما يتدخلوا امهاتنا!
براها خربت وش معانا!..... وانا ساكته بعاين لخالتي و بفكر، قلت في نفسي إذا هي عملت دا كلو بس بسبب اني قلت ما جاهزه للزواج من أحمد ولدها، ح تعمل شنو طيب لمن تعرف بقصة وائل وانو هو كان قايل اسمي الاء وبالغلط اتقدم ل بتها!.... والغريبه انو الاء ما كلمتها و خالتو سميه كمان! مع انها كانت حالفه انو وائل ما يتم عرسو من الاء! معقوله وائل اقنعها! ماف تفسير غير كدا وإلا ما كان جات لناس خالتي وقيلت معاهم زي ما قالت خالتي! معناها الأمور طيبه بيناتهم!
طبعاً نهاي ما فتحت تلفوني، اصلا ماف شي بعكر مزاجي وبجيب لي المصايب غير التلفون، هسي افتحو ألقى قلب مكسور من فلان و تراجيديا من علان و تهديد من فرتكانه!
طبعاً نهاي البت الهددتني بالصور المفبركه ما راحت من بالي وأمس كنت بفتش عليها من بين المعازم، كنت بعاين وبتفحص وجوه البنات، منو الزعلانه ومنو البتعاين لي بنظرات حقد وغضب، منو الما طبيعيه، بس ما لاحظت شي وكلهم كانوا مبسوطين وعاديات!.... إحساسها حيكون شنو لمن تعرف بخطوبتي من خليل الهددتني عشانو! هي زاتا منو و موقعها شنو من الإعراب وبأي حق وعلى أي أساس جايه تهددني عشانو!..... يا ربي خليل بعرفها!.... اكيد لكن علاقتو بيها شنو؟ وحده من حبيباتو ولا تكون معجبه من بنات أهلو وما بستبعد تكون بت خالتو زي ما بحصل في الروايات! في الدقايق الأخيره تظهر للبطل بت خاله من العدم عايشه معاهو عمرها كلو ولما يخطب أو يعرس ياداب تكتشف انها حاباهو وعايزاهو و و و...😶🌫️
_______________________
_ ما عندك بي شغله ازعل ولا اطرشق، مش هددتني بسفرك لو فتحت السيره دي مع زول!
= يا أمي قووولي كلمتيهم، ح تستفيدي شنو؟ ما هي خلاص انخطبت وحتى لو ما انخطبت بيني وبينها ما حيكون في شي تاني! قايلاهم ح يقولو ليك خلاص نبدلها ليهو!
_ انا زاتي ما دايراها ليك بعد العملتو دا لو بقت آخر بت في الدنيا دي، لكن ما دايراك تعرس بت انت ما دايرها!
=دي قسمتي وانا رضيت بيها!
_ ذنبك شنو انت؟
= و بت الناس دي ذنبها شنو؟ براي مشيت عقدت عليها! مسكينه ما جايبه اي خبر عايزاني بكل بساطه اخليها فجأه كدا بعد عقد عليها!
_ قول ليهم ما اتفقنا و طلقها!
=الموضوع ما بالبساطه دي، ح يسألوا ما اتفقنا في شنو!... وغير كدا هي ذنبها شنو أعقد عليها وقبل ما يتم العرس تطلق!
_ انت ليه ما بتفكر في نفسك! تفكيرك في بنات الناس هو الضيعك، سكت عشان ديك و عقدت عشان دي وانت ضايع بين بنات الخالات ديل!
= قال ليها متذكره يا أمي لمن راجل بتك وئام قرر يطلقها قبل ما يتم العرس؟ احساسك كان شنو وقتها؟ مشيتي ليهو واتكلمتي وبذلتي جهدك عشان ما يطلقها، ليه؟
_ لأنو ديك بتي و دي ما بتي.... دي العايز تسمعو مني صاح؟.... العريس داك غريب و انت ولدي، بعرفك زي جوع بطني، غالبني اشوفك تعرس واحده انت ما دايرها!
= دا المقلق بيك!
_ماف شي غيرك شاغل بالي ومقلق بي!
