رواية جزيرة غراب الوادي الفصل السادس عشر 16 بقلم سمارة آل حربي


رواية جزيرة غراب الوادي الفصل السادس عشر 16 بقلم سمارة آل حربي



صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ

«لم أكن أبحث عن خوض حربٍ جديدة لكني وجدتُ في حمايتكِ معركتي.. وقفتُ بينكِ وبين بطش الجميع لأقولها علناً: أُريدكِ زوجةً وحبيبة.» 

(​حصار القلوب والقدر) 

﷽

أكمل جلال حديثه هذه المرة بطريقة مختلفة وعلى غير المعتاد:
جلال (بنبرة يغلفها الدفء): رحتي شغلك ولا لسه رايحة؟!

موج (تبسمت بخجل وهي تضبط أنفاسها): له أهه طالعة دلوك .. خير فيه حاجة ولا إيه؟!

سكت جلال لثوانٍ يستمتع بصدى صوتها الذي أزاح عن صدره جبل الضيق وحسرة الذنب ثم تنهد بتعب وقال:
جلال: مفيش.. حبيت أطمن بس.. ماشي مع السلامة.

وقبل أن يغلق أسرعت موج بسؤال:
موج: مالك يا جلال بيه أنت زين؟!

جلال (ابتسم بتهكم وهدوء وهو يغمض عينيه): زين الحمدلله.. أنام أنا بقى عشان صاحي من عشية.

موج (بلهفة وعفوية لم تستطع كبحها): نوم العوافـ.. اااا قصدي مع السلامة!

أغلق جلال المكالمة وهو يبتسم برضا وضغط على الهاتف بيده ثم وضعه بجانبه وسرعان ما غرق في نومٍ عميق كان بأشد الحاجة إليه ليفرّ من واقعٍ أثقل كاهله.

بينما جلست موج على طرف فراشها حاملة حقيبتها بتفكير سعيد وتيهٍ عذب من تلك المكالمة الغريبة محدثة نفسها:

موج: مش بيدي أوامر المرة دي ولا بيقول الكلام ويقفل غريب.. حتى بيقول لي ما نمتش وبيحكي لي عن حاله حتى لو كلمتين بس برضه مش فاهمة! 
ليه هو سكت وأبوي سكت؟!

ظلت قليلاً مع أفكارها الشاردة بالكامل في مكالمة جلال وصوته المنهك.. كانت تتساءل في سرها عن سر نسيم الحنان المفاجئ الذي أطل منه وعن أسباب حمله لكل هذا الهم في آنٍ واحد.

ثم وقفت مغادرة إلى العمل ووجهها يشع سعادةً ونوراً يغطي على كل غموض العالم من حولها.
ـــــــــــــــــــــــــــــــ**

مرّ اليوم بصمتٍ وثقل حتى حلّ المساء.
وأثناء عودة يونس و وليد من عملهما كان الجميع يجلسون في ساحة السرايا.
دلف وليد أولاً بخطوات واثقة وخلفه يونس بهدوئه المعتاد.

جلس وليد وعينان تلمعان بلؤم ومكر ينظر نحو يونس وهو يقترب ثم وجه حديثه لوالده قائلاً:

وليد: يا بوي.. يا ريت تكلم يونس وتفهمه إن فيه فرق بينا وبين الأهالي والحرس!

جلس يونس أيضا ورمقه بنظرة هادئة دون أن ينطق بكلمة.

تنفس غنام بضيق وقال بنبرة حازمة:
غنام: زين مرة جلال وشاهين ومرة أنتو. 

وليد (بتمسكن خبيث): له.. أنا مهعملش مشاكل أنا بشكيلك بس!

غنام: وعمل إيه يونس؟!

وليد: كل ما أكلم حد في الشغل والتجار اللي بتستلم بضاعتها مننا يقل مني قدامهم!

يونس (برفعة حاجب وجمود): أنا قليت منك؟!

