
رواية جزيرة غراب الوادي الفصل الخامس عشر 15 بقلم سمارة آل حربي
صلوا على النبي 🤍
اللَّهُــمَّ صَلِّ وَسَـــلِّمْ وَبَارِكْ على نَبِيِّنَـــا مُحمَّدﷺ
«وَسَطَ زِحَامِ الأَحْزَانِ وَعَصْفِ الخَطَايَا.. يَبْقَى صَوْتُكِ هُوَ المَلْجَأُ المُنْتَظَرُ وَرُكْنِي الهَادِئ!»
(ضَفَّةُ الأَمَان)
﷽
في اليوم التالي وقت الظهيرة.
كانت موج تتابع عملها، ترتب الأشياء وتنظف المكان بشرودٍ تام وكأن الرياح تعصف بعقلها وتطير بأفكارها كأوراق الشجار في فصل الخريف.
وفجأة توقفت عن الحركة للحظة بذهول صامت وكأن صاعقة ضربت رأسها حين تذكرت ليلة السرداب!
موج (بصوت خفيض وشهقة مكتومة): إيه ده ده أنا ناسية موضوع السلاح خالص يا مرك يا موج.. فاتتني كيف دي؟!
التفتت إليها زينب بقطب حاجبيها وتسقُّط للتفاصيل:
زينب: سلاح إيه يا بت؟!
تداركت موج الموقف سريعاً، وابتلعت ريقها بحرج وتلعثم:
زينب: إيه له.. مفيش سلاح التلميذ!
زينب (بتفحص وشك): إيه.. أنتِ زينة؟!
موج: اه زينة!
أمسكت بالمساحة فوراً وأكملت تنظيف الأرضية بشرودٍ أعمق، بينما دار حوار طريف وحاد داخل عقلها:
موج (تحدث نفسها): اهدي مالك؟ اه حرام ومصيبة كبيرة بس عادي اتجوزيه وخليه يتوب.. اه وماله يتوب على يدك اعتبريه جهاد يا موج وتبقي في ميزان حسناتك!
وفجأة.. ألقت عصا المساحة من يدها بحده وغضب وهتفت بصوتٍ جهوري أرجّ أركان المشغل:
موج: على أساس يعني هتقدري تعملي كدة؟! اه يا قليلة الحيا.. برري برري عشان تتجوزي!
انتفضت زينب رعباً في مكانها وققزت من فوق الكرسي وهي ترتجف وتلتفت حولها بوهل:
زينب: له بقولك إيه.. أنا نجمي خفيف بسم الله الرحمن الرحيم.. أنتِ يا بت بتشوفي خيالات ولا لابسك حد؟!
موج (بتراجع وحرج): له يا خالة ما تخافيش ده أنا بس سرحت شوية!
زينب (وهي تتراجع للخلف برعب): مين هيتجوز أنتِ ولا اللهم احفظنا؟ تقصدي إيه بحديتك ده؟!
موج (بتنهيدة وحسرة): أتجوز إيه بس؟ ده أنا مرّي تقيل يا خالة.. حزني خام!
زينب (بفزع وهي تطرق على صدرها): أعوذ بالله يكتفينا الشر مالك يا بت؟! بقولك إيه.. روحي نص يوم وانا مسامحاكي اشربي حاجة دافية ونامي لك ساعتين!
اقتربت موج من زينب ومالت بنبرة مريبة ومحذرة:
موج: له والنبي.. الخالة زينب طيبة سيبوها تربي عيالها!
شهقت زينب وانتفضت مرعوبة من مكانها لتركض نحو الباب وهي تصرخ هرباً:
زينب: يا مرك يا زينب بسم الله.. بسم الله الرحمن الرحيم!
انفجرت موج ضاحكة بهستيرية وسقطت على الأرض تمسك بطنها من شدة الضحك والألم:
موج: بهزر يا خالة والله.. بهزر!
زينب (وهي تقف عند الباب بعد أن فتحته على مصراعيه وتلتقط أنفاسها): له مش هزار يا موج جسمي قشعر.. فيه حد ويانا هنا؟!
موج: والله بهزر وحياة خالي بهزر وبعدين أنتِ مشغلة قرآن في الراديو أهو.. مالك بس؟!
زينب (بقلة حيلة وضيق): منك لله يا سعدية أنتِ وخلفتك السودا!
موج: وسعدية مالها دلوك بس؟!
