رواية شتات الفصل السابع عشر 17 بقلم مها حولي
قال لي لمن طلعت لي برا جيتي لشنو؟ قلت ليهو عشان انت قلت لي اطلعي لي برا، ناسي؟
عاين لي مساااافه بعدها قال لي في زول مهددك أو مبتزك؟
سكت ساي..... إتلفت حولينا وقال لي تعالي برا، المكان ما مناسب، مشى قدامي وبقيت ماشه وراهو لحدي ما طلعنا من الجامعه، وقف جنب عربيتو وقال لي انا عرفت قبل شويه، ما رديت عليهو قال لي المفروض انك تتكلمي ولا الموضوع ما فارق معاك!
قلت ليهو ماف واحده بنشرو ليها صور زي دي وما يفرق معاها! لكن أكلمك ليه؟
قال لي و ليه ما تكلميني؟ ! نزلتي طوالي ومشيتي! قلت ليهو مش قلت لي عندك شغل؟ قال لي ما كنت عارف!.... قلت ليهو هسي عرفت 😊
سكت مسافه بعدها قال لي جاوبي، في زول مهددك؟
قلت ليهو ما تهديد انا ماف زول بهددني، دي وحده وهميه ساي، طايره ليها عايزه تخوفني!.... قال لي يعني هي بت وانتي عارفاها؟
قلت ليهو ايوه واحده من ناسك، يمكن حبيبتك القديمه!
ملامح وشو اتغيرت!.... قال لي ما تتكلمي لي بالتقصيد، قولي لي الحاصل كلو من البدايه!!
طوالي حكيت ليهو من اول مره رسلت لي فيها!.... شال مني الأرقام الإتواصلت بيهم معاي وقال لي خلي الموضوع دا علي، قلت ليهو عرفتها؟؟
قال لي ح احاول اعرف 😊
طبعاً ما صدقتو، من قلت ليهو يمكن حبيبتك القديمه ملامح وشو اتغيرت، معناها في وحده خطرت على بالو! معناها عرف منو ممكن تعمل كدا عشانو!
قال لي ارجعي واصلي باقي محاضرتك وموضوعك محلول بإذن الله، رجعت كملت باقي المحاضره وباقي محاضرات اليوم بس بالي كان مشغول، حكيت لجمانه الحصل، اتخلعت وقالت لي وليييه انتي ساكته وبارده كدا! دا ما شي ينسكت عليه، يااااا بت ديل منزلين ليك صور مفبركه على الميديا!!.... مسكت تلفوني ودخلت القروبات الإتنشرت فيها صوري بس ما لقيتها! طبعاً عرفت القروبات من الإسكرين شوت الرسلتو لي جويريه!..... ما لقيت شي! فتشت البوستات كلها بس ما لقيت شي! طبعاً هي اتنشرت بمجهول الهويه! كلمت جمانه قالت لي معناها خليل عرف البت دي وخلاها تحذفهم!....جمانه قالت لي رسلي لإدارة القروبات دي واعرفي منهم منو الزول النزل الصور دي بمجهول الهويه!
قلت ليها قايلاني ما فكرت في الحاجه دي؟......شوفي اسامي القروبات دي وهاك عايني محتواهم، القروبات المنحطه دي معموله مخصوص للقرف والتفاهات والقذاره الزي دي، كل شي هنا مسموح بيهو، قايلاهم ح يوروني يعني؟ وما بعيده هي تكون داخله بحساب وهمي عشان اسمها ذاتو ما يكون معروف لأي زول! ماف زول غير خليل ممكن يقول لي هي منو والأهم جابت صوري من وين!
طبعاً ما رجعت البيت بعد المحاضرات، قعدت في الجامعه وكنت بحكي ل جمانه، بعد شويه خليل اتصل علي، قمت من مكاني ومشيت بعيد شويه منها، قال لي الصور اتحذفت والحصل ما ح يتكرر تاني، قلت ليهو البت دي منو؟ قال لي ما تشغلي بالك بيها، قلت ليهو لااااا من حقي اعرف، جابت صوري من وين؟ يعني هي بتعرفني؟ حتى لو بتعرفني لقت صوري وين؟؟
قال لي عايني امي دي قبل كدا كان عندها صور ليك رسلتهم ليها الخاله سميه بحكم انو امي عايزه توري صورك لأخواني و باقي الأسره نظام دي البت الإخترتها ل ولدي والصور دي انتشرت بين بنات الأسره تحديدا و وحده من بنات الأهل ومع اعتذاري الشديد عملت التصرف القذر دا، انا بعتذر ليك نيابة عنها واوعدك شي زي دا ما ح يحصل تاني، عارف الإعتذار ولا شي قصاد الضرر النفسي الوقع عليك بسبب الموضوع دا، قلت ليهو شكلي ح أواجه مشاكل كتيره بسبب الإرتباط دا!.... دي زولتك ولا شنو!.... اتجاهل سؤالي وقال لي زي ما قلت ليك الحصل دا ما ح يتكرر تاني، على كدا قفل مني!