وليد: اه وكمان بتساوينا بالعمال وده ما ينفعش.. بلاها شغل التواضع ده عشان هيخليهم يتنططوا علينا!

غنام (بقلة صبر): أيوه يعني بتلف في الكلام ليه إيه اللي حصل بالضبط؟!

وليد: واحد من التجار استلم بضاعته ودفع نص التمن وقال الباقي لآخر الأسبوع.. لما شديت في الكلام معاه وقلت له يبقى خد نص بضاعتك 
اتدخل جناب البيه وخلي العمال يحملوا له بقية كاملة!

التفت غنام بنظرة صارمة نحو يونس وسأله بنبرة حادة:
غنام: ليه يا يونس؟ هو فيه تاجر ما معاهوش حق البضاعة؟ أمال بيبيع ويكسب كيف؟ 
مش كفاية بنجيبوها لغاية عندهم من برة الجزيرة؟!

يونس: يا بوي.. ده تاجر بقالة يعني أكل وشرب وقال إن أغلب شغله بيطلع شِكك لآخر الشهر لبين ما الناس تقبض والمرتبات تنزل واللي بياخد معاش يسد المديونية.. ما يجراش حاجة لما نصبر عليه أسبوع!

وليد (بتدخل وانحطاط): والناس بتطفح ليه لما معهاش تدفع؟!

يونس (بنظرة عتاب ونخوة): والله المفروض دي شغلتنا الناس اللي دخلهم قليل أو ما عندهمش حد يصرف عليهم 
نعملوا لهم معاشات أو حتى نصرفوا لهم خزين على حسابنا.. إحنا بنشتغل ونكسب من وراهم كتير إيه المشكلة لما ندعم المحتاج؟!

غنام (بتهكم وسخرية): والله عال أصرف عليهم من جيبي يعني؟ ما أطبخ لهم أحسن ولا أفتح تكية على رأس الجزيرة؟!

يونس: يا بوي مش بقول كده.. نساعد أو لو مش هنساعد نصبر عليهم إحنا بنكسب من خيرهم وعرقهم.

غنام: كل واحد بياخد حقه وما بظلمش حد.. إن نخيت ورخيت.. الناس عينها فارغة هتلاقي قدام السرايا دي نص الجزيرة جاية عاوزه مساعدة روق دماغك يا يونس.

خضرة (بتدخل وسمّ يقطر من لسانها): يونس زي أخوه.. حنين وقلبه رهيف اللي زيه ملوش شغل مع الناس شوف له شغل بعيد عن البضايع.. شغله في المواشي هيتفاهم معاهم أحسن!

هنا ثار غضب غنام وخرج عن صمته بصياح وهدر هزّ أركان السرايا:
غنام: اكتمي لأقوم أنشك عيار في زورك قلت وهقول.. إلا يونس المواشي اللي يعرف يتفاهم معاهم اللي خلفك. 

تعجب الجميع وانعقدت ألسنتهم من هجوم غنام العنيف والصارم على خضرة؛ فهو طالما دافع عن يونس بهدوء لكن إهانت خضرة ليونس هذه المرة أثارت غضبه وجنونه!

خضرة (بصدمة ودموع غيظ): اخص عليك يا غنام بتهزقني قدام عيالك وحريمهم وتغلط في أبوي؟!

غنام (بنبرة قاطعة تحذر الجميع): وفي عيلتك بالنفر يونس أوعاكي تكلمية نص كلمة!

وقفت خضرة بحرجٍ قاتل وغضبٍ عارم ودلفت إلى الداخل مسرعة وهي تغلي من القهر تحت أنظار رحاب التي دارت ابتسامة تشفٍّ خبيثة خلف يدها!

بينما التفت غنام نحو يونس قائلاً بنبرة قاطعة:
غنام: انتبه لشغلك يا يونس وخليه ماشي كيف ما هو ماشي التجار يتصرفوا ويسدوا دي حيل وحجج فاضية.. عشان غيره ما يقلدش وشغلك يخرب سامع؟!

يونس (بهدوء وامتثال): حاضر يا بوي.