زينب (بتفحص حذر): متأكدة إنك زينة؟!
موج: اه متأكدة.. تحبي أقرالك قرآن عشان تطمني؟!
زينب (بتحذير وحسم): مخصوم منك نص يوم على الفزعة دي!
موج (بضحكة مكتومة): انشفي يا خالة.. مالك؟!
زينب: أنشف؟ ده أنا مش هنام الليلة بسببك.. حتى لو بتهزري!
ـــــــــــــــــــــــــــــــــــــــ**
في وقت العصر.
كان جلال قد تهيأ ليخرج من المنزل وبينما كان يهم بالخروج أوقفته نجاة لتسأل عن آخر أخباره:
نجاة: كنت عاوزة أتكلم وياك..
جلال (باستعجال وهو يرتدي ساعته): مش فاضي يا عمتي وراي شغل.
نجاة: ما تخافش.. كلمتين وأمشي.
نظر جلال لساعة يده بنفاذ صبر ثم قال:
جلال: سامحيني يا عمتي مشوار ضروري.. بعدين!
تركها وغادر مسرعاً بخطوات حثيثة.
خرجت إليها خضرة من الداخل وهي تتفحص الأثر بفضول:
خضرة: خير.. ماله متسربع وما عبركيش يعني؟!
نجاة (باعتزاز): براحته.. أنا وولد أخوي حرين!
خضرة (بعتاب وضيق): اه عاجبك عمايل غنام.. مرت وليد زعلانة وتقول بيطلع شغله وياجي متأخر ما بلحقش أتونس بعريسي!
نجاة: متأخر فين؟ ده بياجي أول واحد!
خضرة: حتى لو.. برضه لساه متجوز!
نجاة: معلهش شوية وتزهق منه وتبقى عاوزاه يبيت برة!
خضرة (بزجر): ليه تزهق؟ ولدي فيه عيب إياك؟!
نجاة: له ولدك زي الفل.. بس هنعمل إيه؟ أبوه أمر وهو نفذ وبعدين زيها زي سلايفها ربنا يصلح الحال.
خضرة: آمين يا نجاة.
ـــــــــــــــــــــــــــــــــــــ**
في ذلك الوقت.
كانت موج قد خرجت من عملها متوجهة للعودة إلى المنزل وكان جلال يتظاهر بجولته المعتادة كي يراها وليبدو الأمر في ظاهر الأحوال مجرد صدفة غير مقصودة.
كانت موج تسير في طريقها بخطوات هادئة حتى أتاها صوت هامس ومشاكس من الخلف:
حليم: قلت فيه إنّ في الموضوع!
التفتت موج بطفش وضيق فور معرفتها للصوت:
موج: يا ساتر خير.. نعم؟ أؤمر؟!
سارا سوياً في طريق واحد فنظر إليها حليم بتفحص:
حليم: مش طريق المشغل ده.. كنتِ فين يا بت؟!
موج: وأنت مالك؟ كنت بجيب حاجة بعد الشغل.
حليم: اه.. والحاجة دي من طريق الخالة زينب صوح؟!
موج (بتحذير حاسم): حليم مالكش صالح وأوعاك تتكلم قدام أمي أو حد!
حليم (بخبث): مش هتكلم لو قلتِ.. لو ما قلتِيش هسأل خالتي ومش بعيد جوز خالتي كمان!
موج (بقلة حيلة ونفاذ صبر): اه يا حليم.. كنت عند الخالة زينب طردوني من شغلي وبشتغل عندها دلوك!
حليم (بصدمة): الله.. وأمك ما تعرفش؟!
موج (بتهديد ومزاح حاد): له لسه محدش يعرف.. ولو اتكلمت هجيب بطنك من أولها لأخرها كيف البطيخة!
أكملا سيرهما سوياً يتحدثان بمشاكسة وضحك خفيف حتى قطع طريقهما جلال فجأة!
خرج أمامهما من أحد الطرقات المنزوية محتلاً المشهد بجهامة وجهه.. وقفت موج بتوتر وحرج شديدين فور رؤيته بينما امتحنهما جلال بنظرات ثاقبة صلبة،
وآثار الضحك لا تزال مرتسمة على وجهيهما!
غضب جلال وعَبِست ملامحه بحدة وقسوة لكنه لم يستطع الحديث بحرفٍ واحد أمام حليم فمرّ من جانبهما ببرود جاف وأكمل سيره بشكل طبيعي
تاركاً خلفه جمرة غيرة تشتعل في الخفاء.