جمانه قالت لي الحاجه الكويسه انو الصور دي انتشرت في قروبات محدوده يعني اهلك ما حيكونو شافوها، قلت ليها هي متقصده تنشرهم بطريقه محدودة النطاق وإلا كان ممكن تنزلهم في كل مكان!.... جمانه قالت لي بالضبط كدا، هي نفسها شكلها كانت خايفه! لكن علاقتها شنو بخليل!.... قلت ليها اكيد حبيبتو القديمه، يمكن هو اتخطاها وهي لا! قالت لي شكلها مهووسه بيهو لدرجة انها تنزل للمستوى دا و تهدد بت بصورها وتنشرها!!
لمن رجعت البيت لقيت اخواتي بس، قلت ليهم امي وين، قالوا لي مشت لخالتو سميه!..... خفت خالتو سميه تكلمها!.... يعني كل ما اقول خلاص المواضيع دي كلها اتقفلت وكل زول بدا صفحه جديده يظهر لي الموضوع دا تاني!
اها بعد شويه امي لمن جات قالت لي انتي سميه دي مالا ما حصل قالت ليك؟
قلت ليها بري تقول لي شنو؟.... قالت لي شايفاك انتي ذاتك بقيتي ما بتمشي ليها وما بتجيبي سيرتها!
قلت ليها والله ما فاضيه، السمستر دا ضاغط وامتحاناتو قربت!..... عاينت لي بعين تشكيك نظام ما مصدقه عذري!.... طوالي غيرت الموضوع وقلت ليها الليله خالتي رقيه ما جاتك، قالت لي مشيت ليها قبيل شربت معاها الجبنه، قلت ليها خالتي عايزه تحسن علاقتها وترجع زي زمان، قالت لي المشاكل والخصامات فايدتها شنو؟
اها لمن دخلت جوه عشان اشيل تلفوني من الشحن سامعه التوأم محمد ومصطفى بتكلمو، واحد منهم قال ليهو بكرا ما نمشي المدرسه، التاني قال ليهو ليه المدرسه دي حقت ابوهم والله رجاله نمشي، دايرين يعملوا لينا شنو!.... التاني قال ليهو انا ما خايف لكن هم اكتر مننا!.... طوالي دخلت وقلت ليهم مالكم؟
قالوا لي مالنا؟
قلت ليهم الحاصل شنو في المدرسه؟ منو ديل الأكتر منكم و مالم معاكم؟
الإتنين سكتوا، عاينت لواحد منهم لقيت جبينو وارم! قلبي اتنفض، مسكت راسو وقلت ليهو الضربك منو وبقيت انادي على أمي و هو شغال لي فكيني ياخ، امي طوالي جات و وراها مآب، مرام طلعت، قلت ليها تعالي شوفي ولدك الضربو منو، امي طوالي جات واتهجمت مسكت راسو وقالت ليهو مالك يا مصطفى وقعت ولا اتشاكلت مع زول، قلت ليها اتشاكلو شكلهم و حكيت ليها بكلامهم السمعتو، امي شاكلتهم وقالت ليهم مش قلت ليكم ابعدوا من المشاكل وما تعملوا ليكم عداوه مع زول!
قلت ليها دقيقه يا أمي، اسمعي منهم اول، شوفي ضاربنو كيف بعد دا كلو تشاكليهم!.... قلت لمصطفى ياااااخ انت ما تتكلم ساكت ليه؟ الشاكلكم منو؟؟
محمد قال لي في اولاد في المدرسه كل يوم بتشاكلو معانا، مرات بنتظرونا برا المدرسه ولمن نطلع بجدعونا بالحجار ومرات بنتضارب معاهم لكن هم اكتر مننا!
طبعاً انا عفاريت الدنيا دي كلها قعدت تنطط قدامي و حسيت بوجع وقهر ما عادي! معقوله اخواني الصغار يحصل معاهم دا كلو وبشكل متكرر ونحنا ما جايبين خبر! عشان كدا بكرهو المدرسه بس ما حصل قالوا السبب!
أمي طوالي قالت ليهم مالكم ما اتكلمتوا وليه ما كلمتو ليهم الاساتذه؟
قالوا ليها كلمناهم لكن ما اشتغلوا بينا، ولمن كلمنا المشرفه مره تانيه قالت لينا انا ما عندي شغله بالمشاكل البتحصل برا المدرسه، مصطفى قال ليها ونحنا مالنا ما عندنا يدين عشان كل مره زي الشفع نكلم ليهم الأستاذه!
أمي قالت ليهو سمح يدينك ديل مالم ما جابن ليك حق! انت يا مصطفى لسانك أطول منك و دا الجايب ليك الكفاوي والبلاوي!