قام يونس ودلف إلى الداخل ليبدّل ثيابه ويتناول عشائه. 
في تلك اللحظة التفت غنام إلى وليد ونظراته ترميه باللوم والزجر:
غنام: قلت لك كتير بطّلوا هرج ورغي.. فيه حاجة في الشغل ما تتكلمش قدام الحريم وكل واحدة تقول رأيها.. فيه وقت للكلام!

نظر وليد نحو زوجته رحاب بحرجٍ شديد بعد هذا التقريع طثم قال محاولاً التبرير:
وليد: يا بوي مش قصدي بس...

غنام (مقاطعاً بصرامة): ما بسش بعد كده فيه حاجة، تتكلم معاي بعيد عن قعدة أهل البيت!

وليد: حاضر يا بوي.

التفت غنام إلى كريمة وسألها بفضول:
غنام: حكمت روحت؟!

كريمة: اه مشت من المغرب.

غنام: قولي للبت التانية دي تجهز لي شيشة.

كريمة: عيدة كمان روحت.

غنام (بعقد حاجبيها): وغارت ليه دي كمان؟!

كريمة: كانت تعبانة شوية وعمتي نجاة مشتها.. هقوم أنا أعملك الشيشة وأعشي يونس.

وقفت كريمة ودلفت للداخل لتجهز طلب غنام بينما دخل خلفها وليد وزوجته رحاب بخطوات ثقيلة ومحبطة.
ــــــــــــــــــــــــــــــــــــــ**

في منزل فايز... 
كان الجو كالعادة مشحوناً بالمشاكل والخناقات الصغيرة بين الأخوات خاصة في ظل غياب والدهم خارج المنزل.

كانت موج تجلس بطفش أمام التلفاز ناهيكِ عن كثرة حديث ليلى المعتاد وضجيجها.

ليلى (بصوت باكٍ ومحباط): يا ماي الله يخليكي قولي لها حاجة!

سعدية (بقلة صبر): اقعدي يا ليلى النهار كله كلام كلام.. يا بتي حرام عليكي هدّي شوية!

ليلى (بزعل وإصرار): مش هالبسها ولما ياجي أبوي هقوله!

موج (بدون أن تلتفت لها): والله لو مشيتي على رأسك ما هغيرها أنا خدامة عندك إياك؟! 
مالها الشنطة زينة وزي الفل وفيها خمسة سُدس ودبدوب في الجنب أهه!

ليلى (بغيظ): ما هو الدبدوب ده اللي هيجلطني أنا رايحة الحضانة يا ناس!

خلود (بتدخل ومكر): اخلعيه طيب منها أو ادهالي وخدي شنطتي!

ليلى (برفع حاجب): صيدي في المية العكرة أنتِ كمان! 

ثم التفتت إلى موج بغضب قائلة:
ليلى: موج بكرة ترجعيها سامعة ولا له؟!

موج (بلامبالاة وسخرية): بتهددي مين يا بت أنتِ؟! والله ما ماسكاكِ لفرسك غوري ضيعتي عليا الفيلم!

ليلى: مش وراكي غير الزومبي يارب يمسكك زومبي يا موج ياكل فخدتك!

خلود (بضحكة): اشمعنى الفخدة يعني؟!

ليلى: معرفش جت معاي كده عشان كبيرة ويشبع! 

ضحكت خلود بصوت عالٍ بينما نظرت موج لأمها بحسرة وقالت:
موج: شايفه يا ماي عشان لما أضربها بتزعلي وتلومي عليا!

سعدية (وهي مندمجة بالكامل مع أحداث فيلم الزومبي): هو هو بقى الـ "زولي" ده مرض يعني؟! ليه بياكلوا بعض ما ياكلوا فروج ولا حتى معيز حتى لحم البني آدم بيقولوا طعمه مر وقاسي!

نظرت موج نحو خلود باستغراب وضحك ثم قالت:
موج: ياكل فروج؟! اه يا ماي مرض.. بس مين اللي ضاق وقالك لك إن لحم البني آدم طعمه مر؟!