التفت حليم خلفه يتفحص أثر جلال بنظرات متعجبة وقال:
حليم: غريب ماله جلال بيه وشه عكر ليه كده؟! وبصلك بَصّة غريبة!
موج (بقلق وتوتر وحرج): إيه بصلي فين ماخدتش بالي!
حليم: له بص.. ما علينا!
موج (تحاول إخفاء ارتباكها): اه مالنا بيه الله يسهل له.
أكملا سيرهما نحو الدار بينما انطلق جلال بحصانه يشق الطريق نحو مقر عمله بحنق وطفش عارم؛ فقد كان حضوره مقصوداً بالكامل كي يرى موج ويتحدث معها لدقائق لكن وجود حليم المفاجئ أفشل مخططه وأجج نيران الغيرة في صدره!
ــــــــــــــــــــــــــــــــــــــ**
وفي المساء.
أتى هاني إليه في مكان عمله بالجزيرة ودخل عليه قائلاً:
هاني: أهه جيت.. خير؟!
جلال (بنفاذ صبر وجمود): عملت إيه فيه جديد؟!
هاني: له.
جلال (بقطب حاجبي وغضب مكتوم): يعني إيه له ما عرفتش فايز وشاهين بينهم إيه؟!
هاني: ما عرفتش قلت لك قبل سابق وبعدين الواد بيراقب من بعيد أكيد مش هيقعد بينهم يتسمع حديتهم يعني!
جلال (بحدة ونبرة هجومية): كلامك كتير ليه يا هاني وشغلك قليل المفروض نعرف كيف يعني؟! أروح أنا أقعد بينهم أتسمع على حدياهم ولا أعمل إيه؟!
هاني (باستغراب وتفحص): مالك يا جلال فيك حاجة؟!
جلال: فيا إيه زهقان وضايق لما أكون قاعد ماسك الجزيرة كلها بحرسها في يدي ومش عارف نفرين بيعملوا إيه من وراي.. يبقى أضايق ولا له؟!
هاني: عشان دول مش نفرين عاديين.. ده شاهين بيه!
انتفض جلال واقفاً بغضب عارم أربك المكان حوله وهتف بحنَق:
جلال: يعني إيه زفت بيه؟ بيتخفى يعني ولا حواليه جيش مسلح مش عارفين توصلوا له بقولك إيه.. أنا مروح خلي منعم يطلع مكاني!
ترك المكان فوراً وامتطى ظهر حصانه وغادر بجموح وسرعة على غير العادة بينما ظل هاني واقفاً ينظر في أثره بذهول واستغراب شديدين من طريقته الثائرة وموقفه الهجومي غير المبرر!
ـــــــــــــــــــــــــــــــــــــــــ*"
لم يذهب إلى السرايا بل قاد حصانه نحو ضفة النهر.. نزل وجلس مستنداً إلى جذع إحدى الأشجار يكتنفه الظلام والدجى وينظر إلى صفحة المياه بضيق صدر وعبوس.
أخرج هاتفه وسحب رقم موج ليتصل بها بأي حجة كانت يسألها عن سبب سيرها مع حليم وما كان يجمع بينهما من ضحك
لكنه تراجع في آخر لحظة وقبض على الهاتف بحدة.. تنهد بعمق يحاول استعادة هدوئه ثم أعاد الهاتف إلى جيبه مرة أخرى.
ظل على حاله وقتاً ليس بالطويل حتى سكنت ثورته وهدأ كثيراً ثم ابتسم بسخرية وتهكم على حاله وقال محدثاً نفسه:
جلال: كداب حمادة الصغير لما قال الحب حلو.. الحب زي الزفت!
ثم صمت لثانية يعقد حاجبيه بتفكير عبثي:
جلال: هو كان حمادة الصغير ولا حمادة الوزير؟!
نفث زفيراً حاراً وضرب جلبابه بخفة قائلاً بتذمر:
جلال: والله عال يا جلال هشتغل في المسخرة وتدلدل كيف وليد؟!
ظل جالساً لوقت طويل من الليل بمفرده دون حرس أو رفيق يسائله.. أغمض عينيه واستند برأسه إلى جذع إحدى الأشجار حتى تبدد ظلام الليل الستير وبدأت الشمس تشرق بنورها على الأرض.
فتح عينيه باستغراب وذهول من غفوته التي لم يحسب لها حساباً تنفس الهواء النقي بعمق ثم وقف واعتدل في وقفته ليعدل هندامه وجلبابه.