قلت ليهو اقسم بالله ما اخليهم، بكرا ماشه معاكم المدرسه اشوف الكلاب ديل والله اكفتهم هم و استاذتهم، امي قالت لي تكفتيهم شنو قدرك هم، بمشي انا وبتكلم مع الأستاذ، ماف داعي للفوضى دي، هم ناس زملاء في المدرسه وفي نفس الفصل ماف داعي للمشاكل دي!
قلت ليها والله قدري ما قدري دي ما مشكلتي، شفتي لو أعمارهم شهور ماااا بخليهم، والله أو المدرسه دي كانت فاتحه هسي ما كان اترددت ثانيه واحده، الله يجيب يوم بكرا دا، مصطفى قال لي والله ما تمشي معانا، قلت ليهو إلا كان تربطوني، قال لأمي اتكلمي مع بتك دي، شايفاني شافع انا! قلت ليهو اصلا انتوا شُفع!
طبعاً طنطن مساااافه واعترض قال ما امشي مدرستهم، عامل فيها الأسد النتر وشايفها شييينه في حقو كونو انا أو امي نمشي المدرسه عشان الموضوع دا، لكن أنا مُصره، ح امشي كان يابى كان يرضى وبكرا ح يلقاني قدامو في المدرسه.
اها بعد شويه مرام جات، مآب طوالي حكت ليها، جاتنا من الهول مشعلله و بتصفق صفيقة الردحي هيييييي دا منو الكلب ولد الكلب الفلقك يا مصطفى، امي قالت ليها انتي كمان ما تكوركي فينا، طبعاً مرام كانت بتتكلم بصوت عالي وبتصفق كمان و مولعه نااار، قلت ليها اسكتي بكرا ماشين معاهم المدرسه، طواااالي مصطفى قال لي والله ما تمشي وكان مشيتي انا ما ماشي!..... طبعاً ما كترت معاهو الكلام، مرام قالت شوووفو بكرا كما رشيت المدرسه دي بجاز و حرقتها، مصطفى قال ليها عليك الله انتي كمان اختينا هسي لو قلت ليك اعمل لينا شاي ما بتعمليهو ماف زول في البيت دا شغال بينا هسي جاين تعملو لي وجع راسي!
طبعاً كلامو هجمني!... الكلام دا ما انقال ساي، يمكن التوأم جد جد حاسين انو ماف زول شغال بيهم، مهما يحصل معاهم بسكتوا ولو اتكلموا امي بتشاكلهم وبترمي اللوم عليهم!
مرام قالت ليهو اي ما بعمل ليكم شاي لكن بكرا المدرسه دي ح أحرقها ح أحرقها 🤚
اها بليل كنت في التيك توك، مركبه سماعه وبشوف في الفيديوهات، لحدي ما ظهر لي فيديو لخليل، الفيديو ظهر لي لأن قبل كدا دخلت حسابو واتفرجت كتييير على صورو والفيديوهات البنزلها ف خوارزمية التيك توك فهمت اني مهتمه بالحساب دا!
طبعاً كان مصور الفيديو من داخل المكتب، كان بتكلم كلام كدا عملي، عن ترتيب الوقت والأعمال و السعي، انا ما هماني الكلام، سرحت في نبرة الصوت وفي شكلو و في لبسو و ترتيبو لنفسو ومكتبو!.... حتى طريقة جلوسو، بتديك احساس انو زول واصل ابعد درجات الثقه بالنفس وعندو كاريزما كمان، الفيديو دا حضرتو أكتر من 3 مرات وفي كل مره بحس كأني بحضرو اول مره! بقيت اعاين للخاتم الفي اصبعي وللشخص الفي الفيديو دا يلي هو خليل ف بقيت اسأل نفسي سؤال انا عارفه اجابتو : معقوله انا مرتبطه بالإنسان دا!؟ معقوله الخاتم الفي يدي دا من الإنسان الفي الفيديو دا!.... ابتسمت وغمرتني السعاده، لكن اتذكرت كلامو و شروطو برضو كنت مبسوووطه لأنو دي شروط ما عندها اي فايده أو معنى، يعني زول بقول ليك ح نعيش زي الأزواج و يكون عندنا أطفال عادي.... اها يعني تاني خلى شنو؟ 😂 دا كلو قصاد ما انق ليهو واقول ليهو ماشي وين وجاي من وين؟ عاااادي دا كلام اي زوج بقولو لزوجتو، الرجال دي كلهم ما بحبو النقه والاسئله الكتيره، بس اصبر وشوف بكرا يا خليل يا بتاع بنكك لو ما جيت براك وبقيت تقول لي مشيت هناك و جاي من هناك، براك ح تجي تحكي لي تفاصيل يومك و تدخل في تفاصيلي و تدخلني في تفاصيلك!.... ضحكت اكتر لمن اتذكرت اني مسجلاهو ب بنكك، خليل بنكك، الإسم ظابط والله 🤣