=معناها اتطمني من الناحيه دي لأني قررت أدي نفسي فرصه معاها، و دا ما شي جديد كل الناس دي بتعرس ناس ماف شي بينهم وبينها! اعتبريهو زواج صالونات
_بتقول كدا سااااي عشان تطمني
= والله انتي يا أمي 😂😂 مالك بقيتي أم حديثه ومنفتحه للدرجه دي! دا شنو دا عايزاني أعرس بعد قصة حب ولا شنو 🤣
_ لا، عايزاك بس تعرس بت من اختيارك انت ما من اختيار الناس والظروف!
= وانا اخترتها و رضيت وقلت ليك الكلام دا قبل كدا!
_ الله يكتب ليك الفيها خير و مدام خلاص انت مقتنع و راضي و جد جد داير تدي نفسك فرصه معاها الله يسعدك و يبارك ليك فيها، لكن المغصه لسه شاقاني!
_______________________
طبعاً لحد المساء ما لمست تلفوني، ياخ طلع احساس انك تقضي يومك بدون تلفون إحساس سمح شديد، بتعرف فيهو قيمة الوقت، بتكون نشيط وما بتحس بأي خمول، بتنجز شغل البيت كلو بدون طنطنه واستعجال، يومك بكون مرتب و راااايق.
اها لمن جا المساء وابوي جا،بعد اتغدينا وشربنا الشاي وعملت كل شغلي العلي وعملت الإسكين كير حقي، دخلت جوه وشلت تلفوني وقلت حان وقت البكاء، هسي إلا ما ألقى لي مصيبه في التلفون، اها فتحت الشبكه من جاتنا إشعارات الواتس قلت المصايب كبست، قلت بسم الله وفتحت الواتس، اول رسائل من رقم غريب، وفي رساله من خليل، و رسائل من الاء و رسائل من رقم غريب تاني وغاااايتو، قلت خليني أبدا بالأقل ضرر أولاً، الأرقام الغريبه ح اخليها آخر شي لأنو اكيد ما فيها خير، قلت كدي نبدأ بالخطيب اول، فتحت رسالتو كان كاتب لي:
كاتب ص الخير، طبعاً دي اختصار لصباح الخير 😒 ومرسل صور الخطوبه، قال لي جويريه قالت يرسلوهم ليك، كتبت ليهو جويريه عندها رقمي، طبعاً رسالتو دي من الصباح.
طلعت من الشات ودخلت دردشة الاء، لقيتها كاتبه لي :
_عايني انا اشتقت لونستنا الزماااان، انتي زعلانه لسه ولا خلاص،مع انو انا المفروض ازعل.
رديت ليها : خلاص
طلعت من دردشتها وقلت لحدي هنا ماشين تمام، الفات بالسيسي والجاي بالوريد الرئيسي 🤚
اول رقم غريب حسيتو ما غريب علي، لمن فتحت الشات كان مكتوب:
_ مبروك ليك يا صحبتي الزمان
لمن دخلت في معلومات الحساب، اسم المستخدم كان غفو!.... عرفتها غفران
رديت ليها :
الله يبارك فيك يا غفران.... وما زدت حرف، بس سبحان الله ما اتوقعتها تتواصل معاي تاني وتبارك لي!... من بدري مسحتها دردشتها و رقمها!
اها نجي للرقم الآخير :
فتحت الدردشه لقيت صور مفبركه لي و تحتها تهديد بنشرهم وكلام فارغ، كاتبه لي كمان ماااا قلتي ما بتعرفي خليل!
كتبت ليها :
عايني كنت ماااا بعرفو وعرفتو بسببك كتر خيرك، بعد تهديدك الأول صراحة اتشوقت وجاني فضول اتعرف على خليل البتهددي عشانو دا و يااااهو خطبتووو و طلع سااااهل جدا معقوله كان غالبك؟؟
رديت علي طوالي بإنو الصور دي ح تتنشر، قلت ليها انشريهم ساي بحب الشهره انا، قداااام يا زوله... ✌️
قرت الرساله وما ردت علي تاني.