سعدية (بضيق وشاخصة في الشاشة): إيه.. بس اسكتي مش عارفة أسمع منك!

صمت الجميع فجأة للاندماج في أحداث الفيلم المشتعلة.. وفجأة رنّ هاتف موج نظرت إلى ألاسم المكتوب على الشاشة فانتفضت من مجلسها فوراً ودق قلبها بقوة.

خلود (بدهشة): مالك نطيتي كده ليه مين بيكلمك؟!

موج (بارتباك وسرعة): دي.. دي دميانة هكلمها جوة عشان الصوت والدوشة هنا.
ـــــــــــــــــــــــ**

دلفت مسرعة إلى الغرفة لكن للأسف انتهى الاتصال قبل أن تتمكن من الإجابة!
جلست على أطراف الفراش بضيق من ضياع المكالمة لكن سرعان ما ارتسمت على شفاهها ابتسامة دافئة ومغرورة:

موج: وه ده هياخد عليا بقى لازم أوقفه عند حده.. اه بلاها قلة حيا ولا عشان ولد الحاكم يعني؟!

تبسمت بدلال وغنج وهي تفرُد أصابع يدها وتضمها واحداً تلو الآخر عدّاً:
موج: له.. له.. له.. له.. له خمسة له ده واقع لشوشته بس بصراحة جمالي ما يتقاومش.. معذور!

رنّ الهاتف في يدها مرة أخرى ففزعت وأجابت سريعا تحاول ضبط نبرة صوتها:
موج: ألو..

جلال (بنبرة هادئة ورزينة): أيوه.

صمتت موج تنتظر أن يكمل حديثه فواصل جلال بصوته الرخيم:
جلال: أنتِ طالعة بكرة صح؟

موج: فين الشغل؟ اه..

جلال: طيب عاوز أشوفك.

لم تجب موج في بداية الأمر لشدة دهشتها؛ فقلبها بدأ يطرق ضلوعها بشدة فتحدث جلال مرة أخرى يتفقد صمتها:

جلال: إيه.. مالك؟

موج (بارتباك وحيرة): مفيش.. بس ما ينفعش يعني!

قاطعها جلال بنبرة قاطعة تحسِم خوفها:
جلال: ما تقلقيش.. عادي في سكتك وأنتِ معاودة. لولا الموضوع مهم ما كنتش هقول لك أشوفك.

موج (بفضول وتوجس): خير طيب قول دلوك!

جلال: له ما ينفعش.. لما أشوفك.

موج (بتسليم مأخوذ): ماشي.

جلال (بتحذير وغيرة غير ومباشرة): ويا ريت تكوني لحالك.. بلاها واد خالتك حتى لو أخوكي في الرضاعة مشيكم سوا مش زين.. وهزار ومسخرة قدام الناس!

موج (باندهاش واستنكار): هزار؟ هزار إيه؟!

جلال (باقتضاب ليغلق ): مش مهم.. يلا سلام.

أغلق الهاتف بينما جلست موج مكانها تتأمل الشاشة المظلمة وأفكارها تتخبط في حديثه والفضول يحرقها لمعرفة هذا الأمر المهم وغيرته التي حاول مواراتها خلف نبرته الصارمة!

تنهدت موج وقالت وهي تلقي هاتفها بجانبها:

موج: والله الحيرة دي وحشة على صحتي كنت عايشة في مية البطيخ لغاية ما ظهر الراجل ده.. خلي نص يومي تفكير وشرود ربنا يستر..