قمت قعدت وحسيت اني جد جد عايزه أظهر على تيك توك، عايزه يكون عندي محتوى، جوه عقلي في حوارات وافكاري كتيره محتاجه اني اترجمها على شكل فيديوهات، كتير بتراودني الأفكار دي، نفسي اتحرر من كل القيود، نفسي اعمل كل حاجه بتخطر على بالي، بس هسي لو نزلت على الميديا اهلي ح يقومو الدنيا وما يقعدوها! بالنسبه لأمي دي قلة أدب ساي، بس انا لو زوله عندي محتوى، ح أظهر بشكل لائق، عارفه حدودي و محترماها وين المشكله؟ هو اي بت ظهرت في الميديا معناها ما عندها وليان أو معناها بحق لأي زول يتكلم فيها بالعاطل ويشكك في أخلاقها! يعني انا دي انا نفسي الفي الواقع بلبسي وطباعي ح أظهر في الميديا، يعني انتوا شايفيني في الواقع، البمنع شنو تشوفوني في الميديا؟؟.... مرات بقعد اتخيل بقول هسي لو الواحد ما اتولد سوداني أو على الأقل ما اتولد في مجتمع غبي ومتخلف وتافه زي دا شكل حياتو كانت حتكون كيف؟... انا بحترم جدا الحريات البتكون في حدود، بحترم جدا المجتمعات الما بتلقي اي نبذ أو اساءه لأي شخص لمجرد ظهورو في الميديا! الحاجه دي بشوفها عندي الأجانب! شوفو مع انو نحنا المسلمين وهم الكفار بس هم احسن مننا، ما اظن التلفظ والتفاهه والقذاره العندنا في الميديا السودانيه عند ناس غيرنا! ونهااااي ما ننكر انو التفاهات دي مرغوبه! تلقي الناس ماسكين وحده يردموا فيها صباح و مساء ويتلفظوا ليها وهم اكتر ناس متابعنها وفي الخاص مترقدين ليها!.... يعني لو ما مجتمعنا دا مجتمع تافه وقذر كان ح تلقى حسابات المحتويات الذباله فيها ملايين المتابعين؟
انا دا ما غايظني اي زول بطريقو بس بالجد الغايظني شديد انو أهلنا بشوفو التفاهات دي وبحكموا على كل الميديا والناس الفيها بالسوء وبشوفو انو اي بت تطلع في الميديا معناها ما نافعه!
عشان كدا كان نفسي أعرس من الأسر الواعيه، البتحب النجاح وبتعشق الطموح و بتدعم المرأه والحاجه دي متمثله في أسرة خليل!
يعني هسي اختو الأكبر من جويريه مثلاً متزوجه وست بيت عندها قناة على اليوتيوب والتيك توك بتقدم فيها محتوى عن الطبخ، محترمه نفسها جدا ولبسها لااااائق ومحتشم لأنو هم اصلا محترمين نفسهم وبخافوا على سمعتهم اكتر من خوفهم من الناس! لكن دا ما معناه انهم يقفلوا ابوابهم عليهم ويكبتوا حريتهم!
اها سرحت في عالمي الوردي، كنت بعاين للسقف، مديت يدي اللابسه فيها الخاتم و صورتها وانا رافعاها فوق للسقف، الصوره عجبتني، كتبت معاها كلام كدا ونزلتها على التيك توك، ختيت التلفون ومشيت عملت لي اندومي وكباية شاي، جيت راجعه الغرفه وانا شايله كباية الشاي، لمن فتحت التيك توك لقيت في رسائل على صندوق الوارد، اتخييييلوا لمن فتحت الرساله لقيتها من خليل!
قلبي نطط من الفرح، ابتسمت بالجنبه، قلت هو عرف كيف انو دا حسابي لو لقاهو كيف؟ معقوله يكون من بدري بحث عن حسابي وبقى مراقبني ولا يمكن عشان انا حارسه حسابو التيك توك السواااط قال ليهو فلانه دي شاهدت فيديوهات ليك!
كان كاتب لي :
اليد دي معناها شنو، رديت عليهو وقلت ليهو كيف يعني معناها شنو؟
قال لي الناس الطبيعيه يا اما بتظهر بشكل كااامل على تيك توك أو ما بتظهر خلاص، لكن حكاية اليدين والعيون و جزمه وطرف الطرحه دي معناها شنو؟ والله انتوا البنات عليكم جنس حركات واستهبال! 😂
قلت ليهو رووووق نفسك قاعده اتدرب عشان أظهر كلي على الميديا، الليله يد بكرا كراع بعد بكرا عيون وبعيديهو رأس لمن أظهر كاااامله 🙂
قال لي خلاص قررت تلحقي قطر الترندات؟ قلت ليهو اي زول يظهر في الميديا معناها بفتش للترند؟
قال لي ايوه، ما دا السبب البخلي الناس تستمر في النشر!