تاني يوم كان عندي جامعه، طلعت بدري ومشيت، متفقين انا وجمانه نجي بدري زي عادتنا الزمان، عادي نجي قبل ساعه من المحاضره نشرب قهوه ومرات نفطر ونقعد نتونس تحت شجرتنا، شلنا قهوه ومشينا البنش حقنا المعتاد، قلت ليها انتي ماريا وين بقت ما بتمشي معانا!....قالت لي انسينا منها، قلت ليها اهاااا كالعاده اتشاكلتوا؟ قالت لي لا، لكن براااها اتغيرت من يوم رجعنا صحبات، هي بتزعل وبتغير لمن تشوفنا مع بعض، قلت ليها انتِ بالنسبه ليها أقرب صاحبه! قالت لي لكن هي عارفه انو انتِ أقرب صاحبه لي! قلت ليها خلاص القلب وما يهوى وقعدت اضحك، قالت لي بالمناسبه ماريا نفس غفران، غفران برضو كانت بتزعل لما تشوفنا ماشين وجاين سوا و دائما بيناتنا ونسه خاصه، هي عايزاك تكوني صحبتها هي وبس، مع انو انا وانتِ الأساس وفيما بعد هم بقوا صحباتنا! قلت ليها شفتي دي القصص الكانت بتزهجني، أي وحده بتزعل من التانيه عشان التانيه مشت مع وحده تانيه مع انو التانيه دي صحبتها برضو 😶🌫️
قالت لي وكمااان منار، منار اصلا من بدري كانت صحبة غفران لكن غفران باعتها وجات صاحبتنا نحنا ومنار جات معاها وبقت مننا لكن برضو كنت بحسها مايله اكتر شي لغفران و بتفضل انو يكونو براهم، هسي حتكون اكتر وحده مبسوطه بقطع العلاقات دي، أخيراً غفران صحبتها رجعت ليها!.... قلت ليها بالمناسبه أمس غفران رسلت لي و.... حكيت ليها بالرساله وما جبت ليها سيرة شي تاني، قالت لي شكلها عايزه ترجع المياه لمجاريها، قلت ليها على راحتها، انا مريحه عقلي من القصص دي، قالت لي والله اخير ليك مديه الدنيا شلوووت، انا والله لمن اتخاصم معاكم الدنيا بتمسخ لي و دايماً بكون شايله هم، قلت ليها عشان كدا خصاماتكم كتيره! الإنسان مرات كتيره بتللذب بالألم! في بنات كدا والله بتخاصموا مع صحباتهم في أبسط الحاجات عشان يعيشوا دور الضحايا و تراجيديا والدراما و يسمعوا اغاني حزينه و يقروا نصوص عن خيانة الصحبات وينزلوا استشارات عن كيف تتجاوزي غدر صحبتك، يعني تهويل وتكبير لمواضيع ماااا تستاهل!.... قالت لي انااااا!!.... قلت ليها بقول ليك في بناااات، بناااات، بتكلم بصوره عامه، قالت لي صح لكن أنا عمري ما خاصمت زول عشان اعيش إحساس معين واصلا ما حصل اتخيلت انو في ناس بتتبنى الألم و تتلذذب بيهو!.... قلت ليها عاااارفه والله يا جمانه وانا ما قاصداك انتي والله! اتكلمت بصوره عااامه.
ضحكت وقالت لي عارفه، اها كيف الحياه بعد الخطوبه، قلت ليها نفس الحياه قبل الخطوبه بس الفرق انو في خاتم في اصبعك، قالت لي ماااا دي الزبده زاتا!
اها بعد رجعتي البيت من الخطوبه قال ليك شنو، قلت ليها انتِ اديتيهو فرصه عشان يقول أمس قريبه ساعه بتتكلمي معاي بالتلفون، زهجتي ولد الناس..... قعدت تضحك ضحك، قالت لي بكون شماني شديد ونبذني لجدي الآخير، قلت ليها لا لا اتطمني نبذك انتِ بس.... ضحكت وقالت لي الله يطمنك، اعتذري ليهو نيابة عني 🤣🤣
بعد شويه كدا تلفوني رن، المتصله كانت جويريه، لمن رديت عليها قالت لي مها الصور دي شنو!! قلت ليها صور شنو قالت لي شوفي الفيس، شوفت بس ما لقيت شي، جمانه قالت لي في شنو؟ قلت ليها ثواني، راجعت بوستات الفيس كلو بس ما لقيت شي، قمت من مكاني واتصلت على جويريه، قلت ليها ما لقيت أي شي، قالت لي ادخلي الواتس، لمن دخلت لقيت في رسائل من رقم أمس، كانت ناشره صوري وعامله لي اسكرين شوت ك إثبات، جويريه برضو كانت مرسله لي اسكرين شوت للصور دي، قالت رسلوها ليها صحباتها!
قلت ليها دي صور مفبركه!.... قالت لي ما عندي شك لكن ليه ومنو العمل كدا؟.... قلت ليها برجع ليك.