التفت بنظره نحو جياش حصانه الواقف بالقرب منه وقال بمداعبة عتاب:
جلال: سايبني نايم ليه هنا؟ مش تنبهني ولا بتتفرج على خيبة صاحبك؟!
تبسم قليلاً بقلة حيلة ثم سار نحوه وربت على رقبته بخفة وحنان قبل أن يمتطي ظهره ويمضي به عائداً نحو السرايا.
ــــــــــــــــــــــــــــــــــــــ**
مر الوقت...
وفي المساء في منزل فايز وفي وقت العشاء تحديداً... كانت نظرات موج تلاحق والدها منذ الأمس من حين لآخر تحاول قراءة ما يخفيه وراء صمته حتى انتبه فايز لنظراتها المترددة فأنزل ملعقته وسأل:
فايز: خير يا موج مالك.. عاوزه تقولي حاجة؟!
موج (بارتباك وسرعة): له يا أبوي سلامتك.. مفيش!
سعدية (منقضّة بحدة): أنا اللي عاوزه أقول!
فايز (بتنهيدة ضيق): عاوزه إيه يا سعدية؟!
سعدية: طلعاتك كِترت قوي يا فايز.. طالع النهاردة كمان إياك؟!
فايز: له، مش طالع النهاردة.. ريحي بالك يا سعدية!
سعدية: مش هيرتاح بالي إلا لما اعرف بتروح فين وما تقوليش مصلحة.. عشان الكلمة دي ملهاش لزمة عندي واصل!
فايز (بنفاذ صبر): طيب كملي وكلك.. مش وقت حديت دلوك!
ليلى (بانتهاز الفرصة ومزاح): يا أبوي عاوزه شنطة جديدة.. شنطتي اتقطعت خالص!
فايز: ماشي.. ابقي ادي موج تجيب لك.
ليلى (باعتراض وقمص): ليه موج يعني ما تديني أنا أجيب لنفسي!
فايز (بتحذير وحسم): له.. أنتو تروحوا مكان وتلفوا في مكان له!
ليلى: مش برة والله.. هجيب من هنا من الجزيرة!
فايز: برضه له!
ثم التفت نحو موج وقال بطلب مباشر:
فايز: ابقي هاتي لأختك اللي عاوزاه يا موج.
موج: حاضر يا أبوي..
عادت موج لصمتها واستغرابها الشديد؛ لماذا لم يخبرها بطلب جلال حتى الآن؟ ولماذا يبدو عليه البرود وعدم المبالاة كأن شيئاً لم يكن وظلت تأكل في صمتٍ مريب حتى انتهى العشاء.
ــــــــــــــــــــــــــــــــــــ**
في الجانب الآخر وفي مكانٍ منزوٍ خارج السرايا.
كان جلال يتفقد بعض الأعمال المخفية والسرية قبل انتهاء المساء؛ استعداداً لتسليمها في منتصف الليل.
وفجأة... أتى إليه منعم بخطوات ثقيلة ووجه حزين يكتسيه الهم قائلاً:
منعم: جلال بيه.. عندي اخبار عفشة!
التفت إليه جلال بنظرات ثاقبة ومتفحصة:
جلال: خير يا منعم قول على طول!
منعم (بتردد وألم): الدكتورة إيمان.. اللي شغالة في مستشفى الجزيرة.
جلال (بقطب حاجبي وجدية حادة): هوووه.. مالها اتكلم!
منعم (بأسى): تعيش أنت!
اندهش جلال واتسعت عيناه بذهول وصدمة أرجّت ثباته:
جلال: يعني إيه أعيش أنا تقصد إيه حصل إيه يا منعم وكانت فين؟!
منعم: عملت حادثة شديدة ولسه الخبر واصل دلوك!
جلال: فين دلوك في المستشفى والا في دارهم؟!
منعم: له.. على المغرب جالها كشف مستعجل برة الجزيرة وطلعت ليه ومعاها حد تبعنا من الحرس وبعدين وهي راجعة حصل اللي حصل!
جلال (بنبرة تشوبها الريبة والشك): يعني إيه كشف مستعجل برة الجزيرة ومن مِيتا بتكشف برة اصلاً أنت بتقول إيه؟!
منعم: اللي حصل يا بيه.. قالوا لما عرفت الحالة تعبانة صممت تروح عشان أجلها!