قلت ليهو انا ما بهمني شديد، وقت أقرر أظهر ح أظهر وما بهمني أي ترند 🤚
قال لي عايزه تظهري عشان شنو، قلت ليهو وما أظهر عشان شنو؟
قال لي اعلاميه انتي ولا رئيسة وزراء ولا سفيره؟ قلت ليهو وانت واحد من ديل؟ هسي اختك جوري دي مش ظااااهره في الميديا؟ وزيره هي ولا اعلاميه ولا سفيره؟
قال لي راجلها ما عندو مانع، هم حرين!.... قلت ليهو خالتو سميره برضو بتظهر على التلفزيون! قال لي برضو راجلها ما منعها وبعدين هي عضو في حقوق المرأه، يعني طبيعة شغلها يتفرض عليها انها تظهر في الميديا!!
قلت ليهو انا كمان طموحاتي ومحتواي الح اقدمو ح يفرض علي اكون ظااااهره في الميديا 😊
قال لي ياااا سلام يعني اليد دي محتوى ليك؟.... قلت ليهو هسي انا قلت ليك دا المحتوى، وبعدين انت مالك مش قلت لا أتدخل فيك لا تدخل فيني والحاله لسه ما عرسنا!!
قال لي ما اتدخلت فيك، انا بس بتناقش معاك، قلت ليهو خلاص انا دا حدي في النقاش وما بحب زول يتدخل في الحاجات البتخصني، انا صاحبة قراري🤚
طبعاً تاني ما رد علي بس عمل متابعه لحسابي ف قبلت طلب المتابعه وبقى صديق على تيك توك.
تاني يوم جهزت نفسي عشان اول شي امشي المدرسه مع امي ومنها امشي الجامعه، امي حلفت زول يمشي معاها ماف، قالت لي براي بمشي بتكلم مع المدير ومشرفة الفصل لو ما حلوا الموضوع دا لي تصرف تاني معاهم، قلت ليها يا أمي نسكت ليهم لمتين؟ محمد ومصطفى ديل يوم واحد ما جوا شكوا ليك عشان عارفاك بااااارده وما بتاخدي موقف وبعد دا كلو ح تلوميهم هم وتشاكليهم عشان كدا قنعانيييين وما قالوا لأي زول!
طبعاً هنا امي سكتت واتفاجأت بكلامي وانا ذاتي اتفاجأت لاني ما كنت مخططه اقول ليها كدا، بس بالجد كنت زعلانه!
قالت لي بنهره ما بتمشي معاي شبر، امشي جامعتك ولو ما ماشه اقعدي لكن المدرسه ما بتمشي، قالت كدا وطوالي جهزت نفسها وطلعت عشان تمشي المدرسه، طبعاً التوأم مشوا بدري شديد عشان ماف زول يمشي معاهم، قايلين الناس ما عندهم رجلين يعني!
مرام نادت مآب وقالت ليها ارح انتي كمان اتأخرنا!.... مرام إتلفتت علي لقتني لسه واقفه متضايقه، قالت لي لو امي مشت أو لا انا الأولاد ديل حاااالفه عليهم، الليله إلا ما يطلعوا من المدرسه، مش الأستاذ قال ما عندو شغله بالمشاكل البتحصل برا المدرسه!؟ يلااااا بس انا الليله بآخد للتوأم حقهم برا المدرسه، قلت ليها لكن انتي عارفه هم منو؟ قالت لي ايوه محمد أمس قال لي لمن قعدت معاهو وسألتو عنهم، أما اب راس ماكن داك حلف ما يتكلم، قلت ليها بس دي الصفه الح نقدر تاني نفرز بيها بين محمد ومصطفى، مصطفى عنيد وبتاع ركوب راس، قالت لي المهم الشفع ديلك يصبروا لي 🤌
المهم على كدا انا طلعت ومشيت الجامعه، جمانه كان لسه ما جات، اتصلت عليها قالت قريبه، بعد قفلت منها فجأه جات غفران قعدت قصادي وكانت مربعه يدينها، قلت ليها صباح الخير.... خير!
ما ردت علي، طبعاً انا ما استغربت من جيتها دي لأنها متأكده وعارفه انو هي في الآخر براها ح تجيني راجع، غفران لمن تتخاصم معاي بتفور و تدفق و بتتغاظ شديد وبتحاول تقهر الزول الهي متخاصمه معاهو وتحاول تغيظو بس انا عمري ما اتغظت منها وما كنت ببدي اي اهتمام أو ردة فعل لمطاعناتها وكلامها البترميهو لي و دا الكان بقهرها و بستنزفها وبخليها تجي راجعه براها! انا مخليه ليها البساط أحمدي ليه؟ لأنو والله ما بهمني، صح اعتبرتها صديقه و بيناتنا مواقف كتيره كويسه بس هي اسوأ صفه فيها انها لمن تتخاصم معاك بتنسى العشره و بتتحول لحاجه تانيه! بتكون بس عايزه الناس يركزو معاهو و يغيرو و يتغاظوا منها والحاجات دي ماااا لقتها مني وما ح تلقاها 🤚
لمن ما اتكلمت اشتغلت بتلفوني وما ركزت معاها، بعد شويه قالت لي ما عزمتيني خطوبتك!... قلت ليها لأنو لو كان عزمتك ما ح تجي ف اختصرت عليك وعلي!