بقيت افكر اتصرف كيف! ما ح اقول ما خاته احتمال انها تنشر الصور دي، لا خاته احتمال زي دا بس ما اتوقعت ردة فعلي تكون كدا خاصة اني ما كنت خايفه من تهديدها بس بالجد قصة انو الواحده تلقى صور شنيعه ليها في الميديا ماف اسوأ منها حتى لو الصور دي مفبركه!... أطرافي بدت ترجع ما من الخوف لأن ما عملت شي لكن من الموقف الزباله الحصل معاي، انا تتعمل لي صور خادشه للحياء زي دي و تتنشر! يعني حتى لو ما كنت مشهوره ومعروفه في الميديا بالنسبه لي جي إشاااانه وتشويه سمعه!
وانا واقفه جمانه جاتني وقالت لي بسم الله يا بت مالك!.... تلفوني رن وكان خليل طوالي رديت عليهو، قال لي في الجامعه؟ قلت ليهو ايوه، قال لي انا قريبه منها اطلعي لي لو فاضيه، قلت لجمانه برجع ليك هسي، خليل واقف لي برا وطوالي مشيت بإستعجال، قلت معناها جاي بسبب الصور دي، اكلمو اكيد ح يعرف البت دي منو دي، طلعت برا الجامعه وبقيت واقفه منتظراهو لأنو قال قريب، بعد شويه اتصل علي وقال لي وين انتي، قلت ليهو انت الوين انا جنب البوابه، كنت بتكلم معاهو وانا ماشه على الظلط لحدي ما شفت عربيتو وهو مطلع لي يدو، قفلت منو ومشيت ليهو، فتحت الباب وركبت، قال لي كيف الحال، قلت ليهو تمام، فتح يدو وقال لي الحلق، عاينت ليهو بإستغراب بس شلتو منو، بعدها الإتنين سكتنا، وهو كان بعاين لي بإستغراب، قال لي خلصتي؟ قلت ليهو لا عندي محاضره ح تبدأ بعد شويه!.... قال لي شكلها القعده عجبتك، انا ماشي عندي شغل!
طبعاً استغربت! مستحيل يكون جاي عشان يديني فردة الحلق، شكلو جاي مخصوص لموضوع الصور بس كسر الحنك، يمكن اتذكر شروطو والكلام القالو لي! وما عايز يبدي اي اهتمام بالموضوع، ما رديت عليهو، نزلت طوالي وقفلت الباب بدون أي كلام ومشيت طوالي وعيوني مليانات دموع، قلت مااااف مشكله براي بتصرف، قايلني ح اقعد اتبكى ليك واقول ليك أنقذني من الموقف!!
لمن رجعت الوقت داك المحاضره بدت بس جمانه ما دخلت كانت واقفه منتظراني، قالت لي مها في شنو، مسحت دموعي قبل تنزل وقلت ليها خلينا نلحق المحاضره اول، مشينا القاعه وهي تعاين لي ساي بس ما قادره تسأل، الأستاذ سمح لينا ندخل، المحاضره ياداب كانت بدايه، بعد زي ربع ساعه كدا خليل اتصل، عملت التلفون صامت، تاااني اتصل، لمن اتصالاتو كترت طوالي قفلت التلفون و بقيت احاول اركز مع المحاضره وطبعاً جمانه مراقبه بصمت!
بعد شويه كدا لمحت خليل بالشباك في الممر بتلفت ساي شكلو بفتش على القاعه، طوالي قمت من مكاني عشان ما يعمل لي موضوع قدام الناس اول ما قمت من البنش في زول دق الباب، الأستاذ طوال وقف شرح ومشى على الباب و انا طوالي لحقتو و زي ما اتوقعت كان خليل!.... أول ما وصلتهم خليل قال ليهو ياها الوراك دي، طوالي الأستاذ إتلفت علي وقال لي اتفضلي ورجع يواصل المحاضره، طلعت برا مع خليل، قال لي ليه ما كلمتيني؟
ربع ليهو يديني وقلت ليهو أكلمك بشنو؟؟
أحيانًا... لا نكون أشرارًا كما يرانا الآخرون، ولا أبرياء كما نقنع أنفسنا. نكون فقط أشخاصًا لم يعرفوا كيف يحبون، ولا كيف يعتذرون، ولا كيف يقولون: "أنا أتألم."
يتبع.........