صمت جلال لثوانٍ يتأمل الحديث وغير مصدق لما يسمعه ثم سأل بنبرة قاطعة:
جلال: فين دلوك؟!
منعم: لسه في مستشفى برة مستنيين يخلصوا الإجراءات عشان يجيبوها.
جلال (بحزم وسرعة): طيب يلا نطلع علي هناك لازم اعرف فيه إيه بالظبط.. كلم هاني الأول يياجي مكاني هنا!
ـــــــــــــــــــــــــــــــــــــــــ**
وبعد وقتٍ قليل
خرج جلال من الجزيرة بصحبة منعم متوجهاً إلى المشفى لينظر في هذا الأمر الذي أشعل الشكوك والريبة في رأسه!
عندما وصل جلال إلى المشفى كانت الأجواء حزينة للغاية وتعلوها صرخات وبكاء أسرة الطبيبة الراحلة وهم ينتظرون تصريح الخروج لنقل جثمانها إلى الجزيرة لدفنها.
حاول جلال مواساة والدها وأهلها بكلماتٍ متزنة ثم توجه نحو الحارس المكلف بمرافقتها وتوصيلها بعدما أنهى الإدلاء بأقواله لدى الشرطة.
أخذه جلال جانباً بعيداً عن الأعين وسأله بنبرة حادة ونافذة:
جلال: احكيلي إيه اللي حصل من الأول بالظبط؟!
الحارس (بارتباك وأسى): مخابرش يا بيه.. أنا شيعولي قالولي اطلع مع الدكتورة ضروري لكشف مستعجل برة الجزيرة طلعت وياها واستنيت لما خلصت.
جلال (مقاتعاً بنبرة تفحصية): الكشف كان فين؟!
الحارس: هنا يا بيه.. في المستشفى دي.
جلال: يعني إيه هنا مش فيه دكاترة هنا.. المهم كان فيه حد تعبان صوح؟!
الحارس: اه يا بيه حتى وقت ما الشرطة سألت عن الست اللي كشفت عليها الدكتورة جابوها وكانت تعبانة صوح!
جلال: كمل.
الحارس: بس كشفت عليه وأنا كنت منتظرها برة.. وبعد ما خلصت طالعة من المستشفى بتعدي الطريق ناحيتي عشان نعودوا الجزيرة جه موتوسيكل سريع خبطها خبطة شديدة جريت عليها والناس ساعدوني وطلعوا دكاترة من المستشفى نقلناها جوة تاني.. بس قدر ربنا الخبطة كانت قوية وماتت على طول!
جلال (بعقد حاجبي وشك): مسكوا اللي خبطها؟!
الحارس: اه عيل طايش وشكله كان مبلبع حاجة.
جلال: ماشي.
ترك جلال الحارس وعقله يئن بالأسئلة والظنون غير مصدق إطلاقاً أن الأمر مجرد صدفة؛ فالشكوك كلها تتمحور حول "شاهين" وحده جلس على إحدى مقاعد الاستراحة يتذكر تهديده لشاهين بطفله من وعد
وتلك الطبيبة هي الشاهدة الوحيدة والرئيسي على الأمر منذ البداية.. لكنه لم يُرد أن يسبق الأحداث قبل أن يمتلك الدليل القاطع.
وقف جلال ليساعد في إنهاء إجراءات خروج جثمان الطبيبة سريعاً وبعد فترة عادوا جميعاً إلى الجزيرة حيث أُقيمت صلاة الجنازة ومراسم الدفن التي استمرت لوقتٍ طويل من الليل..
وحتى حلول الصباح لم يترك جلال الأمر لحظة واحدة؛ بل انتقل مباشرة إلى مستشفى الجزيرة وتحديداً قسم النساء والتوليد ليتفحص ما حدث ودوافع خروج الطبيبة قبل رحيلها المفاجئ.
بدأ يسأل هنا وهناك حتى وصل إلى إحدى الممرضات التي كان يبدو عليها الحزن الشديد والانهيار؛ لشدة تعلقها وقربها من الطبيبة الراحلة.
جلال (بنبرة هادئة ومواسيّة): البقية في حياتك.
الممرضة (وهي تمسح دموعها): البقية في حياتك أنت يا جلال بيه.
جلال (بتفحص): كنتِ معاها؟
الممرضة: اه، على طول معاها.
جلال: إيه اللي حصل بالضبط؟! وليه طلعت برة الجزيرة؟!