قالت لي انتِ اصلا ما عايزاني اجي، اكتفيتي ب جمانه وخلاص 😊
ختيت تلفوني على جنب وقلت ليها انتِ مشكلتك اني ما عزمتك ولا مشكلتك جمانه؟
قالت لي ولاااا وحده، قلت ليها مشكلتك يا غفران انك ما عارفه نفسك عايزه شنو! انتي ما قادره تفهمي نفسك!
قالت لي صدقيني انتي ما قادره تفهمي نفسك، مثلاً دائماً كنتِ بتقولي انتوا عندي واحد، كلكم صحباتي بس في الحقيقه انتي بتفضلي جمانه علينا كلنا، الواحد مهما عمل ليك ما بتقدريهو وجمانه دي لو عملت ليك ابسط شي تقعدي تشكري فيها كأنها كتبت الكون دا كلو بإسمك! قلتي علي غيوره وبتاعة مشاكل ومغارز؟! ايوه انا كدا، لأني انسان، بتغاظ من الإستهتار و بنقهر من التجاهل المتعمد خاصة لزول انا اتعاملت معاهو بطريقه كويسه!
طبعاً انا كلامها حيرني!.... انا بفضل جمانه عليهم؟..... واصلت وقالت لي انا ما عندي مشكله اكون غلط بس انتي اكبر مشاكلك انك تكوني غلط! بتشوفي عيوب كل الناس بس ما بتشوفي عيوبك انتي! و دا المخليك تتكبري على الناس و تحسي انك مثاليه!
قلت ليها انا ما مثاليه ولاااا حصل كنت مثاليه وما بحب اكون مثاليه، انا حقيقيه، تصرف ما عجبني بقول نا عجبني، انسان زعجني يا كلمتو يا مشيت خليتو، انتِ برضو كان ممكن تعملي كدا لمن لقيتيني كلي عيوب وما بنفع معاك!..... قالت لي انا بعد دا كلو عندي تقدير للعلاقات، عارفه انو الناس بتختلف، ما نفس التفكير وما نفس الطباع عشان كدا ماف تصرف أو انطباع مخالف لإنطباعي بخليني اقطع علاقتي بالزول المختلف عني!.... ما بقطع علاقتي بصديقه لي عشان طباعها مختلف عني!..... قلت ليها انتي البتقولي كدا؟ غفران انتي لو زعلتي من زول ساي تكرهيهو حياتو وتحاولي تزعجيهو بأي طريقه! قالت لي ايوه لكن ما بقطع علاقتي بيهو وانا عارفه في قرارة نفسي انو دي فترة زعل وبتروح والناس ممكن ترجع زي ما كانت، قلت ليها لو بالجد بتفكري كدا كان جيتي و واجهتيني بعيوبي القلتي عنها، قايله يعني المطاعنه بالكلام والمضايقه بعد الخصام دليل محبه؟؟
قالت لي انتي غياظه، قلت ليها ما اكتر منك!..... بعدها الإتنين سكتنا، هي مره كانت تعاين لي ومره تلف وشها مني زي الزول العايز يقول حاجه لكن متردد، بعد شويه مدت لي يدها بتردد وقالت لي صافيه؟
قلت ليها عرفتي ليه كنت بقول عليك شافعه وكمان شافعه دلوعه؟.... مديت ليها يدي وقلت ليها اصلا ما زعلت منك، قالت لي زعلتي لكن ما خليتي الموضوع يكبر جواك، عكسي انا!
بعد شويه جمانه جات، اتفاجأت لمن لقتنا قاعدين مع بعض، غفران قالت ليها رجعت المياه لمجاريها، جمانه قعدت وقالت لي الزحمه كانت مبالغه، قلت ليها انتِ ليه ما بتجي بعربية امك؟ قالت لي والله بخاف من السواقه وما بقدر اخلي امي كل يوم توصلني، لكن برضو المواصلات في سعي ومتعه 😂
قلت ليها براك بتحبي التعب،زمان كنت بتجي بترحيل، قالت لي خليتو، عايزه اجرب المعافره في المواصلات دي 😂
عاينت للساعه في التلفون وقلت ليهم زمن المحاضره جا، ارح سرررررعه براكم عارفين الأستاذ دا!