عادت موج مرة أخرى لتكمل ليلتها مع أمها وأخواتها وسط ضحكاتهم الخفيفة ومناقشاتهم العائلية بينما ظلت رأسها شاردة في موعد الغد وتلك الغيرة غير المباشرة التي أطلت من بين كلماته.
ـــــــــــــــــــــــــــــــ**

في الطرف الآخر...
كان جلال يجلس في مكتبه والهدوء يلف المكان من حوله إلا من صوت أفكاره التي تتلاطم في رأسه. يتطلع إلى الغد بفارغ الصبر ليرى موج ومحدثاً نفسه بنبرة يملؤها الهم والتفكير العميق:

جلال: المشكلة إنها قوية ومش سهلة واصل.. مخابرش كيف هقنعها بالجواز من ورا أبوها وقبل ما شاهين يعمل لها حاجة.. طالما اتخلص من الدكتورة وسكتها للأبد يبقى أطماع مخه كبرت وأكيد جواه مصيبة تانية بيخطط لها!

مسح على وجهه بتعب وهو يتنهد بضيق ثم تابع حديثه الداخلي:

جلال: لازم أخلص من موضوع حمايتها الأول عشان أفضى لشاهين.. وأحاسبه على كل حاجة واحدة واحدة وعلى مهل.

عارف إنها هتتمنع وترفض وتصعبها عليا.. بس هحاول وأمري لله يمكن تقتنع وتفهم إن ده الحل الوحيد اللي هيحميها!

أتى إليه "هاني" بخطوات هادئة وجلس بجواره في صمتٍ ثقيل يخيم عليه العتب.

لاحظ جلال وجوم صديقه فقال بنبرة دافئة محاولاً تلطيف الجو:
جلال: ما تزعلش يا عم هاني.

هاني (بجفاء وتظاهر بالجهل): على إيه؟!

جلال (بابتسامة خفيفة): عامل مش فاكر وأنت حتى ما رميتش السلام!

هاني (بتنهيدة جافة): اه صوح.. مساء الخير.

جلال: عارف إني زودتها معاك بس كنت مضايق والظروف كانت شديدة.

هاني: عادي ولا يهمك.. المهم دلوك إيه أخبارك أنت؟

جلال: والله أخباري معقولة.. زي كل يوم.

اعتدل هاني في جلسته واقترب منه بنبرة جادة وهو ينقل له المستجدات:
هاني: طلعوا تاني.. بس الواد ما لحقهمش!

جلال (بعقد حاجبيه واهتمام): ليه؟!

هاني: على ما عدى في المعدية وراهم كانوا اختفوا في الناحية التانية!

جلال (بنظرة شاردة وتفكير عميق): بينهم سر كبير هما الاتنين.. بس نعرفه كيف مخابرش المهم دلوك ورايا مصلحة أخلصها الأول وأروق لهم على مهل.

التفت هاني ونظر إليه بفضولٍ وشغف حقيقي:
هاني: مصلحة إيه؟!

جلال (بهدوء وثبات): أجوز.

هاني (بسعادة وتهليل): هووووي له الموضوع كبير بقى احكي يا عم البيه!

جلال (بابتسامة مكتومة): أحكي إيه تاني ما بقول لك أهو.. هجوز!

هاني: اه يعني فين التفاصيل؟ ميتا الجواز ولقيت العروسة فين؟ عاوز أعرف!

جلال (بجدية وابتسامة راضية): إن شاء الله ربنا يسهل وهتعرف كل حاجة.. دلوك نَيّم فضولك شوي!

هاني (بضحكة خفيفة): حلو الغموض برضه!

جلال: هه.. غموض وماله!

هاني (بصدق ونخوة أخوية): مش مهم كل حاجة تهون.. المهم تكون واخد الخطوة دي جد المرادي!

جلال (بنبرة قاطعة وعينين تلمعان بالإصرار): إن شاء الله جد المرة دي.. وما هرجعش فيها واصل
ـــــــــــــــــــــــــــــــــــــ**

مرّ الليل وأشرق صباح اليوم التالي..

وصلت موج إلى العمل وبدأت في التنظيف بهمة ونشاط تدندن بأغنية قديمة ببهجة وسعادة غير طبيعية ملأت المكان حيوية.

كانت الخالة زينب تتابع تحركاتها باستغراب ومحبة وارتسمت على وجهها ابتسامة دافئة دون أن تسألها مباشرة عن سر هذه السعادة التي تزين ملامحها.