الممرضة: جالها تلفون بحالة تعبانة قوي برة الجزيرة ولازم تروح تشوفها بنفسها بس هي كان عندها كشوفات كتير هنا.
صمتت الممرضة للحظة وترددت في الحديث، ثم أكملت بارتباك:
الممرضة: بس.. وطلعت!
جلال (بعقد حاجبي ونبرة حاسمة): أنتِ ليه سحبتِ نص الكلام!
الممرضة (بتلعثم وسرعة): له هو ده اللي حصل بالضبط!
شعر جلال بأن هنالك شيئاً تُخفيه وراء خوفها فسألها بنبرة ذكية:
جلال: الحارس اللي جالك.. قالك إيه بعد الخبر ما وصل؟!
نظرت الممرضة إليه باندهاش واستغراب فأكمل جلال ليطمئنها:
جلال: قولي ما تخافيش.. إيه اللي حصل بعد ما قالت إن عندها كشوفات كتير؟!
الممرضة ( بقلق): يعني.. ده ما يأذيش المستشفى في حاجة؟!
جلال: إيه هو اللي يأذي المستشفى؟!
الممرضة: أصل الحارس قال لي كده قال لو اتكلمت بالتفاصيل المستشفى هتدخل في سين وجيم ومش بعيد ياخدوني في الرجلين!
تبسم جلال ساخراً بتهكم ومرارة:
جلال: الحارس؟ اه ماشي.. سيبك من كلامه وكملي.
الممرضة: قالت إن عندها كشوفات كتير وحالات ما تقدرش تسيبهم ودلّتهم على دكتورة تاني معرفة برة الجزيرة يطلبوها وقالت إنها زينة ويمكن أشطر منها كمان وخلاص.. وبعدين كلموها تاني قالوا لها الحالة بتموت ومش عارفين يوصلوا للدكتورة التانية
ولازم تلحقها لدرجة إن الست التعبانة كلمتها بنفسها وقعدت تعيط وتترجاها تروح تلحقها.. عشان كده الدكتورة صممت تروح!
جلال: خلاص وصلت.. حد من الحكومة جه هنا صوح؟!
الممرضة: اه وقلنا طلعت عشان الحالة تعبانة باختصار زي ما قالوا لنا.
جلال: ماشي.. روحي لشغلك.
غادرت الممرضة لعملها بينما وقف جلال في مكانه يشعر بقلة حيلة وحزن شديد ينهش صدره على كل ما حدث متيقناً يقيناً قاطعاً أن "شاهين" هو من دبر هذه الخطة الشيطانية وقتل الطبيبة؛ بسبب تهديده السابق له!
تنهد جلال بعمق ونظر إلى الأعلى بحسرة وألم:
جلال: تاني ذنب يتعلق في رقبتك يا جلال؟!
ثم التفت بخطوات ثقيلة ومغادراً المشفى يجر خلفه خيبة جديدة ومرارة لا تنتهي.
عاد إلى المنزل بعد يومٍ طويل وشاق وكان الحزن والوجوم يكسوان ملامحه؛ فشاهين لم يعد يكتفي بمعاداته
بل أصبح أكثر إجراماً ودموية من ذي قبل كان جلال يشعر بإنهاك وذنب يخنق رقبته؛ فلولا تهديده لشاهين بطفل وعد لما التفت لتلك الطبيبة ولا فكر في التخلص منها ليداري قذارته ومخاوفه!
وما إن دلف من باب السرايا حتى وجد شاهين يخرج على عجلة من أمره وما إن رأى وجه جلال بهذه الهيئة والوجوم حتى توقف فوراً وسأله بفضول وخبث:
شاهين: خير؟ مالك يا ولد أبوي زعلان كده ليه؟! قولي وأنا أقلب الدنيا علشانك!
جلال (بنظرة صلبة ونبرة محملة بالمعاني): أنت قالب الدنيا صوح.. بس مش علشاني!
شاهين (بمكر وتباكي): أنا في حالي أهه. وأنت خليك في حالك زي ما اتفقنا!
جلال (بجمود جاف): وماله.. زين ياريت تفضل على الاتفاق!
شاهين: إن شاء الله.. بس تأخرت كده ليه؟ ولا عشان اللي حصل؟!
جلال: اه.. عشان اللي حصل!
شاهين (بتصنّع الأسى والترحم): الله يرحمها ويغفر لها الأجل مكتوب.. ربنا يرحمنا برحمته!