قمت واتحركت قدامهم وجمانه جات وبقت يميني، لمن إتلفت وراي لقيت غفران نزلت على الأرض بتربط في جزمته، قلت لجمانه انتظري وانتظرناها، الشي الغريب انها لمن رفعت راسها ولقتنا واقفين منتظرنها استغربت! واستغرابها دا خلاني اسأل لنفسي للدرجه دي هي حاسه اني مع جمانه ما بنتبه ليها أو ما بدي وجودها اهميه! حسيت في سرور وبهجه ظهرو في ملامح وشها، جات وقالت لينا يلاااا وكانت مبسوطه، دخلنا القاعه وقعدنا جنب بعض.
لمن رجعت البيت مآب قالت لي ماااا شفتي امي شالت الأولاد واتخيلي لقتهم كبار أكبر من محمد ومصطفى وعندهم اخوان في الثانوي كمان كانوا بشاكلوا معاهم محمد ومصطفى نهاية اليوم!... قلت ليها كلمتي ليهم الأستاذ يعني ولا الحصل شنو؟ مرام قالت لي استاذ شنو، ياااازوله لمينا فيهم في الشارع براااانا، اتخيلي كانو منتظرين محمد ومصطفى يطلعو من المدرسه، قلت ليها يعني انتوا من قبيل كنتوا منتظرنهم جنب المدرسه، مرام قالت لي لا، امي قبيل مشت اتكلمت مع مشرفة الفصل نادتهم كلهم و اتكلمت معاهم و حذرتهم وباقي العواره ديك واصلا هم مستحيل يشتغلوا بكلامها والدليل انو هم واخوانهم بتاعين الثانوي نهاية اليوم كانو منتظرين ديل جنب المدرسه!.... أمي جات راجعه البيت، قعدت فتره وتاني رجعت المدرسه عشان تشوف محمد ومصطفى لقتنا انا و لمى و مآب ومعانا صحباتنا بنتضارب مع الأولاد، والله دقيناهم دق العيش، كسرنا فروع الشجر و قطعناهو في جلدهم، والله جلدناهم جلده 🤣
قلت ليها حيييييينا ياريتني كنت معاكم، امي قالت للتوأم اسمعوا هنا تاني البغلط عليكم ما تسكتوا ليهو نهاي وتعالوا كلموني، مرام قالت ليهم لا لا كلمونا نحنا ديل بس وعكاكيزنا جاااهزه!
المهم بعد فطرت كنت سامعه امي بتشكي من رجلينها، شلت شوية زيت ومشيت قعدت جنبها قلت ليها مديهم امسدهم ليك، قالت لي سمح، رقدت وبقيت اعمل ليها زيت ومساج على رجلينها، قالت لي اكلتي، قلت ليها اي، قالت لي قبل شويه كدا كنت بتكلم مع سميره، قلت ليها هي اتصلت عليك ولا انتي اتصلتي عليها؟ قالت لي هي الإتصلت تسلم علينا، قالت لي انتي ما قاعده تتصلي عليهم؟
طبعاً حسيت كلمة عليهم دي كأنها عايز تقول لي خليل ما بتصل عليك او ما قاعدين تسألو عن أحوال وأسر بعض!
قلت ليها مرات مرات جويريه بترسل لي وبرسل ليها.... طبعاً ما قلت ليها شي تاني، نهاي ما بقدر اقول ليها مثلاً خليل اتصل علي أو رسل لي، لو خالتو سميه كنت بحكي ليها من الألف للياء، حتى قصة الصور دي كنت ح احكيها ليها.
المهم بعدها عدت الأيام وكنت مستقره، لا شفت فيها وائل لا خالتو سميه لا رسائل لا اتصالات من أحمد، خالتي و بناتها بجونا طوالي و الاء بقت على تواصل معاي و بتجي بيتنا بس انا ما حصل مشيت بيتهم تاني، ما عشان زعلانه أو في شي في خاطري لا عشان بقيت ما فاضيه 😂
بجي من الجامعه تعبانه برتاح شويه وطوالي بفتح الميديا اشوف خليل بنكك بعمل في شنو، ولو لقيتو ما منزل شي جديد براجع القديم ماف مشكله، التيك توك لو كان بتكلم كان ح يقول لي عليك الله خلي حساب ولد الناس في حالو وشوفي ليك شي تاني غيرو!..... طبعاً علاقتي مع جويريه كانت كويسه شديد، اكتر وحده متواصله معاي من اخوات خليل، هي أكبر مني بسنتين فقط و خريجه دي آخر سنه ليها،أما خليل ماف مكالمات ورسائل كتيره بينا بس بكون مراقباهو بس طولت ما سمعت صوتو إلا من الفيديوهات، طبعاً كنت بحاول اعرف منها البت الهددتني ديك منو بس قالت ما عارفه منو وانا ما صدقتها لأنو خليل لمن اعتذر قال وحده من بنات أهلهم، بس جويريه ما قالت كدا قالت ما عارفه، قلت معقوله خليل ما يكون قال ليها دي منو من بنات أهلهم؟ ولا هي بس ما عايزه تقول لي انو العملت العمله دي من بنات أهلي؟!