التفتت موج بالصدفة ورأتها تبتسم لها فقالت بمشاكسة ولطف:
موج: مالك يا خالة نفسك تقولي لي مالك.. صوح؟!

زينب (بضحكة خفيفة): والله نفسي ده غير كمان مش الروقان وبس.. النهاردة جاية ملوّنة شوية عن اللبس الكاتم بتاعك!

نظرت موج إلى ثيابها باحراج محبب وقالت:
موج: فين ده عادي.. بعدين دي مش هدومي ده لبس خلود خدته من وراها!

زينب: اه.. عشان كده ألوانه زينة برضه ما قولتيش فيه إيه؟!

موج (بابتسامة عريضة): مفيش.. عادي بحاول أفرح روحي شوية يمكن النحس ينفك وأتجوز ولا حاجة!

زينب (بغمزة ومكر لطيف): يمكن ولا انفك صوح يا بنت سعدية؟!

موج: يا ريت كنت فرحتك معايا أول واحدة!

زينب: يمكن أمك قالت لك ما تقوليلش قدامي لما الموضوع يتم ولا حاجة؟

موج (بضحكة عالية من قلبها): أمي له دي لو جالي عريس مش بعيد تطلع تنادم في الجوامع وتخبر الجزيرة كلها!

زينب (بصدق ودعاء من القلب): ربنا يروق بالك بابن الحلال اللي يصونك إن شاء الله.

موج: إن شاء الله يا خالة.. دعواتك معايا.

زينب: بدعي لك والله من غير ما تقولي.

أكملتا حديثهما وعملهما معاً بروح طيبة.. 
ــــــــــــــــــــــــــــــــــــــ**

وفي الطرف الآخر كان جلال يجلس بانتظار مرور الوقت يعتصر هاتفه بين يديه وينتظر لحظة خروجها على أحر من الجمر.

انتهى عملها وتجهزت للخروج والعودة إلى المنزل..
لكن قبل أن تغادر سارت بخطوات بطيئة نحو المرآة ووقفت تعدل هندامها وتضبط طرحتها باهتمامٍ بالغ ولأول مرة بهذه الدقة! 

ابتسمت لرؤية نفسها ثم التفتت وسلمت على الخالة زينب بخجل وغادرت المكان بخطوات حثيثة.

تابعت زينب أثرها بعينين تلمعان بالدهاء وهزت رأسها برفع حاجب وابتسامة محدثة نفسها:

زينب: أول مرة تبص في المراية وتعدل نفسها كدة قبل ما تروح له.. وتقول لي مفيش حاجة قال وحياة أبوي البت دي جاييها عريس وكمان تعرفه وعاجبها.. يا رب لو كلامي صوح تتم جوازتها على خير وتفرح قلبها.
ــــــــــــــــــــــــــــــــــــــ**

سارت بخطواتٍ متثاقلة وخجل يلتف حول قلبها وكانت شجاعتها تتلاشى تدريجياً مع كل خطوة تخطوها رهبةً من فكرة أنه ينتظرها.

​حتى مرت من أحد الشوارع الجانبية الهادئة وقبل أن تنزوي في المنعطف أتاها صوته الرخيم من خلفها بثبات:

جلال: تأخرتي ليه؟!

​التفتت بفزعة وهي تضع يدها على صدرها:
موج: بسم الله الرحمن الرحيم!

​جلال (بنبرة عتاب هادئة): مالك ما أنتِ خابرة إني مستنيكي!

​موج (بتلعثم محرج): اه.. بس مش متخفي كده
​سكت جلال وهو يتفحص مظهرها بتمعن؛ وجهها المشرق وثيابها ذات الألوان المختلفة التي لم يعتد رؤيتها بها من قبل. 

أربكته هيأتها الجديدة وشيء ما اهتز بجنباته بينما خفق قلب موج بشدة وبدأت يداها بالارتعاش خجلاً من نظراته فأنزلت رأسها تشد طرف طرحتها وتعدل من وقفتها بارتباك.