لم يحر جلال جواباً على حديثه المنافق فتركه ودلف إلى الداخل بخطوات متعبة بينما التفت شاهين خلفه يتفحص أثره باستغراب وهو يحدث نفسه بمكر:
شاهين: غريب مال ده؟ كأنها موج اللي ماتت مش الدكتورة بس ليه ما وجهليش أي كلام ولا خطر في باله
على العموم ده المطلوب تبان قضاء وقدر.. والله دماغك حلوة يا شاهين ولسه اللي جاي!
تبسم ضاحكاً بشر ورضا عن نفسه ثم أكمل محدثاً نفسه أثناء مغادرته السرايا:
شاهين: المرة دي جنازة.. الجاي جوازة
ــــــــــــــــــــــــــــ**
أثناء دخول جلال لغرفته بخطوات متعبة بعد ليلة شاقة صادف رحاب في طريقه فرمقته بابتسامة واسعة وبشوشة على غير العادة قائلة:
رحاب: حمد الله على السلامة.
نظر جلال نحوها باستغراب من لطفها المفاجئ ثم أجاب باقتضاب وجمود:
جلال: الله يسلمك.
رحاب (باهتمام مصطنع): داخل على طول يعني؟ مش عاوز حاجة.. أو فطور مثلاً؟
جلال (بعقد حاجبيه): كتر خيرك.. فطران.
التفت جلال باستغراب ودلف إلى غرفته مغلقاً الباب خلفه. في تلك اللحظة خرجت خضرة من الداخل بوجه مشحون بالغضب ونظرات نارية ثاقبة وتوجهت نحو رحاب فوراً:
خضرة (بحدة وزجر): واقفة معاه ليه؟!
رحاب (بتعجب مصطنع): يعني إيه واقفة معاه؟!
خضرة (بغل واحتداد): يعني مالك أنتِ رجع بالسلامة ولا رجع مضروب بعيار؟ فطر ولا له.. إيه دخلك بطلباته؟
رحاب (بشهقة وضربة خفيفة على صدرها): مضروب بعيار يا ساتر ليه كده.. بعيد الشر!
خضرة (بغضب أعمى): شر في عينك ما رديتيش.. أنتِ مالك وماله؟!
رحاب (ببراءة مصطنعة ودفاع): مالي إيه عادي زي أخوي.. ولا مش المفروض أسأل؟!
خضرة (مقاطعة بتهديد): له مش المفروض فيه خدم يلبوا طلباته أنتِ إيه حشرك؟
ده بالذات تبعدي عنه هو وأخوه اللي اسمه يونس خليكي في جوزك وبلاها شغل السهوكة ده وأخوي وأبوي!
رحاب (بانفعال وغيظ): أنا مسهوكة يا مرت عمي والله عيب الكلام ده!
خضرة (بنبرة قاطعة ووعيد): هطنش المرة دي وهسكت.. بس اعلمي إن وليد لو دري هيسوّد عيشتك!
تركتها خضرة ودلفت للداخل بخطوات غاضبة بينما وقفت رحاب تنظر في أثرها برفع حاجب وامتعاض شديد، متمتمة بصوت خفيض وحقد:
رحاب: إيه المَرة دي يا لطيف دي العقربة هيّنة عنها!
ـــــــــــــــــــــــــــــ**
دخل جلال غرفته واستلقى على الفراش بتعبٍ إنهاكي.. كان الضيق يتملكه والتفكير يعصر عقله من كل جانب.. لم يرد الجدال حالياً مع شاهين لكي لا ينتبه ويسرع في الوصول لموج..
حسم أمره وأمسك هاتفه وسحب رقم موج ليتصل بها دون تردد أو تفكير لثانية واحدة.
في تلك اللحظة... كانت موج في منزلهم تتهيأ للذهاب إلى عملها فنظرت إلى شاشة الهاتف وما إن رأت اسمه يتلألأ عليها حتى تبسمت تلقائياً وأشرق وجهها ثم أجابت بنبرة دافئة:
موج: ألو..
جلال (بنبرة هادئة يُخفي وراءها تعبه): عاملة إيه؟!
اتسعت عيناها بذهول واندهش قلبها قبل عقليتها عند سؤاله المباشر عنها لأول مرة؛ فشعرت بسعادة غامرة تسري في أركانها وأجابت سريعا باضطراب حنون:
موج: الحمد لله.. زينة!.