المهم يوم كنت بتكلم مع جويريه، قلت ليها الأسبوع الجاي ح انزل امتحانات الفاينل، ايام البكى والإكتئاب جايه، قالت لي يا حليلك والله ربنا يوفقك، قلت ليها دي أكتر ايام بكون فيها ما انا، يعني لو لقيتيني متغيره عليك أعذريني لأنو حتى نفسي ما بكون طايقاها 😂
قالت لي عذرك معاك يا زوله وربنا يعينك ويوفقك لكن احسن زاتو عشان تخلصي وتعملو لينا العرس دا بسرعه وتفرحونا، قلت ليها واها انتي يا سمحه متين؟
قالت لي والله انا لسه سكتي عطش، قلت ليها ياااا كذابه، قالت لي والله جد، قلت ليها خلاص ح اعمل نفسي مصدقاك ومصدقه انو ماف زول في حياتك.
قالت لي خلاص على راحتك لو ما عايزه تصدقي😂
قلت ليها المهم يا زوله نعست ماشه انوم اقطعي وشك، قالت لي ماشه تنومي ولا عايزه تتكلمي مع خليل 😁
قلت ليها اتكلم معاهو شنو والله عايزه انوم، مالي ومال السهر والكلام الكتير، قالت لي ما ضروري مكالمات، يمكن رسائل على الواتس، قلت ليها يااااا بت عليك الله انا يومي ما لاحق لراحتي، مالي قال أزيد على نفسي الهموم والفتر،انوم بدري عشان أصحى بدري!
سكتت مساااافه بعدها قالت لي انتي يا مها خليل دا ما قاعد يتصل عليك او يرسل ليك؟.... قلت ليها الفاضي منو عليك الله، قالت لي جاااوبيني، قلت ليها ليه السؤال؟
قالت لي سااااي بس، قلت ليها مرات مرات،قالت لي اليوم اتصل أو رسل؟ قلت ليها لا، قالت لي أمس طيب؟ قلت ليها لا، قالت لي اول امس، قلت ليها برضو لا!
قالت لي خايفه اسأل اكتر وانصدم، دي ما اسمها مرات مرات دي اسمها ماف تواصل اصلا، طيب انتي ليه ما بترسلي ليهو أو تتصلي؟
ما رديت عليها، قالت لي مهويه اسمعيها مني، خليل اخوي دا والله كويس ومستحيل تلقي راجل زيو وما بقول ليك كدا عشان هو اخوي، صدقيني هو راجل بألف راجل بس مشكلتو ماااااا بعرف يعبر أو يبادر! هو ما بتكلم لكن افعالو خير دليل!.... قلت ليها لكن أنا ما حسيت انو هو عندو مشكله في التعبير! اخوك دا والله ماف شي بغلبو و العايزو بسويهو لكن ظاهر انو مستنزف، شكلو في وحده ادتو شاكوش 😂
قلت كدا وضحكت بس هي سكتت، قلت ليها معناها كلامي صاح، انتي ليه ساكته كأنها حاجه مفاجئه! يعني دي ما حاجه جديده كتار بكونو حبو اكتر من بت وفي النهايه يا عرسها يا عرس غيرها!.... برضو ما ردت، قلت ليها حسستيني انو الموضوع أخطر واكبر من كدا، ما يكون بس معرس ومرتو خانتو 😂😁
قالت لي امي بتناديني، تصبحي على خير وقفلت!
رجعت الفيس وبقيت اشوف في صورو القديمه و منشوراتو، بعد شويه جاني إشعار رسالة واتس، لمن دخلت الواتس لقيتها من خليل، بإستعجال فتحتها لقيتو كاتب:
من يوم عرفتك ولحد اللحظه دي وانا على يقين تاني اني ما حبيت وما ح احب زول بالعمق دا وما ح احس بالإنتماء مع غيرك، خليك على يقين انو ماف عندي أعز منك والبحسو معاك ما بحسو مع غيرك! 🩷
قلبي بقى يدق بسرعه، دا خليل! حاسه بشنو، ليه كتب لي كدا، تكون جويريه كلمتو!
قريت كلامو اكتر من تلات مرات وابتسامتي للضرس الآخير، ما عرفت أرد اقول شنو، الكلام اربكني و وترني بس ما حلوه اخلي الرساله كدا وما اتفاعل معاها، اول ما لمست الكيبورد وكنت ح اكتب الرساله اتحذفت!!
"لا نحتاج سوى الرأفة ببعضنا البعض
الرأفةُ في الحديث
وفي الفعل
في التمسُّك، وحتى في التخلِّي
فمن لا يرحم لا يُرحم"
يتبع......