​موج: احم.. ايوه خير سامعة؟!

​أعدل جلال نظره وثبّت عينيه عليها قائلاً بجدية:
جلال: اه طبعاً.. دلوك أبوكي ما كلمكيش على جوازنا مع إني كلمته بنفسي ورحت له دكانه!

​موج (بصدمة خفيفة): اه.. له ما كلمنيش!

​جلال: طيب أبوكي لما رد عليا قال لي إنك أنتِ اللي رفضتيني وقعد بنفسه يامين يقنعك وما وافقتيش!

​تلاشت الفرحة بالكامل عن وجه موج، وحلت محلها دهشة واستغراب شديدان:

موج: يعني إيه أبوي قال كده؟!

​جلال: اه كلمني في التليفون وقالي!

​موج (بنفي قاطع): له بس ده محـ...

​جلال (مقاطعاً إياها برزانة): عارف إنه ما حصلش.. وإنه ما كلمكيش عشان كده جيت دلوك وعاوز رأيك في الموضوع ده.

​موج (بتوجس وحيرة): رأيي في إيه بالضبط؟!

​جلال (بثبات ونبرة قاطعة): نتجوز.

​موج (بيأس واستنكار): كيف يعني وأبوي رفض؟!

​جلال: من وراه.. أنتِ بلغتي دلوك وأكتب عليكي.

​اتسعت عينا موج بذهولٍ تام وشهقت وهي ترجع خطوة للخلف:
موج: إيه من ورا أبوي.. يعني إيه؟!

​جلال (ببساطة يحاول بها تهدئة الحادثة): سهلة.. نكتب وبعدين نخبروه وهيرضى.

​شعرت موج بتضاربٍ عنيف في عقلها بين الذهول والاستغراب وعدم الاستيعاب.. كلماته تتساقط عليها كالصاعقة:

موج: يعني إيه سهلة.. يعني إيه؟!

​جلال: اهدى.. مالك أنا لسه باخد رأيك.

​موج (برفضٍ قاطع ونبرة حادة يغلفها الانكسار): ورأيي عُمر: له مستحيل أعمل كده.. عشان إيه أصلاً أكسر كلام أبوي أنا متلخبطة ودلوك مش عارفة أقول إيه بس... بس لازمن أمشي!

​التفتت مسرعة لتغادر فأمسك بكفها ليوقفها فنفضت يده بقوة وعنفوان:

موج: كررتها كتير.. ما تمسكنيش!

​جلال (بتفهم ورغبة في استيعابها): طيب ممكن تروقي؟ اسكُتي شوية وبعدين نكمل كلامنا.

​موج: مفيش كلام!

​جلال: اسمعي مني.. اهدي دقيقتين وبعدين نتكلم.

​سارت موج خطوتين بعيداً عنه ورفعت يدها تمسح وجهها وتحاول سحب أنفاسها لتهدأ قليلاً ثم عادت ووقفت أمامه ونظرت في عينيه بشرارة نخوة وكبرياء:

موج: اسمع يا جلال بيه.. أنت مقامك كبير في الجزيرة اه بس مقام أبوي عندي يسوى الجزيرة بناسها 

ولو قال لي موتي روحك أعملها.. مش بس جواز أكيد رفضه فيه سبب حتى لو ما قالوش أنا واثقة في قراره وكل حاجة نصيب.. إن شاء الله تلاقي اللي تناسبك ويا ريت ما نتقابلش تاني ولا نتكلم في التليفون!

​جلال (بتنهيدة ثقيلة وهو يشعر بصدقها وعزة نفسها): عارف.. أكيد كلامي صعب لأنك أنتِ مش فاهمة سبب وإني بطلب جوازي منك بالشكل ده.

​موج: صوح ومش لاقية سبب يخليك عاوز تتجوزني من ورا أبوي ولا سبب يخليني أنا أوافق أصلاً!

​اقترب جلال خطوة وقرب نبرته منها بثبات وصدق هز أركانها:
جلال: اسمعي.. فيه سببين؛ أولهم وأهمهم إني عاوز أتجوزك عشان عاوزك وعاوز تكوني مرتي.. تصدقي أو له.

​نظرت له موج بنظرة غريبة وعميقة لا يمكن تفسيرها؛ خليط متضارب بين حزنٍ دفين وسعادة غامرة هزت قلبها بعد سماع اعترافه الصريح بأنه يريدها هي لذاتها.

ظلت موج تنظر إليه دون أن تنطق وكأن عقلهــا توقف عند كلمته وحدها؛ «عاوزك».

كل السخرية التي كانت لديها اختفت وكل الردود تبخرت دفعة واحدة.

موج بصوت خافت: إنت... عاوزني أنا؟

ابتسم جلال ابتسامة صغيرة وقال بثبات:
جلال: أيوه.. إنتِ.

موج: وليه؟

جلال: عشان من يوم ما دخلتي طريقي وأنا كل ما أحاول أبعدك عني ألاقي نفسي بقربك أكتر.

سكت لحظة ثم قال:
جلال: وأنا مش راجل بعرف أقول كلام كتير.. بس عارف حاجة واحدة إني مش عاوز أشوفك لحد غيري.

رفعت موج عينيها إليه وقلبها يخفق بعنف قبل أن تسأله:
موج: والسبب التاني؟!
​
​جلال (بنبرة قاسية ومباشرة كشفت المستور): إن أبوكي هيجوزك لشاهين أخوي

شلت الصدمة لسانها وتجمدت الدماء في عروقها حتى شعرت ببرودة تسري في أطرافها. 

سقطت الكلمة على رأسها كالصاعقة؛ شاهين.. اسم نزل على قلبها ليعصر كل أمل زرعته مكالمته ورجاؤه بالأمس. 
اتسعت عيناها بذهول وثقلت أنفاسها ونظرت إلى جلال بضياع تام وكأنها تحاول استيعاب لغة غريبة لا تفهمها.

تداخلت الأفكار في رأسها كدوامة عاتية وتراوحت مشاعرها في لحظة واحدة بين الخوف والخذلان والحيرة القاتلة؛

هل يكذب جلال ليدفعها إلى موافقته ومجاراته في كتب الكتاب من وراء أبيها.. أم أن أبيها يخطط لشيء لا تدركه وعقد صفقة مع عائلة الحاكم على حسابها؟!

سقطت دمعة محبوسة على وجنتها دون أن تشعر، وهمست بصوت متقطع يخنقه الذهول وعدم الفهم:

موج: شاهين أبوي أنا.. يجوزني لشاهين بيه؟
أنا مش فاهمة حاجة خالص راسي وجعاني.. أنتم عاوزين مني إيه أنت وأخوك؟ 
قبل ما أقابلك كل حاجة كانت زينة وحياتي ماشية حلو حتى لو الناس بترمي كلام عني إني عنّست.. 

ليه من وقت ما شفتك بيحصلي حاجات غريبة؟! وكمان أخوك يبعت لي وأسيب شغلي وأختي اللي عملت حادثة ودلوك جواز أنت وهو في وقت واحد؟!

عيال غنام بيه الاتنين عاوزين يجوزوني أنا.. ليه وعلشان إيه؟! 
حرام عليكم حرام عليك سيبني في حالي وبعُد عني.. أنا مش موافقة ودلوك عاوزه أروح!

التفتت موج لتركض وتغادر فهتف جلال بآخر كلماته بنبرة هزت أركانها:

جلال: صدقيني أنا بحميكي من أخوي ويمكن من أبوكي كمان ومش عاوز أتجوزك حماية وبس.. عاوز أتجوزك عشان حبيتك!..



                 الفصل السابع عشر من هنا 
 
تعليقات
×

للمزيد من الروايات زوروا قناتنا على تليجرام من هنا

زيارة القناة